ერთი ახალი ამბავი

ირანის კრიზისის ფონზე ჩინეთი დიპლომატიურ აქტივობას აძლიერებს და აცხადებს, რომ დეესკალაციისა და მოლაპარაკებების ხელშეწყობას გააგრძელებს. პეკინის შეფასებით, ამ ეტაპზე მთავარი ამოცანა რეგიონში შემდგომი დაპირისპირების თავიდან აცილება და დიალოგისთვის სივრცის შენარჩუნებაა.

ჩინეთის ეს პოზიცია 15 აპრილის ბრიფინგზე დადასტურდა, სადაც საგარეო საქმეთა სამინისტროს სპიკერმა გუო ძიაკუნმა განაცხადა, რომ პეკინი მიესალმება ყველა იმ ძალისხმევას, რომელიც კონფლიქტის დასრულებას ემსახურება.

ამავე მიდგომის ფარგლებში, ჩინეთის საგარეო საქმეთა სამინისტროს ინფორმაციით, 14 აპრილს აბუ-დაბის მემკვიდრე პრინცთან, შეიხ ხალედ ბინ მუჰამედ ბინ ზაიდ ალ ნაჰიანთან შეხვედრისას, სი ძინპინმა ახლო აღმოსავლეთში მშვიდობის აუცილებლობის შესახებ ისაუბრა და სტაბილურობის დაცვისთვის ოთხი მთავარი პრინციპი გამოყო: მშვიდობიანი თანაარსებობა, ეროვნული სუვერენიტეტი, საერთაშორისო სამართალი და განვითარებისისა და უსაფრთხოების ბალანსი.

Wall Street Journal-ის ცნობით, 15 აპრილს ჩინეთის საგარეო საქმეთა მინისტრმა ვან იმ ირანის საგარეო საქმეთა მინისტრ სეიდ აბას არაღჩისთან სატელეფონო საუბარი გამართა, სადაც მხარეებმა რეგიონში შექმნილი ვითარება და ირან-აშშ-ის მოლაპარაკებები განიხილეს. ვან იმ აღნიშნა, რომ ვითარება „ომსა და მშვიდობას შორის კრიტიკულ ეტაპზეა“ და „მშვიდობის შესაძლებლობის ფანჯარა იხსნება“. მისივე განცხადებით, პეკინი მხარს უჭერს როგორც ცეცხლის შეწყვეტისა და მოლაპარაკებების გაგრძელებას, ისე ირანის სუვერენიტეტის დაცვასა და ჰორმუზის სრუტეში ნავიგაციის უსაფრთხოების უზრუნველყოფას.

კრიზისის ფონზე ჩინეთი დიპლომატიურ ჩართულობას როგორც პირდაპირი კომუნიკაციის, ისე საერთაშორისო პარტნიორების ჩართულობით აგრძელებს. კერძოდ, 31 მარტს ჩინეთმა და პაკისტანმა ერთობლივი ხუთპუნქტიანი ინიციატივა წარადგინეს, რომელიც დაუყოვნებლივ ცეცხლის შეწყვეტას, სამშვიდობო მოლაპარაკებების დაწყებასა და ირანისა და სპარსეთის ყურის ქვეყნების სუვერენიტეტის დაცვას ითვალისწინებს.

ჩინეთი ამ პროცესში განსაკუთრებით ფრთხილად მოქმედებს: ერთი მხრივ ცდილობს ირანთან საკომუნიკაციო არხების შენარჩუნებას, მეორე მხრივ კი ვაშინგტონთან ურთიერთობის გამწვავებას არიდებს თავს.

Reuters წერს, რომ ვან ის ცეცხლის შეწყვეტის საკითხთან დაკავშირებით 30-მდე სატელეფონო საუბარი და შეხვედრა ჰქონდა, ხოლო ჩინეთის სპეციალურმა წარმომადგენელმა სპარსეთის ყურისა და არაბული რეგიონის რამდენიმე დედაქალაქში დიპლომატიური კონსულტაციები გამართა. სააგენტო იუწყება, რომ პეკინის ეს აქტიურობა დონალდ ტრამპის მიერ მაისში სი ძინპინთან შეხვედრის შესახებ გაკეთებულ განცხადებებს ემთხვევა, თუმცა ჩინეთის საგარეო უწყებამ მხოლოდ ის დაადასტურა, რომ ამ საკითხზე მხარეებს შორის კომუნიკაცია ჯერ კიდევ გრძელდება.

ავტორი: მარიამ სიმსივე