კვირის ამბავი

კვირის ამბავი: ჩინეთი სამხრეთ კავკასიასა და ყაზახეთში(3-9 ნოემბერი)

კვირის ამბავი / /

საქართველო

ირაკლი კობახიძე ლი ციანს შეხვდა

4 ნოემბერი

2025 წლის 4 ნოემბერს, საქართველოს პრემიერ-მინისტრი შანხაიში ჩინეთის სახალხო რესპუბლიკის პრემიერ-მინისტრ ლი ციანს შეხვდა.

შეხვედრაზე ლი ციანმა ხაზი გაუსვა ორ ქვეყანას შორის 2023 წელს დამყარებული სტრატეგიული პარტნიორობის მნიშვნელობას და აღნიშნა, რომ ჩინეთი მზად არის, გააღრმავოს თანამშრომლობა სავაჭრო-ეკონომიკურ სფეროში, განსაკუთრებით კი „ერთი სარტყელი, ერთი გზის“ ინიციატივის ფარგლებში.

კობახიძემ დაადასტურა, რომ საქართველო ჩინეთს სტრატეგიულ პარტნიორად მიიჩნევს, მტკიცედ იცავს „ერთი ჩინეთის“ პრინციპს და მხარს უჭერს ჩინეთის გლობალურ ინიციატივებს.

შეხვედრის ბოლოს, პრემიერებმა ხელი მოაწერეს ორმხრივი თანამშრომლობის დოკუმენტებს ისეთ სფეროებში, როგორიცაა: ვაჭრობა, სოფლის მეურნეობა, ავიაცია, კულტურა, გარემოს დაცვა და, განსაკუთრებით, ხელოვნური ინტელექტი (AI).

შეხვედრა შანხაის მერთან

5 ნოემბერი

2025 წლის 5 ნოემბერს, საქართველოს პრემიერ-მინისტრი ირაკლი კობახიძე შანხაის მერს, კუნგ ჭენგს, ჩინეთის საერთაშორისო იმპორტის გამოფენის (CIIE) ფარგლებში შეხვდა.

პრემიერ-მინისტრმა კობახიძემ ხაზი გაუსვა ეკონომიკური თანამშრომლობის უპირატეს მნიშვნელობას და აღნიშნა, რომ მთავრობის მიზანია ორმხრივ ურთიერთობებში ხელშესახები პრაქტიკული შედეგების მიღწევა. შანხაის მერი დაეთანხმა ამ პოზიციას და აღნიშნა, რომ თბილისისა და შანხაის დამეგობრებული ქალაქების სტატუსი ხელს შეუწყობს პრაგმატული და ორმხრივად სასარგებლო თანამშრომლობის გაღრმავებას.

აღსანიშნავია, რომ 2024 წელს თბილისსა და შანხაის შორის გაფორმდა შეთანხმება,  რომელიც ითვალისწინებდა თანამშრომლობას ისეთ სფეროებში, როგორიცაა სპორტი, კულტურა, ურბანული განვითარება, ტრანსპორტი და გამწვანება.

ირაკლი კობახიძე ჩინეთის საერთაშორისო იმპორტის მე-8 გამოფენის (CIIE) გახსნის ცერემონიაზე

5 ნოემბერი

შანხაიში ჩატარებულ ჩინეთის საერთაშორისო იმპორტის გამოფენაში მონაწილეობდა 155 ქვეყანა, რეგიონი და საერთაშორისო ორგანიზაცია, 4,108 უცხოური კომპანია. მათ შორის საპატიო ქვეყნების სტატუსით მონაწილეობენ ტაილანდი, არაბთა გაერთიანებული საამიროები, ნიგერია, საქართველო, შვედეთი და კოლუმბია.

საქართველოს მთავრობის გვერდზე გამოქვეყნებული პოსტიდან დასტურდება, რომ 2025 წლის 5 ნოემბერს, საქართველოს პრემიერ-მინისტრმა ირაკლი კობახიძემ ჩინეთის სახალხო რესპუბლიკის პრემიერ ლი ციანთან ერთად ჩინეთის იმპორტის საერთაშორისო გამოფენაზე (CIIE) საქართველოს საგამოფენო სივრცე გახსნა.

ჩინეთში საქართველოს ელჩმა, პაატა კალანდაძემ განაცხადა, რომ CIIE  ქართული პროდუქციის ჩინურ ბაზარზე უფრო ფართო წვდომის შესაძლებლობას იძლევა.

ელჩის განცხადებით, ჩინეთის უზარმაზარი და საინტერესო ბაზარი ფართო პერსპექტივებს იძლევა ისეთი ქართული პროდუქტებისთვის, როგორიცაა ღვინო, მინერალური წყლები და თაფლი. მან ასევე ხაზი გაუსვა, რომ ორმხრივ ვაჭრობას მნიშვნელოვნად უწყობს ხელს თავისუფალი ვაჭრობის შეთანხმება (FTA) და გასულ წელს დაწესებული უვიზო რეჟიმი, რაც აძლიერებს როგორც ტურისტულ, ისე საქმიან კავშირებს.

ვან ი-ს შეხვედრა საქართველოს საგარეო საქმეთა მინისტრთან

7 ნოემბერი

2025 წლის 7 ნოემბერს საქართველოს საგარეო მინისტრსა და ჩინეთის კომუნისტური პარტიის ცენტრალური კომიტეტის პოლიტბიუროს წევრს და საგარეო საქმეთა მინისტრს შორის გაიმართა მოლაპარაკებები. ორ მხარეს შორის მოლაპარაკებები პეკინში ოფიციალური ვიზიტის ფარგლებში შედგა.

ვანგ ი-ს მიხედვით საქართველო ჩინეთისთვის არის პირველი ქვეყანა ევრაზიის რეგიონში და უმნიშვნელოვანესი სტრატეგიული პარტნიორი ამიერკავკასიაში, რომელმაც თავისუფალი სავაჭრო შეთანხმება გააფორმა ჩინეთთან. მინისტრის განცხადების თანახმად, ჩინეთის მხარე მზად არის გააგრძელოს ურთიერთთანამშრომლობა საქართველოსთან და გააღრმავოს საქართველოსა და ჩინეთს შორის ურთიერთობები.

ასევე, ვანგ იმ აღნიშნა, რომ ჩინეთი მზად არის საქართველოსთან გააძლიეროს სტრატეგიული ურთიერთობა, გააფართოვოს თანამშრომლობა ვაჭრობისა და კულტურული გაცვლების სფეროებში და ხელი შეუწყოს “სარტყლისა და გზის” ინიციატივის მაღალი ხარისხით განხორციელებას.

განსაკუთრებული ყურადღება დაეთმო კავკასიის რეგიონის სტრატეგიულ მნიშვნელობას. ამ კონტექსტში, ხაზგასმით აღინიშნა საქართველოს გამორჩეული როლი შუა დერეფნის განვითარებაში.

საქართველოს საგარეო საქმეთა მინისტრმა ხაზგასმით აღნიშნა, რომ საქართველო მოელის თავისუფალი ვაჭრობის შეთანხმების განახლებული ვერსიის სწრაფად ამოქმედებას, რათა ქართულ პროდუქტებს ჩინეთის ბაზარზე შესვლის მეტი შესაძლებლობა მიეცეს. ასევე, შეხვედრაზე აღინიშნა, რომ საქართველოს ხელისუფლება ურყევად უჭერს მხარს „ერთი ჩინეთის“ პრინციპს და მზად არის ნებისმიერ პლატფორმაზე დააფიქსიროს თავისი მხარდაჭერა ჩინეთის მიმართ.

აზერბაიჯანი

აზერბაიჯანის სახელმწიფო ეკონომიკური უნივერსიტეტი და პეკინის უცხო ენების უნივერსიტეტი თანამშრომლობას იწყებენ

3 ნოემბერი

ჩინეთის პეკინის უცხო ენების უნივერსიტეტის დელეგაცია აზერბაიჯანის სახელმწიფო ეკონომიკურ უნივერსიტეტს (ასეუ) ეწვია.

ასეუ-ს რექტორმა, ადალეთ მურადოვმა, შეხვედრის დროს აღნიშნა, რომ 2019 წლიდან უნივერსიტეტში, ჰაიდარ ალიევის ფონდის მხარდაჭერითა და კონფუცის ინსტიტუტის ჩართულობით, ტარდება ჩინური ენის ონლაინ კურსები. აღნიშნული კურსებში 500-ზე მეტმა სტუდენტმა მიიღო მონაწილეობა.

თავის მხრივ, პეკინის უცხო ენების უნივერსიტეტის პრორექტორმა, გაო ქანგმა აღნიშნა, რომ ჩინურ უნივერსიტეტში 101 უცხო ენა ისწავლება. მათ შორის, ერთ-ერთი აზერბაიჯანული ენაა.

შეხვედრის ფარგლებში, მხარეებმა განიხილეს თანამშრომლობის კონკრეტული მიმართულებები. კერძოდ, მხარეებს შორის მიღწეულ იქნა შეთანხმება „უცხო ენა + ეკონომიკის“ მიმართულებით ორმაგი დიპლომის პროგრამების განხორციელების, ასეუ-ს პედაგოგებისთვის უცხო ენების განხრით ტრენინგების ჩატარების, პეკინის უცხო ენების უნივერსიტეტის ენის სწავლების გამოცდილების გაზიარების, ასეუ-ში უცხო ენების სწავლების ცენტრის შექმნისა და ერთობლივი კონფერენციების თუ თარგმნის პროექტების განხორციელების შესახებ.

აზერბაჯანის მეცნიერებათა ეროვნულ აკადემიასა და პეკინის უცხო ენების უნივერსიტეტს შორის ურთიერთგაგების მემორანდუმი გაფორმდა

3 ნოემბერი

აზერბაიჯანის მეცნიერებათა ეროვნული აკადემიის (AMEA) პრეზიდენტი, ისა ჰაბიბაილი პეკინის უცხო ენების უნივერსიტეტის პრორექტორს, გაო ქანგინს შეხვდა.

AMEA-ს პრეზიდენტმა შეხვედრაზე აღნიშნა, რომ აზერბაიჯანსა და ჩინეთს შორის ურთიერთობები მყარ საფუძვლებს ეფუძნება და აზერბაიჯანის პრეზიდენტი, ილჰამ ალიევი პეკინთან ურთიერთობებს განსაკუთრებულ მნიშვნელობას ანიჭებს. ამასთანავე, ჰაბიბაილიმ სტუმრებს მიაწოდა ინფორმაცია პარტნიორი ჩინური უნივერსიტეტებისა და აკადემიების შესახებ.

შეხვედრის დასასრულს, აზერბაიჯანის მეცნიერებათა ეროვნულ აკადემიასა და პეკინის უცხო ენების უნივერსიტეტს შორის ხელი მოეწერა ურთიერთგაგების მემორანდუმს.

ბაქოს საინჟინრო უნივერსიტეტი და ჩინეთის თიანშუეის ნორმალური უნივერსიტეტი თანამშრომლობას იწყებენ

4 ნოემბერი

ბაქის საინჟინრო უნივერსიტეტსა და ჩინეთის თიანშუეის ნორმალურ უნივერსიტეტს შორის აკადემიური თანამშრომლობის შესახებ ურთიერთგაგების მემორანდუმს მოეწერა ხელი.

შეთანხმება ითვალისწინებს ერთობლივ სამეცნიერო პროექტებს, სტუდენტების/პედაგოგების გაცვლით პროგრამებს, ორმაგი დიპლომის პროგრამების ორგანიზებასა და აკადემიური პროგრამების ერთობლივ მომზადებას.

ჩინეთის თიანშუეის ნორმალური უნივერსიტეტის რექტორმა, ვანგ ჰუინგმა აღნიშნა, რომ ხელმოწერილი მემორანდუმი ხელს შეუწყობს არა მხოლოდ უნივერსიტეტებს, არამედ ჩინეთსა და აზერბაიჯანს შორის მეგობრობის, თანამშრომლობის გაძლიერებას.

აზერბაიჯანის სახელმწიფო პედაგოგიური უნივერსიტეტი ჩინურ უნივერსიტეტთან თანამშრომლობას იწყებს

5 ნოემბერი

აზერბაიჯანის სახელმწიფო პედაგოგიურ უნივერსიტეტს ჩინეთის თიანშუეის ნორმალური უნივერსიტეტის დელეგაცია ეწვია.

მხარეებმა, შეხვედრის დასასრულს, ხელი მოაწერეს თანამშრომლობის შესახებ ურთიერთგაგების მემორანდუმს, რომელიც ითვალისწინებს ერთობლივ სამეცნიერო საქმიანობას, სტუდენტებისთვის/პედაგოგებისთვის გაცვლით პროგრამებს, ორმაგი დიპლომის პროგრამებსა და ერთობლივ აკადემიურ პროგრამებს.

აზერბაიჯანის საგანგებო სიტუაციების სამინისტროს დელეგაციის ვიზიტი ჩინეთში

5 ნოემბერი

აზერბაიჯანის საგანგებო სიტუაციების სამინისტროს დელეგაცია 26 ოქტომბრიდან 4 ნოემბრამდე ჩინეთის სახალხო რესპუბლიკაში იმყოფებოდა.

ვიზიტის ფარგლებში, დელეგაციის წევრები შეხვდნენ ჩინეთის ეროვნული ავიაციის ტექნოლოგიების იმპორტისა და ექსპორტის კორპორაციის ვიცე-პრეზიდენტ ლიუ ის.

შეხვედრის ფარგლებში, მხარეებმა ისაუბრეს საგანგებო სიტუაციების მართვის დარგში მოქმედ დაწესებულებებს შორის ორმხრივი თანამშრომლობის მნიშვნელობასა და ავიაციის დარგში, შესაბამისი ტექნოლოგიების გამოყენების საჭიროებაზე.

აზერბაიჯანის პრემიერ მინისტრის მოადგილე ჩინეთში

6 ნოემბერი

ჩინეთის საერთაშორისო იმპორტის გამოფენის ფარგლებში, აზერბაიჯანის პრემიერ მინისტრის მოადგილე და აზერბაიჯან-ჩინეთის მთავრობათაშორისი სავაჭრო-ეკონომიკური თანამშრომლობის კომისიის თავმჯდომარე, შაჰინ მუსტაფაევი შეხვდა ჩინური კომპანიების, მათ შორის, China Datang Corporation Ltd-სა და Wontai Group-ის ხელმძღვანელობას.

ჩინურ კომპანიებთან შეხვედრაზე, აზერბაიჯანის პრემიერ მინისტრის მოადგილემ აღნიშნა, რომ ჩინური კომპანიები სარგებლობენ აზერბაიჯანში არსებული ხელსაყრელი საინვესტიციო და ბიზნეს გარემოთი და სხვადასხვა მიმართულებით, პროექტებს ახორციელებენ.

სოკარი ჩინურ კომპანიასთან თანამშრომლობას იწყებს

7 ნოემბერი

სოკარის პრეზიდენტი როვშან ნაჯაფი ჩინური კომპანიის, Sinopec Engineering-ის პრეზიდენტს, ჭანგ სინმინგს შეხვდა.

შეხვედრის ფარგლებში, მხარეებმა ნავთობისა და გაზის წარმოების, ნავთობქიმიური პროდუქტების, გაციფრულების, ენერგიის გადაცემისა და თანამედროვე დამუშავების ტექნოლოგიების შესახებ ისაუბრეს.

