Civicidea

ჩინეთის ვიცე-პრეზიდენტის ვიზიტი საქართველოში

ამბები / /

2026 წლის 6–8 ნოემბერს საქართველოს ოფიციალური ვიზიტით ჩინეთის სახალხო რესპუბლიკის ვიცე-პრეზიდენტი ხან ჭენგი ეწვია. ვიზიტის ფარგლებში გაიმართა შეხვედრები საქართველოს პრეზიდენტ მიხეილ ყაველაშვილთან, პრემიერ-მინისტრ ირაკლი კობახიძესთან და ორი ქვეყნის ბიზნესსაზოგადოების წარმომადგენლებთან. მოლაპარაკებების მთავარი თემები იყო პოლიტიკური ურთიერთობების გაღრმავება, სავაჭრო-ეკონომიკური თანამშრომლობის გაფართოება, ინვესტიციების მოზიდვა და სატრანსპორტო-ლოჯისტიკური პროექტების განვითარება.

ვიზიტს განსაკუთრებული პოლიტიკური მნიშვნელობა ჰქონდა, რადგან ეს იყო ჩინეთის ვიცე-პრეზიდენტის პირველი ვიზიტი საქართველოში. ხან ჭენგის ვიზიტი ორ ქვეყანას შორის ურთიერთობების ინტენსიფიკაციის ფონზე გაიმართა. კერძოდ, 2023 წელს დამყარებული ჩინეთ-საქართველოს სტრატეგიული პარტნიორობა 2026 წლის ივნისში ყოვლისმომცველი სტრატეგიული პარტნიორობის დონემდე ამაღლდა.

6 ნოემბერს, ჩინეთის ვიცე-პრეზიდენტი საქართველოს პრეზიდენტ მიხეილ ყაველაშვილს შეხვდა. შეხვედრაზე, მხარეებმა განიხილეს პოლიტიკური და ეკონომიკური ურთიერთობების მიმდინარე დინამიკა, საერთაშორისო სატრანსპორტო პროექტებში საქართველოს როლი და სხვადასხვა სფეროში თანამშრომლობის პერსპექტივები. შეხვედრაზე ხან ჭენგმა განაცხადა, რომ საქართველო ჩინეთის პირველი სტრატეგიული პარტნიორია სამხრეთ კავკასიაში და პირველი ქვეყანაა ევრაზიაში, რომელმაც ჩინეთთან თავისუფალი ვაჭრობის შეთანხმება გააფორმა. გავრცელებული ინფორმაციით, შეხვედრაზე მიხეილ ყაველაშვილმა მადლობა გადაუხადა ჩინეთის მხარეს საქართველოს სუვერენიტეტისა და ტერიტორიული მთლიანობის მხარდაჭერისთვის და დაადასტურა თბილისის ერთგულება „ერთი ჩინეთის“ პრინციპისადმი. თავის მხრივ, ჩინეთის მხარემ გამოთქვა მზადყოფნა, საქართველოსთან ითანამშრომლოს პრეზიდენტ სი ძინპინის მიერ წამოყენებული გლობალური ინიციატივების განხორციელების მიმართულებით.

პრეზიდენტთან შეხვედრის დროს საუბარი შეეხო თავისუფალი ვაჭრობის შეთანხმებით შექმნილი შესაძლებლობების გამოყენებას, ჩინური ინვესტიციების მოზიდვასა და ინფრასტრუქტურის განვითარებას. ყურადღება დაეთმო თბილისსა და შანხაის შორის კავშირების გაღრმავებას, პირდაპირი ავიამიმოსვლის პერსპექტივას, განათლებისა და მეცნიერების სფეროებში თანამშრომლობასა და ხელოვნური ინტელექტის მიმართულებით ერთობლივი სამუშაო ჯგუფის საქმიანობას. საქართველოს პრეზიდენტმა ჩინეთის დელეგაციასთან 2027 წელს თბილისში მშვიდობისა და ჯანსაღი ცხოვრების წესის ხელშეწყობის გლობალური სამიტის გამართვაზეც ისაუბრა.

6 ნოემბერს, ვიცე-პრეზიდენტი ასევე შეხვდა ივანიშვილის პრემიერ-მინისტრ ირაკლი კობახიძეს. შეხვედრაზე ყურადღება გამახვილდა ეკონომიკური პარტნიორობის და ერთობლივი სტრატეგიული პროექტების განვითარების პერსპექტივებზე. კობახიძემ ხაზი გაუსვა საქართველოს გეოგრაფიულ მდებარეობასა და ჩინეთის ინიციატივის „სარტყელი და გზა“ ფარგლებში თანამშრომლობის მნიშვნელობას. თავის მხრივ, ხან ჭენგმა დაადასტურა პეკინის მზადყოფნა, გააძლიეროს საქართველოსთან პოლიტიკური და ეკონომიკური კავშირები. მან აღნიშნა, რომ ჩინეთი მომავალშიც დაუჭერს მხარს საქართველოს სუვერენიტეტს, უსაფრთხოებასა და განვითარების ინტერესებს. ამასთან, ვიცე-პრეზიდენტმა განაცხადა, რომ ჩინეთი ეწინააღმდეგება ქვეყნის შიდა საქმეებში გარე ძალების ჩარევას.

ჩინეთის ვიცე-პრეზიდენტსა და კობახიძეს შორის შეხვედრაზე გაჟღერებული გზავნილები მიანიშნებს, რომ ჩინეთთან ურთიერთობები მხოლოდ სავაჭრო-ეკონომიკური თანამშრომლობით აღარ შემოიფარგლება. იგი თანდათანობით უფრო ფართო პოლიტიკურ განზომილებაში ექცევა. სინო-ქართული სტრატეგიული პარტნიორობა ახალ იმპულსს იძენს მაშინ, როდესაც საქართველოს ხელისუფლებასა და ევროკავშირს შორის ურთიერთობები მნიშვნელოვნად არის გაუარესებული. 

ოფიციალური შეხვედრების გარდა, ვიცე-პრეზიდენტის ვიზიტის დღის წესრიგი საქართველოში მოქმედი ჩინური კომპანიების ბიზნეს ინტერესების მხარდაჭერასაც მოიცავდა. 7 ნოემბერს საქართველოსა და ჩინეთის ბიზნესსაზოგადოების წარმომადგენლებს შორის გამართულ შეხვედრაზე ჩინეთის ვიცე-პრეზიდენტმა განაცხადა, რომ პეკინი მზადაა, ხელი შეუწყოს საქართველოში ჩინური კომპანიების საქმიანობის გაფართოებას.

საბოლოოდ, ჩინეთის ვიცე-პრეზიდენტის საქართველოში ვიზიტი ოფიციალურ პირებს შორის შეხვედრებით და მოლაპარაკებებით შემოიფარგლა. ვიზიტის ფარგლებში ახალი შეთანხმების ან მემორანდუმის ხელმოწერის შესახებ საჯარო ინფორმაცია არ გავრცელებულა. ვიზიტმა საქართველო-ჩინეთის ურთიერთობების გაღრმავების მიმართ ორმხრივი ინტერესი დაადასტურა. ოფიციალურ პირებს შორის შეხვედრებზე გამოიკვეთა მხარეთა სურვილი, გააძლიერონ თანამშრომლობა ვაჭრობის, ინვესტიციებისა და სატრანსპორტო ინფრასტრუქტურის განვითარების მიმართულებით.

