Civicidea

სამოქალაქო საზოგადოების განცხადება აგვისტოს ომის 18 წლისთავთან დაკავშირებით

ამბები / /

საქართველოს სამოქალაქო საზოგადოება 2008 წლის რუსეთ-საქართველოს აგვისტოს ომის 18 წლისთავთან დაკავშირებით  ერთობლივ განცხადებას ავრცელებს. განცხადებას უერთდება სამოქალაქო იდეა და ორგანიზაციის თავმჯდომარე, თინათინ ხიდაშელი.

18 წელი შესრულდა მას შემდეგ, რაც 2008 წლის 7 აგვისტოს რუსეთის მიერ საქართველოს წინააღმდეგ განხორციელდა სრულმასშტაბიანი სამხედრო აგრესია.

ქედს ვიხრით საქართველოს დამოუკიდებლობისა და ტერიტორიული მთლიანობისთვის დაღუპული სამხედრო მოსამსახურეების, პოლიციელებისა და მშვიდობიანი მოქალაქეების ხსოვნის წინაშე. მათი თავგანწირვა ჩვენი სახელმწიფოსა და ეროვნული მეხსიერების განუყოფელი ნაწილია.

აგვისტოს ომი მხოლოდ წარსულის ნაწილი არ არის. მისი ისტორიული გააზრება პირდაპირ უკავშირდება საქართველოს ეროვნულ უსაფრთხოებას, დეოკუპაციის პოლიტიკის მიზნებსა და იმ საერთაშორისო-სამართლებრივ პოზიციების განუხრელ დაცვას და განმტკიცებას, რომლებიც ქვეყანამ ბოლო 18 წლის მანძილზე ჩამოაყალიბა. სწორედ ამიტომ, 2008 წლის ომზე საჯარო მსჯელობა განსაკუთრებულ პასუხისმგებლობას მოითხოვს. როდესაც საუბარი ქვეყნის სუვერენიტეტსა და ტერიტორიულ მთლიანობას ეხება, პარტიული მიზნებისთვის ისტორიული ფაქტების დამახინჯება დაუშვებელია.

ომის შემდეგ, დასავლელი პარტნიორების მხარდაჭერით, საქართველომ მნიშვნელოვან სამართლებრივ, დიპლომატიურ და პოლიტიკურ შედეგებს მიაღწია. სხვადასხვა პერიოდში გაწეულმა მრავალწლიანმა ძალისხმევამ მნიშვნელოვნად გაამყარა საქართველოს საერთაშორისო პოზიციები სუვერენიტეტის დაცვის საქმეში. ჩამოყალიბდა რუსეთის მიერ ჩვენი ოკუპირებული რეგიონების ე.წ. დამოუკიდებლობის არაღიარების პოლიტიკა, რომელსაც საერთაშორისო საზოგადოების მტკიცე მხარდაჭერა აქვს. რუსეთმა დიდი ძალისხმევის მიუხედავად ვერ მოახერხა ამ ტერიტორიების ე.წ. დამოუკიდებლობის აღიარების მოპოვება ვერცერთი პასუხისმგებლიანი ხელისუფლების მქონე ქვეყნის მიერ.

 ადამიანის უფლებათა ევროპულმა სასამართლომ და საერთაშორისო სისხლის სამართლის სასამართლომ მნიშვნელოვანი გადაწყვეტილებებით დაადასტურეს რუსეთის პასუხისმგებლობა საქართველოში ოკუპაციასა და საერთაშორისო სამართლის მძიმე დარღვევებზე.

აგვისტოს ომმა კიდევ ერთი მნიშვნელოვანი გაკვეთილი დაგვიტოვა – საქართველოს თავდაცვისუნარიანობა და სახელმწიფოებრიობის შენარჩუნება პირდაპირ არის დაკავშირებული საერთაშორისო პარტნიორობასთან. ჩვენი ამერიკელი და ევროპელი მეგობრების ძალისხმევამ, მათ შორის ომის დღეებში ევროპელი ლიდერების მხარდამჭერმა ვიზიტმა თბილისში, უმნიშვნელოვანესი როლი შეასრულა რუსეთის სამხედრო წინსვლის შეჩერებასა და ქართული სახელმწიფოს შენარჩუნებაში.

 

რუსეთი წლების განმავლობაში ცდილობს, საკუთარი აგრესიის პასუხისმგებლობა თავად მსხვერპლს -საქართველოს დააკისროს, რაც რუსეთის იმპერიის ტრადიციულად ნაცადი ხერხია. ამ ნარატივის გამეორება ან/და მისი შინაარსის გაზიარება აზიანებს საქართველოს სახელმწიფო ინტერესებს. ისტორიული სიმართლე, რომელიც საქართველოს სუვერენიტეტსა და ტერიტორიულ მთლიანობას უკავშირდება, არ უნდა იქცეს შიდა პოლიტიკური დაპირისპირების საგნად.

რუსეთის 2008 წლის აგვისტოს ფართომასშტაბიანი სამხედრო აგრესია საქართველოს და შემდგომ, 2014 და 2022 წლებში უკრაინის წინააღმდეგ მკაფიო შეხსენებაა ცივილიზებული სამყაროსთვის, რომ რუსეთის აგრესიული პოლიტიკა მხოლოდ საქართველოს გამოწვევა არ არის. არამედ, იგი საფრთხეს უქმნის იმ საერთაშორისო წესრიგს, რომელიც სახელმწიფოების სუვერენულ თანასწორობას, თავისუფლებასა და საერთაშორისო სამართლის პატივისცემას ეფუძნება.

კიდევ ერთხელ ქედს ვიხრით საქართველოს თავისუფლებისათვის დაღუპული გმირების წინაშე. ვაფასებთ ომის მონაწილე დაჭრილი და დაშავებული სამხედრო მოსამსახურეების ღვაწლს, ისევე როგორც იმ სამხედროებისას, რომლებიც დღესაც სამშობლოს თავდაცვისუნარიანობის სადარაჯოზე დგანან. მათი თავგანწირვა  გვავალდებულებს, დავიცვათ ისტორიული სიმართლე, შევინარჩუნოთ ეროვნული ღირსება და ვემსახუროთ სამშობლოს, რომლის დასაცავადაც მათ ყველაზე ძვირფასი- სიცოცხლე გაიღეს!

