ერთი ახალი ამბავი

ახალი გამოწვევები ჩინეთის ეკონომიკისთვის აშშ-ს მზარდი ტარიფების ფონზე

ერთი ახალი ამბავი / /

ჩინეთი, მსოფლიოში სიდიდით მეორე ეკონომიკა, ახალი გამოწვევების წინაშე დგას. ტრამპის ადმინისტრაციის თეთრ სახლში დაბრუნებამდე და ახალი სავაჭრო ტარიფების დანერგვამდე რამდენიმე კვირით ადრე,  ნოემბერში ჩინეთის ექსპორტი უფრო ნელი ტემპით გაიზარდა, ვიდრე წინა თვეში. ასევე დაეცა იმპორტის მოცულობაც.

საექსპორტო გადაზიდვები გაიზარდა მხოლოდ 6,7%-ით გასულ თვეში, რაც ეკონომისტების მიერ მოსალოდნელზე 8,5%-ით დაბალია და ოქტომბრის 12,7%-დან კლების გამოხატულებაა. ამასთანავე, იმპორტი შემცირდა 3.9%-ით, რაც ყველაზე ცუდი მაჩვენებელია ცხრა თვის განმავლობაში და გაცილებით უარესი, ვიდრე მოსალოდნელი 0.3%-იანი ზრდა. ამან გამოიწვია მთავრობის მეტი ქმედებისა და ჩარევისკენ მოწოდებები შიდა მოთხოვნების დასაკმაყოფილებლად. 

აშშ-ს ახლადარჩეულმა პრეზიდენტმა, დონალდ ტრამპმა 26 ნოემბერს გამოაცხადა, რომ დააწესებს დამატებით 10%-იან ტარიფს ჩინეთიდან იმპორტირებულ პროდუქტებზე, რადგან პეკინმა არ შეასრულა დაპირება, რომ  მკაცრად დასჯიდა ყველას, ვინც ხელს  უწყობდა ფენტანილისა და ნარკოტიკების ჩინეთიდან კონტრაბანდას შეერთებულ შტატებში მექსიკის გავლით. ტრამპმა, ასევე, განაცხადა, რომ შესაძლოა ჩინურ საქონელზე 60%-ზე მეტი ტარიფი დააწესოს.

ჩინეთს ასევე ემუქრება სავაჭრო ომში მეორე ფრონტის გახსნის საფრთხე,  ევროკავშირის მიერ ჩინური წარმოების ელექტრომობილებზე დაწესებული 45,3%-იანი ტარიფების გამო.

ჰუ ტიანჩენმა, Economist Intelligence Unit-ის უფროსმა ეკონომისტმა, განაცხადა, რომ “ტრამპის ტარიფების მოლოდინში, მომავალი წლისთვის, ვაჭრობის დატვირთულობის ადრეული ნიშნები გამოჩნდა, მაგრამ სრულ გავლენას ვერ ვიგრძნობთ მომდევნო თვეებამდე, განსაკუთრებით დეკემბერსა და იანვრამდე“.

აშშ-ს ტარიფები ახლა უფრო დიდი გამოწვევა ხდება ჩინეთისთვის, ვიდრე დონალდ ტრამპის პრეზიდენტობის პირველი ვადის პერიოდში. ჩინეთის ეკონომიკა, რომლის მოცულობა 19 ტრილიონი დოლარია, დიდწილად ეყრდნობა ექსპორტს, მაგრამ იმის გამო, რომ უძრავი ქონების კრიზისი ზიანს აყენებს ოჯახებისა და ბიზნესის ნდობას, ექსპორტი ზეწოლის ქვეშ იმყოფება. მიუხედავად იმისა, რომ მწარმოებლებმა განაცხადეს უკეთესი ბიზნეს პირობების შესახებ ნოემბერში, რაც მიუთითებდა მთავრობის სტიმულის გარკვეულ ეფექტზე, მათ ასევე აღნიშნეს საექსპორტო შეკვეთების ვარდნა. 

ამის გამო, ექსპერტებმა მოუწოდეს ჩინეთს, თავი დააღწიოს წარმოებასა და ექსპორტზე ზედმეტ დამოკიდებულებას. მთავრობის ზოგიერთი მრჩეველი თვლის, რომ ჩინეთმა მომავალი წლისთვის უნდა შეინარჩუნოს ზრდის სამიზნე დაახლოებით 5%-ის ფარგლებში. ეს კი, მათი აზრით, შესაძლებელია ისეთი უფრო აგრესიული სტიმულირების ზომების გამოყენებით, რომლებიც მიზნად ისახავს შიდა მოხმარების გაძლიერებას აშშ-ს ტარიფების ზემოქმედების კომპენსაციის მიზნით.

ამ გამოწვევების საპასუხოდ, ჩინეთის ცენტრალურმა ბანკმა სექტემბერში დაიწყო პანდემიის შემდეგ ყველაზე დიდი მონეტარული შემსუბუქება, შეამცირა საპროცენტო განაკვეთები და ეკონომიკაში 140 მილიარდი დოლარი შეიტანა. ჩინეთში ასევე შემცირდა ისეთი საქონლის იმპორტი, როგორიცაა მცენარეული ზეთები და იშვიათი მიწები, თუმცა ზოგიერთზე, როგორიცაა ნედლი ზეთი და სპილენძი, ფასები გაიზარდა.

მთავარი გადაწყვეტილების მიმღები პირები მალე შეხვდებიან 2025 წლის პრიორიტეტების განსახილველად და ინვესტორებს სურთ ნახონ, გადაიტანს თუ არა პეკინი ყურადღებას სამომხმარებლო სექტორის გაძლიერებაზე, რამაც შეიძლება გამოიწვიოს მომავალი ზრდა. ეკონომისტები ელიან, რომ იმპორტი გაიზრდება უახლოეს თვეებში, რადგან ფისკალური პოლიტიკა, სავარაუდოდ, ხელს შეუწყობს მოთხოვნის სტიმულირებას სამრეწველო საქონელზე.

ახალი გამოწვევები ჩინეთის ეკონომიკისთვის აშშ-ს მზარდი ტარიფების ფონზე Read More »

დონალდ ტრამპმა ჩინეთში აშშ-ს შემდეგ ელჩად დეივიდ პერდიუ დაასახელა

ერთი ახალი ამბავი / /

აშშ-ს ახლადარჩეულმა პრეზიდენტმა, დონალდ ტრამპმა ყოფილი ჯორჯიას შტატის სენატორი, დევიდ პერდიუ ჩინეთში ამერიკის შემდეგ ელჩად დაასახელა.