ჩინეთის ვიცე-პრეზიდენტის ვიზიტი საქართველოში Read More »

პეკინში ჩინეთისა და ჩრდილოეთ კორეის მაღალჩინოსნებს შორის შეხვედრა გაიმართა

ერთი ახალი ამბავი / /

5 ნოემბერს პეკინში ჩინეთის საგარეო საქმეთა მინისტრი ვან ი ჩრდილოეთ კორეის მმართველი პარტიის მაღალჩინოსანს, კიმ სონგ ნამს და მის დელეგაციას შეხვდა. მხარეებმა ორმხრივი ურთიერთობების განვითარება და არსებული შეთანხმებების შესრულება განიხილეს. აღსანიშნავია რომ, ბოლო წლებში, უკრაინაში მიმდინარე ომის ფონზე, მოსკოვსა და ფხენიანს შორის პოლიტიკური და სამხედრო თანამშრომლობა მნიშვნელოვნად გაფართოვდა, რის პარალელურადაც ჩინეთსა და ჩრდილოეთ კორეას შორის ურთიერთობებში გარკვეული დისტანცირება შეინიშნებოდა.

ვან იმ დასძინა, რომ ჩინეთი მზადაა, ჩრდილოეთ კორეასთან ერთად იმუშაოს ორი ქვეყნის მმართველი პარტიების ლიდერების მიერ მიღწეული მნიშვნელოვანი შეთანხმებების განსახორციელებლად და ხელი შეუწყოს ორმხრივი ურთიერთობების მუდმივ განვითარებას.

თავის მხრივ, კიმ სონგ ნამმა განაცხადა, რომ ჩრდილოეთ კორეა მზადაა, ჩინეთთან ერთად შეასრულოს ქვეყნის ლიდერებს შორის მიღწეული შეთანხმებები და გააძლიეროს მეგობრული ურთიერთობები და თანამშრომლობა.

ჩრდილოეთ კორეელმა მაღალჩინოსანმა სი ძინპინის ივნისის ვიზიტზე განსაკუთრებული ყურადღება გაამახვილა და აღნიშნა, რომ მან ორმხრივ ურთიერთობებში ახალი ეტაპის დაწყებას შეუწყო ხელი.  კიმ სონგ ნამმა ასევე გაიხსენა რომ აღნიშნულმა ვიზიტმა კიდევ ერთხელ წარმოაჩინა ორ ქვეყანას შორის ისტორიულად ჩამოყალიბებული, „სისხლით განმტკიცებული მეგობრობის“ სტრატეგიული მნიშვნელობა.

პეკინში გამართული შეხვედრა რეგიონში მნიშვნელოვანი საერთაშორისო ღონისძიების მოახლოებასაც ემთხვევა. 18-19 ნოემბერს ჩინეთის ქალაქ შენჟენში აზია-წყნარი ოკეანის ეკონომიკური თანამშრომლობის (APEC) სამიტია დაგეგმილი, რომელშიც, სავარაუდოდ, აშშ-ის პრეზიდენტი დონალდ ტრამპიც მიიღებს მონაწილეობას.

სამიტის მოახლოებამ საერთაშორისო მედიაში კვლავ გააჩინა ვარაუდები ტრამპსა და ჩრდილოეთ კორეის ლიდერ კიმ ჩენ ინს შორის შესაძლო შეხვედრის შესახებ. მიუხედავად ამისა, ჩრდილოეთ კორეის ლიდერის დამ, კიმ იო ჩენმა, ოთხშაბათს მსგავსი შესაძლებლობა უარყო. მისი განცხადებით, ფხენიანი საჭიროდ არ მიიჩნევს პირისპირ მოლაპარაკებებს იმ მხარესთან, რომელსაც არასანდოდ და მტრულად განწყობილად აფასებს.

რეგიონში უსაფრთხოების კუთხით არსებული ვითარება ჩრდილოეთ კორეის სამხედრო აქტივობებმაც გაამწვავა. ოთხშაბათს ფხენიანმა ახალი საჰაერო თავდაცვის რაკეტა გამოსცადა. გავრცელებული ცნობებით, ეს ერთ კვირაზე ნაკლებ პერიოდში მსგავსი ტიპის შეიარაღების უკვე მესამე გამოცდა იყო.

ამ მოვლენების ფონზე ჩინეთისა და ჩრდილოეთ კორეის წარმომადგენლებს შორის პეკინში გამართული მოლაპარაკებები ორმხრივი პოლიტიკური დიალოგის გააქტიურების კიდევ ერთ ნაბიჯად განიხილება. მხარეთა განცხადებები მიუთითებს, რომ პეკინი და ფხენიანი განსაკუთრებულ ყურადღებას უთმობენ უმაღლეს დონეზე მიღწეული შეთანხმებების შესრულებას, პარტიათაშორისი ურთიერთობების განმტკიცებასა და ტრადიციული პარტნიორობის შემდგომ განვითარებას.

პეკინში ჩინეთისა და ჩრდილოეთ კორეის მაღალჩინოსნებს შორის შეხვედრა გაიმართა Read More »

ჩინეთი ფილიპინებს „წითელი ხაზების“ გადაკვეთის გამო აფრთხილებს

ერთი ახალი ამბავი / /

ჩინეთის საგარეო საქმეთა მინისტრმა ვან იმ ფილიპინებს მოუწოდა, თავი შეიკავონ ისეთი განცხადებებისა და ქმედებებისგან, რომლებმაც შესაძლოა ორ ქვეყანას შორის არსებული დაძაბულობა კიდევ უფრო გაამწვავოს. სამხრეთ ჩინეთის ზღვაში არსებული ტერიტორიული პრეტენზიების გამო ორი აზიური ქვეყანა დიდი ხანია უთანხმოებაშია, თუმცა ბოლო კვირების განმავლობაში დაძაბულობა კიდევ უფრო გაიზარდა ფილიპინელი პოლიტიკოსების მხრიდან ჩინეთის მისამართით გაკეთებული განცხადებების გამო.

ჩინეთის საგარეო საქმეთა სამინისტროს ინფორმაციით, ვან იმ აღნიშნული საკითხები 3 ნოემბერს ფილიპინების საგარეო საქმეთა მდივან ტერეზა ლაზაროსთან სატელეფონო საუბრისას განიხილა. ვან ის განცხადებით, ფილიპინელ პოლიტიკოსთა ნაწილი, პოლიტიკური მიკერძოებისა და პირადი ინტერესების გამო, პეკინის მიმართ შეურაცხმყოფელ განცხადებებს აკეთებს და ჩინეთისთვის მიუღებელ საზღვრებს კვეთს. მისივე თქმით, მსგავსი ქმედებები უარყოფითად აისახება ეკონომიკურ, სავაჭრო და ხალხთაშორის კავშირებზე, ამასთან, საფრთხეს უქმნის ფილიპინებში მოქმედი ჩინური ორგანიზაციებისა და მოქალაქეების კანონიერ ინტერესებს.

გარდა ამისა, ვან იმ ფილიპინების ხელისუფლებას შეახსენა „ერთი ჩინეთის“ პოლიტიკის დაცვის მნიშვნელობა და გააფრთხილა, რომ სამხრეთ ჩინეთის ზღვასთან დაკავშირებულ საკითხებზე განსაკუთრებული სიფრთხილე გამოიჩინოს როგორც საჯარო განცხადებებში, ისე პრაქტიკულ მოქმედებებში.

ქვეყნებს შორის დაძაბულობის ერთ-ერთ მთავარ მიზეზად კვლავ სამხრეთ ჩინეთის ზღვაში არსებული ტერიტორიული დავები რჩება. პეკინი სტრატეგიულად მნიშვნელოვანი საზღვაო სივრცის უდიდეს ნაწილზე აცხადებს პრეტენზიას, რასაც ფილიპინები და რეგიონის სხვა სახელმწიფოები ეწინააღმდეგებიან.

