Civicidea

ისრაელის თავდაცვის ძალები ჩინურ მანქანებს ბლოკავს

ამბები / /

ისრაელის თავდაცვის ძალებში ცვლილებები ხორციელდება: 2025 წლის ნომებრის დასაწყისში, ისრაელის თავდაცვის ძალებმა მიიღო გადაწყვეტილება, რომ შეწყვეტენ ჩინეთში წარმოებული მანქანების გამოყენებას. ამის მიზეზად კი, მანქანებიდან მიღებული ინფორმაციის ჩინეთის ხელში მოხვედრის რისკი დაასახელეს. IDF-ის განცხადებით, 2026 წლის პირველი კვარტლისთვის, 700-დე მანქანა, განსაკუთრებით კი Chery Tiggo 8 pro, ამოღებული იქნება ისრაელის უმცროსი ოფიცრების ფლოტიდან. გადაწყვეტილება მიიღეს მას შემდეგ, რაც გაჩნდა ეჭვები, რომ მანქანებში ჩაშენებული ჭკვიანი მოწყობილობები შესაძლოა ინფრომაციას აგროვებდნენ ისრაელის სამხედრო ძალების შესახებ და მას ჩინეთს, ან რომელიმე სხვა მესამე ძალას გადასცემდნენ.

აღნიშნული გადაწყვეტილება არ წარმოადგენს მხოლოდ სამომავლო შიშს შპიონაჟის შესახებ. ჩინური მანქანები, რომლებიც ისრაელის თავდაცვის ძალების პოლკოვნიკებსა და სხვა თანამდებობის პირებს 2022 წლიდან გადაეცათ, დახურული ოპერაციული სისტემით მუშაობს. მანქანებში ჩაშენებულია ჭკვიანი ტექნოლოგიები: კამერები, მიკროფონები, სენსორები, თუ საკომუნიკაციო სისტემები, რომელთაც შეუძლიათ აუდიო, ვიდეო, გეოლოკაციისა და ბიომეტრიული მონაცემების შეგროვება. გარდა ამისა, შესაძლებელია ამ მონაცემების გარე, პოტენციურად ჩინეთში მდებარე სერვერებზე გადაცემა, მძღოლის, თუ იმპორტიორის თანხმობისა და ცოდნის გარეშე.

გარდა ამისა, მანქანებში ჩაშენებული GPS მოწყობილობები მუდმივად აგროვებენ ინფორმაციას მანქანის მდებარეობისა და დაიგნოსტიკის შესახებ, ამასთანავე, Chery Tiggo 8 pro-ს მაღალი გარჩევადობის 360 გრადუსიან კამერებს შეუძლიათ სამხედრო წვრთნების, ჯარების გადაადგილებისა, თუ სამხედრო ტექნიკის ოპერირების დაფიქსირება. 

საინტერესოა, რომ უსაფრთხოების წარმომადგენლებმა თავადვე სცადეს მანქანების, “სტერილიზაცია” ისე, რომ აღეკვეთათ ინფორმაციის გადაცემა გარე ძალებისთვის, თუმცა, მათი დასკვნით, ეს შეუძლებელია.

აღნიშნული რისკების გათვალისწინებით, ისრაელის ზოგიერთმა უსაფრთხოებისა და დაზვერვის სააგენტომ უარი განაცხადა ჩინური ავტომობილების მათ ტერიტორიაზე შეშვებაზე.

გარდა IDF-სა, მიმდინარე თვის დასაწყისში ისრაელის საჰაერო ინდუსტრიებისა და თავდაცვის სხვა მიმართულებების ინდუსტრიებმაც აკრძალეს ჩინური მანქანების გამოყენება. ამასთანავე, ისინი გეგმავენ ჩინური წარმოების მანქანების დაშვების აკრძალვას თავდაცვითი ქარხნების ტერიტორიაზე, ხოლო ამ მანქანების მფლობელ მუშაკებს მოუწევთ მანქანების ქარხნებს გარეთ არსებულ საზოგადოებრივ ავტოსადგომებზე გაჩერება.

ისრაელის საჰაერო ძალების ცნობით, უკვე არსებობს ტერიტორიები, სადაც ჩინური მანქანების შესვლა აკრძალულია. ამასთანავე, ისინი აპირებენ ასეთი სივრცეების გაფართოებას, რათა არ მოხდეს გაუთვალისწინებელი შემთხვევები და თანამშრომლების, თუ სტუმრების ჩინური მანქანები შემთხვევით არ მოხვდეს სენსიტიურ ტერიტორიებზე.

აღნიშნულ გადაწყვეტილებებს შესაძლოა ისრაელში ჩინური მანქანების ექსპორტის მნიშვნელოვანი შეფერხება მოყვეს. ეს პროცესი უკვე ნაწილობრივ დაწყებულია, ვინაიდან, მნიშვნელოვნად შეიზღუდა და გაჭიანურდა იმპორტის ლიცენზიების გაცემა ჩინურ ავტომობილებზე. არსებული ინფორმაციით, ჩინეთის მთავრობა უკვე ოფიციალურად დაუკავშირდა ისრაელს აღნიშნულ საკითხთან დაკავშირებით, მას შემდეგ, რა მსხვილი ავტომობილების იმპორტიორებისთვის ლიცენზიების გაცემის ვადა გადაიდო.

ისრაელის უსაფრთხოების ძალების ეს ნაბიჯი ისრაელს ამერიკის შეერთებული შტატებისა და დიდი ბრიტანეთის გვერდით აყენებს, სადაც ასევე შეზღუდულია ჩინური მოწყობილობების უსაფრთოხების უწყებების ტერიტორიებზე დაშვება. ამერიკის შეერთებულ შტატებში, პენტაგონმა სამთავრობო, უსაფრთოებისა და სამხედრო უწყებების ტერიტორიებზე არა მხოლოდ ჩინური მანქანების, არამედ ჩინური მობილური ტელეფონების გამოყენებაც კი აკრძალა.