      ხელმომწერები:

2.      ეკა აკობია — სახელმწიფო მართვის სკოლის დეკანი, პროფესორი, კავკასიის უნივერსიტეტი

3.      გიორგი ანთაძე — ჯეოქეისი

4.      მერაბ ანთაძე — საქართველოს საგანგებო და სრულუფლებიანი ელჩი, კონფლიქტების მოგვარების და რეინტეგრაციის საკითხებში საქართველოს ყოფილი სახელმწიფო მინისტრი

5.      თეონა აქუბარდია — საქართველოს ეროვნული უშიშროების საბჭოს მდივნის მოადგილე 2014-2018 წწ, პარლამენტის წევრი 2020-2024 წწ

6.      სალომე აქუბარდია-ყოფილი დიპლომატი

7.      გიორგი ბადრიძე — საქართველოს საგანგებო და სრულუფლებიანი ელჩი, უფროსი მკვლევარი, საქართველოს სტრატეგიული და საერთაშორისო კვლევების ფონდი

8.      აკია ბარბაქაძე — საქართველოს ეროვნული უშიშროების საბჭოს მდივნის მოადგილე 2016-18წწ, თადარიგის პოლკოვნიკი

9.      ნატო ბაჩიაშვილი — გეოპოლიტიკური კვლევების საერთაშორისო ცენტრი

10.  გელა ბეჟუაშვილი — საგანგებო და სრულუფლებიანი ელჩი, თავდაცვის ყოფილი მინისტრი (2004), საგარეო საქმეთა ყოფილი მინისტრი (2005-2008)

11.  ოთარ ბერძენიშვილი — ყოფილი საგანგებო და სრულუფლებიანი ელჩი ბულგარეთის და მაკედონიის რესპუბლიკებში

12.  გიორგი ბილანიშვილი — სახელმწიფო უსაფრთხოებისა და კრიზისების მართვის საბჭოს საგარეო უსაფრთხოების საკითხთა დეპარტამენტის ყოფილი დირექტორი

13.  დავით ბრაგვაძე — საქართველოს ეროვნული უშიშროების საბჭოს აპარატი, ანალიტიკური დეპარტამენტის ხელმძღვანელი 2014-18წწ.

14.  ზაზა ბროლაძე — საქართველოს თავდაცვის მინისტრის მოადგილე 2012-13 წწ.

15.  გიორგი ბუაჩიძე — ყოფილი დიპლომატი

16.  დავით ბუჯიაშვილი — საგანგებო და სრულუფლებიანი დესპანი

17.  არჩილ გეგეშიძე — საქართველოს საგანგებო და სრულუფლებიანი ელჩი

18.  გიგი გიგიაძე — ეკონომიკური პოლიტიკის კვლევის ცენტრის უფროსი მკვლევარი

19.  ნიკოლოზ (ნუკრი) გოგიტიძე — თადარიგის იუსტიციის გენერალ-მაიორი

20.  პაატა დავითაია — საქართველოს პარლამენტის აგვისტოს მოვლენების შემსწავლელი დროებითი კომისიის თავმჯდომარე, პარლამენტის თავმჯდომარის მოადგილე (2008-2012წწ)

21.  მიხეილ დარჩიაშვილი — საქართველოს თავდაცვის მინისტრის ყოფილი მოადგილე 2013-2014წწ, საქართველოს ატლანტიკური საბჭო

22.  დავით დონდუა — ევროკავშირის ცნობიერების ცენტრი

23.  დავით დავითაშვილი -პროფესორი, საერთაშორისო ურთიერთობების მიმართულება, თბილისის სახელმწიფო უნივერსიტეტი

24.  ზურაბ ერისთავი-საგანგებო და სრულუფლებიანი ელჩი

25.  ნიკოლოზ ვაშაკიძე — საგარეო საქმეთა მინისტრის და თავდაცვის მინისტრის ყოფილი მოადგილე, უშიშროების საბჭოს მდივნის ყოფილი მოადგილე

26.  მერაბ ვაშაკიძე — ყოფილი დიპლომატი, საგანგებო და სრულუფლებიანი დესპანი

27.  ივანე ზირაქიშვილი-თადარიგის ვიცე-პოლკოვნიკი

28.  თეიმურაზ კეკელიძე — საქართველოს ელჩი კვიპროსის რესპუბლიკაში 2020-2023 წწ.

29.  ვახტანგ კაპანაძე — თადარიგის გენერალ-მაიორი, საქართველოს შეიარაღებული ძალების გენერალური შტაბის უფროსი 2005-2006 და 2012-2016 წწ.

30.  დავით კაპანაძე — ჟენევაში გაეროსა და სხვა საერთაშორისო ორგანიზაციებთან საქართველოს წარმომადგენლობის ყოფილი უფროსი მრჩეველი

31.  ირაკლი ლაითაძე — ილიას უნივერსიტეტის პროფესორი

32.  შალვა ლომიძე — საქართველოს დაზვერვის სამსახურის უფროსი 2021-2024 წწ, თადარიგის გენერალ-მაიორი

33.  მარიამ მაისაია-ჟენევაში გაეროს განყოფილებასა და სხვა საერთაშორისო ორგანიზაციებთან საქართველოს მუდმივი წარმომადგენლობის ყოფილი უფროსი მრჩეველი

34.  ეკატერინე მეგრელიშვილი — ყოფილი დიპლომატი

35.  გიორგი მელაშვილი — ევროპულ-ქართული ინსტიტუტის თავმჯდომარე

36.  მალხაზ მიქელაძე — საქართველოს საგანგებო და სრულუფლებიანი ელჩი

37.  გიორგი მუჩაიძე — საქართველოს თავდაცვის მინისტრის ყოფილი მოადგილე, საქართველოს ატლანტიკური საბჭოს აღმასრულებელი დირექტორი

38.  დავით  ნარდაია-საგანგებო და სრულუფლებიანი დესპანი

39.  დავით რაქვიაშვილი — საქართველოს ეროვნული უშიშროების საბჭოს მდივანი 2017-18 წწ.

40.  ნიკოლოზ რთველიაშვილი — ყოფილი დიპლომატი, საგანგებო და სრულუფლებიანი ელჩი

41.  ვასილ რუბაშვილი — ყოფილი დიპლომატი და საერთაშორისო ურთიერთობათა სპეციალისტი

42.  გიორგი რუხაძე — საქართველოს სტრატეგიული ანალიზის ცენტრის დამფუძნებელი, ევროპული კვლევების დირექტორი

43.  დავით სიხარულიძე — საქართველოს თავდაცვის ყოფილი მინისტრი 2008-2009 წლებში, საქართველოს ყოფილი ელჩი აშშ-ში

44.  დავით სოლომონიანი-საგანგებო და სრულუფლებიანი ელჩი

45.  მიხეილ უკლება — საქართველოს საგანგებო და სრულუფლებიანი ელჩი

46.  თენგიზ ფხალაძე — საქართველოს პრეზიდენტის ყოფილი მრჩეველი – საგარეო ურთიერთობათა ყოფილი მდივანი 2014-2018

47.  ნინო ფიფია — ყოფილი დიპლომატი

48.  მირიან ფოფხაძე — უფროსი მკვლევარი დელფის გლობალურ კვლევათა ცენტრში

49.  ნიკოლოზ ქავთარაძე — სახელმწიფო უსაფრთხოების და კრიზისების მართვის საბჭოს თავდაცვის საკითხთა დეპარტამენტის ყოფილი დირექტორი