ბოლო წლებში ტერიტორიული უთანხმოება არაერთხელ გადაიზარდა ზღვაში ფიზიკურ დაპირისპირებაში, მათ შორის ხომალდების შეჯახებებსა და სანაპირო დაცვის წარმომადგენლებს შორის ინციდენტებში. საერთაშორისო საარბიტრაჟო გადაწყვეტილებით, ჩინეთის ფართომასშტაბიან ისტორიულ პრეტენზიებს სამხრეთ ჩინეთის ზღვაზე სამართლებრივი საფუძველი არ გააჩნია, თუმცა პეკინი აღნიშნულ გადაწყვეტილებას არ აღიარებს.

დავის ერთ-ერთი მნიშვნელოვანი მიმართულებაა „რიდ ბენკის“ (Reed Bank) საზღვაო ტერიტორია, რომელიც ფილიპინების ექსკლუზიურ ეკონომიკურ ზონაში მდებარეობს. მანილა ამ რაიონში ნავთობისა და ბუნებრივი აირის რესურსების შესწავლას ცდილობს, თუმცა ჩინეთის წინააღმდეგობის გამო შესაბამისი სამუშაოები წლების განმავლობაში ფერხდება.

მიუხედავად არსებული უთანხმოებებისა, ფილიპინების საგარეო საქმეთა მდივანმა ტერეზა ლაზარომ ჩინელ კოლეგასთან საუბარი კონსტრუქციულად შეაფასა. სოციალურ ქსელ X-ზე გამოქვეყნებულ განცხადებაში მან აღნიშნა, რომ მხარეებმა ორმხრივი ურთიერთობების განვითარების პერსპექტივები განიხილეს და დიპლომატიური კომუნიკაციის გაგრძელების აუცილებლობაზე გაამახვილეს ყურადღება.

ლაზაროს განცხადებით, ფილიპინებისთვის მნიშვნელოვანია ჩინეთთან სტაბილური და პროგნოზირებადი ურთიერთობების შენარჩუნება. მისი თქმით, განსაკუთრებით ეკონომიკისა და ენერგეტიკის სფეროებში არსებული გამოწვევების გათვალისწინებით, ორ ქვეყანას შორის თანამშრომლობა უთანხმოებების მართვასა და რეგიონული სტაბილურობის განმტკიცებას შეუწყობს ხელს.

ფილიპინების საგარეო საქმეთა მდივანმა ასევე დაადასტურა, რომ მანილა კვლავ ერთგულია „ერთი ჩინეთის“ პოლიტიკისა და ამ მიმართულებით საკუთარი პოზიციის შეცვლას არ გეგმავს. მან ხაზი გაუსვა საზღვაო და სხვა სადავო საკითხების მოლაპარაკებების გზით გადაწყვეტის მნიშვნელობას.

ამასთან, პეკინი და მანილა შეთანხმდნენ, რომ არსებულ უთანხმოებებს პასუხისმგებლობით მოეკიდონ, ხელი შეუწყონ ვითარების სტაბილიზაციას და გააფართოონ თანამშრომლობა საერთო ინტერესების სფეროებში.

მიუხედავად ჩინეთის მხრიდან გაჟღერებული მკაცრი გაფრთხილებებისა, სატელეფონო საუბრის შედეგები მიუთითებს, რომ ორივე ქვეყანა დაძაბულობის ფონზეც დიპლომატიური არხების შენარჩუნებას ცდილობს. თუმცა სამხრეთ ჩინეთის ზღვაში არსებული ტერიტორიული დავები კვლავ რჩება მნიშვნელოვან გამოწვევად ჩინეთ-ფილიპინების ურთიერთობებისთვის.

ჩინეთი ფილიპინებს „წითელი ხაზების“ გადაკვეთის გამო აფრთხილებს Read More »

სი ძინპინმა ომანის სულთანთან რეგიონული უსაფრთხოება და სტრატეგიული პარტნიორობა განიხილა

ერთი ახალი ამბავი / /

ჩინეთის პრეზიდენტმა სი ძინპინმა ომანის სულთან ჰაისამ ბინ ტარიკთან შეხვედრისას განაცხადა, რომ ახლო აღმოსავლეთი და სპარსეთის ყურის რეგიონი არ უნდა იქცეს დიდი სახელმწიფოების გეოპოლიტიკური დაპირისპირების სივრცედ. მისი თქმით, პეკინი მზად არის, არაბულ ქვეყნებთან თანამშრომლობით ხელი შეუწყოს რეგიონში მშვიდობის აღდგენას, უსაფრთხოების განმტკიცებასა და გრძელვადიანი სტაბილურობის უზრუნველყოფას.

ჩინეთის ლიდერის განცხადება ახლო აღმოსავლეთში არსებული დაძაბული ვითარების ფონზე გაკეთდა. მიუხედავად იმისა, რომ პეკინი რეგიონულ კონფლიქტებში ტრადიციულად შედარებით თავშეკავებულ დიპლომატიურ პოლიტიკას ატარებდა, ბოლო პერიოდში ჩინეთი უფრო აქტიურად ცდილობს კრიზისების მოგვარების პროცესში ჩართვას. განსაკუთრებით საყურადღებოა ირანის გარშემო აშშ-ისა და ისრაელის მონაწილეობით განვითარებული დაძაბულობა, რომელმაც ჰორმუზის სრუტეში ვითარება გაართულა და ენერგეტიკული რესურსებისა და საზღვაო გადაზიდვების ხარჯების ზრდა გამოიწვია.

ჩინეთის საგარეო საქმეთა სამინისტროს ინფორმაციით, სი ძინპინმა აღნიშნა, რომ მსოფლიო მასშტაბური ისტორიული ცვლილებების ეტაპზე იმყოფება, ხოლო რეგიონული უსაფრთხოების უზრუნველყოფა ყველა დაინტერესებული მხარის ერთობლივ ძალისხმევას მოითხოვს. მან მხარი დაუჭირა საომარი მოქმედებების შეწყვეტას და არაბულ ქვეყნებთან, მათ შორის სპარსეთის ყურის თანამშრომლობის საბჭოს წევრ სახელმწიფოებთან, პოლიტიკური კოორდინაციის გაძლიერების მზადყოფნა გამოთქვა. ამასთან, პეკინმა ახლო აღმოსავლეთში სპეციალური წარმომადგენლების გაგზავნა გადაწყვიტა, რომლებიც მხარეებს შორის დიალოგისა და დაძაბულობის შემცირების ხელშეწყობაზე იმუშავებენ.

ომანის სულთნის ორდღიან ოფიციალურ ვიზიტს განსაკუთრებული ისტორიული მნიშვნელობა აქვს, რადგან ეს ომანის სახელმწიფოს მეთაურის პირველი ვიზიტია ჩინეთში 1978 წელს დიპლომატიური ურთიერთობების დამყარების შემდეგ. შეხვედრისას ჰაისამ ბინ ტარიკმა დადებითად შეაფასა ჩინეთის პოზიცია რეგიონული უსაფრთხოების საკითხებზე და აღნიშნა, რომ ეკონომიკური განვითარება მჭიდროდ უკავშირდება მშვიდობას, სტაბილურობასა და სახელმწიფო სუვერენიტეტის პატივისცემას.

მოლაპარაკებების მნიშვნელოვანი ნაწილი ეკონომიკური თანამშრომლობის გაფართოებას დაეთმო. ჩინეთი ომანის უმსხვილესი სავაჭრო პარტნიორია, ხოლო ომანი ჩინეთის ბაზარს ნედლი ნავთობითა და სხვა ენერგეტიკული პროდუქტებით ამარაგებს. მხარეები დაინტერესებული არიან პარტნიორობის გაღრმავებით განახლებადი ენერგეტიკის, ციფრული ეკონომიკის, თანამედროვე ტექნოლოგიებისა და ინვესტიციების მიმართულებით. ვიზიტის ფარგლებში ასევე მოსალოდნელია ახალი შეთანხმებებისა და ურთიერთგაგების მემორანდუმების გაფორმება.