შეხვედრის დასასრულს, კომპანიებს შორის თანამშრომლობის შესახებ შეთანხმებას მოეწერა ხელი.

აზერბაიჯანის ფიზიკის ინსტიტუტი ჰონგ კონგის აკადემიასთან თანამშრომლობს

8 ნოემბერი

აზერბაიჯანის მეცნიერებისა და განათლების სამინისტროს ფიზიკის ინსტიტუტის დირექტორმა, არიფ ჰაშიმოვმა მეცნიერებისა და ჰუმანიტარული მეცნიერებების საერთაშორისო CORE აკადემიას უმასპინძლა.

შეხვედრის ფარგლებში, ფიზიკის ინსტიტუტსა და CORE აკადემიას შორის, ევრაზიის საერთაშორისო ლაბორატორიის შექმნის შესახებ სტრატეგიული თანამშრომლობის შეთანხმებას მოეწერა ხელი.

შეთანხმება ითვალისწინებს მეცნიერებისა და განათლების დარგებში ინტეგრაციის გაძლიერებას, საგანმანათლებლო და კადრების მომზადების პროგრამებს, ტექნოლოგიის გადაცემას, საერთაშორისო სამეცნიერო კავშირების გაძლიერებას, ერთობლივ სამეცნიერო-კვლევით საქმიანობასა და „სარტყლისა და გზის“ პლატფორმის ფარგლებში, ერთობლივი ლაბორატორიის შექმნას.

სომხეთი

ჩინეთის სოციალური მეცნიერებების აკადემიის წარმომადგენელი სომხეთ-ჩინეთის ურთიერთობების შესახებ

5 ნოემბერი

ჩინეთის სოციალური მეცნიერებების აკადემიის “სარტყლისა და გზის” კვლევითი ცენტრის გენერალურმა მდივანმა, ვან სიაოციუნიანმა, კონფერენციაზე, სახელწოდებით – “ორბელის ფორუმი 2025: მშვიდობისა და მრავალმხრივი თანამშრომლობის მშენებლობა”, გამოსვლისას სომხეთ-ჩინეთის ურთიერთობებზე გაამახვილა ყურადღება და აღნიშნა: “საუკუნეების განმავლობაში, სომხეთი აღმოსავლური და დასავლური ცივილიზაციების გზაჯვარედინზე მდებარეობდა. სწორედ ცივილიზაციური ჰარმონიის ეს ფაქტორი დგას ჩინეთის „სარტყელი და გზის“ ინიციატივის (BRI) საფუძველშიც”.

ვანის თქმით, მიმდინარე გეოპოლიტიკური ცვლილებების ფონზე, ჩინეთ-სომხეთის თანამშრომლობა ხელს უწყობს არა მხოლოდ რეგიონული ეკონომიკური ინტეგრაციის გაღრმავებას, არამედ მშვიდობის დამყარებასა და კულტურული კავშირების გაძლიერებას სამხრეთ კავკასიაში. ვანის აზრით, ასეთი თანამშრომლობა უნდა ეფუძნებოდეს თანასწორობის პრინციპს, რაც მოიცავს სუვერენიტეტის პატივისცემას, ინტერესთა ურთიერთგაგებას და საერთო სარგებლის გაცნობიერებას.

ვანმა ასევე ყურადღება გაამახვილა სომხეთის ბოლოდროინდელ საგარეო პოლიტიკურ კურსზე. კერძოდ, მან დადებითად შეაფასა ის ფაქტი, რომ სომხეთი ევროკავშირთან დაახლოების პარალელურად, შანხაის თანამშრომლობის ორგანზიაციაში გაწევრიანებისკენ მიისწრაფვის:

„სომხეთის დიპლომატია ამ მხრივ შთამბეჭდავია, რადგან ის მიზნად ისახავს სტრატეგიული ურთიერთობების გაღრმავებას ჩინეთთან, თანაც რუსეთთან კონსტრუქციული კავშირების შენარჩუნებით.” – აღნიშნა ექსპერტმა.

ერევანში ჩინური სიმღერის მეორე სტუდენტური კონკურსი გაიმართა

6 ნოემბერი

6 ნოემბერს რუსულ-სომხური უნივერსიტეტის კულტურის სახლში გაიმართა ჩინური სიმღერის მეორე უნივერსიტეტთაშორისი კონკურს-ფესტივალი. ღონისძიება ჩატარდა სომხეთში ჩინეთის საელჩოს, რუსულ-სომხური უნივერსიტეტის კონფუცის კლასისა და ბრიუსოვის სახელობის სახელმწიფო უნივერსიტეტის კონფუცის ინსტიტუტის ერთობლივი ძალისხმევით.

მასპინძელი უნივერსიტეტების გარდა, კონკურსში მონაწილეობა მიიღეს ერევნის სახელმწიფო უნივერსიტეტისა და სომხეთის ფიზიკური კულტურისა და სპორტის სახელმწიფო ინსტიტუტის სტუდენტებმა. კონკურსანტებმა შეასრულეს სიმღერები ჩინურ ენაზე. კონკურსის ფარგლებში, გამარჯვებულები გამოვლინდნენ მათი გამოთქმის, ვოკალური უნარებისა და სასცენო გამოსვლების მიხედვით.

კონკურსის გამარჯვებული გახდა ბრიუსოვის უნივერსიტეტის სტუდენტი ჰაიასტან ჰმაიაკიანი. პირველი სამი ადგილის მფლობელები და სხვა გამორჩეული მონაწილეები დაჯილდოვდნენ სომხეთში ჩინეთის საელჩოს მიერ გადაცემული მობილური ტელეფონებით.

გახსნის ცერემონიაზე მისასალმებელი სიტყვით გამოვიდა რუსულ-სომხური უნივერსიტეტის პრორექტორი პარგევ ავეტისიანი, რომელმაც აღნიშნა, რომ ღონისძიება „შესანიშნავი შესაძლებლობაა, მოვისმინოთ სტუდენტების შესრულება, რომლებიც მოხიბლულნი არიან ჩინური კულტურითა და მუსიკით“.

თავის მხრივ, სომხეთში ჩინეთის ელჩმა ლი სინვეიმაც ყურადღება გაამახვილა სომეხი ახალგაზრდების მზარდ ინტერესზე ჩინური ენისა და კულტურისადმი. ამასთან,  ლი სინვეიმ, იმედი გამოთქვა, რომ შემდგომ წლებში კონკურსში უფრო მეტი მონაწილე ჩაერთვება და აღნიშნა, რომ მომავალი წლის ღონისძიება გაიმართება სომხეთის საზოგადოებრივი ტელევიზიის ახალ სტუდიაში, რომელიც ჩინეთის მხარდაჭერით შენდება.

ყაზახეთი

ყაზახეთში ჩინეთის ელჩი ყაზახეთის ტრანსპორტის მინისტრს შეხვდა

7 ნოემბერი

ჩინეთი და ყაზახეთი ინფრასტრუქტურისა და ლოჯისტიკის სფეროში თანამშრომლობას აძლიერებენ. კერძოდ, 7 ნოემბერს, ჩინეთის ელჩი ხან ჩუნლინი შეხვდა ყაზახეთის ტრანსპორტის ახლად დანიშნულ მინისტრს, საურანბაიევს.

შეხვედრის ფარგლებში, მხარეებმა ხაზი გაუსვეს ტრანსპორტისა და ლოჯისტიკის სფეროში ურთიერთდაკავშირების მნიშვნელობას, როგორც “სარტყლისა და გზის” ინიციატივის მთავარ პრიორიტეტს.

ჩინეთის საელჩომ გამოთქვა მზადყოფნა, ხელი შეუწყოს მეტი ჩინური კომპანიის მონაწილეობას ყაზახეთის სატრანსპორტო და ინფრასტრუქტურულ პროექტებში.

ყაზახეთის ტრანსპორტის მინისტრმა დადებითად შეაფასა არსებული პრაქტიკული თანამშრომლობა და გამოხატა მზადყოფნა, რომ გააგრძელოს ჩინეთთან მუშაობა “სარტყლისა და გზის” ინიციატივის ფარგლებში.

ახალი სავაჭრო შეთანხმება ყაზახეთსა და ჩინეთს შორის

5 ნოემბერი

ყაზახეთმა და ჩინეთმა, ჩინეთის საერთაშორისო იმპორტის გამოფენაზე, სავაჭრო პარტნიორობის შესახებ ახალ შეთანხმებაზე მოაწერეს ხელი. შეთანხმება მიზნად ისახავს ონლაინ პლატფორმების შექმნას და ციფრული ვაჭრობის ხელშეწყობას, რაც, თავის მხრივ, გაამარტივებს ყაზახური პროდუქციის ჩინურ ბაზარზე შესვლას.

შეთანხმება გაფორმდა Optimize Integration Group (OIG)-სა და ყაზახეთის სავაჭრო პოლიტიკის განვითარების ცენტრ, QazTrade-ს შორის.

შეთანხმების აჩვენებს, რომ ყაზახეთი ჩინეთის მთავარ ციფრულ იმპორტიორთან პარტნიორობითა და ჩინეთის საერთაშორისო იმპორტის გამოფენაში ჩართულობით, ცდილობს დააჩქაროს ყაზახური პროდუქციის ექსპორტი და  გაზარდოს სოფლის მეურნეობის პროდუქციის მიწოდება ჩინეთში.

ყაზახეთსა და ჩინეთს შორის სამეცნიერო თანამშრომლობა ახალ ეტაპზე გადადის

6 ნოემბერი

6 ნოემბერს, სიანის ძიათონგის უნივერსიტეტში „შაქარიმის“ სახელობის ყაზახურ-ჩინური კულტურული კვლევის ცენტრი გაიხსნა. ღონისძიება ჩატარდა “სარტყლისა და გზის” ინიციატივის ფარგლებში. ყაზახურ მედიაში გავრცელებული ინფორმაციის მიხედვით, ახლადგახსნილი ცენტრი მნიშვნელოვან როლს შეასრულებს ყაზახეთსა და ჩინეთს შორის კულტურული და სამეცნიერო თანამშრომლობის გაღრმავებაში.

“შაქარიმის” კულტურული კვლევის ცენტრის მიზანია ჩინელ აუდიტორიას გააცნოს ყაზახი ხალხის სულიერი მემკვიდრეობა.

ცენტრი ხელს შეუწყობს ორი ქვეყნის მეცნიერებსა და სტუდენტებს შორის ერთობლივ კვლევით და კულტურულ-გაცვლითი პროგრამების განხორციელებას.

კვირის ამბავი: ჩინეთი სამხრეთ კავკასიასა და ყაზახეთში(3-9 ნოემბერი) Read More »

კვირის ამბავი: ჩინეთი სამხრეთ კავკასიასა და ტაჯიკეთში (27.10 – 02.11)

კვირის ამბავი / /

საქართველო

საქართველოსა და ჩინეთს შორის სარკინიგზო თანამშრომლობა ღრმავდება

22 ოქტომბერი

საქართველოს საგანგებო და სრულუფლებიანი ელჩი ჩინეთის სახალხო რესპუბლიკაში, პაატა კალანდაძე, შეხვდა ქალაქ ჭუჭოუს მუნიციპალიტეტის ვიცე-მერს, ხუა იანგს.

შეხვედრაზე განიხილეს საქართველოსა და ჩინეთს შორის სარკინიგზო სფეროში მიმდინარე თანამშრომლობის გაღრმავების შესაძლებლობები. ასევე, მხარეები შეთანხმდნენ ამ მიმართულებით მუშაობის გაგრძელებაზე.

 

აღსანიშნავია, რომ ქალაქი ჭუჭოუ ცნობილია როგორც ჩინეთის „ლოკომოტივების დედაქალაქად“. CRRC ZELC (ჭუჭოუს ლოკომოტივების მწარმოებელი კომპანია) 1997 წლიდან აქტიურად არის ჩართული გლობალურ ექსპორტში. მნიშვნელოვანი პარტნიორები არიან სინგაპური, მალაიზია, მაკედონია, თურქეთი, ჩეხეთი, გერმანია, სამხრეთ აფრიკა და ა.შ.

საქართველოში ჩინეთის საელჩოს მიერ ორგანიზებული ესეების კონკურსი: „მე და ჩემი ჩინური ამბავი“

30 ოქტომბერი

საქართველოში ჩინეთის საელჩომ დააორგანიზა ესეების კონკურსი – „მე და ჩემი ჩინური ამბავი“ („我和中国的故事“), რომელშიც მონაწილეობას იღებდნენ მონაწილეობას იღებდნენ სტუდენტები, სკოლის მოსწავლეები და სხვა დაინტერესებული პირები.

საელჩომ გამოაქვეყნა გამარჯვებულთა სია, სადაც წარმოდგენილნი არიან სხვადასხვა სექტორისა და პროფესიის წარმომადგენლები. მათ შორის, პირველ ადგილზე გავიდა ტელეკომპანია “იმედის” ტელეწამყვანი, თამარ ცინცაძე.

ჩინეთის მშვიდობიანი გაერთიანების ხელშეწყობის ეროვნული ასოციაციის პოზიცია თაივანთან დაკავშირებით

საქართველოში ჩინეთის საელჩოს მიერ გავრცელებული ინფორმაციის თანახმად, ჩინეთის მშვიდობიანი ეროვნული გაერთიანების ხელშეწყობის საქართველოს ასოციაციამ, 25 ოქტომბერს, გამოაქვეყნა განცხადება თაივანის განთავისუფლების მე-80 წლისთავის აღსანიშნავად.

ჩინეთის რესპუბლიკის მთავრობამ 2001 წლიდან 2024 წლამდე პერიოდში 25 ოქტომბრის საყოველთაო უქმედ გამოცხადება შეწყვიტა. თუმცა, 2025 წელს აღდგა უქმე დღის სტატუსი, რასაც თან ახლდა დღესასწაულის სახელის ცვლილება. წლევანდელი გადაწყვეტილებით 25 ოქტომბერი „თაივანის განთავისუფლების მემორიალურ დღედ“ გამოცხადდა.

ასოციაციის მიერ გამოქვეყნებული განცხადების მიხედვით, გაერთიანება არის ისტორიული და სამართლებრივი ფაქტი, რომელიც გარდაუვალია და წარმოადგენს ჩინელი ერის მოთხოვნას. ორგანიზაცია მკაცრად გმობს „თაივანის დამოუკიდებლობის“ მცდელობებს და გარე ძალების ჩარევას. 

აზერბაიჯანი

ბაქოს საინჟინრო უნივერსიტეტსა და ცინხუას უნივერსიტეტს შორის თანამშრომლობის მიმართულებები განისაზღვრა

27 ოქტომბერი

ბაქოს საინჟინრო უნივერსიტეტსა და ჩინეთის ცინხუას უნივერსიტეტს შორის, თანამშრომლობის სამომავლო მიმართულებების განსაზღვრის მიზნით, მოლაპარაკებები გაიმართა.

შეხედრაზე მხარეებმა, სამეცნიერო-კვლევითი ინიციატივების, აკადემიური გაცვლითი პროგრამებისა და ერთობლივი საგანმანათლებლო პროექტების მიმართულებით, თანამშრომლობის შესაძლებლობებზე ისაუბრეს. 

