კვირის ამბავი

ჩინეთი სამხრეთ კავკასიასა და ტაჯიკეთში (4-10 მაისი)

კვირის ამბავი / /
საქართველო

საქართველოს რკინიგზის მოდერნიზაცია შუა დერეფნისთვის

5 მაისი

5 მაისს საქართველოს ეკონომიკის სამინისტრომ განაცხადა, რომ ქვეყნის დამოუკიდებლობის ისტორიაში პირველად, საქართველოს რკინიგზაში სრული განახლების პროექტი იწყება. პროექტი მოიცავს ინფრასტრუქტურის მოდერნიზაციას, სარკინიგზო ხაზების განახლებასა და ტვირთბრუნვის შესაძლებლობების ზრდას.

პროექტის მთავარი მიზანი საქართველოს, როგორც შუა დერეფნის მნიშვნელოვანი სატრანზიტო ჰაბის, გაძლიერებაა. ხელისუფლება მიიჩნევს, რომ განახლებული რკინიგზა ევროპასა და აზიას შორის ტვირთების გადაზიდვას დააჩქარებს და განსაკუთრებით გაზრდის ჩინეთიდან მომავალი სატრანზიტო ნაკადების მოცულობას.

ბოლო წლებში შუა დერეფნის მიმართ ჩინეთის ინტერესიც გაიზარდა, რადგან მარშრუტი ჩინეთს ევროპასთან აკავშირებს რუსეთის გვერდის ავლით. თბილისში აცხადებენ, რომ რკინიგზის მოდერნიზაცია საქართველოს კონკურენტუნარიანობას რეგიონულ ლოგისტიკურ ქსელში მნიშვნელოვნად გააძლიერებს.

აზერბაიჯანი

ჩინეთი მხარს უჭერს აზერბაიჯანის ინიციატივას SCO განვითარების ბანკთან მიერთების შესახებ

5 მაისი

5 მაისს გავრცელებული ინფორმაციით, ჩინეთის მხარემ გამოთქვა ინტერესი აზერბაიჯანის შესაძლო გაწევრიანების მიმართ შანხაის თანამშრომლობის ორგანიზაციის (SCO) განვითარების ბანკში.

ინფორმაცია გავრცელდა აზერბაიჯანის ფინანსთა სამინისტროსა და ჩინეთის წარმომადგენლებს შორის გამართული შეხვედრის შემდეგ, რომელიც აზიის განვითარების ბანკის (ADB) წლიური შეხვედრის ფარგლებში, სამარყანდში გაიმართა.

მხარეებმა შეხვედრაზე განიხილეს აზერბაიჯან–ჩინეთის ეკონომიკური თანამშრომლობის გაფართოება, მათ შორის სავაჭრო კავშირების გაძლიერება და ინდუსტრიულ ზონებში ჩინური კომპანიების ჩართულობის ზრდა.

ჩინეთის მხარის განცხადებით, აზერბაიჯანთან ურთიერთობები დინამიურად ვითარდება და ქვეყნის მონაწილეობა მრავალმხრივ ფინანსურ ინსტიტუტებში, მათ შორის SCO განვითარების ბანკში, რეგიონული თანამშრომლობის გაღრმავებას შეუწყობს ხელს.

აზერბაიჯანის მხარემ დაადასტურა მზადყოფნა ჩინეთთან პარტნიორობის კიდევ უფრო გაფართოების მიმართ როგორც ორმხრივ, ისე მრავალმხრივ ფორმატებში.

პეკინში ჰეიდარ ალიევის დაბადების დღისადმი მიძღვნილი საქველმოქმედო ღონისძიება გაიმართა

8 მაისი

8 მაისს პეკინში გაიმართა საქველმოქმედო ღონისძიება, რომელიც აზერბაიჯანის ეროვნული ლიდერის, ჰეიდარ ალიევის დაბადების დღეს მიეძღვნა. ღონისძიება ორგანიზებული იყო აზერბაიჯანის საელჩოს მიერ ჩინეთის სახალხო რესპუბლიკაში, ხოლო ინიციატივას მხარს უჭერდა ჰეიდარ ალიევის ფონდი.

ღონისძიებაზე სიტყვით გამოსვლისას აზერბაიჯანის ელჩმა ჩინეთში ხაზი გაუსვა ჰეიდარ ალიევის როლს თანამედროვე აზერბაიჯანის სახელმწიფოებრიობის ჩამოყალიბებაში და აღნიშნა მისი წვლილი ქვეყნის საგარეო პოლიტიკის განვითარებაში. მისი თქმით, დღეს აზერბაიჯანსა და ჩინეთს შორის ურთიერთობები ყოვლისმომცველი სტრატეგიული პარტნიორობის დონეზეა.

საელჩოს განცხადებით, ღონისძიება საქველმოქმედო ხასიათის იყო და ასახავდა ჰეიდარ ალიევის ფონდის ჰუმანიტარულ მიმართულებასა და აზერბაიჯან-ჩინეთის კულტურულ-დიპლომატიურ თანამშრომლობას.

ღონისძიება გაიმართა ჰეიდარ ალიევის დაბადებიდან 103-ე წლისთავთან დაკავშირებით.

სომხეთი

სომხეთი ჩინეთთან ეკონომიკური თანამშრომლობის გაფართოების პოტენციალს უსვამს ხაზს

6 მაისი

სომხეთი აღნიშნავს, რომ ჩინეთი ქვეყნისთვის მნიშვნელოვანი ეკონომიკური პარტნიორია და ორმხრივ ურთიერთობებში ჯერ კიდევ არსებობს მნიშვნელოვანი, გამოუყენებელი პოტენციალი.

ინფორმაცია გაჟღერდა „ერევანის დიალოგი 2026“ საერთაშორისო ფორუმის ფარგლებში, სადაც სომხეთის ეკონომიკის მინისტრის მოადგილემ ანუშიკ ავეტისიანმა განაცხადა, რომ მხარეები მუშაობენ სავაჭრო ურთიერთობების გაფართოებასა და ახალი საინვესტიციო პროექტების განვითარებაზე.

მისი თქმით, ჩინური კომპანიები უკვე აქტიურად მონაწილეობენ სომხეთის ინფრასტრუქტურულ პროექტებში, რაც ხელს უწყობს ეკონომიკის დივერსიფიკაციასა და მდგრადობის გაძლიერებას.

სომხური მხარე ხაზს უსვამს, რომ ჩინეთთან თანამშრომლობის გაღრმავება ქვეყნის ერთ-ერთი პრიორიტეტია, განსაკუთრებით ინფრასტრუქტურის, ვაჭრობისა და რეგიონული კავშირის მიმართულებით.

„ერევანის დიალოგი 2026“ ფორუმი 5-6 მაისს გაიმართა თემაზე: „ქარიშხლების გავლით გზის პოვნა“, სადაც მონაწილეობდნენ პოლიტიკოსები და ექსპერტები, რომლებმაც განიხილეს გლობალური ცვლილებები და განვითარების გამოწვევები.

ტაჯიკეთი

CGTN-მა მოამზადა სიუჟეტი ჩინეთ-ტაჯიკეთის ინდუსტრიული თანამშრომლობის შესახებ

10 მაისი

ჩინეთის სახელმწიფო მედიამ, CGTN-მა, 10 მაისს გაავრცელა სიუჟეტი სახელწოდებით „China–Tajikistan industrial cooperation empowers Central Asia“, სადაც აღწერილია ჩინეთ-ტაჯიკეთის ეკონომიკური თანამშრომლობის მიმდინარე მიმართულებები და მისი გავლენა ცენტრალური აზიის ინდუსტრიულ განვითარებაზე.

ჩინეთის სახელმწიფო მედიის შეფასებით, ტაჯიკეთში მიმდინარე ინდუსტრიული და ენერგეტიკული პროექტები „ღრმა ტრანსფორმაციის“ ეტაპზეა. სიუჟეტი ყურადღებას ამახვილებს იმაზე, რომ ჩინეთი ტაჯიკეთს აწვდის ტექნოლოგიებს, სრულ ინდუსტრიულ აღჭურვილობასა და საინჟინრო გამოცდილებას, რაც მიზნად ისახავს ქვეყნის წარმოებითი სექტორის მოდერნიზაციას და იმპორტზე დამოკიდებულების შემცირებას.

CGTN-ის მასალაში გამოყოფილია რამდენიმე ძირითადი მიმართულება: თანამედროვე ცემენტის ქარხნებში ავტომატიზებული წარმოების დანერგვა, ალუმინის ინდუსტრიის განახლება, ჰიდროენერგეტიკული ინფრასტრუქტურის რეაბილიტაცია, მათ შორის როღუნის ჰესთან დაკავშირებული სამუშაოები.

მედია აღნიშნავს, რომ ეს თანამშრომლობა არა მხოლოდ ტაჯიკეთის შიდა ინდუსტრიის გაძლიერებას ემსახურება, არამედ ფართო რეგიონულ მიზანს, ცენტრალური აზიის ენერგეტიკული და ინფრასტრუქტურული ინტეგრაციის გაღრმავებას „სარტყლისა და გზის“ ინიციატივის ფარგლებში.

სიუჟეტის მიხედვით, ჩინეთის ჩართულობა ქმნის პირობებს ახალი საექსპორტო არხების განვითარებისათვის და აძლიერებს რეგიონში „მწვანე ენერგიისა“ და ინფრასტრუქტურული შესაძლებლობების გაფართოებას, რაც გრძელვადიან ეკონომიკურ თანამშრომლობად არის წარმოდგენილი.

ჩინეთი სამხრეთ კავკასიასა და ტაჯიკეთში (4-10 მაისი) Read More »

ჩინეთი სამხრეთ კავკასიასა და უზბეკეთში (27 აპრილი – 3 მაისი)

კვირის ამბავი / /
საქართველო

აჭარა ჩინელი ტურისტების მოსაზიდად ციფრულ კამპანიას იწყებს

29 აპრილი

აჭარის ტურიზმის დეპარტამენტი ჩინელი ვიზიტორების მოსაზიდად მასშტაბურ ციფრულ კამპანიას იწყებს. ინიციატივის ფარგლებში, რეგიონის ტურისტული მიმართულებები ჩინეთის წამყვან ონლაინპლატფორმებზე განთავსდება.

კამპანიის მოსამზადებლად აჭარას Tongcheng Travel-ის მარკეტინგის ხელმძღვანელი ეწვია. ვიზიტის მიზანი რეგიონის ტურისტული პროდუქტების ადგილზე გაცნობა და იმ მასალების მომზადება იყო, რომლებიც შემდგომ პლატფორმის ციფრულ არხებზე გავრცელდება. დეპარტამენტის შეფასებით, ეს აჭარის, როგორც მიმზიდველი ტურისტული მიმართულების, ცნობადობის გაზრდას შეუწყობს ხელს.

აჭარის ტურიზმის დეპარტამენტის ინფორმაციით, მარტიდან ჩინურ ციფრულ პლატფორმებზე აჭარის პოპულარიზაციის ცხრათვიანი ონლაინკამპანია მიმდინარეობს. კამპანიის ფარგლებში რეგიონის ტურისტული პროდუქტები Douyin-ზე, Red Note-სა და Weibo-ზეა წარმოდგენილი. ბათუმის პოპულარიზაციისთვის შეიქმნა საპრომოციო გვერდი – Visit Batumi, რომლის მეშვეობითაც ჩინელ მომხმარებლებს აჭარისა და საქართველოს ტურისტული შეთავაზებების შესახებ ინფორმაცია მიეწოდებათ.

კამპანიის მიზანია, ჩინურ აუდიტორიას აჭარის სამთო–სათავგადასავლო, ეკოტურისტული და საზღვაო მიმართულებები გააცნოს და ბათუმი ოთხივე სეზონზე მიმზიდველ ტურისტულ ქალაქად წარმოაჩინოს.

რეგიონის პოპულარიზაცია საერთაშორისო ტურისტულ ღონისძიებებზეც იგეგმება. აჭარის ტურიზმის დეპარტამენტი წელს რეგიონს შანხაის საერთაშორისო ტურისტულ გამოფენაზე, ITB China 2026, წარადგენს, სადაც საქართველო პარტნიორი ქვეყნის სტატუსით იქნება წარმოდგენილი.

კონფუცის ინსტიტუტმა ჩინური ენის საერთაშორისო დღე პრეზენტაციით აღნიშნა

2 მაისი

ჩინური ენის საერთაშორისო დღესთან დაკავშირებით, თავისუფალი უნივერსიტეტის კონფუცის ინსტიტუტის ორგანიზებით, 2 მაისს პრეზენტაცია გაიმართა. ღონისძიების თემა იყო „ჩინური ენა ლიტერატურაში – ცვლილების საწყისი და მაკავშირებელი რგოლი წარსულსა და აწმყოს შორის“.

პრეზენტაციაზე თავისუფალი უნივერსიტეტისა და თბილისის სახელმწიფო უნივერსიტეტის ლექტორებმა და სინოლოგებმა, მარიამ ჩახაიამ და ანა გოგუაძემ, აუდიტორიას ჩინური ენის როლზე ძველი და თანამედროვე ლიტერატურის მაგალითებზე დაყრდნობით ესაუბრნენ.

ღონისძიების ფარგლებში განხილული იყო, როგორ შეასრულა ჩინურმა ენამ მნიშვნელოვანი როლი საზოგადოებრივ განვითარებაში და როგორ შეძლო, ენობრივი ცვლილებებისა და ეპოქათა მონაცვლეობის მიუხედავად, კავშირი შეენარჩუნებინა წარსულთან.

აზერბაიჯანი

აზერბაიჯანი და ჩინეთი სატვირთო გადაზიდვებში თანამშრომლობას აფართოებენ

27 აპრილი

აზერბაიჯანი და ჩინეთი საერთაშორისო საავტომობილო სატვირთო გადაზიდვების მიმართულებით თანამშრომლობას აფართოებენ. მხარეებმა 2026 წლისთვის ნებართვების დამატებითი კვოტების გაცვლაზე შეთანხმებას მიაღწიეს, რის შედეგადაც ნებართვების საერთო რაოდენობა ხუთჯერ გაიზრდება.

AZERTAC-ის ინფორმაციით, შეთანხმება ჩინეთის ქალაქ ურუმჩიში გამართული აზერბაიჯან–ჩინეთის საერთაშორისო საავტომობილო ტრანსპორტის პირველი მოლაპარაკებების ფარგლებში შედგა.

ვიზიტის ფარგლებში აზერბაიჯანის დელეგაცია ხორგოსის სასაზღვრო–გამშვებ პუნქტსა და თავისუფალ სავაჭრო ზონაში მოქმედ ლოგისტიკურ ცენტრებსაც გაეცნო. მხარეებმა გადამზიდავებსა და ლოგისტიკურ კომპანიებს შორის პირდაპირი თანამშრომლობის შესაძლებლობებიც განიხილეს.

აზერბაიჯანმა ჩინეთში ლოგისტიკის საერთაშორისო გამოფენაში მიიღო მონაწილეობა

27 აპრილი

27 აპრილს აზერბაიჯანის ციფრული განვითარებისა და ტრანსპორტის სამინისტროს დელეგაციამ ჩინეთის ქალაქ ჩენდუში გამართულ მიწოდების ჯაჭვისა და საპორტო ლოგისტიკის მე-8 საერთაშორისო გამოფენაში მიიღო მონაწილეობა.

აზერბაიჯანის სამინისტროს ინფორმაციით, გამოფენის გახსნის ცერემონიაზე ყურადღება დაეთმო აზერბაიჯანსა და ჩინეთს შორის გაფორმებულ დოკუმენტებს, სტრატეგიული პარტნიორობის დინამიკასა და ტრანსპორტისა და ლოგისტიკის სფეროში თანამშრომლობას.

ღონისძიების ფარგლებში აზერბაიჯანის დელეგაციამ მონაწილეობა მიიღო აზია–ევროპის მულტიმოდალური ტრანსპორტის განვითარების მე-10 კონფერენციაშიც. შეხვედრაზე წარმოდგენილი იყო აზერბაიჯანის სატრანსპორტო სისტემა, ქვეყნის როლი საერთაშორისო სატრანსპორტო დერეფნებში, მათ შორის შუა დერეფანში, ასევე მიმდინარე ინფრასტრუქტურული პროექტები.

ნახიჩევანის სახელმწიფო უნივერსიტეტი ჩინეთის სინძიანის უნივერსიტეტთან თანამშრომლობას იწყებს

28 აპრილი

ნახიჩევანის სახელმწიფო უნივერსიტეტი ჩინეთის სინძიანის უნივერსიტეტთან აკადემიურ თანამშრომლობას იწყებს. მხარეებმა ურუმჩიში გამართულ შეხვედრაზე ერთობლივი საგანმანათლებლო და კვლევითი პროექტების განხორციელებაზე იმსჯელეს.

AZERTAC-ის ინფორმაციით, საწყის ეტაპზე უნივერსიტეტები გეგმავენ თანამშრომლობას მწვანე ენერგეტიკის მიმართულებით, ასევე ხელოვნური ინტელექტისა და ბიოტექნოლოგიის ერთობლივი ცენტრების დაფუძნებას.

მხარეები ასევე შეთანხმდნენ აბრეშუმის გზის კვლევითი ცენტრის შექმნაზე. ინიციატივა კვლევითი საქმიანობის გაფართოებას, აკადემიური გაცვლის გაძლიერებასა და საერთაშორისო თანამშრომლობის გაღრმავებას ისახავს მიზნად.

შეხვედრაზე ხაზი გაესვა ურუმჩისა და ნახიჩევანის დაძმობილებული ქალაქების ურთიერთობებსაც, როგორც კულტურული და აკადემიური თანამშრომლობის განვითარების დამატებით საფუძველს.

ნახიჩევანის სახელმწიფო უნივერსიტეტში ხელოვნური ინტელექტის ცენტრი შეიქმნება

1 მაისი

ნახიჩევანის სახელმწიფო უნივერსიტეტსა და პეკინის ქიმიური ტექნოლოგიის უნივერსიტეტს შორის თანამშრომლობის შეთანხმება გაფორმდა. მხარეები ერთობლივი საგანმანათლებლო და კვლევითი პროექტების განვითარებას გეგმავენ.

AZERTAC-ის ინფორმაციით, შეხვედრაზე თანამშრომლობის ერთ–ერთ მთავარ მიმართულებად ორ უნივერსიტეტს შორის ხელოვნური ინტელექტის ერთობლივი ცენტრის შექმნა განისაზღვრა. მხარეებმა ასევე იმსჯელეს პეკინის ქიმიური ტექნოლოგიის უნივერსიტეტში აზერბაიჯანელი სტუდენტების საწარმოო და სტაჟირების პროგრამებში მონაწილეობაზე.

მხარეების შეფასებით, თანამშრომლობა ხელს შეუწყობს სამეცნიერო და ინოვაციური საქმიანობის განვითარებას, საერთაშორისო გამოცდილების გაზიარებასა და კვალიფიციური კადრების მომზადებას.

სომხეთი

სომხეთის დელეგაციამ ჩინეთში მწვანე და მდგრადი განვითარების ფორუმში მიიღო მონაწილეობა

29 აპრილი

სომხეთის დელეგაციამ 29 აპრილს ჩინეთის ქალაქ ნინგბოში შანხაის თანამშრომლობის ორგანიზაციის მწვანე და მდგრადი განვითარების ფორუმში მიიღო მონაწილეობა. ღონისძიებაზე ერევანმა ჩინეთთან და SCO-სთან მდგრადი განვითარების, გარემოს დაცვისა და ბიომრავალფეროვნების მიმართულებით თანამშრომლობის გაღრმავების მზადყოფნა გამოხატა.

სომხეთის დელეგაციაში შედიოდნენ ბიომრავალფეროვნების კონვენციის მხარეთა მე-17 კონფერენციის, COP17-ის, სომხეთის თავმჯდომარეობის სპეციალური წარმომადგენელი, ელჩი მჰერ მარგარიანი და სომხეთის ელჩი ჩინეთში ვაჰე გევორგიანი.

პანელურ დისკუსიაზე, სახელწოდებით „გლობალური ბიომრავალფეროვნების დაცვა მრავალმხრივი მმართველობის გზით“, მარგარიანმა COP17-ისთვის სომხეთის მოსამზადებელ სამუშაოებზე ისაუბრა. მან აღნიშნა, რომ ერევანში დაგეგმილი კონფერენციის ერთ–ერთი მთავარი საკითხი კუნმინ–მონრეალის გლობალური ბიომრავალფეროვნების ჩარჩოს შესრულების პროგრესის შეფასება იქნება.

ფორუმის ფარგლებში სომხეთის დელეგაცია ჩინეთის ეკოლოგიისა და გარემოს დაცვის მინისტრ ხუანგ ჟუნციუს და ნინგბოს მერს, ტანგ ფეიფანსაც შეხვდა. დელეგაციამ ასევე გამართა მედია–ბრიფინგი COP17-ის ბიომრავალფეროვნების კონფერენციის შესახებ.