პერდიუს კონგრესში საქმიანობას ჩინური ანალიტიკური ცენტრები „ანტი-ჩინურად“ ახასიათებდნენ. მისთვის ერთ-ერთი მთავარი საკითხი ამერიკული საზღვაო სამხედრო ძალის განვითარება იყო, რაც, ნაწილობრივ, იქიდან გამომდინარეობდა, რომ ჩინეთი მუდმივად აძლიერებდა თავის სამხედრო შესაძლებლობებს. გარდა ამისა, მომავალი ელჩი Washington Examiner-ში გამოქვეყნებულ ესეში ჩინეთზე საუბრობს და ამბობს, რომ თავდაცვისთვის „ამერიკელებმა თავდაპირველად უნდა გაიაზრონ, რომ [ჩინეთის კომუნისტური პარტია] ჩვენთან ომშია“.

აღსანიშნავია, რომ მისი პოზიცია ჩინეთისადმი ყოველთვის ამგვარად მკაცრი არ ყოფილა: თავდაპირველად, ვინაიდან ის კეთილგანწყობილი იყო ბიზნესის მიმართ, ყოფილი სენატორი ადვოკატირებდა ჩინეთის სავაჭრო დეფიციტის შემცირებას. დამატებით, პერდიუ, როგორც ბიზნესმენი, განსაკუთრებით ემხრობოდა კონკრეტული სამუშაოების ამერიკიდან აზიაში გადატანას რათა დაზოგილიყო წარმოების თანხა, თუმცა ბევრისთვის მსგავსი ქმედებები ტრამპის „America First“ („ამერიკა უპირველესყოვლისა“) პოლიტიკას ეწინააღმდეგებოდა, რომლის მიზანიც აშშ-ში სამუშაო ადგილების „დაბრუნებას“ უკავშირდებოდა.

სოციალურ ქსელ TRUTH.-ში დონალდ ტრამპი პერდიუს ახალი პოზიციის შესახებ წერს და აღნიშნავს, რომ ელჩის საქმიანობა უმნიშვნელოვანეს როლს შეასრულებს ჩინეთის ლიდერებთან პროდუქტიულ ურთიერთობასა და ტრამპის სტრატეგიის იმპლემენტაციაში, რომელიც მოიცავს რეგიონში მშვიდობის შენარჩუნებას. მიუხედავად ამისა, პერდიუს კონგრესში წარსული საქმიანობიდან გამომდინარე, ტრამპის მიერ მისი ელჩის კანდიდატურაზე გათვალისწინება მეტყველებს იმაზე, რომ აშშ-ს პრეზიდენტის მომავალი ადმინისტრაცია, ბაიდენის ადმინისტრაციისგან განსხვავებით, უფრო აგრესიულ პოლიტიკას აწარმოებს.

Politico ანონიმურ წყაროზე დაყრდნობით წერს, რომ ჩინეთისთვის პერდიუ პარტნიორად არ აღიქმება და ის „იღბლიანი იქნება, თუ [საგარეო საქმეთა მინისტრთან] შეხვედრას მოახერხებს“. ჩინეთის საგარეო საქმეთა სამინისტროს წარმომადგენელს აღნიშნულ საკითხზე განცხადება ამ დრომდე არ გაუკეთებია, თუმცა აღნიშნა, რომ მას აქვს ინფორმაცია ამ გადაწყვეტილების შესახებ.

დონალდ ტრამპმა ჩინეთში აშშ-ს შემდეგ ელჩად დეივიდ პერდიუ დაასახელა Read More »

დონალდ ტრამპმა ჩინეთის კრიტიკოსი პიტერ ნავარო ვაჭრობისა და წარმოების საკითხებში უფროს მრჩევლად დანიშნა

ერთი ახალი ამბავი / /

აშშ-ს ახლად არჩეულმა პრეზიდენტმა, დონალდ ტრამპმა პიტერ ნავარო, რომელიც 2021 წლიდან პეკინის მიერაა სანქცირებული,, ვაჭრობისა და წარმოების საკითხებში უფროს მრჩევლად დანიშნა. ნავარო მეორე ვადით არჩეულ პრეზიდენტს წარმოების, ტარიფების დაწესების საკითხებსა და “სავაჭრო დღის წესრიგის წარმატებულ იმპლემენტაციასა და კომუნიკაციაში” დაეხმარება, – განაცხადა ტრამპმა ოთხშაბათს სოციალურ მედიაში.

ტრამპმა შეაქო ნავაროს წარსული საქმიანობა და თქვა: „ჩემი პირველი ვადის განმავლობაში, ცოტანი იყვნენ ისეთი ეფექტური ან გამძლე, როგორც პიტერი ჩემი ორი წმინდა წესის აღსრულებაში – იყიდე ამერიკული, დაიქირავე ამერიკელი“. მან დაამატა, რომ ახალ როლში ნავარო გამოიყენებს „თეთრი სახლის გამოცდილების ფართო სპექტრს“.

ტრამპის პირველი ვადის განმავლობაში პიტერ ნავარო თეთრი სახლის ეროვნული სავაჭრო საბჭოს დირექტორის თანამდებობას იკავებდა. ცნობილი პროტექციონისტული სავაჭრო პოლიტიკის ძლიერი ადვოკატირებით, ნავარო მუდმივად მხარს უჭერდა ამერიკული ინდუსტრიების დაცვისკენ მიმართულ ზომებს. ტრამპის პირველი ვადის განმავლობაში, ნავარო მხარს უჭერდა ტარიფებს 370 მილიარდი დოლარის ღირებულების ჩინურ იმპორტზე და მოითხოვდა ტარიფების დაწესებას ალუმინისა და ფოლადის ინდუსტრიაში.

პიტერ ნავარო ჩინეთის წინააღმდეგ ამერიკის სავაჭრო ომის მთავარი არქიტექტორი იყო. ამის გამო,  28 მაღალჩინოსან შორის მოხვდა, რომლებსაც პეკინმა სანქციები დაუწესა პრეზიდენტ ჯო ბაიდენის ინაუგურაციის შემდეგ, 2021 წლის იანვარში. სანქცირების მიზეზად, ჩინეთის საგარეო საქმეთა სამინისტრომ განაცხადა, რომ ნავარო და სხვა სანქცირებული ამერიკელები “სერიოზულად არღვევდნენ ჩინეთის სუვერენიტეტს” და ისინი პირველ რიგში იყვნენ პასუხისმგებლები “ჩინეთთან დაკავშირებულ საკითხებზე.”

