ჩინეთის ფართომასშტაბიანი წვრთნები აღმოსავლეთ ჩინეთის ზღვაში: განახლებული ესკალაცია ტაივანის წინააღმდეგ

პეკინმა აღმოსავლეთ ჩინეთის ზღვაში ფართომასშტაბიანი სამხედრო წვრთნები დაიწყო, რაც მორიგი ესკალაციის მცდელობაა ტაივანის წინააღმდეგ, რომელსაც ჩინეთი საკუთარ ტერიტორიად მიიჩნევს. წვრთნები ფოკუსირებულია ,,სახალხო-განმათავისუფლებელი არმიის” შესაძლებლობების გამოცდაზე და მასში მონაწილეობას 76 სამხედრო თვითმფრინავი და 19 საზღვაო ხომალდი იღებს. ზოგიერთი მათგანი ტაივანის თავდაცვის ზონაშიც შევიდა.

ამ წვრთნების ფარგლებში, ჩინელმა სამხედროებმა გამოაქვეყნეს კადრები, რომლებშიც ნაჩვენებია რაკეტების დარტყმა სამიზნეებზე, მათ შორის აფეთქებების ანიმაციური სიმულაციები ტაივანის ქალაქებსა და სტრატეგიულ ადგილებზე, სადაც განლაგებულია სამხედრო ბაზები და პორტები.

ჩინეთის კამპანიები ტაივანის წინააღმდეგ 2024 წლის არჩევნების შემდეგ კიდევ უფრო გააქტიურდა. პეკინმა ტაივანის პრეზიდენტს, ლაი ცინგ დეს ,,სეპარატისტი“ და ,,პარაზიტი” უწოდა. ფართომასშტაბიანი წვრთნები, რომლებიც ბლოკადების სიმულაციას ახდენდნენ, დაემთხვა აშშ-ის თავდაცვის მდივნის, პიტ ჰეგსეთის ვიზიტს აზიაში, რომელმაც მკაცრად გააკრიტიკა პეკინის სამხედრო აგრესია.

ტაივანის საპრეზიდენტო ოფისის სპიკერმა X-ზე განაცხადა, რომ ჩინეთის აშკარა სამხედრო პროვოკაციები არა მხოლოდ ტაივანის სრუტეში ქმნის უსაფრთხოების გამოწვევებს, არამედ მთელ რეგიონში ძირს  უთხრის მას. წვრთნები ავსტრალიის, ახალი ზელანდიის, იაპონიის, კორეის, ფილიპინებისა და სამხრეთ ჩინეთის ზღვის (SCS) სიახლოვეს ტარდება, რომელიც მნიშვნელოვან და სადავო წყლებს წარმოადგენს, რომელზეც ჩინეთი აცხადებს პრეტენზიას.

ჩინეთის ზღვაში მიმდინარე ფართომასშტაბიანი წვრთნების გამო, ამერიკის შეერთებულმა შტატებმა, იაპონიამ და ევროკავშირმა შეშფოთება გამოთქვეს. აშშ-ს სახელმწიფო დეპარტამენტის მიერ გამოქვეყნებულ განცხადებაში ჩინეთის სამხედრო ნაბიჯებია გაკრიტიკებული, სადაც ვკითხულობთ, რომ პეკინის ქმედებები ,,აძლიერებენ დაძაბულობას და რეგიონულ სტაბილურობას უქმნიან საფრთხეს.” ევროკავშირმა კი ტაივანის სრუტის სტატუს კვოს ნებისმიერ ცალმხრივ და დიდ ცვლილებასთან თავისი წინააღმდეგობრივი პოზიცია კიდევ ერთხელ დაადასტურა.

ჩინეთმა ბოლო წლებში მრავალი დიდი სამხედრო წვრთნა ჩაატარა  ტაივანის გარშემო, აგრეთვე, ხშირად ახორციელებდა ბლოკადებსა და შეტევებს. წვრთნები Strait Thunder-2025A ხაზს უსვამს პეკინის მზარდ სამხედრო ძალას და მის მზადყოფნას, თავისი ძალაუფლების დემონსტრაცია მოახდინოს რეგიონში, რაც შესაძლო სამომავლო კონფლიქტებთან დაკავშირებით ძლიერ შეშფოთებას იწვევს.

Scroll to Top