50.  თამარ ქარსელაძე — ყოფილი დიპლომატი

51.  გიორგი ქობელაშვილი — ყოფილი დიპლომატი

52.  ბათუ ქუთელია — საქართველოს ყოფილი ელჩი აშშ, კანადასა და მექსიკაში, დელფის უფროსი მკვლევარი

53.  გიორგი ყარალაშვილი-საგანგებო და სრულუფლებიანი ელჩი

54.  ალექსანდრე ყიფიანი-ყოფილი დიპლომატი

55.  ნოდარ ხარშილაძე — საქართველოს სტრატეგიული ანალიზის ცენტრი

56.  ნიკოლოზ ხატიაშვილი — საქართველოს პარლამენტის საგარეო ურთიერთობათა კომიტეტის აპარატის ყოფილი უფროსი

57.  ელგუჯა ხოკრიშვილი — დემოკრატიის, გეოპოლიტიკისა და მედეგობის ცენტრის აღმასრულებელი დირექტორი

58.  თინა ხიდაშელი -საქართველოს თავდაცვის ყოფილი მინისტრი, სამოქალაქო იდეა-ხელმძღვანელი

59.  შოთა ღვინერია — ეკონომიკური პოლიტიკის კვლევის ცენტრი

60.  ვლადიმერ ჩაჩიბაია — თადარიგის გენერალ-ლეიტენანტი, საქართველოს შეიარაღებული ძალების მეთაური 2016-2020წწ და პარლამენტის ყოფილი წევრი 2020-2024წწ.

61.  თამარ ჩაჩიბაია — ყოფილი დიპლომატი

62.  ვალერი ჩეჩელაშვილი — საგანგებო და სრულუფლებიანი ელჩი, BSEC-ის ყოფილი გენერალური მდივანი (2000-2004), ფინანსთა ყოფილი მინისტრი (2005)

63.  გიორგი ჩხეიძე — ყოფილი დიპლომატი, საგანგებო და სრულუფლებიანი დესპანი

64.  შალვა ცისკარაშვილი  — საქართველოს საგანგებო და სრულუფლებიანი ელჩი

65.  კარლო ცქიტიშვილი-საერთაშორისო ურთიერთობისა და დიპლომატიური პროტოკოლის ექსპერტი

66.  გიორგი ცხვიტავა-სამოქალაქო საბჭო თავდაცვისა და უსაფრთხოების საკითხებში

67.  ლაშა ძებისაშვილი-საქართველოს უნივერსიტეტის პროფესორი

68.  გიორგი წიქარაშვილი— ყოფილი დიპლომატი

69.  ზვიად ჭუმბურიძე — საქართველოს საგანგებო და სრულუფლებიანი ელჩი

70.  გიორგი შაიშმელაშვილი — საქართველოს თავდაცვის სამინისტროს თავდაცვის პოლიტიკისა და დაგეგმვის დეპარტამენტის ყოფილი უფროსი

71.  თეა ჯანაშია — ყოფილი დიპლომატი

72.  თემურ ჯანჯალია — საგარეო საქმეთა მინისტრის ყოფილი მოადგილე

73.  გია ჯაფარიძე-საქართველოს უნივერსიტეტის პროფესორი, საქართველოს საქმეთა დროებითი რწმუნებული პორტუგალიაში, კვიპროსზე, საბერძნეთში

სამოქალაქო საზოგადოების განცხადება აგვისტოს ომის 18 წლისთავთან დაკავშირებით Read More »

პეკინმა იაპონიის თავდაცვის ახალ დოკუმენტს პროტესტით უპასუხა

ერთი ახალი ამბავი / /

5 აგვისტოს ჩინეთის საგარეო საქმეთა სამინისტრომ განაცხადა, რომ იაპონიას ახლად გამოქვეყნებული თავდაცვის „თეთრი წიგნის“ გამო ოფიციალური პროტესტი გადასცა. პეკინის შეფასებით, ტოკიო დოკუმენტში განზრახ აძლიერებს ე.წ. ჩინეთის საფრთხის ნარატივს, ტაივანის საკითხზე დაუსაბუთებელ განცხადებებს აკეთებს და სამხედრო შესაძლებლობების გაფართლებას ამ გზით ამართლებს.

იაპონიის თავდაცვის ყოველწლიური ანგარიში 4 აგვისტოს გამოქვეყნდა. დოკუმენტში ნათქვამია, რომ ჩინეთმა ტაივანის გარშემო სამხედრო აქტივობა გააძლიერა და მხარეებს შორის ძალთა საერთო ბალანსი სწრაფად იცვლება პეკინის სასარგებლოდ. ტოკიო ჩინეთის სამხედრო მოქმედებებს იაპონიისა და საერთაშორისო თანამეგობრობისთვის სერიოზულ საფრთხედ და ქვეყნის უდიდეს სტრატეგიულ გამოწვევად აფასებს.

ჩინეთის საგარეო საქმეთა სამინისტრომ ეს შეფასებები უარყო და აღნიშნა, რომ ტაივანის საკითხი ჩინეთის შიდა საქმეა, რომლის გადაწყვეტის გზაზეც იაპონიას ჩარევის უფლება არ აქვს. უწყების განცხადებით, ტაივანის გარშემო ჩინეთის სამხედრო მოქმედებები „ლეგიტიმური და გონივრულია“.

პეკინმა ტოკიო ასევე დაადანაშაულა საკუთარი სამხედრო გაძლიერებისთვის საბაბის ძიებასა და ომისშემდგომი თავდაცვითი შეზღუდვების თანდათანობით შესუსტებაში. ჩინეთის ხელისუფლებამ იაპონიას მოუწოდა, შეწყვიტოს სამხედრო გაფართოების გასამართლებლად ჩინეთის გამოყენება და თავი შეიკავოს ტაივანის საკითხში ჩარევისგან.

პეკინმა იაპონიის თავდაცვის ახალ დოკუმენტს პროტესტით უპასუხა Read More »

ჩინეთი დასავლეთთან სავაჭრო მოლაპარაკებების წინ ეკონომიკურ „წითელ ხაზებს“ ავლებს

ერთი ახალი ამბავი / /

აშშ–სა და ევროკავშირთან მოსალოდნელი სავაჭრო მოლაპარაკებების წინ ჩინეთი მიანიშნებს, რომ წარმოებასა და მაღალტექნოლოგიურ ინდუსტრიებზე დაფუძნებული ეკონომიკური კურსის არსებით შეცვლას არ გეგმავს. პეკინი უარყოფს დასავლეთის ბრალდებებს, რომ სახელმწიფო სუბსიდიები და ჭარბი საწარმოო სიმძლავრე გლობალურ კონკურენციას აზიანებს.

