Civicidea

თავისუფალი ვაჭრობის შეთანხმება ჩინეთსა და ASEAN-ს შორის

ერთი ახალი ამბავი / /

28 ოქტომბერს, მალაიზიაში,  ASEAN-ის სამიტზე ჩინეთმა ხელი მოაწერა სამხრეთ-აღმოსავლეთ აზიის ქვეყნების ასოციაციასთან თავისუფალი ვაჭრობის შესახებ შეთანხმების გაფართოებულ ვერსიას. ეს ასოციაცია მოიცავს ბრუნეის, კამბოჯას, ინდონეზიას, ლაოსს, მალაიზიას, მიანმარს, ფილიპინებს, სინგაპურს, ტაილანდს, ტიმორ-ლესტეს და ვიეტნამს. ორგანიზაცია წარმოადგენს სამხრეთ-აღმოსავლეთ აზიის 11 ქვეყნის რეგიონულ გაერთიანებას, რომელიც მიზნად ისახავს წევრ ქვეყნებს შორის ეკონომიკური და უსაფრთხოების თანამშრომლობის ხელშეწყობას.

ჩინეთსა და ASEAN-ს შორის ჩარჩო შეთანხმებას 2002 წელს მოეწერა ხელი, რამაც საფუძველი ჩაუყარა, 2010 წლისათვის, ASEAN-ჩინეთის თავისუფალი სავაჭრო ზონის (ACFTA) შექმნას. ეს სავაჭრო ზონა მოიცავს დაახლოებით 2 მილიარდ ადამიანს და არსებითად ამცირებს სატარიფო ბარიერებს წევრ ქვეყნებსა და ჩინეთს შორის. მისი მეშვეობით ჩინეთისა და ASEAN-ის სავაჭრო ურთიერთობები 2010 წელს 235,5 მილიარდი დოლარიდან გასულ წელს თითქმის 1 ტრილიონ დოლარამდე გაიზარდა.

2025 წლის ხელშეკრულების შესახებ მოლაპარაკებებში, ჩინეთის წარმომადგენელი იყო პრემიერ მინისტრი ლი ციანგი, რომელმაც ეს შეთანხმება წარმოაჩინა როგორც ალტერნატიული გზა, დონალდ ტრამპის პროტექციონისტული პოლიტიკისა და გაზრდილი სავაჭრო ბარიერების საპასუხოდ. მან სიტყვით გამოსვლისას განაცხადა, რომ „სოლიდარობის მაგივრად კონფრონტაციისაკენ სწრაფვას არავითარი სარგებელი არ მოაქვს“, „უნილატერალიზმმა და პროტექციონიზმმა სერიოზულად იმოქმედა გლობალურ ეკონომიკურ და სავაჭრო წესრიგზე და მაშინ, როდესაც გარე ძალები აძლიერებენ ჩარევას რეგიონში, ბევრი ქვეყანა დაუსაბუთებლად აღმოჩნდა მაღალი ტარიფების პირისპირ“. „ერთმანეთზე დაყრდნობით და ჩვენი ქმედებების კოორდინირებით, შეგვიძლია დავიცვათ ჩვენი უფლებები და ინტერესები“. მან, ასევე, ASEAN-ის წევრებს მიმართა, როგორც „კარგ მეზობლებს და კარგ ძმებს, რომლებიც დაახლოებულნი არიან გეოგრაფიით, კულტურითა და სენტიმენტებით“.

თუმცა, ამავე დროს, ჩინეთი აგრძელებს თავისი კონტროლის განმტკიცებას თითქმის მთელ სამხრეთ ჩინეთის ზღვაზე. ოფიციალურ პეკინს დავები აქვს ვიეტნამთან, ფილიპინებთან, მალაიზიასთან და ბრუნეისთან. ვითარება უფრო დაძაბულია ფილიპინებსა და ჩინეთს შორის. 2013 წელს ფილიპინებმა, სამხრეთ ჩინეთის ზღვაზე ჩინეთის ფართო პრეტენზიებთან დაკავშირებით, ჩინეთის წინააღმდეგ საქმე განსახილველად წარადგინა მუდმივ საარბიტრაჟო სასამართლოში. 2016 წელს ტრიბუნალმა დაადგინა, რომ ჩინეთის პრეტენზიებს სამხრეთ ჩინეთის ზღვაზე არ აქვს სამართლებრივი საფუძველი. ჩინეთმა სასამართლოს აღნიშნული გადაწყვეტილება ბათილად ცნო.

სიტუაცია ჩინეთსა და ფილიპინებს შორის ამ თვეშიც დაიძაბა. კერძოდ, ფილიპინების საზღვაო საბჭომ დაადანაშაულა ჩინეთის საზღვაო ძალები ტიტუს კუნძულის მახლობლად ფილიპინების გემზე წყლის ჭავლით თავდასხმაში. წლევანდელ ASEAN-ის სამიტზე, ჩინეთსა და ASEAN-ის წევრებს შორის ერთიანობისა და მეგობრობის შესახებ ჩინეთის პრემიერის, ლი ციანგის სიტყვებს ფილიპინების პრეზიდენტი სკეპტიციზმით შეხვდა და კვლავ გააკრიტიკა ჩინეთის ქმედებები სამხრეთ ჩინეთის ზღვაში.