უზბეკეთი

ჩინეთი უზბეკეთში ფარმაცევტული წარმოების გაფართოებას განიხილავს

27 აპრილი

უზბეკეთი და ჩინეთი ფარმაცევტულ სექტორში თანამშრომლობის გაფართოებას გეგმავენ. მხარეებმა ერთობლივი პროექტების შესაძლებლობები ფარმაცევტული წარმოების, ბიოტექნოლოგიების, ვაქცინების, სისხლის პროდუქტებისა და ინოვაციური მედიკამენტების მიმართულებით განიხილეს.

Trend-ის ინფორმაციით, შეხვედრა უზბეკეთის ფარმაცევტული ინდუსტრიის განვითარების სააგენტოს დირექტორ აბდულა აზიზოვსა და ჩინეთის ფარმაცევტული სექტორის წარმომადგენლებს შორის გაიმართა.

უზბეკურმა მხარემ აღნიშნა, რომ ქვეყანას რეგიონულ ფარმაცევტულ ჰაბად ჩამოყალიბების პოტენციალი აქვს. მხარეებმა პრაქტიკული ერთობლივი პროექტების განხორციელებისა და თანამშრომლობის გაღრმავებისთვის მზადყოფნა გამოხატეს.

უზბეკეთი და ჩინეთი გარემოს დაცვის სფეროში თანამშრომლობას აფართოებენ

27 აპრილი

რეგიონული გარემოსდაცვითი სამიტის ფარგლებში 27 აპრილს უზბეკეთის პრეზიდენტის მრჩეველი გარემოსდაცვით საკითხებში აზიზ აბდუხაკიმოვი ჩინეთის ეკოლოგიისა და გარემოს დაცვის მინისტრ ჰუანგ ჟუნციუს შეხვდა.

მხარეებმა მტვრისა და ქვიშის ქარების ადრეული გაფრთხილების სისტემების გაძლიერებაზე, კლიმატის სატელიტურ მონიტორინგზე, ჰაერისა და წყლის ხარისხის ანალიტიკური მონიტორინგის ერთობლივი ლაბორატორიის შექმნასა და სამეცნიერო თანამშრომლობაზე იმსჯელეს.

შეხვედრაზე უზბეკურმა მხარემ ჩინეთის გამოცდილების პრაქტიკული გამოყენებისა და ადგილობრივ საჭიროებებზე მორგების ინიციატივა დააყენა. ჩინურმა მხარემ თანამშრომლობის მზადყოფნა გამოხატა.

გარემოსდაცვითი თანამშრომლობის ერთ–ერთი მიმართულებაა ნარჩენების ენერგიად გარდაქმნის პროექტებიც, რომლის ფარგლებშიც უზბეკეთში ჩინელი ინვესტორების მონაწილეობით 11 ასეთი ქარხნის მშენებლობა მიმდინარეობს.

ტაშკენტი და პეკინი გაზსაცავების მშენებლობასა და მზისა და ქარის პროექტებზე შეთანხმდნენ

27 აპრილი

27 აპრილს ტაშკენტში უზბეკეთ–ჩინეთის მთავრობათაშორისი თანამშრომლობის კომიტეტის ენერგეტიკის ქვეკომიტეტის მე-8 სხდომა გაიმართა.

შეხვედრას უზბეკეთის ენერგეტიკის მინისტრი ჯურაბეკ მირზამახმუდოვი და ჩინეთის ენერგეტიკის ეროვნული ადმინისტრაციის ხელმძღვანელი ვან ხუნჯი ხელმძღვანელობდნენ. მხარეებმა ნავთობისა და გაზის სექტორში, ელექტროენერგეტიკასა და განახლებად ენერგიებში ერთობლივი პროექტების განვითარებაზე იმსჯელეს.

განსაკუთრებული ყურადღება დაეთმო ნახშირწყალბადების საბადოების განვითარებას, მიწისქვეშა გაზსაცავების მშენებლობას, ძირითადი გაზის ინფრასტრუქტურის მოდერნიზაციას, ასევე მზისა და ქარის ელექტროსადგურების პროექტებს ჩინური ტექნოლოგიების გამოყენებით.

შეხვედრის შედეგად, მხარეები ენერგეტიკული ობიექტების დიგიტალიზაციის, დარგობრივი სტანდარტიზაციისა და ინფრასტრუქტურის მართვის თანამედროვე მიდგომების მიმართულებით გამოცდილების გაცვლის გაგრძელებაზე შეთანხმდნენ.

ტაშკენტი ჩინეთთან AI-სა და ციფრული ინდუსტრიის პროექტებს აფართოებს

29 აპრილი

29 აპრილს უზბეკეთის საელჩოს წარმომადგენლები ჩინეთის მრეწველობისა და საინფორმაციო ტექნოლოგიების მინისტრის მოადგილეს, სიუნ ძიძიუნს შეხვდნენ.

შეხვედრის ფარგლებში მხარეები ციფრული ეკონომიკის, საინფორმაციო ტექნოლოგიებისა და ხელოვნური ინტელექტის მიმართულებით თანამშრომლობის გაღრმავებაზე შეთანხმდნენ. უზბეკურმა დელეგაციამ ჩინურ მხარეს უზბეკეთის ინდუსტრიული განვითარების პრიორიტეტები და „ციფრული უზბეკეთი 2030“-ის ფარგლებში მიმდინარე რეფორმები გააცნო.

მხარეებმა ერთობლივი პროექტების განხორციელება, ტექნოლოგიური პლატფორმების განვითარება, ინდუსტრიაში ახალი ტექნოლოგიების დანერგვა და სპეციალისტების გაცვლა განიხილეს. ყურადღება დაეთმო ასევე განათლებისა და პროფესიული გადამზადების მიმართულებით თანამშრომლობას.

უზბეკეთისა და ჩინეთის სოფლის მეურნეობის მინისტრების მოადგილეები პეკინში შეხვდნენ

29 აპრილი

უზბეკეთმა და ჩინეთმა სოფლის მეურნეობის მიმართულებით თანამშრომლობის გაღრმავებაზე იმსჯელეს. 29 აპრილს პეკინში უზბეკეთ–ჩინეთის სოფლის მეურნეობის ქვეკომიტეტის მე-6 შეხვედრა გაიმართა.

უზბეკეთის დელეგაციას სოფლის მეურნეობის მინისტრის მოადგილე ალიშერ შუკუროვი ხელმძღვანელობდა, ჩინურ მხარეს კი სოფლის მეურნეობისა და სოფლის საკითხთა მინისტრის მოადგილე ჟანგ ჟილი.

შეხვედრაზე მხარეებმა თესლის წარმოების განვითარება, მაღალმოსავლიანი და კლიმატგამძლე კულტურების დანერგვა, სელექციური და გენეტიკური კვლევები, ვეტერინარული თანამშრომლობა, ნიადაგის ნაყოფიერების დაცვა და წყლის რესურსების ეფექტიანი მართვა განიხილეს.

ყურადღება დაეთმო აგრარულ სექტორში ინოვაციური ტექნოლოგიების, რესურსდამზოგავი მეთოდებისა და ციფრული მონიტორინგის სისტემების დანერგვასაც. შეხვედრის შედეგად, მხარეები შეთანხმდნენ, რომ თანამშრომლობის პრაქტიკული განხორციელებისთვის საგზაო რუკას მოამზადებენ.

ილზატ კასიმოვმა ძიანსუს ვიცე–გუბერნატორთან საინვესტიციო პროექტები განიხილა

1 მაისი

1 მაისს უზბეკეთის ინვესტიციების, მრეწველობისა და ვაჭრობის მინისტრის მოადგილის, ილზატ კასიმოვის ხელმძღვანელობით დელეგაცია ნანკინში ძიანსუს პროვინციის ვიცე–გუბერნატორ ჟაო იანს შეხვდა.

მხარეებმა რეგიონებს შორის საინვესტიციო კავშირების გაძლიერება, სამრეწველო თანამშრომლობა, მაღალტექნოლოგიური წარმოებების განვითარება და ახალი ერთობლივი საინვესტიციო პროექტების ხელშეწყობა განიხილეს.

შეხვედრაზე ყურადღება დაეთმო ძიანსუს პროვინციის დელეგაციის მონაწილეობას უზბეკურ–ჩინურ მესამე რეგიონთაშორის ფორუმშიც, რომელიც 20-22 მაისს ჩინეთის ქალაქ სიანში გაიმართება.

ჩინეთი სამხრეთ კავკასიასა და უზბეკეთში (27 აპრილი – 3 მაისი) Read More »

ჩინეთი სამხრეთ კავკასიასა და ყირგიზეთში (20 – 26 აპრილი)

კვირის ამბავი / /
საქართველო

თბილისი პეკინთან ციფრული თანამშრომლობის გაღრმავებას ცდილობს

21 აპრილი

21 აპრილს თბილისში ჩინეთის კიბერსივრცის ადმინისტრაციის დირექტორმა ჭუანგ ჟუნგვენმა მაღალი დონის შეხვედრები გამართა. მას საქართველოს იუსტიციის მინისტრი და ეკონომიკისა და მდგრადი განვითარების მინისტრი შეხვდნენ.

ეკონომიკის სამინისტროს ინფორმაციით, შეხვედრაზე ყურადღება გამახვილდა საქართველო–ჩინეთის სტრატეგიული პარტნიორობის მნიშვნელობაზე, ეკონომიკური კავშირების განვითარებასა და ციფრული ეკონომიკის მიმართულებით თანამშრომლობაზე.

ქართულმა მხარემ ხაზი გაუსვა საქართველოს, როგორც აზიისა და ევროპის დამაკავშირებელი ციფრული სატრანზიტო ჰაბის, როლის გაძლიერებას და მასშტაბური მონაცემთა ცენტრების განვითარების მნიშვნელობას. საუბარი შეეხო ხელოვნური ინტელექტის სფეროში თანამშრომლობასაც, რაც ბოლო პერიოდში საქართველო–ჩინეთის ოფიციალური შეხვედრების ერთ–ერთ აქტიურ თემად გამოიკვეთა.

21 აპრილს ჩინეთის კიბერსივრცის ადმინისტრაციის დირექტორი საქართველოს იუსტიციის მინისტრ პაატა სალიასაც შეხვდა. შეხვედრაზე კიბერუსაფრთხოებისა და ინოვაციების სფეროში თანამშრომლობის გაღრმავების შესაძლებლობები განიხილეს. საუბარი შეეხო ხელოვნური ინტელექტის გამოყენებას, მობილური აპლიკაციების დანერგვასა და ციფრული პროექტების განვითარებას.

ჭუანგ ჟუნვენის ვიზიტი აჩვენებს, რომ ოფიციალური თბილისი ციფრულ სფეროში პეკინთან თანამშრომლობის გაფართოებას ცდილობს. თუმცა, აღსანიშნავია, რომ უწყება, რომლის წარმომადგენელსაც საქართველოს მინისტრები შეხვდნენ, ჩინეთის კომუნისტური პარტიის სახელმწიფო ცენზურისა და ციფრულ სივრცეზე ავტორიტარული კონტროლის ერთ–ერთი მთავარი ინსტრუმენტია.

საქართველო და ჩინეთი თავისუფალი ვაჭრობის შეთანხმების განახლებაზე შეთანხმდნენ

22 აპრილი

საქართველოს ეკონომიკისა და მდგრადი განვითარების მინისტრი მარიამ ქვრივიშვილი 22 აპრილს პეკინში ჩინეთის კომერციის მინისტრს, ვანგ ვენთაოს შეხვდა.

შეხვედრაზე მხარეებმა ხელი მოაწერეს ოქმს საქართველო–ჩინეთის თავისუფალი ვაჭრობის შეთანხმებაში ცვლილებების შეტანის შესახებ, რაც თანამედროვე სავაჭრო გარემოსთან ადაპტაციას, განსაზღვრული თანამშრომლობის სფეროების კონკრეტიზაციას და ახალი მიმართულებების დამატებას ითვალისწინებს.

ჩინეთის კომერციის სამინისტროს ინფორმაციით, მარიამ ქვრივიშვილმა შეხვედრაზე ჩინეთთან თანამშრომლობა საქართველოს მთავრობის პრიორიტეტად დაასახელა და ხაზი გაუსვა სოფლის მეურნეობის, ნავთობისა და გაზის განვითარების, ავტომობილების წარმოების, პორტის ინფრასტრუქტურისა და ტურიზმის მიმართულებებით თანამშრომლობის გაფართოების ინტერესს.

პეკინი აღნიშნავს, რომ იგი მზად არის საქართველოსთან სავაჭრო–ეკონომიკური და საინვესტიციო კავშირები გააღრმაოს.

ქვრივიშვილი NDRC-ის წარმომადგენელს შეხვდა: აქცენტი ინვესტიციებსა და შუა დერეფანზე

23 აპრილი

23 აპრილს საქართველოს ეკონომიკისა და მდგრადი განვითარების მინისტრი მარიამ ქვრივიშვილი ჩინეთის ეროვნული განვითარებისა და რეფორმების კომიტეტის (NDRC) თავმჯდომარის მოადგილე ჭოუ ჰაიბინს შეხვდა.

შეხვედრაზე მხარეები საქართველო–ჩინეთს შორის ინვესტიციების მოსაზიდად დიალოგის მექანიზმის შექმნაზე შეთანხმდნენ. აღნიშნული მექანიზმი განსაკუთრებულ აქცენტს ტრანსპორტისა და ლოგისტიკის სექტორში ჩინურ ინვესტიციებზე გააკეთებს.

ამავე შეხვედრაზე განიხილეს შუა დერეფნის საკითხი და საქართველოს, როგორც ჩინეთისა და ევროპის დამაკავშირებელი სატრანზიტო ქვეყნის, როლი. ამ კონტექსტში ანაკლიის პორტი დასახელდა სტრატეგიულ პროექტად, რომელსაც მნიშვნელობა ექნება როგორც საქართველო–ჩინეთის თანამშრომლობისთვის, ისე შუა დერეფნის პარტნიორი სახელმწიფოებისთვის.

ანაკლიის პორტის საკითხს ოფოციალურ შეხვედრამდე საქართველოს პრემიერ–მინისტრიც გამოეხმაურა, როდესაც ჟურნალისტების მიერ საქართველოსა და ჩინეთს შორის თავისუფალი ვაჭრობის შეთანხმებაში ცვლილებებთან დაკავშირებით დასმულ კითხვას უპასუხა:

„ყველა თემაზე იქნება საუბარი, მათ შორის, ანაკლიის თემაზეც. ბუნებრივია, ესეც არის ამ ვიზიტის ერთ–ერთი მიზანი. მოლაპარაკებები გრძელდება“, – აღნიშნა ირაკლი კობახიძემ.

ანაკლიის ღრმაწყლოვანი პორტი საქართველოს მნიშვნელოვან სტრატეგიულ და ინფრასტრუქტურულ პროექტად მიიჩნევა. 2024 წელს პროექტის კერძო პარტნიორის შერჩევის პროცესში საბოლოო წინადადება ჩინურ–სინგაპურულმა კონსორციუმმა წარადგინა, თუმცა შეთანხმების შესახებ ოფიციალური განახლება ამ დრომდე არ გავრცელებულა.

ქვრივიშვილის ვიზიტი ჩინეთში: ავიაცია, ენერგეტიკა და ტექნოლოგიური თანამშრომლობა

25 აპრილი

ეკონომიკისა და მდგრადი განვითარების მინისტრმა მარიამ ქვრივიშვილმა 21-25 აპრილს ჩინეთში ოფიციალური ვიზიტის ფარგლებში შეხვედრები ავიაციის, ენერგეტიკის, ტექნოლოგიებისა და ციფრული ეკონომიკის მიმართულებებით გამართა.

ვიზიტის ერთ–ერთი პრაქტიკული შედეგი ავიაციის სფეროში გამოიკვეთა. ქვრივიშვილსა და China Eastern Airlines-ის ხელმძღვანელებს შორის გამართული შეხვედრის შედეგად, ავიაკომპანია 15 ივლისიდან შანხაი–თბილისი–შანხაის პირდაპირ რეისებს კვირაში სამჯერ შეასრულებს.

პარალელურად, ქართულმა დელეგაციამ China Southern Airlines-თან პეკინი–თბილისის და ჩინეთის სხვა ქალაქებიდან საქართველოს მიმართულებით პირდაპირი რეისების დაწყების შესაძლებლობა განიხილა. შეხვედრებზე ყურადღება სატვირთო გადაზიდვებსაც დაეთმო, მათ შორის შუა დერეფნის ფარგლებში რეგიონული სატვირთო ჰაბის განვითარებასა და China Southern Cargo-სთვის საქართველოს სატრანსპორტო ინფრასტრუქტურაზე წვდომის შესაძლებლობას.

ვიზიტის ფარგლებში ქვრივიშვილი ჩინეთის სახელმწიფო კომპანია China ZhenHua Oil-ის თავმჯდომარე ვანგ იუტაოს შეხვდა. მხარეებმა საქართველოში ნავთობისა და გაზის მოპოვების შესაძლებლობები განიხილეს. ასევე, Geo-Jade Petroleum Corporation-თან გამართულ შეხვედრაზე ქართულმა დელეგაციამ კომპანიას საქართველოს ბიზნეს და საინვესტიციო გარემო გააცნო.

ვიზიტის ფარგლებში მნიშვნელოვანი ადგილი ტექნოლოგიურ მიმართულებასაც დაეთმო. მარიამ ქვრივიშვილი Xiaomi Corporation-ის საერთაშორისო სამთავრობო ურთიერთობების დირექტორ საიმონ დუს შეხვდა და კომპანიასთან თანამშრომლობის შესაძლებლობები განიხილა.

ვიზიტის ფარგლებში დაწყებული მოლაპარაკებები ჩინეთთან ეკონომიკური თანამშრომლობის გაღრმავებას ისახავს მიზნად. პროცესის შემდგომი ეტაპი მხარეების მიერ განხილული ინიციატივების პრაქტიკულ იმპლემენტაციას გულისხმობს.

აზერბაიჯანი

აზერბაიჯანი და ჩინეთი WUF13-ის ფარგლებში თანამშრომლობაზე მსჯელობენ

21 აპრილი

აზერბაიჯანის სახელმწიფო ქალაქმშენებლობისა და არქიტექტურის კომიტეტის თავმჯდომარე ანარ გულიევი 21 აპრილს ჩინეთის ელჩს აზერბაიჯანში, ლუ მეის შეხვდა.

მხარეებმა აზერბაიჯან–ჩინეთის სტრატეგიული პარტნიორობის მნიშვნელობას გაუსვეს ხაზი და ბაქოში დაგეგმილი ურბანული განვითარების მსოფლიო ფორუმის, WUF13-ის, ფარგლებში ჩინეთის მონაწილეობის საკითხი განიხილეს.

WUF13 ბაქოში 2026 წლის 17-22 მაისს გაიმართება, სახელწოდებით „მსოფლიოს საცხოვრებლით უზრუნველყოფა: უსაფრთხო და მდგრადი ქალაქები და თემები“. ფორუმის ფარგლებში ყურადღება გამახვილდება ურბანიზაციის, საცხოვრებლის კრიზისის, უსაფრთხო და მდგრადი ქალაქების, კლიმატური რისკებისა და ინკლუზიური ურბანული დაგეგმვის საკითხებზე.

შეხვედრაზე ასევე ითქვა, რომ ფორუმის ფარგლებში მოსალოდნელია მაღალი დონის დელეგაციების, აკადემიური წრეებისა და კერძო სექტორის წარმომადგენლების ფართო მონაწილეობა.

შეხვედრა აზერბაიჯანსა და ჩინეთს შორის თანამშრომლობის გაფართოების მცდელობას ასახავს ინფრაატურქტურისა და ურბანული განვითარების მიმართულებით.

SOCAR-მა და ჩინურმა BGP Inc.-მა თანამშრომლობის გაფართოებაზე იმსჯელეს

22 აპრილი

აზერბაიჯანის სახელმწიფო ნავთობკომპანიის, SOCAR-ის პრეზიდენტი როვშან ნაჯაფი 22 აპრილს ჩინური BGP Inc.-ის თავმჯდომარესა და აღმასრულებელ დირექტორს, რენ ვენძიუნს შეხვდა. მხარეებმა მიმდინარე პროექტები, საოპერაციო ეფექტიანობის გაუმჯობესება და თანამშრომლობის გაფართოების შესაძლებლობები განიხილეს.

შეხვედრაზე SOCAR-მა და BGP Inc.-მა ხაზი გაუსვეს კომპანიებს შორის ხანგრძლივ თანამშრომლობას. ყურადღება გამახვილდა Caspian Geo-ზეც, SOCAR-ისა და BGP Inc.-ის ერთობლივ საწარმოზე, რომელიც კასპიის რეგიონში მოწინავე ტექნოლოგიების გამოყენებით სეისმური კვლევების ჩატარებაში მნიშვნელოვან როლს ასრულებს.

აღნიშნული შეხვედრა აზერბაიჯან–ჩინეთის ენერგეტიკული თანამშრომლობის გაუმჯობესების მიზნით მნიშვნელოვან ნაბიჯს წარმოადგენს.

აზერბაიჯანში ჩინური კომპანიების მონაწილეობით ავტომობილების წარმოება იგეგმება

23 აპრილი

განჯის საქალაქო აღმასრულებელი ხელისუფლების ხელმძღვანელის, ნიაზი ბაირამოვის ხელმძღვანელობით აზერბაიჯანული დელეგაცია ჩინეთს 23 აპრილს ოფიციალური ვიზიტით ეწვია. ვიზიტის ფარგლებში განჯის საავტომობილო ქარხნის საწარმოო გაერთიანებამ ორ ჩინურ კომპანიასთან თანამშრომლობის შეთანხმებები გააფორმა.

