Civicidea

კირ სტარმერი ჩინეთში ოფიციალური ვიზიტისთვის გაემგზავრა

ერთი ახალი ამბავი / /

დიდი ბრიტანეთის პრემიერ-მინისტრი სერ კირ სტარმერი 28-31 იანვარს ოფიციალურად სტუმრობს ჩინეთის სახალხო რესპუბლიკას. ხუთშაბათს ის პრეზიდენტ სი ძინპინს შეხვდება.

ვიზიტში სერ კირ სტარმერს ბიზნეს მდივანი პიტერ კაილი და ფინანსთა სამინისტროს ეკონომიკის მდივანი ლუსი რიგბი უერთდებიან. ვიზიტში პრემიერ-მინისტრთან ერთად დაახლოებით 50 ბრიტანელი ბიზნესისა და კულტურის ლიდერი მიიღებს მონაწილეობას.

ბრიტანეთის ხელისუფლების განცხადებით, ეს ვიზიტი ჩინეთთან ურთიერთობის აღდგენის ერთ-ერთი ყველაზე მნიშვნელოვანი ეტაპია. სტარმერის თქმით, ბრიტანეთის მიდგომა ჩინეთის მიმართ წლების განმავლობაში არათანმიმდევრული იყო, თუმცა, „გარდა გამოწვევებისა, ჩინეთთან სტრატეგიული ურთიერთობა ეროვნული ინტერესების სასარგებლოა“.

აღნიშნულ საკითხზე, პეკინის კომერციის სამინისტრომ განაცხადა, რომ ქვეყანა დიდ მნიშვნელობას ანიჭებს ეკონომიკურ და სავაჭრო თანამშრომლობას გაერთიანებულ სამეფოსთან და არის მზად, ეს ვიზიტი გამოიყენოს პოლიტიკური ნდობის გაძლიერებისა და პრაქტიკული თანამშრომლობის გაღრმავებისთვის. მინისტრის მოადგილის განცხადებით, ჩინური და ბრიტანული კომპანიები აქტიურად დაინტერესდნენ თანამშრომლობით, რასაც უკვე 100-ზე მეტი კომპანია გამოეხმაურა.

ვიზიტის ფარგლებში მოსალოდნელია ისეთი საკითხების მიმოხილვა, როგორიცაა ადამიანის უფლებები, ჰონგ კონგის მდგომარეობა, სინძიანგი, უკრაინის ომი და ჩინეთის როლი საერთაშორისო უსაფრთხოებაში. ასევე, ყურადღება დაეთმობა ჩინური კომპანიების მონაწილეობას ბრიტანეთის ინფრასტრუქტურაში.

უნდა აღინიშნოს, რომ სერ კირ სტარმერი უკვე შეხვდა პრეზიდენტ სი ძინპინს 2024 წლის ნოემბერში G20 სამიტზე რიო-დე-ჟანეიროში, თუმცა ეს იქნება პირველი ოფიციალური ვიზიტი ბრიტანელი პრემიერ-მინისტრის მხრიდან ჩინეთში 2018 წლის შემდეგ.

ავტორი: მარიამ სიმსივე

კირ სტარმერი ჩინეთში ოფიციალური ვიზიტისთვის გაემგზავრა Read More »

“სამოქალაქო იდეას”  კონტრიბუცია გაეროს ადამიანის უფლებათა შეფასების ანგარიშში

ამბები / /

ჩვენი ორგანიზაციის მონაწილეობით მომზადებული ანგარიში მოხსენიებულია გაეროს UPR პროცესის Stakeholders’ Summary-ში, როგორც Joint Submission 1 (JS1). ეს ნიშნავს, რომ ჩვენი ხმა გათვალისწინებულია საქართველოს ადამიანის უფლებათა მდგომარეობის საერთაშორისო შეფასებისას.

UPR არის მექანიზმი, რომელიც შეისწავლის გაეროს თითოეული წევრი სახელმწიფოს ადამიანის უფლებათა მდგომარეობას და ეფუძნება როგორც სახელმწიფო ანგარიშებს, ასევე სამოქალაქო საზოგადოებისა და დამოუკიდებელი ექსპერტების მასალებს.

ანგარიშში ხაზგასმულია რამდენიმე მნიშვნელოვანი გამოწვევა, მათ შორის: 

  • სამოქალაქო სივრცის შემცირება და ზეწოლა არასამთავრობო ორგანიზაციებზე, ჟურნალისტებსა და ადამიანის უფლებათა დამცველებზე

  • საკანონმდებლო ცვლილებები, რომლებიც ზღუდავს ადამიანის უფლებებს, მათ შორის შეკრების თავისუფლებას

  • ძალის გადამეტებული გამოყენება საპროტესტო აქციებზე და აქტივისტებზე მიმართული სამართლებრივი ზეწოლის შემთხვევები

 შედეგების სრული ანგარიში  უახლოეს პერიოდში გამოქვეყნდება.