თავისუფალი ვაჭრობის შეთანხმება ჩინეთსა და ASEAN-ს შორის Read More »

ჩინეთი იაპონიის ახალ პრემიერ-მინისტრს, სანაე ტაკაიჩის, ცივად შეხვდა

ერთი ახალი ამბავი / /

ჩინეთმა, თითქმის ერთი კვირის განმავლობაში, იაპონიის ახალ პრემიერ-მინისტრს, სანაე ტაკაიჩის, თანამდებობაზე დანიშვნა არ მიულოცა. ეს მოვლენა, ქვეყნებს შორის დიპლომატიური ურთიერთობების ისტორიაში, უპრეცედენტო შემთხვევას წარმოადგენს და აჩენს კითხვებს ორ ქვეყანას შორის ურთიერთობების მდგომარეობის შესახებ.

64 წლის სანაე ტაკაიჩიმ, რომელიც ჩინეთთან მიმართებით მკაცრი პოზიციით გამოირჩევა, თანამდებობა სამშაბათს დაიკავა. იგი გახდა ქვეყნის ისტორიაში პირველი ქალი პრემიერ-მინისტრი და მეხუთე პირი, ვინც ამ თანამდებობას ბოლო ხუთ წელიწადში იკავებს.

საყურადღებოა, რომ გასული წლის ოქტომბერში, იაპონიის ყოფილ პრემიერ-მინისტრს, შიგერუ იშიბას, როგორც ჩინეთის პრეზიდენტმა სი ძინპინმა, ისე პრემიერმა ლი ციანგმა, თანამდებობის დაკავების დღესვე მიულოცეს პრემიერ-მინისტრად დანიშვნა. პეკინმა ასევე დაუყოვნებლივ გაუგზავნა მისალოცი შეტყობინებები იაპონიის ყოფილ ლიდერებს, ფუმიო კიშიდას, 2021 წლის ოქტომბერში და იოშიჰიდე სუგას, 2020 წლის სექტემბერში.

ჩინეთის საგარეო საქმეთა სამინისტროს მიერ გასული კვირის ხუთშაბათს გამართულ ბრიფინგზე დასმულ შეკითხვაზე, მიულოცავდა თუ არა პეკინი ტაკაიჩის თანამდებობაზე დანიშვნას, სამინისტროს სპიკერმა, გუო ძიაკუნმა განაცხადა: „ჩინეთმა შესაბამისი ღონისძიებები დიპლომატიური პრაქტიკის მიხედვით მიიღო“. „ჩინეთი და იაპონია ერთმანეთის ახლო მეზობლები არიან. ჩინეთის ფუნდამენტური პოზიცია იაპონიასთან ურთიერთობების მიმართ თანმიმდევრული და ნათელია“, – დასძინა გუომ.

„ვიმედოვნებთ, რომ იაპონია და ჩინეთი… შეასრულებენ თავიანთ პოლიტიკურ ვალდებულებებს, მთავარ საკითხებთან დაკავშირებით… დაიცავენ ორმხრივი ურთიერთობების პოლიტიკურ პრინციპებს და სრულად განავითარებენ ჩინეთ-იაპონიის ურთიერთსასარგებლო სტრატეგიულ ურთიერთობებს“.

ზოგიერთი ანალიტიკოსი თვლის, რომ ტაკაიჩის ადმინისტრაციის პირობებში შესაძლოა პეკინსა და ტოკიოს შორის დაძაბულობა გამწვავდეს, რასაც, გარკვეულწილად, განაპირობებს მხარეების, თაივანთან და იაპონიის ომისდროინდელ ისტორიასთან დაკავშირებული, საკამათო პოზიციებით. ტაკაიჩი აქტიურად უჭერს მხარს პრემიერ-მინისტრის ვიზიტს იასუკუნის სადავო სალოცავში, სადაც იაპონიის ომში დაღუპულ გმირებს პატივს მიაგებენ. ჩინეთისთვის პოლიტიკოსების ამ სალოცავში ვიზიტი აღშფოთების მიზეზია, რადგან იაპონიის მიერ 1931 წელს ჩინეთის ოკუპაციას და მის მიერ ომის დროს ჩადენილ სისასტიკეებს უკავშირდება.

პეკინის კრიტიკას, ასევე, განაპირობებს ტაკაიჩის კონტაქტები თაივანის ოფიციალურ პირებთან. აპრილში, თაიფეიში თაივანის ლიდერ უილიამ ლაი ჩინგ-ტესთან შეხვედრისას, ტაკაიჩიმ ხაზი გაუსვა მხარეებს შორის თავდაცვითი თანამშრომლობის მნიშვნელობას. ის, ასევე, შეხვდა თაივანის საგარეო საქმეთა მინისტრ ლინ ჩია-ლუნგს ივლისში, იაპონიაში.