საინტერესოა, რომ ჩინური ავტომობილები აქტიურად შემოდის საქართველოშიც. 2024 წლის იანვარ-აგვისტოში, საქართველოში ჩინური ავტომობილების იმპორტი წინა წლის იგივე პერიოდთან შედარებით 111%-ით გაიზარდა.  ექსპერტები ჩინური მანქანების ხელმისაწვდომობის პარალელურად, საუბროდნენ მასთან დაკავშირებულ რისკებზეც, რაც ევროპულ ხარისხთან შეუსაბამობას მოიცავდა. გარდა ამისა, 2025 წელს, ,,სენა ავტო ჯგუფთან” გაფორმებული ურთიერთთანამშრმობლობის მემორანდუმის შედეგად,  ისრაელის თავდაცვის ძალების მიერ აკრძალული Chery ქართულ ბაზარზე ოფიციალურად შემოვიდა. 

საინტერესოა, რომ ჩინური ჭკვიანი ტექნოლოგიების მიერ ინფორმაციის შეგროვებისა და ჩინეთისა, თუ სხვა ძალებისთვის გადაცემის საფრთხე საქართველოშიც დგას. ბოლო რამდენიმე წლის განმავლობაში, საქართველო აქტიურად ყიდულობს და იყენებს ჩინურ სათვალთვალო კამერებს, რაც დიდ რისკებთანაა დაკავშირებული. ,,სამოქალაქო იდეას” კვლევის მიხედვით, აღნიშნული კამერები საქართველოს ეროვნულ უსაფრთხოებას საფრთხის ქვეშ აყენებს, ვინაიდან ჩინური ჭკვიანი კამერები იძლევა ადამიანის სახის ამოცნობის, ხმის ჩაწერის შესაძლებლობას და ქმნის ამ ინფორმაციის ჩინეთის ხელში მოხვედრის საფრთხეს. სწორედ ამ საფრთხეების გამო, გარკვეული ჩინური ჭკვიანი კამერები აკრძალულია მრავალ დასავლურ ქვეყანაში, მათ შორის: ამერიკის შეერთებულ შტატებში, დიდ ბრიტანეთში, თუ ევროკავშირის ქვეყნებში.

ავტორი: მარიამ კაპანაძე

ისრაელის თავდაცვის ძალები ჩინურ მანქანებს ბლოკავს Read More »

” რატომ ვერ შეიცვალა ხელისუფლება 2024 წლის პროტესტების ტალღის დროს? ” – თინათინ ხიდაშელის ანალიზი

ამბები / /
Eastern Neighborhood Bulletin-მა გამოაქვეყნა ანალიტიკური სტატია იმის შესახებ, თუ რატომ ვერ შეიცვალა ხელისუფლება 2024 წლის პროტესტების ტალღის დროს.
სტატიაში სხვადასხვა ქვეყნის ცხრა ექსპერტის შეფასებებია თავმოყრილი.
სტატიაში ასევე იხილავთ სამოქალაქო იდეას ხელმძღვანელის, თინათინ ხიდაშელის, ანალიზსაც, სადაც ის აღწერს, როგორ ვერ შეძლო ოპოზიციურმა პარტიებმა საზოგადოებრივი ენერგიის გარდაქმნა პოლიტიკურ სტრატეგიად:
“2024 წლის საპარლამენტო არჩევნები ყველასთვის ბოლო იმედის ნაპერწკლად აღიქმებოდა, გამონაკლისს, როგორც ჩანს, წარმოადგენდნენ მხოლოდ მთავარი მოთამაშეები- ოპოზიციური პარტიები. საზოგადოებაში არსებობდა მოლოდინი, რომ ოპოზიცია გადადგამდა თამამ, მოულოდნელ ნაბიჯებს, რომლებიც ხელისუფლებას დისკომფორტში ჩააგდებდა და მის კარგად დაგეგმილ სტრატეგიას დაარღვევდა. როცა ქვეყნის სუვერენიტეტი და მისი მომავალი კურსი დგას სასწორზე, ბრძოლა მხოლოდ ქუჩის პროტესტით ვეღარ გაგრძელდება – მას სჭირდება პოლიტიკური ძალა. წინააღმდეგობა აუცილებლად უნდა იყოს პოლიტიკური – ორგანიზებული და გამყარებული იმ სუბიექტების მიერ, რომლებიც ძალაუფლების პრეტენზიის ლეგიტიმურობასა და შესაძლებლობას ფლობენ, ესეთი სუბიექტები კი პოლიტიკური პარტიები არიან.
 
უნდა ამოქმედებულიყო სამეტაპიანი, გარდაუვალი ცვლილების მარტივი გეგმა: საზოგადოებას, პოლიტიკური სიმპათიების მიუხედავად, მოეთხოვა ცვლილება; შემდეგ დაეჯერებინა, რომ ის შესაძლებელი იყო; და ბოლოს, გამოეყო ძალა, რომელსაც გამარჯვებისა და შემდეგ ქვეყნის მართვის უნარი ჰქონდა. აქტივისტებმა და სამოქალაქო სექტორმა თავიანთი მისია შეასრულეს. მოძრაობა თვალსაჩინოდ კრეატიული და ენერგიული იყო, რაც ნათლად აჩვენებდა, რომ საზოგადოება ცვლილებას ითხოვდა. მაგრამ ეს დიდი ენერგია პოლიტიკურმა ლიდერობამ ვერ აქცია სტრატეგიად, ვერ გარდაქმნა ხელისუფლებაში მოსვლის რეალურ გეგმად. “ – სამოქალაქო იდეას ხელმძღვანელი, თინათინ ხიდაშელი.
 
