ერთი ახალი ამბავი

აზერბაიჯანი და ჩინეთი აძლიერებენ სტრატეგიულ პარტნიორობას

ერთი ახალი ამბავი / /

2025 წლის 23 აპრილს, პეკინში, აზერბაიჯანის პრეზიდენტ ილჰამ ალიევის სახელმწიფო ვიზიტის ფარგლებში, აზერბაიჯანმა და ჩინეთმა ხელი მოაწერეს „ყოვლისმომცველი სტრატეგიული პარტნიორობის ჩამოყალიბების შესახებ ერთობლივ განცხადებას“. ეს ისტორიული ნაბიჯი ხაზს უსვამს ორი ქვეყნის მისწრაფებას, გააღრმავონ თანამშრომლობა ეკონომიკის, ინფრასტრუქტურის, უსაფრთხოებისა და კულტურის სფეროებში. ჩინეთი მხარს უჭერს აზერბაიჯანის სწრაფ გაწევრიანებას მსოფლიო სავაჭრო ორგანიზაციაში (WTO) და მის მშვიდობის დღის წესრიგს. თანამშრომლობის გაღრმავების შესახებ გადაწყვეტილება ასევე პასუხობს აზერბაიჯანზე დასავლეთის ზეწოლას COP29-ის მასპინძლობის გამო და ცხადჰყოფს, რომ აზერბაიჯანი ჩინეთს, როგორც სანდო პარტნიორს, უფრო მეტად ეყრდნობა.

ვიზიტის ფარგლებში, ალიევმა და ჩინეთის პრეზიდენტმა სი ძინპინმა გამოხატეს ურყევი მხარდაჭერა ერთმანეთის სუვერენიტეტისა და ტერიტორიული მთლიანობისადმი. აზერბაიჯანმა კვლავ დაადასტურა „ერთიანი ჩინეთის“ პრინციპის მხარდაჭერა, ხოლო ჩინეთმა მხარი დაუჭირა აზერბაიჯანის მშვიდობიან ინიციატივებს. ხელი მოეწერა მრავალ შეთანხმებას, მათ შორის სავიზო გამონაკლისის, ნაღმსაწინააღმდეგო ჰუმანიტარული თანამშრომლობის, სისხლის სამართლის საქმეებში სამართლებრივი დახმარებისა და ეკონომიკური თანამშრომლობის შესახებ, რაც ორ ქვეყანას შორის პოლიტიკური ნდობის გაძლიერებას ემსახურება.  

ეკონომიკური თანამშრომლობა ვიზიტის ერთ-ერთი მთავარი აქცენტი იყო. 2024 წელს ორმხრივი ვაჭრობა 20.7%-ით გაიზარდა, 3.7 მილიარდ დოლარს მიაღწია, რამაც ჩინეთი აზერბაიჯანის მთავარ საექსპორტო პარტნიორად აქცია. ჩინეთის „სარტყლისა და გზის“ ინიციატივა შეესაბამება აზერბაიჯანის „აბრეშუმის გზის აღორძინების“ სტრატეგიას, განსაკუთრებით ტრანსკასპიური სავაჭრო მარშრუტის განვითარებაში, სადაც 2024 წელს ტვირთის მოცულობა 86%-ით, 378,000 ტონამდე გაიზარდა. მხარეები გეგმავენ მოლაპარაკებებს თავისუფალი ვაჭრობის შეთანხმებაზე, რაც ხელს შეუწყობს ეკონომიკური თანამშრომლობის გაღრმავებას.

ვიზიტის დროს ხელი მოეწერა 20-ზე მეტ შეთანხმებას, მათ შორის მეცნიერების, ტექნოლოგიების, კულტურისა და ტურიზმის სფეროებში. მაგალითად, მხარეებს შორის მიღწეულ იქნა 2025-2029 წლებისთვის კულტურული თანამშრომლობის ოქმი, ციფრული ეკონომიკისა და მწვანე განვითარების მემორანდუმები. გარდა ამისა, ნახიჩევანისა და ჩინეთის ქალაქ ურუმჩის მერები შეთანხმდნენ, რომ ეს ქალაქები გახდნენ დაძმობილებულნი, რაც ხელს შეუწყობს ადგილობრივ დონეზე თანამშრომლობას. ეს ყველაფერი აჩვენებს, რომ ორივე ქვეყანა ცდილობს გააძლიეროს არა მხოლოდ ეკონომიკური, არამედ კულტურული და საგანმანათლებლო კავშირები.

ალიევის ვიზიტი და ხელმოწერილი შეთანხმებები აზერბაიჯანის გეოპოლიტიკური სტრატეგიის ნაწილია, რომელიც მიზნად ისახავს დასავლეთის გავლენის ბალანსირებას ჩინეთთან და გლობალურ სამხრეთთან თანამშრომლობით. ჩინეთის მხარდაჭერა COP29-ის წარმატებულ ჩატარებასა და აზერბაიჯანის ლიდერობას შანხაის თანამშრომლობის ორგანიზაციაში (SCO) ხაზს უსვამს პეკინის მზარდ ინტერესს, აზერბაიჯანი განიხილოს არა მხოლოდ ლოგისტიკურ კვანძად, არამედ სტრატეგიულ პარტნიორად. თუმცა, ამ თანამშრომლობის წარმატება დამოკიდებული იქნება იმაზე, თუ რამდენად შეძლებენ მხარეები დააბალანსონ ერთმანეთის ინტერესები გლობალური დაძაბულობის ფონზე.