ჩინეთსა და იაპონიას შორის ურთიერთობებს დიდი ხანია აფერხებს ტერიტორიული დავები, 1930-იანი წლების ომისდროინდელი ისტორია და ტოკიო-ვაშინგტონის ალიანსი. მიუხედავად ეკონომიკური თანამშრომლობის გაღრმავებისა და ხალხთაშორისი გაცვლების ხელშეწყობის მცდელობებისა, ორ ქვეყანას შორის კავშირები, განსაკუთრებით უსაფრთხოების სფეროში, კვლავ დაძაბულია. ეს დაძაბულობა სავარაუდოდ გაგრძელდება, რადგან ტაკაიჩიმ, პარასკევს, თავის პირველ პოლიტიკურ გამოსვლაში, აღნიშნა, რომ იაპონიის თავდაცვის ხარჯებს გაზრდის. ჩინეთის საგარეო საქმეთა სამინისტროს განცხადებით, მსგავსი ინიციატივები იაპონიის თავდაცვის პოლიტიკის მიმართ რეგიონში ეჭვებს ამძაფრებს.

ჩინეთი იაპონიის ახალ პრემიერ-მინისტრს, სანაე ტაკაიჩის, ცივად შეხვდა Read More »

პეკინის ახალი ხუთწლიანი გეგმა თაივანში განგაშს იწვევს

ერთი ახალი ამბავი / /

ჩინეთი მე-15 ხუთწლიანი გეგმის გამოსაქვეყნებლად ემზადება. ამასობაში, თაივანი სულ უფრო მეტად არის შეშფოთებული, რომ პეკინმა, შესაძლოა, აღნიშნული გეგმა გამოიყენოს გავლენის გასაფართოებლად თაივანის სრუტეში, არა მარტო ვაჭრობისა და მრეწველობის სექტორებზე, არამედ თაივანის მიმდებარე კუნძულების მიმართულებით. 

თაიფეის ოფიციალური პირები შიშობენ, რომ პეკინმა შესაძლოა თაივანი ან მისი კუნძულები, როგორიცაა კინმენი და მაცუ, სიმბოლურად შეიტანოს მომავალ 5 წლიან გეგმაში. მსგავსი ნაბიჯი პეკინთან ეკონომიკურ თანამშრომლობასა და მის პოლიტიკურ კონტროლს შორის ზღვარს გააბუნდოვანებს. 

ჩინეთის ახალი გეგმა, სავარაუდოდ, კონცენტრირებულია მაღალტექნოლოგიურ ინდუსტრიებზე, მწვანე ენერგეტიკასა და ინფრასტრუქტურაზე. ანალიტიკოსები ამბობენ, რომ პეკინმა შესაძლოა სცადოს თაივანის კომპანიების ინტეგრირება თავის ეკონომიკურ სისტემაში და მათ შესთავაზოს სტიმულები, ინვესტიციების მოზიდვისა და რიგი ინდუსტრიების (მათ შორის, ნახევარგამტარების, ელექტრომობილებისა და ხელოვნური ინტელექტის) ჩინეთის პრიორიტეტებთან შესაბამისობაში მოსაყვანად.

პეკინი ამგვარ თანამშრომლობას “ორმხრივად მომგებიანად” წარადგენს, მაგრამ თაივანი მას ხედავს, როგორც გრძელვადიან სტრატეგიას, დამოკიდებულების გაზრდისა და გაერთიანების მიმართ თაივანის წინააღმდეგობის შესუსტების მიზნით.

ანალიტიკოსები ხაზს უსვამენ მზარდ შეშფოთებას კინმენისა და მაცუსზე – თაივანის მიერ კონტროლირებულ ორ კუნძულზე, რომლებიც მდებარეობს ჩინეთის სანაპიროდან სულ რამდენიმე კილომეტრში. პეკინმა ახლახან გააფართოვა საჰაერო მარშრუტები, გაზარდა სანაპირო დაცვის პატრულირება და თაივანთან კონსულტაციის გარეშე, ხიემენიდან კინმენამდე ხიდის აშენების ინიციატივით გამოვიდა.

თაიფეი შიშობს, რომ ასეთი გადაწყვეტილებები შესაძლოა ადრეული ნაბიჯები იყოს დე ფაქტო კონტროლის დამტკიცებისთვის. “თუ ისინი გაბედავენ კინმენში შეჭრას, ჩვენ გავხდებით შემდეგი ყირიმი,’’- განაცხადა ტაივანის ოფიციალურმა წარმომადგენელმა.

ექსპერტები აღნიშნავენ, რომ პეკინის მიდგომა, პირდაპირი სამხედრო დაპირისპირებიდან, ეკონომიკურ და ინფრასტრუქტურულ ინტეგრაციაზე გადავიდა. ჩინეთი მისივე განვითარებისთვის ცდილობს თაივანის ეკონომიკურ საქმიანობაში ჩართვას, რათა გაერთიანება პრაქტიკული და გარდაუვალი გამოჩნდეს.

