ერთი ახალი ამბავი

პეკინი აშშ-ის ახალ კანონპროექტს აკრიტიკებს და საპასუხო ზომებით იმუქრება

ერთი ახალი ამბავი / /

ჩინეთმა მკაცრად გააკრიტიკა აშშ–ის სენატში წარდგენილი კანონპროექტი, რომელიც რუსეთის ენერგორესურსების უმსხვილეს მყიდველ ქვეყნებს 100%-მდე ტარიფების დაწესებით ემუქრება. პეკინში განაცხადეს, რომ ჩინური კომპანიებისა და მოქალაქეების ინტერესების დასაცავად „აუცილებელ ზომებს“ მიიღებენ.

ჩინეთის საგარეო საქმეთა სამინისტროს პრესსპიკერმა ლინ ძიანმა 15 ივლისის ბრიფინგზე განაცხადა, რომ პეკინი მტკიცედ ეწინააღმდეგება ცალმხრივ სანქციებს, რომლებსაც საერთაშორისო სამართლებრივი საფუძველი და გაეროს უშიშროების საბჭოს ავტორიზაცია არ გააჩნია.

ჩინეთის განცხადება 14 ივლისს აშშ–ის სენატორების მიერ წარდგენილ კანონპროექტს მოჰყვა. ინიციატივა ამჟამად სენატში განიხილება, თუმცა მასზე კენჭისყრა ჯერ არ გამართულა. კანონპროექტის ავტორთა განცხადებით, ინიციატივა რუსეთის ენერგეტიკული შემოსავლების შემცირებასა და მოსკოვზე ზეწოლის გაძლიერებას ისახავს მიზნად, რათა უკრაინის წინააღმდეგ ომის გასაგრძელებლად რუსეთის ხელთ არსებული ფინანსური რესურსები შეიზღუდოს.

კანონპროექტი აშშ–ის პრეზიდენტს უფლებას მისცემს, რუსეთის ნავთობისა და ბუნებრივი აირის ხუთ უმსხვილეს შემსყიდველ ქვეყანას 100%-მდე ტარიფები დაუწესოს. სენატის წარმომადგენლების მონაცემებით, რუსული ნედლი ნავთობის მთავარი მყიდველები არიან ჩინეთი, ინდოეთი, სლოვაკეთი, უნგრეთი და აზერბაიჯანი, ხოლო ბუნებრივი აირის უმსხვილეს იმპორტიორებს შორის ჩინეთთან ერთად საფრანგეთი, იაპონია, უნგრეთი და ბელგიაც სახელდებიან.

როგორც რუსული ენერგორესურსების ერთ–ერთი უმსხვილესი შემსყიდველი, ჩინეთი კანონპროექტით გათვალისწინებული შესაძლო შეზღუდვების უშუალო სამიზნედ ექცევა, რაც პეკინის მკვეთრი რეაქციის მთავარ საფუძველს წარმოადგენს.

კანონპროექტის მიღების შემთხვევაში, უკრაინის ომთან დაკავშირებული ამერიკის სანქციების პოლიტიკა უშუალოდ შეეხება აშშ–ჩინეთის სავაჭრო ურთიერთობებსაც. ვაშინგტონი რუსეთის ენერგეტიკულ სექტორზე ზეწოლის გაძლიერებას მისი ძირითადი სავაჭრო პარტნიორების წინააღმდეგ ტარიფების გამოყენებით შეეცდება, პეკინი კი მოსკოვთან ენერგეტიკულ თანამშრომლობას საკუთარი ეკონომიკური ინტერესებისა და ენერგეტიკული უსაფრთხოების ნაწილად განიხილავს.

შესაბამისად, ინიციატივამ შესაძლოა არა მხოლოდ რუსეთზე სანქციებით ზეწოლა გააძლიეროს, არამედ აშშ–სა და ჩინეთს შორის სავაჭრო და პოლიტიკური დაპირისპირების ახალი მიმართულებაც შექმნას.