ავტორი: სანდრო კაპანაძე

აზერბაიჯანი და ჩინეთი აძლიერებენ სტრატეგიულ პარტნიორობას Read More »

ჩინეთში სანქცირებული რუსული ნავთობის იმპორტი იზრდება

ერთი ახალი ამბავი / /

რუსეთი აპრილის თვეში  მნიშვნელოვნად ზრდის არქტიკული ნავთობის ექსპორტს ჩინეთში. ჩინეთში რუსული ნავთობი შემცირებული ფასით იყიდება, ხოლო ამისთვის გამოიყენება ის ტანკერები, რომლებზეც აშშ-ის სანქციები არ ვრცელდება. ამის შესახებ ინფორმაციას  ანალიტიკური კომპანია Vortexa და ორი რუსი ნავთობით მოვაჭრე ავრცელებს. რუსული კომპანიები Lukoil-ი და Gazprom Neft-ი აღნიშნულ საკითხზე კომენტარს არ აკეთებენ.

რუსეთის საზღვაო ნავთობის ექსპორტის დაახლოებით 10%-ს არქტიკული ნავთობი შეადგენს, რომლის მიწოდება იანვარში აშშ-ის სანქციების გამოცხადების შემდეგ მნიშვნელოვნად შეფერხდა. სანქციებმა ძირითადად არქტიკული ნავთობის ისეთ სატვირთო პარტიებზე იმოქმედა, როგორიცაა ARCO, Novy Port და Varandey, აგრეთვე სანქციები შეეხო სახელმწიფო კომპანიას Gazprom Neft-ს.

შეზღუდვების თავიდან ასაცილებლად, მოვაჭრეები ნავთობს საერთაშორისო წყლებში, სინგაპურსა და მალაიზიასთან ახლოს, გემიდან გემზე გადაზიდვის (STS) მეთოდით ტვირთავენ. გადატვირთვის შემდეგ, სანქციების მიღმა დარჩენილი Very Large Crude Carrier (VLCC) ტიპის ტანკერები საქონელს ჩინეთისკენ გზავნიან.

ლი-ს თქმით, გასულ კვირას ამ გზით სულ მცირე 4 მილიონი ბარელი არქტიკული ნავთობის გადაზიდვა განხორციელდა, ხოლო აპრილის ბოლომდე კიდევ 16 მილიონი ბარელის გაგზავნა იგეგმება სამხრეთ ჩინეთის ზღვაში. მისი განმარტებით, ჩინეთის მხრიდან არქტიკულ ნავთობზე მოთხოვნა კვლავ იზრდება, თუმცა საბოლოოდ გადმოტვირთული მოცულობა დამოკიდებული იქნება როგორც ლოჯისტიკურ სირთულეებზე, ასევე ჩინელი გადამმუშავებელი საწარმოების ინტერესზე.

Vortexa-ს მონაცემებით, მარტში ჩინეთმა დღიურად დაახლოებით 25,000 ბარელი არქტიკული ნავთობი შეიძინა. ერთი მოვაჭრის თქმით, ასეთი ტიპის გადაზიდვები აუცილებელია, რადგან ჩინურ გადამამუშავებლებს ურჩევნიათ სანქციების მიღმა მყოფი ტანკერებით გადაზიდული ნავთობის შეძენა, რათა თავიდან აირიდონ დამატებითი რისკები და სანქციები. ისინი მზად არიან ამისთვის უფრო მაღალი ფასიც გადაიხადონ.

მაგალითად, Kpler-ის მონაცემებით, არასანქცირებული VLCC ტიპის ტანკერმა Atila-მ მარტში სინგაპურის წყლებში ორი სანქცირებული გემიდან დაახლოებით 2.07 მილიონი ბარელი ნავთობი გადაიტვირთა. ეს ნავთობი აპრილში ჩინეთის შანდუნის პროვინციაში, დონგინგის პორტში ჩამოტვირთეს. აღსანიშნავია, რომ Atila-ს მანამდეც იყენებდნენ ირანული ნავთობის გადაზიდვისას მსგავსი ოპერაციებისთვის.

არქტიკული ნავთობის მარაგი აკუმულირდება რუსეთის ჩრდილოეთ რეგიონებიდან, სადაც მკაცრი კლიმატური პირობები და მოპოვების ტექნიკური სირთულე უზარმაზარ საინვესტიციო რესურსს მოითხოვს. 

ამჟამად, ნავთობის მიწოდებას რუსეთიდან ჩინეთში დაახლოებით ორი თვე სჭირდება, რადგან ტანკერები სუეცის არხის მეშვეობით გადაადგილდებიან, ხოლო გემიდან გემზე გადატვირთვები ტრანსპორტირების ხარჯებს კიდევ უფრო ზრდის. მოვაჭრეების თქმით, ალტერნატიული — უფრო მოკლე ჩრდილოეთის საზღვაო მარშრუტი (NSR) ივლისამდე დაკეტილია.

მოვაჭრეთა ცნობით, არქტიკული ნავთობი, რომელიც ადრე Brent-ზე უფრო ძვირად ფასობდა, ახლა უკვე ფასდაკლებით იყიდება.

ინდოეთი, რომელიც აქამდე არქტიკული ნავთობის ერთ-ერთი მთავარი შემსყიდველი იყო, სანქციების გამო შესყიდვებს ამცირებს. ამასთან, ინდოეთის ხელისუფლებამ ამ თვეში ერთი-ერთი ტანკერის მიერ რუსული ნავთობის გემიდან გემზე გადატვირთვა შეზღუდა.

რუსული არქტიკული ნავთობის სხვა შემსყიდველებს შორისაა სირია, რომელმაც წელს უკვე მიიღო პირველი პარტიები, და მიანმარი.