ივლისის ბოლოს ჩინეთის კომუნისტური პარტიის პოლიტბიურომ მოქმედი ეკონომიკური პოლიტიკის გაგრძელებას დაუჭირა მხარი. ხელისუფლებამ მიზნობრივი დახმარებისა და შიდა მოთხოვნის გაძლიერების აუცილებლობაზე ისაუბრა, თუმცა მასშტაბური სტიმულირების ან სტრუქტურული რეფორმების ახალი პაკეტი არ წარუდგენია.

ჩინეთის ვაჭრობის სამინისტროს განცხადებით, ჭარბი წარმოების შესახებ ბრალდებები ჩინური კომპანიების წინააღმდეგ დისკრიმინაციული სავაჭრო ზომების გასამართლებლად გამოიყენება. პეკინი ამტკიცებს, რომ ინდუსტრიული და ტექნოლოგიური განვითარება ეკონომიკური ჩამორჩენის დასაძლევად აუცილებელია.

აშშ და ევროკავშირი კი მიიჩნევენ, რომ სახელმწიფო მხარდაჭერა, სუსტი შიდა მოთხოვნა და საწარმოო სიმძლავრეების სწრაფი ზრდა ჩინურ კომპანიებს უცხოურ ბაზრებზე ფასობრივ უპირატესობას აძლევს. ბრიუსელი და ვაშინგტონი პრობლემურ საკითხებად სუბსიდიებს, ბაზარზე წვდომის ბარიერებსა და არათანაბარ კონკურენტულ პირობებს ასახელებენ.

მიუხედავად მკაცრი რიტორიკისა, პეკინი გარკვეული შიდა დისბალანსების გამოსწორებას ცდილობს, თუმცა მასშტაბურ დათმობებს არ განიხილავს. Reuters-ის შეფასებით, ჩინეთი დასავლეთთან მოლაპარაკებების წინ იმ „წითელ ხაზებს“ ავლებს, რომელთა გადაკვეთასაც საკუთარ ეკონომიკურ პოლიტიკაში არ აპირებს.

ჩინეთი დასავლეთთან სავაჭრო მოლაპარაკებების წინ ეკონომიკურ „წითელ ხაზებს“ ავლებს Read More »

ჩინეთი სამხრეთ კავკასიასა და ტაჯიკეთში (27 ივლისი – 2 აგვისტო)

კვირის ამბავი / /
საქართველო

ირაკლი კობახიძე ჩინეთის ელჩის გამოსამშვიდობებელ მიღებას დაესწრო

27 ივლისი

27 ივლისს თბილისში ჩინეთის სახალხო–განმათავისუფლებელი არმიის დაარსების 99-ე წლისთავისა და საქართველოში ჩინეთის ელჩის, ჭოუ ციენის, დიპლომატიური მისიის დასრულებისადმი მიძღვნილი მიღება გაიმართა. ღონისძიებას საქართველოს პრემიერ–მინისტრი ირაკლი კობახიძე, მთავრობის წევრები და დიპლომატიური კორპუსის წარმომადგენლები დაესწრნენ.

კობახიძემ ჭოუ ციენს ორმხრივი ურთიერთობების განვითარებაში შეტანილი წვლილისთვის მადლობა გადაუხადა და აღნიშნა, რომ 2023 წელს სტრატეგიული პარტნიორობის დამყარების შემდეგ თანამშრომლობა პოლიტიკურ, ეკონომიკურ და ხალხთაშორის სფეროებში გაფართოვდა. პრემიერის განცხადებით, ჩინეთი საქართველოს მესამე უმსხვილესი სავაჭრო პარტნიორი და ქართული ადგილობრივი ექსპორტისთვის მეორე უმნიშვნელოვანესი ბაზარია.

ჭოუ ციენმა საქართველოში ოთხწლიანი საქმიანობა შეაჯამა და განაცხადა, რომ ამ პერიოდში ურთიერთობები ჯერ სტრატეგიული, შემდეგ კი ყოვლისმომცველი სტრატეგიული პარტნიორობის დონეზე გადავიდა.

 

საქართველოს ელჩი ჩინეთის საერთაშორისო სწავლების ინსტიტუტის ღონისძიებას დაესწრო

28 ივლისი

28 ივლისს პეკინში ჩინეთის საერთაშორისო სწავლების ინსტიტუტმა CIIS-მა საერთაშორისო ვითარებისა და ჩინეთის საგარეო პოლიტიკის შესახებ მომზადებული ახალი გამოცემა წარადგინა. ღონისძიებას საქართველოს ელჩი ჩინეთში პაატა კალანდაძე და სხვადასხვა ქვეყნის დიპლომატიური წარმომადგენლობების ხელმძღვანელები დაესწრნენ.

შეხვედრაზე მონაწილეებს გააცნეს ინსტიტუტის ახალი გამოცემა Blue Book on International Situation and China’s Foreign Affairs. პუბლიკაცია საერთაშორისო სისტემაში მიმდინარე ცვლილებებს, გლობალურ გამოწვევებსა და 2025-2026 წლებში ჩინეთის საგარეო პოლიტიკის ძირითად მიმართულებებს მიმოიხილავს.

ღონისძიების ფარგლებში დიპლომატებმა და ჩინელმა მკვლევრებმა საერთაშორისო პროცესებზე მოსაზრებები გაცვალეს და საექსპერტო თანამშრომლობის გაძლიერების შესაძლებლობები განიხილეს.

აზერბაიჯანი

ჩინეთმა აზერბაიჯანთან სამხედრო თანამშრომლობის გაღრმავებისთვის მზადყოფნა გამოთქვა

28 ივლისი

28 ივლისს ბაქოში ჩინეთის სახალხო–განმათავისუფლებელი არმიის შექმნის 99-ე წლისთავისადმი მიძღვნილი ოფიციალური მიღება გაიმართა. ღონისძიებას ჩინეთის ელჩი ლუ მეი და სამხედრო ატაშე, უფროსი პოლკოვნიკი სონგ ძიუნი მასპინძლობდნენ.

ღონისძიებაზე ლუ მეიმ აზერბაიჯანთან სამხედრო და ტექნოლოგიური თანამშრომლობის გაფართოებაზე ისაუბრა. ლუ მეის განცხადებით, სამხედრო კავშირები ორი ქვეყნის ყოვლისმომცველი სტრატეგიული პარტნიორობის მნიშვნელოვანი ნაწილია. მან აღნიშნა, რომ ჩინეთის არმია მზად არის, აზერბაიჯანის შეიარაღებულ ძალებთან კონტაქტები და პრაქტიკული თანამშრომლობა გააძლიეროს.