სანქცირებული პირებს აეკრძალათ ჩინეთის ტერიტორიაზე შესვლა, მათ შორის, ჰონგ კონგში და მათთან დაკავშირებულ კომპანიებს ჩინეთში ბიზნეს შეზღუდვები დაუწესდათ. 

ნავარო ტრამპის ახალი ადმინისტრაციის მეორე წევრია, რომელსაც პეკინმა სანქციები დაუწესა. ის უერთდება მარკო რუბიოს, ამერიკელ სენატორს ფლორიდადან და ჩინეთის ცნობილ კრიტიკოსს, რომელსაც პეკინმა ორჯერ დაუწესა სანქციები. რუბიო, რომელიც ტრამპმა აირჩია მომავალ სახელმწიფო მდივნად, ამჟამად ელოდება აშშ-ს სენატის დასტურს.. აღსანიშნავია, რომ ტრამპმა უკვე დანიშნა კაბინეტის მდივნები და ეროვნული უსაფრთხოების მრჩეველი, რომლებიც ურყევად მკაცრ პოზიციას გამოხატავენ ჩინეთთან დაკავშირებით.

პიტერ ნავარო იმ ამერიკელ პოლიტიკოსთა შორისაა, რომელიც კორონავირუსის გავრცელებაში პასუხისმგებლობას ჩინეთს აკისრებს. ტელეკომპანია CNBC-ისთვის მიცემულ ინტერვიუში პიტერ ნავარომ განაცხადა, რომ პეკინმა არ მიიღო შესაბამისი ზომები, რათა კოვიდ 19-ით ინფიცირებული მოქალაქეებისთვის საზღვარგარეთ გამგზავრება შეეზღუდა.

„მათ აკრძალეს რეისები უხანიდან პეკინში და შანხაიში, თუმცა ამავდროულად დაუშვეს რეისები მილანში და ნიუ-იორკში. ასი ათასობით ჩინელმა ფართოდ გაავრცელა ვირუსი, რამაც პანდემიის გავრცელების წინაპირობა შექმნა. ჩინეთმა მსოფლიოს სერიოზული ზიანი მიაყენა და ამის გამო მოუწევს საფასურის გადახდა“, – განაცხადა პიტერ ნავარომ.

ნავარო, ჰარვარდში განათლებამიღებული ეკონომისტი და პროფესორი,  ცნობილი გახდა 2011 წელს გამოცემული წიგნით “ჩინეთის მიერ მოკლული”, სადაც მან ჩინეთი დაადანაშაულა ვალუტის მანიპულირებაში და საშიში სამომხმარებლო საქონლით ამერიკელებისთვის განზრახ ზიანის მიყენებაში.

თავის წიგნში ნავარომ შეიმუშავა ზომები ამ ქმედებების წინააღმდეგ. მაგალითად, გამოსავლის სახით დაასახელა ამერიკულ კომპანიებზე პეკინის ზეწოლის აცილება. ზეწოლა ამერიკულ კომპანიებზე გულისხმობდა მცდელობას პეკინის მხრიდან, კომპანიებს გადაეცათ ამერიკული ტექნოლოგიები ჩინელი პარტინორებისთვის. ნავაროს ბევრი რეკომენდაცია მოგვიანებით ტრამპის ადმინისტრაციამ გაითვალისწინა.

MSNBC-ის კრიტიკულ სტატიაში ხაზგასმულია: ნავაროს დაბრუნება მიანიშნებს, რომ ტრამპი ისეთივე სერიოზულია, როგორც არასდროს, აგრესიული სატარიფო სტრატეგია აწარმოოს პეკინის წინააღმდეგ. ტრამპის სავაჭრო პოლიტიკა, ტარიფების დაწესების გარდა, ჩინეთთან არსებული თავისუფალი სავაჭრო ნორმებისა და შეთანხმებების გაუქმებას მოიცავს, რამაც შესაძლოა სავაჭრო ომის ესკალირება გამოიწვიოს.

დონალდ ტრამპმა ჩინეთის კრიტიკოსი პიტერ ნავარო ვაჭრობისა და წარმოების საკითხებში უფროს მრჩევლად დანიშნა Read More »

ჩინეთმა ამერიკის შეერთებულ შტატებში ძირითადი მინერალების ექსპორტი აკრძალა – სავაჭრო დაძაბულობა იზრდება

ერთი ახალი ამბავი / /

ჩინეთმა 3 დეკემბერს ძირითადი მინერალების – გალიუმიუს, გერმანიუმისა და ანტიმონის – ექსპორტი აკრძალა შეერთებულ შტატებში. ეს მინერალები აუცილებელია სამხედრო და ტექნიკური ნაწილებისთვის, ეს ნაბიჯი კი ორ ქვეყანას შორის მიმდინარე სავაჭრო დაძაბულობის მნიშვნელოვან ესკალაციაზე მიუთითებს. გადაწყვეტილება ჩინეთმა მიიღო მეორე დღესვე, როგორც კი აშშ-მ დააწესა ახალი შეზღუდვები ჩინურ ნახევარგამტარებზე.

ჩინეთი ეტაპობრივად აძლიერებს კონტროლს მნიშვნელოვანი მინერალების ექსპორტზე, მაგრამ ამჯერად ეს აკრძალვა მხოლოდ აშშ-ს ეხება. ჩინეთის ვაჭრობის სამინისტრომ მიზეზად დაასახელა ეროვნული უსაფრთხოების რისკები და განაცხადა, რომ ამ მინერალების ექსპორტი აშშ-ში აღარ დაიშვება. გალიუმი და გერმანიუმი მნიშვნელოვანია ნახევარგამტარებისა და ინფრაწითელი ტექნოლოგიებისთვის, ხოლო ანტიმონი გამოიყენება იარაღსა და საბრძოლო მასალაში. გრაფიტი, რომელზეც ასევე მოქმედებს ახალი შეზღუდვები, ელექტროავტომობილების ბატარეების მთავარი კომპონენტია.

„ეროვნული უსაფრთხოების ინტერესების დასაცავად და ისეთი საერთაშორისო ვალდებულებების შესასრულებლად, როგორიცაა იარაღის გაუვრცელებლობა, ჩინეთმა გადაწყვიტა გააძლიეროს ექსპორტის კონტროლი შეერთებულ შტატებში შესაბამისი ორმაგი დანიშნულების პროდუქტებზე“, – თქვა სამინისტრომ.