ჩინეთში სანქცირებული რუსული ნავთობის იმპორტი იზრდება Read More »

ჩინეთმა ახალი სავაჭრო წარმომადგენელი დანიშნა

ერთი ახალი ამბავი / /

ჩინეთმა ამერიკასთან ესკალაციური სავაჭრო ომის ფონზე, მნიშვნელოვანი სტრატეგიული ნაბიჯი გადადგა, როდესაც ოთხშაბათს ახალი საერთაშორისო სავაჭრო წარმომადგენელი, ლი ჩენგანგი, დანიშნა. ეს ცვლილება ხაზს უსვამს პეკინის მისწრაფებას, გააძლიეროს თავისი პოზიციები აშშ-თან მოლაპარაკებებში და შეამსუბუქოს ტრამპის მიერ დაწესებული ტარიფების ზეწოლა. ჩინეთის ეს გადაწყვეტილება ასევე ასახავს მის მცდელობას, შეინარჩუნოს გავლენა გლობალურ სავაჭრო სისტემაში, განსაკუთრებით მსოფლიო სავაჭრო ორგანიზაციის (WTO) ფარგლებში, სადაც პეკინი თავს სტაბილურობის წყაროდ წარმოაჩენს. ლი ჩენგანის დანიშვნა არა მხოლოდ ტაქტიკური, არამედ სიმბოლური ნაბიჯია, რომელიც ასახავს ჩინეთის ორმაგ სტრატეგიას: ერთი მხრივ, გაუმკლავდეს აშშ-ს ეკონომიკურ ზეწოლას, მეორე მხრივ, გააძლიეროს თავისი, როგორც გლობალური სავაჭრო სისტემის ლიდერის, პოზიცია.

58 წლის ლი ჩენგანი, ჩაანაცვლებს 59 წლის ვან შოუვენს, რომელიც 2018 წლიდან იყო ჩინეთის სავაჭრო წარმომადგენელი და მნიშვნელოვანი როლი ითამაშა 2020 წლის ჩინეთ-აშშ-ის სავაჭრო შეთანხმების მოლაპარაკებებში. ოფიციალური მიზეზი ცვლილების შესახებ არ გამჟღავნებულა, მაგრამ ანალიტიკოსები ვარაუდობენ, რომ ეს შეიძლება იყოს პეკინის მცდელობა, გარღვევა მოახდინოს მოლაპარაკებებში, რომლებიც გაზრდილი დაძაბულობის გამო ჩიხშია შესული. ლის გამოცდილება ჟენევაში, სადაც მან დაამყარა კავშირები საერთაშორისო პარტნიორებთან, მათ შორის აშშ-ის წარმომადგენლებთან, მას ამ მიზნისთვის იდეალურ კანდიდატად აქცევს.

ლი ჩენგანი  მაღალი კვალიფიკაციის მქონე დიპლომატია, რომელიც 2021 წლის თებერვლიდან იყო ჩინეთის ელჩი WTO-ში, სადაც ხმამაღლა აკრიტიკებდა აშშ-ს სატარიფო პოლიტიკას, მათ შორის თებერვლის WTO-ს გენერალური საბჭოს შეხვედრაზე, სადაც განაცხადა, რომ „აშშ ცალმხრივად და თვითნებურად არღვევს WTO-ს წესებს“. მისი ათწლეულების გამოცდილება კომერციის სამინისტროში, მათ შორის ჩინეთის WTO-ში გაწევრიანების მოლაპარაკებებში მონაწილეობა, მას მყარ საფუძველს აძლევს რთული სავაჭრო დავების მართვისთვის.

ჩინეთის ეკონომიკამ, ძლიერი ექსპორტისა და საცალო გაყიდვების წყალობით, 2025 წლის პირველ კვარტალში 5.4%-იანი ზრდა აჩვენა, რაც აღემატება ანალიტიკოსების 5.1%-იან მოლოდინს. თუმცა, ეროვნული სტატისტიკის ბიუროს სპიკერმა, შენგ ლაიუნმა, განაცხადა, რომ აშშ-ს ტარიფები „გარკვეულ ზეწოლას“ ახდენს ექსპორტზე, რომელიც ჩინეთის ეკონომიკის მამოძრავებელია. ტარიფების საპასუხოდ, პეკინი ცდილობს გააძლიეროს შიდა მოხმარება და გააფართოოს თანამშრომლობა ევროპასა და გლობალურ სამხრეთთან. თუმცა აშშ-ს მომხმარებლის ჩანაცვლება რთული იქნება, განსაკუთრებით ჩინეთში შიდა მოხმარების შემცირებისა და უძრავი ქონების კრიზისის ფონზე. ლი ჩენგანის თავისუფალი ვაჭრობისადმი მხარდაჭერა შეიძლება იყოს ორლესილი მახვილი: ერთი მხრივ, ის ხელს უწყობს ჩინეთის, როგორც გლობალური ვაჭრობის დამცველი ქვეყნის, იმიჯს, მაგრამ მეორე მხრივ, შეიძლება გაართულოს მოლაპარაკებები ტრამპის ადმინისტრაციასთან, რომელიც მკაცრ პროტექციონისტულ პოლიტიკას ეწევა. შესაბამისად, ლის წარმატება დამოკიდებული იქნება მის უნარზე, დააბალანსოს ჩინეთის მტკიცე პოზიცია და მოლაპარაკებებისთვის ღიაობა, რათა თავიდან აიცილოს სავაჭრო ომის შემდგომი ესკალაცია.

ჩინეთის პრეზიდენტი სი ძინპინი,  აქტიურად ცდილობს, ჩინეთი გლობალური თავისუფალი ვაჭრობის „სტაბილურობისა და გარკვეულობის“ წყაროდ წარმოაჩინოს, განსაკუთრებით სამხრეთ-აღმოსავლეთ აზიაში, სადაც აშშ-ის გავლენის შეკავება პეკინის ერთ-ერთი მთავარი პრიორიტეტია. ბოლო დღეებში მისი ვიზიტები ვიეტნამსა და მალაიზიაში, სადაც განიხილება ჩინეთსა და ASEAN-ის 10 წევრს შორის თავისუფალი ვაჭრობის შეთანხმება, ხაზს უსვამს პეკინის მცდელობას, გააძლიეროს რეგიონული პარტნიორობა და თავი აარიდოს დასავლეთის მიერ დომინირებულ სავაჭრო ორგანიზაციებს. ეს ნაბიჯები ასევე პასუხია აშშ-ის მიერ ვიეტნამისთვის 46%-იანი ტარიფების დაწესებაზე, რომლებიც მოგვიანებით 90-დღიანი მოლაპარაკებების ვადით შეჩერდა.