ელჩმა ყურადღება ხელოვნური ინტელექტის სფეროსაც დაუთმო და აღნიშნა, რომ პეკინი აზერბაიჯანთან გამოცდილებისა და ტექნოლოგიური შესაძლებლობების გაზიარებით არის დაინტერესებული. ამ კონტექსტში მან ჩინეთის ინიციატივით შექმნილ ხელოვნური ინტელექტის მსოფლიო თანამშრომლობის ორგანიზაცია WAICO-ზე ისაუბრა, რომლის მიზანიც ხელოვნური ინტელექტის უსაფრთხო და თანასწორი განვითარების ხელშეწყობაა.

 

აზერბაიჯანელმა მკვლევარმა ჩინეთში კონფუცის ნაშრომის თარგმნის პროექტი წარადგინა

30 ივლისი

30 ივლისს ჩინეთში კონფერენცია „ცივილიზაციათაშორისი გაცვლა და უძველესი კლასიკური ნაწარმოებების თარგმნა“ გაიმართა. ღონისძიებაში პეკინის უცხო ენების უნივერსიტეტის აზიის ფაკულტეტის აზერბაიჯანული ენის კათედრის ხელმძღვანელი და კონფუციანიზმის საერთაშორისო ასოციაციის გამგეობის წევრი აგშინ ალიევი მონაწილეობდა.

ალიევმა კონფუცის ფილოსოფიის ძირითადი ცნებების აზერბაიჯანულ ენაზე გადატანის მეთოდებსა და სირთულეებზე ისაუბრა. მან ჩინურიდან აზერბაიჯანულად პირველად თარგმნა კონფუცის გამონათქვამებისა და დიალოგების კრებული „საუბრები და მსჯელობები“.

ღონისძიება კონფუციანიზმის საერთაშორისო ასოციაციისა და კონფუცის კვლევითი ინსტიტუტის ორგანიზებით გაიმართა და მას 20 ქვეყნიდან დაახლოებით 50 მკვლევარი დაესწრო.

აზერბაიჯან–ჩინეთის ერთობლივი საინჟინრო ფაკულტეტი პირველ სტუდენტებს მიიღებს

31 ივლისი

ბაქოს საინჟინრო უნივერსიტეტმა და პეკინის ქიმიური ტექნოლოგიების უნივერსიტეტმა ერთობლივ საინჟინრო ფაკულტეტზე პირველი სტუდენტების მიღება გამოაცხადეს. ფაკულტეტი მუშაობას 2026-2027 სასწავლო წლიდან დაიწყებს.

სასწავლო მიმართულებები მოიცავს კომპიუტერულ მეცნიერებებს, ქიმიას, ბიოტექნოლოგიასა და მექანიკურ ინჟინერიას. პროგრამა „3+1“ მოდელით განხორციელდება: სტუდენტები პირველ სამ წელს აზერბაიჯანში, ბოლო წელს კი ჩინეთში ისწავლიან.

მოთხოვნების წარმატებით დაკმაყოფილების შემდეგ კურსდამთავრებულები ორივე უნივერსიტეტის დიპლომს მიიღებენ. თანამშრომლობა ასევე ითვალისწინებს ერთობლივ კვლევებს, აკადემიურ მობილობასა და ტექნოლოგიების გადაცემას.

სომხეთი

 

სომხეთის წარმომადგენლები SCO-ს მედიისა და კვლევითი ცენტრების სამიტს დაესწრნენ

27 ივლისი

27 ივლისს ბიშკეკში შანხაის თანამშრომლობის ორგანიზაციის მედიისა და კვლევითი ცენტრების სამიტი გაიხსნა, რომელშიც სომხეთის პრემიერ–მინისტრის აპარატთან არსებული საზოგადოებასთან ურთიერთობისა და ინფორმაციის ცენტრი და სააგენტო „არმენპრესი“ მონაწილეობდნენ.

ღონისძიება ჩინეთის სახელმწიფო საინფორმაციო სააგენტო „სინხუასა“ და ყირგიზეთის სააგენტო „კაბარის“ ორგანიზებით გაიმართა. დისკუსიები შეეხო საერთაშორისო საინფორმაციო თანამშრომლობას, მედიის ციფრულ ტრანსფორმაციას, დეზინფორმაციასთან ბრძოლასა და ხელოვნური ინტელექტის გამოყენებას. სამიტმა 26 ქვეყნიდან დაახლოებით 250 მონაწილე გააერთიანა.


ფაშინიანმა ჩინეთთან სტრატეგიული ურთიერთობა საგარეო პოლიტიკის გაფართოების მცდელობას დაუკავშირა

30 ივლისი

30 ივლისს გამართულ პრესბრიფინგზე სომხეთის პრემიერ–მინისტრმა ნიკოლ ფაშინიანმა ქვეყნის საგარეო პოლიტიკის დივერსიფიკაციაზე ისაუბრა და ჩინეთი იმ სახელმწიფოებს შორის დაასახელა, რომლებთანაც ერევანმა სტრატეგიული ურთიერთობების განმსაზღვრელი დოკუმენტები გააფორმა.

მისი თქმით, სომხეთი წარსულში ეკონომიკური და პოლიტიკური კავშირების ალტერნატივების ნაკლებობას განიცდიდა, ახლა კი პარტნიორთა წრის გაფართოებას ცდილობს. ფაშინიანმა აღნიშნა, რომ ერევანს სტრატეგიული ურთიერთობების შესახებ დოკუმენტები ჩინეთთან, შეერთებულ შტატებთან, დიდ ბრიტანეთთან, ნიდერლანდებთან, საფრანგეთთან და სხვა ქვეყნებთან აქვს გაფორმებული.

სომხეთის პრემიერ–მინისტრის განცხადებით, რომელიმე ქვეყანასთან ურთიერთობა შეზღუდული არ უნდა იყოს. მისი შეფასებით, ერევნის ახალი მიდგომა არსებული პარტნიორების ჩანაცვლებას კი არა, პოლიტიკური და ეკონომიკური კავშირების დაბალანსებასა და ალტერნატივების შექმნას ემსახურება.

ჩინეთი სამხრეთ კავკასიასა და ტაჯიკეთში (27 ივლისი – 2 აგვისტო) Read More »

სი ძინპინი ჩინეთის არმიაში კორუფციასთან ბრძოლის გაძლიერებას მოითხოვს

ერთი ახალი ამბავი / /

ჩინეთის პრეზიდენტმა სი ძინპინმა ქვეყნის შეიარაღებულ ძალებში კორუფციის წინააღმდეგ ბრძოლის გაღრმავებისა და სამხედრო მოდერნიზაციის დაჩქარების აუცილებლობაზე ისაუბრა. 31 ივლისს გავრცელებული ინფორმაციით, მან განცხადებები ჩინეთის კომუნისტური პარტიის პოლიტბიუროს თემატურ სხდომაზე გააკეთა.