პეკინი აშშ-ის ახალ კანონპროექტს აკრიტიკებს და საპასუხო ზომებით იმუქრება Read More »

ჩინეთმა და ყაზახეთმა სავაჭრო და ხელოვნური ინტელექტის სფეროებში თანამშრომლობის გაღრმავება განიხილეს

ერთი ახალი ამბავი / /

13 ივლისს პეკინში ჩინეთის საგარეო საქმეთა მინისტრი ვან ი ყაზახ კოლეგას, ერმეკ კოშერბაევს შეხვდა. მხარეებმა ორმხრივი ვაჭრობის გაფართოება, ტექნოლოგიური თანამშრომლობა, ხელოვნური ინტელექტის განვითარება და საერთაშორისო ფორმატებში კოორდინაცია განიხილეს.

ყაზახეთის საგარეო საქმეთა სამინისტროს ცნობით, შეხვედრაზე მხარეებმა ჩინეთ–ყაზახეთის „მუდმივი ყოვლისმომცველი სტრატეგიული პარტნიორობის“ მიმდინარეობა და ორი ქვეყნის ლიდერების მიერ მიღწეული შეთანხმებების შესრულება შეაფასეს. ეკონომიკურ ნაწილში განსაკუთრებული ყურადღება სავაჭრო ბრუნვის გაორმაგების მიზანს დაეთმო.

შეხვედრა წინ უძღვის შანხაიში 17-20 ივლისს დაგეგმილ მსოფლიო ხელოვნური ინტელექტის კონფერენციასა და გლობალური AI-მმართველობის მაღალი დონის შეხვედრას. ღონისძიებას ყაზახეთის პრეზიდენტი ყასიმ–ჟომარტ ტოკაევიც დაესწრება. ვიზიტის ფარგლებში დაგეგმილია მისი შეხვედრა ჩინეთის პრეზიდენტ სი ძინპინთან.

ვან იიმ და კოშერბაევმა ასევე განიხილეს თანამშრომლობა გაეროს, შანხაის თანამშრომლობის ორგანიზაციის, „ჩინეთი–ცენტრალური აზიის“ ფორმატისა და სხვა მრავალმხრივი პლატფორმების ფარგლებში. ჩინეთის საგარეო უწყების ინფორმაციით, ყაზახურმა მხარემ კვლავ დაადასტურა „ერთი ჩინეთის“ პრინციპისადმი მხარდაჭერა.

მოლაპარაკებების შემდეგ კოშერბაევმა ყაზახეთის მთავრობის სახელით ხელი მოაწერა საერთაშორისო მედიაციის ორგანიზაციის დაფუძნების კონვენციას. ჩინეთის ინიციატივით შექმნილი, ჰონგ–კონგში დაფუძნებული ორგანიზაცია სახელმწიფოებსა და კომერციულ სუბიექტებს შორის დავების მედიაციის გზით მოგვარებას ისახავს მიზნად.

ორგანიზაციის დამფუძნებელი კონვენცია 2025 წლის მაისში ჩინეთმა და 30-ზე მეტმა სახელმწიფომ გააფორმეს. პეკინი მას საერთაშორისო სასამართლო და საარბიტრაჟო მექანიზმების დამატებით ინსტრუმენტად წარმოაჩენს.

ჩინეთმა და ყაზახეთმა სავაჭრო და ხელოვნური ინტელექტის სფეროებში თანამშრომლობის გაღრმავება განიხილეს Read More »

სი ძინპინი ჩინეთსა და ჩრდილოეთ კორეას „სტრატეგიული სიმტკიცის“ შენარჩუნებისკენ მოუწოდებს

ერთი ახალი ამბავი / /

10 ივლისს ჩინეთის პრეზიდენტი სი ძინპინი პეკინში ჩრდილოეთ კორეის მთავრობის მეთაურს, პაკ თაე სონს შეხვდა. შეხვედრა ჩინეთსა და ჩრდილოეთ კორეას შორის მეგობრობის, თანამშრომლობისა და ურთიერთდახმარების ხელშეკრულების გაფორმებიდან 65 წლისთავის წინ გაიმართა.

