იზიტის ერთ–ერთი მნიშვნელოვანი თემა სატრანსპორტო და ლოგისტიკური ინფრასტრუქტურა იყო. 23 აპრილს მარიამ ქვრივიშვილი ჩინეთის ეროვნული განვითარებისა და რეფორმების კომიტეტის თავმჯდომარის მოადგილე ჭოუ ჰაიბინს შეხვდა. საქართველოს ეკონომიკის სამინისტროს ცნობით, მხარეები შეთანხმდნენ დიალოგის მექანიზმის შექმნაზე, რომელიც საქართველოში, განსაკუთრებით ტრანსპორტისა და ლოგისტიკის სექტორში, ჩინური ინვესტიციების მოზიდვას შეუწყობს ხელს.
ამავე შეხვედრაზე განიხილეს შუა დერეფნის საკითხი და საქართველოს როლი, როგორც ჩინეთსა და ევროპას შორის დამაკავშირებელი სატრანზიტო ქვეყანა. ამ კონტექსტში ანაკლიის პორტი დასახელდა სტრატეგიულ პროექტად, რომელსაც მნიშვნელობა ექნება როგორც საქართველო–ჩინეთის თანამშრომლობისთვის, ისე შუა დერეფნის პარტნიორი სახელმწიფოებისთვის.
ანაკლიის პორტის საკითხს ვიზიტამდე საქართველოს პრემიერ–მინისტრი ირაკლი კობახიძეც გამოეხმაურა. როდესაც ჟურნალისტების მიერ საქართველოსა და ჩინეთს შორის თავისუფალი ვაჭრობის შეთანხმებაში ცვლილებებთან დაკავშირებით დასმულ კითხვას უპასუხა:
„ყველა თემაზე იქნება საუბარი, მათ შორის, ანაკლიის თემაზეც. ბუნებრივია, ესეც არის ამ ვიზიტის ერთ–ერთი მიზანი. მოლაპარაკებები გრძელდება“.
ანაკლიის ღრმაწყლოვანი პორტი საქართველოს მნიშვნელოვან სტრატეგიულ და ინფრასტრუქტურულ პროექტად მიიჩნევა. 2024 წელს პროექტის კერძო პარტნიორის შერჩევის პროცესში საბოლოო წინადადება ჩინურ–სინგაპურულმა კონსორციუმმა წარადგინა, თუმცა შეთანხმების შესახებ ოფიციალური განახლება ამ დრომდე არ გავრცელებულა.
ვიზიტის პრაქტიკული შედეგი ავიაციის მიმართულებით გამოიკვეთა. ქვრივიშვილსა და China Eastern Airlines-ის ხელმძღვანელებს შორის შეხვედრის შედეგად, ავიაკომპანია 15 ივლისიდან შანხაი–თბილისი–შანხაის პირდაპირ რეისებს კვირაში სამჯერ შეასრულებს.
პარალელურად, ქართულმა დელეგაციამ China Southern Airlines-თან პეკინი–თბილისის და ჩინეთის სხვა ქალაქებიდან საქართველოს მიმართულებით პირდაპირი რეისების დაწყების შესაძლებლობა განიხილა. შეხვედრებზე ყურადღება სატვირთო გადაზიდვებსაც დაეთმო, მათ შორის შუა დერეფნის ფარგლებში რეგიონული სატვირთო ჰაბის განვითარებასა და China Southern Cargo-სთვის საქართველოს სატრანსპორტო ინფრასტრუქტურაზე წვდომის შესაძლებლობას.
ვიზიტის ფარგლებში მარიამ ქვრივიშვილი China ZhenHua Oil-ის თავმჯდომარე ვანგ იუტაოს შეხვდა, სადაც მხარეებმა საქართველოში ნავთობისა და გაზის მოპოვების შესაძლებლობებზე იმსჯელეს. ჩინურმა მხარემ საქართველოს ენერგეტიკულ სექტორში ინვესტირების ინტერესი გამოხატა.
ქვრივიშვილი ასევე Geo-Jade Petroleum Corporation-ის თავმჯდომარე ჰუანლონგ ჩენს შეხვდა. ეკონომიკის სამინისტროს ცნობით, ქართულმა მხარემ კომპანიას საქართველოს საინვესტიციო გარემო გააცნო, ჩინურმა მხარემ კი ნავთობისა და გაზის სექტორით დაინტერესება დააფიქსირა.
ტექნოლოგიური და ციფრული ეკონომიკის მიმართულებებით, მარიამ ქვრივიშვილი Xiaomi Corporation-ის წარმომადგენელს შეხვდა და კომპანიას საქართველოში CKD საწარმოს შექმნისა და ქვეყნის რეგიონულ ლოგისტიკურ პლატფორმად გამოყენების შესაძლებლობა შესთავაზა.
ამასთან ერთად, ქვრივიშვილს ჩინეთის კიბერსივრცის ადმინისტრაციის დირექტორ ჭუანგ ჟუნგვენთან ჰქონდა შეხვედრა. მხარეებმა საქართველოს, როგორც აზიისა და ევროპის დამაკავშირებელი ციფრულ–სატრანზიტო ჰაბის როლი, მონაცემთა ცენტრების განვითარება და ხელოვნური ინტელექტის გამოყენების შესაძლებლობები განიხილეს.
ვიზიტის ფარგლებში დაწყებული მოლაპარაკებები ენერგეტიკისა თუ ტექნოლოგიების სფეროში ჩინეთთან ეკონომიკური თანამშრომლობის გაღრმავებას ისახავს მიზნად, თუმცა პროცესის შემდგომი ეტაპი მხარეების მიერ განხილული ინიციატივების პრაქტიკულ იმპლემენტაციას გულისხმობს.