ამავდროულად, კინმენისა და მაცუ–ს მაცხოვრებლები, რომლებიც თაივანიდან ვაჭრობასა და ტურიზმზე არიან დამოკიდებულნი, რთული სიტუაციის წინაშე დგანან ეკონომიკურ შესაძლებლობებსა და ეროვნულ უსაფრთხოებას შორის. კუნძულები ასევე დაუცველია კრიტიკული ინფრასტრუქტურის საფრთხეების, მათ შორის წყალქვეშა საკომუნიკაციო კაბელების მიმართ. თაივანმა დააკავა ჩინეთთან დაკავშირებული გემები, რომლებიც ეჭვმიტანილნი იყვნენ ამ კაბელების დაზიანებაში და გააძლიერა პატრულირება, რაც ხაზს უსვამს თაივანის შეშფოთებას პეკინის არასამხედრო ზეწოლის ტაქტიკის გამო.

თაივანის ლიდერებმა მოუწოდეს პეკინს, თავი შეიკავოს თაივანის ტერიტორიებსა და შიდა პოლიტიკაში ჩართვაზე. ამავდროულად, თაივანი აგრძელებს თავდაცვის გაძლიერებას გარე კუნძულებზე, ინვესტიციებს ახორციელებს დრონსაწინააღმდეგო სისტემებსა და სანაპირო დაცვის პატრულირებაში.

ანალიტიკოსები ფიქრობენ, რომ მიუხედავად იმისა, რომ ჩინეთის გეგმა შეიძლება არ ითვალისწინებდეს თაივანის აშკარას ანექსიას, “ინტეგრაციის ზონებზე” ან ინფრასტრუქტურულ კავშირებზე ნებისმიერმა მითითებამ შეიძლება გაზარდოს დაძაბულობა და წინააღმდეგობაში მოვიდეს თაივანის სუვერენიტეტთან.

პეკინის შემდეგი ხუთწლიანი გეგმა შესაძლოა მიმართული იყოს არა მხოლოდ ჩინეთის ეკონომიკური მომავლისკენ, არამედ, მან შეიძლება ხელახლა განსაზღვროს პეკინის კონტროლი თაივანის სრუტეზე. ჩინეთი, როგორც ჩანს, ეკონომიკური წახალისებისა და სტრატეგიული დაგეგმვის მეშვეობით, თაივანის დამოკიდებულების გაზრდას აპირებს. 

ავტორი: ნია კოხრეიძე

პეკინის ახალი ხუთწლიანი გეგმა თაივანში განგაშს იწვევს Read More »

ჩინელებს ჯერ ფულის დახარჯვა არ უნდათ, ეს კი ივანიშვილს არ აწყობს – ინტერვიუ თინათინ ხიდაშელთან

ამბები / /

შუა დერეფანზე გაამახვილა ყურადღება ირაკლი კობახიძემ ჩინეთის სახალხო რესპუბლიკის დაარსების 76-ე წლისადმი მიძღვნილ ღონისძიებაზე 29 სექტემბერს.

მანამდე, რამდენიმე დღით ადრე, საქართველოს თავდაცვის ყოფილმა მინისტრმა, თინა ხიდაშელმა ჰელსინკის კომისიას მიმართა: „საქართველოს სტრატეგიული მდებარეობა არ უნდა შერჩეს ჩინურ, რუსულ და ირანულ გავლენებს…“

რეალურად, რა ინტერესი აქვს ჩინეთს საქართველოში?

„მარტო გზებში ჩინური კომპანიების მიერ მიღებული სატენდერო თანხები თითქმის ორჯერ აღემატება მათ მიერ საქართველოში განხორციელებულ ინვესტიციებს. ჩინეთიდან ინვესტიცია რამდენად რეალურია, ყველაზე კარგად ამ რიცხვების შედარებით ჩანს: ორჯერ მეტი ფული აქვთ წაღებული საქართველოდან, ჩვენი გადასახადის გადამხდელების, ევროპელი, ამერიკელი გადასახადის გადამხდელების ფული,“ – ამბობს თინა ხიდაშელი.

თავდაცვის ყოფილი მინისტრის აზრით, საქართველომ უნდა დაიბრუნოს თავისი გეოპოლიტიკური ფუნქცია რეგიონში. წინააღმდეგ შემთხვევაში, ანაკლიის პორტიც კი, ჩინეთისთვის საინტერესო აღარ იქნება.

„თუ რამე დღეს საქართველოსთან დაკავშირებით ინტერესს იწვევს, ეს არის საქართველოს პოზიციონირება ჩინეთთან და ირანთან… ეს არის თემა, რომლითაც შეიძლება დავაინტერესოთ ჩვენი პარტნიორები და დავანახოთ, რომ ამ რეგიონში, როდესაც მიმდინარეობს გლობალური პოლიტიკური გადათამაშება, საქართველოს მნიშვნელოვანი ფუნქცია აქვს,“ – მიიჩნევს თინა ხიდაშელი.