სი ძინპინის განცხადებით, საერთაშორისო ვითარებაში არსებული არასტაბილურობის ფონზე, პეკინმა და ფხენიანმა „სტრატეგიული სიმტკიცე“ და ურთიერთობების განვითარებისადმი ნდობა უნდა შეინარჩუნონ. მან ასევე მხარეებს მოუწოდა, დააჩქარონ ჩრდილოეთ კორეის ლიდერ კიმ ჩენ ინთან ივნისში მიღწეული შეთანხმებების შესრულება და ორმხრივი ურთიერთობები პოლიტიკური, ეკონომიკური და კულტურული თანამშრომლობის მიმართულებით განავითარონ.

ჩინეთის პრეზიდენტის თქმით, ორ ქვეყანას შორის ურთიერთობების განვითარებამ ხელი უნდა შეუწყოს მათი სოციალისტური სისტემებისა და მოდერნიზაციის პროცესის გაძლიერებას. პაკ თაე სონმა კი სი ძინპინს კიმ ჩენ ინის მოკითხვა გადასცა და განაცხადა, რომ 1961 წელს ხელმოწერილი ხელშეკრულება ჩინეთ–ჩრდილოეთ კორეის ურთიერთობების გრძელვადიანი განვითარების სამართლებრივ საფუძველს წარმოადგენს.

მხარეებმა ასევე დაადასტურეს მზადყოფნა, გააგრძელონ ერთმანეთის მხარდაჭერა და ხელი შეუწყონ რეგიონული მშვიდობისა და სტაბილურობის შენარჩუნებას.

სი ძინპინი ჩინეთსა და ჩრდილოეთ კორეას „სტრატეგიული სიმტკიცის“ შენარჩუნებისკენ მოუწოდებს Read More »

ჩინეთი აშშ-სა და ირანს სამხედრო ესკალაციის შეწყვეტისკენ მოუწოდებს

ერთი ახალი ამბავი / /

ჩინეთმა აშშ–სა და ირანს ძალის გამოყენებისგან თავის შეკავებისა და უთანხმოების მოლაპარაკებების გზით მოგვარებისკენ მოუწოდა. განცხადება პეკინმა მხარეებს შორის სამხედრო დაპირისპირების განახლების შემდეგ გააკეთა.

ჩინეთის საგარეო საქმეთა სამინისტროს პრესსპიკერმა მაო ნინმა 8 ივლისის ბრიფინგზე განაცხადა, რომ საბრძოლო მოქმედებების განახლება არც ერთი მხარის ინტერესებში არ შედის და სამხედრო მეთოდებით დაპირისპირების ძირეული მიზეზების გადაჭრა შეუძლებელია. მისი თქმით, ვაშინგტონმა და თეირანმა სრულად უნდა შეასრულონ მათ მიერ ხელმოწერილი ურთიერთგაგების მემორანდუმი და დავები დიალოგისა და მოლაპარაკებების გზით მოაგვარონ.

პეკინის განცხადებას წინ უძღოდა უძღოდა აშშ–ის მიერ ირანის წინააღმდეგ განხორციელებული თავდასხმების ახალი ეტაპი. ამერიკული მხარის ცნობით, ძალებმა 80-ზე მეტ სამხედრო სამიზნეს შეუტიეს, რაც ვაშინგტონმა ჰორმუზის სრუტეში ნაოსნობის უსაფრთხოების დაცვით ახსნა. ირანმა ამერიკული დარტყმები აგრესიად შეაფასა და საპასუხო მოქმედებები განახორციელა რეგიონში მდებარე ამერიკულ სამხედრო ობიექტებზე.

აშშ–მა და ირანმა ურთიერთგაგების მემორანდუმს ივნისის შუა რიცხვებში მოაწერეს ხელი. შუალედური შეთანხმება საბრძოლო მოქმედებების შეწყვეტას, ჰორმუზის სრუტეში ნაოსნობის ეტაპობრივ აღდგენასა და 60-დღიანი მოლაპარაკებების დაწყებას ითვალისწინებდა, თუმცა მხარეებს შორის ძირითადი სადავო საკითხები, მათ შორის ირანის ბირთვული პროგრამა, საბოლოო შეთანხმებისთვის დარჩა.