CLW Chengli Group-თან გაფორმებული შეთანხმება აზერბაიჯანში კომერციული ავტომობილებისა და სატვირთო მანქანების წარმოების დაწყებას ითვალისწინებს. მეორე შეთანხმება კი Shaanxi Automobile Group Commercial Vehicle Co. Ltd.-თან, იგივე SAGMOTO-სთან, გაფორმდა და აზერბაიჯანში კომერციული ავტომობილების აწყობას მოიცავს.

დოკუმენტებს ხელი მოაწერეს განჯის საავტომობილო ქარხნის საწარმოო გაერთიანების სამეთვალყურეო საბჭოს თავმჯდომარემ ხანლარ ფატიევმა, CLW Chengli Group-ის გენერალურმა მენეჯერმა და SAGMOTO-ს გენერალური დირექტორის მოადგილემ.

ხელმოწერის ცერემონიამდე გამართულ შეხვედრებზე ნიაზი ბაირამოვმა აზერბაიჯანში შექმნილ ბიზნესისა და საინვესტიციო გარემოზე ისაუბრა. შეხვედრებზე ასევე წარადგინეს ვიდეომასალები განჯის ქალაქისა და ჩინური კომპანიების საქმიანობის შესახებ.

აზერბაიჯანმა და ჩინეთმა ლოგისტიკისა და ტექნოლოგიების სფეროში თანამშრომლობა განიხილეს

23 აპრილი

აზერბაიჯანის ციფრული განვითარების და ტრანსპორტის მინისტრი რაშად ნაბიევი 23 აპრილს ჩინეთის კიბერსივრცის ადმინისტრაციის ხელმძღვანელს, ჟუანგ ჟონგვენს შეხვდა. შეხვედრაზე მხარეებმა აზერბაიჯანსა და ჩინეთს შორის ტრანსპორტის, ლოგისტიკისა და ტექნოლოგიების მიმართულებით თანამშრომლობა განიხილეს.

AZERTAC-ის ცნობით, მხარეებმა იმსჯელეს საინფორმაციო–საკომუნიკაციო ტექნოლოგიებისა და ინოვაციების სფეროში არსებულ შესაძლებლობებზე.

შეხვედრაზე ყურადღება დაეთმო კიბერუსაფრთხოებას, კვლევით თანამშრომლობას, ადამიანური კაპიტალის განვითარებასა და სამართლებრივი და მარეგულირებელი ჩარჩოს გაძლიერებას.

აზერბაიჯანის პარლამენტის თავმჯდომარემ ჩინეთის კიბერსივრცის ადმინისტრაციის ხელმძღვანელს უმასპინძლა

23 აპრილი

აზერბაიჯანის მილი მეჯლისის თავმჯდომარე საჰიბა გაფაროვა 23 აპრილს ჩინეთის სახელმწიფო ინტერნეტ–ინფორმაციის ოფისის ხელმძღვანელს, ჟუანგ ჟონგვენს შეხვდა. მხარეებმა აზერბაიჯან–ჩინეთის სტრატეგიული პარტნიორობა და ციფრული მიმართულებით თანამშრომლობის გაფართოების შესაძლებლობები განიხილეს.

შეხვედრაზე ყურადღება გამახვილდა ეკონომიკის, ვაჭრობის, მწვანე ენერგეტიკის, საინფორმაციო ტექნოლოგიების, ინოვაციებისა და ხელოვნური ინტელექტის სფეროებში თანამშრომლობაზე.

გაფაროვამ ისაუბრა აზერბაიჯანში მიმდინარე ციფრული ტრანსფორმაციის პოლიტიკაზე და აღნიშნა, რომ მილი მეჯლისი შესაბამისი საკანონმდებლო ჩარჩოს ჩამოყალიბებაში მონაწილეობს.

ჩინური მხარის წარმომადგენელმა განაცხადა, რომ პეკინი მზად არის აზერბაიჯანთან თანამშრომლობა გააფართოოს ინტერნეტის, კიბერუსაფრთხოების, ციფრული ეკონომიკისა და ხელოვნური ინტელექტის მიმართულებით.

აზერბაიჯანმა და ჩინეთმა დეზინფორმაციასთან ბრძოლის საკითხებზე იმსჯელეს

24 აპრილი

აზერბაიჯანის პრეზიდენტის თანაშემწე და პრეზიდენტის ადმინისტრაციის საგარეო პოლიტიკის საკითხთა განყოფილების ხელმძღვანელი ჰიქმეთ ჰაჯიევი 24 აპრილს ჩინეთის კიბერსივრცის ადმინისტრაციის მინისტრს, ჟუანგ ჟონგვენს შეხვდა. მხარეებმა ციფრული განვითარების, სოციალური მედიისა და დეზინფორმაციასთან ბრძოლის მიმართულებით თანამშრომლობა განიხილეს.

Trend-ის ცნობით, ჰაჯიევმა შეხვედრის შესახებ ინფორმაცია საკუთარ X-ის გვერდზე გაავრცელა. მისი განცხადებით, აზერბაიჯანსა და ჩინეთს შორის ყოვლისმომცველი სტრატეგიული პარტნიორობის ფარგლებში მხარეებმა ასევე დეზინფორმაციასთან ბრძოლის საკითხზე იმსჯელეს.

შეხვედრა აზერბაიჯან–ჩინეთის თანამშრომლობის ციფრული და საინფორმაციო უსაფრთხოების მიმართულებებს უსვამს ხაზს.

სომხეთი

ფაშინიანმა ჩინეთი სომხეთის „დაბალანსებული საგარეო პოლიტიკის“ კონტექსტში ახსენა

20 აპრილი

20 აპრილს სომხეთის პრემიერ–მინისტრმა ნიკოლ ფაშინიანმა მმართველი პარტიის, „სამოქალაქო შეთანხმების“, საარჩევნო პროგრამის წარდგენისას ჩინეთი სომხეთის საგარეო პოლიტიკის ერთ–ერთ მნიშვნელოვან მიმართულებად დაასახელა.

ფაშინიანის თქმით, სომხეთმა ბოლო პერიოდში სხვადასხვა სახელმწიფოსთან სტრატეგიული პარტნიორობის, დიალოგისა და თანამშრომლობის ფორმატები ჩამოაყალიბა. ამ კონტექსტში მან ჩინეთიც ახსენა და აღნიშნა, რომ აღნიშნული მიდგომა სომხეთის „დაბალანსებული და დამაბალანსებელი“ საგარეო პოლიტიკის ნაწილია.

პრემიერის გამოსვლაში ყურადღება დაეთმო რეგიონული კავშირების გაძლიერებასაც. პროგრამაში საუბარია სატრანზიტო და ინფრასტრუქტურულ პროექტებზე, მათ შორის TRIPP-ის პროექტზე, ყარსი–გიუმრის რკინიგზასა და „მშვიდობის გზაჯვარედინის“ კონცეფციაზე.

ფაშინიანის გზავნილი მიუთითებს, რომ ერევანი ჩინეთთან ურთიერთობას განიხილავს არა მხოლოდ ორმხრივი თანამშრომლობის, არამედ უფრო ფართო საგარეო–პოლიტიკური და სატრანზიტო დღის წესრიგის ნაწილად.

სომხეთის ვიცე–პრემიერი ჩინეთის ელჩს შეხვდა

22 აპრილი

22 აპრილს სომხეთის ვიცე–პრემიერმა, მჰერ გრიგორიანმა ჩინეთის ელჩი სომხეთში, ლი სინვეი მიიღო.

სომხეთის მთავრობის ცნობით, შეხვედრაზე მხარეებმა სომხეთსა და ჩინეთს შორის ჩამოყალიბებული სტრატეგიული პარტნიორობის პერსპექტივები განიხილეს. გრიგორიანმა აღნიშნა, რომ ორმხრივ ურთიერთობებში „ახალი ჰორიზონტები“ გაიხსნა.

შეხვედრაზე ასევე ისაუბრეს სომხეთის „მშვიდობის გზაჯვარედინის“ პროექტისა და ჩინეთის „სარტყელი და გზის“ ინიციატივის შესაძლო თანხვედრაზე. მხარეებმა ხაზი გაუსვეს სავაჭრო–ეკონომიკური თანამშრომლობის ზრდას და ბიზნესკავშირების გააქტიურების საჭიროებას.

ყირგიზეთი

 

ყირგიზეთმა ჩინეთს ტორუგარტის გამშვები პუნქტის 24-საათიან რეჟიმზე გადასვლა შესთავაზა

21 აპრილი

21 აპრილს ყირგიზეთისა და ჩინეთის საბაჟო უწყებების წარმომადგენლებმა ყირგიზეთ–ჩინეთის საზღვარზე გამტარუნარიანობის გაზრდის საკითხები განიხილეს.

შეხვედრაზე მხარეებმა სასაზღვრო–გამშვები პუნქტების გამტარუნარიანობის გაზრდის გზები განიხილეს. ამ კონტექსტში, ყირგიზეთმა ჩინეთს ტორუგარტის გამშვები პუნქტის ჩინური მხარის 24-საათიან რეჟიმზე გადასვლა შესთავაზა, რაც ბიშკეკის შეფასებით, ტვირთნაკადების დაჩქარებასა და სავაჭრო–ლოგისტიკური კავშირების გაძლიერებას შეუწყობს ხელს.

მხარეებმა ასევე განიხილეს საბაჟო პროცედურების გამარტივება და სასაზღვრო პუნქტებზე საკოორდინაციო მექანიზმების გაუმჯობესება. საუბარი შეეხო დამატებითი მეკავშირე ოფიცრების ჩართვასაც, რაც ოპერატიულ კომუნიკაციასა და სასაზღვრო პროცესების უკეთ კოორდინაციას უნდა დაეხმაროს.

ყირგიზეთ–ჩინეთის საზღვარზე გამტარუნარიანობის გაზრდა ბიშკეკისთვის მნიშვნელოვანია რეგიონული სატრანზიტო ფუნქციის გაძლიერების ფონზე. ტორუგარტისა და ირკეშტამის მიმართულებები ყირგიზეთისთვის ჩინეთთან ვაჭრობისა და ცენტრალური აზიის სატრანსპორტო კავშირების ერთ–ერთ ძირითად არხად რჩება.

ჩინელმა ინვესტორებმა ყირგიზეთში სამართლებრივი დაცვისა და სტაბილური გარემოს უზრუნველყოფა მოითხოვეს

21 აპრილი

21 აპრილს ყირგიზეთის ეროვნული საინვესტიციო სააგენტო ჩინური კომპანიების, Guipai Holding Group-ის, Hunan Jingwei Real Estate Development Co.-ისა და Tengri Invest LLC-ის წარმომადგენლებს შეხვდა.

შეხვედრაზე მხარეებმა სამშენებლო, უძრავი ქონებისა და ინფრასტრუქტურული პროექტების განხორციელების შესაძლებლობები განიხილეს. ჩინელმა ინვესტორებმა ყურადღება გაამახვილეს საინვესტიციო გარემოს სტაბილურობაზე და ყირგიზეთის მხარეს სამართლებრივი დაცვის მექანიზმებისა და სახელმწიფო გარანტიების უზრუნველყოფა სთხოვეს.

ყირგიზეთისთვის ჩინური ინვესტიციების მოზიდვა ინფრასტრუქტურული და ურბანული განვითარების მიმართულებით ეკონომიკური თანამშრომლობის ერთ–ერთ მნიშვნელოვან კომპონენტად რჩება.

ყირგიზეთმა და ჩინეთმა საავტომობილო გადაზიდვების საკითხები განიხილეს

22 აპრილი

22 აპრილს ბიშკეკში ყირგიზეთის ტრანსპორტის მინისტრის მოადგილე ალმაზ ტურგუნბაევი ჩინეთის ტრანსპორტის მინისტრის მოადგილე ლი იანგს შეხვდა. მხარეებმა ორმხრივი საავტომობილო გადაზიდვების განვითარება და ახალი ლოგისტიკური მარშრუტების გაძლიერება განიხილეს.

შეხვედრაზე საუბარი შეეხო ყირგიზეთის შესაძლო მონაწილეობას ჩინეთი–რუსეთი–მონღოლეთის აზიური საავტომობილო გზების სატრანსპორტო ჩარჩოში, ჩინეთის ტერიტორიაზე არაგაბარიტული ტვირთების გადაადგილებისთვის სპეციალურ ნებართვებს, ასევე ყირგიზული სამგზავრო ავტომობილების ჩინეთში შესვლისა და ყირგიზეთში ჩინური ტაქსების ოპერირების საკითხებს.

ბიშკეკისთვის ეს მიმართულებები მნიშვნელოვანია ჩინეთთან სატრანსპორტო კავშირების გაფართოებისა და რეგიონული ლოგისტიკური ფუნქციის გაძლიერების კონტექსტში.

ყირგიზეთმა ჩინურ Gansu Feitian-თან საინვესტიციო თანამშრომლობა განიხილა

22 აპრილი

22 აპრილს ყირგიზეთის ეროვნულმა საინვესტიციო სააგენტომ ჩინურ Gansu Feitian International Trading Company-სთან საინვესტიციო თანამშრომლობის შესაძლებლობები განიხილა.

შეხვედრაზე საუბარი შეეხო შესაძლო პროექტებს სამთო მოპოვების, ტრანსპორტის, ურბანული ინფრასტრუქტურის, ენერგეტიკის, წყლის რესურსების, მრეწველობისა და ლოგისტიკის მიმართულებით. მხარეებმა ასევე იმსჯელეს საჯარო–კერძო პარტნიორობის მექანიზმებზე, საგადასახადო შეღავათებსა და თავისუფალი ეკონომიკური ზონების გამოყენების შესაძლებლობაზე.

ბიშკეკისთვის მსგავსი მოლაპარაკებები ჩინური კაპიტალის მოზიდვისა და ინფრასტრუქტურულ–ეკონომიკური პროექტების გაფართოების ნაწილია.

ჩინეთი–ყირგიზეთი–უზბეკეთის რკინიგზის პროექტს ეკოლოგიური რისკების გამო აკრიტიკებენ

23 აპრილი

23 აპრილს რეგიონულმა მედიებმა გაავრცელეს ინფორმაცია, რომ ჩინეთი–ყირგიზეთი–უზბეკეთის რკინიგზის პროექტი ეკოლოგიური რისკების გამო ყურადღების ცენტრში მოექცა.

კრიტიკა განსაკუთრებით ეხება ყირგიზეთის მაღალმთიან რეგიონებში თოვლის ლეოპარდის ჰაბიტატზე შესაძლო ზემოქმედებას. გარემოსდამცველების შეფასებით, სარკინიგზო მარშრუტმა შესაძლოა გამოიწვიოს ჰაბიტატის ფრაგმენტაცია, ეკოსისტემის დარღვევა და ველური ბუნების გადაადგილების შეზღუდვა.

პროექტის მიმართ გამოთქმული შენიშვნები აჩენს მოთხოვნას, რომ ინფრასტრუქტურული განვითარება უფრო მკაფიო გარემოსდაცვითი გარანტიებითა და დამატებითი დაცვის მექანიზმებით წარიმართოს.

ყირგიზეთმა და შანდონის პროვინციამ სამრეწველო თანამშრომლობა განიხილეს

24 აპრილი

24 აპრილს ყირგიზეთის ოფიციალური პირები ჩინეთის შანდონის პროვინციის დელეგაციას შეხვდნენ. მხარეებმა მაღალტექნოლოგიური ინვესტიციების, სამრეწველო მოდერნიზაციის, ერთობლივი ინდუსტრიული პარკების, ტრანსპორტისა და ლოგისტიკის მიმართულებით თანამშრომლობის გაღრმავება განიხილეს.

შეხვედრის შედეგად, მხარეებმა ორ დოკუმენტს მოაწერეს ხელი. ერთი მათგანი ინდუსტრიალიზაციას, ახალი საწარმოო ხაზების შექმნასა და მაღალტექნოლოგიური კლასტერების განვითარებას ეხება, მეორე კი პროფესიულ მომზადებას, საინჟინრო კადრების გადამზადებასა და შანდონში სტაჟირების შესაძლებლობებს ითვალისწინებს.

ბიშკეკისთვის შანდონთან თანამშრომლობა ჩინური ინვესტიციების მოზიდვისა და ქვეყნის სამრეწველო პოტენციალის გაძლიერების კიდევ ერთ მიმართულებად განიხილება.

ყირგიზეთმა PowerChina-სთან ჰიდროენერგეტიკის პროექტები განიხილა

24 აპრილი

24 აპრილს ყირგიზეთის ეროვნულმა საინვესტიციო სააგენტომ ჩინური PowerChina-ს დელეგაციასთან ენერგეტიკული თანამშრომლობის შესაძლებლობები განიხილა.

შეხვედრაზე ყურადღება გამახვილდა მსხვილ ჰიდროენერგეტიკულ პროექტებზე, განახლებადი ენერგიის განვითარებასა და ენერგეტიკულ ინფრასტრუქტურაში ინვესტიციების მოზიდვაზე. მხარეებმა ასევე იმსჯელეს მომავალ ერთობლივ პროექტებში თანამედროვე ტექნოლოგიების გამოყენებაზე.

ბიშკეკისთვის ჩინურ კომპანიებთან ენერგეტიკული თანამშრომლობა ქვეყნის საინვესტიციო პორტფელის გაფართოებისა და ენერგეტიკული ინფრასტრუქტურის გაძლიერების ერთ–ერთ მიმართულებად რჩება.

ყირგიზეთმა ჩინეთის გავლით ყარაჩის პორტამდე სატრანსპორტო მარშრუტი გამოსცადა

25 აპრილი

25 აპრილს ყირგიზეთმა ახალი საპილოტე სატრანსპორტო მარშრუტი გამოსცადა, რომელიც ბიშკეკს ჩინეთისა და პაკისტანის გავლით ყარაჩის პორტთან აკავშირებს.

მარშრუტი მოიცავს მიმართულებას ბიშკეკი–ტორუგარტი–ქაშგარი–ხუნჯერაბი–ისლამაბადი–ყარაჩი და დაახლოებით 3 300 კილომეტრს შეადგენს. მისი მიზანია ყირგიზეთისთვის საზღვაო პორტებზე წვდომის გაფართოება და ჩინეთისა და პაკისტანის გავლით სავაჭრო–ლოგისტიკური კავშირების გაძლიერება.

ბიშკეკისთვის მსგავსი სატრანსპორტო დერეფნები განსაკუთრებით მნიშვნელოვანია ქვეყნის სატრანზიტო პოტენციალის ზრდისა და რეგიონულ სავაჭრო ქსელებში უფრო აქტიური ჩართვისთვის.

ჩინეთი სამხრეთ კავკასიასა და ყირგიზეთში (20 – 26 აპრილი) Read More »

ჩინეთი სამხრეთ კავკასიასა და ყირგიზეთში (23 – 29 მარტი)

კვირის ამბავი / /

საქართველო

საქართველოს ელჩმა გუანჯოუში გამართულ კონფერენციაში მიიღო მონაწილეობა

24 მარტი

საქართველოს ელჩმა ჩინეთის სახალხო რესპუბლიკაში, პაატა კალანდაძემ, გუანჯოუში გამართულ კონფერენციაში მიიღო მონაწილეობა, სადაც საქართველო-ჩინეთის ორმხრივი ურთიერთობებისა და საქართველოში არსებული საინვესტიციო შესაძლებლობების შესახებ ისაუბრა.

კონფერენცია სახელწოდებით „New Cooperation Reaching out to Georgia, Mutual Journey of Cooperation & Exchange“ 20 მარტს გაიმართა, საქართველოს საელჩომ კი ამის შესახებ ინფორმაცია 24 მარტს გაავრცელა.

კონფერენციის ორგანიზატორი იყო „სარტყელისა და გზის საქართველოს ბიზნეს სახლის“ დამფუძნებელი და გუანჯოუში საქართველოს სავაჭრო-სამრეწველო პალატის წარმომადგენელი ბექა მიქაბერიძე. ღონისძიებას ადგილობრივი ხელისუფლების, ბიზნესისა და საინვესტიციო წრეების, ასევე მედიის წარმომადგენლები ესწრებოდნენ.

საქართველოს ელჩის ინტერვიუ ჩინურ ოფიციალურ გამოცემაში გამოქვეყნდა

25 მარტი

ჩინურ გამოცემა People’s Daily-ში ჩინეთის სახალხო რესპუბლიკაში საქართველოს ელჩის, პაატა კალანდაძის ინტერვიუ გამოქვეყნდა. ამის შესახებ ინფორმაცია საქართველოს საელჩომ 25 მარტს გაავრცელა.

ინტერვიუში ელჩმა საქართველო-ჩინეთის ორმხრივ ურთიერთობებზე ისაუბრა. განსაკუთრებული ყურადღება დაეთმო განათლების, ტურიზმისა და ორმხრივი კავშირების გაღრმავებას.