გარდა ამისა, მხარეები, მიმდინარე წლის ივლისში, უნივერსიტეტებს შორის თანამშრომლობასთან დაკავშირებით გამართული მოლაპარაკებების შემდგომ პერიოდში, მიღწეულ შედეგებს გაეცნენ.

აზერბაიჯანსა და ჩინეთს შორის „მწვანე ენერგიის განვითარების კუთხით ერთობლივი კვლევითი ცენტრის“ შექმნის საკითხი განიხილეს

27 ოქტომბერი

ენერგეტიკის მინისტრ ფარვიზ შაჰბაზოვსა და China Energy Engineering Corporation Limited-ის დელეგაციას შორის შეხედრა გაიმართა.

შეხვედრაზე სამინისტროსა და კომპანიას შორის ენერგეტიკის სფეროში პროექტების განხორციელების საკითხი იქნა განხილული. კერძოდ, აღინიშნა, რომ აზერბაიჯანში განახლებადი ენერგიის მიმართულებით China Energy Engineering Corporation Limited-თან ერთობლივი ინიციატივები დარგის განვითარებას შეუწყობს ხელს.

შეხვედრაზე ხაზი გაესვა ჩინეთის ელექტროენერგეტიკული დაგეგმვისა და ინჟინერიის ინსტიტუტთან (EPPEI) ერთად განხორციელებული კვლევების მნიშვნელობას. ამასთანავე, მხარეებმა “მწვანე ენერგიის განვითარების კუთხით ერთობლივი კვლევითი ცენტრის” შექმნის აუცილებლობაზე გაამახვილეს ყურადღება.

სამინისტროს წარმომადგენელმა, ბილასუვარსა და ნეფტჩალაში ჩინური კომპანიის საქმიანობა, კერძოდ, 760 მეგა ვატი სიმძლავრის მზის ელექტროსადგურის შენება და მისი აღჭურვილობით უზრუნველყოფა, მაღალ დონეზე შეაფასა.

აზერბაიჯანი და ჩინეთი შუა დერეფნის გავლით სატვირთო გადაზიდვების გაზრდის შესახებ შეთანხმდნენ

27 ოქტომბერი

“აზერბაიჯანის რკინიგზების” პრეზიდენტი, როვშან რუსთამოვი შეხვდა ჩინეთის სახალხო რესპუბლიკის დელეგაციას, რომელსაც ხელმძღანელობდა ქალაქ სიანის მერი, იე ნიუ პინინი.

შეხვედრაზე აღინიშნა, რომ შუა დერეფნის შესაძლებლობების გაფართოების და ტვირთების ნაკადის გაზრდის მიზნით, აზერბაიჯანის რკინიგზები და ჩინეთის სიანის ნავსადგური მჭიდროდ თანამშრომლობენ. თანამშრომლობის გასაძლიერებლად, სიანის ნავსადგურში აზერბაიჯანის რკინიგზების წარმომადგენელი დაინიშნა. ამასთანავე, წარმომადგენელს წვდომა მიენიჭა სიანის ნავსადგურის საოპერაციო სისტემაზე.

შეხვედრაზე აღინიშნა, რომ წელს, 9 თვის განმავლობაში, აზერბაიჯანის რკინიგზებმა 113 სატრანზიტო მატარებელი მიიღო. აღნიშნული, წინა წლის იმავე პერიოდთან შედარებით, 39 %-იან ზრდაზე მიანიშნებს. ანალოგიურად, წინა წელთან შედარებით, ტვირთბრუნვა 20 %-ით არის გაზრდილი.  

შეხვედრის ფარგლებში, აზერბაიჯანის რკინიგზებსა და ჩინეთის სიანის ნავსადგურს შორის ურთიერთგაგების მემორანდუმი გაფორმდა. მემორანდუმი ითვალისწინებს საერთაშორისო სატვირთო გადაზიდვებისთვის ხელსაყრელი გარემოს შექმნას, გაციფრულების მეშვეობით მომსახურების ხარისხის გაუმჯობესებას და „გზისა და სარტყლის“ ინიციატივის ფარგლებში, შუა დერეფნის მულტიმოდალური სატრანსპორტო კავშირების გაფართოებას.

ჩინელი დოქტორანტურების მონაწილეობით, ბაქოს საინჟინრო უნივერსიტეტში სამეცნიერო სემინარი ჩატარდა

28 ოქტომბერი

ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის ორმაგი სადიპლომო პროგრამის ფარგლებში, ჩინეთის სახალხო რესპუბლიკიდან 32 დოქტორანტი და პროფესორ-მასწავლებლების დელეგაცია აზერბაიჯანს ეწვივნენ.

დელეგაციის ვიზიტის ფარგლებში, “მდგრადი განვითარების მიზნებზე ინჟინერიის გავლენების” შესახებ სამეცნიერო სემინარი ჩატარდა. სემინარს ესწრებოდნენ აზერბაიჯანის მეცნიერებათა ეროვნული აკადემიის წარმომადგენლები და სხვა უნივერსიტეტების მეცნიერ-მკვლევარები.

ბაქოს საინჟინრო უნივერსიტეტის რექტორმა, იაკუბ ფირიევმა ხაზი გაუსვა პეკინის ქიმიური ტექნოლოგიების უნივერსიტეტთან დამყარებული თანამშრომლობისა და ბაკალავრიატის დონეზე შექმნილი პირველი ორმაგი სადიპლომო პროგრამის წარმატებებს.

ღონისძიებაზე, პეკინის ქიმიური ტექნოლოგიების უნივერსიტეტის საერთაშორისო საგანმანათლებლო დეპარტამენტის პროფესორმა, იუ იემ უნივერსიტეტის სამეცნიერო-კვლევითი მიმართულებებისა და ორმაგი სადიპლომო პროგრამების შესახებ ისაუბრა. ამასთანავე, შეხვედრაზე, ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის სადიპლომო პროგრამის ფარგლებში ჩინეთში მყოფი აზერბაიჯანელი სტუდენტების ვიდეოინტერვიუები წარადგინეს.

აზერბაიჯანის ენების უნივერსიტეტი ჩინეთში გამართულ საერთაშორისო კონფერენციაზე

28 ოქტომბერი

აზერბაიჯანის ენების უნივერსიტეტის კონფუცის ინსტიტუტის დირექტორი, რაფიკ აბასოვი დაესწრო “პროფესიონალების საერთაშორისო გაცვლის 23-ე კონფერენციას”, რომელიც ქალაქ შანხაიში ჩატარდა.

კონფერენცია ჩინეთის ადამიანური რესურსებისა და სოციალური უზრუნველყოფის სამინისტროს და შანხაის მერიის მხარდაჭერით გაიმართა. ღონისძიების მთავარი ორგანიზატორები პეკინის საერთაშორისო კვლევების უნივერსიტეტი და ჩინეთის რეგიონული კვლევების კონსორციუმი იყო.

კონფერენციაზე განხილულ იქნა ხელოვნური ინტელექტის როლი კულტურებს შორის განათლების განვითარებაში, კულტურათაშორისი განათლების სისტემებისთვის კადრების მომზადების საკითხი, საინფორმაციო საზოგადოებაში განათლების განვითარების ტენდენციები და სხვა თემები.

აზერბაიჯანის არქიტექტურისა და მშენებლობის უნივერსიტეტი ჩინეთში გამართულ საერთაშორისო კონფერენციაზე

28 ოქტომბერი

აზერბაიჯანის არქიტექტურისა და მშენებლობის უნივერსიტეტის დელეგაციამ, ჩინეთის ადამიანური რესურსებისა და სოციალური უზრუნველყოფის სამინისტროსა და შანხაის მერიის მიერ “მათემატიკა და ხელოვნური ინტელექტის” თემაზე გამართულ, საერთაშორისო სამეცნიერო კონფერენციაში მიიღო მონაწილეობა.

აზერბაიჯანის უნივერსიტეტის დელეგაცია კონფერენციას შანხაის ჯიაო ტონგის უნივერსიტეტისგან მიღებული მოწვევით დაესწრო. კონფერენციის ფარგლებში, აზერბაიჯანის არქიტექტურისა და მშენებლობის უნივერსიტეტის რექტორმა, გულჩოჰრა მამმადოვმა საერთაშორისო სამეცნიერო ჟურნალების განვითარებაში შინაარსის ხარისხის, მულტიდისციპლინარული თანამშრომლობისა და უნივერსიტეტებს შორის სამეცნიერო კავშირების მნიშვნელობაზე ისაუბრა.

მოგვიანებით, 30 ოქტომბერს, აზერბაიჯანის არქიტექტურისა და მშენებლობის უნივერსიტეტის წარმომადგენლები შანხაის ჯიაო ტონგის უნივერსიტეტს ეწვივნენ. შეხვედრის ფარგლებში, მხარეებმა უნივერსიტეტებს შორის აკადემიური თანამშრომლობის გაფართოების, ერთობლივი სასწავლო პროგრამების განვითარებისა და ორმხრივი სამეცნიერო პროექტების განხორციელების საკითხები განიხილეს.

ბაქოსა და ქალაქ სიანს შორის პირდაპირი საჰაერო კავშირების დამყარების საკითხი განიხილეს

29 ოქტომბერი

ციფრული განვითარებისა და ტრანსპორტის მინისტრი, რაშად ნაბიევი ჩინეთის ქალაქ სიანის მერს, იე ნიუპინგს შეხვდა.

შეხვედრაზე მხარეებმა ქალაქებს შორის საჰაერო კავშირების დამყარების, ხელოვნური ინტელექტის, გაციფრულებისა და სხვა მიმართულებებით თანამშრომლობის პერსპექტივები განიხილეს.

შეხვედრის ბოლოს, მხარეები, განხილულ თემებზე სამუშაოდ, სამუშაო ჯგუფის შექმნაზე შეთანხმდნენ.

აზერბაიჯანისა და ჩინეთის უმაღლეს სასწავლებლებს შორის თანამშრომლობის პერსპექტივები განიხილეს

29 ოქტომბერი

ჩინეთის სახალხო რესპუბლიკის ელჩი საქართველოში, ლუ მეი აზერბაიჯანის რესპუბლიკის პრეზიდენტთან არსებული საჯარო მმართველობის აკადემიას ეწვია.

შეხვედრაზე აკადემიის რექტორმა, ურხან ალაქბაროვმა, აზერბაიჯან-ჩინეთის მეგობრობაზე და ორმხრივი თანამშრომლობის განვითარებაში განათლების მნიშვნელობაზე ისაუბრა.

შეხვედრაზე მხარეებმა ორი ქვეყნის უმაღლეს საგანმანათლებლო დაწესებულებებს შორის თანამშრომლობის პერსპექტივები განიხილეს.

აზერბაიჯანსა და ჩინეთს შორის ტურიზმის სფეროში არსებული კავშირები განიხილეს

29 ოქტომბერი

სახელმწიფო ტურიზმის სააგენტოს თავმჯდომარე, ფუად ნაღიევი აზერბაიჯანში ჩინეთის ელჩს, ლუ მეის შეხვდა.

შეხვედრაზე ფუად ნაღიევმა ორმხრივი ტურისტული კავშირების განვითარების დინამიკაზე და სავიზო შეზღუდვების გაუქმების დადებით შედეგებზე ისაუბრა.

სააგენტოს თავმჯდომარემ, ასევე, აღნიშნა, რომ ჩინეთში აზერბაიჯანის ტურიზმის ბიუროს ადგილობრივი ფილიალის გახსნის მიმართულებით სამუშაოები მიმდინარეობს.

თავის მხრივ, ჩინეთის ელჩმა აღნიშნა, რომ აზერბაიჯანის მდიდარი ტურიზმის პოტენციალი ჩინელი ტურისტების ყურადღებას იპყრობს და ტურიზმი ქვეყნებს შორის მზარდი თანამშრომლობის ერთ-ერთ მიმართულებას წარმოადგენს. ელჩმა აღნიშნა, რომ ჩინეთი აზერბაიჯანის ტურიზმის სექტორში საინვესტიციო შესაძლებლობებითა და შესაძლო პროექტებში მონაწილეობითაა დაინტერესებული.

აღსანიშნავია, რომ ბაქო-პეკინის მიმართულებით კვირაში სამი, ბაქო-ურუმჩის მიმართულებით კი, ხუთი რეისი ხორციელდება. 2024 წელს, ჩინეთიდან აზერბაიჯანში ჩამოსული ვიზიტორების რაოდენობამ 44 798-ს მიაღწია, რაც, წინა წელთან შედარებით, 94 %-იან ზრდაზე მიანიშნებს.

ბაქოს ახალგაზრდულ ცენტრში კონფუცის ინსტიტუტის ფილიალი გაიხსნა

30 ოქტომბერი

ბაქოს ახალგაზრდულ ცენტრში, აზერბაიჯანის ენების უნივერსიტეტში მოქმედი კონფუცის ინსტიტუტის ფილიალის გახსნის ცერემონია გაიმართა. ღონისძიება აზერბაიჯანის ახალგაზრდობის და სპორტის სამინისტროსა და აზერბაიჯანში ჩინეთის საელჩოს მხარდაჭერით დაორგანიზდა.

გახსნის ცერემონიას ესწრებოდნენ ახალგაზრდობის და სპორტის მინისტრი, ფარიდ გაიბოვი, აზერბაიჯანში ჩინეთის ელჩი, ლუ მეი და ახალგაზრდული ცენტრის დირექტორი, ნარგიზ ბაბაევი.

ღონისძიების ფარგლებში, ბაქოს ახალგაზრდული ცენტრის დირექტორმა, ნარგიზ ბაბაევმა, აზერბაიჯანის მხრიდან კონფუცის ინსტიტუტის დირექტორმა, რაფიკ აბასოვმა და ჩინეთის მხრიდან ინსტიტუტის დირექტორმა, ლი ჯიჰუამ თანამშრომლობის შესახებ შეთანხმებას მოაწერეს ხელი. შეთახნმება აზერბაიჯანისა და ჩინეთის ახალგაზრდებს შორის განათლების, კულტურისა და ენის კუთხით გაცვლის გაფართოებას, ერთობლივ პროექტებსა და პროგრამებს ითვალისწინებს.

ბაქოს სახელმწიფო უნივერსიტეტი ჩინეთის უნივერსიტეტებთან თანამშრომლობს

30 ოქტომბერი

ჩინეთის სახალხო რესპუბლიკის პეკინის ქიმიური ტექნოლოგიების უნივერსიტეტის დელეგაცია ბაქოს სახელმწიფო უნივერსიტეტს ეწვია.

შეხვედრაზე ორ საგანმანათლებლო დაწესებულებას შორის სამეცნიერო და აკადემიური თანამშრომლობის განვითარების პერსპექტივები განიხილეს.

ფიზიკის ინსტიტუტში პეკინის ქიმიური ტექნოლოგიების უნივერსიტეტთან თანამშრომლობის შესაძლებლობები განიხილეს

31 ოქტომბერი

აზერბაიჯანის მეცნიერებისა და განათლების სამინისტროს ფიზიკის ინსტიტუტსა და ჩინეთის პეკინის ქიმიური ტექნოლოგიების უნივერსიტეტს შორის, თანამშრომლობის პერსპექტივების განხილვის მიზნით, შეხვედრა გაიმართა.