სტატია სრულად იხილეთ აქ:
 
Why Didn’t Georgian Dream Fall?

” რატომ ვერ შეიცვალა ხელისუფლება 2024 წლის პროტესტების ტალღის დროს? ” – თინათინ ხიდაშელის ანალიზი Read More »

თინათინ ხიდაშელი ჰიტოცუბაშის უნივერსიტეტში

ამბები / /

02 დეკემბერს, ჰიტოცუბაშის უნივერსიტეტში “Global Governance Research (GGR)”–ის სერიის ფარგლებში, სამოქალაქო იდეის თავმჯდომარე თინათინ ხიდაშელი შეხვდა სტუდენტებს და ისაუბრა თემაზე – „პატარა სახელმწიფოები არასტაბილურ რეგიონებში: რა გვასწავლის საქართველოს მიმდინარე პოლიტიკური კრიზისი“.

ხიდაშელმა მსმენელს გააცნო საქართველოს გეოპოლიტიკური გარემოს განვითარება, სამხრეთ კავკასიაში არსებული დინამიკები და იმ გამოწვევები, რომლებიც რეგიონში ავტორიტარული გავლენის ზრდას, ჰიბრიდულ საფრთხეებსა და უსაფრთხოების არასტაბილურობას უკავშირდება. განხილვის მთავარი ხაზები იყო, თუ როგორ ახდენს ეს ყველაფერი გავლენას მცირე სახელმწიფოების სტრატეგიულ არჩევანებზე და როგორ მოქმედებს მათი გადაწყვეტილებები რეგიონულ უსაფრთხოებაზე.

შეხვედრას ესწრებოდნენ ჰიტოცუბაშის უნივერსიტეტის სტუდენტები, პროფესორები, ჟურნალისტები და პოლიტიკის შემქმნელები, რომლებმაც ხიდაშელთან ერთად იმსჯელეს რეგიონში მიმდინარე გეოპოლიტიკურ პროცესებზე და მცირე სახელმწიფოების წინაშე მდგარ გამოწვევებზე.

თინათინ ხიდაშელი ჰიტოცუბაშის უნივერსიტეტში Read More »

სამოქალაქო იდეას განცხადება მიზანმიმართული დეზინფორმაციული თავდასხმის შესახებ

ამბები / /
დღეს სამთავრობო არხებმა დაიწყო მიზანმიმართული დეზინფორმაციული კამპანია “სამოქალაქო იდეას” და ორგანიზაციის თავმჯდომარე თინათინ ხიდაშელის წინააღმდეგ.
 
პრო-სამთავრობო მედიების ნარატივი ხელისუფლების ბოლოდროინდელი პრაქტიკის გაგრძელებაა – ვინც კრიტიკული კითხვებს სვამს, მათ “ანტისახელმწიფოებრივად” აცხადებენ, რათა რეალური პრობლემები საჯარო ყურადღების მიღმა დარჩეს. შესაბამისად, ამ კამპანიის მთავარი მიზანია კვლევის შინაარსისა და წარმოდგენილი მტკიცებულებების გადაფარვა.
 
მოკლედ გთავაზობთ კვლევის შინაარსიდან მნიშვნელოვან მონაკვეთებს.
 
🚨 რა ფაქტებმა გააღიზიანა “ქართული ოცნება”?
 
1. ირანული ნავთობისა და ნავთობპროდუქტების იმპორტის მკვეთრი ზრდის ტენდენცია:
ბოლო წლებში, ირანიდან საქართველოში იმპორტირებული ნავთობისა და ნავთობპროდუქტების წილი მნიშვნელოვნად გაიზარდა. კერძოდ,
 
თუ 2020 წელს ირანული იმპორტის მოცულობა 45 მილიონ აშშ დოლარს შეადგენდა, 2024 წლისთვის ეს მაჩვენებელი თითქმის ხუთჯერ გაიზარდა და 285 მილიონ აშშ დოლარს მიაღწია.
 
2021 წელს საქართველოში იმპორტირებული ნავთობისა და ნავთობპროდუქტების მოცულობა, 2020 წლის მაჩვენებელთან შედარებით, 154 პროცენტით გაიზარდა და 3413 ტონას შეადგენდა.
 
საყურადღებოა, რომ ირანის ისლამური რესპუბლიკისთვის ნავთობპროდუქტებით ვაჭრობა შემოსავლის ერთ-ერთ მთავარ წყაროს წარმოადგენს. შესაბამისად, ირანიდან საქართველოში ნავთობის ექსპორტის მზარდი ტენდენცია ცხადად მიუთითებს თეირანის ირიბ ფინანსურ მხარდაჭერაზე.
 
2. ირანიდან ნავთობპროდუქტების იმპორტის შესახებ აშშ-ის ოფიციალური გაფრთხილება:
 
მიმდინარე წლის 1 მაიის, აშშ-ის პრეზიდენტმა, დონალდ ტრამპმა, სოციალურ პლატფორმა Truth Social-ზე გამოაქვეყნა პოსტი:
 
“გაფრთხილება: ირანული ნავთობის ან ნავთობქიმიური პროდუქტების შესყიდვა დაუყოვნებლივ უნდა შეწყდეს! ნებისმიერი ქვეყანა, ან პირი, რომელიც ირანიდან ნავთობის ან ნავთობქიმიური პროდუქტების ნებისმიერ რაოდენობას შეიძენს, დაუყოვნებლივ დაექვემდებარება მეორად სანქციებს.“
 
როგორც ჩანს, “ქართული ოცნება” ცდილობს გადაფაროს ფაქტები, რომლებიც ხაზს უსვამს მის კოლაბორაციონისტულ დამოკიდებულებას ამერიკისადმი მტრულად განწყობილი ძალის მიმართ.
 