ინტერვიუში ასევე საუბარია ორ ქვეყანას შორის სავაჭრო-ეკონომიკური ურთიერთობების გაძლიერებაზე, თავისუფალი ვაჭრობის შეთანხმების მნიშვნელობასა და სამომავლო თანამშრომლობის პერსპექტივებზე.

პაატა კალანდაძემ ყურადღება გაამახვილა საქართველო-ჩინეთს შორის უვიზო მიმოსვლაზე, საქართველოს სატრანზიტო პოტენციალსა და შუა დერეფნის განვითარებაში სახელმწიფოს როლზე.

საქართველოსა და ჩინეთს შორის მემორანდუმი გაფორმდა

25 მარტი

25 მარტს საქართველოს სპორტის მინისტრი შალვა გოგოლაძე ჩინეთის სახალხო რესპუბლიკის სპორტის მინისტრს, გაო ჭიდანს, შეხვდა. შეხვედრაზე მხარეებმა სპორტის სფეროში თანამშრომლობის მემორანდუმს მოაწერეს ხელი.

დოკუმენტი ორ ქვეყანას შორის სპორტის სფეროში ურთიერთობების გაღრმავებას გულისხმობს და მოიცავს ერთობლივი საწვრთნელი შეკრებების ორგანიზებას, საერთაშორისო სპორტულ ღონისძიებებში თანამშრომლობის გაძლიერებასა და სპორტულ ორგანიზაციებს შორის კავშირების შემდგომ განვითარებას.

სპორტის მინისტრების სამუშაო შეხვედრას ასევე ესწრებოდნენ მინისტრის მოადგილე ირაკლი დოლაბერიძე, საქართველოს ელჩი ჩინეთის რესპუბლიკაში პაატა კალანდაძე, მაგიდის ჩოგბურთის ფედერაციის პრეზიდენტი გურამ გოგოლაძე, ჩინეთისა და საქართველოს სპორტის სამინისტროსა და საქართველოს საელჩოს წარმომადგენლები.

სპორტის მინისტრი ჩინეთში „თაიშან გრუპის“ წარმომადგენლებს შეხვდა

26 მარტი

26 მარტს საქართველოს სპორტის მინისტრი შალვა გოგოლაძე, სპორტული ინვენტარის მწარმოებელი ჩინური კომპანია „თაიშან გრუპის“ წარმომადგენლებს შეხვდა.

მინისტრის ხელმძღვანელობით დელეგაციამ შეხვედრა გამართა კომპანიის მმართველობითი საბჭოს თავმჯდომარე პიენ ჭილიანგთან და ვიცე-პრეზიდენტ მან ფანგფანგთან. ვიზიტის ფარგლებში დელეგაციამ ასევე მოინახულა „თაიშან გრუპის“ მუზეუმი და ქარხნები, სადაც წარმოების პროცესს გაეცნო.

მხარეებმა შეხვედრაზე სამომავლო თანამშრომლობის პერსპექტივები განიხილეს. საუბარი შეეხო საქართველოში სპორტული ინფრასტრუქტურის საერთაშორისო სტანდარტების შესაბამისი სპორტული ინვენტარითა და ინოვაციური დანადგარებით აღჭურვის საკითხს.

შეხვედრას ესწრებოდნენ მინისტრის მოადგილე ირაკლი დოლაბერიძე, „თაიშან გრუპის“ სხვადასხვა დეპარტამენტის ხელმძღვანელები, მაგიდის ჩოგბურთის ფედერაციის პრეზიდენტი გურამ გოგოლაძე, ასევე საქართველოს სპორტის სამინისტროსა და საელჩოს წარმომადგენლები.

2026 წლის დასაწყისში საქართველო-ჩინეთის სავაჭრო ბრუნვამ ზრდა აჩვენა

27 მარტი

2026 წლის იანვარ-თებერვალში საქართველო-ჩინეთის სავაჭრო ურთიერთობებში ზრდის ტენდენცია გამოიკვეთა.

Business Insider Georgia-ს მიერ 27 მარტს გავრცელებული, საქსტატის მონაცემებზე დაფუძნებული სტატიის თანახმად, აღნიშნულ პერიოდში საქართველოდან ჩინეთში ექსპორტმა 147.1 მილიონი აშშ დოლარი შეადგინა, რაც 2025 წლის შესაბამის პერიოდთან შედარებით 289.1%-ით მეტია. ამავე დროს, ჩინეთიდან იმპორტი 310.7 მილიონ დოლარამდე გაიზარდა, რაც წლიურ ჭრილში 28.4%-იან ზრდას ასახავს.

საექსპორტო სტრუქტურის მიხედვით, ჩინეთის მიმართულებით საქართველოდან ყველაზე მეტი მოცულობით ძვირფასი ლითონების მადნები და კონცენტრატები გავიდა. უმსხვილეს საექსპორტო პროდუქტებს შორის ასევე დასახელებულია სპილენძის მადნები და კონცენტრატები, სანელებლები, მედიცინასა და ვეტერინარიაში გამოსაყენებელი ხელსაწყოები და მოწყობილობები, ასევე ყურძნის ნატურალური ღვინოები.

იმპორტის ნაწილში ჩინეთიდან საქართველოში შემოსული ძირითადი პროდუქტები იყო დიოდები, ტრანზისტორები და სხვა ანალოგიური ნახევარგამტარი ხელსაწყოები, ელექტროგენერატორული დანადგარები და მბრუნავი ელექტრო გარდამქმნელები, მსუბუქი ავტომობილები, ბრტყელი ნაგლინი ნახშირბადიანი ფოლადი, ასევე შინაური ფრინველის ხორცი და კვების სუბპროდუქტები.

სტატია ხაზს უსვამს, რომ საქართველო-ჩინეთის სავაჭრო ურთიერთობები მზარდ დინამიკას ინარჩუნებს და ჩინეთი საქართველოსთვის კვლავ მოწინავე  სავაჭრო პარტნიორად რჩება.

ქართული ღვინო ჩენდუში გამართულ გამოფენებზე წარადგინეს

27 მარტი

26-27 მარტს ქართული ღვინის მწარმოებელი კომპანიები ჩინეთის ქალაქ ჩენდუში მიმდინარე საერთაშორისო გამოფენებზე ქართული ღვინით წარდგნენ.

ღვინის ეროვნული სააგენტოს ფინანსური და ორგანიზაციული მხარდაჭერით, ქართული ღვინო წარმოდგენილი იყო გამოფენებზე Fine Wineseer და Fine Wine Hotel Exhibition, ხოლო მიმდინარე კვირაში წარმოდგენილია ღონისძიებაში China Food & Drinks Fair.

Fine Wine Hotel Exhibition-ის ფარგლებში გაიმართა ქართული ღვინის დეგუსტაცია-სემინარიც, რომელსაც ღვინის მაგისტრი ფონგი ვოკერი უძღვებოდა. ღონისძიებას დაახლოებით 100 სტუმარი, მათ შორის ღვინის ექსპერტები, იმპორტიორები და ჰორეკა სექტორის წარმომადგენლები დაესწრნენ. დეგუსტაციაზე წარმოდგენილი იყო ქართული ღვინის მწარმოებელი რვა კომპანიის ღვინოები.

ღვინის ეროვნული სააგენტოს განცხადებით, აღნიშნულ ღონისძიებებში მონაწილეობა ქართული ღვინის ცნობადობის ზრდას, ახალი პარტნიორების მოძიებასა და საექსპორტო პოზიციების გაძლიერებას ემსახურება. სააგენტოში აღნიშნავენ, რომ ჩინეთი ქართული ღვინის ერთ-ერთი სტრატეგიული ბაზარია, სადაც 2013 წლიდან აქტიურად მიმდინარეობს მარკეტინგული კამპანია.

სპორტის სამინისტროს სამუშაო ვიზიტი ჩინეთში

27 მარტი

23-27 მარტს საქართველოს სპორტის სამინისტროს დელეგაცია ჩინეთის სახალხო რესპუბლიკაში სამუშაო ვიზიტით იმყოფებოდა.

ვიზიტის ფარგლებში მინისტრის მოადგილემ ირაკლი დოლაბერიძემ პეკინის სპორტის უნივერსიტეტი მოინახულა, სადაც მხარეებმა სპორტული განათლების, გაცვლითი პროგრამებისა და ერთობლივი სამწვრთნელო პროექტების პერსპექტივები განიხილეს.

ვიზიტის ფარგლებში ქართული დელეგაცია ტიანძინში მიმდინარე უშუს მე-10 ახალგაზრდულ მსოფლიოს ჩემპიონატსაც დაესწრო. საქართველოს სპორტის მინისტრი შალვა გოგოლაძე, ირაკლი დოლაბერიძე და ჩინეთში საქართველოს ელჩი პაატა კალანდაძე საქართველოს უშუს ეროვნული ნაკრების წევრებს შეხვდნენ.

ამასთან, გაიმართა შეხვედრა უშუს საერთაშორისო ფედერაციის გენერალურ მდივან იუფინგ ჭანგთან, სადაც მხარეებმა საქართველოში უშუს პოპულარიზაციისა და ამ სპორტის სახეობის განვითარების ხელშეწყობის საკითხები განიხილეს.

აზერბაიჯანი

სი ძინპინი: ჩინეთი აზერბაიჯანთან პარტნიორობის გაღრმავებისთვის მზად არის

23 მარტი

23 მარტს აზერბაიჯანის პრეზიდენტის ოფიციალურ ვებგვერდზე ჩინეთის პრეზიდენტ სი ძინპინის წერილი გამოქვეყნდა, რომელშიც იგი პრეზიდენტ ილჰამ ალიევს ნოვრუზის დღესასწაულს ულოცავს.

წერილში სი ძინპინი აღნიშნავს, რომ ჩინეთი და აზერბაიჯანი „ყოვლისმომცველი სტრატეგიული პარტნიორები“ არიან. მისივე შეფასებით, ბოლო წლებში ორ ქვეყანას შორის პოლიტიკური ნდობა განმტკიცდა, ხოლო სხვადასხვა სფეროში თანამშრომლობა თანმიმდევრულად ვითარდება.

ჩინეთის პრეზიდენტის განცხადებით, იგი განსაკუთრებულ მნიშვნელობას ანიჭებს ჩინეთ-აზერბაიჯანის ურთიერთობების განვითარებას და მზად არის, ილჰამ ალიევთან ერთად იმუშაოს იმისათვის, რომ ორმხრივი თანამშრომლობა ახალ ეტაპზე გადავიდეს.

საჰიბა გაფაროვა ჩინეთის ეროვნული სახალხო კონგრესის თავმჯდომარეს შეხვდა

25 მარტი

აზერბაიჯანის მილი მეჯლისის თავმჯდომარე საჰიბა გაფაროვა 25 მარტს პეკინში ჩინეთის ეროვნული სახალხო კონგრესის მუდმივმოქმედი კომიტეტის თავმჯდომარეს, ჟაო ლეჯის შეხვდა. მხარეებმა ორმხრივი პოლიტიკური, ეკონომიკური და საპარლამენტო თანამშრომლობის გაღრმავება განიხილეს.

შეხვედრაზე აღინიშნა, რომ აზერბაიჯან-ჩინეთის ურთიერთობები ბოლო წლებში სტრატეგიული პარტნიორობის დონეზე განვითარდა. მხარეებმა ყურადღება გაამახვილეს ლიდერებს შორის აქტიურ კონტაქტებზე, საპარლამენტო კავშირების გაძლიერებასა და ორმხრივი ვიზიტების ზრდაზე.

საჰიბა გაფაროვამ კიდევ ერთხელ დაადასტურა აზერბაიჯანის მხარდაჭერა „ერთი ჩინეთის“ პოლიტიკის მიმართ, ხოლო ჩინურმა მხარემ აზერბაიჯანის სუვერენიტეტისა და ტერიტორიული მთლიანობის მხარდაჭერა გამოხატა. შეხვედრაზე ასევე განიხილეს სავაჭრო, სატრანსპორტო და ჰუმანიტარული თანამშრომლობა, მათ შორის „შუა დერეფნის“ მნიშვნელობა, პირდაპირი ავიამიმოსვლა და უვიზო მიმოსვლის პერსპექტივა.

მხარეებმა ისაუბრეს თანამშრომლობის გაფართოებაზეც ციფრული განვითარების, ხელოვნური ინტელექტისა და მწვანე ენერგიის მიმართულებებით. განსაკუთრებული ყურადღება დაეთმო პარლამენტებს შორის ინსტიტუციური კავშირების გაღრმავებასაც.

საჰიბა გაფაროვამ ბოაოს ფორუმზე აზერბაიჯან-ჩინეთის ურთიერთობებზე ისაუბრა

26 მარტი

აზერბაიჯანის მილი მეჯლისის სპიკერი საჰიბა გაფაროვა 26 მარტს, ჩინეთში სამუშაო ვიზიტის ფარგლებში, აზიის ბოაოს ფორუმის ყოველწლიურ კონფერენციაზე სიტყვით გამოვიდა, სადაც ჩინეთის საერთაშორისო როლსა და აზერბაიჯან-ჩინეთის ურთიერთობებზე ისაუბრა.

გაფაროვამ აღნიშნა, რომ მზარდი გეოპოლიტიკური დაძაბულობის ფონზე დიალოგი და თანამშრომლობა აუცილებლობად იქცა, ხოლო ბოაოს ფორუმი ასეთ პირობებში პრაქტიკული გადაწყვეტილებებისა და საერთაშორისო თანამშრომლობის მნიშვნელოვანი პლატფორმაა.

მისი თქმით, ჩინეთი თანამედროვე საერთაშორისო ურთიერთობებში მნიშვნელოვან და კონსტრუქციულ როლს ასრულებს, ხოლო პეკინის გლობალური განვითარების, უსაფრთხოების, ცივილიზაციისა და მმართველობის ინიციატივებს აზერბაიჯანი მხარს უჭერს.

სპიკერის განცხადებით, აზერბაიჯანი და ჩინეთი საერთო ხედვებს იზიარებენ, ხოლო ბოლო პერიოდში გამართული უმაღლესი დონის ვიზიტები და სტრატეგიული პარტნიორობის შესახებ ხელმოწერილი დოკუმენტები ორ ქვეყანას შორის პოლიტიკური დიალოგისა და ურთიერთნდობის გაღრმავებაზე მიუთითებს.

აზერბაიჯანსა და ჩინეთს შორის სავაჭრო ბრუნვა 2026 წლის დასაწყისში გაიზარდა

28 მარტი

2026 წლის იანვარ-თებერვალში აზერბაიჯანსა და ჩინეთს შორის სავაჭრო ბრუნვამ 779.4 მილიონი დოლარი შეადგინა, რაც გასული წლის ანალოგიურ პერიოდთან შედარებით 4.6 პროცენტით მეტია. ამის შესახებ მედია გამოცემა Trend აზერბაიჯანის სახელმწიფო საბაჟო კომიტეტის მონაცემებზე დაყრდნობით წერს.

გამოცემის ინფორმაციით, აღნიშნულ პერიოდში ჩინეთი აზერბაიჯანის საგარეო სავაჭრო ბრუნვის 12.44 პროცენტს იკავებდა და ქვეყნის უმსხვილეს სავაჭრო პარტნიორებს შორის მესამე ადგილზე იყო. ამავე დროს, ჩინეთი აზერბაიჯანის მთავარი საიმპორტო პარტნიორი გახდა.

იანვარ-თებერვალში აზერბაიჯანიდან ჩინეთში ექსპორტმა 21.6 მილიონი დოლარი შეადგინა, რაც წლიურად თითქმის გაორმაგებულია. ჩინეთიდან იმპორტი კი 757.8 მილიონ დოლარამდე გაიზარდა, რაც 3.2-პროცენტიან მატებას ნიშნავს.

საერთო ჯამში, აზერბაიჯანის საგარეო სავაჭრო ბრუნვამ მოცემულ პერიოდში 6.264 მილიარდი დოლარი შეადგინა. აქედან 3.66 მილიარდი დოლარი ექსპორტზე, ხოლო 2.59 მილიარდი დოლარი იმპორტზე მოდის. შედეგად, ქვეყანამ 1.06 მილიარდი დოლარის დადებითი სავაჭრო სალდო შეინარჩუნა.

დუნჰუანგის კონფერენციაზე აზერბაიჯან-ჩინეთის კულტურული ურთიერთობები განიხილეს

28 მარტი

პეკინის უცხო ენების უნივერსიტეტის აზერბაიჯანული ენის დეპარტამენტის ხელმძღვანელი, ფილოლოგიის დოქტორი აქშინ ალიევი, 28 მარტს ჩინეთის ქალაქ დუნჰუანგში გამართულ საერთაშორისო სამეცნიერო კონფერენციაზე სიტყვით გამოვიდა.

აქშინ ალიევმა საკუთარ გამოსვლაში აღნიშნა, რომ 2025 წლის აპრილში გაფორმებულმა აზერბაიჯანსა და ჩინეთს შორის ყოვლისმომცველი სტრატეგიული პარტნიორობის შესახებ დეკლარაციამ ორ ქვეყანას შორის კულტურული თანამშრომლობა ახალ ეტაპზე გადაიყვანა.

მისი შეფასებით, აბრეშუმის გზაზე მდებარე აზერბაიჯანსა და ჩინეთს შორის ისტორიული კავშირები დიდი ხანია აზერბაიჯანელი მკვლევრების ყურადღების ცენტრშია. ალიევის თქმით, დუნჰუანგი, როგორც აბრეშუმის გზის მნიშვნელოვანი ცენტრი, ისტორიულად განსაკუთრებულ როლს ასრულებდა ამ სივრცეში კულტურული დიალოგის ჩამოყალიბებაში და ამ ფუნქციას დღესაც ინარჩუნებს.

ღონისძიება სახელწოდებით „დუნჰუანგის კულტურა, ბამბუკის ხელნაწერები და ჩინური კულტურის საერთაშორისო პოპულარიზაცია“ გაიმართა და მას ექვსი მონაწილე ქვეყნიდან 100-ზე მეტი მონაწილე დაესწრო.

აბასოვი: ჩინეთი აზერბაიჯანის საიმედო პარტნიორია

29 მარტი

აზერბაიჯანის ენების უნივერსიტეტთან არსებული კონფუცის ინსტიტუტის დირექტორის, რაფიგ აბასოვის განცხადებით, ჩინეთი აზერბაიჯანის საიმედო პარტნიორია. ამის შესახებ მან ჩინეთის სააგენტო Xinhua-სთან ინტერვიუში განაცხადა,

აბასოვის თქმით, აზერბაიჯანსა და ჩინეთს შორის პარტნიორობა პოლიტიკურ, ეკონომიკურ და ჰუმანიტარულ სფეროებში დინამიკურად ვითარდება. მან ასევე აღნიშნა, რომ ბაქო და პეკინი აქტიურად აძლიერებენ თანამშრომლობას „ერთი სარტყელი, ერთი გზის“ ინიციატივის ფარგლებშიც.

ჰუმანიტარული კავშირების შეფასებისას აბასოვმა თქვა, რომ აზერბაიჯანში ჩინური ენისადმი ინტერესი წლიდან წლამდე იზრდება, ისევე როგორც ჩინეთის კულტურის, ისტორიისა და თანამედროვე ცხოვრების მიმართ ყურადღება.

მისი ინფორმაციით, ბაქოში მოქმედმა კონფუცის ინსტიტუტმა ათი წლის განმავლობაში 13 ფილიალის, სამეცნიერო ორგანიზაციებისა და სხვადასხვა უნივერსიტეტისა და სკოლის მეშვეობით ჩინური ენა უკვე 4,000-ზე მეტ სტუდენტს ასწავლა.

აბასოვის განცხადებით, სტუდენტური გაცვლები, ახალგაზრდული საგანმანათლებლო ღონისძიებები ინსტიტუტს აზერბაიჯანსა და ჩინეთს შორის კულტურული გაცვლისა და ხალხთაშორისი დიპლომატიის მნიშვნელოვან პლატფორმად აქცევს.

სომხეთი

ერევნის სახელმწიფო უნივერსიტეტის სტუდენტები ჩინეთის საელჩოს ეწვივნენ

27 მარტი

27 მარტს, ერევნის სახელმწიფო უნივერსიტეტის საერთაშორისო ურთიერთობების ფაკულტეტის სტუდენტური სამეცნიერო საზოგადოების წევრები სომხეთში ჩინეთის სახალხო რესპუბლიკის საელჩოს აკადემიური ვიზიტით ეწვივნენ.

ვიზიტის ფარგლებში სტუდენტები დიპლომატიური კორპუსის წარმომადგენლებს შეხვდნენ, რომლებმაც მათ სომხეთ-ჩინეთის თანამშრომლობის მიმდინარე დინამიკასა და სამომავლო მიმართულებებზე მიაწოდეს ინფორმაცია.

შეხვედრაზე განსაკუთრებული ყურადღება დაეთმო სტუდენტების მიერ წამოჭრილ საკითხებს, მათ შორის ჩინეთმცოდნეობის მიმართულებით მიღებულ გამოცდილებას, ორმხრივი საგანმანათლებლო და კულტურული კავშირების პერსპექტივებს, ასევე არსებულ გამოწვევებსა და ახალ შესაძლებლობებს.