“სამოქალაქო იდეას”  კონტრიბუცია გაეროს ადამიანის უფლებათა შეფასების ანგარიშში Read More »

ჩინეთის ორი უმაღლესი რანგის გენერალი თანამდებობიდან მოხსნეს

ერთი ახალი ამბავი / /

ჩინეთში ხელისუფლებამ 2026 წლის 24 იანვარს ორი უმაღლესი რანგის სამხედრო ლიდერი თანამდებობიდან მოხსნა. საუბარია ცენტრალური სამხედრო კომისიის (CMC) წევრ გენერლებზე – ჟან იოუსიასა და ლიუ ჟენლიზე, რომლებიც ჩინეთის სახალხო-განმათავისუფლებელი არმიის უმაღლეს რგოლში გადამწყვეტ როლს ასრულებდნენ.

ჟან იოუსია CMC-ის ვიცე-თავმჯდომარის პოსტს იკავებდა და არმიაში ერთ-ერთ ყველაზე გავლენიან ფიგურად ითვლებოდა. იგი წლების განმავლობაში პრეზიდენტ სი ძინპინის ახლო თანამოაზრედ განიხილებოდა და სამხედრო რეფორმებისა და არმიის მოდერნიზაციის პროცესში მნიშვნელოვანი მონაწილეობა ჰქონდა.

ლიუ ჟენლი კი CMC-ის გაერთიანებული შტაბის დეპარტამენტის უფროსის პოზიციას იკავებდა და პასუხისმგებელი იყო სამხედრო ოპერაციების დაგეგმვასა და არმიის საბრძოლო მზადყოფნაზე.

ოფიციალური ვერსიით, გენერლები „სერიოზული დისციპლინური დარღვევების“ გამო გადააყენეს და მათ წინააღმდეგ საგამოძიებო პროცედურებია დაწყებული. თუმცა ჩინეთის ხელისუფლებას ბრალდებების შინაარსი დეტალურად არ დაუზუსტებია. ამ ეტაპზე ოფიციალურად არ დასტურდება, არიან თუ არა გენერლები დაკავებულნი, თუმცა ისინი საჯარო სივრციდან სრულად გაქრნენ.

ამასთან, The Wall Street Journal-ის მიერ გავრცელებული ინფორმაციის მიხედვით, რასაც The Straits Times ციტირებს, ჟან იოუსია ეჭვმიტანილია, რომ მან ამერიკის შეერთებულ შტატებს ჩინეთის ბირთვული იარაღის პროგრამასთან დაკავშირებული სენსიტიური ინფორმაცია გადასცა, ასევე ბრალდება ეხება ქრთამის აღებას ოფიციალური გადაწყვეტილებების სანაცვლოდ, მათ შორის სამხედრო დაწინაურებების ხელშეწყობას. აღნიშნული ცნობები ეფუძნება პეკინში გამართულ შიდა ბრიფინგზე ინფორმირებულ წყაროებს. ჩინეთის ხელისუფლებას აღნიშნული ბრალდებები საჯაროდ არ დაუდასტურებია.

ბოლო განახლება 26 იანვარს გავრცელდა, როდესაც სახელმწიფო მედიისა და საერთაშორისო გამოცემების ცნობით, პეკინმა კიდევ ერთხელ გაუსვა ხაზი არმიაში „პარტიული დისციპლინისა და პოლიტიკური სიწმინდის“ მნიშვნელობას.

ამ ეტაპზე უცნობია, ვინ ჩაანაცვლებს მოხსნილ გენერლებს და როგორ აისახება ეს გადაწყვეტილება ჩინეთის სამხედრო სტრუქტურასა და მმართველობის სისტემაზე.

ჩინეთის ორი უმაღლესი რანგის გენერალი თანამდებობიდან მოხსნეს Read More »

ჩინეთი სამხრეთ კავკასიასა და ყირგიზეთში (19-25 იანვარი)

კვირის ამბავი / /

საქართველო

საქართველოს ელჩი ჩინეთში ჩინეთ-ევროპის ტექნიკური და ეკონომიკური თანამშრომლობის ასოციაციის ხელმძღვანელობას შეხვდა

20 იანვარი

2026 წლის 20 იანვარს პეკინში საქართველოს ელჩმა ჩინეთის სახალხო რესპუბლიკაში პაატა კალანდაძემ სამუშაო შეხვედრა გამართა ჩინეთ-ევროპის ტექნიკური და ეკონომიკური თანამშრომლობის ასოციაციის (CEATEC) აღმასრულებელ ვიცე-პრეზიდენტსა და გენერალურ მდივანთან, ლუ მეიჟენთან.

შეხვედრის ფარგლებში მხარეებმა იმსჯელეს საქართველო-ჩინეთს შორის თანამშრომლობის გაღრმავების შესაძლებლობებზე მაღალტექნოლოგიური და განახლებადი ენერგიის სფეროებში. განხილვის მთავარი თემები იყო ქარის, მზის, წყალბადის და ენერგიის შენახვის ტექნოლოგიები და ის მიმართულებები, სადაც CEATEC აქტიურად მუშაობს.

ელჩმა პაატა კალანდაძემ ყურადღება გაამახვილა საქართველოს ხელსაყრელ საინვესტიციო გარემოზე და ხაზი გაუსვა ქვეყნის პოტენციალს „მწვანე ენერგიის“ მიმართულებით. მან ასევე აღნიშნა საქართველოს ინტერესი, ენერგეტიკული სექტორის მოდერნიზაციის მიზნით, ჩინური ინოვაციური ტექნოლოგიების დანერგვაზე.