აშშ-ის მთავრობა მსჯელობს არსებულ სიტუაციაზე და აცხადებს, რომ მიიღებს შესაბამის ზომებს, რისი დასტურიცაა თეთრი სახლის სპიკერის განცხადება, რომ ჩინეთზე დამოკიდებულების შესამცირებლად აუცილებელია ეკონომიკური მიწოდების ჯაჭვის დივერსიფიკაცია და გამრავალფეროვნება.

მონაცემები აჩვენებს, რომ ამ წლის განმავლობაში გერმანიუმი თუ გალიუმი აშშ-ში არ ყოფილა იმპორტირებული, იმის მიუხედავად, რომ თავის დროზე ეს მინერალები ძირითადი საექსპორტი რესურსები იყო. ჩინეთის მიერ ანტიმონის მიწოდება ასევე მკვეთრად შემცირდა ოქტომბერში ექსპორტის შეზღუდვების გამოცხადების შემდეგ.

ეს ნაბიჯი განიხილება, როგორც ჩინეთის სტრატეგიის ნაწილი, დაიცვას თავისი სამხედრო და ტექნოლოგიური ინტერესები. ზოგიერთმა ამერიკულმა კომპანიამ განაცხადა, რომ ჩინეთი მნიშვნელოვან მინერალებზე წვდომას „იარაღად იყენებს“. Perpetua Resources, კომპანიამ, რომელიც ამუშავებს ანტიმონის მაღაროს აიდაჰოში, თქვა, რომ შეერთებულმა შტატებმა უნდა შეამციროს დამოკიდებულება ჩინურ მინერალებზე.

აღსანიშნავია ჩინეთის მიერ მინერალების ექსპორტზე აკრძალვის დაწესების დრო, რადგან აღნიშნული მოვლენა ჩინეთის ნახევარგამტარული ინდუსტრიის მიმართ აშშ-ს მესამე შეტევას მოჰყვა. ორ ქვეყანას შორის სავაჭრო ომი კვლავ მძაფრდება, რამდენადაც ორივე მხარე ტარიფებსა და შეზღუდვებს აწესებს.

ჩინეთმა ამერიკის შეერთებულ შტატებში ძირითადი მინერალების ექსპორტი აკრძალა – სავაჭრო დაძაბულობა იზრდება Read More »

ბაერბოკი, უკრაინის კონფლიქტში რუსეთის მხარდაჭერის გამო, ჩინეთს უპირისპირდება

ერთი ახალი ამბავი / /

გერმანიის საგარეო საქმეთა მინისტრმა, ანნალენა ბაერბოკმა მკაცრად გააკრიტიკა ჩინეთი რუსეთისთვის ეკონომიკური და სამხედრო მხარდაჭერისთვის უკრაინის წინააღმდეგ მიმდინარე ომში და გააფრთხილა, რომ პეკინის ქმედებები საფრთხეს უქმნის მშვიდობას ევროპასა და ინდო-წყნარ ოკეანეში. მომავალ კვირას პეკინში ვიზიტის წინ გაკეთებულ განცხადებაში, ბაერბოკმა დაადანაშაულა ჩინეთი გლობალური უსაფრთხოებისთვის საფუძვლის გამოცლაში, რაც რუსეთის მხარდაჭერასა და ევროპის ძირითად ინტერესებთან დაპირისპირებაში გამოიხატა.

„როგორც გაეროს უშიშროების საბჭოს მუდმივი წევრი, მსოფლიოში მშვიდობასა და უსაფრთხოებაზე პასუხისმგებლობის აღების ნაცვლად, ჩინეთი ეწინააღმდეგება ჩვენს ძირითად ევროპულ ინტერესებს რუსეთისთვის ეკონომიკური და სამხედრო დახმარებით“, – თქვა ბაერბოკმა. მომავალ კვირას დაგეგმილ შეხვედრაზე, თავის ჩინელ კოლეგასთან, ვანგ ისთან, გერმანიის საგარეო საქმეთა მინისტრი მთელ რიგ საკითხებს განიხილავს, მათ შორის, უკრაინის ომს.

ბაერბოკმა ხაზგასმით აღნიშნა, რომ რუსეთის შეჭრა უკრაინაში არა მხოლოდ პირდაპირი საფრთხეა ევროპული მშვიდობისთვის, არამედ მას გლობალური მასშტაბის შედეგებიც მოჰყვება. მან განაცხადა, რომ რუსეთ-უკრაინის ომი აჩვენებს, თუ რამდენად მჭიდროდ არის დაკავშირებული ევროპის უსაფრთხოება აზიის უსაფრთხოებასთან, განსაკუთრებით მაშინ, როდესაც ჩრდილოეთ კორეა აგზავნის ჯარისკაცებსა და იარაღს რუსეთის მხარდასაჭერად, ხოლო რუსეთი ეხმარება ფხენიანს ბირთვული პროგრამის განვითარებაში. „თუ ჩრდილოეთ კორეა აგზავნის ჯარისკაცებსა და იარაღს უკრაინის წინააღმდეგ, ხოლო რუსეთი მხარს უჭერს ფხენიანის ბირთვულ პროგრამას, მაშინ ეს საფრთხეს უქმნის მშვიდობას როგორც აქ, ასევე ინდო-წყნარ ოკეანეში“, – თქვა მან.  

ბაერბოკის განცხადების საპასუხოდ, ჩინეთის საგარეო საქმეთა სამინისტროს სპიკერმა, ლინ ჯიანმა, უარყო ბრალდებები. ”ჩინეთი მტკიცედ ეწინააღმდეგება უსაფუძვლო ბრალდებებსა და განტევების ვაცებს, ისევე როგორც პოლიტიკურ მანიპულირებას”, – თქვა ლინმა და გაიმეორა ჩინეთის დიდი ხნის პოზიცია უკრაინის კონფლიქტთან დაკავშირებით. ჩინეთი ამტკიცებს, რომ ნეიტრალურია ომში და აცხადებს, რომ იგი არ უწევს ფუნდამენტურ დახმარებას არცერთ მხარეს, განსხვავებით შეერთებული შტატებისა და სხვა დასავლური ქვეყნებისგან. თუმცა, ჩინეთის მჭიდრო პოლიტიკურმა და ეკონომიკურმა კავშირებმა რუსეთთან, აიძულა ნატოს წევრები, პეკინისთვის ომის “გადამწყვეტი გამცემი”  ეწოდებინათ.