ავტორი: სანდრო კაპანაძე

ჩინეთმა ახალი სავაჭრო წარმომადგენელი დანიშნა Read More »

სი ძინპინი ჰანოიში – ჩინეთი რეგიონული ლიდერობისთვის იბრძვის

ერთი ახალი ამბავი / /

ჩინეთი, ამერიკასთან სავაჭრო ომისა და დაძაბულობის ფონზე, აზია-წყნარი ოკეანის რეგიონში დომინაციის საჩვენებლად სტრატეგიული ნაბიჯების გადადგმას განაგრძობს. ამჯერად, ჩინეთის პრეზიდენტი სი ძინპინი ვიეტანამის დედაქალაქ ჰანოის ესტუმრა, რითაც გამოხატა მკაფიო სურვილი, შეინარჩუნოს მჭიდრო ეკონომიკური და პოლიტიკური პარტნიორობა სამხრეთ-აღმოსავლეთ აზიის სახელმწიფოებთან.

14 აპრილს, ჰანოიში ჩასვლიდან მალევე, სი ძინპინმა განაცხადა, რომ იმედი აქვს, ამ შეხვედრას გამოიყენებს, როგორც შესაძლებლობას, ღრმა დისკუსიები გამართოს ვიეტნამის ლიდერებთან ორ ქვეყნის ურთიერთობებისა და სტრატეგიული თანამშრომლობის, ასევე საერთო რეგიონალური პრობლემების შესახებ.  

პეკინმა ბოლო ათწლეულის განმავლობაში ვიეტნამთან ეკონომიკური პარტნიორობა გააძლიერა. ჩინეთი ვიეტნამის უდიდესი სავაჭრო პარტნიორია. ვიეტნამს მნიშნელოვანი სავაჭრო დანიშნულება აქვს ჩინეთისთვის, იმის გათვალისწინებით, რომ ამერიკაში ექსპორტირებული ჩინური პროდუქტები სწორედ ვიეტნამის ტერიტორიაზე გადის. გასულ კვირას ამერიკამ ვიეტნამს 46%-იანი ტარიფები დაუწესა. თუმცა, მოგვიანებით, ტრამპმა ტარიფები შეაჩერა და სავაჭრო ბარიერების მოსახსნელად მოლაპარაკებების წამოსაწყებად 90 დღიანი ვადა დაუწესა ყველა სახელმწიფოს (გარდა ჩინეთის), მათ შორის, ვიეტნამს.

სახალხო განმათავისუფლებელი არმიის (PLA) ყოფილი ოფიცრის, ჟოუ ბოს თქმით, სანამ პრეზიდენტი დონალდ ტრამპი ვაშინგტონის მოკავშირეებზე ზეწოლას ახდენს, კონტინენტური ჩინეთი ორიენტირებულია მაღალტექნოლოგიური „გლობალური საზღვაო ფლოტის“ შექმნაზე. ტაივანის საკითხი კონფლიქტის პოტენციური გამწვავების მიზეზი შეიძლება იყოს, თუმცა ეს არაა ერთადერთი საკითხი, რომელიც განაპირობებს პეკინის სამხედრო ინდუსტრიის, განსაკუთრებით კი, საზღვაო ფლოტის განვითარებას. ტაივანის გარდა, ასევე დაძაბულობაა სამხრეთ ჩინეთის ზღვაში – დაპირისპირება ჩინური თავდაცვის ძალებსა და ფილიპინურ გემებს შორის. პეკინსა და ფილიპინებს შორის დაძაბულობა გამოწვეულია სამხრეთ ჩინეთის ზღვის რესურსების სიმდიდრითა და ამ გეოგრაფიულ არეალში სადავო კუნძულების არსებობით. გარდა ამისა, დაძაბულობას ამწვავებს აშშ-სა და ფილიპინებს შორის არსებული პარტნიორობა. 

1 აპრილს, ჩინეთის სახალხო განმათავისუფლებელმა არმიამ (PLA) ერთობლივი წვრთნები გაფრთხილების გარეშე დაიწყო. პეკინმა ტაივანის მთავარი კუნძულის გარშემო მდებარე პოზიციებზე გაგზავნა 76 თვითმფრინავი და 20-ზე მეტი საზღვაო და სანაპირო დაცვის ხომალდი, მათ შორის შანდონგის გადამზიდავი ჯგუფი. წვრთნები მომდევნო დღესაც გაგრძელდა, ტაივანის სრუტის ცენტრალურ და სამხრეთ რაიონებში, სადაც ვარჯიშობდნენ საკვანძო პორტებისა და ენერგეტიკული ინფრასტრუქტურებისთვის თავდასხმაზე. ამის ფონზე, მომდევნო დღეს, შტატებმა სრული თანადგომა გამოუცხადა ტაივანსა და სხვა პარტნიორებს “ჩინეთის დაშინების ტაქტიკისა და დესტაბილიზაციის ხელშემწყობი ქცევების ფონზე”.

როგორც მალკოლმ დევისი, ავსტრალიის სტრატეგიული პოლიტიკის ინსტიტუტის უფროსი ანალიტიკოსი აცხადებს, იმის გათვალისწინებით, რომ ტრამპმა ტაივანის საკითხზე ბოლოს კომენტარი თებერვალში გააკეთა, ჩინეთი აგრძელებს შტატებზე უბრალოდ დაკვირვებას და აინტერესებთ, რამდენად შორს შეუძლიათ წასვლა.