განახლებულმა შეტაკებებმა მემორანდუმის შესრულება და რეგიონში უფრო ფართო სამხედრო დაპირისპირების თავიდან აცილების შესაძლებლობა კითხვის ნიშნის ქვეშ დააყენა.

ჩინეთი აშშ-სა და ირანს სამხედრო ესკალაციის შეწყვეტისკენ მოუწოდებს Read More »

ჩინეთი და რუსეთი ერთობლივ საზღვაო წვრთნებს იწყებენ

ერთი ახალი ამბავი / /

ჩინეთმა და რუსეთმა 6 ივლისს აღმოსავლეთ ჩინეთის სანაპიროსთან, ცინდაოს მიმდებარე საზღვაო და საჰაერო სივრცეში, ყოველწლიური სამხედრო–საზღვაო სწავლება „ერთობლივი ზღვა 2026” დაიწყეს. წვრთნები 13 ივლისამდე გაგრძელდება.

„ერთობლივი ზღვა” ჩინეთ–რუსეთის ყოველწლიური სამხედრო–საზღვაო სწავლებაა, რომელიც 2012 წლიდან ტარდება და ორი ქვეყნის სამხედრო თანამშრომლობის ერთ–ერთ რეგულარულ ფორმატს წარმოადგენს.

ჩინეთის თავდაცვის სამინისტროს განცხადებით, სწავლების მიზანია ორი ქვეყნის შეიარაღებულ ძალებს შორის სტრატეგიული კოორდინაციის გაძლიერება, საერთო უსაფრთხოების გამოწვევებზე რეაგირების უნარის დახვეწა და რეგიონული მშვიდობისა და სტაბილურობის მხარდაჭერა.  

წვრთნები მოიცავს საჰაერო და სარაკეტო თავდაცვას, საზღვაო დაზვერვას, წყალზედა სამიზნეებზე მოქმედებასა და კოორდინირებულ ოპერაციებს. სწავლების დასრულების შემდეგ ჩინეთისა და რუსეთის სამხედრო ხომალდების ნაწილი წყნარი ოკეანის განსაზღვრულ რაიონებში ერთობლივ პატრულირებასაც განახორციელებს.  

რუსული მედიის ცნობით, მოსკოვი სწავლებაში წყნარი ოკეანის ფლოტის რამდენიმე ხომალდით მონაწილეობს, მათ შორის სარაკეტო კრეისერით, კორვეტით, დიზელ–ელექტრული წყალქვეშა ნავითა და სამაშველო გემით. ჩინეთის ჩრდილოეთის სარდლობამ კი განაცხადა, რომ წვრთნებში ჩინეთის მხრიდან ჩართულია გამანადგურებლები, ფრეგატი, წყალქვეშა ნავი, მომარაგებისა და სამაშველო ხომალდები. 

იმავე დღეს ტაივანის ეროვნული უსაფრთხოების ბიურომ განაცხადა, რომ ივლისიდან სექტემბრამდე ჩინეთის სამხედრო სწავლების სეზონის დაწყებასთან ერთად ჩინეთის საზღვაო ძალების აქტიურობა მნიშვნელოვნად გაიზარდა და ხელისუფლება განსაკუთრებული ყურადღებით აკვირდება როგორც ჩინეთის, ისე ჩინეთ–რუსეთის ერთობლივ სამხედრო მოქმედებებს. 

ჩინეთი და რუსეთი ერთობლივ საზღვაო წვრთნებს იწყებენ Read More »

ჩინეთმა აშშ-ისა და ევროკავშირის კრიტიკა ახალი ეთნიკური ერთობის კანონის გამო „მავნე ცილისწამებად“ შეაფასა

ერთი ახალი ამბავი / /

ჩინეთმა უარყო აშშ–ისა და ევროკავშირის კრიტიკა ახალი კანონის მიმართ, რომელიც ეთნიკური ერთობისა და პროგრესის ხელშეწყობას ეხება. პეკინმა დასავლელი პარტნიორების შეშფოთება „მავნე ცილისწამებად“ შეაფასა და განაცხადა, რომ კანონი ქვეყნის შიდა სტაბილურობისა და ეროვნული ერთიანობის განმტკიცებას ემსახურება.

