საქართველოს ელჩი ნინგსია ხუეის რეგიონის დელეგაციას შეხვდა
14 სექტემბერი
14 სექტემბერს ჩინეთში საქართველოს ელჩმა, პაატა კალანდაძემ, ნინგსია ხუეის ავტონომიური რეგიონის საგარეო საქმეთა ოფისის დელეგაციასთან შეხვედრა გამართა. დელეგაციას ოფისის დირექტორი, პაი იუჭენი ხელმძღვანელობდა.
საქართველოს საელჩოს ინფორმაციით, მხარეებმა თანამშრომლობის შემდგომი გაღრმავების შესაძლებლობები განიხილეს. შეხვედრა მას შემდეგ გაიმართა, რაც საქართველომ და ჩინეთმა ურთიერთობები ყოვლისმომცველი სტრატეგიული პარტნიორობის დონეზე აიყვანეს. პრეზიდენტებმა ეს გადაწყვეტილება დიპლომატიური ურთიერთობების 34-ე წლისთავზე, 2026 წლის 9 ივნისს, წერილების გაცვლით გამოაცხადეს.
შანხაიში ქართული ღვინის პოპულარიზაციის ახალი კამპანია დაიწყო
16 სექტემბერი
16 სექტემბერს შანხაიში ქართული ღვინის ეროვნულმა სააგენტომ მარკეტინგული და სადეგუსტაციო ღონისძიებების პროგრამა წარადგინა, რომელიც ჩინელ მომხმარებლებს შორის ქართული ღვინის ცნობადობის გაზრდასა და ბაზარზე მისი პოზიციების განმტკიცებას ისახავს მიზნად.
დეგუსტაციაზე ქართული მარნების წარმომადგენლებმა მშრალი და ნახევრად ტკბილი წითელი და თეთრი ღვინოები, ასევე ცქრიალა და ქარვისფერი ღვინოები წარადგინეს. სტუმრებს მარნების ისტორია და საქართველოს მეღვინეობის რეგიონების თავისებურებებიც გააცნეს.
კამპანიის გახსნის ღონისძიება შანხაის სასტუმრო „W“-ში სააგენტოს პარტნიორმა, „Dragon Trail International“-მა გამართა. ღონისძიებას მედიის წარმომადგენლები, ბლოგერები და ღვინის ავტორი დენის ლინი დაესწრნენ. აღნიშნულის შესახებ ინფორმაციას ჩინური გამოცემა „Gourmet Talks” აქვეყნებს.
აზერბაიჯანმა და ჩინეთმა უსაფრთხოების სფეროში თანამშრომლობის შეთანხმება გააფორმეს
14 სექტემბერი
14 სექტემბერს აზერბაიჯანის სახელმწიფო უსაფრთხოების სამსახურმა და ჩინეთის საზოგადოებრივი უსაფრთხოების სამინისტრომ უსაფრთხოების სფეროში თანამშრომლობის შეთანხმება გააფორმეს.
დოკუმენტს ხელი ჩინეთის ძიანსუს პროვინციის ქალაქ ლიანიუნგანგში, სამსახურის უფროსის, გენერალ–პოლკოვნიკ ალი ნაგიევისა და ჩინეთის საზოგადოებრივი უსაფრთხოების მინისტრის, ვანგ სიაოხუნის შეხვედრის შემდეგ მოეწერა. მხარეებმა ტერორიზმის, ტრანსნაციონალური ორგანიზებული დანაშაულისა და სატელეკომუნიკაციო სისტემების გამოყენებით ჩადენილი თაღლითობის წინააღმდეგ თანამშრომლობის გაღრმავება განიხილეს.
ჩინეთის სამინისტროს მიწვევით ჩასული აზერბაიჯანული დელეგაცია საზოგადოებრივი უსაფრთხოების სფეროში თანამშრომლობის მეხუთე გლობალურ ფორუმშიც მონაწილეობდა. ღონისძიებაზე განიხილეს საერთაშორისო პარტნიორობის გაძლიერება, უსაფრთხოების სფეროში ახალი ტექნოლოგიების გამოყენება და მართვის მექანიზმების გაუმჯობესება. ასევე, მიიღეს ტერორიზმის წინააღმდეგ გლობალური ბრძოლის 2026 წლის სამოქმედო გეგმაც. ორმხრივ შეხვედრაზე ნაგიევმა და ვანგმა ინფორმაციის ოპერატიული გაცვლისა და უსაფრთხოების უწყებებს შორის კავშირების განვითარების მნიშვნელობაც აღნიშნეს.