შეხვედრაზე, მხარეებმა მეცნიერების, განათლებისა და ინოვაციების მიმართულებით ერთობლივი პროექტების განხორციელების, ორმხრივი გაცვლების განხოციელებისა და ახალგაზრდა მეცნიერებისთვის გაცვლითი პროგრამების შექმნის საკითხები განიხილეს.

აზერბაიჯანის სახელმწიფო ნავთობის ფონდის შეხვედრა CEEC International-თან

31 ოქტომბერი

აზერბაიჯანის სახელმწიფო ნავთობის ფონდის აღმასრულებელი დირექტორის მოადგილე, როვშან ჯავადოვი ჩინური კომპანიის, China Energy International Group Co., Ltd./“CEEC International”-ის წარმომადგენლებს შეხვდა.

მხარეებმა, 2025 წლის 8 სექტემბერს, აზერბაიჯანის სახელმწიფო ნავთობის ფონდსა და CEEC International-ს შორის ხელმოწერილი ურთიერთგაგების მემორანდუმის ფარგლებში, ორმხრივი თანამშრომლობის გაღრმავების, საინვესტიციო შესაძლებლობების განსაზღვრისა და თანამშრომლობის მექანიზმების შესახებ ისაუბრეს.

პეკინის უცხო ენების უნივერსიტეტი აზერბაიჯანში

1 ნოემბერი

პეკინის უცხო ენების უნივერსიტეტის პრორექტორმა, გაო ქანგინმა, აზერბაიჯანის სახელმწიფო საინფორმაციო სააგენტოსთან ინტერვიუში, ორი ქვეყნის უნივერსიტეტებს შორის თანამშრომლობის მიმდინარე დინამიკაზე ისაუბრა.

პრორექტორმა აღნიშნა, რომ მისი უნივერსიტეტის დელეგაციის აზერბაიჯანში ვიზიტი ქვეყნებს შორის განათლებისა და მეცნიერების მიმართულებით თანამშრომლობის ახალი ეტაპის დასაწყისია.

ვიზიტის ფარგლებში, პეკინის უცხო ენების უნივერსიტეტის დელეგაცია შეხვდა ბაქოს სახელმწიფო უნივერსიტეტის, აზერბაიჯანის მეცნიერებათა ეროვნული აკადემიის, აზერბაიჯანის სახელმწიფო ეკონომიკური უნივერსიტეტის, ჰეიდარ ალიევის ფონდის და ხაზარის უნივერსიტეტის წარმომადგენლებს. მეტიც, შეხვედრების ფარგლებში ურთიერთგაგების შესახებ მემორანდუმები გაფორმდა.

ვიზიტის ფარგლებში, ჩინური მხარის წარმომადგენლები ჰეიდარ ალიევის ფონდის ვიცე-პრეზიდენტს, ლეილა ალიევს, აღმასრულებელ დირექტორს, ანარ ალაქბაროვსა და აზერბაიჯანის მილი მეჯლისის (პარლამენტის) თავმჯდომარეს, საჰიბა ქაფაროვას შეხვდნენ. მხარეებს შორის ურთიერთგაგების მემორანდუმი გაფორმდა.

გარდა ამისა, პეკინის უცხო ენების უნივერსიტეტმა ურთიერთგაგების მემორანდუმები გააფორმა აზერბაიჯანის სახელმწიფო ეკონომიკურ უნივერსიტეტსა და აზერბაიჯანის მეცნიერებათა ეროვნულ აკადემიასთან.

სომხეთი

სომხეთში ჩინეთის ელჩი, ლი სინვეი ერევნის მერ ტიგრან ავინიანს შეხვდა

სომხეთში ჩინეთის ელჩ, ლი სინვეისა და ერევნის მერს, ტიგრან ავინიანს შორის შეხვედრა გაიმართა. ჩინეთის ელჩმა ყურადღება გაამახვილა ჩინეთის ქალაქებსა და ერევანს შორის ბოლო პერიოდში დამყარებულ კავშირებზე. მან აღნიშნა, რომ რეგიონათაშორისი თანამშრომლობა მნიშვნელოვან როლს ასრულებს ორმხრივ ურთიერთობებში. ელჩმა, ასევე, განაცხადა, რომ მხარეებს ვაჭრობის, ეკონომიკის, კულტურისა და ტურიზმის სფეროებში თანამშრომლობის გაღრმავება შეუძლიათ.

მერმა ავინიანმა, თავის მხრივ, გამოხატა მადლიერება, ჩინეთის მხარის მიერ ადგილობრივი მოსახლეობის კეთილდღეობის მხარდაჭერის გამო. მერმა ხაზი გაუსვა ურბანული მენეჯმენტის მოდერნიზაციის სფეროში ჩინეთის მიღწევებს. ავინიანმა, ასევე, აღნიშნა, რომ ჩინური გამოცდილების გაცნობა ხელს შეუწყობს ჩინეთისა და სომხეთის ქალაქებს შორის თანამშრომლობის გაღრმავებას და გააძლიერებს ორ ქვეყანას შორის ხალხთაშორის კავშირებზე დაფუძნებულ მეგობრობასაც.

ტაჯიკეთი

ტაჯიკურმა და ჩინურმა კომპანიებმა თანამშრომლობის მემორანდუმი გააფორმეს

დუშანბეში გაიმართა ავიაკომპანია „Somon Air“-ისა და ჩინური კომპანია Shanghai Haizhu Engineering & Design Group Co., Ltd. (HIZ)-ის წარმომადგენელთა შეხვედრა, რომლის შედეგადაც მხარეებმა თანამშრომლობის შესახებ მემორანდუმს მოაწერეს ხელი. მემორანდუმი მიზნად ისახავს ტაჯიკეთის საავიაციო ინფრასტრუქტურის განვითარებასა და მოდერნიზაციას.

მოლაპარაკებებისას მხარეებმა განიხილეს ქვეყნის აეროპორტების განვითარების პერსპექტივები. განსაკუთრებული ყურადღება დაეთმო საჰაერო ხომალდების ტექნიკური მომსახურებისათვის განკუთვნილი ჰანგარის პროექტირებისა და მშენებლობის საკითხს. მიღწეული შეთანხმების ფარგლებში იგეგმება პროექტის ტექნიკურ-ეკონომიკური დასაბუთების (Feasibility Study) მომზადება.

აღსანიშნავია, რომ 2001 წელს დაფუძნებული ჩინური კომპანია HIZ საავიაციო ინფრასტრუქტურის დიზაინისა და მშენებლობის სფეროში ჩინეთის ათ ყველაზე წამყვან კომპანიას შორისაა.

კვირის ამბავი: ჩინეთი სამხრეთ კავკასიასა და ტაჯიკეთში (27.10 – 02.11) Read More »

ჩინეთი სამხრეთ კავკასიასა და უზბეკეთში (20-26 ოქტომბერი)

კვირის ამბავი / /
საქართველო
ჩინეთის მზარდი გავლენის სტრატეგიული ანალიზი: თბილისში აბრეშუმის გზის ფორუმი 2025 ჩატარდა

2025 წლის 22-23 ოქტომბერს, თბილისში მეხუთე საერთაშორისო აბრეშუმის გზის ფორუმი გაიმართა. ღონისძიება, რომელსაც 70-ზე მეტი ქვეყნის დელეგატი ესწრებოდა, მათ შორის გაეროს, აზიის განვითარების ბანკის (ADB) და სხვა მსხვილი საერთაშორისო ორგანიზაციების წარმომადგენლები, რეგიონული და გლობალური თანამშრომლობის კრიტიკულ ინსტრუმენტად არის მიჩნეული.

წლევანდელი ფორუმის მთავარი სლოგანი იყო „ინვესტიცია დაკავშირებადობაში – ზრდა სტაბილურობაში“ (Invest in Connectivity – Grow in Stability). „სტაბილურობაზე“ აქცენტირება მნიშვნელოვანი პოლიტიკური სტრატეგიაა, რადგან 2022 წელს რუსეთზე დაწესებულმა სანქციებმა მნიშვნელოვნად შეცვალა ევროპისა და ევრაზიის სატრანსპორტო სისტემები. შედეგად, გაიზარდა საქართველოს როლი ტრანსევრაზიულ ვაჭრობაში. ფორუმზე განიხილეს გლობალური ვაჭრობის, ტრანსპორტის, ციფრული ტექნოლოგიებისა და ინვესტიციების მიმართულებები.

ფორუმი ჩინეთ-საქართველოს ორმხრივი კავშირების მზარდი ტენდენციის გამოხატულებაა. 2015 წელს, სწორედ საქართველოსა და ჩინეთის მთავრობების ორგანიზებით, გაიმართა პირველი აბრეშუმის გზის ფორუმი. სწორედ ამ პერიოდში შეუერთდა საქართველო ჩინეთის “სარტყლისა და გზის” ინიციატივას (BRI).  

წელს აბრეშუმის გზის ფორუმზე ყოფილი ჩინელი მაღალჩინოსნის მონაწილეობამ, რეგიონული კავშირების გაძლიერების მიმართ პეკინის ინტერესი ცხადი გახადა. კერძოდ, ფორუმში მონაწილეობდა აზიის განვითარების ბანკის ვიცე-პრეზიდენტი ინგმინ იანგი, ჩინეთის ფინანსთა სამინისტროს ყოფილი მაღალჩინოსანი, რომელმაც შუა დერეფნის ეკონომიკურ პერსპექტივებზე პანელი გახსნა.

თბილისის აბრეშუმის გზის ფორუმი, მართალია, წარმატებით ამკვიდრებს საქართველოს ცენტრალურ მოთამაშედ, მაგრამ ზრდის მის დამოკიდებულებას ჩინეთზე. ექსპერტები აღნიშნავენ, რომ “ქართული ოცნების” მიერ არჩეული სტრატეგიული გზა, რომელიც 2023 წელს ჩინეთთან სტრატეგიული პარტნიორობასა და ანაკლიის პროექტის შესახებ მიღებულ გადაწყვეტილებაში აისახა, აჩვენებს, რომ მოკლევადიანი ფინანსური სარგებლის მისაღებად საქართველო უგულებელყოფს ევროატლანტიკური უსაფრთხოების გრძელვადიან პრიორიტეტებს.

22/23 ოქტომბერი

საქართველოს საგარეო საქმეთა მინისტრი ჩინეთის ელჩს შეხვდა

2025 წლის 24 ოქტომბერს საქართველოს საგარეო საქმეთა მინისტრი მაკა ბოჭორიშვილი შეხვდა ჩინეთის სახალხო რესპუბლიკის ელჩს, ჭოუ ციენს. შეხვედრაზე მხარეებმა განიხილეს საქართველო–ჩინეთის ორმხრივი თანამშრომლობის საკითხი. განსაკუთრებული ყურადღება გამახვილდა:

  • უვიზო მიმოსვლისა და პირდაპირი ავიამიმოსვლის მნიშვნელობაზე;
  • საქართველოს მონაწილეობაზე ჩინეთის რიგით მე-8 საერთაშორისო იმპორტის გამოფენაში, რომელიც გაიმართება 5-10 ნოემბერს. აღინიშნა, რომ ეს პლატფორმა ხელს უწყობს ქართველი ექსპორტიორების აქტიურობას ჩინეთის ბაზარზე. აღსანიშნავია, რომ 2018 წლიდან გამოფენაში მონაწილეობდა 120-ზე მეტი კომპანია, მიმდინარე წელს კი 40-ზე მეტი წამყვანი ქართული კომპანია სამ პავილიონში იქნება წარმოდგენილი.
  • შუა დერეფნის პროექტისა და „ერთი სარტყელი, ერთი გზა“ ინიციატივის ფარგლებში, თანამშრომლობის გაძლიერების მნიშვნელობა, რეგიონული და გლობალური მშვიდობის, სტაბილურობისა და პროგრესის უზრუნველყოფის თვალსაზრისით.
  • ორმხრივი თანამშრომლობა სამოქალაქო ავიაციისა და ტურიზმის სფეროებში, ახალი მიმართულებების დანიშვნისა და ფრენების სიხშირეების ზრდის მნიშვნელობა.

აღნიშნულ შეხვედრაზე გამოიკვეთა, რომ მხარეები მზად არიან გააღრმავონ სტრატეგიული პარტნიორობა, ხელი შეუწყონ ეკონომიკური აქტივობების განვითარებას. ასევე, მხარეებმა განიხილეს ეკონომიკის, ტურიზმის, განათლებისა და კულტურის სფეროებში თანამშრომლობის გაღრმავების საკითხები. 

24 ოქტომბერი

ჩინეთის ელჩმა თენგიზ მალანიას ფილმში საქართველოს გლობალურ როლზე ისაუბრა

2025 წლის 27 ოქტომბერს, ჩინეთის ელჩმა საქართველოში, ჭოუ ციენმა, მონაწილეობა მიიღო ქართველი რეჟისორის, თენგიზ მალანიას, დოკუმენტური ფილმის, „კულტურა იხსნის მსოფლიოს“ 《文化拯救世界》– ჩაწერაში.

დოკუმენტური ფილმი „კულტურა იხსნის მსოფლიოს“, რომელიც საქართველოს კულტურის სამინისტროსა და კინოაკადემიის მხარდაჭერით იქმნება, მიზნად ისახავს რეგიონული და გლობალური მშვიდობის ხელშეწყობაში საქართველოს როლის წარმოჩენას.

ელჩის თქმით, აბრეშუმის გზის საფუძველია მშვიდობიანი თანამშრომლობა, ღიაობა და ორმხრივი სარგებელი. ეს გზა არა მხოლოდ ეკონომიკური დერეფანია, არამედ მეგობრობისა და კულტურული გაცვლის ხიდი.

ელჩმა ყურადღება გაამახვილა თავმჯდომარე სი ძინფინის გლობალურ ცივილიზაციურ ინიციატივაზე, რომელიც მოუწოდებს მსოფლიო ცივილიზაციების მრავალფეროვნების პატივისცემისკენ, თანასწორობისა და დიალოგისკენ. ჭოუ ციენის განმარტებით, აბრეშუმის გზა სწორედ ამ პრინციპების პრაქტიკული გამოხატულებაა.

27 ოქტომბერი

ჩინეთის ელჩის ვიზიტი კავკასიის უნივერსიტეტში

23 ოქტომბერს, კავკასიის უნივერსიტეტს ესტუმრა ჩინეთის სახალხო რესპუბლიკის ელჩი, ჭოუ ციენი. ელჩი შეხვდა უნივერსიტეტის პრეზიდენტ კახა შენგელიას, ინტერნაციონალიზაციის ვიცე-პრეზიდენტ ირენა მელუას და საერთაშორისო ურთიერთობების დეპარტამენტის დირექტორ ქეთევან კარბაიას.

შეხვედრის ფარგლებში განხილული იქნა კავკასიის უნივერსიტეტსა და ჩინეთის უმაღლეს საგანმანათლებლო დაწესებულებებს შორის არსებული თანამშორომლობა: სტუდენტური გაცვლითი პროგრამები, მოკლევადიანი პროგრამები როგორც ქართველი, ისე ჩინელი სტუდენტებისთვის და ერთობლივი კვლევითი პროექტები. 