ლუ მეიჟენმა დაადასტურა მზადყოფნა საქართველოსთან აქტიური თანამშრომლობისთვის და აღნიშნა, რომ CEATEC მზად არის ხელი შეუწყოს წამყვანი ჩინური ტექნოლოგიური კომპანიების ინტერესის ზრდას საქართველოს ენერგეტიკულ ბაზარზე.

შეხვედრის დასასრულს მხარეები შეთანხმდნენ მჭიდრო კოორდინაციის გაგრძელებაზე, მათ შორის ერთობლივი ეკონომიკური ფორუმებისა და თემატური სემინარების ორგანიზებაზე.

წყარო: EMBASSY OF GEORGIA TO THE PEOPLE`S REPUBLIC OF CHINA

აზერბაიჯანი

აზერბაიჯანი და ჩინური კომპანიები ალუმინის ერთობლივ წარმოებაზე მსჯელობენ

19 იანვარი

აზერბაიჯანის მთავრობამ და ჩინურმა კომპანიებმა, Wanji-მა და Sunstone-მ, ალუმინის წარმოების სფეროში ერთობლივი პროექტების განხორციელებისა და ორმხრივი თანამშრომლობის გაფართოების შესაძლებლობები განიხილეს.

აზერბაიჯანის ეკონომიკის სამინისტროს ინფორმაციით, აზერბაიჯანის ეკონომიკის მინისტრის მოადგილე სამად ბაშირლი ჩინური კომპანიების ხელმძღვანელებს შეხვდა.

კომპანიების წარმომადგენლებს გააცნეს აზერბაიჯანში არსებული ხელსაყრელი საინვესტიციო გარემო, ინდუსტრიულ ზონებში შექმნილი ინფრასტრუქტურა, აგრეთვე ინვესტორებისთვის გათვალისწინებული სტიმულები და მხარდაჭერის მექანიზმები.

შეხვედრაზე აღინიშნა, რომ აზერბაიჯანი განსაკუთრებულ მნიშვნელობას ანიჭებს ინდუსტრიულ და ტექნოლოგიაზე ორიენტირებული პროექტების განხორციელებას და დაინტერესებულია უცხოელ ინვესტორებთან გრძელვადიანი თანამშრომლობის განვითარებით.

მოლაპარაკებების მთავარი აქცენტი გაკეთდა ურთიერთთანამშრომლობის გაფართოებასა და ალუმინის წარმოების სფეროში ერთობლივი პროექტების განხორციელების შესაძლებლობებზე.

Wanji ერთ-ერთი ჩინური კომპანიაა, რომელიც სპეციალიზდება ინდუსტრიის, ტრანსპორტისა და ტექნოლოგიური გადაწყვეტილებების მიმართულებით. კომპანია მუშაობს ინოვაციური პროდუქტებისა და სერვისების განვითარებაზე, წარმოების ეფექტიანობის გაუმჯობესებასა და საერთაშორისო ბაზრებზე თანამშრომლობის გაფართოებაზე.

Sunstone კი დაკავებულია ალუმინის ინდუსტრიისთვის განკუთვნილი ნახშირბადოვანი მასალების (წინასწარ გამომწვარი ანოდების) კვლევით, წარმოებითა და რეალიზაციით და ამ ეტაპზე წარმოადგენს ჩინეთის ერთ-ერთ წამყვან ექსპორტიორს აღნიშნულ სფეროში.

წყარო: Report.az

აკშინ ალიევი: აზერბაიჯანული ენის ჩინეთში სწავლება საპატიო მისიაა

19 იანვარი

აზერბაიჯანული ენის ჩინეთში სწავლება საპატიო და მნიშვნელოვანი მისიაა, განაცხადა აზერბაიჯანელმა მეცნიერმა და ჩინური ენისა და ლიტერატურის სპეციალისტმა აქშინ ალიევმა.

ალიევმა ეს განცხადება აზერბაიჯანსა და ჩინეთს შორის კულტურული და საგანმანათლებლო თანამშრომლობის გაფართოების კონტექსტში გააკეთა, მათ შორის იმ ინიციატივების ფარგლებში, რომლებიც ჩინეთის საგანმანათლებლო დაწესებულებებში აზერბაიჯანული ენის სწავლასა და პოპულარიზაციას ისახავს მიზნად. მისი თქმით, ენის სწავლება მნიშვნელოვან როლს ასრულებს ორმხრივი კავშირების გაძლიერებასა და ურთიერთგაგების ხელშეწყობაში.

ალიევის განცხადებით, აზერბაიჯანული ენის საზღვარგარეთ სწავლებისთვის შესაძლებლობების შექმნა ასახავს აზერბაიჯანის კულტურულ გახსნილობასა და ფართო საერთაშორისო თანამშრომლობისადმი ერთგულებას.

მისივე თქმით, აზერბაიჯანული ენის ჩინეთში პოპულარიზაცია უნდა განიხილებოდეს არა მხოლოდ საგანმანათლებლო პრიორიტეტად, არამედ დიპლომატიურ მიღწევადაც, რომელიც ხელს უწყობს ბაქოსა და პეკინს შორის ურთიერთობების საერთო განვითარებას.