ექსპერტები ამბობენ, რომ ჩინეთი აძლიერებს თავის საზღვაო ძალებს ინდო-წყნარ ოკეანეში, რათა რეგიონალურ მეზობლებს მკაფიო შეტყობინება გაუზგავნოს სამხედრო უპირატესობის შესახებ. პარალელურად, პეკინი, დიდი კონკურენტის, დონალდ ტრამპის ფიქრებსა და აზროვნებას ამოწმებს.

სი ძინპინი ჰანოიში – ჩინეთი რეგიონული ლიდერობისთვის იბრძვის Read More »

„ტარიფების ომი“  ჩინეთსა და აშშ-ს შორის

ერთი ახალი ამბავი / /

აშშ-ს  პრეზიდენტმა, დონალდ ტრამპმა, საარჩევნო კამპანიაში ქვეყნებზე ტარიფების დაწესების შესახებ დაპირებების შემდეგ, აღნიშნული პოლიტიკის უშუალოდ გატარება დაიწყო. ტარიფების განსაკუთრებული სამიზნე ჩინეთი გახდა, რომელსაც ტრამპის ადმინისტრაციამ თავდაპირველად 54%, ხოლო მოგვიანებით 145%-იანი ტარიფი დაუწესა.

აშშ-ს მხრიდან ტარიფების ზრდა ჩინეთის საპასუხო ტარიფებს მოჰყვა –  ჩინეთმა ამერიკულ ტარიფებს 10 აპრილს 34%-ით უპასუხა, ჩინეთზე ამერიკული ტარიფების ზრდის შემდეგ ისინი 84%-მდე გაზარდა, ხოლო შაბათს, 12 აპრილს – 125%-მდე. ჩინეთის ვაჭრობის სამინისტროს განცხადებით, ჩინეთი „ბოლომდე იბრძოლებს“ იმ შემთხვევაში, თუ აშშ „დაჟინებულად ეცდება ტარიფების ან სავაჭრო ომის პროვოცირებას“.

აღსანიშნავია, რომ 12 აპრილს დონალდ ტრამპმა სმარტფონებზე, კომპიუტერებსა და სხვა ელექტრონულ მოწყობილობებზე ტარიფებისგან გამონაკლისის დაშვებაზე ისაუბრა, რაც ისეთი კომპანიებისთვის, როგორიც, მაგალითად, „ეფლია“ დიდ შეღავათს გამოიწვევდა, ვინაიდან მსგავსი კომპანიები იმპორტირებულ პროდუქციაზე მნიშვნელოვნად არიან დამოკიდებული. ამავე დღეს, აშშ-ს პრეზიდენტის ამ ნაბიჯს ჩინეთის მხრიდანაც მოჰყვა გამოხმაურება – ჩინეთის ვაჭრობის სამინისტროს მიხედვით, ეს გადაწყვეტილება „პატარა ნაბიჯია უნილატერალური „საპასუხო ტარიფების“ სახით [ჩინეთთან] არასწორი მიდგომების გამოსასწორებლად“. გარდა ამისა, სამინისტრომ განაცხადა, რომ ვაშინგტონი მძიმედ აზიანებდა საერთაშორისო ეკონომიკურ და სავაჭრო მოწყობას და ქვეყანას მსგავსი პოლიტიკის წარმოებისთვის თავის დანებებისა და „საერთო პატივისცემისა და განსხვავებების დიალოგის გზით გადაწყვეტის სახით სწორი გზისკენ დაბრუნებისკენ“ მოუწოდა. ამის მიუხედავად, მოგვიანებით, 13 აპრილს, დონალდ ტრამპმა გამონაკლისების შესახებ განცხადება შეასწორა და თქვა, რომ ტარიფებისგან თავისუფალი არაფერი იქნება და ელექტრონული მოწყობილობები უბრალოდ ტარიფების სხვა „დონეზე“ გადავიდოდა, შესაბამისად, მათზე ისევ მოქმედებს 20%-იანი ტარიფები, თუმცა, მისი განცხადებით, პირობები „მოქნილი“ იქნება გარკვეული კომპანიებისთვის.

მნიშვნელოვანია ისიც, რომ აშშ-ს მსგავსი პოლიტიკის ფონზე, ჩინეთი ევროკავშირთან დაახლოებას ცდილობს – ჩინეთის პრეზიდენტმა, სი ძინპინმა, 11 აპრილს, ესპანეთის პრემიერ მინისტრთან შეხვედრისას განაცხადა, რომ პეკინი და ევროკავშირი აშშ-ს „დაშინებას“  გაერთიანებული ძალებით უნდა შეეწინააღმდეგონ და მათი „საერთაშორისო პასიხოსმგებლობა“ შეასრულონ, რომელიც ეკონომიკური გლობალიზაციისა და სამართლიანი საერთაშორისო სავაჭრო გარემოს ჩამოყალიბებას უკავშირდება.

„ტარიფების ომი“  ჩინეთსა და აშშ-ს შორის Read More »

როგორ პასუხობს “ქართული ოცნება” აშშ-ს მიერ ანაკლიის შესახებ გავრცელებულ გზავნილებს?

ამბები, ანაკლია, ერთი ახალი ამბავი / /

„ქართული ოცნების“ წარმომადგენლების მოლოდინების საპირისპიროდ, ბოლო პერიოდში ამერიკელი პოლიტიკოსების განცხადებები ადასტურებს, რომ ტრამპის ადმინისტრაცია არ არის ინდიფერენტული ანაკლიის პორტის ჩინური კომპანიისთვის გადაცემის გადაწყვეტილების მიმართ. მეტიც, როგორც რესპუბლიკური, ისე დემოკრატიული პარტიის წარმომადგენლები ანაკლიის პორტში ჩინური კომპანიის ჩართვას განიხილავენ როგორც ჩინეთის – აშშ-ს კონკურენტი სახელმწიფოს მცდელობას, გააძლიეროს საკუთარი გავლენა შავი ზღვის რეგიონში.