ოფიციალური ნაწილის დასრულების შემდეგ შეხვედრა კითხვა-პასუხის ფორმატში გაგრძელდა, რის შედეგადაც საერთაშორისო ურთიერთობების მომავალი სპეციალისტები მათთვის საინტერესო პროფესიულ საკითხებზე დიპლომატებთან უშუალო დიალოგში ჩაერთვნენ.

ყირგიზეთი

ყირგიზეთი CSCEC-სთან ინფრასტრუქტურულ პროექტებს განიხილავს

24 მარტი

ყირგიზეთის რესპუბლიკის პრეზიდენტთან არსებული ეროვნული საინვესტიციო სააგენტოს ხელმძღვანელმა, რავშანბეკ საბიროვმა, 24 მარტს China State Construction Engineering Corporation-ის (CSCEC) წარმომადგენლებთან შეხვედრა გამართა.

ეროვნული საინვესტიციო სააგენტოს ინფორმაციით, ყირგიზეთსა და CSCEC-ს შორის თანამშრომლობა პეკინში გამართული პირველი შეხვედრის შემდეგ ახალ ეტაპზე გადავიდა.

მხარეებმა ინფრასტრუქტურულ და საინვესტიციო პროექტებზე, მათ შორის გზების, ხიდების, რკინიგზის, ენერგეტიკისა და ურბანული განვითარების მიმართულებებზე იმსჯელეს, ასევე განიხილეს „მწვანე“ და ციფრული ტექნოლოგიების გამოყენება.

შეხვედრის ბოლოს მხარეებმა გრძელვადიანი თანამშრომლობის გაღრმავებისა და კონკრეტული პროექტების შემუშავების მზადყოფნა დაადასტურეს.

ჩინეთი-ყირგიზეთი-უზბეკეთის რკინიგზის მშენებლობაში 5 ათასზე მეტი ადამიანია ჩართული

24 მარტი

ჩინეთი-ყირგიზეთი-უზბეკეთის რკინიგზის პროექტის სამშენებლო სამუშაოებში 5 ათასზე მეტი ადამიანი და 5.6 ათასზე მეტი ერთეული ტექნიკაა ჩართული. ამის შესახებ ყირგიზეთის მინისტრთა კაბინეტის მონაცემებზე დაყრდნობით 24.kg წერს.

24.kg-ის ინფორმაციით, 24 მარტს მინისტრთა კაბინეტის თავმჯდომარის მოადგილემ ერლისტ აკუნბეკოვმა პროექტის მიმდინარეობის შესახებ სამუშაო შეხვედრა გამართა. ამ დროისთვის ძირითადი საპროექტო მასალები უკვე მომზადებულია და შესაბამის უწყებებთან შეთანხმება მიმდინარეობს.

გამოცემის ცნობით, სამშენებლო უბნებზე უკვე შესრულებულია 3.5 მილიონ კუბურ მეტრზე მეტი მიწის სამუშაო. პროექტის ფარგლებში ძირითადი სამუშაოები გვირაბების გაყვანას, მიწის მასების გადაადგილებასა და ხიდების მშენებლობას მოიცავს.

ყირგიზეთის ხელისუფლებაში აცხადებენ, რომ პროექტის განხორციელებისთვის საჭირო მხარდაჭერასა და კოორდინაციას უზრუნველყოფენ. აკუნბეკოვმა კი უსაფრთხოების ნორმებისა და ეკოლოგიური მოთხოვნების მკაცრი დაცვის აუცილებლობაზე გაამახვილა ყურადღება.

ჩინეთის ელჩი ყირგიზეთის საგანგებო სიტუაციების მინისტრს შეხვდა

25 მარტი

ჩინეთის ელჩი ყირგიზეთში, ლიუ ძიანპინი, ყირგიზეთის საგანგებო სიტუაციების მინისტრ კანატბეკ ჩინიებაევს შეხვდა. მხარეებმა 25 მარტის შეხვედრაზე საგანგებო სიტუაციების მართვის სფეროში თანამშრომლობის გაღრმავების საკითხები განიხილეს.

ჩინეთის საელჩოს ინფორმაციით, ელჩმა მინისტრს თანამდებობაზე დანიშვნა მიულოცა და აღნიშნა, რომ პეკინსა და ბიშკეკს შორის თანამშრომლობამ სხვადასხვა მიმართულებით უპრეცედენტოდ მაღალ დონეს მიაღწია. მისივე თქმით, ჩინური მხარე მზად არის, ყირგიზეთთან ერთად დააჩქაროს შესაბამისი პროექტების განხორციელება, ასევე გააძლიეროს სპეციალისტების მომზადებისა და კვალიფიკაციის ამაღლების მიმართულებით თანამშრომლობა.

ყირგიზეთის საგანგებო სიტუაციების მინისტრმა, კანატბეკ ჩინიებაევმა, ორმხრივი ურთიერთობების განვითარების შედეგები დადებითად შეაფასა და ჩინურ მხარეს მადლობა გადაუხადა იმ მხარდაჭერისთვის, რომელსაც ყირგიზეთი სტიქიური უბედურებების პრევენციის, ზიანის შემცირებისა და საგანგებო მართვის სფეროში იღებს.

მინისტრის განცხადებით, ბიშკეკი მზად არის, პეკინთან მჭიდრო თანამშრომლობით უპასუხოს გლობალურ გამოწვევებს.

ყირგიზეთის ენერგეტიკის მინისტრის ოფიციალური ვიზიტი ჩინეთში

26 მარტი

ყირგიზეთის ენერგეტიკის მინისტრმა, ტაალაიბეკ იბრაევმა, ჩინეთში სამუშაო ვიზიტის ფარგლებში ჩინურ ენერგეტიკულ და ტექნოლოგიურ კომპანიებთან შეხვედრები გამართა.

ყირგიზეთის ენერგეტიკის სამინისტროსა და ჩინურ კორპორაცია ShuiFa Group-ს შორის გაფორმდა მემორანდუმი, რომელიც ენერგეტიკული ინფრასტრუქტურის სფეროში თანამშრომლობას ითვალისწინებს.

დოკუმენტი დამტენი სადგურებისა და ენერგიის დაგროვების სისტემების განვითარებას ეხება. ყირგიზული მხარის შეფასებით, ეს ნაბიჯი ქვეყნის ენერგეტიკული სექტორის მოდერნიზაციას და მდგრადი სატრანსპორტო ინფრასტრუქტურის განვითარებას შეუწყობს ხელს.

ვიზიტის ფარგლებში მინისტრი ასევე შეხვდა კომპანია NUCL New Energy Tech-ის დამფუძნებელსა და გენერალურ დირექტორს, იულინ ლიანს. შეხვედრაზე განიხილეს ელექტრომობილებისთვის დამტენი ინფრასტრუქტურის განვითარება და თანამედროვე ტექნოლოგიური გადაწყვეტილებების დანერგვა.

გარდა ამისა, ყირგიზულმა დელეგაციამ მოლაპარაკებები გამართა კომპანია Zhejiang Anfu Energy-ს წარმომადგენლებთანაც. მხარეებმა განიხილეს ელექტროტრანსპორტისთვის განკუთვნილი დამტენი სადგურების აღჭურვილობის მიწოდებისა და ტექნოლოგიების ლოკალიზაციის შესაძლებლობები.

ჩინეთის ელჩი და ბიშკეკის მერი თანამშრომლობის გაფართოებაზე შეთანხმდნენ

27 მარტი

ჩინეთის სახალხო რესპუბლიკის ელჩი ყირგიზეთში ლიუ ძიანპინი ბიშკეკის მერს, აიბეკ ჯუნუშალიევს შეხვდა. ჩინეთის საელჩოს ინფორმაციით, შეხვედრა 27 მარტს გაიმართა და მხარეებმა ჩინეთ-ყირგიზეთის თანამშრომლობის გაღრმავების საკითხები განიხილეს.

ჩინური მხარის განცხადებით, ბოლო წლებში ბიშკეკთან თანამშრომლობამ ეკოლოგიის, ინფრასტრუქტურისა და ჰუმანიტარული მიმართულებით მნიშვნელოვანი შედეგები გამოიღო. საელჩოს ცნობით, ამოქმედდა ბიშკეკის ნარჩენების გადამამუშავებელი ქარხანა, ასევე მიმდინარეობს საგზაო ქსელის რეკონსტრუქციისა და შემოვლითი გზის მშენებლობის პროექტები.

ელჩმა აღნიშნა, რომ პეკინი მზად არის, ბიშკეკსა და ჩინეთის ქალაქებსა და პროვინციებს შორის თანამშრომლობის გაფართოებას მომავალშიც შეუწყოს ხელი, მათ შორის ურბანული მართვის გამოცდილების გაზიარების გზით.

თავის მხრივ, აიბეკ ჯუნუშალიევმა ჩინურ მხარეს ყირგიზეთისადმი გრძელვადიანი მხარდაჭერისთვის მადლობა გადაუხადა და აღნიშნა, რომ მზად არის ორმხრივად მომგებიანი პროექტების განხორციელებისთვის თანამშრომლობა კიდევ უფრო გააძლიეროს.

China Southern Airlines-მა გუანჯოუ–ბიშკეკის ახალი ავიარეისი შეასრულა

29 მარტი

29 მარტს ჩინურმა ავიაკომპანია China Southern Airlines-მა გუანჯოუ-ბიშკეკი-გუანჯოუს მიმართულებით პირველი რეისი შეასრულა. ოფიციალური ინფორმაციით, ეს ყირგიზეთის საავიაციო სექტორისთვის მნიშვნელოვანი მოვლენაა და ახალი მარშრუტი ჩინურ მხარესთან თანამშრომლობის შედეგად ამოქმედდა.

ოფიციალური ცნობით, რეგულარული ფრენები კვირაში ორჯერ – ოთხშაბათსა და კვირას შესრულდება. ყირგიზული მხარის შეფასებით, ახალი ავიამიმართულების ამოქმედება ხელს შეუწყობს როგორც სამგზავრო და სატვირთო გადაზიდვების განვითარებას, ისე ყირგიზეთსა და ჩინეთს შორის სატრანსპორტო, ეკონომიკური და ჰუმანიტარული კავშირების გაღრმავებას.

ჩინეთი სამხრეთ კავკასიასა და ყირგიზეთში (23 – 29 მარტი) Read More »

ჩინეთი სამხრეთ კავკასიასა და უზბეკეთში (2 – 8 მარტი)

კვირის ამბავი / /

საქართველო

საქართველოს ელჩი ჩინეთის პარლამენტის წარმომადგენელს შეხვდა

2 მარტი

2026 წლის 27 თებერვალს, ჩინეთის სახალხო რესპუბლიკაში საქართველოს ელჩმა, პაატა კალანდაძემ, შეხვედრა გამართა ჩინეთის ეროვნული სახალხო კონგრესის მუდმივმოქმედი კომიტეტის გენერალური ოფისის საგარეო საქმეთა ბიუროს გენერალურ დირექტორთან, ვან ვენთან. აღნიშნულის შესახებ ინფორმაცია საქართველოს საელჩომ 2 მარტს გამოაქვეყნა.

შეხვედრის ფარგლებში მხარეებმა საქართველო-ჩინეთის ორმხრივი ურთიერთობების გაღრმავების საკითხები განიხილეს. განსაკუთრებული ყურადღება დაეთმო ორი ქვეყნის საკანონმდებლო ორგანოებს შორის თანამშრომლობის გაძლიერების პერსპექტივებს.

მხარეებმა ხაზი გაუსვეს საპარლამენტო მიმართულებით კავშირების გააქტიურების მნიშვნელობას, რაც, მათი შეფასებით, ორმხრივი ურთიერთობების შემდგომ განვითარებას შეუწყობს ხელს.

ჩინური კომპანიები საქართველოს ქარის ენერგეტიკის სექტორში გავლენას აძლიერებენ

3 მარტი

ჩინური კომპანიები საქართველოს განახლებადი ენერგიის სექტორში მონაწილეობას რუისის ქარის ელექტროსადგურის პროექტში ჩართულობით აფართოებენ. აღნიშნულის შესახებ ინფორმაცია 3 მარტს Xinhua-ს საინფორმაციო სააგენტომ გაავრცელა.

გორის მახლობლად მდებარე 206 მეგავატიანი პროექტი ჩინური ქარის ტურბინების მწარმოებელი კომპანიის, Goldwind-ის მონაწილეობით ხორციელდება. კომპანია პროექტისთვის ტურბინებს ამარაგებს და ასევე ჩართულია მშენებლობის, შემდგომი ოპერირებისა და ტექნიკური მომსახურების პროცესში.

მკაცრი ზამთრისა და რთული სამშენებლო პირობების მიუხედავად, პროექტის განხორციელება შეუფერხებლად მიმდინარეობს. პროექტის დასრულების შემდეგ, ქარის ელექტროსადგური, სავარაუდოდ, ელექტროენერგიით დაახლოებით 200 000 ოჯახს უზრუნველყოფს და ყოველწლიურად დაახლოებით 400 000 ტონით შეამცირებს ნახშირორჟანგის გამოყოფას.

პროექტი ენერგეტიკის სფეროში ჩინეთსა და საქართველოს შორის თანამშრომლობის გაღრმავებაზე მიუთითებს, მაშინ როცა საქართველო მომდევნო წლებში განახლებადი ენერგიის სექტორის განვითარებას გეგმავს.

პეკინში ჩინეთის „ორი სესიის“ გახსნის სხდომა გაიმართა

5 მარტი

2026 წლის 4-5 მარტს, პეკინში, სახალხო კრების დიდ დარბაზში, ჩინეთის „ორი სესიის“ გახსნის სხდომა გაიმართა. 4 მარტს ჩინეთის სახალხო პოლიტიკური საკონსულტაციო საბჭოს ეროვნული კომიტეტის მე-14 მოწვევის მეოთხე სესია გაიხსნა, ხოლო 5 მარტს ჩინეთის ეროვნული სახალხო კონგრესის მე-14 მოწვევის მეოთხე სესიამ განაახლა მუშაობა.

„ორი სესია“ ჩინეთის ერთ-ერთ უმნიშვნელოვანეს ყოველწლიურ პოლიტიკურ მოვლენას წარმოადგენს. მის ფარგლებში იმართება ქვეყნის უმაღლესი საკანონმდებლო ორგანოსა და უმაღლესი პოლიტიკური-საკონსულტაციო ორგანოს წლიური სხდომები, სადაც განიხილება სახელმწიფოს განვითარების ძირითადი მიმართულებები, ეკონომიკური და სოციალური პოლიტიკის პრიორიტეტები, სახელმწიფო ბიუჯეტი, ასევე სხვა საკანონმდებლო და სამთავრობო საკითხები.

2026 წლის სესიებზე განსაკუთრებული ყურადღება ქვეყნის ეკონომიკური და სოციალური განვითარების პრიორიტეტებზეა გამახვილებული. განსახილველ საკითხებს შორის ერთ-ერთი მთავარი თემაა 2026-2030 წლების ეროვნული ეკონომიკური და სოციალური განვითარების მე-15 ხუთწლიანი გეგმის მონახაზი.

გახსნის სხდომებს ჩინეთში აკრედიტებული დიპლომატიური მისიების წარმომადგენლები ესწრებოდნენ. ღონისძიებას საპატიო სტუმრის სტატუსით დაესწრო საქართველოს ელჩი ჩინეთის სახალხო რესპუბლიკაში პაატა კალანდაძე.

საქართველოს ელჩის შეხვედრა China-CEEC-ის სამდივნოსთან

6 მარტი

6 მარტს, საქართველოს ელჩი პაატა კალანდაძე შეხვდა ჩინეთი-ცენტრალური და აღმოსავლეთ ევროპის ქვეყნების (China-CEEC) თანამშრომლობის საკითხებში ჩინეთის სპეციალურ წარმომადგენელს, ელჩ ჩენ კუოიოს.

შეხვედრაზე მხარეებმა China-CEEC-ის ფორმატში საქართველოს აქტიური ჩართულობის პერსპექტივები განიხილეს და ხაზი გაუსვეს ქვეყნის სტრატეგიულ როლს „შუა დერეფნის“ განვითარების პროცესში. საუბარი ასევე შეეხო სამომავლო თანამშრომლობის დინამიკას.

აზერბაიჯანი

ბაქოში ჩინეთის საელჩომ ირანიდან ევაკუირებული მოქალაქეები მიიღო

3 მარტი

აზერბაიჯანში ჩინეთის საელჩომ ირანიდან ევაკუირებული ჩინეთის მოქალაქეები მიიღო და მათ სამშობლოში უსაფრთხოდ დაბრუნებაში დახმარება გაუწია. Xinhua-ს ინფორმაციით, 3 მარტს ბაქოში მდებარე Caspian Business Hotel-ში 48 ჩინეთის მოქალაქე გადაიყვანეს, რომლებიც ირანიდან ევაკუაციის ფარგლებში აზერბაიჯანში ჩავიდნენ.

გამოცემის ცნობით, ბოლო დღეებში ირანიდან აზერბაიჯანში სულ 260-ზე მეტი ჩინეთის მოქალაქე გადავიდა. პროცესს კოორდინაციას უწევდა ჩინეთის საელჩო აზერბაიჯანში.

Xinhua News Agency-ის მიერ გამოქვეყნებულ მასალაში აღნიშნულია, რომ აზერბაიჯანის მთავრობამ ჩინეთის მოქალაქეების ქვეყანაში შესვლის პროცესში მნიშვნელოვანი მხარდაჭერა აღმოუჩინა პეკინს. ჩინეთის ელჩის შეფასებით, ეს თანამშრომლობა ჩინეთსა და აზერბაიჯანს შორის არსებული სტრატეგიული პარტნიორობის გამოხატულებაა.

AZERTAC-მა და Xinhua-მ ხანგრძლივი მედია პარტნიორობის შესახებ ისაუბრეს

6 მარტი

აზერბაიჯანის სახელმწიფო საინფორმაციო სააგენტო AZERTAC-მა და ჩინეთის Xinhua News Agency-მ მათი 23-წლიანი თანამშრომლობა ძლიერი მედია პარტნიორობის მაგალითად შეაფასეს.

6 მარტს, ბაქოში გამართულ შეხვედრაზე, AZERTAC-ის მმართველი საბჭოს თავმჯდომარემ ვუგარ ალიევმა და Xinhua-ს ევრაზიის ბიუროს დირექტორის მოადგილემ ვეი კანგმა განიხილეს ხანგრძლივი თანამშრომლობა, ინფორმაციის გაცვლა და სამომავლო ურთიერთობები. მხარეებმა აღნიშნეს, რომ მათი პარტნიორობა ასახავს აზერბაიჯან-ჩინეთის ფართო ურთიერთობებს და ხაზი გაუსვეს დეზინფორმაციის წინააღმდეგ ბრძოლასა და ობიექტური გაშუქების მნიშვნელობას.

სომხეთი

სომხეთი ჩინეთის მოქალაქეების ირანიდან ევაკუაციის ერთ-ერთ მარშრუტად დასახელდა

4 მარტი

4 მარტს ჩინეთის საგარეო საქმეთა სამინისტრომ განაცხადა, რომ ირანიდან გასვლის მსურველ ჩინეთის მოქალაქეებს ევაკუაცია მეზობელი ქვეყნების გავლით შეეძლოთ, მათ შორის სომხეთის გავლით, აგარაკის სასაზღვრო გამშვები პუნქტის გამოყენებით. პეკინმა ასევე აღნიშნა, რომ ჩინეთის მოქალაქეებს სომხეთში პასპორტით უვიზოდ შესვლა შეუძლიათ. ევაკუაციის პროცესში დახმარების მიზნით, ჩინურმა დიპლომატიურმა მისიებმა სასაზღვრო პუნქტებზე სამუშაო ჯგუფები განათავსეს.

უზბეკეთი

ტაშკენტში ჩინეთ-უზბეკეთის ბიზნესფორუმი გაიმართა

3 მარტი

3 მარტს ტაშკენტში ჩინეთისა და უზბეკეთის წარმომადგენლებმა გამართეს ბიზნესფორუმი, რომლის მიზანიც ორმხრივი ვაჭრობისა და საინვესტიციო თანამშრომლობის გაღრმავება იყო.

უზბეკეთის საინვესტიციო სამინისტროს წინასწარი განცხადებით, ფორუმი გათვალისწინებული იყო როგორც პლატფორმა ჩინეთისა და უზბეკეთის ბიზნესწრეებს შორის პირდაპირი დიალოგისთვის. განხილვის ძირითად თემებს შორის იყო საინვესტიციო პოტენციალი, სამრეწველო თანამშრომლობა და ერთობლივი პროექტების განხორციელებისთვის საჭირო პრაქტიკული ნაბიჯები.

Eurasianet-ის ინფორმაციით, ჩინელმა მენეჯერებმა შეხვედრები გამართეს უზბეკეთის საინვესტიციო სამინისტროს, სოფლის მეურნეობის სამინისტროსა და სავაჭრო-სამრეწველო პალატის წარმომადგენლებთან.