აღსანიშნავია, რომ კავკასიის უნივერსიტეტი აქტიურად თანამშრომლობს ჩინეთთან, მათ შორის სიჩუანის ტურიზმის უნივერსიტეტთან 2020 წელს გაფორმებული მემორანდუმის ფარგლებში. შეთანხმება სტუდენტთა და ლექტორთა გაცვლით პროგრამებს და ორმაგი ხარისხის პროგრამებს ითვალისწინებს. ასევე, წინა წელს, კავკასიის უნივერსიტეტის სტუდენტებს საშუალება მიეცათ მონაწილეობა მიიღონ ჩინეთის სიას უნივერსიტეტის საერთაშორისო საზაფხულო ბანაკში. 

კავკასიის უნივერსიტეტი არა მხოლოდ აძლიერებს აკადემიურ კავშირებს ჩინეთის წამყვან უნივერსიტეტებთან, არამედ უზრუნველყოფს სტუდენტებისა და ლექტორებისთვის საერთაშორისო გამოცდილებისა და კულტურული გაცვლის ფართო შესაძლებლობებს.

23 ოქტომბერი

საქართველოს ელჩი პაატა კალანდაძე Lanting Forum-ის ღონისძიებას დაესწრო

2025 წლის 27 ოქტომბერს საქართველოს ელჩი პაატა კალანდაძე დაესწრო „Lanting Forum“-ის მიერ ორგანიზებულ შეხვედრას გლობალური მმართველობის გაუმჯობესების საკითხებზე. ღონისძიებაზე სიტყვით გამოვიდა ჩინეთის საგარეო საქმეთა მინისტრი ვანგ ი. მან წარმოადგინა ჩინეთის პრეზიდენტ სი ძინფინის Global Governance Initiative (GGI), რომელიც მან 2025 წლის სექტემბერში წარადგინა, შანხაის თანამშრომლობის ორგანიზაციის (SCO) შეხვედრაზე.

GGI ინიციატივის ხუთი ძირითადი კონცეფციაა: სუვერენული თანასწორობის დაცვა, საერთაშორისო სამართლის უზენაესობის დაცვა, მულტილატერალიზმის პრინციპი, ხალხზე ორიენტირებული მიდგომა და მოქმედებაზე ორიენტირება.

„Lanting Forum“ კი წარმოადგენს კომუნიკაციის პლატფორმას, რომელიც შექმნილია ჩინეთის საგარეო საქმეთა სამინისტროს ინიციატივით და მიზნად ისახავს მთავრობის, ბიზნესის, აკადემიური წრეებისა და მედიის წარმომადგენლებს შორის დისკუსიების წახალისებას საგარეო პოლიტიკის საკითხებზე.

 „Lanting Forum“–ზე ვანგ ი-მ აღნიშნა, რომ GGI, ანუ გლობალური მმართველობის ინიციატივა, ეფუძნება გაეროს ქარტიის მიზნებსა და პრინციპებს, ასახავს ჩინური დიპლომატიის ტრადიციებს, საერთო მომავლის ხედვას, და წარმოადგენს გზას გლობალური მმართველობის რეფორმისთვის. 

27 ოქტომბერი

შოთა რუსთაველის უნივერსიტეტი ჩინეთის ორ საერთაშორისო თეატრალურ ფესტივალზე

2025 წლის ოქტომბერში, საქართველოს შოთა რუსთაველის თეატრისა და კინოს სახელმწიფო უნივერსიტეტის დასი მონაწილეობდა ორ მნიშვნელოვან თეატრალურ ფესტივალში ჩინეთში. 20-22 ოქტომბერს პეკინში, მსოფლიო თეატრალური განათლების ეგიდით (WTEA), „2025 წლის საერთაშორისო თეატრალური ფესტივალი“ გაიმართა. უნივერსიტეტი მაყურებლის წინაშე წარდგა სპექტაკლით – „სიყვარულის მსუბუქი ფრთებით“.

ფესტივალების ფარგლებში, საქართველოს ელჩი პაატა კალანდაძე შეხვდა ჩინეთის ცენტრალური დრამის აკადემიის ვიცე პრეზიდენტ სიუ ჭენს, რექტორ გიორგი შალუტაშვილს და უნივერსიტეტის პედაგოგ ნიკა საბაშვილს. შეხვედრაზე მხარეებმა განიხილეს სამომავლო თანამშრომლობის გაღრმავების საკითხი. 

მსოფლიო თეატრალური განათლების ალიანსი (WTEA), რომელიც დაარსდა 2016 წელს, აერთიანებს წამყვან თეატრალურ სკოლებს და მიზნად ისახავს განათლებისა და გამოცდილების გაცვლის ხელშეწყობას. როგორც ალიანსის ერთ-ერთი დამფუძნებელი წევრი, შოთა რუსთაველის უნივერსიტეტი მეოთხედ იღებს მონაწილეობას ფესტივალში.

გარდა პეკინის ფესტივალისა, 2025 წლის 24 ოქტომბრიდან 2 ნოემბრამდე, ქართული დასი მონაწილეობას მიიღებს კიდევ ერთ მნიშვნელოვან ჩინურ თეატრალურ ღონისძიებაში, „კუილინის ფესტივალში“.

23 ოქტომბერი

აზერბაიჯანი

ჩინეთის საინფორმაციო სააგენტო „სინხუას“ ინტერვიუ აზერბაიჯანის სურსათის უვნებლობის სააგენტოს დირექტორთან

აზერბაიჯანის სურსათის უვნებლობის სააგენტოს დირექტორმა, აქბარ ალიევმა, ჩინეთის საინფორმაციო სააგენტო „სინხუასთან“ ინტერვიუში სააგენტოს დელეგაციის ჩინეთში ვიზიტის შედეგებზე ისაუბრა.

აქბარ ალიევმა ინტერვიუში აღნიშნა, რომ წელს აზერბაიჯანის რესპუბლიკის პრეზიდენტის, ილჰამ ალიევის ჩინეთში ვიზიტმა ორმხრივ ურთიერთობებს მნიშვნელოვნად შეუწყო ხელი. მისი თქმით, სწორედ ქვეყნებს შორის თანამშრომლობის ფარგლებში დაიწყო აზერბაიჯანული თხილის ექსპორტი „მსოფლიოს ერთ-ერთ ყველაზე დიდ ბაზარზე“, ჩინეთში.

ალიევმა ყურადღება გაამახვილა აზერბაიჯანის სურსათის უვნებლობის სააგენტოსა და შესაბამის ჩინურ უწყებას შორის, ჩინეთში თხილისა და ნუშის ექსპორტის შესახებ ხელმოწერილ ოქმზე. ამავდროულად, მან აღნიშნა, რომ ჩინეთში რიგი პროდუქტების, მათ შორის, ქათმის, ვაშლისა და კენკრის ექსპორტის გაფართოების მიზნით, ჩინურ მხარესთან დიალოგი გრძელდება.

20 ოქტომბერი

აზერბაიჯანის მეტროლოგიის ინსტიტუტის დელეგაცია ჩინეთში

აზერბაიჯანის ანტიმონოპოლიის და სამომხმარებლო ბაზრის კონტროლის სახელმწიფო სააგენტოს დაქვემდებარებაში არსებული მეტროლოგიის ინსტიტუტის წარმომადგენლები, სამუშაო ვიზიტით, ჩინეთს ეწვივნენ.

ვიზიტის ფარგლებში, აზერბაიჯანის დელეგაცია ჩინეთის მეტროლოგიის ინსტიტუტის ხელმძღვანელობას შეხვდა. შეხვედრის ფარგლებში, მხარეებმა ისაუბრეს აზერბაიჯანის მეტროლოგიის ინსტიტუტის სამუშაო მიმართულებებსა და განხორციელებულ პროექტებზე. ასევე, ინსტიტუტებმა განიხილეს „სტანდარტული სანიმუშო მატერიალების“ (Standard Reference Materials) სფეროში თანამშრომლობის შესაძლებლობები.

ამავდროულად, მხარეებმა განიხილეს ერთობლივი სამეცნიერო-კვლევითი და ტექნიკური პროექტების განხორციელების, სპეციალისტების გადამზადებისა და ტრენინგების ორგანიზების კუთხით თანამშრომლობის პერსპექტივები. 

20 ოქტომბერი

აზერბაიჯანის სახელმწიფო ფილარმონია შანხაის საერთაშორისო ფესტივალზე

აზერბაიჯანის სახელმწიფო საინფორმაციო სააგენტოს მიერ გავრცელებული ინფორმაციის მიხედვით, აზერბაიჯანის სახელმწიფო აკადემიური ფილარმონიის წარმომადგენლები, ბაქოს სახელმწიფო ორკესტრის თანხლებით, შანხაის 24-ე საერთაშორისო ხელოვნების ფესტივალში მონაწილეობდნენ. სააგენტოს ინფორმაციით, ორკესტრის მუსიკალურმა წარმოდგენამ აუდიტორიის მხრიდან დიდი მოწონება დაიმსახურა.

21 ოქტომბერი

ჩინეთის დისტანციური ზონდირებისა და ციფრული მიწის ინსტიტუტი აზერბაიჯანში

21 ოქტომბერს, ჩინეთის მეცნიერებათა აკადემიის დისტანციური ზონდირებისა და ციფრული დედამიწის ინსტიტუტის თავმჯდომარის მოადგილე, ლი რენინგი, აზერბაიჯანის მეცნიერებათა ეროვნული აკადემიის სეისმოლოგიური მომსახურების ცენტრს ეწვია.

ლი რენინგმა სეისმოლოგიური კვლევების სფეროში თანამშრომლობის მხრივ ინტერესი გამოხატა. ჩინეთის დელეგაციის წარმომადგენელმა მხარეებს შორის ორმხრივი თანამშრომლობის შესახებ მემორანდუმის გაფორმების ინიციატივა წამოაყენა და აღნიშნა: „ვიმედოვნებ, რომ მსგავსი დოკუმენტის ხელმოწერას, ჩვენი ორმხრივი თანამშრომლობის მჭიდრო განვითარებაში, დადებითი შედეგები ექნება.“

21 ოქტომბერი

ბაქოს საინჟინრო უნივერსიტეტი ჩინეთის სამიტზე

ბაქოს საინჟინრო უნივერსიტეტის საერთაშორისო ურთიერთობების მიმართულებით პრორექტორი, ათრაბა გიულმა მონაწილეობა მიიღო „უნივერსიტეტის პარტნიორების სამიტი ხანგჭოუ 2025“-ში, რომელიც ჩინეთის სახალხო რესპუბლიკაში ჩატარდა.

სამიტი ჩინეთის ბეიჰანგის უნივერსიტეტის (Beihang University) მიერ დაორგანიზდა და მიზნად ისახავდა უნივერსიტეტებს შორის თანამშრომლობის გაძლიერებას.

ბაქოს საინჟინრო უნივერსიტეტის პრორექტორმა, სამიტის ფარგლებში, ჩინეთში პარტნიორი უნივერსიტეტების წარმომადგენლებს შეხვდა და მრგვალ მაგიდებში მიიღო მონაწილეობა. შეხვედრებზე განიხილეს თანამშრომლობის პოტენციური პერსპექტივები, მათ შორის, მასწავლებელ-მოსწავლეთა გაცვლის მექანიზმები, ორმაგი სადიპლომო პროგრამების შექმნა, ერთობლივი სამეცნიერო-კვლევითი და ინოვაციური პროექტების განხორციელება და სხვა.

22 ოქტომბერი

ჩინეთთან ეკონომიკური ურთიერთობის გაძლიერების შესახებ შეხვედრა გაიმართა

ჩინეთის საერთაშორისო ვაჭრობის საბჭოს შაანსის პროვინციის კომიტეტის წარმომადგენლები, ოფიციალური ვიზიტით, აზერბაიჯანს ეწვივნენ. ვიზიტის ფარგლებში, დელეგაციასა და აზერბაიჯანის ექსპორტისა და ინვესტიციების ხელშეწყობის სააგენტოს შორის „ჩინეთის შაანსის პროვინციასთან აზერბაიჯანის ეკონომიკური და სავაჭრო თანამშრომლობის“ შესახებ მრგვალი მაგიდა გაიმართა.

შეხვედრაზე სააგენტოს აღმასრულებელი დირექტორის მოადგილემ, თურალ ჰაჯილიმ აზერბაიჯან-ჩინეთის თანამშრომლობის დინამიკაზე, აზერბაიჯანში ჩინური კომპანიების საინვესტიციო პროექტებსა და აზერბაიჯან-ჩინეთის სავაჭრო კავშირებზე ისაუბრა. თავის მხრივ, შაანსის პროვინციის კომიტეტის პარტიის მდივანმა, ვანგ ხონგვეიმ აღნიშნა, რომ ორმხრივი სავაჭრო-საინვესტიციო თანამშრომლობის გაფართოების მნიშვნელოვანი პოტენციალი არსებობს.

მრგვალი მაგიდის ფარგლებში, ჩინურმა კომპანიებმა პრეზენტაციები წარადგინეს. შეხვედრის დასასრულს, მხარეებმა სამომავლო თანამშრომლობის შესაძლებლობები განიხილეს.

23 ოქტომბერი

შეხვედრა აზერბაიჯანელ სტუდენტებთან, რომლებიც ჩინეთში აგრძელებენ სწავლას

ბაქოს საინჟინრო უნივერსიტეტსა და პეკინის ქიმიური ტექნოლოგიების უნივერსიტეტს შორის, ორმაგი სადიპლომო პროგრამის ფარგლებში, აზერბაიჯანიდან სტუდენტთა პირველი ნაკადი ჩინეთში აგრძელებს სწავლას.

გასულ კვირას, ხსენებულ აზერბაიჯანელ სტუდენტებთან პეკინში გაიმართა შეხვედრა, რომლის ფარგლებშიც, განხილულ იქნა სასწავლო პროცესი, სტუდენტების აკადემიური მიღწევები და სოციალურ გარემოსთან ადაპტაციის საკითხები.

საყურადღებოა, რომ ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის ორმაგი სადიპლომო პროგრამა, აზერბაიჯანისა და ჩინეთის უნივერსიტეტებს შორის, ბაკალავრიატის დონეზე შექმნილი პირველი ორმაგი სადიპლომო პროგრამაა. პროგრამის ფარგლებში, სტუდენტები ორივე უნივერსიტეტში მიიღებენ განათლებას და მოიპოვებენ ორმაგ დიპლომს. პროგრამა მოიცავს ქიმიის, კომპიუტერული და მექანიკური ინჟინერიის სპეციალობებს. აზერბაიჯანის სახელმწიფო საინფორმაციო სააგენტოს ინფორმაციით, მომავალ წლებში, პროგრამაზე მისაღები ადგილების რაოდენობის გაზრდა იგეგმება.

24 ოქტომბერი

სომხეთი

სომხეთის ელჩი შანხაის თანამშრომლობის ორგანიზაციის ფორუმზე

24 ოქტომბერს, სომხეთში ჩინეთის ელჩმა, ვაჰე გევორგიანმა მონაწილეობა მიიღო პეკინში გამართულ ჩინეთ-შანხაის თანამშრომლობის ორგანიზაციის საინვესტიციო თანამშრომლობის ფორუმში. ფორუმი დაორგანიზდა შანხაის თანამშრომლობის ორგანიზაციის (SCO) და ჩინეთის საერთაშორისო განვითარების ასოციაციის (CODA) მიერ.