ომანის საინფორმაციო სააგენტოსთან (ONA) საუბრისას ჩინელმა ექსპერტმა, დოქტორმა იბრაჰიმ ლიმ აღნიშნა, რომ ვიზიტი ორმხრივი ურთიერთობების განვითარების მნიშვნელოვანი ეტაპია. მისი შეფასებით, 2018 წელს ყოვლისმომცველი სტრატეგიული პარტნიორობის დამყარების შემდეგ ქვეყნებს შორის თანამშრომლობა მუდმივად ფართოვდება. ექსპერტმა განსაკუთრებული ყურადღება გაამახვილა ჩინური კომპანიების მზარდ ინტერესზე ომანის ბაზრის მიმართ, ასევე ხელოვნური ინტელექტის, ციფრული ეკონომიკისა და მოწინავე ტექნოლოგიების სფეროებში არსებულ შესაძლებლობებზე.

პეკინის უნივერსიტეტის პროფესორმა ფუ ჯიმინგმა კი ხაზი გაუსვა ომანის სტრატეგიულ გეოგრაფიულ მდებარეობას და მის პოტენციალს, გახდეს მნიშვნელოვანი სავაჭრო და ეკონომიკური დამაკავშირებელი ცენტრი ჩინეთს, არაბულ ქვეყნებსა და საერთაშორისო ბაზრებს შორის. მისი თქმით, თანამშრომლობის პერსპექტიულ მიმართულებებს შორისაა ენერგეტიკა, რობოტოტექნიკა, კოსმოსური კვლევები და საგანმანათლებლო გაცვლები.

ჩინეთისა და ომანის ლიდერებს შორის გამართული შეხვედრა ასახავს პეკინის მზარდ ინტერესს ახლო აღმოსავლეთის მიმართ. რეგიონში არსებული უსაფრთხოების გამოწვევებისა და ენერგეტიკული ბაზრების არასტაბილურობის ფონზე ჩინეთი ცდილობს, გააძლიეროს როგორც ეკონომიკური კავშირები, ისე დიპლომატიური გავლენა. ამ პროცესში ომანი მნიშვნელოვან პარტნიორად განიხილება, რომელსაც შეუძლია ხელი შეუწყოს ჩინეთის ურთიერთობების გაღრმავებას სპარსეთის ყურისა და მთლიანად არაბული სამყაროს სახელმწიფოებთან.

სი ძინპინმა ომანის სულთანთან რეგიონული უსაფრთხოება და სტრატეგიული პარტნიორობა განიხილა Read More »

ჩინეთი სამხრეთ კავკასიასა და ყაზახეთში.(26 ოქტომბერი-1 ნოემბერი)

კვირის ამბავი / /
საქართველო

საქართველო და ჩინეთი ორმხრივი თანამშრომლობის გაღრმავების პერსპექტივებს განიხილავენ

28 ოქტომბერი

2026 წლის 28 ოქტომბერს საქართველოს საგარეო საქმეთა მინისტრის მოადგილე ალექსანდრე ხვთისიაშვილი საქართველოში ჩინეთის სახალხო რესპუბლიკის საქმეთა დროებით რწმუნებულს, დაი ჩუნიონგს შეხვდა. შეხვედრის მთავარი თემა ორ ქვეყანას შორის არსებული ურთიერთობების განვითარება და სამომავლო თანამშრომლობის პრიორიტეტული მიმართულებები იყო.

მხარეებმა ყურადღება გაამახვილეს საქართველო-ჩინეთის პარტნიორობის გაძლიერების შესაძლებლობებზე როგორც ორმხრივი ურთიერთობების, ისე საერთაშორისო თანამშრომლობის ფარგლებში. საუბარი შეეხო ქვეყნებს შორის სავაჭრო-ეკონომიკური კავშირების მიმდინარე დინამიკას, ეკონომიკური ურთიერთობების გაფართოებასა და თანამშრომლობის ახალი შესაძლებლობების განხილვას.

შეხვედრაზე ასევე ხაზი გაესვა მაღალი დონის ოფიციალური ვიზიტების მნიშვნელობას, რომლებიც ხელს უწყობს ქვეყნებს შორის პოლიტიკური დიალოგის შენარჩუნებასა და ურთიერთობების შემდგომ განვითარებას.

შეხვედრის ფარგლებში განხილული საკითხები ასახავს საქართველოსა და ჩინეთის ინტერესს, გააგრძელონ თანამშრომლობა სხვადასხვა მიმართულებით და ხელი შეუწყონ ორმხრივი ურთიერთობების გაღრმავებას.

საქართველო და ჩინეთი ქართული ღვინის პოპულარიზაციის მიმართულებით თანამშრომლობას აძლიერებენ

29 ოქტომბერი

2026 წლის 29 ოქტომბერს, ჩინეთის სახალხო რესპუბლიკაში საქართველოს საელჩოში, ქართული ღვინის ჩინეთის ბაზარზე პოპულარიზაციისა და საექსპორტო შესაძლებლობების განვითარების საკითხებზე სამუშაო შეხვედრა გაიმართა.

საქართველოს საგანგებო და სრულუფლებიანმა ელჩმა პაატა კალანდაძემ ჩინეთის კვებისა და ფერმენტაციის მრეწველობის ეროვნული კვლევითი ინსტიტუტის წარმომადგენლებს უმასპინძლა. დელეგაციას ინსტიტუტის საერთაშორისო თანამშრომლობის დეპარტამენტის დირექტორი ფენგ ხაო ხელმძღვანელობდა.

შეხვედრის ფარგლებში მხარეებმა განიხილეს ჩინეთის ბაზარზე ქართული ღვინის პოზიციონირების არსებული მდგომარეობა, პროდუქციის გავრცელებასთან დაკავშირებული გამოწვევები და სამომავლო თანამშრომლობის შესაძლებლობები. განსაკუთრებული ყურადღება დაეთმო ქართული ღვინის ცნობადობის ამაღლებასა და მისი პოპულარიზაციისთვის ახალი მიდგომების შემუშავებას.

დისკუსიის შედეგად მხარეებმა განსაზღვრეს ქართული ღვინის პოპულარიზაციის განახლებული სამოქმედო გეგმა და შეთანხმდნენ ერთობლივი საქმიანობის კოორდინირებულად გაგრძელებაზე.

აღნიშნული თანამშრომლობა ქართული ღვინის ჩინეთის ბაზარზე პოპულარიზაციის ხელშეწყობისა და ორ ქვეყანას შორის სავაჭრო-ეკონომიკური ურთიერთობების განვითარებისკენ გადადგმულ კიდევ ერთ ნაბიჯს წარმოადგენს.

საქართველომ და ჩინეთმა სარკინიგზო სფეროში თანამშრომლობის საკითხები განიხილეს

26 ოქტომბერი

2026 წლის 26 ოქტომბერს ჩინეთში საქართველოს ელჩი პაატა კალანდაძე ჩინეთის ეროვნული რკინიგზის ადმინისტრაციის წარმომადგენლებს შეხვდა. ჩინურ დელეგაციას ადმინისტრაციის გენერალური დირექტორის მოადგილე კაო ხუნგი ხელმძღვანელობდა.

შეხვედრის მთავარი თემა საქართველოსა და ჩინეთს შორის სარკინიგზო სექტორში არსებული თანამშრომლობა და ამ მიმართულებით ურთიერთობების განვითარების საკითხები იყო.მხარეებმა ყურადღება გაამახვილეს ორ ქვეყანას შორის სარკინიგზო სფეროში თანამშრომლობის სხვადასხვა ასპექტზე.

შეხვედრის შედეგად მიღწეული კონკრეტული შეთანხმებების ან სამომავლო პროექტების შესახებ დამატებითი ინფორმაცია არ გავრცელებულა.