„ბათუმელებმა“ თინა ხიდაშელთან ინტერვიუ ჩაწერა. იგი საქართველოს თავდაცვის ყოფილი მინისტრია და არასამთავრობო ორგანიზაციის „სამოქალაქო იდეის“ ხელმძღვანელი.

  • ქალბატონო თინა, რა ეტაპზეა საქართველო-ჩინეთის მოკავშირეობა? შუა დერეფანსა და სავაჭრო კავშირებზე გაამახვილა ყურადღება 29 სექტემბერს ირაკლი კობახიძემ, როდესაც ჩინეთის სახალხო რესპუბლიკის დაარსების 76-ე წლისადმი მიძღვნილ ღონისძიებას დაესწრო. მანამდე თქვენ ჰელსინკის კომისიას მიმართეთ: „საქართველოს სტრატეგიული მდებარეობა არ უნდა შერჩეს ჩინურ, რუსულ და ირანულ გავლენებს…“

ერთია, სამართლებრივად სად ვართ და მეორე: რეალურ ცხოვრებაში რა ხდება. სამართლებრივად, ქაღალდებს რომ გავყვეთ, მემორანდუმებს, რომელიც ფორმდება, საკმაოდ სწრაფად მივდივართ ამ ურთიერთობებში. ბევრი შეთანხმებაა, მაგალითად, იგივე განათლების სამინისტროებს შორის. სხვათა შორის, ელჩმა იმ ღონისძიებაზე, რომელიც თქვენ ახსენეთ, ბევრი ისაუბრა, რომ სკოლებში ჩინური დაემატა, როგორც მეორე უცხოური ენა და კონფუცის ინსტიტუტები ძლიერდება – უფრო და უფრო მეტი საგანმანათლებლო ცენტრი იხსნება უნივერსიტეტებთან, რაც არის ჩინეთის „რბილი ძალის“ ერთ-ერთი ყველაზე მნიშვნელოვანი ინსტრუმენტი.

ასევე, ეკონომიკის სამინისტროსთან უამრავი შეთანხმება ფორმდება პოტენციური ინვესტიციების შესახებ. ისევ ჩინეთის ელჩს დავესესხები, მან თქვა, რომ საქართველო ჩინეთისთვის საინვესტიციოდ საინტერესო ქვეყანააო. ამას ამბობენ უკვე 10 წელია, მაგრამ საქართველოში ჩინეთიდან განხორციელებული ინვესტიციები არ გვინახავს.

განახლდა შეთანხმების ხელმოწერის მოლაპარაკებები „თავისუფალი ვაჭრობის ხელშეკრულების“ მეორე ეტაპზე. როგორც ჩანს, ამას ხელს რეალურად მოაწერენ – ელჩმა თავის გამოსვლაში თქვა, პროგრესი სახეზეა და მოლაპარაკებები წარმატებულიაო.

რეალურ ცხოვრებაში კი, ჩვენ ვხედავთ ფაქტებს, სტატისტიკას, რიცხვებს და მონაცემებს, რომელიც სრულიად განსხვავებულია. მიუხედავად დაპირებებისა, ვერ ვნახეთ განვითარება ამ ურთიერთობებში, ვერ ვნახეთ რეალური ინვესტიციები, ვერ ვნახეთ ვაჭრობაში წარმატება.

ინვესტიციების კუთხით კატასტროფა გვაქვს: 2024 წელს 6 მილიონი იყო ჩინური ინვესტიცია საქართველოში – 60 მილიონი, ან 6 მილიარდი კი არა, 6 მილიონი. ეს წინა წლის ანალოგიურ პერიოდთან შედარებით [იანვარი – სექტემბერი] 93%-ით ნაკლებია.

ინტერვიუ სრულად

ჩინელებს ჯერ ფულის დახარჯვა არ უნდათ, ეს კი ივანიშვილს არ აწყობს – ინტერვიუ თინათინ ხიდაშელთან Read More »

„სამოქალაქო იდეას“ განცხადება ანასტასია ჯაფარიძის უკანონო დაკავების შესახებ

ამბები / /

2025 წლის 22 ოქტომბერს, თბილისში მიმდინარე მშვიდობიანი პროტესტისას, სამართალდამცავებმა ძალადობრივი და უკანონო მეთოდებით გაიტაცეს და დააკავეს ჩვენი ორგანიზაციის მოხალისე და საგანმანათლებლო პროგრამების აქტიური მონაწილე ანასტასია ჯაფარიძე. მისი დაკავება წარმოადგენს რეჟიმის მხრიდან სამოქალაქო აქტივიზმისა და პროტესტის გამოხატვის წინააღმდეგ მიმართულ მორიგ ძალისმიერ ქმედებას. ანასტასია ჯაფარიძე არის ღირსეული, განათლებული და მაღალი სამოქალაქო ცნობიერების მქონე ახალგაზრდა, რომელიც წლებია მონაწილეობს ჩვენი ორგანიზაციის საგანმანათლებლო და საზოგადოებრივ პროექტებში.