გერმანიის საგარეო საქმეთა მინისტრი უკვე დიდი ხანია უკრაინის ძლიერი მხარდამჭერია, რომელიც მუდმივად მოუწოდებს პეკინს, უფრო მტკიცე პოზიცია დაიჭიროს რუსეთის უკრაინაში შეჭრის წინააღმდეგ. გასულ წელს მიცემულ ინტერვიუში ბაერბოკმა პარალელი გაავლო რუსეთის პრეზიდენტ ვლადიმერ პუტინსა და ჩინეთის პრეზიდენტ სი ძინპინს შორის და თქვა, რომ რუსეთის გამარჯვება მოტივაციას მისცემს სხვა დიქტატურებს მთელს მსოფლიოში. ”თუ პუტინი ამ ომს მოიგებდა, რა ნიშანი იქნებოდა ეს მსოფლიოს სხვა დიქტატორებისთვის, როგორიცაა სი, ჩინეთის პრეზიდენტი?”, განაცხადა ბაერბოკმა 2023 წლის სექტემბერში.

ბაერბოკის ჩინეთში ვიზიტის კვალდაკვალ, გერმანია-ჩინეთის ურთიერთობების მომავალი გზაჯვარედინზეა, რადგან აღნიშნული ქვეყნები ეკონომიკური თანამშრომლობის, გლობალური უსაფრთხოებისა და ადამიანის უფლებების საკითხებში კონკურენტული პრიორიტეტებით გამოირჩევიან. მათ ამ გამოწვევების დაბალანსება მოუწევთ, რათა ჩინეთ-ევროპის ურთიერთობები მომდევნო წლებში იყოს სტაბილური.  

ბაერბოკი, უკრაინის კონფლიქტში რუსეთის მხარდაჭერის გამო, ჩინეთს უპირისპირდება Read More »

ლიეტუვამ ჩინეთის საელჩოს სამი თანამშრომელი გააძევა

ერთი ახალი ამბავი / /

ლიეტუვის საგარეო საქმეთა სამინისტროს მიხედვით, ქვეყანამ ჩინეთის წარმომადგენლობითი ოფისის სამი თანამშრომელი პერსონა ნონ გრატად გამოაცხადა და სამი კვირა მისცა ქვეყნის დასატოვებლად. სამინისტრომ გადაწყვეტილება ვენის კონვენციისა და ლიეტუვის კანონმდებლობის დარღვევით გაამართლა, თუმცა არ უსაუბრია სხვა დეტალებზე.

გაძევებას წინ უძღოდა უკვე დაძაბული ურთიერთობები ჩინეთსა და ლიეტუვას შორის, რომლის ორ მთავარ მიზეზად სახელდება ტაივანის მხარდაჭერის საკითხი და ჩინური გემის სავარაუდო ჩართულობა საზღვაო კაბელების დაზიანებაში. უკანსნელი ეხება ორი ბალტიის ზღვის ტელეკომუნიკაციის კაბელის, მათ შორის შვედური კუნძულის, გოთლანდისა და ლიეტუვის დამაკავშირებლის, დაზიანებას ნოემბრის დასაწყისში. ეჭვები ჩინური ჩართულობის შესახებ, გემის, Yi Peng 3-ის მარშრუტზე დაფუძნებით გაჩნდა – მონიტორინგის მიხედვით,  აღნიშნული გემი სწორედ ამ ტერიტორიაზე იმყოფებოდა მაშინ, როდესაც კაბელები გადაჭრეს. ფინეთმა, შვედეთმა და ლიეტუვამ ტელეკომუნიკაციების დაზიანების ფაქტის გამოძიება საერთო ძალებით დაიწყეს, რაშიც მათ ევროკავშირის კრიმინალური სამართლის საკითხებში კოოპერაციის სააგენტო, Eurojust, დაეხმარებათ.

ჩინეთის საგარეო საქმეთა სამინისტროს განცხადებით, ჩინეთი მტკიცედ გმობს და ეწინააღმდეგება ლიეტუვის ამ გადაწყვეტილებას და იტოვებს უფლებას განახორციელოს საპასუხო ქმედებები. სამინისტრო აღნიშნავს, რომ ლიეტუვას არ წარმოუდგენია მიზეზი, რის გამოც ჩინური წარმომადგენლობის ამ თანამშრომლებს ქვეყნისთვის არასასურველ ადამიანებად გამოაცხადებდა.  ამავე განცხადებაში საუბარია ლიეტუვის მიერ „ერთი ჩინეთის პრინციპის სერიოზულ დარღვევაზე ტაივანის საკითხებში“ და აღნიშნულია, რომ ამ უკანასკნელმა განსაკუთრებული დაბრკოლებები წარმოქმნა ჩინურ-ლიეტუვურ ურთიერთობებში. კონტექსტისათვის, ამ განცხადების მიზეზი ლიეტუვის მიერ ტაივანისთვის 2021 წელს დე ფაქტო საელჩოს გახსნის უფლების მიცემა გახდა.

ლიეტუვამ ჩინეთის საელჩოს სამი თანამშრომელი გააძევა Read More »

ჩინური და რუსული ჯარების ავიაპატრულირება იაპონიის ზღვის საჰაერო სივრცეში

ერთი ახალი ამბავი / /

ჩინურმა და რუსულმა ჯარებმა მეცხრე საერთო ავიაპატრულირება დააორგანიზეს, რომელიც ამჯერად იაპონიის ზღვის საჰაერო სივრცეში მოეწყო. აღნიშნული პროექტი ქვეყნებს შორის 2019 წლიდან მოქმედი თანამშრომლობითი შეთანხმების ნაწილია.

ჩინური მედიის, CCTV-ს განცხადებით, პატრულირების მიზანია როგორც საერთო წვრთნების გამოცდა და გაუმჯობესება, ისე ორი სამხედრო-საჰაერო ძალის ოპერაციული შესაძლებლობების განვითარება.

სამხედრო ძალების სამხრეთ კორეის საჰაერო თავდაცვის იდენტიფიკაციის ზონაში (ADIZ) გამოჩენის შემდეგ, ქვეყანამ დაუყოვნებლივ აამოქმედა სამხედრო რეაქტიული ვერტმფრენები, თუმცა ჩინეთისა და რუსეთის საჰაერო ხომალდებმა ტერიტორია ინციდენტის გარეშე, 4 საათის შემდეგ დატოვეს. სამხრეთ კორეამ აღნიშნა, რომ ავიაპატრულირება ქვეყნისთვის წინასწარი შეტყობინების გარეშე ჩატარდა.