სომხეთი

სომხეთი და ჩინეთი ეკონომიკური თანამშრომლობის გაფართოებას გეგმავენ

26 ოქტომბერი

სომხეთის ეკონომიკის მინისტრის მოადგილემ, არმან ხოჯოიანმა, და ჩინეთის ქალაქ შიძიაჯუანის მერის აღმასრულებელმა მოადგილემ, ლიუ ძიუნჯიმ, ერევანში გამართულ შეხვედრაზე ორმხრივი თანამშრომლობის განვითარების საკითხები განიხილეს.

მხარეებმა ყურადღება გაამახვილეს სოფლის მეურნეობის, კვების მრეწველობის, ვაჭრობის, მეცნიერებისა და ტექნოლოგიების, კულტურისა და ტურიზმის სფეროებში თანამშრომლობაზე.

ხოჯოიანმა აღნიშნა, რომ ჩინეთი სომხური პროდუქციით ინტერესდება და სომხეთი მზადაა, ხელი შეუწყოს ორ ქვეყანას შორის ბიზნესკავშირების გაძლიერებას. მხარეები შეთანხმდნენ ერთობლივი პროექტების განხორციელებისთვის პრაქტიკული ნაბიჯების გადადგმაზე.

სომხეთის სტატისტიკის კომიტეტის მონაცემებით, 2026 წლის იანვარ–აგვისტოში სომხეთსა და ჩინეთს შორის სავაჭრო ბრუნვა 31%-ით გაიზარდა და 2,2 მილიარდ დოლარს მიაღწია. ექსპორტი 81,3%-ით გაიზარდა და 780,6 მილიონი დოლარი შეადგინა, ხოლო იმპორტი 13,5%-ით გაიზარდა და 1,4 მილიარდ დოლარს მიაღწია. ჩინეთი სომხეთის მეორე უმსხვილესი სავაჭრო პარტნიორია რუსეთის შემდეგ.

ყაზახეთი

ყაზახეთმა და ჩინეთმა ენერგეტიკის სფეროში თანამშრომლობის გაფართოება განიხილეს

27 ოქტომბერი

ყაზახეთსა და ჩინეთს შორის ნავთობისა და გაზის სექტორში თანამშრომლობის სამუშაო ჯგუფის მეხუთე შეხვედრა გაიმართა, რომელსაც ყაზახეთის პირველი ვიცე-პრემიერი ნურლიბეკ ნალიბაევი ხელმძღვანელობდა.

შეხვედრას ესწრებოდნენ ყაზახეთის ენერგეტიკის მინისტრი ერლან აკკენჟენოვი, ჩინეთის ეროვნული ნავთობისა და გაზის კორპორაციის (CNPC) ხელმძღვანელი ჯოუ სინჰუაი და ორივე ქვეყნის ენერგეტიკული კომპანიების წარმომადგენლები.

მოლაპარაკებების ფარგლებში მხარეებმა იმსჯელეს ნავთობის მიწოდების ზრდაზე, მილსადენების გამტარუნარიანობის გაფართოებაზე, გაზის სექტორში თანამშრომლობასა და შიმკენტის ნავთობგადამამუშავებელი ქარხნის სიმძლავრეების გაზრდაზე. ყურადღება დაეთმო გეოლოგიურ კვლევებს, ნავთობქიმიურ პროექტებსა და ენერგეტიკის ახალ მიმართულებებსაც. ასევე განიხილეს არსებული კონტრაქტების გახანგრძლივებისა და ერთობლივი პროექტების განხორციელებასთან დაკავშირებული საკითხები.

ნალიბაევმა ხაზი გაუსვა ყაზახეთ-ჩინეთის სტრატეგიული პარტნიორობის მნიშვნელობას და აღნიშნა, რომ აუცილებელია შეთანხმებული პროექტების დაჩქარება და ნაკისრი ვალდებულებების დროულად შესრულება.

 

ყაზახეთი და ჩინეთი ხორგოსის სასაზღვრო ცენტრში უსაფრთხოების სფეროში თანამშრომლობას აძლიერებენ

27 ოქტომბერი

ყაზახეთმა სამართლებრივი აქტების საჯარო პორტალზე გამოაქვეყნა კანონპროექტი, რომელიც ჩინეთთან ხორგოსის საერთაშორისო სასაზღვრო თანამშრომლობის ცენტრში უსაფრთხოებისა და საზოგადოებრივი წესრიგის დაცვის შესახებ შეთანხმების რატიფიცირებას ითვალისწინებს. დოკუმენტს ხელი 2026 წლის 7 სექტემბერს პეკინში მოეწერა.

შეთანხმების მიხედვით, ორი ქვეყნის შესაბამისი უწყებები ითანამშრომლებენ დანაშაულის პრევენციის, გამოვლენისა და გამოძიების მიმართულებით. თანამშრომლობა ასევე მოიცავს ძებნილი პირების დაკავებას, ინფორმაციის გაცვლასა და საგანგებო სიტუაციებზე ერთობლივ რეაგირებას. დოკუმენტი ასევე  განსაზღვრავს სამართალდამცავ ორგანოებს შორის ურთიერთდახმარების, კონფიდენციალური ინფორმაციის დაცვისა და დაკავებულ პირებთან დაკავშირებულ პროცედურებს

შეთანხმება ძალაში შევა მას შემდეგ, რაც ორივე ქვეყანა შიდასახელმწიფოებრივ პროცედურებს დაასრულებს და შესაბამის დიპლომატიურ შეტყობინებებს გაცვლის. ძალაში შესვლის ვადა შეტყობინებების გაცვლიდან 30 დღეა.

აზერბაიჯანი

ჩინეთის ტურისტული სექტორის წარმომადგენლებმა ბაქოში საერთაშორისო სამიტში მიიღეს მონაწილეობა

29 ოქტომბერი

2026 წლის 29 ოქტომბერს, აზერბაიჯანის დედაქალაქ ბაქოში გაიმართა საერთაშორისო ტურისტული სამიტი PATA Hosted Buyers Summit Baku 2026, რომელშიც ჩინეთის ტურისტული ინდუსტრიის წარმომადგენლებიც მონაწილეობდნენ. ღონისძიების მთავარი მიზანი აზერბაიჯანსა და აზია-წყნარი ოკეანის რეგიონის ქვეყნებს შორის ტურისტული და ბიზნესკავშირების გაღრმავება იყო.

სამიტი აზერბაიჯანის ტურიზმის სახელმწიფო სააგენტოს, აზერბაიჯანის ტურიზმის ბიუროსა (ATB) და აზია-წყნარი ოკეანის ტურისტული ასოციაციის (PATA) ერთობლივი ორგანიზებით ჩატარდა. მასში მონაწილეობდა 50-ზე მეტი ტურისტული სექტორის პროფესიონალი ჩინეთიდან, იაპონიიდან, სამხრეთ კორეიდან, მალაიზიიდან, ინდონეზიიდან და სინგაპურიდან.

სამიტის ერთ-ერთი მონაწილე იყო ჩინური ტურისტული კომპანიის, Chongqing Holiday International Travel Service Co., Ltd.-ის გენერალური მენეჯერი ჟუჯია იანგი (Zhujia Yang), რომელმაც აზერბაიჯანის ტურისტულ პოტენციალზე ისაუბრა. მისი შეფასებით, ჩინელი მოგზაურებისთვის ხელსაყრელ პირობებს ქმნის აზერბაიჯანთან უვიზო მიმოსვლა და პირდაპირი ავიარეისები ურუმჩიდან და პეკინიდან. მან ასევე ყურადღება გაამახვილა შანხაის მიმართულებით მოსალოდნელ ავიამიმოსვლაზე.