Reuters-ის ცნობით, დასავლეთში შეშფოთებას იწვევს კანონის ის ნაწილი, რომელიც ჩინეთის ხელისუფლებას შესაძლებლობას აძლევს, სამართლებრივი მექანიზმები გამოიყენოს იმ პირებისა თუ ჯგუფების წინააღმდეგაც, რომლებიც ქვეყნის ფარგლებს გარეთ იმყოფებიან და რომლებსაც პეკინი ეთნიკური ერთიანობის შელახვას, სეპარატიზმის წახალისებას ან ჩინეთის შიდა საქმეებში ჩარევას დაუკავშირებს.

კრიტიკოსების შეფასებით, კანონი შესაძლოა ჩინეთის ექსტერიტორიული სამართლებრივი ზეწოლის კიდევ ერთ ინსტრუმენტად იქცეს, განსაკუთრებით იმ თემების მიმართ, რომლებიც სინძიანს, ტიბეტს ან სხვა ეთნიკურად მგრძნობიარე რეგიონებს უკავშირდება. აშშ–სა და ევროკავშირში აცხადებენ, რომ ასეთი ჩანაწერები ადამიანის უფლებების, გამოხატვის თავისუფლებისა და საზღვარგარეთ მცხოვრები აქტივისტების უსაფრთხოების თვალსაზრისით დამატებით რისკებს აჩენს.

ჩინეთის ხელისუფლება ამტკიცებს, რომ კანონი არ არის მიმართული კონკრეტული ეთნიკური ჯგუფების წინააღმდეგ. პეკინის პოზიციით, მისი მიზანი ეთნიკურ ჯგუფებს შორის ერთობის გაძლიერება, სოციალური სტაბილურობის დაცვა და სეპარატისტული საქმიანობის პრევენციაა.

ახალი კანონის გარშემო დაპირისპირება კიდევ ერთხელ აჩვენებს დაძაბულობას ჩინეთსა და დასავლეთს შორის ადამიანის უფლებების, ეროვნული უსაფრთხოების და ჩინეთის შიდა პოლიტიკის საერთაშორისო გავლენებთან დაკავშირებულ საკითხებზე.

ჩინეთმა აშშ-ისა და ევროკავშირის კრიტიკა ახალი ეთნიკური ერთობის კანონის გამო „მავნე ცილისწამებად“ შეაფასა Read More »

ვანგ იმ აშშ-ს ტაივანის საკითხზე „უკიდურესი სიფრთხილისკენ“ მოუწოდა

ერთი ახალი ამბავი / /

ჩინეთის საგარეო საქმეთა მინისტრმა ვანგ იმ აშშ–ის სახელმწიფო მდივან მარკო რუბიოსთან სატელეფონო საუბარში ვაშინგტონს მოუწოდა, ტაივანთან დაკავშირებულ საკითხებს „უკიდურესი სიფრთხილით“ მიუდგეს. მათ შორის საუბარი 1 ივლისს შედგა.

ვანგ იმ განაცხადა, რომ ჩინეთმა და აშშ–მ უნდა განაგრძონ მუშაობა „კონსტრუქციული სტრატეგიული სტაბილურობის“ ფორმირებისკენ, რათა ორი ქვეყნის ლიდერების მიერ მაისში პეკინში მიღწეული შეთანხმებები პრაქტიკულ პოლიტიკად აქციონ. ჩინეთის საგარეო საქმეთა სამინისტროს თანახმად, ვანგმა განსაკუთრებული აქცენტი ტაივანზე გააკეთა და აღნიშნა, რომ ამ საკითხთან დაკავშირებულმა მცირე ნაბიჯმაც კი შესაძლოა მთლიან ვითარებაზე მოახდინოს გავლენა.