„ელჩების დიალოგის“ პანელზე, სომხეთის ელჩმა ისაუბრა სომხეთის ეკონომიკურ და საინვესტიციო ლანდშაფტზე. ელჩმა ყურადღება გაამახვილა ქვეყანაში მიმდინარე ბიზნეს რეფორმებსა და კვალიფიცირებულ ადამიანურ რესურსებზე. გევორგიანმა პოტენციური თანამშრომლობის დარგებს შორის ახსენა მაღალი ტექნოლოგიების ინდუსტრიები, განახლებადი ენერგია, სოფლის მეურნეობა, ტურიზმი და სატრანსპორტო სექტორი.

ელჩმა აღნიშნა, რომ ჩინეთ-SCO-ს მსგავს პლატფორმებში სომხეთის მონაწილეობა ადასტურებს ოფიციალური ერევანის პოლიტიკას, რომელიც ითვალისწინებს ეკონომიკურ დივერსიფიკაციასა და დიპლომატიას. კერძოდ, ქვეყანა აზიის ეკონომიკებთან ეკონომიკური კავშირების პარალელურად, ინარჩუნებს კავშირებს დასავლეთსა და სამხრეთ კავკასიის რეგიონში პარტნიორებთან.

აღსანიშნავია, რომ ფორუმამდე, ჩინურ მედიასთან, CGTN-თან ინტერვიუში განაცხადა, რომ ერევანსა და ჩინეთს შორის ურთიერთობები ურთიერთნდობას ეფუძნება და ქვეყნებს შორის თანამშრომლობას „ლიმიტი“ არ აქვს.

24 ოქტომბერი

უზბეკეთი
უზბეკეთმა ჩინეთში 629.8 მილიონი დოლარის ღირებულების გაზი გაიტანა

უზბეკეთმა მიმდინარე წლის იანვარ-სექტემბერში ჩინეთში მილსადენით დაახლოებით 629.8 მილიონი დოლარის ღირებულების ბუნებრივი აირი გაიტანა. ჩინეთში გაზის უმსხვილესი იმპორტიორი (7.29 მილიარდი დოლარის ღირებულების იმპორტით) რუსეთი გახდა. თურქმენეთი, რომელიც მრავალი წლის განმავლობაში პირველ ადგილს იკავებდა, ახლა მეორე ადგილზეა. მის მიერ ჩინეთში მილსადენით მიწოდებული გაზის მოცულობა 2025 წლის პირველ ცხრა თვეში 12.7%-ით შემცირდა და 6.46 მილიარდი დოლარი შეადგინა.

ჩინეთის მთავარი საბაჟო სამმართველოს საერთო სტატისტიკა აჩვენებს, რომ 2024 წელს ჩინეთმა $21.1 მილიარდის ღირებულების გაზი შემოიტანა, რაც, 2023 წელთან შედარებით, 8.6%-ით მეტია.

20 ოქტომბერი

უზბეკმა სტუდენტებმა მონაწილეობა მიიღეს ჩინეთის საგანმანათლებლო პროგრამაში

უზბეკეთში ოფიციალურად დაიწყო საგანმანათლებლო ინიციატივის, Seeds for the Future-ის ახალი ეტაპი, რომელიც მიზნად ისახავს ციფრული ტექნოლოგიებით დაინტერესებული ნიჭიერი სტუდენტების მხარდაჭერას. პროექტის საერთაშორისო ფაზა ჩინეთში გაიმართება.

ციფრული განათლების განვითარების ცენტრის დირექტორმა, აზამატ ეშონკულოვმა, სიტყვით გამოსვლისას აღნიშნა, რომ ჩინეთის ციფრული ეკონომიკის სწრაფი განვითარება ქმნის კვალიფიციური IT-სპეციალისტების მზარდ მოთხოვნას.

„უზბეკეთში ციფრული ეკონომიკა დინამიკურად ვითარდება, რაც ზრდის კვალიფიციური კადრების საჭიროებას. სასიხარულოა, რომ ჩვენი სტუდენტების განათლების დონე უმჯობესდება და მათი დაინტერესება ციფრული ტექნოლოგიებით იზრდება — მათ შორის გლობალური ინიციატივების, როგორიცაა Seeds for the Future, მეშვეობით,“ — აღნიშნა მან.

პროგრამა, რომელიც 2008 წლიდან ჩინური კომპანია Huawei Technologies Co., Ltd.-ის მიერ ხორციელდება, უკვე მოიცავს 142 ქვეყნის 19,000-ზე მეტ სტუდენტს და თანამშრომლობს 500-ზე მეტ უნივერსიტეტთან მთელ მსოფლიოში.

წელს პროგრამის ფარგლებში უზბეკეთის ექვსი უნივერსიტეტის ათი სტუდენტი მიიწვიეს ჩინეთში გამართულ საერთაშორისო საგანმანათლებლო სემინარზე, რომელიც ჩატარდა 19-25 ოქტომბერს. ერთკვირიან პროგრამაში მონაწილეობა მიიღო 19 ქვეყნის 150 სტუდენტმა, რომლებიც მუშაობენ ისეთ თანამედროვე დისციპლინებზე, როგორიცაა ხელოვნური ინტელექტი, 5G კომუნიკაციები და სხვა ინოვაციური IT-მიმართულებები.

25 ოქტომბერი

უზბეკეთში ჩინურ კომპანიასთან თანამშრომლობით ჰიდროელექტროსადგურის მშენებლობა იგეგმება

ანდიჯანის რეგიონში, ჩინურ კომპანია Sichuan Power Transmission & Transformation Construction-თან პარტნიორობით, 200 მეგავატიანი ჰიდროელექტროსადგურის მშენებლობაა დაგეგმილი. მხარეებმა მოილაპარაკეს 500 მილიონი დოლარის ინვესტიციის პროექტის განხორციელებაზე, რომელიც მოიცავს როგორც ახალი სადგურის აშენებას, ასევე არსებული ქვესადგურების მოდერნიზაციას.

შეთანხმება მიღწეულია ანდიჯანის რეგიონის დელეგაციის ჩინეთში ოფიციალური ვიზიტის ფარგლებში. უზბეკური მხარის წარმომადგენლები შეხვდნენ ხსენებული ჩინური კომპანიის ხელმძღვანელობას. მოგვიანებით, ანდიჯანის რეგიონულმა ადმინისტრაციამ აღნიშნა, რომ ჩინურ მხარესთან შეთანხმებული პროექტი ენერგეტიკის სექტორში ორმხრივ თანამშრომლობას გააძლიერებს და რეგიონში განახლებადი ენერგიის წყაროების განვითარებას შეუწყობს ხელს.

აღსანიშნავია, რომ კომპანია Sichuan Power Transmission & Transformation Construction ოპერირებს ელექტროენერგეტიკული ინფრასტრუქტურისა და ელექტროენერგიის გადაცემის სისტემების მშენებლობის დარგში.

26 ოქტომბერი

ჩინეთი სამხრეთ კავკასიასა და უზბეკეთში (20-26 ოქტომბერი) Read More »

ჩინეთი სამხრეთ კავკასიასა და ყირგიზეთში (13-19 ოქტომბერი)

კვირის ამბავი / /

საქართველო

მარიამ ქვრივიშვილი ჩინეთის ელჩს შეხვდა

ივანიშვილის მთავრობის ეკონომიკისა და მდგრადი განვითარების მინისტრი, მარიამ ქვრივიშვილი საქართველოში ჩინეთის ელჩს, ჭოუ ციენს შეხვდა.

გავრცელებული ინფორმაციის თანახმად, “მხარეებმა ისაუბრეს საქართველოსა და ჩინეთს შორის არსებული სტრატეგიული პარტნიორობის განვითარების დადებით დინამიკაზე, მათ შორის, სავაჭრო-ეკონომიკური მიმართულებით”. ამასთანავე, შეხვედრაზე განხილულ იქნა “ორმხრივი თანამშრომლობის საკითხები სამოქალაქო ავიაციისა და ტურიზმის სექტორებში”.

პრესრელიზის მიხედვით, მხარეებმა შეხვედრაზე “განსაკუთრებული” ყურადღება გაამახვილეს ჩინეთის მე-9 საერთაშორისო იმპორტის გამოფენაზე, რომელიც შანხაიში 5-10 ნოემბერს გაიმართება. ჩინეთის მხარემ საქართველო აღნიშნულ გამოფენაზე ოფიციალურად მიიწვია. შეხვედრაზე აღინიშნა, რომ გამოფენაზე 40-ზე მეტი ქართული კომპანია იქნება წარდგენილი.

15 ოქტომბერი

“ერთი ჩინეთის პრინციპის” შესახებ ჩინეთის ელჩის სტატია ქართულ მედიაში

17 ოქტომბერს, ქართულ გაზეთ „რეზონანსში“ გამოქვეყნდა საქართველოში ჩინეთის ელჩის, ჭოუ ციენის, სტატია, სათაურით: „ერთი ჩინეთის პრინციპი უდავოა: გაეროს გენერალური ასამბლეის №2758 რეზოლუციაში ეჭვის შეტანა დაუშვებელია“.

სტატიის შინაარსობრივ ნაწილში რიგი მონაკვეთები განსაკუთრებულ ყურადღებას იქცევს, რამდენადაც ხაზგასმულია სახალხო რესპუბლიკის მტკიცე და მკაცრი პოზიცია თაივანის საკითხთან მიმართებით:

  • სტატიაში აღნიშნულია, რომ “თაივანი ჩინეთის უდავო და უცვლელი ნაწილია”. ელჩის თქმით, 1971 წელს გაეროს გენერალური ასამბლეის მიერ მიღებული რეზოლუცია 2758, სწორედ, ერთი ჩინეთის პრინციპს ეფუძნება. კერძოდ, რეზოლუციაში მკაფიოდ არის ნათქვამი, რომ “მსოფლიოში ერთადერთი ჩინეთია და ჩინეთის სახალხო რესპუბლიკის მთავრობა მთლიანად ჩინეთის, მათ შორის, თაივანის ერთადერთი ლეგიტიმური წარმომადგენელია”.
  • სტატიაში აღნიშნულია, რომ “ცალკეული ქვეყნები და თაივანის ხელისუფლება ხშირად ალიაქოთს ტეხენ გაეროს გენერალური ასამბლეის 2758-ე რეზოლუციის შესახებ.”
  • ასევე, ელჩი წერს, რომ “ჩინეთისთვის დღესდღეობით კიდევ უფრო შეუძლებელია, უმოქმედოდ იჯდეს და თაივანის გახლეჩის მცელობებს სისრულეში მოყვანის საშუალებები მისცეს”.

ჩინეთის საგარეო პოლიტიკური ხედვების შემდგომ, სტატიის დასასრულს, ელჩი ყურადღებას ამახვილებს საქართველო-ჩინეთის პარტნიორობაზე და აღნიშნავს, რომ მხარეები “ერთმანეთს ენდობიან და პატივს სცემენ ერთმანეთის სუვერენიტეტს, დამოუკიდებლობასა და ტერიტორიულ მთლიანობას”.

ამასთანავე, სტატიაში, ჩინეთის ელჩი აღნიშნავს, რომ “ჩინეთი აფასებს საქართველოს მიერ ერთი ჩინეთის პრინციპისადმი ხანგრძლივ ერთგულებას და მზადაა, საქართველოსთან ერთად კვლავ დაიცვას ერთმანეთის ძირითადი ინტერესები”. თუმცა, სტატიაში უგულებელყოფილია ფაქტი, რომ სახალხო რესპუბლიკა საქართველოს ტერიტორიული მთლიანობისადმი ანალოგიურ “ერთგულებას” არ იჩენს და გასული წლების მანძილზე, ჩინეთს ერთხელაც კი არ დაუჭერია მხარი გაეროს გენერალური ასამბლეის მიერ “აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ” მიღებული რეზოლუციისთვის. მათ შორის, სტრტატეგიული პარტნიორობის გამოცხადების შემდგომ პერიოდშიც (2023-2025 წლებში), ჩინეთმა აღნიშნული რეზოლუციის მხარდაჭერისგან “თავი შეიკავა”.

17 ოქტომბერი

პეკინში „Emotions Are Georgia - საქართველოს ოთხი სეზონის გამოცდილება“ გაიმართა

ჩინეთ-საქართველოს მზარდი სტრატეგიული პარტნიორობისა და ხალხთაშორისი კავშირების ფონზე, საქართველოს ტურიზმის ეროვნულმა ადმინისტრაციამ, ჩინეთში საქართველოს საელჩოს აქტიური მხარდაჭერით, პეკინის ლონგფუსის მოედანზე, კულტურული ღონისძიება გამართა („一往情深·格鲁吉亚“). 17-19 ოქტომბერს გამართულმა სამდღიანმა პროგრამამ ჩინელ სტუმრებს საქართველოს კულტურა ახლოდან გააცნო.

ღონისძიებას დაესწრო ჩინეთის სახალხო რესპუბლიკაში საქართველოს საგანგებო და სრულუფლებიანი ელჩი პაატა კალანდაძე, რომელმაც მისასალმებელ სიტყვაში საქართველო-ჩინეთის მეგობრული ურთიერთობებისა და სტრატეგიული პარტნიორობის მნიშვნელობაზე გაამახვილა ყურადღება.

19 ოქტომბერი

აზერბაიჯანი

23 ჩინელი სტუდენტი აზერბაიჯანში აგრძელებს სწავლას

2025-2026 წლების, აზერბაიჯანის მთავრობის სასტიპენდიო პროგრამების ფარგლებში, 65-მა უცხოელმა სტუდენტმა აზერბაიჯანის უმაღლეს სასწავლო დაწესებულებებში სწავლის გაგრძელების უფლება მოიპოვა. სტიპენდიანტებს შორის 23 სტუდენტი ჩინეთის სახალხო რესპუბლიკიდანაა.

სასტიპენდიო პროგრამის ფარგლებში, სტუდენტები სხვადასხვა სახელმწიფო უნივერსიტეტში გააგრძელებენ სწავლას. მათ შორის, 9 ჩინელი სტუდენტი ბაქოს სახელმწიფო უნივერსიტეტში ისწავლის.

14 ოქტომბერი

ჩინური კომპანიები „კასპიის მშენებლობის კვირის“ გამოფენაზე

ბაქოში გაიმართა „კასპიის მშენებლობის კვირის“ 30-ე გამოფენა, რომელსაც რეგიონის სამშენებლო სექტორის წამყვანი კომპანიები ესწრებოდნენ. გამოფენა აერთიანებდა რამდენიმე საერთაშორისო ღონისძიებას, მათ შორის, აზერბაიჯანის საერთაშორისო მშენებლობის გამოფენას, ყარაბაღის აღდგენის, აღორძინებისა და განვითარების შესახებ გამოფენას და სხვა.

გამოფენაში 17 ქვეყნიდან 299 კომპანია მონაწილეობდა. წარმოდგენილ ქვეყნებს შორის ერთ-ერთი ჩინეთის სახალხო რესპუბლიკა იყო.