აზერბაიჯანის თავდაცვის მინისტრმა ჩინელ კოლეგასთან სამხედრო თანამშრომლობა განიხილა
15 სექტემბერი
15 სექტემბერს ჩინეთში სამუშაო ვიზიტის ფარგლებში აზერბაიჯანის თავდაცვის მინისტრი, გენერალ–პოლკოვნიკი ზაქირ ჰასანოვი, ჩინეთის თავდაცვის მინისტრს, ადმირალ დონგ ძიუნს, შეხვდა. მხარეებმა სამხედრო და სამხედრო–ტექნიკური თანამშრომლობის, ასევე სამხედრო განათლების სფეროში ურთიერთობების არსებული მდგომარეობა და განვითარების პერსპექტივები განიხილეს. საუბარი საერთაშორისო უსაფრთხოებისა და სტაბილურობის საკითხებსაც შეეხო.
ვიზიტისას ჰასანოვმა ჩინეთის აეროკოსმოსური მეცნიერებისა და მრეწველობის კორპორაციის, „CASIC“-ის, საწარმოც მოინახულა და მის მიერ წარმოებული თავდაცვითი სისტემები დაათვალიერა. 16 სექტემბერს მინისტრი პეკინის მე-13 სიანგშანის ფორუმის გახსნას დაესწრო. თავდაცვის სამინისტროს ცნობით, საერთაშორისო უსაფრთხოების საკითხებზე გამართულ ღონისძიებაში ასზე მეტი ქვეყნის თავდაცვის უწყებების წარმომადგენლები, საერთაშორისო ორგანიზაციები და ექსპერტები მონაწილეობდნენ. ფორუმი 17 სექტემბრამდე გაგრძელდა.
ბაქოში ჩინეთის TRACECA-ში შესაძლო გაწევრიანება განიხილეს
17 სექტემბერი
17 სექტემბერს ბაქოში აზერბაიჯანის საგარეო საქმეთა მინისტრმა, ჯეიჰუნ ბაირამოვმა, და „TRACECA“-ს მთავრობათაშორისი კომისიის მუდმივი სამდივნოს გენერალურმა მდივანმა, ჯასურბეკ ჩორიევმა, ორგანიზაციაში ჩინეთისა და პაკისტანის შესაძლო გაწევრიანების საკითხი განიხილეს.
„TRACECA“-ს განცხადებით, საუბარი ევროპა–კავკასია–აზიის სატრანსპორტო დერეფნის გეოგრაფიული მოცვის გაფართოებასა და ახალი პარტნიორების ჩართვის პერსპექტივებს შეეხო. შეხვედრაზე მხარეებმა შუა დერეფნის განვითარებაზე, სატრანზიტო გადაზიდვების ზრდასა და მიწოდების ვადების შემცირებაზეც იმსჯელეს. შეხვედრაზე ასევე განიხილეს ბაქოსა და ტაშკენტში კომპეტენციის ცენტრების შექმნის, მრავალმხრივი სანებართვო სისტემის დანერგვისა და ვაჭრობის გასამარტივებლად ციფრული ინსტრუმენტების განვითარების ინიციატივები.
აზერბაიჯანის რკინიგზამ ჩინეთიდან შვიდი სატვირთო ლოკომოტივი მიიღო
18 სექტემბერი
18 სექტემბერს „აზერბაიჯანის რკინიგზამ“, „ADY“-მ, ბაქოში ჩინეთში წარმოებული შვიდი ახალი „AC50“-ის ტიპის სატვირთო ლოკომოტივი წარადგინა. კომპანიის ინფორმაციით, „CRRC Ziyang“-ის მიერ დამზადებული ლოკომოტივები საერთაშორისო სატრანსპორტო დერეფნებზე ტვირთების გადასაზიდად არის განკუთვნილი.
კომპანიაში აცხადებენ, რომ ახალი ტექნიკა უფრო მძიმე და გრძელი სატვირთო შემადგენლობების გადაადგილების შესაძლებლობას იძლევა. „ADY“-ს საზოგადოებასთან ურთიერთობის სამსახურის წარმომადგენლის, ბახთიარ ჰაჯიევის განცხადებით, პარკის განახლება შუა დერეფანში ტვირთებზე მოთხოვნისა და ჩინეთიდან აზერბაიჯანის მიმართულებით გაგზავნილი საკონტეინერო მატარებლების რაოდენობის ზრდას უკავშირდება.