ჩინეთი სამხრეთ კავკასიასა და ყაზახეთში.(26 ოქტომბერი-1 ნოემბერი) Read More »

ჩინეთ-ინდოეთის საზღვარზე დაძაბულობა გრძელდება

ერთი ახალი ამბავი / /

ჩინეთსა და ინდოეთს შორის სასაზღვრო ვითარება კვლავ დაძაბულია. ინდოეთის ოფიციალური პირების ინფორმაციით, არუნაჩალ-პრადეშის შტატში, ფაქტობრივი კონტროლის ხაზის (LAC) გასწვრივ, ბოლო თვეების განმავლობაში ორ ქვეყანას შორის სამხედრო დაპირისპირების არაერთი შემთხვევა დაფიქსირდა. პეკინი ინდოეთის მხრიდან გამოთქმულ ბრალდებებს არ ეთანხმება და აცხადებს, რომ მისი სამხედროები საზღვარზე მოქმედი შეთანხმებების შესაბამისად გადაადგილდებიან.

ინდოეთ-ტიბეტის სასაზღვრო პოლიციის (ITBP) გენერალურმა დირექტორმა შატრუჯიტ კაპურმა დაადასტურა, რომ ინდოელი და ჩინელი სამხედროების დაპირისპირება არუნაჩალ-პრადეშის რამდენიმე მონაკვეთზე კვლავ გრძელდება. მისი განცხადებით, სასაზღვრო ინციდენტები განსაკუთრებით აქტუალური გახდა ბოლო პერიოდში, თუმცა დაძაბულობის შესახებ ცნობები ჯერ კიდევ ივლისიდან ვრცელდებოდა.

კაპურმა აღნიშნულ საკითხზე რაჯასტანის შტატის ქალაქ ალვარში, ITBP-ის თანამშრომელთა დაჯილდოების ყოველწლიურ ღონისძიებაზე ისაუბრა. მან განსაკუთრებული ყურადღება გაამახვილა სასაზღვრო პოლიციის სპეციალური დანიშნულების დანაყოფების მოქმედებებზე, რომლებმაც არუნაჩალ-პრადეშში შექმნილი ვითარების მართვაში მიიღეს მონაწილეობა. ამასთან, კაპურმა ხაზი გაუსვა ჩინეთის სამხედრო შესაძლებლობების ზრდას და აღნიშნა, რომ პეკინის მიერ შეიარაღებული ძალების მოდერნიზაციაში განხორციელებული მნიშვნელოვანი ინვესტიციები ინდოეთის უსაფრთხოებისთვის დამატებით გამოწვევებს ქმნის.

ჩინეთის საგარეო საქმეთა სამინისტროს წარმომადგენელმა, გუო ძიაკუნმა განაცხადა, რომ პეკინი ორ ქვეყანას შორის მიღწეულ შეთანხმებებსა და ურთიერთგაგებას იცავს. მისი თქმით, ჩინეთის სამხედროების მოქმედებები საზღვრის გასწვრივ ჩვეულებრივი საპატრულო საქმიანობის ნაწილია, რომლის მიზანიც ტერიტორიული სუვერენიტეტისა და სასაზღვრო რეგიონებში სტაბილურობის უზრუნველყოფაა.

მიმდინარე მოვლენები განსაკუთრებით მნიშვნელოვანია ჩინეთ-ინდოეთის ურთიერთობების ბოლო წლების ისტორიის გათვალისწინებით. 2020 წელს გალვანის ხეობაში მომხდარმა სისხლიანმა შეტაკებებმა ორ ქვეყანას შორის ურთიერთობები მნიშვნელოვნად გააუარესა და ხანგრძლივი სამხედრო დაპირისპირება გამოიწვია. მიუხედავად იმისა, რომ ბოლო წლებში მხარეებმა გარკვეულ მონაკვეთებზე სამხედრო ძალების დაშორებისა და ურთიერთობების ნორმალიზების მიმართულებით ნაბიჯები გადადგეს, ტერიტორიული უთანხმოებები სრულად არ აღმოფხვრილა.

პოლიტიკური დიალოგის აღდგენის მცდელობები უმაღლეს დონეზეც მიმდინარეობს. ინდოეთის პრემიერ-მინისტრ ნარენდრა მოდისა და ჩინეთის პრეზიდენტ სი ძინპინის შეხვედრების დროს არაერთხელ გამოიკვეთა ორმხრივი ურთიერთობების გაუმჯობესების აუცილებლობა. ინდური მხარე ხაზს უსვამს, რომ ურთიერთობები უნდა ემყარებოდეს ურთიერთპატივისცემას, ერთმანეთის ინტერესების გათვალისწინებასა და საერთო ინტერესების დაცვას.

მიუხედავად დიპლომატიური კონტაქტების გააქტიურებისა, არუნაჩალ-პრადეშში მიმდინარე სასაზღვრო ინციდენტები აჩვენებს, რომ ჩინეთსა და ინდოეთს შორის უსაფრთხოების სფეროში არსებული უთანხმოებები კვლავ მოუგვარებელია.

ჩინეთ-ინდოეთის საზღვარზე დაძაბულობა გრძელდება Read More »

ჩინეთი გაეროსთან თანამშრომლობის გაღრმავებას და გლობალური გამოწვევების ერთობლივად დაძლევას გეგმავს

ერთი ახალი ამბავი / /

გაერთიანებული ერების ორგანიზაციაში ჩინეთის სახალხო რესპუბლიკის წარმომადგენლობის აღდგენიდან 55 წელი შესრულდა. ამ თარიღთან დაკავშირებით ჩინეთის საგარეო საქმეთა სამინისტროს ოფიციალურმა წარმომადგენელმა მაო ნინგმა გაეროსთან თანამშრომლობის მნიშვნელობაზე, გასული ათწლეულების განმავლობაში ქვეყნის როლსა და სამომავლო პრიორიტეტებზე ისაუბრა.

მაო ნინგის განცხადებით, 1971 წლის 25 ოქტომბერს გაეროს გენერალური ასამბლეის 26-ე სესიაზე მიღებულმა რეზოლუცია 2758-მა ჩინეთის სახალხო რესპუბლიკას ორგანიზაციაში წარმომადგენლობის უფლებები აღუდგინა. მისი შეფასებით, აღნიშნული გადაწყვეტილება მნიშვნელოვანი ისტორიული ეტაპი იყო, რომელმაც გავლენა მოახდინა როგორც ჩინეთის საერთაშორისო პოზიციებზე, ისე გაეროს საქმიანობასა და გლობალურ პოლიტიკურ პროცესებზე.

მაო ნინგის თქმით, გასული 55 წლის განმავლობაში ჩინეთი აქტიურად მონაწილეობდა გაეროს ფარგლებში მიმდინარე პროცესებში და მხარს უჭერდა ორგანიზაციის წამყვან როლს საერთაშორისო ურთიერთობებში. ამასთან, პეკინი განსაკუთრებულ მნიშვნელობას ანიჭებდა გაეროს უშიშროების საბჭოს მუდმივი წევრის სტატუსით ნაკისრი ვალდებულებების შესრულებას.

ჩინეთის საგარეო უწყების შეფასებით, ქვეყნის საქმიანობა ამ პერიოდში მიმართული იყო საერთაშორისო მშვიდობისა და უსაფრთხოების განმტკიცების, ეკონომიკური განვითარების ხელშეწყობისა და სახელმწიფოებს შორის თანამშრომლობის გაფართოებისკენ. პეკინი ასევე ყურადღებას ამახვილებდა სხვადასხვა კულტურასა და ცივილიზაციას შორის დიალოგის განვითარებასა და გლობალური მმართველობის არსებული მექანიზმების გაუმჯობესებაზე.