3. ირანულენოვანი ვებ-გვერდების რეკომენდაციები საქართველოს გავლით სანქციებისთვის გვერდის ავლის თაღლითური სქემის შესახებ:
 
ირანულ ინტერნეტ-სივრცეში განთავსებულია არაერთი სტატია, სადაც ღიად არის აღწერილი თაღლითური სქემები, რომელთა საშუალებითაც, ირანელი ბიზნესმენები საერთაშორისო სანქციებს გვერდს უვლიან. ირანული წყაროების მიხედვით, საქართველოს გავლით, თეირანს შეუძლია დაუკავშირდეს როგორც რუსულ და ჩინურ, ისე დასავლეთის ბაზრებს.
 
“[ირანელ ბიზნესმენებს] შეუძლიათ საკუთარი საქონელი საქართველოში შეიტანონ, შემდეგ საქართველოში შეფუთვით და „საქართველოში წარმოებული პროდუქციის“ ნიშნით – საბაჟო ტარიფების გადახდის გარეშე და კონკურენტულ ფასად – განახორციელონ მისი ექსპორტი ევროპასა და ამერიკაშიც კი.”
 
“ირანს ნამდვილად შეუძლია საქართველოსთან ვაჭრობის გზით ამერიკის მიერ ირანზე დაწესებულ შეზღუდვებსა და სანქციებს გვერდი აუაროს და მსოფლიო ბაზარზე სხვადასხვა პროდუქციით გასვლის შესაძლებლობა მოიპოვონ […]
 
საქართველოს ერთ-ერთი უპირატესობა, რომლის მეშვეობითაც მას შეუძლია ირანი მსოფლიო ბაზარს დააკავშიროს, არის ის, რომ მას ვაჭრობის სფეროში აქვს ბევრი შეთანხმება ევროპასთან.”
 
ირანულენოვანი ვებ-გვერდები მოუწოდებენ ირანელ ბიზნესმენებს, რომ ისარგებლონ საქართველოში არსებული ხელსაყრელი ბიზნეს გარემოთი და დააფუძნონ კომპანიები:
 
ირანული კომპანია Arad Branding-ის ოფიციალურ ვებ-გვერდზე იძებნება სტატია, რომელშიც ხაზგასმულია საქართველოსთან ვაჭრობის უპირატესობები: “გირჩევთ, რომ საქართველოში, განსაკუთრებით, პორტების მახლობლად, კომპანია დაარეგისტრიროთ. ამ გზით შეგიძლიათ მარტივად განახორციელოთ ვაჭრობა. კომპანიის რეგისტრაციის შემთხვევაში თქვენ შეგიძლიათ ხარჯები მნიშვნელოვნად შეამციროთ.”
 
❗ კიდევ ერთხელ აღვნიშნავთ, რომ “სამოქალაქო იდეას” ანგარიში ეფუძნება ღია წყაროებს და სტატისტიკის ეროვნული სამსახურის მიერ გამოქვეყნებულ მონაცემებს. “ქართული ოცნება” ანგარიშში მისი მისამართით დასმულ კრიტიკულ შეკითხვებს ჩვეული ტაქტიკით – დეზინფორმაციული კამპანიით პასუხობს.
კვლევა სრულად

სამოქალაქო იდეას განცხადება მიზანმიმართული დეზინფორმაციული თავდასხმის შესახებ Read More »

თინათინ ხიდაშელის გამოსვლა ტოკიოს უნივერსიტეტში

ამბები / /

1 დეკემბერს ტოკიოს უნივერსიტეტში, კვლევისა და ტექნოლოგიების ცენტრის (RCAST) მიერ ორგანიზებულ კონფერენციაზე, მომხსენებლად გამოვიდა სამოქალაქო იდეას ხელმძღვანელი, თინათინ ხიდაშელი. 

მოხსენებაზე: „Frontlines of Influence: Russia, China, and the Hybrid Contest over Georgia“  – თინათინ ხიდაშელმა ისაუბრა საქართველოს გეოპოლიტიკურ მდგომარეობაზე, მიმოიხილა ავტორიტარული სახელმწიფოების; რუსეთისა და ჩინეთის მზარდი გავლენები საქართველოს შიდა პოლიტიკურ სივრცესა და ეკონომიკურ სექტორებზე.

“თინათინ ხიდაშელი ისაუბრებს, როგორ იქცა საქართველო ჰიბრიდული ომის საცდელ ველად. საქართველო, პატარა ქვეყანა კავკასიაში, უმკლავდება მსოფლიოს ერთ-ერთ ყველაზე მწვავე სტრატეგიულ გამოწვევებს; რუსეთის გავლენებს დემოკრატიული პროცესების შეფერხების პროცესში, ჩინეთის ეკონომიკური პროექტების საფრთხეებსა და სამოქალაქო საზოგადოების მიმართ გაძლიერებულ ზეწოლას. მისი გამოსვლა, ამავდროულად, შეეხება ჩინეთის მიერ დაგეგმილ ინვესტიციებს საქართველოში, მათ შორის სტრატეგიულად მნიშვნელოვან ანაკლიის პორტს.

საქართველოს სამოქალაქო სივრცის შემცირებასთან ერთად, თინათინ ხიდაშელი თავადაც გახდა მძლავრი დეზინფორმაციის სამიზნე, ამის ერთ-ერთი მაგალითია სამთავრობო არხის მიერ მომზადებული “დოკუმენტური ფილმი”, რომელმაც იგი წარმოჩინა როგორც „ტაივანის აგენტი“ და იაპონური მთავრობის სახელით გარკვეული ინტერესების გამტარებელი.