სომხეთის თავდაცვის მინისტრმა პეკინში სამხედრო თანამშრომლობის გაფართოება განიხილა
15 სექტემბერი
15 სექტემბერს სომხეთის თავდაცვის მინისტრი სურენ პაპიკიანი პეკინში ჩინეთის თავდაცვის მინისტრს, ადმირალ დონგ ძიუნს შეხვდა. მხარეებმა თავდაცვის სფეროში თანამშრომლობა და მისი განვითარების პერსპექტივები განიხილეს.
სომხეთის თავდაცვის სამინისტროს ინფორმაციით, მინისტრებმა განსაკუთრებული ყურადღება თანამშრომლობის ახალი მიმართულებების განვითარებასა და გრძელვადიან დაგეგმვას დაუთმეს. შეხვედრას ჩინეთში სომხეთის ელჩი ვაჰე გევორგიანიც დაესწრო.
პაპიკიანის ჩინეთში სამუშაო ვიზიტი 14 სექტემბერს დაიწყო. 16 სექტემბერს ის პეკინში სიანშანის მე-13 ფორუმის გახსნას დაესწრო, ხოლო 17 სექტემბერს ჩინეთის მსხვილი სამხედრო–სამრეწველო კომპანიების ხელმძღვანელებთან თანამშრომლობის საკითხები განიხილა. 18 სექტემბერს მინისტრი პეკინის ეროვნული თავდაცვის უნივერსიტეტსაც ეწვია. სამინისტროს განცხადებით, უნივერსიტეტის ხელმძღვანელობასთან შეხვედრაზე რამდენიმე შეთანხმებას მიაღწიეს, თუმცა მათი შინაარსი გამოქვეყნებულ ცნობაში არ დაკონკრეტებულა.
სომხეთში „ArCa-UnionPay“-ის ერთობლივი საბანკო ბარათები წარადგინეს
17 სექტემბერი
17 სექტემბერს სომხეთში სომხური გადახდის სისტემის, „ArCa“-ისა და ჩინური „UnionPay International“-ის ერთობლივი საბანკო ბარათების გამოშვების დაწყების ცერემონია გაიმართა. ღონისძიებას სომხეთის ცენტრალური ბანკის, ორივე გადახდის სისტემის, ჩინეთის საელჩოსა და ფინანსური სექტორის წარმომადგენლები დაესწრნენ.
ერთობლივი ბარათი სომხეთში „ArCa“-ს ინფრასტრუქტურით მომსახურებას, საზღვარგარეთ კი „UnionPay“-ის საერთაშორისო ქსელში გადახდების განხორციელებას ითვალისწინებს. „ArCa“-ს ხელმძღვანელის, ვარდან ხაჩატრიანის განცხადებით, ბარათების გამოშვება თანამშრომლობის პირველი ეტაპია და მომავალში სხვა მომსახურებების, მათ შორის სწრაფი ფულადი გადარიცხვების განვითარებაც იგეგმება. „UnionPay“-ის წარმომადგენელმა პარტნიორობა სომხეთის საგადახდო ბაზარზე კომპანიის საქმიანობის გაფართოების მნიშვნელოვან ნაბიჯად შეაფასა.
ტაშკენტის ოლქის დელეგაციამ ჩინეთში სამრეწველო და ენერგეტიკული თანამშრომლობა განიხილა
15 სექტემბერი
15 სექტემბერს ჩინეთის ქალაქ ტიანძინში გამართულ უზბეკეთ–ჩინეთის ბიზნესფორუმში ორასზე მეტი, მთლიანობაში 300-ზე მეტი, მეწარმე მონაწილეობდა. უზბეკურ დელეგაციას ტაშკენტის ოლქის გუბერნატორი, ზოირ მირზაევი ხელმძღვანელობდა.
მონაწილეებმა ოლქის საინვესტიციო და საექსპორტო შესაძლებლობები, საწარმოო ბაზა და სატრანსპორტო ინფრასტრუქტურა განიხილეს. ფორუმის ფარგლებში გამართული შეხვედრების შედეგად სამი დოკუმენტი გაფორმდა. ვიზიტის ფარგლებში დელეგაციამ ჩინურ კომპანიებთან ქიმიური და ნავთობქიმიური წარმოების, ტექნოლოგიების ადგილობრივად დანერგვისა და განახლებადი ენერგეტიკის საკითხებზეც გამართა მოლაპარაკებები.