Reuters-ის ინფორმაციით, საუბარი მოჰყვა მაისის შუა რიცხვებში პეკინში გამართულ შეხვედრას ჩინეთის პრეზიდენტ სი ძინპინსა და აშშ–ის პრეზიდენტ დონალდ ტრამპს შორის. სწორედ ამ შეხვედრის შემდეგ ტაივანის საკითხი კვლავ ერთ–ერთ მთავარ საკითხად დარჩა ჩინეთისა და აშშ–ის ურთიერთობებში.

2 ივლისის მდგომარეობით, ვაშინგტონის მხრიდან ამ კონკრეტულ სატელეფონო საუბარზე ოფიციალური კომენტარი არ გავრცელებულა, თუმცა ივნისში მარკო რუბიომ სენატის საგარეო ურთიერთობათა კომიტეტის მოსმენაზე განაცხადა, რომ აშშ–ის პოლიტიკა ტაივანის მიმართ არ შეცვლილა და ვაშინგტონი არსებული სტატუს–კვოს შენარჩუნებას უჭერს მხარს.

იმავე დღეს ტაივანის სანაპირო დაცვამ განაცხადა, რომ ტაივანურმა გემებმა არ უნდა შეასრულონ ჩინეთის სანაპირო დაცვის მხრიდან შესაძლო შემოწმებისა და ბორტზე ასვლის მოთხოვნები. ტაიპეის განცხადებით, საჭიროების შემთხვევაში ტაივანის სანაპირო დაცვის ხომალდები ჩაერევიან, რადგან ჩინეთს ტაივანის წყლებში იურისდიქცია არ აქვს.

სატელეფონო საუბარი აჩვენებს, რომ პეკინი ტაივანის საკითხს არა მხოლოდ ორმხრივ უთანხმოებად, არამედ ჩინეთ–აშშ–ის ურთიერთობების სტაბილურობის განმსაზღვრელ ფაქტორად განიხილავს. ამ ფონზე, მხარეებს შორის კომუნიკაციის გაგრძელება დაძაბულობის მართვის ერთ–ერთ მთავარ მექანიზმად რჩება.

ვანგ იმ აშშ-ს ტაივანის საკითხზე „უკიდურესი სიფრთხილისკენ“ მოუწოდა Read More »

სი ძინპინი ლუკაშენკოს შეხვდა

ერთი ახალი ამბავი / /

ჩინეთის პრეზიდენტი სი ძინპინი 29 ივნისს პეკინში ბელარუსის პრეზიდენტ ალექსანდრ ლუკაშენკოს შეხვდა. შეხვედრაზე პეკინმა ხაზი გაუსვა ბელარუსის სუვერენიტეტის, დამოუკიდებლობისა და ტერიტორიული მთლიანობის მხარდაჭერას.

ჩინეთის სახელმწიფო მედიის ცნობით, სი ძინპინმა განაცხადა, რომ ჩინეთმა და ბელარუსმა უნდა შეინარჩუნონ სტრატეგიული კომუნიკაცია და ხელი შეუწყონ ორმხრივი ურთიერთობების შემდგომ განვითარებას. პეკინის შეფასებით, ორ ქვეყანას შორის ურთიერთობების გაღრმავება ორივე ქვეყნის მოსახლეობის ინტერესებს უნდა მოემსახუროს.

ბელარუსის პრეზიდენტის ადმინისტრაციის ინფორმაციით, ლუკაშენკომ შეხვედრაზე მთავარი აქცენტი ეკონომიკურ და ინდუსტრიულ თანამშრომლობაზე გააკეთა. მან ჩინეთთან თანამშრომლობის ერთ–ერთ წარმატებულ მაგალითად „დიდი ქვის“ ინდუსტრიული პარკი დაასახელა, სადაც ჩინური კომპანიები უცხოური ინვესტიციების მნიშვნელოვან ნაწილს წარმოადგენენ. ლუკაშენკომ ასევე განაცხადა, რომ 2026-2027 წლებში ჩინეთ–ბელარუსის ურთიერთობებში ერთ–ერთი მთავარი მიმართულება ინდუსტრიული თანამშრომლობა იქნება.