ზემოთჩამოთვლილი საფრთხეები მხოლოდ საქართველოს არ ეხება. ავტორიტარული აქტორების მიერ გავრცელებულმა დეზინფორმაციულმა კამპანიებმა მსოფლიო მასშტაბით გაიდგა ფესვები, ამიტომ შეხვედრა ყველასთვის საინტერესო უნდა იყოს”  – წერს აკირა აგატა, ტოკიოის უნივერსიტეტის, კვლევისა და ტექნოლოგიების ცენტრის (RCAST) ლექტორი შეხვედრის შესახებ საინფორმაციო ბარათში.

შეხვედრას ესწრებოდნენ ტოკიოს უნივერსიტეტის სტუდენტები, აკადემიური წრისა და მედიის წარმომადგენლები. ღონისძიება ინტერაქტიული ფორმატით წარიმართა: მოხსენების შემდეგ გაიმართა კითხვა-პასუხის სესია და დისკუსია.

თინათინ ხიდაშელის გამოსვლა ტოკიოს უნივერსიტეტში Read More »

“პატარა სახელმწიფოები არასტაბილურ რეგიონებში” თინათინ ხიდაშელის გამოსვლა ჰიტოცუბაშის უნივერსიტეტში

ამბები / /

“პატარა სახელმწიფოები არასტაბილურ რეგიონებში: რა გვასწავლის საქართველოს მიმდინარე პოლიტიკური კრიზისი”- თინათინ ხიდაშელის გამოსვლა

📅 02/დეკ/2025

📍ჰიტოცუბაშის უნივერსიტეტი, იაპონია

“The institute for global governance research (GGR) ”-ის მიერ ორგანიზებული შეხვედების სერიის ფარგლებში, ჰიტოცუბაშის  უნივერსიტეტის სტუდენტებს 2 დეკემბერს შეხვდება სამოქალაქო იდეას თავმჯდომარე,  თინათინ ხიდაშელი.  შეხვედრის ფარგლებში იგი ისაუბრებს საქართველოსა და სამხრეთ კავკასიაში არსებულ გეოპოლიტიკურ სიტუაციაზე და რეგიონში მომძლავრებული ავტორიტარული ძალების გამოწვევებზე , 

“თინათინ ხიდაშელი ხელმძღვანელობს ქართულ კვლევით-ანალიტიკურ ორგანიზაციას „სამოქალაქო იდეა“, რომელიც ებრძვის ავტორიტარული ძალების გავლენებს საქართველოში, წინააღმდეგობას უწევს რუსულ პროპაგანდას და ემსახურება საქართველოს დაცვისა და უსაფრთხოების პოლიტიკის ჩამოყალიბებას.

თინათინ ხიდაშელი არის ჰიბრიდულ ომზე პირველი ქართული წიგნის ავტორი,  რამდენიმე უნივერსიტეტში ასწავლიდა ჰიბრიდული ომსა და თავდაცვის პოლიტიკას. კარიერის მანძილზე  იკავდება სხვადასხვა მაღალ თანამდებობას საჯარო სამსახურში, მათ შორის იყო საქართველოს პირველი ქალი თავდაცვის მინისტრი და საქართველოს ახალგაზრდა იურისტთა ასოციაციის დამფუძნებელი/თავმჯდომარე. ორგანიზაციის, რომელიც დღემდე წარმოადგენს ერთ-ერთ უდიდეს უფლებადამცველ ჯგუფს საქართველოში.” – წერს “GGR”.

“პატარა სახელმწიფოები არასტაბილურ რეგიონებში” თინათინ ხიდაშელის გამოსვლა ჰიტოცუბაშის უნივერსიტეტში Read More »

საქართველო და ჩინეთი სატრანსპორტო სფეროში თანამშრომლობას აძლიერებენ

კატეგორიის გარეშე / /

საქართველო ჩინეთთან აძლიერებს კავშირებს, განსაკუთრებით სატრანსპორტო, სავაჭრო და ინფრასტრუქტურულ სფეროში. ეკონომიკის მინისტრი მარიამ ქვრივიშვილი შეხვდა ჩინეთის ტრანსპორტის მინისტრის მოადგილეს, ლი იანს, ლონდონში, სადაც ისაუბრეს თანამშრომლობის გაფართოებაზე, რაც ასევე მოიცავს საზღვაო ხაზებსა და სატრანსპორტო ინფრასტრუქტურას. ძირითადი ყურადღება გამახვილდა შუა დერეფანზე (ჩინეთისა და ევროპის დამაკავშირებელი ტრანსკასპიური მარშრუტი, სადაც საქართველოს მნიშვნელოვანი სატრანზიტო როლი აქვს).

ვიზიტი თვის დასაწყისში პრემიერ მინისტრის, ირაკლი კობახიძის, ჩინეთში ვიზიტს მოჰყვა, სადაც ორივე მხარე დათანმხდა პირდაპირი ფრენების დაწესებას თბილისსა და პეკინს შორის. ამავდროულად, მოლაპარაკებები მიმდინარეობს შესაძლო პირდაპირი ფრენების დაწესებასთან დაკავშირებით თბილისიდან შანხაის მიმართულებით. ქვრივიშვილმა აღნიშნულ ზომები დაახასიათა როგორც სავაჭრო, ეკონომიკური და ადამიანური კავშირების გაძლიერება. ამასთანავე, საქართველოს მხარემ ხაზი გაუსვა ჩინეთის გამოცდილების მნიშვნელობას საზღვაო განვითარებაში.