ალიევმა ასევე აღნიშნა, რომ საგანმანათლებლო და კულტურული გაცვლები გრძელვადიანი ორმხრივი თანამშრომლობის ერთ-ერთ მთავარ საყრდენს წარმოადგენს.

წყარო: Azertag.az

სომხეთი

სომხეთში ექსპორტის მოცულობით ლიდერები რუსეთი, არაბთა გაერთიანებული საამიროები და ჩინეთი არიან

23 იანვარი

2025 წლის პირველი თერთმეტი თვის განმავლობაში სომხეთის ექსპორტის მოცულობა 40.6%-ით შემცირდა, თუმცა ექსპორტის მთავარ მიმართულებებად კვლავ რუსეთი, არაბთა გაერთიანებული საამიროები და ჩინეთი დარჩა.

ოფიციალური მონაცემების თანახმად, 2025 წლის იანვარ–ნოემბერში სომხეთის სავაჭრო ბრუნვამ 18.9 მილიარდი დოლარი შეადგინა, რაც 2024 წლის ანალოგიურ პერიოდთან შედარებით 33.2%-ით ნაკლებია. ექსპორტმა 7.35 მილიარდი დოლარი შეადგინა, იმპორტმა კი 11.56 მილიარდი დოლარი, რაც შესაბამისად 40.6%-იან და 27.4%-იან შემცირებას ნიშნავს.

სომხეთის მესამე უმსხვილესი იმპორტიორია ჩინეთი. ჩინეთში სომხეთის ექსპორტის მაჩვენებელმა 648.5 მილიონი დოლარი შეადგინა, რაც წინა წელთან შედარებით 38.1%-ით ნაკლებია.

წყარო: armenpress.am

ყირგიზეთი

ყირგიზეთი ჩინეთთან ენერგეტიკის სფეროში თანამშრომლობას აფართოებს

23 იანვარი

ყირგიზეთი ენერგეტიკული დეფიციტის დასაძლევად სულ უფრო მეტად ამყარებს ნახშირის სფეროში თანამშრომლობას ჩინეთთან, განსაკუთრებით ზამთრის პერიოდში, როდესაც ელექტროენერგიის მოხმარება იზრდება და ჰიდროენერგიის გამომუშავება მცირდება.

ენერგეტიკის სამინისტროს შეფასებით, კლიმატის ცვლილების ფონზე ჰიდროენერგეტიკის არასტაბილურობამ თბოელექტროსადგურების მნიშვნელობა გაზარდა. ხელისუფლება ნახშირით მომუშავე გენერაციას განიხილავს როგორც სტაბილურ და გარდამავალ ენერგეტიკულ სტრატეგიას, სანამ გრძელვადიანი პროექტები განხორციელდება.

22 იანვარს ენერგეტიკის მინისტრი ტალააიბეკ იბრაევი შეხვდა საერთაშორისო კონსორციუმის წარმომადგენლებს და ნახშირის საბადოებთან უშუალოდ თბოელექტროსადგურების მშენებლობა შესთავაზა. ეს არის მოდელი, რომელიც ფართოდ გამოიყენება ჩინეთში. კონსორციუმმა გამოთქვა მზადყოფნა სამი ნახშირით მომუშავე ელექტროსადგურის აშენებაზე, საერთო სიმძლავრით 1 050 მეგავატი, თანამედროვე „სუფთა ნახშირის“ ტექნოლოგიების გამოყენებით.

ჩინეთი ყირგიზული ნახშირის ექსპორტისთვის სულ უფრო მნიშვნელოვანი ბაზარი ხდება. 2024 წელს ჩინეთში ექსპორტი 118 200 ტონამდე გაიზარდა, რაც მკვეთრი ზრდაა წინა წელთან შედარებით. ხელისუფლების შეფასებით, ეს ტენდენცია ორ ქვეყანას შორის ენერგეტიკული თანამშრომლობის გაღრმავებას ასახავს.

წყარო: The Times Of Central Asia

ჩინეთი სამხრეთ კავკასიასა და ყირგიზეთში (19-25 იანვარი) Read More »

ჩინური კომპანიები საქართველოში

ამბები, კვლევა / /

გიზიარებთ სამოქალაქო იდეას ახალი ანგარიშს: „ჩინური კომპანიები საქართველოში“.

2017 წლიდან მოყოლებული, სამოქალაქო იდეა იკვლევს სახელმწიფო ტენდერებში მონაწილე ჩინურ კომპანიებს. წინამდებარე ანგარიშში გაერთიანებულია აღნიშნული კომპანიების საქმიანობასთან დაკავშირებული ძირითადი ტენდენციები.

„ქართული ოცნების“ პარტნიორი ჩინური კომპანიების საქმიანობის თანმდევი რისკების, შესაძლო დარღვევების და ანგარიშვალდებულების ხარისხის ანალიზის შედეგად დგინდება, რომ ჩინური კომპანიების ჩართულობით მიმდინარე სახელმწიფო პროექტები ხასიათდება კორუფციის რისკებით, სუსტი სათანადო გადამოწმების (due dilligence) პრაქტიკით და სამართლებრივი თუ ეთიკური სახის დარღვევებით.