ჩინეთი სამხრეთ კავკასიასა და უზბეკეთში (2 – 8 მარტი) Read More »

ჩინეთი სამხრეთ კავკასიასა და ტაჯიკეთში (9-15 თებერვალი)

კვირის ამბავი / /

საქართველო

საქართველო და ჩინეთი ჯანდაცვის სფეროში თანამშრომლობის გაფართოებას განიხილავენ

9 თებერვალი

9 თებერვალს საქართველოს ელჩი ჩინეთში, პაატა კალანდაძე, ჩინეთის სახალხო რესპუბლიკის ეროვნული ჯანდაცვის კომისარს, ლი მინჯჟუ-ს შეხვდა. შეხვედრა ხაზს უსვამდა ორ ქვეყანას შორის სტრატეგიულ სფეროებში თანამშრომლობის გაძლიერების მიმდინარე ძალისხმევას.

პეკინში გამართულ შეხვედრაზე საქართველო-ჩინეთის სტრატეგიული პარტნიორობის ფარგლებში ჯანდაცვის სფეროში თანამშრომლობის გაღრმავებაზე იმსჯელეს. მხარეებმა განიხილეს საზოგადოებრივი ჯანდაცვის სისტემების გაძლიერების გზები, განსაკუთრებული ყურადღება დაეთმო თანამედროვე ტექნოლოგიების დანერგვასა და ეფექტიანი, შედეგზე ორიენტირებული კოორდინაციის მექანიზმების განვითარებას.

პაატა კალანდაძემ და ლი მინჯჟუ-მ აღნიშნეს ორმხრივ ურთიერთობებში მიღწეული პროგრესი და ხაზი გაუსვეს რეგულარული კომუნიკაციის მნიშვნელობას მიმდინარე და სამომავლო ინიციატივების ხელშეწყობისთვის. ასევე აღინიშნა საჯარო ჯანდაცვის გამოწვევებზე კოორდინირებული რეაგირების აუცილებლობა, გამოცდილების გაზიარებისა და ინოვაციური მიდგომების გამოყენების გზით.

მხარეებმა მზადყოფნა გამოთქვეს თანამშრომლობის არსებული ფორმატების გაღრმავებისა და ჯანდაცვის სფეროში პარტნიორობის გაძლიერების შესახებ.

საქართველო-ჩინეთს შორის სასოფლო-სამეურნეო სფეროში თანამშრომლობის გაღრმავება განიხილეს

10 თებერვალი

10 თებერვალს საქართველოს ელჩმა ჩინეთის სახალხო რესპუბლიკაში, პაატა კალანდაძემ, შეხვედრა გამართა ჩინეთის სოფლის მეურნეობისა და სოფლის საქმეთა სამინისტროს (MARA) წარმომადგენლებთან, სადაც ორ ქვეყანას შორის სოფლის მეურნეობის სფეროში თანამშრომლობის გაღრმავებაზე ისაუბრეს.

შეხვედრის ფარგლებში, MARA-ს საერთაშორისო თანამშრომლობის დეპარტამენტის გენერალურ დირექტორ ვეი ჟენგლინთან გამართული საუბარი 2025 წელს ჩინეთის ბაზარზე ქართული აგროპროდუქციის ექსპორტის სტაბილურ ზრდას დაეთმო. მხარეებმა აღნიშნეს, რომ აღნიშნული ტენდენცია ორმხრივი თავისუფალი ვაჭრობის შეთანხმების ეფექტიან განხორციელებას უკავშირდება.

მოლაპარაკებებისას ჩინურმა მხარემ დადებითად შეაფასა ქართული ღვინის, თხილისა და სხვა სასოფლო-სამეურნეო პროდუქციის ხარისხი და აღნიშნა, რომ ეს პროდუქცია ჩინელ მომხმარებლებს შორის მზარდ პოპულარობას იძენს. გაზრდილი მოთხოვნა, მათი შეფასებით, ორ ქვეყანას შორის სავაჭრო კავშირების გაფართოებასა და ბაზარზე წვდომის გაუმჯობესებას ასახავს.

მომავლის პერსპექტივაზე საუბრისას მხარეებმა გამოთქვეს იმედი, რომ 2026 წელი აგრარულ სექტორში თანამშრომლობის ახალ ეტაპს დაიწყებს, რაც საქართველოს საელჩოსა და MARA-ს შორის უფრო მჭიდრო კომუნიკაციასა და კოორდინაციაზე იქნება დაფუძნებული.

შეხვედრა ჩინეთთან ეკონომიკური კავშირების გაძლიერებისა და საექსპორტო ბაზრების დივერსიფიკაციის მიმართულებით მიმდინარე ძალისხმევის ნაწილია.

პეკინში ქართულ და ჩინურ კომპანიებს შორის ბიზნეს შეხვედრა გაიმართა

11 თებერვალი

2026 წლის 11 თებერვალს, საქართველოს ელჩმა ჩინეთის სახალხო რესპუბლიკაში, პაატა კალანდაძემ, მონაწილეობა მიიღო ღონისძიებაში – ,,მაღალი დონის ბიზნეს დიალოგი ელჩებთან’’. ღონისძიება ორგანიზებული იყო კომპანია Beijing United Information Technology-ის მიერ.

შეხვედრა მიზნად ისახავდა ქართულ და ჩინურ კომპანიებს შორის ბიზნეს კონტაქტების გაძლიერებას და თანამშრომლობის ახალი შესაძლებლობების განხილვას, მათ შორის ციფრული კომერციისა და თანამედროვე ტექნოლოგიების სფეროებში. მონაწილეებმა ასევე იმსჯელეს ორმხრივი ვაჭრობის გაზრდისა და საქართველო-ჩინეთის სტრატეგიული პარტნიორობის ფარგლებში ეკონომიკური კავშირების გაღრმავების გზებზე.

სიტყვით გამოსვლისას საქართველოს ელჩმა ყურადღება გაამახვილა ორ ქვეყანას შორის თავისუფალი ვაჭრობის შეთანხმებაზე, ქართული პროდუქციის საექსპორტო პოტენციალსა და საქართველოში არსებულ ხელსაყრელ ბიზნესგარემოზე. მან ასევე ხაზი გაუსვა იმ მთავარ ფაქტორებს, რომლებიც საქართველოს ინვესტორებისთვის მიმზიდველ ქვეყნად წარმოაჩენს.

Beijing United Information Technology 2002 წელს დაარსდა და წარმოადგენს კომერციული ინფორმაციის მომსახურების ერთ-ერთ წამყვან პლატფორმას ჩინეთში.

საქართველოს ელჩი ჰუავეის ცენტრალური აზიის რეგიონულ ვიცე-პრეზიდენტს შეხვდა

13 თებერვალი

2026 წლის 13 თებერვალს, საქართველოს ელჩმა ჩინეთში, პაატა კალანდაძემ, შეხვედრა გამართა კომპანია Huawei-ის ცენტრალური აზიის რეგიონული პრეზიდენტის მოადგილესთან, სიუ ხაისთან.

მხარეებმა მიმოიხილეს კომპანიასთან თანამშრომლობით უკვე განხორციელებული პროექტები, ისაუბრეს სამომავლო გეგმებზე და ამ მხრივ მჭიდრო კომუნიკაციის გაგრძელებაზე შეთანხმდნენ.

აზერბაიჯანი

აზერბაიჯანის პრეზიდენტი ჩინეთთან სტრატეგიული კავშირების გაღრმავებაზე საუბრობს

16 თებერვალი

აზერბაიჯანის პრეზიდენტმა ილჰამ ალიევმა ჩინეთთან ურთიერთობების გაძლიერებაზე ისაუბრა და აღნიშნა, რომ ორმხრივი თანამშრომლობა ერთობლივი ძალისხმევით მომავალშიც გაფართოვდება. ამის შესახებ ნათქვამია ოფიციალურ განცხადებაში, რომელიც ჩინური გაზაფხულის ფესტივალის აღსანიშნავად გავრცელდა.

6 თებერვლით დათარიღებულ მისალოც წერილში, რომელიც ჩინეთის პრეზიდენტ სი ძინპინს გაეგზავნა, ალიევმა ხაზი გაუსვა ორ ქვეყანას შორის სტრატეგიული პარტნიორობის მდგრად განვითარებას და აღნიშნა, რომ იგი სტაბილურ პოლიტიკურ დიალოგსა და ურთიერთგაგებაზეა დაფუძნებული.

მისი თქმით, აზერბაიჯანსა და ჩინეთს შორის მრავალწლიანი მეგობრული ურთიერთობები და ,,ნაყოფიერი თანამშრომლობა’’ მომავალშიც გაგრძელდება. ალიევმა ასევე აღნიშნა, რომ მთავრობებს შორის მიმდინარე აქტიური კონტაქტები ორმხრივი კავშირების სწრაფი გაძლიერებისთვის ხელსაყრელ პირობებს ქმნის.

აზერბაიჯანის ლიდერის გზავნილი ჩინურ ახალ წელს, ჩუნძიეს, შეეხო, რომელიც მისი შეფასებით მშვიდობის, ჰარმონიის, განახლებისა და ერთიანობის სიმბოლოა. მან ჩინელ ხალხს კეთილდღეობა და წარმატება უსურვა.

ალიევმა ასევე პირადად მიულოცა სი ძინპინს, უსურვა წარმატება სახელმწიფო საქმიანობაში და ჩინეთისთვის ხანგრძლივი მშვიდობა და კეთილდღეობის სურვილი გამოთქვა.

სომხეთი

სომხეთის პრემიერ-მინისტრმა სი ძინპინსა და ლი ციანს ჩინური ახალი წელი მიულოცა

16 თებერვალი

სომხეთის პრემიერ-მინისტრმა ნიკოლ ფაშინიანმა ჩინეთის პრეზიდენტს სი ძინპინსა და სახელმწიფო საბჭოს თავმჯდომარეს, პრემიერ ლი ქიანგს ჩინური ახალი წელი, იგივე გაზაფხულის ფესტივალი მიულოცა.

პრემიერის ოფისის მიერ გავრცელებული განცხადების თანახმად, ფაშინიანმა ჩინეთის ხელმძღვანელობასა და ხალხს მილოცვა და კეთილი სურვილები გადასცა და ხაზი გაუსვა დღესასწაულის კულტურულ და სიმბოლურ მნიშვნელობას.

სი ძინპინისთვის გაგზავნილ წერილში ფაშინიანმა იმედი გამოთქვა, რომ ტრადიციული დღესასწაული ჩინურ ოჯახებს ჯანმრთელობას, წარმატებასა და სიხარულს მოუტანს. მან გაზაფხულის ფესტივალი ფართოდ აღიარებულ ოჯახურ დღესასწაულად დაახასიათა და ,,მეგობარ ჩინელ ხალხს’’ მშვიდობა და კეთილდღეობა უსურვა.

სომხეთის პრემიერ-მინისტრმა აღნიშნა, რომ სომხეთსა და ჩინეთს შორის ურთიერთობები მრავალწლოვან მეგობრულ კავშირებსა და ურთიერთნდობაზეა დაფუძნებული. მან დაადასტურა ერევნის მზადყოფნა ორმხრივი თანამშრომლობის გაღრმავებისკენ და აღნიშნა, რომ ურთიერთობების შემდგომი განვითარება სტრატეგიული პარტნიორობის ჩარჩოს ახალ ინიციატივებს შესძენს.

საბოლოოდ, ფაშინიანმა იმედი გამოთქვა, რომ ორმხრივი თანამშრომლობა მომავალშიც ახალ შედეგებს მოიტანს.

ტაჯიკეთი

ტაჯიკეთის პრეზიდენტი AIIB-ის ხელმძღვანელს შეხვდა

14 თებერვალი

14 თებერვალს, პრეზიდენტმა ემომალი რაჰმონმა დუშანბეში შეხვედრა გამართა აზიის ინფრასტრუქტურული ინვესტიციების ბანკის (AIIB) პრეზიდენტთან, ცზოუ ძიაისთან. მოლაპარაკებები მიმდინარე ინფრასტრუქტურულ პროექტებსა და ფინანსური თანამშრომლობის გაფართოების პერსპექტივებს შეეხო.

ტაჯიკეთის პრეზიდენტმა ცზოუ ძიაის ახალ თანამდებობაზე დანიშვნა მიულოცა და ხაზი გასუვა მის პირველ ოფიციალურ ვიზიტს ქვეყანაში. შეხვედრის ძირითადი საკითხი ტაჯიკეთსა და პეკინში დაფუძნებულ აზიის ინფრასტრუქტურული ინვესტიციების ბანკს შორის თანამშრომლობის მიმდინარე მდგომარეობა იყო. პრეზიდენტმა აღნიშნა AIIB-ის მნიშვნელობა ქვეყნის სოციალურ-ეკონომიკური განვითარების პრიორიტეტების განხორციელებაში.

ტაჯიკური მხარის ინფორმაციით, AIIB ტაჯიკეთის ერთ-ერთ მნიშვნელოვან პარტნიორად რჩება, განსაკუთრებით ინფრასტრუქტურის მოდერნიზებისა და მდგრადი განვითარების, მათ შორის ,,მწვანე ეკონომიკის’’ მიმართულებით.

განსაკუთრებული ყურადღება დაეთმო ენერგეტიკულ პროექტებს, კერძოდ, როგუნის ჰიდროელექტროსადგურის მშენებლობასა და ნურეკის ჰესის რეაბილიტაციას. ორივე პროექტი ქვეყნის გრძელვადიანი ენერგეტიკული სტრატეგიისა და საექსპორტო გეგმების მნიშვნელოვანი ნაწილია.

მხარეებმა ასევე განიხილეს თანამშრომლობის შესაძლებლობები სატრანსპორტო და ურბანულ ინფრასტრუქტურაში, წყლის რესურსების მართვაში, კლიმატის ცვლილებასთან ადაპტაციაში, ციფრულ ტრანსფორმაციასა და ენერგოეფექტიანობის ზრდაში.

შეხვედრის ბოლოს მხარეებმა გრძელვადიანი დაფინანსებისა და პროექტების ეფექტიანი განხორციელების მნიშვნელობა აღნიშნეს და დაადასტურეს მზადყოფნა თანამშრომლობის გაღრმავებისთვის. მათი თქმით, მიღწეული შეთანხმებები ტაჯიკეთსა და AIIB-ს შორის სტრატეგიულ პარტნიორობას გააძლიერებს.

ჩინეთი სამხრეთ კავკასიასა და ტაჯიკეთში (9-15 თებერვალი) Read More »

ჩინეთი სამხრეთ კავკასიასა და უზბეკეთში (02.02- 08.02)

კვირის ამბავი / /

საქართველო

საქართველოს ელჩის შეხვედრა North Star Sinogold-ის ხელმძღვანელთან

3 თებერვალი

3 თებერვალს, საქართველოს ელჩმა ჩინეთის სახალხო რესპუბლიკაში, პაატა კალანდაძემ, შეხვედრა გამართა კომპანიის North Star Sinogold გენერალურ დირექტორთან, მენ ჰაიძუნთან.

შეხვედრის ფარგლებში მხარეებმა განიხილეს საქართველო-ჩინეთის პარტნიორობის გაღრმავების პერსპექტივები საერთაშორისო მიწოდების ჯაჭვების განვითარებისა და პორტული ლოგისტიკის მიმართულებით. ასევე გამოთქვეს მზადყოფნა აღნიშნულ საკითხებზე მჭიდრო კომუნიკაციის გაგრძელების შესახებ.

North Star Sinogold სახელმწიფო საკუთრებაში მყოფი კომპანიაა, რომელიც საერთაშორისო

გამოფენებსა და კონფერენციებს ორგანიზებს ლოგისტიკის, ვაჭრობისა და მიწოდების

ჯაჭვების განვითარების სფეროში.

წყარო: Embassy of Georgia to the People`s Republic of China

ჩინელი ტურისტების ინტერესი სამედიცინო სერვისების მიმართ იზრდება

5 თებერვალი

Bm.ge-ის ინფორმაციით, საქართველოში ჩინელი ტურისტების მხრიდან რეპროდუქციული სამედიცინო მომსახურების მიმართ მზარდი ინტერესი ფიქსირდება. ამის შესახებ განაცხადა თათია მამრიკიშვილმა, საინვესტიციო კომპანიის Galt & Taggart კვლევითი დეპარტამენტის სექტორის ხელმძღვანელმა.

მამრიკიშვილის თქმით, ბოლო პერიოდში ჩინეთიდან ჩამოსული ვიზიტორების ნაწილი საქართველოს არა მხოლოდ ტურისტული მიზნებით, არამედ სამედიცინო მომსახურების, მათ შორის რეპროდუქციული და ფერტილობის სერვისების მისაღებადაც ირჩევს. ექსპერტთა შეფასებით, აღნიშნული ტენდენცია ქვეყანაში სამედიცინო ტურიზმის ახალი მიმართულების განვითარებას უწყობს ხელს.

მამრიკიშვილის განცხადებით, აზიური ბაზრების, განსაკუთრებით ჩინეთის გააქტიურება, მნიშვნელოვნად უწყობს ხელს ტურიზმის სექტორის დივერსიფიკაციას, ხოლო თანამედროვე

სამედიცინო ინფრასტრუქტურა და შედარებით ხელმისაწვდომი მომსახურება საქართველოს ამ მიმართულებით კონკურენტულ უპირატესობას ანიჭებს.

წყარო: bm.ge

აზერბაიჯანი

ბაქო ჩინეთ-ტაივანის საკითხში პეკინის პოზიციას უჭერს მხარს

4 თებერვალი

აზერბაიჯანის საგარეო საქმეთა მინისტრმა ჯეიჰუნ ბაირამოვმა 4 თებერვალს ჩინურ გამოცემა Global Times-თან გამოქვეყნებულ ინტერვიუში ჩინეთსა და აზერბაიჯანს შორის ურთიერთობებზე ისაუბრა.

მინისტრის განცხადებით, აზერბაიჯანის საგარეო პოლიტიკაში განსაკუთრებული ადგილი უკავია ჩინეთთან სტრატეგიული პარტნიორობის გაღრმავებას.

ინტერვიუში ბაირამოვმა ყურადღება გაამახვილა ჩინეთ-ტაივანის საკითხზეც და განაცხადა, რომ აზერბაიჯანი ცალსახად უჭერს მხარს პრინციპს ,,ერთი ჩინეთი’’.

მინისტრის თქმით, აზერბაიჯანის პოზიცია ტაივანის საკითხზე მკაფიო, თანმიმდევრული და საერთაშორისო სამართლის ფუნდამენტურ პრინციპებზეა დაფუძნებული.

,,აზერბაიჯანი არ აღიარებს ტაივანის დამოუკიდებლობას. ვიყავით ერთ-ერთი პირველი ქვეყანა, რომელმაც გააკრიტიკა ტაივანში 2024 წლის იანვარში ჩატარებული არჩევნები’’, – აღნიშნა ბაირამოვმა.

მინისტრის შეფასებით, სტატუს-კვოს ცვლილებისკენ მიმართული ნებისმიერი მცდელობა, მათ შორის პროვოკაციული ქმედებები და თვითნებური საგარეო პოლიტიკური ნაბიჯები, ზრდის რეგიონული დაძაბულობისა და კონფლიქტის რისკებს და არღვევს საერთაშორისო ურთიერთობებში სტაბილურობას.

ბაირამოვის განცხადებით, ტაივანის საკითხში ჩინეთის მხარდაჭერა გამოხატავს აზერბაიჯანის ერთგულებას სახელმწიფოების სუვერენიტეტისა და ტერიტორიული მთლიანობის პრინციპებისადმი, რაც ბაქოს საგარეო პოლიტიკის ერთ-ერთ ფუნდამენტად რჩება.

ინტერვიუში მინისტრმა ასევე აღნიშნა, რომ აზერბაიჯანი ჩინეთთან ურთიერთობებს გრძელვადიან და სტრატეგიულ ჭრილში განიხილავს. მისი თქმით, ორი ქვეყნის თანამშრომლობა ეფუძნება მაღალი დონის პოლიტიკურ ნდობასა და ლიდერებს შორის ჩამოყალიბებულ სტაბილურ დიალოგს. აღნიშნული განცხადებები უკავშირდება ბაირამოვის 28-29 იანვარს პეკინში გამართულ შეხვედრას ჩინეთის საგარეო საქმეთა მინისტრ ვანგ ი-თან.

მინისტრის შეფასებით, ბაქო-პეკინის პარტნიორობა განსაკუთრებულ მნიშვნელობას იძენს ტრანსპორტისა და ლოგისტიკის სფეროში, თუმცა პარალელურად ყურადღება ეთმობა კულტურულ, საგანმანათლებლო და ტურისტულ გაცვლებსაც, რაც ორმხრივ ურთიერთობებს დამატებით სიღრმეს სძენს.

წყარო: Global Times

სომხეთი

ჩინეთის ელჩი სომხეთში სომხეთ-ჩინეთის თანამშრომლობის გაღრმავებაზე საუბრობს

6 თებერვალი

ჩინეთის ელჩი სომხეთში, ლი სინვეი, 6 თებერვალს ერევანში, ჩინეთის საელჩოში გამართულ ჩინური ახალი წლის – გაზაფხულის ფესტივალისადმი მიძღვნილ ოფიციალურ მიღებაზე სიტყვით გამოვიდა.

ელჩმა სომხეთ-ჩინეთის თანამშრომლობის გაღრმავებაზე ისაუბრა და აღნიშნა, რომ ორ ქვეყანას შორის ურთიერთობები ,,განვითარების ახალ ეტაპზე’’ გადავიდა.