ანაკლიასთან დაკავშირებით ვაშინგტონის ბოლოდროინდელ გზავნილებს, „ქართული ოცნების“ წარმომადგენლები განსხვავებული ნარატივებით პასუხობენ. ერთი მხრივ, არალეგიტიმურმა პრემიერ-მინისტრმა, ირაკლი კობახიძემ ამერიკელი პოლიტიკოსების განცხადებები ე.წ. Deep State-ის ზეგავლენის შედეგად მიიჩნია. მეორე მხრივ, არალეგიტიმურმა ვიცე-პრემიერმა, ლევან დავითაშვილმა პორტის ჩინური კომპანიისთვის გადაცემის საკითხი კითხვის ნიშნის ქვეშ დააყენა.

ანაკლიის პორტის შესახებ „ქართული ოცნების“ ბოლოდროინდელი განცხადებებისა და გზავნილების შესახებ უფრო ვრცლად იხილეთ სრული ანგარიში.

სრული ანგარიში

როგორ პასუხობს “ქართული ოცნება” აშშ-ს მიერ ანაკლიის შესახებ გავრცელებულ გზავნილებს? Read More »

ზელენსკის თქმით რუსეთის მხარეს უკრაინაში ჩინეთის 150-ზე მეტი მოქალაქე იბრძვის

ერთი ახალი ამბავი / /

უკრაინა ჩინეთის მოქალაქეებს რუსეთის სამხედრო აგრესიაში მონაწილეობაში ადანაშაულებს. განცხადების მიხედვით, უკრაინას მოპოვებული აქვს დეტალური სადაზვერვო ინფორმაცია 150-ზე მეტ დაქირავებულზე, რომლებიც, სავარაუდოდ, მოსკოვმა სოციალური მედიის საშუალებით მოიზიდა და ჩართო საომარ მოქმედებებში. ჩინეთის ხელისუფლებამ ამ ბრალდებებს “სრულიად უსაფუძვლო” უწოდა. 

უკრაინის პრეზიდენტმა ვოლოდიმირ ზელენსკიმ სამშაბათს განაცხადა, რომ უკრაინის შეიარაღებულმა ძალებმა დაატყვევეს ჩინეთის ორი მოქალაქე, რომლებიც რუსეთის მხარეს იბრძოდნენ უკრაინის ტერიტორიაზე. ეს იყო პირველი შემთხვევა, როცა უკრაინამ ოფიციალურად განაცხადა ჩინელი მებრძოლების მონაწილეობაზე ომში. ზელენსკიმ ასევე აღნიშნა, რომ კიევი მზად არის დატყვევებული ორი ჩინელი მოქალაქე რუსეთის მიერ დატყვევებულ უკრაინელ ჯარისკაცებში გაცვალოს.

მიუხედავად იმისა, რომ პრეზიდენტმა ზელენსკიმ მტკიცებულებები არ წარმოადგინა, მან განაცხადა, ჩინეთის ოფიციალურ პირებს ჰქონდათ ინფორმაცია იმაზე, რომ რუსეთი ჩინელი მოქალაქეების ომში ჩართვაზე მუშაობდა. თუმცა, მან თავი შეიკავა იმის თქმისგან, რომ ჩინეთის მთავრობა ოფიციალურად ახალისებდა მათ მონაწილეობას ომში. 

ზელენსკის თქმით, უკრაინას აღმოაჩნდა ინფორმაცია ჩინეთის 155 მოქალაქის შესახებ, რომლებიც უკრაინაში რუსეთის მხარეს იბრძვიან. უკრაინის სახელმწიფოს ხელშია მათი გვარები და პასპორტის მონაცემები. ზელენსკიმ დასძინა, რომ უკრაინელების ინფორმაციით ჩინეთის მოქალაქეთა რიცხვი გაცილებით მეტია.

ზელენსკიმ ჟურნალისტებს გაუზიარა დოკუმენტები, რომლებიც მოიცავს ჩინელი მებრძოლების სახელებს, პასპორტის მონაცემებსა და პირად დეტალებს — მათ შორის, როდის ჩავიდნენ ისინი რუსეთში სამხედრო წვრთნებისთვის და როდის გაემგზავრნენ ფრონტზე. Associated Press-ს დოკუმენტების ავთენტურობა დამოუკიდებლად არ დაუდგენია.

2022 წლის თებერვალში, რუსეთის მიერ უკრაინაში სრულმასშტაბიანი შეჭრის შემდეგ, ჩინეთმა სტაბილური დიპლომატიური მხარდაჭერა გაუწია მოსკოვს. დასავლელი ოფიციალური პირების განცხადებით, პეკინმა რუსეთს მიაწოდა სამრეწველო ტექნიკა და მიკროელექტრონიკა, რომლებიც შესაძლებელია გამოიყენოს იარაღის წარმოებისთვის. გარდა ამისა, ჩინეთი რუსეთს დაეხმარა ეკონომიკურად, ენერგორესურსებითა და სამომხმარებლო საქონლით ვაჭრობით.

ზელენსკის თქმით, ამერიკელი ოფიციალური პირები “გაკვირვებულნი” იყვნენ, როცა ჩინელი მებრძოლების შესახებ ინფორმაცია შეიტყვეს.

ვაშინგტონში სამშაბათს გამართულ პრესკონფერენციაზე აშშ-ის სახელმწიფო დეპარტამენტის პრესმდივანმა, ტემი ბრუსმა, ჩინელი მოქალაქეების რუსეთის მხარეს ბრძოლაზე გავრცელებული ცნობები “შემაშფოთებლად” შეაფასა.