მთელი რიგი შემაშფოთებელი მტკიცებულებები აჩვენებს, რომ თითოეულ ჩინურ კომპანიას, რომელიც „ქართულ ოცნებასთან“ თანამშრომლობს, სულ მცირე, ერთი სერიოზული სამართლებრივი, ფინანსური ან ეთიკური დარღვევა უკავშირდება.

კვლევა სრულად

ჩინური კომპანიები საქართველოში Read More »

ჩინეთი დავოსში გლობალურ ეკონომიკურ თანამშრომლობაზე საუბრობს

ერთი ახალი ამბავი / /

20 იანვარს დავოსში, მსოფლიო ეკონომიკური ფორუმის (WEF) ფარგლებში, ჩინეთის ვიცე-პრემიერმა ჰე ლიფენგმა ქვეყნის ძირითადი ეკონომიკური გზავნილები წარმოადგინა, რომლებიც ღია ბაზრების გაფართოებას, მრავალმხრივ თანამშრომლობასა და გლობალური ეკონომიკური ზრდის მხარდაჭერას ეფუძნება.

მსოფლიო ეკონომიკური ფორუმი (WEF) არის საერთაშორისო არაკომერციული ორგანიზაცია, რომელიც ყოველწლიურად აერთიანებს სახელმწიფოების ლიდერებს, საერთაშორისო ორგანიზაციებს, ბიზნესისა და აკადემიური წრეების წარმომადგენლებს გლობალური ეკონომიკური და პოლიტიკური საკითხების განსახილველად.

სპეციალურ მიმართვაში ჰე ლიფენგმა განაცხადა, რომ ჩინეთი გააგრძელებს ეკონომიკის გახსნას და უცხოური ბიზნესისთვის ბაზარზე ხელმისაწვდომობის გაზრდას. მისი თქმით, ქვეყანა განაგრძობს მაღალი დონის ღიაობის პოლიტიკას, გააძლიერებს საერთაშორისო სტანდარტებთან შესაბამისობას და შექმნის თანაბარ პირობებს როგორც ადგილობრივი, ისე უცხოური კომპანიებისთვის.

ვიცე-პრემიერმა აღნიშნა, რომ ჩინეთის განვითარება „არ წარმოადგენს საფრთხეს, არამედ შესაძლებლობას“ გლობალური ეკონომიკისთვის. მისი თქმით, პეკინი მზად არის იმპორტის გაზრდისთვის, რაც საერთაშორისო პარტნიორებისთვის დამატებით ეკონომიკურ შესაძლებლობებს შექმნის.

ჰე ლიფენგმა ყურადღება გაამახვილა გლობალური ეკონომიკის წინაშე არსებულ გამოწვევებზეც და განაცხადა, რომ პროტექციონიზმისა და ეკონომიკური იზოლაციის ნაცვლად აუცილებელია დიალოგი და თანამშრომლობა, რაც გლობალური სტაბილურობის შენარჩუნების ერთ-ერთ მთავარ წინაპირობად რჩება.

ამავე ფორუმის ფარგლებში სხვა ლიდერებმაც ისაუბრეს გლობალურ ეკონომიკაში ჩინეთის როლთან დაკავშირებულ საკითხებზე. კერძოდ, საფრანგეთის პრეზიდენტმა ემანუელ მაკრონმა დავოსში გამოსვლისას აღნიშნა, რომ გლობალური ეკონომიკური კონკურენცია საჭიროებს მკაფიო წესებსა და სამართლიან ჩარჩოებს, რათა საერთაშორისო ეკონომიკური სისტემა დარჩეს სტაბილური და პროგნოზირებადი.

ამ კონტექსტში მან ჩინეთი გლობალური ეკონომიკის ერთ-ერთ მნიშვნელოვან აქტორად მოიხსენია და ზოგადად იმ რისკებზე ისაუბრა, რომლებიც, მისი შეფასებით, სახელმწიფო მხარდაჭერისა და ინდუსტრიული პოლიტიკის შედეგად შეიძლება წარმოიშვას საერთაშორისო ბაზრებზე. მაკრონის თქმით, მსგავსი ფაქტორები შესაძლოა გავლენას ახდენდეს კონკურენციის სამართლიანობაზე და დამატებით ზეწოლას ქმნიდეს ევროპულ წარმოებაზე, რაც საერთაშორისო ეკონომიკური წესების უფრო მკაფიო დაცვას საჭიროებს.

საფრანგეთის პრეზიდენტმა ასევე აღნიშნა, რომ გლობალური ეკონომიკური გამოწვევების საპასუხოდ გამოსავალი არ უნდა იყოს კონფრონტაცია, არამედ დიალოგზე, თანამშრომლობასა და წესებზე დაფუძნებულ საერთაშორისო ჩარჩოებზე დამყარებული პოლიტიკა.

ამავე ფორუმზე ბიორგე ბრენდემ, მსოფლიო ეკონომიკური ფორუმის პრეზიდენტმა და აღმასრულებელმა დირექტორმა, განაცხადა, რომ „გლობალური გაურკვევლობის პირობებში დიალოგი არ არის ფუფუნება, არამედ აუცილებლობა“, რაც ეკონომიკური ფრაგმენტაციისა და გეოპოლიტიკური დაძაბულობის ფონზე თანამშრომლობის მნიშვნელობას უსვამს ხაზს.