ბოლო სამი წლის განმავლობაში შუა დერეფანში ტვირთის გადაზიდვა საგრძნობლად გაიზარდა, დაახლოებით 90%-ით, ხოლო 2024 წელს 4.5 მილიონ ტონას მიაღწია, შესაბამისად 2025 წელს ზრდა 5.2 მილიონ ტონამდე იყო მოსალოდნელი. ანაკლიის ღრმაწყლოვან პორტსა და ბაქო-თბილისი-ყარსის რკინიგზაში ინვესტიციების მიზანი კი 2027 წლამდე გამტარუნარიანობის 10 მილიონ ტონამდე გაზრდას უკავშირდება.

თუმცა, ექსპერტების თქმით, ჩინეთის ხშირი ჩართულობა ნაკლებად სარგებლიანია საქართველოსთვის და რეგიონში ძირითადად სტრატეგიული საყრდენის უზრუნველყოფას უკავშირდება. ჩინური კომპანიები დომინირებენ საქართველოს ინფრასტრუქტურულ პროექტებში, როგორიც არის გზების მშენებლობა და საქართველოს კრიტიკულ ინფრასტრუქტურაში ჩართულობა. აღნიშნული ინვესტიციები ხშირად ხასიათდება „ვალის მახის” დიპლომატიითა და ბუნდოვანი შეთანხმებებით, როგორც პეკინისთვის სასარგებლო პოლიტიკური ბერკეტი.

ანალიტიკოსები ამტკიცებენ, რომ საქართველოს მოკლევადიან ეკონომიკური სარგებელსა და სატვირთო გადაზიდვების მოცულობაში გაზრდას შესაძლოა მოჰყვეს გრძელვადიანი უარყოფითი შედეგი, რაც გამოიხატება პეკინზე ეკონომიკურ დამოკიდებულებაში. ამავე კონტექსტში, კრიტიკოსები ხაზს უსვამენ საქართველოს როლს ჩინეთის გლობალურ „ერთი სარტყელი, ერთი გზა” ინიციატივაში, რომელიც ცნობილია, როგორც პეკინის გეოპოლიტიკური ამბიციების განვითარების მექანიზმი. საქართველოს გაზრდილი დამოკიდებულება ჩინურ ინვესტიციებზე, ტექნოლოგიებსა და სავაჭრო მარშრუტებზე საყურადღებოა ეროვნული ინტერესების დაცვის კონტექსტშიც, რათა არ გაჩნდეს უცხოურ სტრატეგიულ პრიორიტეტებზე დამოკიდებულება.

ავტორი: მარიამ სანაძე

საქართველო და ჩინეთი სატრანსპორტო სფეროში თანამშრომლობას აძლიერებენ Read More »

რუსეთისა და ჩინეთის გავლენის ოპერაციები საქართველოში – თინათინ ხიდაშელის გამოსვლა ტოკიოს უნივერსიტეტში

ამბები / /

ტოკიოს უნივერსიტეტში, კვლევისა და ტექნოლოგიების ცენტრის (RCAST) მიერ ორგანიზებულ კონფერენციაზე, მომხსენებლად გამოვა სამოქალაქო იდეას ხელმძღვანელი, თინათინ ხიდაშელი. 

მოხსენებაზე: „Frontlines of Influence: Russia, China, and the Hybrid Contest over Georgia“  – თინათინ ხიდაშელი ისაუბრებს საქართველოს გეოპოლიტიკურ მდგომარეობაზე, მიმოიხილავს ავტორიტარული სახელმწიფოების; რუსეთისა და ჩინეთის მზარდ გავლენებს საქართველოს შიდა პოლიტიკურ სივრცესა და ეკონომიკურ სექტორებზე.

“თინათინ ხიდაშელი ისაუბრებს, როგორ იქცა საქართველო ჰიბრიდული ომის საცდელ ველად. საქართველო, პატარა ქვეყანა კავკასიაში, უმკლავდება მსოფლიოს ერთ-ერთ ყველაზე მწვავე სტრატეგიულ გამოწვევებს; რუსეთის გავლენებს დემოკრატიული პროცესების შეფერხების პროცესში, ჩინეთის ეკონომიკური პროექტების საფრთხეებსა და სამოქალაქო საზოგადოების მიმართ გაძლიერებულ ზეწოლას. მისი გამოსვლა, ამავდროულად, შეეხება ჩინეთის მიერ დაგეგმილ ინვესტიციებს საქართველოში, მათ შორის სტრატეგიულად მნიშვნელოვან ანაკლიის პორტს.

საქართველოს სამოქალაქო სივრცის შემცირებასთან ერთად, თინათინ ხიდაშელი თავადაც გახდა მძლავრი დეზინფორმაციის სამიზნე, ამის ერთ-ერთი მაგალითია სამთავრობო არხის მიერ მომზადებული “დოკუმენტური ფილმი”, რომელმაც იგი წარმოჩინა როგორც „ტაივანის აგენტი“ და იაპონური მთავრობის სახელით გარკვეული ინტერესების გამტარებელი.

ზემოთჩამოთვლილი საფრთხეები მხოლოდ საქართველოს არ ეხება. ავტორიტარული აქტორების მიერ გავრცელებულმა დეზინფორმაციულმა კამპანიებმა მსოფლიო მასშტაბით გაიდგა ფესვები, ამიტომ შეხვედრა ყველასთვის საინტერესო უნდა იყოს”  – წერს აკირა აგატა, ტოკიოის უნივერსიტეტის, კვლევისა და ტექნოლოგიების ცენტრის (RCAST) ლექტორი. 