“ჩინეთი რუსეთის მთავარი მხარდამჭერია უკრაინაში მიმდინარე ომში,” — განაცხადა ბრუსმა. მისი თქმით, ჩინეთი რუსეთს “ომის საწარმოებლად საჭირო ორმაგი დანიშნულების პროდუქციის თითქმის 80 პროცენტით” ამარაგებს.

ზელენსკის თქმით რუსეთის მხარეს უკრაინაში ჩინეთის 150-ზე მეტი მოქალაქე იბრძვის Read More »

პეკინი აშშ-ის საჯარო მოხელეების რეკრუტირებას ცდილობს

ერთი ახალი ამბავი / /

აშშ-ს კონტრდაზვერვისა და უსაფრთხოების ეროვნული ცენტრმა (NCSC) გამაფრთხილებელი  განცხადება გაავრცელა, რომლის მიხედვითაც ჩინეთის სადაზვერვო სააგენტოები ფარულად ცდილობენ აშშ-ის მოქალაქეების დაქირავებას, რომლებსაც წვდომა აქვთ სენსიტიურ სამთავრობო ინფორმაციაზე.

მათი თქმით, პეკინი დახვეწილ და სახიფათო მეთოდებს იყენებს თავისი მიზნების მისაღწევად და რეკრუტინგის პროცესი ხშირად მომგებიან კარიერულ შესაძლებლობებად ინიღბება. NCSC-ის თანახმად, LinkedIn-ის ყალბი პროფილებით ამერიკის სახელმწიფო სამსახურებში ყოფილ თუ ამჟამინდელ დასაქმებულებს კონფერენციებსა თუ „საკონსულტაციო საბჭოებში“ იწვევენ, რაც ფედერალური სამსახურიდან მასობრივი გათავისუფლებისა და რესტრუქტურიზაციის ფონზე ხდება. შეგახსენებთ, რომ ამერიკის მთავრობის ეფექტიანობის დეპარტამენტის (DOGE) ზედამხედველობით, რომელსაც ილონ მასკი ხელმძღვანელობს, ცვლილებები მიმდინარეობს, რომლებიც ბიუროკრატიის შემცირებას ისახავს მიზნად. ამ პროცესებმა უმუშევართა უეცარი ნაკადი წარმოშვა, რომელიც მნიშვნელოვანი სამიზნე გახდა ჩინეთისათვის.

Reuters-ის ადრინდელმა საგამოძიებო რეპორტაჟმა ფირმების ფარული ქსელი გამოავლინა, რომელიც, სავარაუდოდ, დაკავშირებულია საიდუმლო ჩინურ ტექნოლოგიურ კონგლომერატთან, რომლის პარტნიორი ორგანიზაციები უკავშირდებიან აშშ-ს ფედერალურ მუშაკებს, განსაკუთრებით კი მათ, ვისაც გამოცდილება აქვთ ეროვნულ უსაფრთხოებაში, თავდაცვასა და საგარეო პოლიტიკაში.

მიუხედავად იმისა, რომ რეკრუტირების ზუსტი მასშტაბი გასაიდუმლოებული რჩება, აშშ-ს ოფიციალური პირების განცხადებით, ეს აქტივობები ჩინეთის ფართო კამპანიის ნაწილია, რომელიც შეერთებულ შტატებში ადამიანური დაზვერვის (HUMINT) შესაძლებლობების გაფართოებას ისახავს მიზნად. მათივე თქმით, ჩინეთის მხრიდან ,,დასაქმების მცდელობების მკვეთრი ზრდა“ აღინიშნება.

გამოძიების ფედერალური ბიურო (FBI) და ეროვნული დაზვერვის დირექტორის ოფისი (ODNI) აქტიურად მონაწილეობენ კონტრდაზვერვის ოპერაციებში, რათა საფრთხეების იდენტიფიცირება და განეიტრალება ეფექტურად მოხდეს. წარსულში პეკინი გამუდმებით უარყოფდა ბრალდებებს ჯაშუშობასა ან აშშ-ს საშინაო საქმეებში ჩარევაზე და ამგვარ დისკურსს „პოლიტიკურად მოტივირებულ“ და „ანტიჩინური ისტერიის“ კამპანიის ნაწილს უწოდებდა.

ვაშინგტონსა და პეკინს შორის დაძაბულობა გრძელდება. უახლესი გამაფრთხილებელი განცხადება კი ხაზს უსვამს დაზვერვასა და ეროვნულ უსაფრთხოებაში გაძლიერებულ კონკურენციას, რაზეც ამჟამად ჩინეთის საელჩოს ვაშინგტონში ოფიციალური განცხადება არ გაუკეთებია.

პეკინი აშშ-ის საჯარო მოხელეების რეკრუტირებას ცდილობს Read More »

სატარიფო ომი: ტრამპი ჩინეთს დამატებითი 50%-იანი ტარიფებით ემუქრება

ერთი ახალი ამბავი / /

დონალდ ტრამპი ჩინეთს დამატებითი 50%-იანი ტარიფების დაწესებას ჰპირდება, თუ პეკინი 8 აპრილისთვის ამერიკულ საქონელზე დამატებითი 34 %-იანი გადასახადების დაწესების შესახებ გადაწყვეტილებას უკან არ გაიწევს.  საერთო ჯამში, ამერიკაში იმპორტირებულ ჩინურ საქონელზე გადასახადი 104%-ით გაიზრდება. 

როგორც ჩინეთის საგარეო საქმეთა სამინისტროს წარმომადგენელმა 7 აპრილს განაცხადა, ეს ამერიკის მხრიდან ჩინეთისადმი მიმართული ბულინგია, მუქარა და ზეწოლა კი არ არის სწორი გზა ჩინეთთან გასამკლავებლად. მან ტარიფებს ცალმხრივი, ეკონომიკური ბულინგი და პროტექციონიზმი უწოდა. პრესკონფერენციაზე მან აღნიშნა, რომ ორმხრივობის პრინციპის სახელით დაწესებული ამერიკული ტარიფები სხვა ქვეყნების ხარჯზე აშშ-ს ინტერესებს ემსახურება.