სი ძინპინის განცხადებით, ჩინეთის სახალხო–განმათავისუფლებელი არმია კომუნისტური პარტიის აბსოლუტურ ხელმძღვანელობას უნდა დაემორჩილოს. მან სამხედრო ძალების განვითარების მთავარ საზომად საბრძოლო ეფექტიანობა დაასახელა და აღნიშნა, რომ კორუფცია არმიის პოლიტიკურ ერთიანობასა და საბრძოლო შესაძლებლობებს აზიანებს.

ჩინეთის ლიდერმა განსაკუთრებული ყურადღება დაუთმო ტექნოლოგიურ მოდერნიზაციას. მისი თქმით, პეკინმა უნდა დააჩქაროს „ინტელექტუალური სამხედრო სისტემის“ შექმნა, რაც უპილოტო ტექნოლოგიების, ხელოვნური ინტელექტისა და კიბერსაინფორმაციო სისტემების სამხედრო სფეროში უფრო ფართოდ გამოყენებას გულისხმობს.

განცხადება ჩინეთის სახალხო-განმათავისუფლებელი არმიის დაარსებიდან 99 წლისთავის წინ გაკეთდა. სი ძინპინის მმართველობის პერიოდში ანტიკორუფციული კამპანია არმიის უმაღლეს ხელმძღვანელობასა და სამხედრო შესყიდვების სისტემასაც შეეხო, რამაც, სტრატეგიული კვლევების საერთაშორისო ინსტიტუტის შეფასებით, სამეთაურო სტრუქტურაში არსებული პრობლემები გამოავლინა და მოკლევადიან პერიოდში საბრძოლო მზადყოფნაზეც იმოქმედა.

სი ძინპინი ჩინეთის არმიაში კორუფციასთან ბრძოლის გაძლიერებას მოითხოვს Read More »

ჩინეთი გერმანიას სავაჭრო დაპირისპირების პროვოცირებაში ადანაშაულებს

ერთი ახალი ამბავი / /

ჩინეთის საგარეო საქმეთა სამინისტრო გერმანიას მოუწოდებს, პეკინის ეკონომიკური მოწყვლადობის ძიების ნაცვლად, ყურადღება თანამშრომლობაზე გაამახვილოს. უწყების წარმომადგენელმა მაო ნინმა კომენტარი 29 ივლისს ბლუმბერგის იმ ცნობაზე გააკეთა, რომლის მიხედვითაც ბერლინი პოტენციური სავაჭრო დაპირისპირებისთვის პეკინზე ზეწოლის შესაძლო ბერკეტებს იკვლევს.

წყაროების ცნობით, გერმანელი ოფიციალური პირები სავაჭრო ნაკადებსა და კომპანიების მონაცემებს აანალიზებენ, რათა დაადგინონ, რამდენად არის ჩინეთი დამოკიდებული ევროპულ ტექნოლოგიებსა და სამრეწველო ცოდნაზე. წინასწარ გამოვლენილ მიმართულებებს შორის დასახელდნენ გერმანული კომპანიები Trumpf და Carl Zeiss, რომლებიც მაღალი სიზუსტის სამრეწველო და ოპტიკური ტექნოლოგიებით არიან ცნობილი.

მაო ნინის განცხადებით, გლობალიზებულ ეკონომიკაში ქვეყნების საწარმოო და მიწოდების ჯაჭვებში ურთიერთდამოკიდებულება ბუნებრივი მოვლენაა. მან აღნიშნა, რომ ჩინეთ–გერმანიის ეკონომიკური თანამშრომლობა ორმხრივ სარგებელს ეფუძნება და მხარეებმა კომუნიკაციის გაძლიერებითა და კოორდინირებული მოქმედებით გლობალური მიწოდების ჯაჭვების სტაბილურობას უნდა შეუწყონ ხელი.

გერმანია ჩინეთზე ეკონომიკური დამოკიდებულების შემცირებას ცდილობს, თუმცა ჩინეთის ბაზარი მისი მსხვილი კომპანიებისთვის კვლავ მნიშვნელოვანია. 2025 წელს ჩინეთი კვლავ გერმანიის უმსხვილესი სავაჭრო პარტნიორი იყო, საქონლით ორმხრივი ვაჭრობის მოცულობამ დაახლოებით 250 მილიარდ ევროს მიაღწია. ჩინეთში დაახლოებით 5 000 გერმანული კომპანია საქმიანობს, რაც შესაძლო სავაჭრო დაპირისპირების ეკონომიკურ რისკებს ორივე მხარისთვის ზრდის.

ორ ქვეყანას შორის დაძაბულობას გერმანიის სავაჭრო დეფიციტი, ჩინური კომპანიების მზარდი კონკურენცია და ჩინეთის სახელმწიფო სუბსიდიებიც ამწვავებს. სანამ ევროპა პეკინზე დამოკიდებულების შემცირებას ცდილობს, ჩინეთი ამ ნაბიჯებს პროტექციონიზმად აფასებს.

ჩინეთი გერმანიას სავაჭრო დაპირისპირების პროვოცირებაში ადანაშაულებს Read More »

ჩინეთი სამხრეთ კავკასიასა და უზბეკეთში (20-26 ივლისი)

კვირის ამბავი / /
საქართველო

ჩინეთი საქართველოს ადგილობრივი ექსპორტის მთავარ ბაზრად დასახელდა

20 ივლისი

20 ივლისს „საქსტატმა“ 2026 წლის პირველი ნახევრის საგარეო ვაჭრობის მონაცემები გამოაქვეყნა. ანგარიშის მიხედვით, 2026 წლის პირველ ნახევარში საქართველოდან ჩინეთში 428.6 მილიონი დოლარის საქონელი გავიდა, რაც წინა წლის ანალოგიურ პერიოდთან შედარებით დაახლოებით 143%-ით მეტია.

ჩინეთი 417 მილიონი დოლარით ადგილობრივი ექსპორტის, ანუ რეექსპორტის გამოკლებით ექსპორტირებული ქართული პროდუქციის, მთავარი დანიშნულების ქვეყანა გახდა. ექსპორტში წამყვანი ადგილი ძვირფასი ლითონების მადნებსა და კონცენტრატებს, ნავთობპროდუქტებსა და სპილენძის მადნებს ეკავა.

გამოქვეყნებული მონაცემების მიხედვით, ჩინეთიდან იმპორტი 22.5%-ით, 1.07 მილიარდ დოლარამდე გაიზარდა. მთლიანმა სავაჭრო ბრუნვამ თითქმის 1.5 მილიარდი დოლარი შეადგინა, რითაც ჩინეთი თურქეთისა და რუსეთის შემდეგ საქართველოს მესამე უმსხვილესი სავაჭრო პარტნიორი იყო.