ამასთან, მსოფლიო ეკონომიკური ფორუმის ინფორმაციით, დავოსში შეხვედრა 20-24 იანვარს გაიმართება და მასში მონაწილეობას მიიღებს 3 000-მდე წარმომადგენელი 130 ქვეყნიდან და საერთაშორისო ორგანიზაციიდან.

წყარო:

China Global Television Network

The World Economic Forum

CNBC-TV18

ავტორი: მარიამ სიმსივე

ჩინეთი დავოსში გლობალურ ეკონომიკურ თანამშრომლობაზე საუბრობს Read More »

ჩინეთი უცხოურ ძალებს სენსიტიური გეომონაცემების ფარულ მოპოვებაში ადანაშაულებს

ერთი ახალი ამბავი / /

ჩინეთის სახელმწიფო უსაფრთხოების სამინისტრო აცხადებს, რომ უცხოური ძალები ფარულად ცდილობენ ქვეყნის სენსიტიური გეოგრაფიული მონაცემების მოპოვებასა და გატანას. უწყების განცხადებით, აღნიშნული ქმედებები საფრთხეს უქმნის ჩინეთის ეროვნულ უსაფრთხოებას.

ჩინეთის სახელმწიფო უსაფრთხოების სამინისტრო (MSS) განმარტავს, რომ „ანტიჩინური მტრული ძალები“ სხვადასხვა მეთოდს იყენებენ, მათ შორის ფარულ რუკათმშენებლობას, მონაცემების უკანონო შეგროვებასა და გადაცემას, რათა მიიღონ ინფორმაცია ქვეყნის რელიეფის, ბუნებრივი რესურსებისა და ინფრასტრუქტურის შესახებ.

უწყების თქმით, მსგავსი გეომონაცემები მნიშვნელოვან როლს ასრულებს როგორც ეკონომიკურ დაგეგმვაში, ისე სამხედრო და ლოჯისტიკურ პროცესებში, რის გამოც მათი გაჟონვა სერიოზულ საფრთხედ ფასდება. სამინისტრო ასევე ყურადღებას ამახვილებს მონაცემთა არასათანადო დაცვაზე, რაც უცხო მხარეებისთვის მონაცემებზე წვდომის რისკს ზრდის.

ჩინეთის ხელისუფლება ბოლო წლებში ამკაცრებს მონაცემთა უსაფრთხოებასთან დაკავშირებულ კანონმდებლობას და კონტროლს, რაც, ოფიციალური პეკინის განმარტებით, ციფრული სივრცის და ეროვნული უსაფრთხოების დაცვის აუცილებლობით არის განპირობებული.

უწყების გაფრთხილებაზე წერს South China Morning Post, რომლის მიხედვითაც, პეკინი გეოგრაფიულ და სივრცით მონაცემებს სტრატეგიულ რესურსად განიხილავს და მათზე კონტროლს უსაფრთხოების პოლიტიკის მნიშვნელოვან ნაწილად მიიჩნევს.

ჩინეთის მხრიდან მსგავსი განცხადებები ფართო კონტექსტში ჯდება და ასახავს მზარდ დაძაბულობას დასავლეთ ქვეყნებთან, განსაკუთრებით კი შეერთებულ შტატებთან, უსაფრთხოებისა და ტექნოლოგიების სფეროში.

წყარო: South China Morning Post

ავტორი: მარიამ სიმსივე

ჩინეთი უცხოურ ძალებს სენსიტიური გეომონაცემების ფარულ მოპოვებაში ადანაშაულებს Read More »

აშშ ჩინეთს აფრთხილებს, რომ არ გააფართოოს გავლენა ლათინურ ამერიკაში

ერთი ახალი ამბავი / /

აშშ-მ ჩინეთს მკაფიო გზავნილი გაუგზავნა, რომ თავი შეიკავოს ამერიკის კონტინენტზე პოლიტიკური და ეკონომიკური გავლენის გაძლიერებისგან. ამის შესახებ წერს Reuters, ვენესუელაში ჩატარებული აშშ-ის ოპერაციასთან დაკავშირებით, რომლის შედეგადაც 3 იანვარს ვენესუელის პრეზიდენტი ნიკოლას მადურო და მისი მეუღლე დააკავეს.

აშშ-ის ადმინისტრაციის მაღალი რანგის წარმომადგენლების განცხადებით, ვენესუელასთან დაკავშირებული ოპერაცია წარმოადგენს ფართო სტრატეგიის ნაწილს, რომლის მიზანიც ლათინურ ამერიკაში ჩინეთისა და რუსეთის მზარდი გავლენის შეზღუდვაა. Reuters-ის ცნობით, ვაშინგტონი რეგიონს საკუთარი ეროვნული უსაფრთხოების საკვანძო სივრცედ განიხილავს და ნებისმიერი კონკურენტული ძალის გაძლიერებას სტრატეგიულ გამოწვევად აფასებს.