მოვითხოვთ მის დაუყოვნებლივ გათავისუფლებას.  ანასტასია ღირსეული წარმომადგენელია იმ თაობისა, რომელსაც ძალიან კარგად ესმის როგორც თავისუფლების, ისე დემოკრატიული ღირებულებების მნიშვნელობა. „სამოქალაქო იდეა“ მზადაა ანასტასიას და მის ოჯახს გაუწიოს სრული სამართლებრივი და საზოგადოებრივი მხარდაჭერა, სანამ მასზე მიმართული უსამართლო და უკანონო დევნა არ შეწყდება. „სამოქალაქო იდეა“ გმობს ხელისუფლების მხრიდან განხორციელებულ ყოველგვარ ძალადობას, დევნასა და სამოქალაქო აქტივიზმის მიზანმიმართულ კრიმინალიზაციას. სოლიდარობას ვუცხადებთ  ყველა პოლიტპატიმარს, ყველა იმ მოქალაქეს, ვინც საქართველოს ევროპული მომავლისთვის, დემოკრატიისთვის და ქვეყნის ღირსებისთვის დგას ქუჩაში, და ვისაც დღეს რეჟიმი თავისუფლებას ართმევს. საქართველოს მომავალი იმ ადამიანებზე დგას, ვინც აცნობიერებს თავისუფლების, ევროპული არჩევანისა და დემოკრატიული ღირებულებების ფასს.

„სამოქალაქო იდეას“ განცხადება ანასტასია ჯაფარიძის უკანონო დაკავების შესახებ Read More »

ჩინეთ-ევროკავშირის განახლებული დიალოგი

ერთი ახალი ამბავი / /

ჩინეთსა და ევროკავშირს შორის სავაჭრო და გეოპოლიტიკური დაძაბულობის ფონზე, 2025 წლის 21 ოქტომბერს ჩინეთის ვაჭრობის მინისტრმა ვან ვენტაომ ევროკომისარ მაროშ შეფჩოვიჩთან ვიდეო შეხვედრა გამართა, რათა ეკონომიკური ურთიერთობების ჯანსაღი და სტაბილური განვითარების გზები მოეძებნათ. მოლაპარაკებების მთავარი თემა ჩინეთის მხრიდან იშვიათი მინერალების ექსპორტის კონტროლის გამკაცრებას ეხებოდა, რასაც ვანგი „ნორმალურ ქმედებად“ მიიჩნევს, თუმცა ევროკავშირი ჩინეთის ამ ნაბიჯს არალეგიტიმურ ეკონომიკურ იძულებად აფასებს. იშვიათი მინერალები კრიტიკულად მნიშვნელოვანია ევროპული წარმოებისთვის (ელექტრომობილების ბატარეები, მაღალტექნოლოგიური იარაღი).

დიალოგის კიდევ ერთი საკვანძო საკითხი იყო ევროკავშირის ანტი-სუბსიდიური გამოძიება ჩინურ ელექტრომობილებთან დაკავშირებით. გარდა ამისა, მხარეებმა განიხილეს ჩინური კომპანია Nexperia-ს საქმე: ნიდერლანდების მთავრობამ მიიღო განსაკუთრებული ზომები ეროვნული უსაფრთხოების მოტივით, რაც ჩინეთის საკუთრებაში მყოფი აღნიშნული კომპანიის საქმიანობას საფრთხეს უქმნის. ნიდერლანდების მთავრობამ ჩინურ ტრანსნაციონალურ კორპორაცია Wingtech Technologies-ის შვილობილ, ავტოჩიპების მწარმოებელ კომპანია Nexperia-ზე მმართველობითი კონტროლი დაამყარა. ამ ნაბიჯის საპასუხოდ, ჩინეთმა Nexperia-სთვის ჩინეთში აწყობილი მზა პროდუქციისა და სხვა სახის კომპონენტების ექსპორტი აკრძალა, რითაც კომპანიას ევროპელი მომხმარებლებისთვის (BMW, Mercedes-Benz) შეკვეთების შესრულება შეუზღუდა.

ვან ვენტაომ ნიდერლანდების მხრიდან ეს ნაბიჯი „ეროვნული უსაფრთხოების ცნების გადამეტებულ გაფართოებად“ შეაფასა და მოითხოვა, რომ პატივი სცენ სახელშეკრულებო ვალდებულებებს, რაზეც ევროკავშირმა გამოთქვა მზადყოფნა, ხელი შეუწყოს ჰააგასა და პეკინს შორის კონსტრუქციულ მოლაპარაკებებს.

საბოლოოდ, ორივე მხარე შეთანხმდა, რომ მალე ბრიუსელში განახლებული შეხვედრა შედგება, რაც ადასტურებს მათ მზადყოფნას, მწვავე სავაჭრო დავები დიპლომატიური გზებით გადაჭრან.