 

თბილისში ჩინეთის შანსის პროვინციის ბრინჯაოს კოლექცია გამოიფინა

20 ივლისი

20 ივლისს საქართველოს ეროვნულ მუზეუმში გამოფენა „ყვითელი მდინარიდან კავკასიამდე – ჩინეთის შანსის ბრინჯაოს ცივილიზაცია“ გაიხსნა. ექსპოზიცია დამთვალიერებელს ჩინეთის ერთ–ერთი უძველესი კულტურული ცენტრის, შანსის პროვინციის, ბრინჯაოს ხელოვნებასა და ისტორიულ მემკვიდრეობას აცნობს.

გამოფენაზე შანსის მუზეუმიდან ჩამოტანილი 36 უძველესი ბრინჯაოს ნივთია წარმოდგენილი. ექსპონატები ჩინეთის ბრინჯაოს ცივილიზაციის სხვადასხვა ეტაპს, რიტუალურ ტრადიციებსა და მხატვრულ ტექნიკას ასახავს.

გახსნის ცერემონიას ჩინეთის ელჩი საქართველოში ჭოუ ციენი, საქართველოს კულტურის მინისტრის მოადგილე, ეროვნული მუზეუმისა და შანსის მუზეუმის წარმომადგენლები დაესწრნენ. ღონისძიებაზე ყურადღება გამახვილდა საქართველოსა და ჩინეთს შორის კულტურული თანამშრომლობის გაღრმავებასა და მუზეუმებს შორის კავშირების მნიშვნელობაზ

 

საქართველოს ელჩი ჩინურ ავტომწარმოებელ „Yutong Group“-ს შეხვდა

23 ივლისი

საქართველოს ელჩმა ჩინეთში პაატა კალანდაძემ 23 ივლისს ჩინური ავტომწარმოებელი კომპანიის, „Yutong Group“-ის დელეგაციას უმასპინძლა. შეხვედრაზე მხარეებმა საქართველოში კომპანიის საქმიანობა და სამომავლო თანამშრომლობის გაფართოების შესაძლებლობები განიხილეს.

ჩინურ დელეგაციას „Yutong Group“-ის რეგიონული მენეჯერი ცაი ტანი ხელმძღვანელობდა. საქართველოს საელჩოს ინფორმაციით, კომპანია ქართულ ბაზარზე 2012 წლიდან ოპერირებს და ავტობუსებისა და სხვა სატრანსპორტო საშუალებების წარმოების მიმართულებით საქმიანობს.

 

ჩინეთის ელჩმა საქართველოს პრეზიდენტთან გამოსამშვიდობებელი შეხვედრა გამართა

23 ივლისი

23 ივლისს საქართველოს პრეზიდენტი მიხეილ ყაველაშვილი ჩინეთის ელჩს, ჭოუ ციენს, საქართველოში დიპლომატიური მისიის დასრულებასთან დაკავშირებით შეხვდა. საუბრის მთავარი თემა ბოლო წლებში საქართველო-ჩინეთის ურთიერთობებში მიღწეული პროგრესი და თანამშრომლობის შემდგომი გაფართოება იყო.

მხარეებმა ყურადღება გაამახვილეს უვიზო მიმოსვლის ამოქმედებაზე, პირდაპირი ავიარეისების ზრდაზე, თავისუფალი ვაჭრობის შესაძლებლობებსა და საგანმანათლებლო დიპლომების ურთიერთაღიარებაზე. შეხვედრაზე აღინიშნა, რომ აღნიშნულმა გადაწყვეტილებებმა ორ ქვეყანას შორის მოქალაქეთა გადაადგილებას, ბიზნესკავშირებსა და საგანმანათლებლო თანამშრომლობას დამატებითი შესაძლებლობები შეუქმნა.

სამომავლო პრიორიტეტებად სამეცნიერო და კვლევით დაწესებულებებს შორის პარტნიორობის გაძლიერება, ტექნოლოგიურ სფეროში ერთობლივი ინიციატივების განვითარება და მაღალი დონის პოლიტიკური დიალოგის გაგრძელება დასახელდა.

აზერბიაჯანი

ჩინეთის კომუნისტური პარტიის დელეგაცია აზერბაიჯანს ეწვია

23 ივლისი

20 ივლისს „ახალი აზერბაიჯანის პარტიის“ მიწვევით, ბაქოს ჩინეთის კომუნისტური პარტიის ცენტრალური კომიტეტის დელეგაცია ეწვია, რომელსაც საერთაშორისო ურთიერთობების დეპარტამენტის წარმომადგენელი კან შუაი ხელმძღვანელობდა.

ვიზიტის ფარგლებში დელეგაცია მმართველი პარტიის ახალგაზრდულ ორგანიზაციას შეხვდა, სახელმწიფო მართვის აკადემიაში ჩინეთის სახელმწიფო მართვის გამოცდილებისადმი მიძღვნილ ღონისძიებას დაესწრო და პარტიულ და ახალგაზრდულ თანამშრომლობაზე იმსჯელა.

21 ივლისს დელეგაცია აზერბაიჯანის პარლამენტის თავმჯდომარე საჰიბა გაფაროვამ მიიღო. შეხვედრაზე მხარეებმა საპარლამენტო და პარტიული კავშირების გაძლიერება, ასევე ეკონომიკის, ვაჭრობის, განათლების, კულტურისა და ახალგაზრდული პოლიტიკის სფეროებში თანამშრომლობა განიხილეს. ვიზიტი 23 ივლისს „ახალი აზერბაიჯანის პარტიის“ თავმჯდომარის მოადგილე ტაჰირ ბუდაგოვთან შემაჯამებელი შეხვედრით დასრულდა.

 

აზერბაიჯანმა და PowerChina Resources-მა მწვანე ენერგიის პროექტები განიხილეს

23 ივლისი

აზერბაიჯანი ჩინურ კომპანია PowerChina Resources-თან განახლებადი ენერგიის სფეროში თანამშრომლობის გაფართოებას განიხილავს. 23 ივლისს ბაქოში გამართულ შეხვედრაზე ყურადღება გამახვილდა მზისა და ქარის ელექტროსადგურების განვითარებაზე, ენერგიის ექსპორტსა და სახელმწიფო–კერძო პარტნიორობის ფორმატში ახალი პროექტების განხორციელებაზე.

აზერბაიჯანის ეკონომიკის მინისტრი მიქაილ ჯაბაროვი კომპანიის პრეზიდენტ იან ტიანფუს შეხვდა. მხარეებმა შეაფასეს ჩინური კომპანიის შესაძლო მონაწილეობა ქვეყნის ენერგეტიკულ პროექტებში და განიხილეს თანამშრომლობის პრაქტიკული მიმართულებები.