გამოცემის ინფორმაციით, აშშ განსაკუთრებით შეშფოთებულია ჩინეთის ეკონომიკური ჩართულობის ზრდით ლათინურ ამერიკაში, მათ შორის ენერგეტიკულ სექტორში. ჩინეთი ბოლო წლებში ვენესუელას ერთ-ერთ მთავარ ეკონომიკურ პარტნიორად იქცა, განსაკუთრებით ნავთობის ექსპორტისა და ფინანსური მხარდაჭერის მიმართულებით. ამერიკელი ოფიციალური პირების თქმით, ეს თანამშრომლობა პეკინს რეგიონში არა მხოლოდ ეკონომიკურ, არამედ პოლიტიკურ ბერკეტებსაც აძლევს.

Reuters წერს, რომ ვენესუელაში განხორციელებული ნაბიჯები ჩინეთისთვის პირდაპირი სიგნალია – აშშ არ დაუშვებს ლათინურ ამერიკაში ისეთი გეოპოლიტიკური ძალების გამყარებას, რომლებიც მის ინტერესებს ეწინააღმდეგება. ოფიციალური პირების შეფასებით, საუბარია არა ერთ კონკრეტულ ქვეყანაზე, არამედ მთლიან რეგიონზე, სადაც ვაშინგტონი ცდილობს გავლენის ტრადიციული ბალანსის შენარჩუნებას.

აშშ-ის პოზიციის გამკაცრება იმ ფონზე ხდება, როდესაც პეკინი აქტიურად აფართოებს ეკონომიკურ კავშირებს ლათინური ამერიკის ქვეყნებთან ინფრასტრუქტურული პროექტების, სესხებისა და ენერგეტიკული თანამშრომლობის გზით. ამერიკული მხარე ამ პროცესს გრძელვადიან გამოწვევად მიიჩნევს და აცხადებს, რომ მსგავს ნაბიჯებს წინ აღუდგება როგორც დიპლომატიური, ისე უსაფრთხოების ინსტრუმენტებით.

წყარო: Reuters 

ავტორი: მარიამ სიმსივე 

აშშ ჩინეთს აფრთხილებს, რომ არ გააფართოოს გავლენა ლათინურ ამერიკაში Read More »

„ევროპის ფული, ჩინური კომპანიები და საქართველოს ავტორიტარები: პარადოქსი, რომელიც დასავლეთის ბერკეტებს ასუსტებს” – თინათინ ხიდაშელის ანალიტიკური სტატია

ამბები / /

სამოქალაქო იდეას ხელმძღვანელმა, თინათინ ხიდაშელმა, გამოაქვეყნა ანალიტიკური სტატია CEIAS – Central European Institute of Asian Studies-ის პლატფორმაზე, რომელიც ეხება გეოპოლიტიკის, ეკონომიკური სახელმწიფოებრივი პოლიტიკისა და დემოკრატიული მდგრადობის აქტუალურ გამოწვევებს.

სტატიაში – „ევროპის ფული, ჩინური კომპანიები და საქართველოს ავტორიტარები: პარადოქსი, რომელიც დასავლეთის ბერკეტებს ასუსტებს“ — ავტორი აანალიზებს იმ წინააღმდეგობებს, რომლებიც დასავლეთის პოლიტიკასა და ფინანსურ პრაქტიკაში არსებობს და რომლებიც,  ავტორიტარული მმართველობის გაძლიერებას უწყობს ხელს.

პუბლიკაციაში გამოკვეთილია სამი ძირითადი საკითხი:

    • დასავლეთის გავლენის შესუსტება პოლიტიკის არათანმიმდევრულობის გამო — მაშინ, როდესაც დასავლეთი სიტყვიერად აკრიტიკებს დემოკრატიულ უკუსვლასა და აძლიერებს პოლიტიკურ ზეწოლას , ფინანსური მხარდაჭერა ხშირად მაინც გრძელდება — კონკრეტული და მკაცრი დემოკრატიული მოთხოვნების გარეშე.
    • ჩინური სახელმწიფო კომპანიების გაძლიერება — კომპანიები, რომლებიც შეზღუდულნი ან სანქცირებულნი არიან ევროპასა და აშშ-ში, წარმატებით იღებენ მსხვილ ინფრასტრუქტურულ კონტრაქტებს დასავლეთის მხარდაჭერილი ფინანსური ინსტიტუტების დაფინანსებით.
    • საქართველო, როგორც ავტორიტარული ადაპტაციის ნათელი მაგალითი — ხელისუფლება იყენებს დასავლურ ფინანსებსა და ჩინურ კომპანიებს ფორმალური განვითარების უზრუნველსაყოფად, მაშინ როდესაც დემოკრატიული მმართველობა და ანგარიშვალდებულება სისტემურად სუსტდება.
სტატია სრულად

„ევროპის ფული, ჩინური კომპანიები და საქართველოს ავტორიტარები: პარადოქსი, რომელიც დასავლეთის ბერკეტებს ასუსტებს” – თინათინ ხიდაშელის ანალიტიკური სტატია Read More »