,,ბოლო ერთი წლის განმავლობაში სომხეთმა და ჩინეთმა პრაქტიკულ მიმართულებებში თანამშრომლობა საგრძნობლად გააღრმავეს,’’- აღნიშნა მან და დასძინა, რომ ორმხრივი ურთიერთობები აღარ შემოიფარგლება მხოლოდ დიპლომატიური კონტაქტებით და მოიცავს ინფრასტრუქტურულ, ბიზნესსა და სოციალურ პროექტებსაც.

სიტყვით გამოსვლისას ლი სინვეიმ ხაზი გაუსვა სომხეთის პრემიერ-მინისტრის ნიკოლ ფაშინიანის გასულ წელს ჩინეთში ვიზიტს და განაცხადა, რომ თიენძინში შანხაის თანამშრომლობის ორგანიზაციის სამიტის ფარგლებში სი ძინპინთან შეხვედრის შედეგად სომხეთსა და ჩინეთს შორის სტრატეგიული პარტნიორობა გამოცხადდა.

ჩინეთის ელჩმა ასევე ისაუბრა ერთობლივ ინფრასტრუქტურულ და ენერგეტიკულ პროექტებზე, მათ შორის ჩრდილოეთ-სამხრეთის ავტომაგისტრალსა და მზის ენერგეტიკულ სადგურებზე, ასევე საზოგადოებრივი მაუწყებლის ახალი პავილიონის მშენებლობაზე.

მისი თქმით, გაიზარდა ფრენების სიხშირე ურუმჩი-ერევნის მიმართულებით, ხოლო ჩინეთიდან სომხეთში ტურისტების რაოდენობა დაახლოებით 40 პროცენტით გაიზარდა.

ღონისძიება ჩინური ახალი წლისადმი მიძღვნილი კულტურული პროგრამით დასრულდა.

წყარო: Armenpress.am

უზბეკეთი

უზბეკეთი და ჩინეთი შახრიხანის ჰესების კასკადის მოდერნიზაციაზე შეთანხმდნენ

5 თებერვალი

უზბეკეთმა და ჩინეთმა ხელი მოაწერეს შეთანხმებებს შახრიხანის ჰესების კასკადის მოდერნიზაციის შესახებ. დოკუმენტები 5 თებერვალს გაფორმდა.

შეთანხმების ფარგლებში, უზბეკეთის სახელმწიფო კომპანია Uzbekhydroenergo და ჩინური საინჟინრო კომპანია Sinohydro განახორციელებენ რეკონსტრუქციასა და ტექნიკურ განახლებას, რაც პროექტირებას, მშენებლობას, აღჭურვილობის მიწოდებასა და ექსპლუატაციაში გაშვებას მოიცავს.

პროექტის დასრულების შემდეგ, რეკონსტრუირებული ორი სადგურის ჯამური სიმძლავრე გაიზრდება, ხოლო წლიური ელექტროენერგიის გამომუშავება 13 ათასზე მეტი ოჯახის ელექტროენერგიით უზრუნველყოფის საშუალებას მისცემს.

მოდერნიზაცია წლიურად დაახლოებით 11 მილიონი კუბური მეტრი ბუნებრივი აირისა და 27.5 ათასი ტონა ქვანახშირის დაზოგვას უზრუნველყოფს და მიზნად ისახავს ენერგოეფექტიანობის გაუმჯობესებასა და ეკოლოგიურად სუფთა ენერგიის წარმოების ზრდას.

უზბეკეთის ოფიციალური უწყებების შეფასებით, ინიციატივა გააძლიერებს ქვეყნის ენერგეტიკულ უსაფრთხოებას და გააღრმავებს უზბეკეთ-ჩინეთის თანამშრომლობას სტრატეგიულ სექტორებში, მათ შორის ენერგეტიკისა და ინფრასტრუქტურის მიმართულებით.

წყარო: Yuz.uz

ჩინეთი სამხრეთ კავკასიასა და უზბეკეთში (02.02- 08.02) Read More »

ჩინეთი სამხრეთ კავკასიასა და ტაჯიკეთში (26.01-01.02)

კვირის ამბავი / /

საქართველო

საქართველოს ელჩის შეხვედრა ჩინეთის საბაჟო ადმინისტრაციაში

28 იანვარი

2026 წლის 28 იანვარს საქართველოს ელჩმა ჩინეთში, პაატა კალანდაძემ, სამუშაო შეხვედრა გამართა ჩინეთის სახალხო რესპუბლიკის საბაჟო ადმინისტრაციის საერთაშორისო დეპარტამენტის გენერალური დირექტორის მოადგილესთან, იუ სიანტაოსთან.

შეხვედრაზე მხარეებმა საქართველო-ჩინეთის სავაჭრო ურთიერთობების მიმდინარე დინამიკა განიხილეს. ელჩმა განსაკუთრებული ყურადღება გაამახვილა 2025 წლის ნოემბერში ხელმოწერილი განახლებული თავისუფალი ვაჭრობის შეთანხმების პრაქტიკულ განხორციელებაზე, რომელიც ქმნის მყარ საფუძველს ქართული პროდუქციისთვის ჩინეთის ფართო ბაზარზე წვდომის გაფართოებისა და სავაჭრო ბარიერების შემცირებისთვის.

განხილვის ერთ-ერთი მთავარი თემა იყო საბაჟო პროცედურების ციფრული ტრანსფორმაცია და ორ ქვეყანას შორის ტვირთბრუნვის ეფექტიანობის გაზრდა. მხარეებმა იმსჯელეს მექანიზმებზე, რომლებიც მიზნად ისახავს ქართული საექსპორტო პროდუქციის სერტიფიცირების და საბაჟო გაფორმების პროცესების დამატებით გამარტივებას.

შეხვედრის მიზანს წარმოადგენდა ორი ქვეყნის სტრატეგიული პარტნიორობის ფარგლებში ეკონომიკური კავშირების გაძლიერება და საბაჟო ადმინისტრირების ოპტიმიზაცია. შეხვედრის დასასრულს მხარეები შეთანხმდნენ მჭიდრო თანამშრომლობის გაგრძელებაზე.

წყარო: Embassy of Georgia to the People’s Republic of China

აზერბაიჯანი

აზერბაიჯანისა და ჩინეთის საგარეო საქმეთა მინისტრებმა პეკინში მოლაპარაკებები გამართეს

28 იანვარი

28 იანვარს აზერბაიჯანისა და ჩინეთის საგარეო საქმეთა მინისტრებმა პეკინში გაფართოებული ფორმატის მოლაპარაკებები გამართეს, რომლის მიზანიც ორმხრივი ურთიერთობების გაძლიერება იყო.

აზერბაიჯანის საგარეო საქმეთა მინისტრმა ჯეიჰუნ ბაირამოვმა და ჩინეთის საგარეო საქმეთა მინისტრმა ვან იიმ ბაქოსა და პეკინს შორის სტრატეგიული პარტნიორობის მიმდინარე მდგომარეობა და სამომავლო პერსპექტივები განიხილეს. მოლაპარაკებებისას ყურადღება დაეთმო პოლიტიკური დიალოგის გაძლიერებასა და დიპლომატიურ უწყებებს შორის რეგულარული კონტაქტების მნიშვნელობას.

დისკუსიების ფარგლებში მინისტრებმა ისაუბრეს ეკონომიკური და სავაჭრო თანამშრომლობის გაღრმავებაზე, საინვესტიციო შესაძლებლობების გაფართოებაზე, სატრანსპორტო კავშირების განვითარებასა და თანამშრომლობის გაძლიერებაზე ენერგეტიკის, ინოვაციებისა და ციფრული განვითარების სფეროებში. ასევე, მხარეებმა იმსჯელეს მნიშვნელოვან რეგიონულ და საერთაშორისო საკითხებზე და ხაზი გაუსვეს მრავალმხრივი მიმართულებით თანამშრომლობის მნიშვნელობას.

შეხვედრის შემდეგ სოციალურ ქსელში გამოქვეყნებულ განცხადებაში ბაირამოვმა აღნიშნა, რომ აზერბაიჯანი და ჩინეთი განაგრძობენ სტრატეგიული პარტნიორობის გაღრმავებას, ხოლო ორივე მხარემ გამოხატა რწმენა, რომ ვიზიტი და მოლაპარაკებები ხელს შეუწყობს ორმხრივი ურთიერთობის გაძლიერებასა და თანამშრომლობის გაფართოებას სხვადასხვა მიმართულებით.

წყარო: Report.az

ჯეიჰუნ ბაირამოვი ჩინეთის კომუნისტური პარტიის მუზეუმს ეწვია

28 იანვარი

28 იანვარს აზერბაიჯანის საგარეო საქმეთა მინისტრი ჯეიჰუნ ბაირამოვი ჩინეთის სახალხო რესპუბლიკაში ოფიციალური ვიზიტის ფარგლებში ჩინეთის კომუნისტური პარტიის მუზეუმს ეწვია.

საგარეო საქმეთა სამინისტროს ინფორმაციით, მუზეუმი ასახავს იმ ისტორიულ პერიოდსა და მმართველობით გამოცდილებას, რომლებმაც ჩინეთის თანამედროვე განვითარება განსაზღვრა. ვიზიტის დროს ბაირამოვმა მუზეუმის სტუმართა წიგნში ჩანაწერი გააკეთა და ხაზი გაუსვა აზერბაიჯანსა და ჩინეთს შორის სტრატეგიული პარტნიორობის ფარგლებში თანამშრომლობის გაღრმავების მნიშვნელობას.

სოციალურ ქსელ X-ზე გამოქვეყნებულ პოსტში ბაირამოვმა ვიზიტი „დიდ პატივად“ შეაფასა და აღნიშნა, რომ მუზეუმი თვალსაჩინოდ ასახავს ჩინელი ხალხის მდიდარ ისტორიას, ხედვასა და მიღწევებს, ასევე იძლევა წარმოდგენას ჩინეთის განვითარების გზასა და ეროვნული აღორძინების პროცესზე. „გმადლობთ შესანიშნავი ექსკურსიისთვის!“ – დაწერა მან.

ჩინეთის კომუნისტური პარტიის მუზეუმი, რომელიც პეკინის ჩაოიანის რაიონში მდებარეობს, ასახავს ჩინეთის კომუნისტური პარტიის ისტორიას და მისი ხელმძღვანელობის როლს ქვეყნის პოლიტიკური და სოციალური განვითარების ფორმირებაში.

წყარო: Report.az

SOCAR და ჩინური კომპანია ერთობლივი საწარმოების შექმნას განიხილავენ

28 იანვარი

აზერბაიჯანის სახელმწიფო ნავთობკომპანია SOCAR და ჩინური კომპანია CITIC Construction Co., Ltd. ენერგეტიკული ინფრასტრუქტურისა და ნავთოქიმიური პროექტების განხორციელების შესაძლებლობებს, მათ შორის ერთობლივი საწარმოების შექმნას განიხილავენ.

Report-ის ინფორმაციით, შეხვედრაზე საკითხები განიხილეს SOCAR-ის პრეზიდენტმა როვშან ნაჯაფმა და CITIC Construction-ის თავმჯდომარემ იანგ ძიანციანგმა.

მხარეებმა მიმოიხილეს SOCAR-სა და ჩინურ კომპანიებს შორის არსებული თანამშრომლობის გამოცდილება, ასევე იმსჯელეს SOCAR-ის მიმდინარე პროექტებსა და კომპანიის სტრატეგიულ მიზნებზე, როგორც აზერბაიჯანში, ისე მის ფარგლებს გარეთ.

შეხვედრის ბოლოს მხარეებმა ხელი მოაწერეს შეთანხმებას, რომელიც თანამშრომლობის პოტენციური მიმართულებების შესწავლას ითვალისწინებს.

წყარო: Report.az

ბაქოს მეტროპოლიტენი ჩინურ კომპანიასთან დიფერენცირებულ ტარიფებს განიხილავს

 30 იანვარი

2026 წლის 30 იანვარს ჰონგკონგში „ბაქოს მეტროპოლიტენსა“ და ჩინურ კომპანია Octopus Holdings Limited შორის შეხვედრა გაიმართა, რომელიც საზოგადოებრივ ტრანსპორტში დიფერენცირებული ტარიფების შესაძლო დანერგვას ეხებოდა.

ბაქოს დელეგაციას ხელმძღვანელობდა „ბაქო მეტროპოლიტენის“ სამეთვალყურეო საბჭოს თავმჯდომარე ვუსალ ასლანოვი. შეხვედრის დროს მან და Octopus-ის წარმომადგენლებმა, მათ შორის კომპანიის აღმასრულებელმა დირექტორმა ტიმ იინმა და სატრანსპორტო მიმართულების ხელმძღვანელმა ნორა ტანგმა, იმსჯელეს მგზავრობის საფასურის სტრუქტურის მოდერნიზაციისა და გადახდის თანამედროვე ტექნოლოგიების დანერგვის შესაძლებლობებზე.

მხარეებმა განიხილეს ტარიფების პოლიტიკის საერთაშორისო პრაქტიკა, მათ შორის საფეხუროვანი ფასები, ასევე ციფრული გადახდის სისტემები, რომლებიც მგზავრობის გამარტივებასა და ტრანსპორტის ინტეგრაციას ისახავს მიზნად.

Octopus-მა, რომლის უკონტაქტო გადახდის სისტემა ფართოდ გამოიყენება ისეთ ქალაქებში, როგორიცაა ჰონგკონგი, ამსტერდამი და სინგაპური, ბაქოს მხარეს გაუზიარა გამოცდილება „ჭკვიანი გადახდის“ პლატფორმების მიმართულებით, რომლებიც მობილურ გადახდებსა და ღია სისტემების ინტეგრაციას მოიცავს.

ამ ეტაპზე ბაქოში დიფერენცირებული ტარიფების სისტემის დანერგვასთან დაკავშირებით საბოლოო გადაწყვეტილება მიღებული არ არის, თუმცა გამართული მოლაპარაკებები მიუთითებს „ბაქოს მეტროპოლიტენის“ ინტერესზე, შეისწავლოს ინოვაციური და უფრო სამართლიანი ფასების მექანიზმები მგზავრებისთვის.

წყარო: Report.az

სომხეთი

პეკინში „ხაჩატურიანის მეორე საერთაშორისო ახალგაზრდული კონკურსი“ იწყება

26 იანვარი

26 იანვარს პეკინში, ჩინეთის ეროვნული ოპერის თეატრში გაიმართა „ხაჩატურიანის მეორე საერთაშორისო ახალგაზრდული კონკურსის“ პრესკონფერენცია, სადაც განაცხადეს, რომ კონკურსი 2026 წლის ნოემბერში პეკინში ჩატარდება.

ღონისძიებას ესწრებოდნენ ხაჩატურიანის კულტურული ფონდის თავმჯდომარე მარტინ თოვმასიანი, ჩინეთის ეროვნული ოპერის თეატრის პრეზიდენტი და სამხატვრო ხელმძღვანელი ლიუ იუნჯი, ჩინეთში სომხეთის რესპუბლიკის საელჩოს მეორე მდივანი მისაკ ბალაიანი და Jingshe International Cultural and Educational Group-ის წარმომადგენლები.

2023 წლიდან ჩინეთში ხაჩატურიანის საერთაშორისო კონკურსი ტარდება ხაჩატურიანის კულტურული ფონდის მიერ სომხეთის განათლების, მეცნიერების, კულტურისა და სპორტის სამინისტროსა და პარტნიორ ორგანიზაციებთან თანამშრომლობით.

2026 წლის კონკურსი გაიმართება გაფართოებულ ფორმატში, საკვალიფიკაციო ტურებით მსოფლიოს სხვადასხვა რეგიონში, ონლაინ ხმის მიცემითა და „მაყურებლის პრიზით“. ფინალური ეტაპი ნოემბერში პეკინში ჩატარდება პეკინის ეროვნული ოპერის თეატრისა და სომხეთის სახელმწიფო სიმფონიური ორკესტრების მონაწილეობით, დირიჟორ სერგეი სმბატიანის ხელმძღვანელობით.

წყარო: Embassy of Armenia to China

პეკინში სომხეთის შეიარაღებული ძალების 34-ე წლისთავისადმი მიძღვნილი ოფიციალური მიღება გაიმართა

30 იანვარი

30 იანვარს ჩინეთში სომხეთის რესპუბლიკის საელჩომ პეკინში ოფიციალური მიღება გამართა სომხეთის შეიარაღებული ძალების ჩამოყალიბების 34-ე წლისთავის აღსანიშნავად.

ღონისძიებას ესწრებოდნენ პეკინში აკრედიტებული სხვადასხვა ქვეყნის სამხედრო ატაშეები და წარმომადგენლები, ასევე ჩინეთში მცხოვრები და სწავლის მსურველი სომხეთის მოქალაქეები.

ჩინური მხარისგან საპატიო სტუმრის სტატუსით ღონისძიებას დაესწრო სახალხო-განმათავისუფლებელი არმიის გენერალი ლიუ ჩჟუნბინი, ეროვნული თავდაცვის უნივერსიტეტთან არსებული თავდაცვის კვლევების საერთაშორისო ინსტიტუტის ხელმძღვანელი.

ღონისძიების გახსნისას ჩინეთში სომხეთის სამხედრო ატაშემ გიორგი ნალბანდიანმა ხაზი გაუსვა დღის მნიშვნელობას და აღნიშნა სომხეთის შეიარაღებული ძალების როლი სომხური სახელმწიფოებრიობის ჩამოყალიბებასა და გაძლიერებაში.

მისასალმებელ სიტყვაში ჩინეთში სომხეთის ელჩმა ვაჰე გევორგიანმა აღნიშნა სომხეთის ძალისხმევა რეგიონული მშვიდობისა და უსაფრთხოების განმტკიცებისკენ, მან ასევე ისაუბრა მეზობელ ქვეყნებთან ურთიერთობების ნორმალიზაციასა და სომხეთ-ჩინეთის სტრატეგიული პარტნიორობის გაღრმავების მნიშვნელობაზე.

წყარო: Embassy of Armenia to China

ტაჯიკეთი

ტაჯიკეთი ჩინეთთან ავიარეისების გაფართოებას განიხილავს

26 იანვარი

ტაჯიკეთი განიხილავს ჩინეთის Commercial Aircraft Corporation of China (COMAC)-ის მიერ წარმოებული თვითმფრინავების შეძენას და ჩინეთის დამატებით ქალაქებთან პირდაპირი ავიამიმოსვლის გაფართოებას. ამის შესახებ 26 იანვარს გამართული მოლაპარაკებების შემდეგ გახდა ცნობილი.

შეხვედრა გაიმართა ტაჯიკეთის სამოქალაქო ავიაციის სააგენტოს დირექტორსა და COMAC-ის წარმომადგენლებს შორის, ასევე ჩინურ ავიაკომპანია Chengdu Airlines-თან. მხარეებმა ავიაციაში თანამშრომლობის პერსპექტივები განიხილეს, მათ შორის ავიაპარკის განახლება და ტაჯიკეთსა და ჩინეთს შორის ახალი ავიამარშრუტების გახსნა.

ოფიციალური პირების განცხადებით, ინიციატივის მიზანია ორმხრივი ურთიერთობების გაძლიერება და ორივე ქვეყნის სამოქალაქო ავიაციის განვითარების ხელშეწყობა.

ამჟამად Chengdu Airlines კვირაში ერთხელ ასრულებს რეისს მარშრუტზე ხუჯანდი-კაშგარი-ხუჯანდი. ავიაკომპანია ჩინეთის სხვა ქალაქების მიმართულებით ფრენების გაფართოებას გეგმავს, რაც ტაჯიკურ მხარესთან უფრო ფართო თანამშრომლობის ნაწილია.

გამართული მოლაპარაკებები ტაჯიკეთის ინტერესს ასახავს ავიაციური პარტნიორებისა და რეგიონული კავშირის გაუმჯობესების მიმართულებით.

წყარო: Khovar.tj

ჩინეთი სამხრეთ კავკასიასა და ტაჯიკეთში (26.01-01.02) Read More »

ჩინეთი სამხრეთ კავკასიასა და ყირგიზეთში (19-25 იანვარი)

კვირის ამბავი / /

საქართველო

საქართველოს ელჩი ჩინეთში ჩინეთ-ევროპის ტექნიკური და ეკონომიკური თანამშრომლობის ასოციაციის ხელმძღვანელობას შეხვდა

20 იანვარი

2026 წლის 20 იანვარს პეკინში საქართველოს ელჩმა ჩინეთის სახალხო რესპუბლიკაში პაატა კალანდაძემ სამუშაო შეხვედრა გამართა ჩინეთ-ევროპის ტექნიკური და ეკონომიკური თანამშრომლობის ასოციაციის (CEATEC) აღმასრულებელ ვიცე-პრეზიდენტსა და გენერალურ მდივანთან, ლუ მეიჟენთან.

შეხვედრის ფარგლებში მხარეებმა იმსჯელეს საქართველო-ჩინეთს შორის თანამშრომლობის გაღრმავების შესაძლებლობებზე მაღალტექნოლოგიური და განახლებადი ენერგიის სფეროებში. განხილვის მთავარი თემები იყო ქარის, მზის, წყალბადის და ენერგიის შენახვის ტექნოლოგიები და ის მიმართულებები, სადაც CEATEC აქტიურად მუშაობს.