აზერბაიჯანულ მედიაში ჩინური კომპანიების მონაწილეობას განსაკუთრებული ყურადღება ეთმობა. კერძოდ, აზერბაიჯანის მთავრობის საინფორმაციო სააგენტოს სტატიაში აღნიშნულია, რომ „Plastex Caspian“ გამოფენაში ჩინური კომპანიის მონაწილეობა „მრეწველობის განვითარებას“ და „საერთაშორისო თანამშრომლობის გაფართოებას“ შეუწყობს ხელს.

14 ოქტომბერი

ჩინეთ-აზერბაიჯანის სავაჭრო ურთიერთობები (2025 წლის იანვარი-აგვისტო)

აზერბაიჯანის საინფორმაციო სააგენტოს მიერ გავრცელებული ინფორმაციის თანახმად, 2025 წლის იანვარ-აგვისტოს თვეებში აზერბაიჯანის იურიდიულმა და ფიზიკურმა პირებმა 173 ქვეყანასთან სავაჭრო კავშირები დაამყარეს.

სახელმწიფო საბაჟო კომიტეტის მიერ გავრცელებული ინფორმაციის მიხედვით, საგარეო ვაჭრობის ბრუნვის 87.8 %-ს თურქეთთან, რუსეთთან, ჩინეთთან, გერმანიასა და სხვა რიგ ქვეყნებთან სავაჭრო ურთიერთობები შეადგენს.

ასევე, აღნიშნულია, რომ აზერბაიჯანში იმპორტირებული პროდუქციის მთლიანი ღირებულების 19.1 % ჩინეთის სახალხო რესპუბლიკაზე მოდის. საყურადღებოა, რომ აზერბაიჯანში იმპორტირებული პროდუქციის მაჩვენებლით, ჩინეთი აზერბაიჯანის მეზობელ და პარტნიორ ქვეყნებს, მათ შორის, თურქეთსა და რუსეთსაც კი, წინ უსწრებს.

აზერბაიჯანიდან ექსპორტირებული პროდუქციის მაჩვენებლის მიხედვით კი, მთავარი ქვეყნები არიან იტალია, თურქეთი, რუსეთი, ჩეხეთი, ბულგარეთი და სხვ. აღსანიშნავია, რომ ჩინეთზე აზერბაიჯანული ექსპორტის მხოლოდ 3.5 % მოდის.

14 ოქტომბერი

შეთანხმება აზერბაიჯანის სურსათის უვნებლობის სააგენტოსა და ჩინეთის საბაჟო ადმინისტრაციას შორის

აზერბაიჯანის რესპუბლიკის სურსათის უვნებლობის სააგენტოს დელეგაცია ჩინეთს ეწვია. ვიზიტის მიზნად აზერბაიჯანული საკვები პროდუქციის საექსპორტო მიმართულებების გაფართოება დასახელდა.

აზერბაიჯანის სურსათის უვნებლობის სააგენტოსა და ჩინეთის საბაჟო ადმინისტრაციას შორის „აზერბაიჯანის რესპუბლიკიდან ჩინეთის სახალხო რესპუბლიკაში ექსპორტირებული თხილისა და ნუშის შემოწმების, კარანტინისა და სანიტარული მოთხოვნების შესახებ ოქმს“ მოეწერა ხელი. ამასთანავე, მხარეებმა ხელი მოაწერეს „იმპორტსა და ექსპორტში სურსათის უვნებლობის სფეროში თანამშრომლობის მექანიზმის შესახებ დოკუმენტს“.

15 ოქტომბერი

ჩინეთი ბაქოში სამედიცინო ტურიზმის შესახებ გამართულ კონფერენციაზე

ბაქოში სახელმწიფო ტურიზმის სააგენტოს ორგანიზებით ჩატარდა საერთაშორისო კონფერენცია, სახელწოდებით: „ჯანმრთელობის ტურიზმის კონფერენცია 2025: კეთილდღეობის და სამედიცინო ტურიზმის მომავალი მიმართულებები“.

კონფერენციას ესწრებოდნენ სხვადასხვა ქვეყნის, მათ შორის, თურქეთის, მაკედონიის, ტაილანდის, დიდი ბრიტანეთისა და ჩინეთის წარმომადგენლები. ჩინეთის სახალხო რესპუბლიკის მხრიდან კონფერენციაში მონაწილეობდა ჩინეთის ჯანმრთელობისა და სამედიცინო ტურიზმის ასოციაცია. ასოციაციის პრეზიდენტმა, სიტყვით გამოსვლის დროს, ჯანმრთელობისა და სამედიცინო ტურიზმის სექტორის განვითარების მნიშვნელობაზე ისაუბრა.

15 ოქტომბერი

აზერბაიჯანისა და ჩინეთის ექიმების ერთობლივი ოპერაცია

აზერბაიჯანის მთავრობის საინფორმაციო სააგენტოს მიერ გავცელებული ინფორმაციით, აზერბაიჯანისა და ჩინეთის ქირურგებმა ერთ პაციენტს დისტანციურად, რობოტული ხელსაწყოების დახმარებით, ოპერაცია ჩაუტარეს. საყურადღებოა, რომ სააგენტო აღნიშნულ მოვლენას “აზერბაიჯანის ჯანდაცვის ისტორიაში უპრეცედენტო ინოვაციურ მოვლენად” აფასებს.

16 ოქტომბერი

აზერბაიჯანის წარმომადგენელი პეკინის საერთაშორისო კონგრესზე

აზერბაიჯანის სამედიცინო-კვლევითი კარდიოლოგიის ინსტიტუტის დირექტორმა, პროფესორმა გიულნაზ მაჰირ დადაშოვამ მონაწილეობა მიიღო პეკინში გამართულ საერთაშორისო კარდიოლოგთა კონგრესზე, სადაც ერთ-ერთი სესიის ფარგლებში, სიტყვით გამოვიდა.

გავრცელებული ინფორმაციის მიხედვით, კონგრესის ფარგლებში, აზერბაიჯანის რესპუბლიკის ჯანდაცვის სამინისტროს სამეცნიერო-კვლევითი კარდიოლოგიის ინსტიტუტიდა ცინხუას უნივერსიტეტი სამედიცინო-კვლევით და აკადემიურ დარგებში თანამშრომლობის შესახებ მემორანდუმს მოაწერენ ხელს.

17 ოქტომბერი

ჩინეთიდან აზერბაიჯანში მულტიმოდალური გადაზიდვები დაიწყო

ჩინეთის სინძიანის უიღურთა ავტონომიური რეგიონიდან ჩინეთი-ყირგიზეთი-უზბეკეთი-თურქმენეთი-აზერბაიჯანის მარშრუტით პირველი საერთაშორისო მულტიმოდალური კონტეინერული გადაზიდვები დაიწყო.

აზერბაიჯანის საინფორმაციო სააგენტო აღნიშნული მარშრუტით მულტიმოდალური გადაზიდვების დაწყებას, “გზისა და სარტყლის” ინიციატივის ფარგლებში, აზიისა და ევროპის დამაკავშირებელი დერეფნის განვითარებისთვის მნიშვნელოვან მოვლენად აფასებს.

18 ოქტომბერი

სომხეთი

სომხეთი ჩინეთთან ლოგისტიკურ კავშირებს აძლიერებს

სომხეთსა და ყაზახეთს შორის ამოქმედდა ახალი მულტიმოდალური სატრანსპორტო მაშრუტი, რომელიც ქვეყნებს თურქმენეთისა და ირანის გავლით დააკავშირებს.

საყურადღებოა, რომ აღნიშნული მოვლენა სომეხი ექსპერტების მიერ ცენტრალურ აზიასა და ჩინეთთან სავაჭრო ურთიერთობების გაღრმავების შესაძლებლობად არის შეფასებული. კერძოდ, მოქმედი სატრანსპორტო მარშრუტი ორ განშტოებას აერთიანებს: ჩინეთი-ყაზახეთი-უზბეკეთი-თურქმენეთი-ირანი-სომხეთი და ჩინეთი-ყაზახეთი-თურქმენეთი-ირანი-სომხეთი.

17 ოქტომბერი

სომხეთში ჩინეთის სახალხო რესპუბლიკის ელჩის სტატია თაივანის შესახებ

სომხეთში ჩინეთის ელჩის, ლი სინვეის, სტატია, სათაურით: “ერთი ჩინეთის“ უდავო პრინციპი და ახალი სტრატეგიული პარტნიორობა ჩინეთსა და სომხეთს შორის”, სომხურ მედიაში გავრცელდა. სტატიაში რამდენიმე მონაკვეთი იქცევს ყურადღებას:

  • სტატიაში ჩინეთის ელჩი აღნიშნავს, თაივანის დაბრუნება წარმოადგენს მეორე მსოფლიო ომის შედეგების და ომისშემდგომი საერთაშორისო წესრიგის განუყოფელ ნაწილს.
  • ელჩი თვლის, რომ თაივანის ჩინეთთან კავშირის ისტორიული და სამართლებრივი ფაქტები უტყუარია და დასტურებულია ერთმნიშვნელოვნად. კერძოდ, ის აღნიშნავს, რომ გაეროს გენერალური ასამბლეის მიერ 1971 წელს დამტკიცებული რეზოლუცია 2758, სამ ფუნდამენტურ პრინციპს ადასტურებს: “არსებობს მხოლოდ ერთი ჩინეთი”; “თაივანი წარმოადგენს ჩინეთის განუყოფელ ნაწილს”; “ჩინეთის სახალხო რესპუბლიკის მთავრობა არის ერთადერთი ლეგიტიმური მთავრობა, რომელიც მთელ ჩინეთს წარმოადგენს”.
  • სტატიაში მკაცრად არის დაგმობილი თაივანის ხელისუფლებისა და „ზოგიერთი გარე ძალის“ ქმედებები, რომლებიც თითქოსდა რეზოლუციის შინაარსს ამახინჯებენ თაივანის „გაურკვეველი სტატუსის“ ყალბი თხრობის გასავრცელებლად და მისი „საერთაშორისო სივრცის“ გასაფართოებლად.

სტატიის დასასრულს, ელჩი განსაკუთრებულ ყურადღებას უთმობს ჩინეთ-სომხეთის ურთიერთობებსა და სტრატეგიული პარტნიორობას.  ელჩი სინვეი ხაზს უსვამს, რომ სომხეთის მხარე სრულად უჭერს მხარს „ერთი ჩინეთის“ პრინციპს , მტკიცედ ეწინააღმდეგება „თაივანის დამოუკიდებლობას“ და მხარს უჭერს ჩინეთის ეროვნული გაერთიანების ძალისხმევას. თავის მხრივ, ჩინეთის ელჩი აღნიშნავს, რომ “ჩინეთი მტკიცედ უჭერს მხარს სომხეთის პოლიტიკურ დამოუკიდებლობას, სუვერენიტეტს, ტერიტორიულ მთლიანობასა და საზღვრების ურღვევობას, და დადებითად აფასებს სომხეთის „მშვიდობის გზაჯვარედინის“ ინიციატივას”.

17 ოქტომბერი

ყირგიზეთი

ჩინური კომპანიების დელეგაცია ბიშკეკში

2025 წლის 14 ოქტომბერს ჩინეთიდან, კერძოდ, შანხაიდან, მსხვილი კომპანიების წარმომადგენლები ყირგიზეთს საქმიანი ვიზიტით ეწვივნენ.

დელეგაციამ, რომელშიც ჩინეთი ყირგიზეთი-უზბეკეთის მაგისტრალის მთავარი ინჟინერი, ასევე,  ფარმაცევტული და ინფრასტრუქტურული სფეროს ხელმძღვანელები შედიოდნენ, ყირგიზეთის სავაჭრო-სამრეწველო პალატის პრეზიდენტ თემირ სარიევთან შეხვედრა გამართა.

მოლაპარაკებების შედეგად, მხარეები ყირგიზული კომპანიებისთვის შანხაიში საქმიანი ტურის მოწყობაზე შეთანხმდნენ. როგორც სსპ-ის პრეზიდენტმა სარიევმა აღნიშნა, საბოლოო მიზანი ჩინური ინტერესების კონკრეტულ კონტრაქტებად გარდაქმნაა.

14 ოქტომბერი

ყირგიზეთის ქალთა კონგრესის პრეზიდენტის ინტერვიუ

2025 წლის 15 ოქტომბერს ჩინეთის ოფიციალურ საინფორმაციო სააგენტო Xinhua-სთვის მიცემულ ინტერვიუში, ზამირა აკბაგისევამ, ყირგიზეთის ქალთა კონგრესის პრეზიდენტმა, განაცხადა, რომ ჩინეთი ბოლო ათწლეულებში ქალთა უფლებების დაცვასა და გაუმჯობესებაში სასიცოცხლოდ მნიშვნელოვან როლს ასრულებს.

ასევე, მან ჩინეთს ყირგიზეთში ქალთა ინიციატივების მხარდაჭერისთვის მადლობა გადაუხადა და აღნიშნა, რომ ჩინელი ქალების წარმატება საზოგადოებრივ ინტერესებზე ორიენტირებული მმართველობის ნათელი მაგალითია.

15 ოქტომბერი

ყირგიზეთის პოლიტიკურ წრეებში გავლენიანი ექსპერტის ინტერვიუ

2025 წლის 17 ოქტომბერს ჩინეთის ოფიციალურ საინფორმაციო სააგენტო Xinhua-ს მიერ გამოქვეყნებულ ინტერვიუში ვკითხულობთ, რომ ყირგიზეთის „მსოფლიო პოლიტიკის ინსტიტუტის“ დირექტორი შერადილ ბაქთიგულოვი ჩინეთს საერთაშორისო-გლობალური პროგრესის აქტიურ მხარდამჭერად მოიხსენებს. იგი მიიჩნევს, რომ მზარდი ანტი-გლობალისტური ტენდენცია, პროტექციონიზმი და უნილატერალიზმი მსოფლიო წესრიგს სერიოზულ გამოწვევას უქმნის.

ბაქთიგულოვის აზრით, ამ გლობალური გამოწვევების ფონზე, ჩინეთმა წარმოადგინა კონცეფცია, რომელიც ღიაობის, ორმხრივი სარგებლისა და სამართლიანობის პრინციპებს ეფუძნება.

17 ოქტომბერი

InvestHK-ის დელეგაციის ოფიციალური ვიზიტი ცენტრალურ აზიაში

2025 წლის 18 ოქტომბერს ჰონგ-კონგის სპეციალური ადმინისტრაციული რეგიონის სამთავრობო სააგენტოს, Invest Hong Kong-ის (InvestHK), გენერალურმა დირექტორმა, ქალბატონმა ალფა ლაუმ, ცენტრალური აზიის სამ ქვეყანაში: ყაზახეთში, ყირგიზეთსა და უზბეკეთში ოფიციალური რვა დღიანი ვიზიტი დაიწყო.

აღნიშნული ვიზიტი უშუალოდ უკავშირდება ჩინეთის “ერთი სარტყელი – ერთი გზის” (BRI) ინიციატივას და ხაზს უსვამს პეკინის ძალისხმევას, გააძლიეროს რეგონული ეკონომიკური კავშირები. ვიზიტის მიზანია ჰონგ-კონგის, როგორც წამყვანი საერთაშორისო ფინანსური ჰაბის, შესაძლებლობების წარდგენა ცენტრალური აზიის ქვეყნებისთის.