ჩინეთ-ევროკავშირის განახლებული დიალოგი Read More »

Jamestown Foundation-ის გამოცემამ გამოაქვეყნა თინათინ ხიდაშელის სტატია ჩინეთ-საქართველოს „სტრატეგიული პარტნიორობის“ შესახებ

ამბები / /

🇬🇪🇨🇳 ჩინეთ-საქართველოს „სტრატეგიული პარტნიორობა“ შედეგს ვერ აღწევს

ვაშინგტონში დაფუძნებულმა Jamestown Foundation-ის გამოცემამ “ევრაზიის დღიური მონიტორინგის” სექციაში გამოაქვეყნა სამოქალაქო იდეას თავმჯდომარის, თინათინ ხიდაშელის, სტატია, სადაც ის აჩვენებს, რომ ჩინეთ-საქართველოს  „სტრატეგიული პარტნიორობა“ რეალურად ვერ უზრუნველყოფს საქართველოსთვის მოსალოდნელ სარგებელს.

მიუხედავად ოფიციალური განცხადებებისა, რომ თანამშრომლობა საქართველოს კეთილდღეობას მოუტანდა, ჩინური ინვესტიციები საქართველოში მინიმალურია, ვაჭრობის ბალანსი მკვეთრად იხრება ჩინეთის სასარგებლოდ, ხოლო სახელმწიფო ტენდერების დიდ ნაწილს, რომელიც ხშირად დასავლური ან ქართული სახსრებით დაფინანსებულ პროექტებია,  ჩინური კომპანიები იღებენ.

ამავდროულად, პეკინი გაეროში მუდმივად თავს იკავებს ან არ უჭერს მხარს საქართველოს ტერიტორიული მთლიანობის მხარდამჭერ რეზოლუციებს, რაც ადასტურებს, რომ „პარტნიორობა“ მხოლოდ აძლიერებს ჩინეთის გავლენას და საფრთხეს უქმნის საქართველოს სუვერენიტეტსა თუ  ევროპულ-ატლანტიკურ მისწრაფებებს.

სტატია ეყრდნობა სამოქალაქო იდეას უახლეს კვლევას:
 “From Schools to State: China’s Quiet Takeover — Illusions of Partnership, Risks of Dependence.”

თინათინ ხიდაშელის სტატია სრულად შეგიძლიათ ნახოთ ბმულზე:

სტატია სრულად

Jamestown Foundation-ის გამოცემამ გამოაქვეყნა თინათინ ხიდაშელის სტატია ჩინეთ-საქართველოს „სტრატეგიული პარტნიორობის“ შესახებ Read More »

ტრამპი სი ძინპინთან შეხვედრისას „ფანტასტიკური შეთანხმების“ მიღწევას გეგმავს

ერთი ახალი ამბავი / /

ამ თვის ბოლოს სამხრეთ კორეაში აზია-წყნარი ოკეანის ეკონომიკური თანამშრომლობის 2025 წლის სამიტის ჩატარებაა დაგეგმილი, სადაც წევრი ქვეყნების ლიდერები გლობალური ეკონომიკური საკითხების განსახილველად შეიკრიბებიან. ჩინეთსა და აშშ-ს შორის რთული ურთიერთობებისა და სავაჭრო ომის ფონზე, შეერთებული შტატების პრეზიდენტმა, დონალდ ტრამპმა, განაცხადა, რომ სამიტის ფარგლებში სი ძინპინთან შეხვედრას და ჩინეთთან „ფანტასტიკურ შეთანხმების“ მიღწევას იმედოვნებს. მან ტარიფების შემცირების ინიციატივა წამოაყენა, თუმცა ასევე აღნიშნა, რომ ჩინეთიც გარკვეულ დათმობებზე უნდა წავიდეს, მათ შორის აშშ-ში წარმოებული სოიოს შესყიდვა განაგრძოს და იშვიათ წიაღისეულზე შეზღუდვები გააუქმოს. ეს ორი გარემოება, კერძოდ, ჩინეთის მიერ ამერიკის შეერთებული შტატებიდან სოიოს იმპორტის საგრძნობლად შემცირება და იშვიათ წიაღისეულზე მონოპოლია, ჩინეთის ხელში ძლიერი იარაღია, რომლითაც შესაძლოა, ტრამპზე ზეწოლა მოახდინოს, რათა ამ უკანასკნელმა შეამციროს ტარიფები და პეკინთან შეთანხმება დადოს.

ამერიკელი ფერმერებისთვის თითქმის შეუძლებელია ჩინეთის უზარმაზარი მოთხოვნის სხვა ალტერნატივით ჩანაცვლება, ვინაიდან ჩინეთი მსოფლიოში სოიოს უმსხვილესი იმპორტიორი და ამერიკელი ფერმერების ნაწარმის უდიდესი შემსყიდველია. მაგალითად, გასულ წელს ჩინეთმა აშშ-ში წარმოებული სოიოს ნახევარი შეისყიდა, რაც დაახლოებით 12.6 მილიარდ დოლარს შეადგენს. თუმცა, წელს, აშშ-ს მიერ დაწესებული ტარიფების საპასუხოდ, ჩინეთის მიერ სოიოს შესყიდვები მნიშვნელოვნად შემცირდა, რამაც საგრძნობლად იმოქმედა ამერიკელ ფერმერებზე, რომლებიც თავის მხრივ მოუწოდებენ ტრამპს, შეცვალოს ჩინეთის მიმართ პოლიტიკა.