ჩინეთი ტაილანდსა და კამბოჯას შორის მოლაპარაკებებში ჩაერთო

ერთი ახალი ამბავი / /

ჩინეთი ტაილანდსა და კამბოჯას შორის გამწვავებული სამხედრო მოქმედებების შეწყვეტის მოლაპარაკებებში ჩაერთო. დეკემბრის დასაწყისიდან ჩინეთი აქტიურად მონაწილეობს ტაილანდსა და კამბოჯას შორის დაწყებული სამხედრო დაპირისპირების დასრულების მცდელობებში. საგარეო საქმეთა სამინისტროს სპეციალურმა წარმომადგენელმა აზიის საკითხებში, დენ სიძუნმა, 23 დეკემბერს დაასრულა ექვსდღიანი ვიზიტი ტაილანდსა და კამბოჯაში. ამ ვიზიტმა კიდევ ერთხელ გამოკვეთა ჩინეთის ინტერესები და მზაობა, წვლილი შეიტანოს სამხედრო კონფლიქტის შეწყვეტასა და მხარეებს შორის ურთიერთობების სტაბილიზაციაში. უშუალო ვიზიტის გარდა, გასულ კვირას საგარეო საქმეთა მინისტრმა ვანგ იმ სატელეფონო საუბარი გამართა კამბოჯისა და ტაილანდის საგარეო საქმეთა მინისტრებთან. 

ტაილანდსა და კამბოჯას შორის პრეაჰ ვიჰარის ტაძრის მიმდებარე ტერიტორიებთან დაკავშირებული დავა უკვე ათწლეულებია კონფლიქტის საგანს წარმოადგენს, რაც განსაკუთრებით 2025 წლის ივლისიდან საგანგაშოდ გამწვავდა. გავრცელებული ინფორმაციით, სამხედრო მოქმედებებმა უკვე 60-მდე ადამიანის სიცოცხლე შეიწირა, ხოლო ნახევარ მილიონზე მეტი ადამიანი იძულებით გადაადგილებულ პირად იქცა.

საყურადღებოა, რომ ეს ვიზიტი აჩვენებს ჩინეთის მცდელობას, შეასრულოს მნიშვნელოვანი როლი სამხრეთ-აღმოსავლეთ აზიის სახელმწიფოებს შორის ურთიერთობების დასტაბილურებაში. ეს გარკვეულწილად ცვლის მის საგარეო პოლიტიკურ კურსს, რომელიც აქამდე, სხვა ქვეყნების ტერიტორიული დავების დროს, ძირითადად „ჩუმ“ და ნეიტრალურ პოზიციას გულისხმობდა. ჩინეთის საგარეო საქმეთა სამინისტროს განცხადებაში ნათქვამია, რომ ქვეყანა ღრმად არის დამწუხრებული სამხედრო მოქმედებების დამანგრეველი შედეგებითა და მსხვერპლთა დიდი რაოდენობით და ორივე მხარეს კონფლიქტის დაუყოვნებლივ დასრულებისკენ მოუწოდებს. ამასთანავე, ჩინეთმა დადებითად შეაფასა სამხრეთ-აღმოსავლეთ აზიის ქვეყნების ასოციაციის (ASEAN) აქტიური ჩართულობა სამშვიდობო პროცესში და ხაზი გაუსვა, რომ მზადაა შექმნას პირობები და უზრუნველყოს პლატფორმა მხარეებს შორის დიალოგისა და მოლაპარაკებებისთვის. ჩინეთი იმედოვნებს, რომ კამბოჯა და ტაილანდი იმუშავებენ ორმხრივი ნდობისა და საზღვარზე მშვიდობის აღსადგენად.

საინტერესოა, რომ ტაილანდსა და კამბოჯას შორის სამხედრო მოქმედებების შეწყვეტის მოლაპარაკებებში აქტიურად იყო ჩართული ამერიკის შეერთებული შტატებიც. მეტიც, დონალდ ტრამპმა ოქტომბერში დროებით შეწყვეტილი სამხედრო დაპირისპირება იმ რვა კონფლიქტს შორის დაასახელა, რომელიც მან „დაასრულა“. თუმცა, ამ განცხადებიდან მალევე ტაილანდისა და კამბოჯის დაპირისპირება კვლავ გამწვავდა. ტრამპის განცხადებისა და განახლებული სამხედრო მოქმედებების საპასუხოდ, ჩინეთმა გააკრიტიკა ამერიკის ზედაპირული მიდგომა. ChinaDaily-იმ საკმაოდ კრიტიკულად შეაფასა ამერიკის „მედიაცია“ და ხაზი გაუსვა, რომ, აშშ-ისგან განსხვავებით, ჩინეთის ჩართულობა მიმართულია პრობლემის ძირეული მიზეზების მოგვარებასა და გრძელვადიანი სამშვიდობო ჩარჩოს ჩამოყალიბებაზე. ამასთანავე, სტატიაში აღნიშნულია, რომ რთული ისტორიული წარსულით დახასიათებულ კონფლიქტში ცოტა მხარეს თუ შეუძლია ნდობისა და წარმატების მოპოვება. სტატიის მიხედვით, სწორედ ასეთ მხარეს წარმოადგენს ჩინეთი, რომელიც, მისი თქმით, ამ კონფლიქტსაც ისეთივე “წარმატებით” გადაჭრის, როგორც ეს გასულ წელს ირანისა და საუდის არაბეთის შერიგებისას გააკეთა. 

ავტორი: მარიამ კაპანაძე

ჩინეთი ტაილანდსა და კამბოჯას შორის მოლაპარაკებებში ჩაერთო Read More »

Scroll to Top