რაც შეეხება სამომავლო გეგმებს, მაო ნინგმა განაცხადა, რომ ჩინეთი აპირებს გაეროსთან ურთიერთობების კიდევ უფრო გაღრმავებას და მრავალმხრივი თანამშრომლობის გაფართოებას. მისი თქმით, ქვეყანა მზად არის, სხვა სახელმწიფოებთან ერთად იმუშაოს საერთაშორისო საზოგადოების წინაშე არსებული გამოწვევების დასაძლევად.

ჩინეთის საგარეო საქმეთა სამინისტროს წარმომადგენელმა ხაზგასმით აღნიშნა, რომ პეკინი მომავალშიც გააგრძელებს საერთაშორისო პასუხისმგებლობების შესრულებას, მხარს დაუჭერს გაეროს საქმიანობას და ხელს შეუწყობს ისეთი საერთაშორისო გარემოს ჩამოყალიბებას, რომელიც სახელმწიფოებს შორის თანამშრომლობასა და საერთო განვითარებაზე იქნება დაფუძნებული.

მაო ნინგის განცხადებით, ჩინეთის გრძელვადიანი მიზანი კაცობრიობის საერთო მომავლის მქონე საზოგადოების ჩამოყალიბების ხელშეწყობაა, რაშიც გაეროსთან მჭიდრო თანამშრომლობას მნიშვნელოვანი ადგილი უკავია.

ამასთან, გაეროში პოზიციების განმტკიცებას ჩინეთისთვის მნიშვნელოვანი სტრატეგიული დატვირთვაც აქვს. ამერიკული კვლევითი ორგანიზაციის Foreign Policy Research Institute-ის 2026 წლის სექტემბრის ანალიზის თანახმად, აშშ-ის მიერ საერთაშორისო ორგანიზაციებში მონაწილეობისა და ფინანსური მხარდაჭერის შემცირება პეკინს დამატებით შესაძლებლობას აძლევს, გააფართოოს საკუთარი დიპლომატიური გავლენა. ჩინეთი ცდილობს, თავი წარმოაჩინოს მრავალმხრივი თანამშრომლობისა და საერთაშორისო წესრიგის მხარდამჭერ ძალად. ამგვარად, გაეროსთან თანამშრომლობა პეკინისთვის არა მხოლოდ მრავალმხრივი დიპლომატიის, არამედ საკუთარი საერთაშორისო პოზიციების განმტკიცების მნიშვნელოვანი ინსტრუმენტია.

ჩინეთი გაეროსთან თანამშრომლობის გაღრმავებას და გლობალური გამოწვევების ერთობლივად დაძლევას გეგმავს Read More »

თინათინ ხიდაშელი მიუნხენში გამართულ “გლობალური თავდაცვის სამიტში” მონაწილეობდა

ამბები / /

სამოქალაქო ხელმძღვანელი თინათინ ხიდაშელი 23-24 ოქტომბერს, მიუნხენში, ფრიდრიხ ნაუმანის თავისუფლების ფონდის მიერ ორგანიზებულ გლობალური ტოტალური თავდაცვის სამიტში (Global Total Defence Summit) მონაწილეობდა.

სამიტმა გააერთიანა უკრაინის, კავკასიის, ბალტიისპირეთის ქვეყნების, აშშ-ის, ლათინური ამერიკის, აფრიკისა და ინდო-წყნარი ოკეანის რეგიონის წარმომადგენლები, რათა განეხილათ, როგორ შეუძლიათ საზოგადოებებსა და სახელმწიფოებს უსაფრთხოების მზარდ და ცვალებად საფრთხეებთან გამკლავება.

დისკუსიები შეეხებოდა უცხოურ ინფორმაციულ მანიპულაციასა და ჩარევას, კიბერუსაფრთხოებას, ხელოვნურ ინტელექტსა და ახალ ტექნოლოგიებს, საჯარო და კერძო სექტორების თანამშრომლობასა და ჰიბრიდულ საფრთხეებს.

თინათინ ხიდაშელი მიუნხენში გამართულ “გლობალური თავდაცვის სამიტში” მონაწილეობდა Read More »

ჩინეთი და ჯიბუტი რეგიონული დაძაბულობის საფრთხეებს განიხილავენ

ერთი ახალი ამბავი / /

ჩინეთი ახლო აღმოსავლეთის კონფლიქტის აფრიკის რქაში გავრცელების საფრთხეზე საუბრობს. ქვეყანა წითელ ზღვაში საზღვაო მარშრუტების უსაფრთხოების დაცვას მოითხოვს. ჩინეთის საგარეო საქმეთა სამინისტროს წარმომადგენლის, მაო ნინგის თქმით, ეს საკითხი ჩინეთის საგარეო საქმეთა მინისტრმა ვანგ იიმ და ჯიბუტის საგარეო საქმეთა მინისტრმა, აბდულქადერ ჰუსეინ ომარმა პეკინში შეხვედრაზე განიხილეს. მხარეებმა გააფრთხილეს საერთაშორისო საზოგადოება, რომ აფრიკის რქა არ უნდა იქცეს გეოპოლიტიკური დაპირისპირების არენად და ახლო აღმოსავლეთის კონფლიქტი ამ რეგიონში არ უნდა გავრცელდეს.

ჩინეთისა და ჯიბუტის ერთობლივი განცხადებით, წითელ ზღვაში დაძაბულობის ზრდა საფრთხეს უქმნის გლობალურ ეკონომიკას, განსაკუთრებით კი აფრიკის რქის ქვეყნების ეკონომიკურ საქმიანობას. საზღვაო მიმოსვლის შეფერხებამ შესაძლოა გაართულოს საერთაშორისო ვაჭრობა და გაამწვავოს რეგიონში არსებული უსაფრთხოების პრობლემები, მათ შორის მეკობრეობა და ტერორიზმი. მხარეებმა მხარი დაუჭირეს წითელი ზღვის სანაპირო სახელმწიფოების ძალისხმევას, უზრუნველყონ საერთაშორისო საზღვაო გზების შეუფერხებელი და უსაფრთხო ფუნქციონირება. ამასთან, მათ მოუწოდეს შესაბამის მხარეებს, დაიცვან გაეროს წესდების პრინციპები, თავი აარიდონ დაძაბულობის შემდგომ ესკალაციას, არსებული პრობლემები კი დიალოგისა და დიპლომატიური მოლაპარაკებების გზით მოაგვარონ.

ჩინეთისთვის წითელი ზღვა მნიშვნელოვანი სატრანსპორტო დერეფანია, რომლის გავლითაც ჩინური პროდუქცია ევროპულ ბაზარს მიეწოდება. რეგიონში საზღვაო გადაადგილების შეფერხება საფრთხეს შეუქმნიდა როგორც ჩინეთის საექსპორტო ინტერესებს, ისე მის მიერ განხორციელებულ ინფრასტრუქტურულ ინვესტიციებს. პეკინის ინტერესებს დამატებით მნიშვნელობას ანიჭებს ჯიბუტიში არსებული ჩინეთის სამხედრო მხარდაჭერის ბაზა, რომელიც 2017 წლიდან ფუნქციონირებს და, სხვა ამოცანებთან ერთად, ადენის ყურეში მეკობრეობის წინააღმდეგ მოქმედ საზღვაო ძალებს ემსახურება. შანხაის საერთაშორისო კვლევების ინსტიტუტის მკვლევრის, ლი ვეიჯიანის შეფასებით, ჩინეთსა და ჯიბუტის შორის ერთობლივი განცხადების გამოქვეყნება განსაკუთრებული სიმბოლური მნიშვნელობის მატარებელია, რადგან ის პეკინის ინტერესებს უკავშირდება როგორც ნავიგაციის თავისუფლების, ისე რეგიონში სტაბილურობის შენარჩუნების მიმართულებით.