შეხვედრაზე საუბარი შეეხო ასევე მინერალური რესურსებისა და წყლის მარაგების ეფექტიან მართვას. აზერბაიჯანის ეკონომიკის სამინისტროს განცხადებით, განახლებადი ენერგია და რესურსების მდგრადი გამოყენება აზერბაიჯან–ჩინეთის ეკონომიკური პარტნიორობის ერთ–ერთ პერსპექტიულ მიმართულებად რჩება.

 

ბაქოს სახელმწიფო უნივერსიტეტი ჩინეთის ლიაოდუნის უნივერსიტეტთან თანამშრომლობას იწყებს

23 ივლისი

23 ივლისს ბაქოს სახელმწიფო უნივერსიტეტმა ჩინეთის ლიაოდუნის უნივერსიტეტთან აკადემიური და სამეცნიერო თანამშრომლობის მემორანდუმი გააფორმა. შეთანხმება ორ უნივერსიტეტს შორის კვლევითი, საგანმანათლებლო და გაცვლითი პროგრამების განვითარებას ითვალისწინებს.

მემორანდუმის ფარგლებში მხარეები ერთობლივი სამეცნიერო კვლევებისა და კონფერენციების ორგანიზებას, სასწავლო პროგრამების შემუშავებასა და აკადემიური პუბლიკაციების მომზადებას გეგმავენ. დოკუმენტი ასევე ითვალისწინებს სტუდენტების, მკვლევრებისა და ადმინისტრაციული პერსონალის გაცვლას.

შეთანხმებას ხელი ბაქოს სახელმწიფო უნივერსიტეტის რექტორმა ელჩინ ბაბაევმა და ლიაოდუნის უნივერსიტეტის რექტორმა ფუ ლიბინმა მოაწერეს. უნივერსიტეტების შეფასებით, თანამშრომლობა მათ შორის აკადემიური კავშირების გაღრმავებასა და ერთობლივი პროექტების განხორციელებას შეუწყობს ხელს.

ჩინეთი სამხრეთ კავკასიასა და უზბეკეთში (20-26 ივლისი) Read More »

ჩინეთის ინიციატივით პაკისტანი აშშ-ირანის მოლაპარაკებების აღდგენას ცდილობს

ერთი ახალი ამბავი / /

პაკისტანი აშშ–სა და ირანს შორის შეჩერებული მოლაპარაკებების აღსადგენად წინასწარ დიპლომატიურ კონსულტაციებს მართავს. Reuters-ის ცნობით, ინიციატივა ჩინეთისგან მოდის, რომელიც თითქმის ხუთთვიანი სამხედრო დაპირისპირების დასრულებასა და რეგიონში მნიშვნელოვანი სავაჭრო მარშრუტების აღდგენას ცდილობს.

უცხოური წყაროების თანახმად, აშშ–ირანის შესაძლო მოლაპარაკებები ირანის შინაგან საქმეთა მინისტრ ესკანდარ მომენის ისლამაბადში ვიზიტისას განიხილეს. ბოლო ათი დღის განმავლობაში ეს მისი მეორე ვიზიტი იყო პაკისტანში. მომენი პრემიერ–მინისტრ შეჰბაზ შარიფსა და შეიარაღებული ძალების მეთაურ ასიმ მუნირს შეხვდა. პაკისტანელი ოფიციალური პირის განცხადებით, მოლაპარაკებების განახლების ერთ–ერთი წინაპირობა საუდის არაბეთსა და სპარსეთის ყურის სხვა ქვეყნებზე თავდასხმების შეწყვეტაა.

ჩინეთის დაინტერესება უშუალოდ მის ეკონომიკურ და ენერგეტიკულ ინტერესებს უკავშირდება. პეკინი ირანის უმსხვილესი სავაჭრო პარტნიორი და მისი ექსპორტირებული ნავთობის მთავარი მყიდველია. ჰორმუზის სრუტის თითქმის დახურვა და წითელ ზღვაში გადაზიდვებისთვის შექმნილი საფრთხეები ჩინეთისთვის მნიშვნელოვან ენერგეტიკულ და სავაჭრო მარშრუტებს აზიანებს.

ჩინეთის საგარეო საქმეთა სამინისტრო აცხადებს, რომ პეკინი მხარს უჭერს პაკისტანისა და სხვა მხარეების შუამავლობას და სპარსეთის ყურის რეგიონში მშვიდობის აღსადგენად აქტიური როლის შესრულებას გააგრძელებს. ჩინეთმა და პაკისტანმა 16 ივლისსაც მოუწოდეს აშშ–სა და ირანს, შეეწყვიტათ საბრძოლო მოქმედებები და დიალოგს დაბრუნებოდნენ.

ჩინეთის ინიციატივით პაკისტანი აშშ-ირანის მოლაპარაკებების აღდგენას ცდილობს Read More »

ვანი-რუბიოს შეხვედრაზე სი ძინ პინის აშშ-ში ვიზიტი განიხილეს

ერთი ახალი ამბავი / /

ჩინეთის საგარეო საქმეთა მინისტრი ვან ი და აშშ–ის სახელმწიფო მდივანი მარკო რუბიო მანილაში, ASEAN-ის შეხვედრების ფარგლებში 22 ივლისს შეხვდნენ. მოლაპარაკებების ერთ–ერთი მთავარი თემა სექტემბერში ჩინეთის პრეზიდენტ სი ძინპინის ვაშინგტონში მოსალოდნელი ვიზიტისთვის მომზადება იყო.

მხარეებმა ასევე განიხილეს აშშ–ჩინეთის სავაჭრო ურთიერთობები, ტაივანის საკითხი და სამხრეთ ჩინეთის ზღვაში არსებული დაძაბულობა. რუბიოს განცხადებით, ქვეყნებს შორის არსებული უთანხმოებების მიუხედავად, ვაშინგტონმა და პეკინმა არ უნდა დაუშვან, რომ განსხვავებები უკონტროლო ესკალაციაში გადაიზარდოს.

ჩინეთის საგარეო საქმეთა სამინისტროს ცნობით, ვან იმ ამერიკულ მხარეს მოუწოდა, პატივი სცეს ჩინეთის „ძირითად ინტერესებს“, დაიცვას „ერთი ჩინეთის“ პრინციპი და თავი შეიკავოს ისეთი ნაბიჯებისგან, რომლებიც ორმხრივ ურთიერთობებში დაძაბულობას გააღრმავებს.

შეხვედრა ორივე მხარემ პრაგმატულ, პოზიტიურ და კონსტრუქციულ დიალოგად შეაფასა. მოლაპარაკებები აშშ–ჩინეთის ურთიერთობებში არსებული დაძაბულობის ფონზე გაიმართა და მხარეებს შორის მაღალი დონის კომუნიკაციის შენარჩუნებას ისახავდა მიზნად.

ვანი-რუბიოს შეხვედრაზე სი ძინ პინის აშშ-ში ვიზიტი განიხილეს Read More »

Scroll to Top