რუსეთისა და ჩინეთის გავლენის ოპერაციები საქართველოში – თინათინ ხიდაშელის გამოსვლა ტოკიოს უნივერსიტეტში Read More »

კიდევ ერთი ტრაგედია საქართველოში ჩინური კომპანიების ჩართულობით მიმდინარე გზის პროექტში

ამბები, ერთი ახალი ამბავი / /

ქვეშეთი–კობის გზის სამშენებლო მონაკვეთზე 23 ნოემბერს მორიგი ტრაგედია დატრიალდა. სოფელ წკერესთან, საყრდენი კედლის მოწყობის სამუშაოებისას, მეწყრის შედეგად ჩამოიშალა მიწის დიდი მასა, რომლის ქვეშ მოყვა სამშენებლო კომპანიის ხუთი თანამშრომელი – თურქმენეთისა და ჩინეთის მოქალაქეები. ოთხი მათგანი ადგილზევე გარდაიცვალა, ერთი კი გადაყვანილ იქნა კლინიკაში. გზების დეპარტამენტის ცნობით „შემთხვევის ადგილზე მობილიზებულია საგანგებო სიტუაციების მართვის სამსახური და გამოძიება კი უკვე დაწყებულია”.

პროექტს ახორციელებენ ჩინური კომპანიები China Railway Tunnel Group Co და China Railway 23rd Bureau Group Co. მთავრობის განცხადებაში საუბარია კონტრაქტორი კომპანიებისთვის უსაფრთხოების ნორმების გამკაცრების მოთხოვნაზე.

სამწუხაროდ, ქვეშეთი–კობის გზაზე მომხდარი ტრაგედია მხოლოდ მორიგი დასტურია იმ მძიმე ტენდენციისა, რომელზეც  „სამოქალაქო იდეა”  ბოლო რამდენიმე წელია წერს ანგარიშებს, გასცემს რეკომენდაციებს და აფრთხილებს როგორც ქვეყნის მთავრობას, ისე მოსახლეობას.

2017 წლიდან მოყოლებული სხვადასხვა საერთაშორისო ორგანიზაციების ანგარიშები მიუთითებდა, რომ ზემოხსენებული კონტრაქტორები უსაფრთხოების წესებს მხოლოდ ფორმალურად ასრულებდნენ, ხოლო რეალური მონიტორინგი არ ხდებოდა. ეს საქართველოში დადასტურდა ჯერ კიდევ 2022 წელს, როდესაც CRTG-ის გვირაბში აფეთქების შედეგად CO₂-ის დაგროვებამ ერთი ადამიანის სიცოცხლე უკვე შეიწირა.

კომპანიას პრობლემატური რეპუტაცია აქვს არა მხოლოდ საქართველოში, არამედ მსოფლიოს მასშტაბით. CRTG და მისი დედა კომპანია CRCC აშშ-ის თავდაცვის დეპარტამენტის შავ სიაში არიან. ამას გარდა, 2019 წელს მსოფლიო ბანკმა ამავე კომპანიებს თაღლითური პრაქტიკების გამო 20-თვიანი სანქციების პაკეტი წარუდგინა. მათ შორის სატენდერო დოკუმენტაციის გაყალბებისა და მუშების შრომითი უფლებების დარღვევისთვის.

„სამოქალაქო იდეა”  გამაფრთხილებელი ანგარიშების პასუხად იღებდა ბრალდებებს ქვეყნის ინტერესების საწინაარდეგოდ მოქმედებაზე. კობზე მომხდარი მორიგი ტრაგედია კითხვას აჩენს, თუ ვის ინტერესებს ემსახურებოდნენ ის ადამიანები, რომლებიც წლების მანძილზე უგულებელყოფდნენ ჩვენი და ამ საკითხებზე მომუშვე ყველა საერთაშორისო და არასამთავრობო ორგანიზაციის რეკომენდაციებს.

მაღალი ტექნიკური და გარემოსდაცვითი რისკებისა და გაფრთხილებების ფონზე ცხადად სავალდებულო იყო კონტრაქტორების მკაცრი მონიტორინგის საჭიროება. თუმცა, ეს შემთხვევა კიდევ ერთი ტრაგიკული დასტურია იმისა, რომ სახელმწიფო უწყებების მხრიდან ყველა გაფრთხილება იგნორირებულ იქნა და, მეტიც, ისინი კვლავ აგრძელებენ ამ კომპანიების უპირობოდ მხარდაჭერას. საინტერესოა, რა ინტერესები იდგა ამ გარიგებების უკან, რომლებსაც ოცნების რეჟიმი საერთაშორისოდ სანქცირებულ და რეპუტაციაშელახულ ჩინურ კომპანიებთან დებდა.

კიდევ ერთი ტრაგედია საქართველოში ჩინური კომპანიების ჩართულობით მიმდინარე გზის პროექტში Read More »

ლი მოუწოდებს ჩინეთსა და გერმანიას, გააღრმავონ დიალოგი და მოაგვარონ პრობლემები

ერთი ახალი ამბავი / /

ჩინეთის პრემიერ-მინისტრმა, ლი ციანმა ჩინეთსა და გერმანიას დიალოგის გააღრმავებისა და პრობლემების მოგვარებისკენ მოუწოდა, რაც მიანიშნებს პეკინის სურვილზე, გააძლიეროს გერმანიასთან ურთიერთობების პოლიტიკური და ეკონომიკური საფუძვლები. გერმანიის კანცლერ ფრიდრიხ მერცთან შეხვედრაზე, რომელიც იოჰანესბურგში G20-ის სამიტის ფარგლებში გაიმართა, ლიმ აღნიშნა „ერთობლივი ძალისხმევის აუცილებლობა დიალოგისა და კომუნიკაციის გასაძლიერებლად და არსებული პრობლემების სწორად გადასაჭრელად“.