მიუხედავად იმისა, რომ, ზოგადად, ქვეყნები მოითხოვენ იმ თვითმფრინავების იდენტიფიცირებას, რომლებიც მათ ADIZ-ებში შედიან, აღნიშნული ზონები არ ეკუთვნის რომელიმე კონკრეტულ სუვერენულ ქვეყანას და სხვადასხვა სახელმწიფოს ADIZ-ები ხშირად იკვეთებიან.

აღნიშნულ წვრთნებზე კომენტარი გააკეთა ჩინეთის ეროვნული თავდაცვის სამინისტროს სპიკერმა და განაცხადა, რომ ის სამიზნედ არ იღებს რომელიმე მესამე მხარეს და „არაფერ შუაშია არსებულ საერთაშორისო თუ რეგიონულ სიტუაციებთან“.

ჩინეთის ხელისუფლების მიერ მხარდაჭერილი გამოცემა Global Times, ჩინური სამხედრო ძალების ექსპერტზე დაყრდნობით, ხაზს უსვამს გამოყენებული ტერიტორიების სტრატეგიულ მნიშვნელობას და ამბობს, რომ ორი ქვეყნის მხრიდან მათი „კარის ზღურბლზე“ მსგავსი პატრულირებების დაორგანიზება ნორმალურ მოვლენას წარმოადგენს. 

ჩინური და რუსული ჯარების ავიაპატრულირება იაპონიის ზღვის საჰაერო სივრცეში Read More »

ტრამპის სავაჭრო ომის არქიტექტორი ჯემისონ გრირი აშშ-ს სავაჭრო სტრატეგიას მეორე ვადით უხელმძღვანელებს

ერთი ახალი ამბავი / /

შეერთებული შტატების ახლადარჩეულმა პრეზიდენტმა, დონალდ ტრამპმა გამოაცხადა, რომ მან სავაჭრო წარმომადგენლად (USTR) აირჩია პროკურისტი ჯემისონ გრირი. ესაა კრიტიკულად მნიშვნელოვანი პოზიცია, რომელიც განსაზღვრავს ადმინისტრაციის ეკონომიკურ და სავაჭრო სტრატეგიებს ტრამპის მეორე საპრეზიდენტო ვადის განმავლობაში. გრირს, ვაჭრობის კანონმდებლობის სტაჟიან ექსპერტს, ახალი ადმინისტრაცია ამზადებს აგრესიული სავაჭრო პოლიტიკის ხელმძღვანელის პოზიციაზე, ეს აგრესიული პოლიტიკა კი, განსაკუთრებით მიემართება ჩინეთსა და ჩრდილოეთ ამერიკას.

ტრამპმა ხაზი გაუსვა თავისი პრეზიდენტობის პირველი ვადის განმავლობაში  გრირის გადამწყვეტ როლს ძირითად სავაჭრო ქმედებებში, მათ შორის ჩინეთთან სავაჭრო ომში და ჩრდილოეთ ამერიკის თავისუფალი ვაჭრობის შეთანხმების (NAFTA) ხელახალი მოლაპარაკებების დროს, რომელიც შემდგომში გახდა აშშ-მექსიკა-კანადის შეთანხმება (USMCA).  “ჯემისონმა გადამწყვეტი როლი ითამაშა ჩემი პირველი ვადის დროს  სავაჭრო პოლიტიკის წარმატებაში, მათ შორის ჩინეთთან სავაჭრო ომში მტკიცედ დგომით და USMCA ბევრად უკეთესედ გარიგებად გარდაქმნით ამერიკელი მუშაკებისთვის“, – თქვა ტრამპმა განცხადებაში.

გრირი, რომელიც ადრე ტრამპის ყოფილი სავაჭრო წარმომადგენლის, რობერტ ლაიტჰაიზერის შტაბის უფროსად მუშაობდა, ჩართული იყო მოლაპარაკებებში, რომელმაც გამოიწვია 2020 წელს ჩინეთთან სავაჭრო შეთანხმება – “ფაზა 1”. ამ შეთანხმების თანახმად, ჩინეთს დაეკისრა ვალდებულება,  შეესყიდა 200 მილიარდი დოლარის ღირებულების ამერიკული საქონელი ორი წლის განმავლობაში – თუმცა ეს მიზანი სრულად ვერასდროს იქნა მიღწეული, COVID-19-ის პანდემიით გამოწვეული შეფერხებების გამო.

გრირის არჩევა მიუთითებს იმაზე, რომ ტრამპის მეორე ვადის სავაჭრო პოლიტიკა ჩინეთთან მიმართებით უფრო მკაცრი იქნება. გრირი საკმაოდ მკაფიოდ აფიქსირებდა თავის პოზიციას ჩინეთისადმი უფრო მკაცრი მიდგომის აუცილებლობის შესახებ, განსაკუთრებით ისეთ სფეროებში, როგორებიცაა ტექნოლოგია და წარმოება. მან ახლახანს მისცა ჩვენება აშშ-ჩინეთის ეკონომიკური და უსაფრთხოების მიმოხილვის კომისიის წინაშე, რომელიც მხარს უჭერდა უფრო მტკიცე ტარიფებს და ექსპორტის კონტროლს აშშ-ს ინდუსტრიების დასაცავად. „ჩინეთის მთავრობის მიერ ვაჭრობის გამოყენება სამხედრო და სახელმწიფო საწარმოების მხარდასაჭერად კრიტიკულ საფრთხეს წარმოადგენს“, – განუცხადა გრირმა კანონმდებლებს. ეს განცხადება ხაზს უსვამს ეროვნული უსაფრთხოების რისკებს, რომლებიც გამოწვეულია ჩინეთის მზარდი გავლენით გლობალურ ბაზრებზე.

გრირის არჩევა USTR-ად არის ტრამპის უფრო ფართო სტრატეგიის მხოლოდ ერთი ნაწილი აშშ-ს ეკონომიკური პოლიტიკისა და სავაჭრო ურთიერთობების ძირეული გადახედვის პროცესში. როდესაც ტრამპის ადმინისტრაცია დაიწყებს თავისი კურსის დასახვას მომდევნო ოთხი წლისთვის, გრირის როლი გადამწყვეტი იქნება აშშ-ს სავაჭრო პოლიტიკის მომავლის ჩამოყალიბებასა და იმის უზრუნველყოფაში, რომ ტრამპის ეკონომიკური ხედვა დარჩეს მისი პრეზიდენტობის ცენტრალურ ფოკუსად.