სი ძინპინმა ორ ქვეყანას „რკინის მეგობრები“ უწოდა და განაცხადა, რომ ჩინეთ–ბელარუსის ურთიერთობებმა საერთაშორისო გარემოს ცვლილებებს გაუძლო. პეკინის გზავნილი ბელარუსისთვის დიპლომატიური მხარდაჭერის დემონსტრირებაა და აჩვენებს, რომ ჩინეთი აგრძელებს კავშირების გაღრმავებას იმ ქვეყნებთან, რომლებიც დასავლეთის სანქციებისა და პოლიტიკური ზეწოლის ქვეშ არიან.

ამ ფონზე, ბელარუსი სულ უფრო მეტად ეყრდნობა ჩინეთთან და რუსეთთან თანამშრომლობას, როგორც ეკონომიკური, ისე პოლიტიკური და უსაფრთხოების მხარდაჭერის მიმართულებით. სი ძინპინთან შეხვედრამდე ლუკაშენკო პეკინში მოსკოვიდან ჩავიდა, სადაც რამდენიმე დღით ადრე ვლადიმირ პუტინს შეხვდა.

სი ძინპინი ლუკაშენკოს შეხვდა Read More »

ვან ი და აჯიტ დოვალი ჩინეთ-ინდოეთის ურთიერთობების ნორმალიზების პროცესზე შეთანხმდნენ

ერთი ახალი ამბავი / /

ჩინეთის საგარეო საქმეთა მინისტრი და ჩინეთის კომუნისტური პარტიის პოლიტიკური ბიუროს წევრი ვან ი ნიუ–დელიში ინდოეთის ეროვნული უსაფრთხოების მრჩეველ აჯიტ დოვალს შეხვდა. შეხვედრა BRICS-ის ეროვნული უსაფრთხოების მრჩევლებისა და უსაფრთხოების საკითხებში მაღალი რანგის წარმომადგენლების მე-16 შეხვედრის ფარგლებში გაიმართა.

ინდოეთის შეფასებით, შეხვედრა „კონსტრუქციული და მომავალზე ორიენტირებული“ იყო. მხარეებმა განიხილეს ორმხრივი ურთიერთობების ბოლო დინამიკა და აღნიშნეს, რომ ჩინეთსა და ინდოეთს შორის ურთიერთ ობები ეტაპობრივი ნორმალიზაციისკენ მიდის.

ჩინეთის საგარეო საქმეთა სამინისტროს ცნობით, ვან იმა შეხვედრაზე განაცხადა, რომ ჩინეთ–ინდოეთის ურთიერთობები „აღდგენისა და გაუმჯობესების გზას“ დაუბრუნდა. მან ხაზი გაუსვა დიალოგის მექანიზმების აღდგენის აუცილებლობას და თანამშრომლობის გაფართოებას ისეთ სფეროებში, როგორებიცაა ვაჭრობა, ფინანსები, სამართალდაცვითი მიმართულება და მედია.

დოვალმა, თავის მხრივ, აღნიშნა, რომ სტაბილური, პროგნოზირებადი და კონსტრუქციული ურთიერთობები ხელს შეუწყობს ორ ქვეყანას შორის ნდობისა და ურთიერთგაგების განმტკიცებას. ინდური მედიის ცნობით, განხილვის ერთ–ერთი მთავარი თემა იყო ურთიერთობების ნორმალიზება 2020 წლის გალვანის ხეობის დაპირისპირებისა და აღმოსავლეთ ლადაქში მრავალწლიანი სამხედრო დაძაბულობის შემდეგ.

ჩინეთ–ინდოეთის სასაზღვრო ზონაში ვითარება, პეკინის შეფასებით, სტაბილურია და მხარეები საზღვართან დაკავშირებულ საკითხებზე კომუნიკაციას ინარჩუნებენ. უწყების ცნობით, მხარეები მუშაობენ ჩინეთ–ინდოეთის სასაზღვრო საკითხებზე სპეციალური წარმომადგენლების მოლაპარაკებების 25-ე რაუნდის მოსამზადებლად.