ლიმ გაიხსენა, რომ მას შემდეგ, რაც 53 წლის წინ დიპლომატიური კავშირები დამყარდა, ჩინეთი და გერმანია ჩამოყალიბდნენ მნიშვნელოვან ეკონომიკურ და სავაჭრო პარტნიორებად, ხოლო მრავალწლოვანმა თანამშრომლობამ ხელი შეუწყო ორივე ქვეყნის განვითარებას. მისი თქმით, ურთიერთპატივისცემა და მომგებიანი თანამშრომლობა უნდა იყოს ურთიერთობების ძირითადი პრინციპი. სწორედ ამ საფუძველზე შეიძლება აშენდეს სტაბილური, მდგრადი და მაღალი ხარისხის ყოვლისმომცველი სტრატეგიული პარტნიორობა.

პრემიერის თქმით, პეკინი მზად არის გააძლიეროს სტრატეგიული კომუნიკაცია ბერლინთან. მან ხაზი გაუსვა ერთმანეთის „ძირითადი ინტერესებისა და მნიშვნელოვანი საკითხების პატივისცემის“ აუცილებლობას და მოუწოდა გერმანიას, შეიმუშავოს რაციონალური და პრაგმატული პოლიტიკა ჩინეთის მიმართ. ლიმ მოუწოდა ბერლინს თავი აარიდოს ზედმეტ პოლიტიკურ ზეწოლას და ფოკუსირდეს საერთო სარგებელზე დაფუძნებულ სფეროებზე.

ლიმ ასევე აღნიშნა, რომ საჭიროა პრაგმატული თანამშრომლობის გაფართოება სხვადასხვა სექტორში. მისი თქმით, განსაკუთრებით პერსპექტიული მიმართულებებია ახალი ენერგია, ბიომედიცინა, წყალბადის ენერგიის ტექნოლოგია და სხვა.

პრემიერ-მინისტრმა ყურადღება გაამახვილა ევროკავშირთან ურთიერთობების უფრო ფართო კონტექსტზეც და აღნიშნა, რომ წელს აღინიშნება ჩინეთსა და ევროკავშირს შორის დიპლომატიური ურთიერთობების 50 წლისთავი. მან მოუწოდა გერმანიას, ხელი შეუწყოს ევროკავშირი–ჩინეთის ურთიერთობების განვითარებას გრძელვადიანი და უფრო ღია ხედვის საფუძველზე. ლიმ განმარტა, რომ ბერლინს შეუძლია დაარწმუნოს ევროკავშირი, რომ ამ უკანასკნელმა ჩინეთი აღიქვას არა როგორც გამოწვევა, არამედ როგორც სტრატეგიული პარტნიორი.

ლიმ განაცხადა, რომ ჩინეთი მზად არის მჭიდროდ ითანამშრომლოს გერმანიასთან ისეთ გლობალურ ფორმატებში, როგორიცაა გაერო და G20. მისი თქმით, ამ პლატფორმებზე უფრო აქტიური თანამშრომლობა გააძლიერებს გლობალურ მმართველობას, დაეხმარება მულტილატერალიზმის დაცვას, ხელშემწყობი იქნება თავისუფალი ვაჭრობისთვის და ორივე ქვეყანას „კონსტრუქციულ და საიმედო ძალად აქცევს მშვიდობისა და განვითარების ხელშეწყობის საქმეში“.

კანცლერმა მერცმა დადებითად შეაფასა ლის პოზიცია და ყურადღება გაამახვილა გერმანია–ჩინეთის ეკონომიკური კავშირების ხანგრძლივი და პროდუქტიული ისტორია. მან ხაზი ხაზი ბერლინის მზადყოფნას, ითანამშრომლოს ისეთ პერსპექტიულ სფეროებში, როგორიცაა მეცნიერება და ტექნოლოგიები. მერცმა კიდევ ერთხელ დაადასტურა გერმანიის ერთგულება ღია ბაზრების, პოლიტიკური და ეკონომიკური თანამშრომლობის გაღრმავებისა და ევროკავშირი–ჩინეთის დიალოგის განვითარებაში აქტიური როლის შესრულების მიმართ.

ლის მიმართვა გერმანიისადმი განსაკუთრებით მნიშვნელოვანია მიმდინარე გეოპოლიტიკური გარემოს ფონზე, როდესაც ორივე ქვეყანა პოლიტიკური დაძაბულობისა და ეკონომიკური ურთიერთდამოკიდებულების რთულ კონტექსტში აგრძელებს ურთიერთობებს. ბერლინში შეშფოთებას იწვევს ჩინეთის სამრეწველო პოლიტიკა, ხოლო გერმანულ კომპანიებს აწუხებთ ჩინეთის მიერ დაწესებული რიგი საექსპორტო შეზღუდვები. მიუხედავად ამისა, ორივე მხარე კარგად აცნობიერებს ეკონომიკური ურთიერთობებისგან მიღებულ ორმხრივ სარგებელს.

პრაგმატიზმის, ინოვაციურობისა და მრავალმხრივი ჩართულობის ხაზგასმით, ლი ციანმა მიანიშნა, რომ პეკინი აპირებს გერმანიასთან ურთიერთობის გაგრძელებას არა მხოლოდ ვაჭრობის მიმართულებით, არამედ გრძელვადიანი და სტრატეგიული პარტნიორობით, რითაც შესაძლებელი იქნება პოლიტიკური გამოწვევების გადალახვა და თანამშრომლობის გაფართოება უახლეს თუ ტექნოლოგიურად განვითარებულ სფეროებში.

ლი მოუწოდებს ჩინეთსა და გერმანიას, გააღრმავონ დიალოგი და მოაგვარონ პრობლემები Read More »

Scroll to Top