ტრამპის სავაჭრო ომის არქიტექტორი ჯემისონ გრირი აშშ-ს სავაჭრო სტრატეგიას მეორე ვადით უხელმძღვანელებს Read More »

ევროკავშირის მიერ ჩინურ ელექტრომობილებზე დაწესებულ ტარიფებთან დაკავშირებით შეთანხმება ვერ იქნა მიღწეული; ევროკავშირი უკრაინის წინააღმდეგ რუსეთთან თანამშრომლობაში შემჩნეულ ჩინურ კომპანიებს სანქციებს უმზადებს

ერთი ახალი ამბავი / /

ევროკავშირისა და ჩინეთის ოფიციალური პირები  ჩინურ ელექტრომობილებზე ევროკავშირის მიერ დაწესებული ტარიფების ალტერნატივებს განიხილავენ.  ევროკავშირის წარმომადგენლებმა ორშაბათს განაცხადეს, რომ საკითხის მყისიერი გადაწყვეტის პერსპექტივა არ ჩანს.

ევროპარლამენტის სავაჭრო კომიტეტის თავმჯდომარემ ბერნდ ლანგემ პარასკევს გერმანიის მაუწყებელს მიანიშნა, რომ 27 ქვეყანას შორის შეთანხმება, ევროკავშირსა და ჩინეთს შორის ტარიფების სხვა ზომით ჩანაცვლების შესახებ, დასრულებულ სახეს უახლოვდება. 

Reuters-ი იუწყება, რომ ევროკავშირის ოფიციალურმა წარმომადგენლებმა, რომლებიც მოლაპარაკებების მგრძნობიარე ხასიათის გამო ანონიმურად საუბრობდნენ, უარყვეს ლანგეს განცხადება. მათ განმარტეს, რომ დისკუსიები გრძელდება და მნიშვნელოვანი დაბრკოლებები ხელს უშლის გარიგების დადებას. 

ტარიფებთან დაკავშირებით გამართულ მოლაპარაკებებს წინ უსწრებდა გერმანიის კანცლერ ოლაფ შოლცისა და ჩინეთის პრეზიდენტ სი ძინპინის შეხვედრა გასულ კვირას, დიდი ოცეულის სამიტის ფარგლებში. შეხვედრაზე სი ძინპინმა ისაუბრა ჩინეთის მზადყოფნაზე ითანამშრომლოს გერმანიასთან სტრატეგიული პარტნიორობის გასაძლიერებლად. პრეზიდენტმა, ასევე, ხაზი გაუსვა ევროკავშირის მიერ დაწესებული ტარიფების საკითხს ჩინეთში წარმოებულ ელექტრომობილებზე. სი ძინპინის თქმით, ტარიფები პეკინსა და ევროკავშირს შორის სავაჭრო კონფლიქტის რისკებს ზრდის. 

წევრი ქვეყნებისგან საჭირო მხარდაჭერის მიღების შემდეგ, ევროკავშირმა ჩინური ელექტრომობილების იმპორტზე მაღალი ტარიფების დაწესების 5 წლიანი გეგმა 2024 წლის ოქტომბერში დაამტკიცა.   ტარიფები, სავარაუდოდ, გაიზრდება ამჟამინდელი 10%-დან 45%-მდე მომდევნო ხუთი წლის განმავლობაში.  

ევროკომისიამ ხაზგასმით აღნიშნა, რომ ევროკავშირი და ჩინეთი „ინტენსიურად იმუშავებენ” ტარიფების გაზრდით შექმნილი პრობლემების მოსაგვარებლად. საპასუხოდ, ჩინეთის კომერციის სამინისტრომ დაგმო გადაწყვეტილება, როგორც “არასამართლიანი” და “არაგონივრული”, მაგრამ აღიარა საკითხის მოლაპარაკებების გზით მოგვარების შესაძლებლობა.

გადაწყვეტილება ჩინეთში წარმოებულ ელექტრომობილებზე მაღალი ტარიფების დაწესებასთან დაკავშირებით, არ ყოფილა ერთსულოვანი. გერმანია, რომლის საავტომობილო ინდუსტრია დიდწილად დამოკიდებულია ჩინეთში ექსპორტზე, ეწინააღმდეგებოდა ტარიფებს. ევროკავშირის ბევრმა წევრმა  სახელმწიფომ ხმის მიცემისგან თავი შეიკავა. თუმცა საფრანგეთმა, იტალიამ, ნიდერლანდებმა და პოლონეთმა მხარი დაუჭირეს იმპორტის გაზრდილ გადასახადებს. ტარიფების შესახებ წინადადების დაბლოკვა შეიძლებოდა მხოლოდ იმ შემთხვევაში, თუ მას 27-დან  15 წევრი ქვეყნის კვალიფიციური უმრავლესობა არ დაუჭერდა მხარს.

ორ ბლოკს შორის მზარდი სავაჭრო დაძაბულობის ფონზე, ჩინეთის მხრიდან ისმის მოწოდებები თანამშრომლობისკენ.  ჩინეთის საგარეო საქმეთა მინისტრმა ვანგ იიმ ხაზი გაუსვა, რომ ჩინეთმა და ევროკავშირიმა ერთმანეთი  პარტნიორებად უნდა აღიქვან და არა მოწინააღმდეგეებად. მან ორივე მხარეს მოუწოდა იფიქრონ ერთმანეთის პერსპექტივიდან და ეძიონ პარტნიორობის გზები. 

მცდელობის მიუხედავად, ცხადია, რომ ევროკავშირის ზომები ჩინეთის წინააღმდეგ არ შემოიფარგლება მხოლოდ იმპორტის გადასახადების გაზრდით გარკვეულ სექტორებში. ორშაბათის მდგომარეობით, Bloomberg-ის მიერ მოპოვებული დოკუმენტებით ცნობილი გახდა, რომ ევროკავშირი აპირებს სანქციების დაუწესოს რამდენიმე ჩინურ ფირმას, რომლებიც, სავარაუდოდ, რუსულ კომპანიებს უკრაინაში გამოყენებული თავდამსხმელი დრონების შექმნაში ეხმარებოდნენ. 