ვითარებას კიდევ უფრო ართულებს ჰორმუზის სრუტეში არსებული დაძაბულობა და იემენში მოქმედი ჰუსიტების თავდასხმების საფრთხე. ჰორმუზის სრუტეში საზღვაო მიმოსვლის შეფერხების გამო, საუდის არაბეთმა ნავთობის ნაწილი ექსპორტზე  წითელი ზღვის გავლით გაიტანა. გავრცელებული მონაცემებით, ამ მარშრუტით ნავთობის გადაზიდვის მოცულობა დღეში დაახლოებით 1 მილიონიდან 4.9 მილიონ ბარელამდე გაიზარდა. თუმცა წითელ ზღვაში უსაფრთხოების გაუარესებამ შესაძლოა ამ ალტერნატიულ მარშრუტსაც შეუქმნას საფრთხე. ჩინელი ანალიტიკოსების შეფასებით, არსებული ვითარება ჯერ არ მოითხოვს სავაჭრო გემების პირდაპირ სამხედრო ესკორტირებას, თუმცა პეკინი ყურადღებით დააკვირდება მოვლენების განვითარებას და საჭიროების შემთხვევაში დამატებით ზომების მიღებასაც არ გამორიცხავს.

ჯიბუტიმ დადებითად შეაფასა ჩინეთის ინიციატივები რეგიონში მშვიდობისა და უსაფრთხოების ხელშეწყობის მიმართულებით. მიუხედავად ამისა, როგორც The Diplomat-ის ანალიზშია აღნიშნული, პეკინისა და ჯიბუტის განცხადება კონკრეტული ახალი ღონისძიებების განსაზღვრაზე მეტად მათი საერთო შეშფოთებისა და სტრატეგიული ინტერესების გამოხატვას ემსახურება.

საბოლოოდ, ჩინეთის პოზიცია აჩვენებს, რომ წითელი ზღვის უსაფრთხოება მისთვის არა მხოლოდ რეგიონული სტაბილურობის, არამედ საერთაშორისო ვაჭრობის, ენერგორესურსების ტრანსპორტირებისა და ევროპასთან ეკონომიკური კავშირების შენარჩუნების მნიშვნელოვანი საკითხია.

ჩინეთი და ჯიბუტი რეგიონული დაძაბულობის საფრთხეებს განიხილავენ Read More »

ჩინეთი ტაივანის მახლობლად საზღვაო კონტროლის გაფართოებას ცდილობს

ერთი ახალი ამბავი / /

ჩინეთსა და ტაივანს შორის დაძაბულობა სამხრეთ ჩინეთის ზღვაში მდებარე პრატასის კუნძულების გარშემო კვლავ იზრდება. პეკინი აცხადებს, რომ ამ ტერიტორიაზე სანაპირო დაცვის პატრულირება საზღვაო უსაფრთხოებისა და წესრიგის დაცვას ემსახურება. ტაიპეი კი ჩინეთის მოქმედებებს საკუთარი გავლენის გაფართოებისა და საზღვაო სივრცეზე კონტროლის დამყარების მცდელობად აფასებს.

ტაივანის ხელისუფლება ჩინეთის ტერიტორიულ პრეტენზიებს არ აღიარებს. მისი პოზიციით, კუნძულის მომავალზე გადაწყვეტილების მიღების უფლება მხოლოდ ტაივანის მოსახლეობას აქვს. პეკინი კი ტაივანს საკუთარ ტერიტორიად მიიჩნევს და საჭიროების შემთხვევაში არც ძალის გამოყენებას გამორიცხავს.

ჩინეთის ტაივანის საქმეთა ოფისის წარმომადგენელმა, ჟანგ ჰანმა, ოთხშაბათს გამართულ პრესკონფერენციაზე განაცხადა, რომ ჩინეთს სამხრეთ ჩინეთის ზღვის კუნძულებზე, მათ შორის პრატასსა და მის მიმდებარე წყლებზე, უდავო სუვერენული უფლებები აქვს. მისი თქმით, ჩინეთის სანაპირო დაცვის გემები მოქმედებენ ქვეყნის კანონმდებლობის შესაბამისად და ხელს უწყობენ ნორმალური ნაოსნობისა და საზღვაო საქმიანობის შენარჩუნებას.

პეკინის მტკიცებით, პატრულირება ტაივანის სრუტის ორივე მხარეს მცხოვრები ადამიანების კანონიერი ინტერესებისა და უსაფრთხოების დაცვასაც ემსახურება. ამასთან, ჩინეთის წარმომადგენელმა ტაივანის მმართველი ძალა სეპარატისტულ პოლიტიკაში დაადანაშაულა და განაცხადა, რომ სწორედ ეს კურსი ზრდის სამხედრო დაპირისპირების საფრთხეს.

დაძაბულობის გამწვავებას წინ უძღოდა ინციდენტი, რომლის დროსაც ტაივანის სანაპირო დაცვამ ჩინური სათევზაო გემის წინააღმდეგ წყლის ჭავლი გამოიყენა. ამის შემდეგ ჩინეთის ხელისუფლებამ ტაივანი შესაძლო შედეგების შესახებ გააფრთხილა. ტაივანის ინფორმაციით, კვირიდან მოყოლებული ორი შემთხვევა დაფიქსირდა როდესაც  ჩინეთის სანაპირო დაცვის გემები პრატასის კუნძულებს მიუახლოვდნენ. ტაიპეი ამ მოქმედებებს პროვოკაციულად მიიჩნევს.

პრატასის კუნძულები სტრატეგიულად მნიშვნელოვან ადგილას მდებარეობს, სამხრეთ ტაივანსა და ჰონგ-კონგს შორის. იქ მუდმივი სამოქალაქო მოსახლეობა არ ცხოვრობს, ხოლო ტაივანიდან კუნძულებამდე მანძილი 400 კილომეტრს აღემატება. უსაფრთხოების საკითხებზე მომუშავე ექსპერტები მიიჩნევენ, რომ გეოგრაფიული დაშორების გამო ტერიტორია ჩინეთის შესაძლო სამხედრო მოქმედებების მიმართ მოწყვლადია.

ტაივანის კონტინენტური საკითხების საბჭოს ხელმძღვანელმა ჩიუ ჩუი-ჩენგმა სამშაბათს, ტაიპეიში გამართულ ფორუმზე, განაცხადა, რომ ჩინეთი ცდილობს ტაივანის საკითხის შიდა ადმინისტრაციულ საკითხად წარმოჩენას და მის გარშემო არსებულ წყლებზე ფაქტობრივი კონტროლის დამყარებას. მისი შეფასებით, პეკინის პოლიტიკა შესაძლოა უფრო აქტიურ და პროვოკაციულ ხასიათს იძენდეს, რაც ტაივანზე ჩინეთის იურისდიქციის გავრცელებას ემსახურება.

ჩინეთის ლიდერის სი ძინპინის შესაძლო მეოთხე ვადით არჩევის მოლოდინში, პეკინისთვის ტაივანთან „ეროვნული გაერთიანების“ მიზანი კვლავ ერთ-ერთ მნიშვნელოვან პოლიტიკურ პრიორიტეტად რჩება. ამ ფონზე, პრატასის კუნძულების გარშემო განვითარებული მოვლენები აჩვენებს, რომ დაპირისპირება მხოლოდ ტერიტორიულ პრეტენზიებს არ უკავშირდება, ის ასევე ეხება საზღვაო უსაფრთხოებას, იურისდიქციას და რეგიონში ძალთა ბალანსს.

წყარო: https://www.reuters.com/world/china/china-says-it-is-safeguarding-order-around-taiwan-controlled-south-china-sea-2026-10-21/?utm_source

ჩინეთი ტაივანის მახლობლად საზღვაო კონტროლის გაფართოებას ცდილობს Read More »

Scroll to Top