„შტატების მიერ ტარიფების ბოროტად გამოყენება გლობალური სამხრეთის ქვეყნებს ართმევს განვითარების უფლებას“,- განაცხადა ლინმა და დასტურად მოიყვანა იმ უფსკრულის გაღრმავება, რომელიც თითოეულ ქვეყანაში მდიდრებსა და ღარიბებს შორის, განსაკუთრებით ნაკლებად განვითარებულ ქვეყნებში, არსებობს.

ლინმა მოუწოდა სხვა სახელმწიფოებს, ერთად დაუპირისპირდნენ ცალმხრივობასა და პროტექციონზიმს, დაიცვან საერთაშორისო და მრავალმხრივი სავაჭრო სისტემა, გაეროსა და მსოფლიო სავაჭრო ორგანიზაციის ღირებულებების შესაბამისად.

ჩინეთი უარს აცხადებს, დაემორჩილოს ამერიკის „შანტაჟს“. ვაჭრობის მინისტრის თქმით, ჩინეთის წინააღმდეგ ამერიკის მუქარა არის დიდი შეცდომა და ამას გარდა, კიდევ ერთხელ ამჟღავნებს ამერიკის მოშანტაჟე ბუნებას. „თუ ამერიკა თავის გზას არ გადაუხვვეს, ჩინეთი ბრძოლას ბოლომდე გააგრძელებს“,- განაცხადა ვანგ ვენტაომ.

ამის ფონზე, ჩინეთის ვაჭრობის ვიცე მინისტრმა ლინგ ჯიმ ამერიკულ კომპანიებს, მათ შორის, Tesla-სა და GE Healthcare-ს, პირობა მისცა, რომ ქვეყანა ყოველთვის დაიცავს ჩინეთში მოქმედ უცხოური დაფინანსების მქონე კომპანიებს, მათ შორის, ამერიკულ კომპანიებსაც.

„ჩინეთი იყო, არის და იქნება „იდეალური, უსაფრთხო და პერსპექტიული საინვესტიციო ადგილი უცხოელი ინვესტორებისთვის“,- განაცხადა ლინგმა კვირას პეკინში გამართულ შეხვედრაზე, რომელსაც აშშ-ს მიერ დაფინანსებული 20-ზე მეტი კომპანიის წარმომადგენლები ესწრებოდნენ. როგორც ლინგი ამბობს, პეკინი არ აპირებს ამერიკულ კომპანიებს აგებინოს პასუხი იმის გამო, რომ პრეზიდენტი ტრამპი სატარიფო ომის ესკალაციას ახდენს მთელ დანარჩენ მსოფლიოსთან, მათ შორის ჩინეთთანაც.

მსოფლიო სავაჭრო ორგანიზაციის შეხვედრაზე 9 აპრილს, ჩინეთი აპირებს შტატების საპასუხო ტარიფები წინ წამოწიოს, როგორც „ახალი სავაჭრო საზრუნავი“. ჩინეთმა უკვე შეიტანა ოფიციალური საჩივარი ჟენევის სადამკვირვებლო ორგანიზაციაში.

სატარიფო ომი: ტრამპი ჩინეთს დამატებითი 50%-იანი ტარიფებით ემუქრება Read More »

სენატორი შაჰინი ანაკლიის პროექტის შესახებ იმედგაცრუებას გამოხატავს

ერთი ახალი ამბავი / /

ამერიკელმა დემოკრატმა სენატორმა, ჯინ შაჰინმა, ანაკლიის ღრმაწყლოვანი პორტის პროექტის ჩინური კომპანიისთვის გადაცემის ფაქტის შესახებ იმედგაცრუება გამოხატა. ამის შესახებ ინფორმაციას აზერბაიჯანელ-ამერიკელი ჟურნალისტი, ალექს რაუფოღლუ ავრცელებს.

განცხადებაში აღნიშნულია, რომ ქართულმა მხარემ დასავლურ კომპანიებთან პორტის შესახებ  კონტრაქტი გააუქმა და, ბოლოდროიდელი ცნობების მიხედვით, საქაართველო აპირებს შავ ზღვაზე არსებული პროექტი ჩინურ ფირმას გადასცეს. სენატორი შაჰინის მიხედვით, ის და აშშ-ს სენატის საგარეო ურთიერთობების კომიტეტის თავმჯდომარე, სენატორი რიში თავდადებით მუშაობდნენ საქართველოს „წინ წასაწევად“ და სამწუხაროდ მიიჩნევენ ქართული მხრიდან აღნიშნული შესაძლებლობის ხელიდან გაშვებას.

სენატორი შაჰინის განცხადებას წინ ჰელსინკის კომისიის, იგივე ევროპის უსაფრთხოებისა და თანამშრომლობის კომისიის, წევრების განცხადება უძღვის, რომელიც ასევე ეხმიანება ანაკლიის პორტის საკითხს და ხაზს უსვამს იმ საფრთხეებს, რომელსაც აშშ-ს მიერ სანქცირებული ჩინური კომპანიები შეუქმნიან საქართველოს. აღსანიშნავია, რომ მსგავსი გაფრთხილებების შემდეგაც, „ქართული ოცნება“ აგრძელებს პორტის პროექტის ჩინური კონსორციუმისთვის გადაცემის პროცესს და კიდევ ერთხელ საფრთხეს უქმნის დასავლეთსა და საქართველოს შორის წლების მანძილზე ჩამოყალიბებულ პარტნიორობას.

სენატორი შაჰინი ანაკლიის პროექტის შესახებ იმედგაცრუებას გამოხატავს Read More »

Scroll to Top