ევროკავშირის მიერ ჩინურ ელექტრომობილებზე დაწესებულ ტარიფებთან დაკავშირებით შეთანხმება ვერ იქნა მიღწეული; ევროკავშირი უკრაინის წინააღმდეგ რუსეთთან თანამშრომლობაში შემჩნეულ ჩინურ კომპანიებს სანქციებს უმზადებს Read More »

ტრამპის სატარიფო გამბიტი: მკაცრი გადასახადები ჩინეთს, მექსიკასა და კანადას, იმიგრაციისა და ნარკომანიის კრიზისის წინააღმდეგ საბრძოლველად

ერთი ახალი ამბავი / /

დონალდ ტრამპმა განაცხადა, რომ თეთრ სახლში დაბრუნების პირველივე დღეს ჩინეთს, მექსიკასა და კანადას მკაცრ ტარიფებს დაუწესებს. მისი თქმით, ეს ნაბიჯები აუცილებელია იმისათვის, რომ ამ ქვეყნებმა მიიღონ უფრო სერიოზული ზომები არალეგალური იმიგრაციისა და ნარკოტიკებით ვაჭრობის წინააღმდეგ ამერიკის შეერთებულ შტატებში.

Truth Social პლატფორმაზე გამოქვეყნებულ პოსტში, ტრამპმა დეტალურად აღწერა თავისი გეგმები და აღნიშნა, რომ იგი 20 იანვარს ხელს მოაწერს აღმასრულებელ ბრძანებას, რომლის მიხედვითაც მექსიკიდან და კანადიდან შემოტანილ ყველა სახის იმპორტირებულ პროდუქტზე 25%-იან ტარიფს დააწესებს.  კიდევ ერთ პოსტში, დონალდ ტრამპი თავს დაესხა ჩინეთს იმის გამო, რომ ამ უკანასკნელმა არ შეასრულა დაპირებები იმ პირებისთვის სიკვდილით დასჯის დაწესების შესახებ, რომლებიც ვაჭრობენ ფენტანილით, ნარკოტიკით, რომელიც, მისი თქმით, შეერთებულ შტატებში, მექსიკის გავლით, უპრეცედენტო რაოდენობით შედის. ამ პრობლემის მოსაგვარებლად მან გამოაცხადა, რომ იგი გეგმავს დამატებით 10%-იანი ტარიფის დაწესებას ჩინეთიდან იმპორტირებულ ყველა პროდუქტზე იქამდე, სანამ ნარკოტიკების შემოტანის მზარდი მაჩვენებელი არ შეჩერდება აშშ-ში. ტრამპმა ეს შეაფასა, როგორც აუცილებელი ზომა კრიზისის წინააღმდეგ საბრძოლველად და აღნიშნა, რომ ამ საკითხს ყურადღება უნდა მიაქციონ.

ტრამპის მიერ ჩინურ საქონელზე დამატებითი ტარიფების დაწესების საპასუხოდ, ვაშინგტონში ჩინეთის საელჩოს სპიკერმა ლიუ პენგიუმ განაცხადა, რომ ეკონომიკური თანამშრომლობა ჩინეთსა და აშშ-ს შორის ორმხრივად მომგებიანია და გააფრთხილა აშშ, რომ „არავინ მოიგებს სავაჭრო თუ სატარიფო ომს.” ჩინეთის სპიკერმა ასევე აღნიშნა ნარკოტიკების წინააღმდეგ ბრძოლის მიზნით ორ ქვეყანას შორის მიმდინარე თანამშრომლობა, რაც განპირობებული იყო სან-ფრანცისკოს სამიტის შემდეგ ჩინეთ-აშშ-ს შორის კომუნიკაციის განახლების მოტივით. ჩინეთმა, სპიკერის თქმით, გაუზიარა შეერთებულ შტატებს სიახლეები ნარკომანიის წინააღმდეგ ბრძოლის ძალისხმევის შესახებ და უპასუხა აშშ-ის მოთხოვნას ინფორმაციის მისაღების თაობაზე. მან ასევე უარყო ბრალდება, რომ ჩინეთი შეგნებულად უშვებს აშშ-ში ფენტანილის ექსპორტს.

ინგლისის ბანკის მონეტარული პოლიტიკის კომიტეტის წევრის, სვატი დინგრას  თქმით, დონალდ ტრამპის მიერ შემოთავაზებულმა 60%-იანმა ტარიფმა ჩინეთიდან იმპორტზე შესაძლოა კომპლექსური გავლენა იქონიოს გლობალურ ეკონომიკაზე ფასების მასშტაბური ვარდნით, „რადგან საქონელი უფრო იაფი გახდება ყველასთვის“. ლონდონში, კონფერენციაზე გამოსვლისას, დინგრამ განმარტა, რომ ამერიკის მიერ დაწესებულ ასეთ მკაცრ ტარიფებზე შესაძლოა საპასუხო რეაგირება მოახდინონ ჩინელმა ექსპორტიორებმა. მათ შეიძლება შეამცირონ ფასები ალტერნატიულ ბაზრებზე იმისთვის, რომ ვაჭრობის მოცულობა შეინარჩუნონ, რაც ფასების დაცემას გამოიწვევს ყველგან, მათ შორის დიდ ბრიტანეთშიც.

თუმცა, მან დაადასტურა, რომ ეფექტი ცვალებადი იქნება სხვა ქვეყნების რეაქციების გათვალისწინებით. თუ მთავრობები სამაგიეროს გადაუხდიან საკუთარი ტარიფების დაწესებით ან პროტექციონისტული ნაბიჯებით, სავაჭრო ომი შესაძლოა კონტროლიდან გამოვიდეს და ზიანი მიაყენოს მსოფლიო ეკონომიკას. უფრო მაღალი ინფლაცია შეიძლება იყოს შეერთებულ შტატებში, რადგან ამერიკელი მომხმარებლები იღებენ ტარიფის ღირებულებას; თუმცა, ამ ტიპის საქონლის გლობალური ფასები შეიძლება შემცირდეს, რადგან ჩინელი ექსპორტიორები ეგუებიან და ერგებიან ახალ სავაჭრო ბარიერებს.

ვინაიდან ტრამპის წინადადებები დებატებს იწვევს, მისი აგრესიული სავაჭრო პოლიტიკის შედეგები გაურკვეველი რჩება. ცხადია, რომ მისი თანამდებობაზე დაბრუნება გამოიწვევს მკვეთრ ცვლილებას აშშ-ს ეკონომიკურ და საგარეო პოლიტიკაში, რომელშიც ტარიფებს კვლავ ექნება ცენტრალური ადგილი.

ტრამპის სატარიფო გამბიტი: მკაცრი გადასახადები ჩინეთს, მექსიკასა და კანადას, იმიგრაციისა და ნარკომანიის კრიზისის წინააღმდეგ საბრძოლველად Read More »

Scroll to Top