ქალბატონმა ლაუმ აღნიშნა, რომ რეგიონის ინფრასტრუქტურული და განვითარების სხვა ტიპის პროექტებისთვის მრავალფეროვანი დაფინანსების არხების შესათავაზებლად, ჰონგ-კონგის მყარი სარეგულაციო ჩარჩო და დაბალი საგადასახადო რეჟიმი ერთვარ საფუძველს ქმნის.

18 ოქტომბერი

ჩინეთი სამხრეთ კავკასიასა და ყირგიზეთში (13-19 ოქტომბერი) Read More »

ჩინეთი სამხრეთ კავკასიასა და ყაზახეთში (6-12 ოქტომბერი)

კვირის ამბავი / /

საქართველო

თბილისს ჩინელი ინფლუენსერები და ბლოგერები ეწვივნენ

თბილისის მერიის ეკონომიკური განვითარების საქალაქო სამსახურის ორგანიზებით, თბილისს ჩინეთის ტურიზმის სექტორის ციფრული მედიის წარმომადგენლები, ბლოგერები და ტურისტული ასოციაციების წევრები ეწვივნენ. სტუმრებს ეკონომიკური განვითარების საქალაქო სამსახურის ხელმძღვანელმა, ვახტანგ ლომჯარიამ უმასპინძლა.

ციფრული კამპანიის ფარგლებში, მედიის წარმომადგენლები თავიანთ პლატფორმებზე გაავრცელებენ ინფორმაციას თბილისის ტურისტული შეთავაზებების შესახებ, რათა უფრო მეტი ჩინელი ტურისტი მოიზიდონ საქართველოში.

10 ოქტომბერი, 2025

კობახიძე ჩინეთის ელჩს შეხვდა

ივანიშვილის პრემიერ-მინისტრი, ირაკლი კობახიძე ჩინეთის ელჩს საქართველოში, ჭოუ ციენს შეხვდა.

ივანიშვილის მთავრობის პრესსამსახურის მიერ გავრცელებული ინფორმაციის თანახმად, ელჩმა ირაკლი კობახიძეს ადგილობრივი თვითმმართველობის არჩევნებში მმართველი პარტიის „დამაჯერებელი გამარჯვება“ მიულოცა.

გავრცელებული ინფორმაციის თანახმად, „ჩინეთის ელჩმა კობახიძეს გადასცა ჩინური მხარის ოფიციალური მიწვევა ჩინეთის მე-8 საერთაშორისო იმპორტის გამოფენაზე, რომელიც შანხაიში 5-10 ნოემბერს გაიმართება“.

აღსანიშნავია, რომ ირაკლი კობახიძისა და ჩინეთის ელჩის ორმხრივი შეხვედრები რეგულარულ ხასიათს ატარებს. კერძოდ, 10 ოქტომბრის შეხვედრამდე, კობახიძე ჩინეთის ელჩს, მიმდინარე წლის მანძილზე, 3-ჯერ შეხვდა. შესაბამისად, ჩნდება განცდა, რომ ჩინეთის ელჩთან რეგულარული დიპლომატიური შეხვედრები ერთგვარი პოლიტიკური კონსულტაციების სერიად იქცა.

10 ოქტომბერი, 2025

სომხეთი

სომხეთის პრემიერ-მინისტრის შეხვედრა AIIB-ის წარმომადგენელთან

სომხეთის პრეს სამსახურის ცნობით, 10 ოქტომბერს სომხეთის ვიცე-პრემიერმა, ტიგრან ხაჩატრიანმა, უმანსპინძლა კონსტანტინ ლიმიტოვსკის, აზიის ინფრასტრუქტურის საინვესტიციო ბანკის (AIIB) საჯარო სექტორის, პროექტების და კორპორატიული ფინანსების კლიენტების მთავარ საინვესტიციო ოფიცერს.

შეხვედრის დროს ხაჩატრიანმა განაცხადა, რომ სომხეთის წევრობა AIIB-ში შექმნის ახალ შესაძლებლობებს დიდ რეგიონულ საინვესტიციო პროექტებში მონაწილეობისთვის, ასევე ეს მოიზიდავს საჯარო და კერძო კაპიტალს ქვეყანაში სხვადასხვა სექტორული პროგრამების განსახორციელებლად.

შეხვედრის განმავლობაში მხარეებმა გაცვალეს შეხედულებები თანამშრომლობის შესაძლო საკითხებზე, სახელდობრ, განიხილეს ზოგადი საკითხები, რომლებიც უმთავრესად უკავშირდება მთავარ ინფრასტრუქტულ პროექტებს, ენერგიის, წყლის მართვისა და სხვა სექტორულ საკითხებს.

აზერბაიჯანი

აზერბაიჯანის ენების უნივერსიტეტში (ADU) ჩინური “შუა შემოდგომის” დღესასწაული აღინიშნა

აზერბაიჯანის ენების უნივერსიტეტის კონფუცის ინსტიტუტში „შუა შემოდგომის“ დღესასწაულის აღმნიშვნელი ღონისძიება ჩატარდა.

ღონისძიებაზე კონფუცის ინსტიტუტის მასწავლებელმა, ქამალა მამმადოვმა და დირექტორმა, რაფიქ აბასოვმა ფესტივალის ისტორიის, „მთვარის ნამცხვრის“ და სხვა ჩინური ტრადიციების შესახებ ისაუბრეს. ღონისძიების ფარგლებში, უნივერსიტეტის სტუდენტებმა ჩინელი პოეტების მიერ მთვარისადმი მიძღვნილი ლექსები წარმოთქვეს.

6 ოქტომბერი, 2025

აზერბაიჯანელმა მოსწავლემ ჩინეთში ჩატარებულ კონკურსში გაიმარჯვა

ჩინეთში საშუალო სკოლის მოსწავლეების მე-18-ე საერთაშორისო „ჩინური ენის ხიდის“ კონკურსის ფინალურ ეტაპში აზერბაიჯანის ენების უნივერსიტეტის კონფუცის ინსტიტუტის მოსწავლემ, ქამილ ბუნიათოვმა მიიღო მონაწილეობა.

თიენძინში ჩატარებული კონკურსის ფარგლებში, ქამილ ბუნიათოვი „საუკეთესო მიღწევების გამო“ დაჯილდოვდა და მას, ჩინეთში სწავლის გასაგრძელებლად, სტიპენდია მიენიჭა.

7 ოქტომბერი, 2025

ჩინეთ-აზერბაიჯანის ეკონომიკური პარტნიორობის პერსპექტივები განიხილეს

აზერბაიჯანის ექსპორტისა და ინვესტიციების ხელშეწყობის სააგენტოს (AZPROMO) წარმომადგენლები შეხვდნენ ჩინეთის საგარეო განვითარების ასოციაციის დელეგაციას, რომელსაც ასოციაციის პრეზიდენტი ჰე ჟენვეინი ხელმძღვანელობდა.

შეხვედრის ფარგლებში, მხარეებმა, ორმხრივი ეკონომიკური თანამშრომლობის გაღრმავების საკითხი, ასოციაციასა და მის შემადგენლობაში არსებულ კომპანიებთან კავშირების დამყარების პერსპექტივები და ორგანიზაციებს შორის თანამშრომლობის იურიდიულ ჩარჩოში მოქცევის შესაძლებლობა განიხილეს.  

7 ოქტომბერი, 2025

აზერბაიჯანის ბილესუვარის მზის ელექტროსადგურზე ჩინურ ტექნოლოგიას გამოიყენებენ

აზერბაიჯანის ბილესუვარის რაიონში 445 მეგავატი სიმძლავრის მზის ელექტროსადგური შენდება. ელექტროსადგური 2027 წლიდან ამოქმედდება.

გავრცელებული ინფორმაციის თანახმად, პროექტი ჩინური კომპანია Ja Solar-ის ტექნოლოგიების გამოყენებით განხორციელდება. კერძოდ, ელექტროსადგურზე დამონტაჟდება ჩინური წარმოების 943 000-ზე მეტი მზის პანელი.

9 ოქტომბერი, 2025

ყაზახეთი
აღმოსავლეთ ყაზახეთში უახლესი ლაბორატორია გაიხსნა

8 ოქტომბერს აღმოსავლეთ ყაზახეთის რეგიონში უახლესი ვეტერინარული ლაბორატორია საზეიმოდ გაიხსნა. პროექტი ყაზახეთსა და ჩინეთს შორის სამთავრობათაშორისო შეთანხმების საფუძველზე განხორციელდა. ლაბორატორიის გახსნის  მთავარი მიზანი სურსათის უვნებლობის დონის გაუმჯობესება და ქვეყნის სასოფლო-სამეურნეო ექსპორტის პოტენციალის გაძლიერებაა. ლაბორატორია აკრედიტებულია როგორც საერთაშორისო (ISO 17025), ისე ჩინური სტანდარტებით, რაც ყაზახეთს საშუალებას მისცემს, რომ ტექნიკური ბარიერების გარეშე გააფართოვოს სასოფლო-სამეურნეო პროდუქციის ექსპორტი ჩინეთსა და სხვა ბაზრებზე.

თანამშრომლობის ფარგლებში, ჩინეთის მთავრობამ დაწესებულებას 840 მილიონი ტენგეს ღირებულების 99 ერთეული თანამედროვე ლაბორატორიული მოწყობილობა გადასცა. ლაბორატორიას წლის განმავლობაშო განსაკუთრებით საშიშ ინფექციებსა და სურსათის უვნებლობაზე 550,000-მდე ტესტის ჩატარება შეუძლია.

ასტანის კონფერენცია: ჩინეთი საერთაშორისო სამართლის ნორმების დაცვას უჭერს მხარს

8 ოქტომბერს, ასტანამ უმასპინძლა რეგიონულ კონფერენციას, რომელიც საერთაშორისო ჰუმანიტარული სამართლის (IHL) მიმართ პოლიტიკური ვალდებულებების განმტკიცებას მიეძღვნა. ეს ინიციატივა 2024 წელს გაეროს გენერალურ ასამბლეაზე ექვსმა სახელმწიფომ – ყაზახეთმა, ჩინეთმა, ბრაზილიამ, საფრანგეთმა, იორდანიამ და სამხრეთ აფრიკამ – ჩამოაყალიბა და მიზნად ისახავს შეიარაღებული კონფლიქტების ფონზე საერთაშორისო სამართლის ნორმების პრაქტიკული შეუსრულებლობის პრობლემის დაძლევას.

კონფერენციას ჩინური მხარეც ესწრებოდა, შეხვედრაზე განიხილეს პრაქტიკული მექანიზმები, რომლებიც ცენტრალურ აზიაში, სამხრეთ კავკასიასა და აღმოსავლეთ ევროპაში საერთაშორისო სამართლის უკეთ აღსრულებასა და ფუნქციონირებას შეუწყობს ხელს. ჩინეთის აქტიური მონაწილეობა აღნიშნულ პოლიტიკურ პროცესში ნათლად აჩვენებს პეკინის სტრატეგიულ მისწრაფებას, გააფართოოს გავლენა გლობალური მმართველობის არასამხედრო სფეროებში.

ყაზახეთი ჩინელი ტურისტების ხუთ ყველაზე მოთხოვნად მიმართულებაშია

9 ოქტომბრის მონაცემებით, ყაზახეთი ჩინელი მოგზაურებისთვის, სასტუმროების დაჯავშნის კუთხით, ყველაზე სწრაფად მზარდი საერთაშორისო მიმართულებების ტოპ ხუთეულში მოხვდა. „Kazakh Tourism“-ის ცნობით, ეს ტენდენცია ჩინეთის რვადღიან ეროვნულ დღესასწაულსა (National Day Holiday) და „შუა შემოდგომის ფესტივალის“ უქმეებს უკავშირდება.

მონაცემები ადასტურებს, რომ ორმხრივი უვიზო პოლიტიკა ეფექტური აღმოჩნდა: მიმდინარე წლის 9 თვეში ჩინეთიდან ყაზახეთში ტურისტების რაოდენობის მაჩვენებელმა 675,000-ს მიაღწია, რაც წინა წლის ანალოგიურ პერიოდთან შედარებით (655,000) მნიშვნელოვანი ზრდაა. აღნიშნულს ხელს უწყობს ციფრული ინტერესის ზრდაც: ჩინურ საძიებო სისტემა „Baidu“ (ჩინეთის უდიდესი საძიებო სისტემა)-ს მონაცემებით, ყაზახეთის შესახებ დღიური ძებნის სიხშირემ
430,000-ს მიაღწია, განსაკუთრებული აქტივობით – გუანდონგისა და პეკინის ეკონომიკურად ძლიერი რეგიონებიდან.

ყაზახეთი ჩინეთთან ერთად სტრატეგიულ საინვესტიციო პროექტებს აფართოებს

პრეზიდენტ ტოკაევის პირდაპირი დავალების ფარგლებში, დასავლეთ ყაზახეთში 14 მსხვილი საინვესტიციო პროექტი განხორციელდება. ეს ნაბიჯი ხაზს უსვამს ჩინეთ-ყაზახეთის სტრატეგიულ პარტნიორობას. ჩინელი ინვესტორები რეგიონის ეკონომიკის საკვანძო სექტორებში 134 მილიარდ ტენგეზე მეტი კაპიტალის ჩადებას გეგმავენ.

პროექტების მთელი პაკეტი, რომელსაც ერთი ჩინური კონსორციუმი განახორციელებს, სხვადასხვა მიზანს ემსახურება, მაგალითად, პირველ ეტაპზე სამრეწველო ზონაში 34 მეგავატიანი გაზის ელექტროსადგურის მშენებლობა დაიწყება, რაც მომავალი საწარმოების სტაბილურ ენერგომომარაგებას უზრუნველყოფს. ჩინური კომპანია VEGA Power-ის განცხადებით, პროექტი ეტაპობრივია, საწყისი ინვესტიცია კი 30 მილიონ აშშ დოლარს შეადგენს.

10 ოქტომბერი, 2025

ყაზახეთი ჩინეთის დახმარებით სამთო-მეტალურგიულ წარმოებას აფართოებს

13 ოქტომბერს, ყაზახეთის პრემიერ-მინისტრი ოლჟას ბექთენოვი ჩინეთის მსოფლიო დონის მეტალურგიული გიგანტის, Zijin Mining Group-ის დირექტორთა საბჭოს თავმჯდომარეს, ჩენ ძინჰეს, შეხვდა. მოლაპარაკებების მთავარი თემა სამთო-მეტალურგიულ სექტორში საინვესტიციო თანამშრომლობის გაღრმავება იყო. მხარეები შეთანხმდნენ, რომ აქმოლის რეგიონში მსხვილი სამთო-მეტალურგიულ საინვესტიციო კომპლექსის პროექტზე ერთობლივად იმუშავებენ.

პრემიერ-მინისტრმა ბექთენოვმა ხაზგასმით აღნიშნა ყაზახეთის მთავრობის მხარდაჭერა იმ პროექტების მიმართ, რომლებსაც მაღალი დამატებითი ღირებულება გააჩნიათ. ამ ტიპის პარტნიორობა აუცილებელია მინერალების წარმოების გაფართოებისთვის, მუდმივი სამუშაო ადგილების შექმნისა და ეკოლოგიურად მდგრადი, მოწინავე ტექნოლოგიების დანერგვისთვის.

ჩინეთი სამხრეთ კავკასიასა და ყაზახეთში (6-12 ოქტომბერი) Read More »

Scroll to Top