2020 წლის სასაზღვრო დაპირისპირების შემდეგ ჩინეთ–ინდოეთის ურთიერთობები მნიშვნელოვნად გაუარესდა, თუმცა ბოლო წლებში დიპლომატიური და სამხედრო არხებით გამართული მოლაპარაკებების შედეგად მხარეებმა დაძაბულობის შემცირებისკენ ნაბიჯი გადადგეს.

ვან ი და აჯიტ დოვალი ჩინეთ-ინდოეთის ურთიერთობების ნორმალიზების პროცესზე შეთანხმდნენ Read More »

ევროპა ჩინეთის საზღვაო მოქმედებებს აკრიტიკებს, ტაიპეი კი თავდაცვის მზადყოფნას აძლიერებს

ერთი ახალი ამბავი / /

ტაივანის აღმოსავლეთით ჩინეთის სანაპირო დაცვის გააქტიურებას დიდი ბრიტანეთი, საფრანგეთი და გერმანია საგანგაშო ნაბიჯად აფასებენ. პარალელურად, ტაიპეი აცხადებს, რომ პოტენციური ჩინური თავდასხმის შემთხვევაში წინასწარი რეაგირებისთვის დარჩენილი დრო სულ უფრო მცირდება.

Reuters-ის ცნობით, 24 ივნისს სამი ევროპული ქვეყნის წარმომადგენლობამ ერთობლივ განცხადებაში აღნიშნეს, რომ ჩინეთის ახალი საზღვაო აქტივობა საფრთხეს უქმნის რეგიონულ სტაბილურობასა და ნავიგაციის თავისუფლებას.

ევროპული ქვეყნების განცხადებას წინ უძღოდა ტაივანის ბრალდებები, რომ ჩინეთის სანაპირო დაცვის გემები კუნძულის აღმოსავლეთით სავაჭრო გემებს აჩერებდნენ, მათგან მარშრუტისა და დანიშნულების ადგილის შესახებ ინფორმაციას ითხოვდნენ და ამ წყლებზე იურისდიქციის პრეტენზიას გამოთქვამდნენ. ტაიპეი ამ ქმედებებს „რუხი ზონის“ ზეწოლის ნაწილად აფასებს.

პეკინი ამბობს, რომ მისი სანაპირო დაცვის მოქმედებები კანონიერია. ჩინეთის განმარტებით, პატრულირება უკავშირდება იაპონიასა და ფილიპინებს შორის საზღვაო საზღვრების საკითხზე დაწყებულ მოლაპარაკებებს, რასაც პეკინი საკუთარი ინტერესების საწინააღმდეგო ნაბიჯად განიხილავს.

ამავე ფონზე, ტაივანმა ხუთდღიანი სამხედრო წვრთნები დაიწყო. Associated Press-ის ინფორმაციით, წვრთნების მიზანია შემოწმდეს, რამდენად სწრაფად შეძლებს ტაივანის არმია მშვიდობიანი რეჟიმიდან საბრძოლო მზადყოფნაზე გადასვლას იმ შემთხვევაში, თუ ჩინეთის რეგულარული სამხედრო აქტივობა მოულოდნელად რეალურ თავდასხმაში გადაიზრდება.

ტაივანის თავდაცვის მინისტრმა ველინგტონ კუმ განაცხადა, რომ ჩინეთის მხრიდან შესაძლო შეტევის წინასწარი ამოცნობის დრო მცირდება. მისი თქმით, სწორედ ამიტომ არის აუცილებელი სამხედრო ძალების სწრაფი მობილიზაციისა და დაუყოვნებელი რეაგირების უნარის პრაქტიკული შემოწმება.

ევროპა ჩინეთის საზღვაო მოქმედებებს აკრიტიკებს, ტაიპეი კი თავდაცვის მზადყოფნას აძლიერებს Read More »

Scroll to Top