ელჩმა პაატა კალანდაძემ ყურადღება გაამახვილა საქართველოს ხელსაყრელ საინვესტიციო გარემოზე და ხაზი გაუსვა ქვეყნის პოტენციალს „მწვანე ენერგიის“ მიმართულებით. მან ასევე აღნიშნა საქართველოს ინტერესი, ენერგეტიკული სექტორის მოდერნიზაციის მიზნით, ჩინური ინოვაციური ტექნოლოგიების დანერგვაზე.

ლუ მეიჟენმა დაადასტურა მზადყოფნა საქართველოსთან აქტიური თანამშრომლობისთვის და აღნიშნა, რომ CEATEC მზად არის ხელი შეუწყოს წამყვანი ჩინური ტექნოლოგიური კომპანიების ინტერესის ზრდას საქართველოს ენერგეტიკულ ბაზარზე.

შეხვედრის დასასრულს მხარეები შეთანხმდნენ მჭიდრო კოორდინაციის გაგრძელებაზე, მათ შორის ერთობლივი ეკონომიკური ფორუმებისა და თემატური სემინარების ორგანიზებაზე.

წყარო: EMBASSY OF GEORGIA TO THE PEOPLE`S REPUBLIC OF CHINA

აზერბაიჯანი

აზერბაიჯანი და ჩინური კომპანიები ალუმინის ერთობლივ წარმოებაზე მსჯელობენ

19 იანვარი

აზერბაიჯანის მთავრობამ და ჩინურმა კომპანიებმა, Wanji-მა და Sunstone-მ, ალუმინის წარმოების სფეროში ერთობლივი პროექტების განხორციელებისა და ორმხრივი თანამშრომლობის გაფართოების შესაძლებლობები განიხილეს.

აზერბაიჯანის ეკონომიკის სამინისტროს ინფორმაციით, აზერბაიჯანის ეკონომიკის მინისტრის მოადგილე სამად ბაშირლი ჩინური კომპანიების ხელმძღვანელებს შეხვდა.

კომპანიების წარმომადგენლებს გააცნეს აზერბაიჯანში არსებული ხელსაყრელი საინვესტიციო გარემო, ინდუსტრიულ ზონებში შექმნილი ინფრასტრუქტურა, აგრეთვე ინვესტორებისთვის გათვალისწინებული სტიმულები და მხარდაჭერის მექანიზმები.

შეხვედრაზე აღინიშნა, რომ აზერბაიჯანი განსაკუთრებულ მნიშვნელობას ანიჭებს ინდუსტრიულ და ტექნოლოგიაზე ორიენტირებული პროექტების განხორციელებას და დაინტერესებულია უცხოელ ინვესტორებთან გრძელვადიანი თანამშრომლობის განვითარებით.

მოლაპარაკებების მთავარი აქცენტი გაკეთდა ურთიერთთანამშრომლობის გაფართოებასა და ალუმინის წარმოების სფეროში ერთობლივი პროექტების განხორციელების შესაძლებლობებზე.

Wanji ერთ-ერთი ჩინური კომპანიაა, რომელიც სპეციალიზდება ინდუსტრიის, ტრანსპორტისა და ტექნოლოგიური გადაწყვეტილებების მიმართულებით. კომპანია მუშაობს ინოვაციური პროდუქტებისა და სერვისების განვითარებაზე, წარმოების ეფექტიანობის გაუმჯობესებასა და საერთაშორისო ბაზრებზე თანამშრომლობის გაფართოებაზე.

Sunstone კი დაკავებულია ალუმინის ინდუსტრიისთვის განკუთვნილი ნახშირბადოვანი მასალების (წინასწარ გამომწვარი ანოდების) კვლევით, წარმოებითა და რეალიზაციით და ამ ეტაპზე წარმოადგენს ჩინეთის ერთ-ერთ წამყვან ექსპორტიორს აღნიშნულ სფეროში.

წყარო: Report.az

აკშინ ალიევი: აზერბაიჯანული ენის ჩინეთში სწავლება საპატიო მისიაა

19 იანვარი

აზერბაიჯანული ენის ჩინეთში სწავლება საპატიო და მნიშვნელოვანი მისიაა, განაცხადა აზერბაიჯანელმა მეცნიერმა და ჩინური ენისა და ლიტერატურის სპეციალისტმა აქშინ ალიევმა.

ალიევმა ეს განცხადება აზერბაიჯანსა და ჩინეთს შორის კულტურული და საგანმანათლებლო თანამშრომლობის გაფართოების კონტექსტში გააკეთა, მათ შორის იმ ინიციატივების ფარგლებში, რომლებიც ჩინეთის საგანმანათლებლო დაწესებულებებში აზერბაიჯანული ენის სწავლასა და პოპულარიზაციას ისახავს მიზნად. მისი თქმით, ენის სწავლება მნიშვნელოვან როლს ასრულებს ორმხრივი კავშირების გაძლიერებასა და ურთიერთგაგების ხელშეწყობაში.

ალიევის განცხადებით, აზერბაიჯანული ენის საზღვარგარეთ სწავლებისთვის შესაძლებლობების შექმნა ასახავს აზერბაიჯანის კულტურულ გახსნილობასა და ფართო საერთაშორისო თანამშრომლობისადმი ერთგულებას.

მისივე თქმით, აზერბაიჯანული ენის ჩინეთში პოპულარიზაცია უნდა განიხილებოდეს არა მხოლოდ საგანმანათლებლო პრიორიტეტად, არამედ დიპლომატიურ მიღწევადაც, რომელიც ხელს უწყობს ბაქოსა და პეკინს შორის ურთიერთობების საერთო განვითარებას.

ალიევმა ასევე აღნიშნა, რომ საგანმანათლებლო და კულტურული გაცვლები გრძელვადიანი ორმხრივი თანამშრომლობის ერთ-ერთ მთავარ საყრდენს წარმოადგენს.

წყარო: Azertag.az

სომხეთი

სომხეთში ექსპორტის მოცულობით ლიდერები რუსეთი, არაბთა გაერთიანებული საამიროები და ჩინეთი არიან

23 იანვარი

2025 წლის პირველი თერთმეტი თვის განმავლობაში სომხეთის ექსპორტის მოცულობა 40.6%-ით შემცირდა, თუმცა ექსპორტის მთავარ მიმართულებებად კვლავ რუსეთი, არაბთა გაერთიანებული საამიროები და ჩინეთი დარჩა.

ოფიციალური მონაცემების თანახმად, 2025 წლის იანვარ–ნოემბერში სომხეთის სავაჭრო ბრუნვამ 18.9 მილიარდი დოლარი შეადგინა, რაც 2024 წლის ანალოგიურ პერიოდთან შედარებით 33.2%-ით ნაკლებია. ექსპორტმა 7.35 მილიარდი დოლარი შეადგინა, იმპორტმა კი 11.56 მილიარდი დოლარი, რაც შესაბამისად 40.6%-იან და 27.4%-იან შემცირებას ნიშნავს.

სომხეთის მესამე უმსხვილესი იმპორტიორია ჩინეთი. ჩინეთში სომხეთის ექსპორტის მაჩვენებელმა 648.5 მილიონი დოლარი შეადგინა, რაც წინა წელთან შედარებით 38.1%-ით ნაკლებია.

წყარო: armenpress.am

ყირგიზეთი

ყირგიზეთი ჩინეთთან ენერგეტიკის სფეროში თანამშრომლობას აფართოებს

23 იანვარი

ყირგიზეთი ენერგეტიკული დეფიციტის დასაძლევად სულ უფრო მეტად ამყარებს ნახშირის სფეროში თანამშრომლობას ჩინეთთან, განსაკუთრებით ზამთრის პერიოდში, როდესაც ელექტროენერგიის მოხმარება იზრდება და ჰიდროენერგიის გამომუშავება მცირდება.

ენერგეტიკის სამინისტროს შეფასებით, კლიმატის ცვლილების ფონზე ჰიდროენერგეტიკის არასტაბილურობამ თბოელექტროსადგურების მნიშვნელობა გაზარდა. ხელისუფლება ნახშირით მომუშავე გენერაციას განიხილავს როგორც სტაბილურ და გარდამავალ ენერგეტიკულ სტრატეგიას, სანამ გრძელვადიანი პროექტები განხორციელდება.

22 იანვარს ენერგეტიკის მინისტრი ტალააიბეკ იბრაევი შეხვდა საერთაშორისო კონსორციუმის წარმომადგენლებს და ნახშირის საბადოებთან უშუალოდ თბოელექტროსადგურების მშენებლობა შესთავაზა. ეს არის მოდელი, რომელიც ფართოდ გამოიყენება ჩინეთში. კონსორციუმმა გამოთქვა მზადყოფნა სამი ნახშირით მომუშავე ელექტროსადგურის აშენებაზე, საერთო სიმძლავრით 1 050 მეგავატი, თანამედროვე „სუფთა ნახშირის“ ტექნოლოგიების გამოყენებით.

ჩინეთი ყირგიზული ნახშირის ექსპორტისთვის სულ უფრო მნიშვნელოვანი ბაზარი ხდება. 2024 წელს ჩინეთში ექსპორტი 118 200 ტონამდე გაიზარდა, რაც მკვეთრი ზრდაა წინა წელთან შედარებით. ხელისუფლების შეფასებით, ეს ტენდენცია ორ ქვეყანას შორის ენერგეტიკული თანამშრომლობის გაღრმავებას ასახავს.

წყარო: The Times Of Central Asia

ჩინეთი სამხრეთ კავკასიასა და ყირგიზეთში (19-25 იანვარი) Read More »

ჩინეთი სამხრეთ კავკასიასა და ყაზახეთში (12-18 იანვარი)

კვირის ამბავი / /

საქართველო

საქართველოს ელჩი ჩინეთში ჩინეთ-აზიის ეკონომიკური განვითარების ასოციაციის ხელმძღვანელს შეხვდა

13 იანვარი

2026 წლის 13 იანვარს ჩინეთის დედაქალაქ პეკინში საქართველოს ელჩმა პაატა კალანდაძემ სამუშაო შეხვედრა გამართა ჩინეთ-აზიის ეკონომიკური განვითარების ასოციაციის (CAEDA) პრეზიდენტთან, შუნჟი ცუანთან. შეხვედრის მიზანი საქართველო-ჩინეთს შორის ეკონომიკური თანამშრომლობის გაღრმავება იყო.

შეხვედრის ფარგლებში მხარეებმა განიხილეს ორმხრივი ეკონომიკური ურთიერთობების არსებული დინამიკა და იმსჯელეს იმ შესაძლებლობებზე, თუ როგორ შეიძლება ასოციაციის ჩართულობით ახალი საინვესტიციო ინიციატივების მხარდაჭერა. განსაკუთრებული ყურადღება გამახვილდა ლოგისტიკის, ინფრასტრუქტურისა და ვაჭრობის სფეროებში თანამშრომლობის გაძლიერებაზე, ასევე ჩინური ბიზნესწრეებისთვის საქართველოს საინვესტიციო პოტენციალის წარმოჩენაზე.

შუნჟი ცუანმა გამოთქვა მზადყოფნა, აქტიურად შეუწყოს ხელი ჩინეთში საქართველოს ბაზრის ცნობადობის გაზრდას და მხარი დაუჭიროს ერთობლივი ღონისძიებების განხორციელებას, რომლებიც საქართველოს ხელსაყრელ საინვესტიციო გარემოს ჩინელ ინვესტორებს გააცნობს.

ჩინეთ-აზიის ეკონომიკური განვითარების ასოციაცია ჩინეთის საგარეო საქმეთა სამინისტროს პატრონაჟით ფუნქციონირებს და მისი მიზანია აზიის ქვეყნებს შორის ეკონომიკური და სავაჭრო კავშირების გაღრმავება, ასევე მსხვილი განვითარების პროექტების მხარდაჭერა.

წყარო: EMBASSY OF GEORGIA TO THE PEOPLE`S REPUBLIC OF CHINA

აზერბაიჯანი

აზერბაიჯანი და ჩინეთი ენერგეტიკის სფეროში თანამშრომლობის გაფართოებაზე შეთანხმდნენ

13 იანვარი

13 იანვარს აზერბაიჯანის სახელმწიფო ნავთობკომპანიამ SOCAR-მა და ჩინეთის China National Chemical Engineering Co. (CNCEC)-მა ენერგეტიკის სფეროში თანამშრომლობის გაღრმავებაზე იმსჯელეს.

შეხვედრა CNCEC-ის სათავო ოფისში გაიმართა და მას SOCAR Turkiye-ის ნავთობგადამამუშავებელი და პეტროქიმიური ბიზნესერთეულის ხელმძღვანელი და Petkim-ის აღმასრულებელი დირექტორი კენან მირზაევი ესწრებოდა. მხარეებმა განიხილეს აზერბაიჯანის ენერგეტიკული სექტორის როლი საერთაშორისო ბაზრებზე და ერთობლივი პროექტების განვითარების პერსპექტივები.

ჩინურმა მხარემ ხაზი გაუსვა, რომ CNCEC მზად არის გააფართოვოს თანამშრომლობა SOCAR-თან ენერგეტიკისა და ქიმიური ინჟინერიის მიმართულებით, მათ შორის ტექნოლოგიური ინოვაციებისა და საერთაშორისო პროექტების ფარგლებში. კომპანიის წარმომადგენლის განცხადებით, აზერბაიჯანი რეგიონში ერთ-ერთი საკვანძო ენერგეტიკული მოთამაშეა და SOCAR-ს მნიშვნელოვანი პოზიციები უკავია გლობალურ ნავთობის, გაზისა და პეტროქიმიურ ბაზრებზე.

კენან მირზაევმა აღნიშნა, რომ SOCAR საერთაშორისო განვითარების სტრატეგიას აქტიურად ახორციელებს და მიზნად ისახავს აზერბაიჯანის როლის გაძლიერებას რეგიონალურ ენერგეტიკულ და ნავთობქიმიურ ეკოსისტემაში. მისი თქმით, ინდუსტრიული ტრანსფორმაცია და ინოვაციური პროექტები შეიძლება გახდეს აზერბაიჯანსა და ჩინეთს შორის თანამშრომლობის ახალი ეტაპის საფუძველი.

მხარეებმა ასევე იმსჯელეს ერთობლივი ინიციატივების პოტენციალზე, რომლებიც ხელს შეუწყობს აზერბაიჯანის ეკონომიკურ განვითარებას და ენერგეტიკული სექტორის საერთაშორისო ინტეგრაციას.

წყარო: Azernews

ბსუ-ს სტუდენტი ჩინეთიდან აზერბაიჯანული ენის მნიშვნელობაზე საუბრობს

16 იანვარი

ბაქოს სახელმწიფო უნივერსიტეტში სწავლის პროცესში მყოფმა ჩინელმა სტუდენტმა ჟუ ტიანსიუმ აზერბაიჯანული ენის შესწავლა „დიდ შესაძლებლობად“ შეაფასა, რომელმაც მისთვის ახალი კულტურული და საგანმანათლებლო ჰორიზონტები გახსნა.

ინტერვიუში სტუდენტმა ჟუ ტიანსიუმ ყურადღება გაამახვილა აზერბაიჯანული ენის დაუფლების პირად და აკადემიურ უპირატესობებზე და აღნიშნა, რომ ენის შესწავლამ მას აზერბაიჯანის კულტურასთან, ტრადიციებთან და საზოგადოებასთან უფრო ღრმა კავშირი დაამყარებინა. მისი თქმით, ამ გამოცდილებამ გაამდიდრა მისი ცოდნა ქვეყნის შესახებ და გააძლიერა მოტივაცია, მომავალშიც გააგრძელოს აკადემიური და კულტურული კავშირები აზერბაიჯანთან.

აღნიშნული ინიციატივა ასახავს აზერბაიჯანსა და ჩინეთს შორის საგანმანათლებლო თანამშრომლობის უფრო ფართო ტენდენციას, რომლის ფარგლებშიც სულ უფრო მეტი ჩინელი სტუდენტი ირჩევს აზერბაიჯანული ენის სწავლას კულტურული გაცვლისა და აკადემიური მობილობის პროგრამების ფარგლებში

წყარო: azertag.az

სომხეთი

სომხეთის ეროვნული ორკესტრი ჩინეთიდან ტურნეს შემდეგ დაბრუნდა

15 იანვარი

სომხეთის ეროვნული ფილარმონიული ორკესტრი, სამხატვრო ხელმძღვანელისა და მთავარი დირიჟორის ედუარდ ტოპჩიანის ხელმძღვანელობით, ჩინეთში გამართული საახალწლო ტურნიდან დაბრუნდა. ორკესტრმა 2025 წლის 27 დეკემბრიდან 2026 წლის 7 იანვრამდე ჩინეთში ცხრა კონცერტი გამართა.

ტურნის ფარგლებში ორკესტრი გამოვიდა ჩინეთის მნიშვნელოვან კულტურულ სცენებზე, მათ შორის ჩანშაში, ჟუჰაიში, ლიაოიანში, შენიანგში, ვუჰანში, ზიბოში, ბაოჯიში, ჩანშუსა და უსიში მდებარე საკონცერტო დარბაზებსა და დიდ თეატრებში. კონცერტებში სოლისტებად მონაწილეობდნენ ჩინელი კლარნეტისტი თიან შენ, სოპრანო უ ბისია და სომეხი ვიოლინისტი ანუშ ნიკოღოსიანი.

რკესტრის მთავარი პროდიუსერის, არმან პადარიანის განცხადებით, უკვე მესამე წელია, რაც სომხეთის ეროვნული ფილარმონიული ორკესტრი ჩინეთში მასშტაბურ ტურნეს მართავს. მისი თქმით, ორკესტრი ჩინურ აუდიტორიაში კარგადაა ცნობილი. კონცერტებს წინ უსწრებდა ფართომასშტაბიანი სარეკლამო კამპანიები. პადარიანმა აღნიშნა, რომ მსგავსი ტურნეები ხელს უწყობს სომხეთსა და ჩინეთს შორის კულტურული კავშირების გაძლიერებას, რაც ჩინეთის კლასიკური მუსიკის გავრცელების სახელმწიფო პოლიტიკის ნაწილია.

სომხეთის ეროვნული ფილარმონიული ორკესტრის წინა მასშტაბური ტურნეები ჩინეთში 2019–2020 წლებში და 2023 წელს გაიმართა.

წყარო: Armenpress.am

ყაზახეთი

ყაზახეთმა და ჩინეთმა მემორანდუმს მოაწერეს ხელი

14 იანვარი

2026 წლის 13-14 იანვარს შანხაიში გამართული სამუშაო ვიზიტის ფარგლებში, ყაზახეთის აქტობეს ოლქის ადმინისტრაციასა და ჩინურ კომპანიას Suzhou Hunan New Materials შორის ქრომის მადნების ღრმა გადამუშავების მიმართულებით თანამშრომლობის შესახებ ურთიერთგაგების მემორანდუმი გაფორმდა.

შეთანხმება მიღწეულ იქნა აქტობეს ოლქის ადმინისტრაციის ხელმძღვანელის მოადგილის, აბზალ აბდიქარიმოვის, და კომპანიის წარმომადგენლების შეხვედრის შედეგად, რომელიც ყაზახეთის შანხაიში მდებარე გენერალური საკონსულოს მხარდაჭერით გაიმართა.

შეხვედრის დროს ჩინურმა კომპანიამ წარმოადგინა ქრომის მადნების ღრმა გადამუშავებაზე ორიენტირებული ორიეტაპიანი საინვესტიციო პროექტი. პროექტის პირველი ეტაპი ითვალისწინებს ქრომის კონცენტრატის გადამამუშავებელი საწარმოს შექმნას, რომლის საინვესტიციო მოცულობა 150 მილიონ აშშ დოლარამდე იქნება. მეორე ეტაპზე დაგეგმილია მეტალური ქრომის წარმოებაზე გადასვლა.

პროექტი შეფასდა როგორც ეკონომიკურად მნიშვნელოვანი და სრულად მიზანშეწონილი აქტობეს ოლქის ინდუსტრიული განვითარების პრიორიტეტებისა და პირდაპირი უცხოური ინვესტიციების მოზიდვის მიმართულებით ყაზახეთის მიზნებისთვის.

კომპანია Suzhou Hunan New Materials-ის წარმომადგენლებმა დაადასტურეს მზადყოფნა, პროექტის პრაქტიკული განხორციელების ეტაპზე გადავიდნენ და გააგრძელონ მჭიდრო თანამშრომლობა ყაზახეთის სახელმწიფო და რეგიონულ ორგანოებთან.

Suzhou Hunan New Materials მეტალურგიულ ინდუსტრიაში მოქმედი საწარმოა, რომელიც ფეროქრომის დნობის სპეციალიზაციით გამოირჩევა. კომპანიის პროდუქცია ფართოდ გამოიყენება უჟანგავი და სპეციალური ფოლადის წარმოებაში.

წყარო: Gov.kz

ჩინეთი სამხრეთ კავკასიასა და ყაზახეთში (12-18 იანვარი) Read More »

Scroll to Top