სანამ ამერიკელი ფერმერები სასოწარკვეთილები არიან, ჩინეთმა ადვილად გამოძებნა ალტერნატიული მიმწოდებელი ბრაზილიის სახით. აგვისტოში ჩინეთმა ბრაზილიიდან 4.7 მილიარდი დოლარის სოიო შეიძინა, რაც აშშ-ს მიწოდებასთან შედარებით დაახლოებით ორმოცდაათჯერ მეტია. ეს სიტუაცია ჩინეთს უპირატეს მდგომარეობაში აყენებს – ის ზეწოლას ახდენს აშშ-ს სოფლის მეურნეობის სექტორზე და ამავდროულად, ბრაზილიასთან ვაჭრობით აღრმავებს „სამხრეთ-სამხრეთის თანამშრომლობას“.

სოიოს პრობლემის გარდა, რომელიც შესაძლოა მხოლოდ ამერიკელ ფერმერებს ეხებოდეს, არსებობს ჩინეთის მიერ იშვიათი წიაღისეულის ექსპორტზე დაწესებული შეზღუდვების საკითხიც, რომელიც უზარმაზარ პრობლემას წარმოადგენს არა მხოლოდ აშშ-სთვის, არამედ გლობალური ეკონომიკისა და ელექტრომოწყობილობების ბაზრისათვის. ჩინეთი აკონტროლებს გადამუშავებული იშვიათი წიაღისეულების გლობალური წარმოების 90%-ზე მეტს. ამრიგად, აშშ-სა და ჩინეთს შორის მომავალი სამიტი და მოლაპარაკებები მნიშვნელოვანი მოვლენაა გლობალური ეკონომიკისთვის. ამ სავაჭრო ომმა ზიანი მიაყენა ორივე ქვეყანას და მათ ეკონომიკას. შესაბამისად, მათ შორის შეთანხმება, როგორც ტრამპმა აღნიშნა, მართლაც „ფანტასტიკური“ იქნება. თუმცა, ტრამპის არაპროგნოზირებადი გადაწყვეტილებების გათვალისწინებით, ძნელი სათქმელია, რა მოხდება სინამდვილეში.

ტრამპი სი ძინპინთან შეხვედრისას „ფანტასტიკური შეთანხმების“ მიღწევას გეგმავს Read More »

ჩინეთი ეკონომიკის ხუთწლიანი განვითარების გეგმას აანონსებს

კატეგორიის გარეშე / /

სი ძინპინი მიმდინარე კვირაში, მეოთხე პლენარულ სხდომაზე, წარადგენს ჩინეთის ხუთწლიან სტრატეგიას, რომლის მიზანია, აშშ-სთან კონკურენციის ფონზე,  გლობალურ დონეზე მეორე უდიდესი ეკონომიკის შექმნა. აღსანიშნავია, რომ შეხვედრა წარიმართება აშშ-ს პრეზიდენტ დონალდ ტრამპთან შეხვედრამდე ერთი კვირით ადრე, რომელიც სამხრეთ კორეაში იგეგმება.

ეკონომიკის სფერო არაა ერთადერთი საკითხი – პლენუმი შეიძლება მოიცავდეს საკადრო ცვლილებებსაც, ვინაიდან, ანტიკორუფციული კამპანიის შედეგად, რამდენიმე პირი გაათავისუფლეს თანამდებობიდან. ცენტრალური მნიშვნელობისაა ცენტრალური სამხედრო კომისიის  საკადრო ცვლილებები,  რომლის რეპუტაცია სი ძინპინის ანტიკორუფციული კამპანიის შედეგად დაკნინებულია: კომისიის ექვსი სამხედრო პირიდან სამი გათავისუფლდა. პლენუმის დროს თავისუფალ ადგილებს ცენტრალურ კომიტეტში დაახლოებით 12 ალტერნატიული წევრი შეავსებს.

ნეილ თომასის, აზიის საზოგადოების პოლიტიკის ინსტიტუტისა და ჩინეთის პოლიტიკის სპეციალისტის შეფასებით, ცენტრალური კომიტეტის თითოეულმა წევრმა იცის, რომ მათი მომავალი დამოკიდებულია სი ძინპინის კეთილგანწყობაზე. მეორე მხრივ, საკადრო ცვლილებები არსებითად აძლიერებს სი ძინპინის კონტროლს პარტიასა და სახალხო განმათავისუფლებელ არმიაზე. პარალელურად, აშშ-ის მთავრობას მუშაობა უკვე მესამე კვირაა შეჩერებული აქვს, რადგან ახალი საფინანსო წლის დაწყებამდე სენატმა ვერ მიიღო კანონპროექტი ფედერალური უწყებების დაფინანსების შესახებ. ამ პერიოდში, ჩინეთის ხელმძღვანელობისთვის, სხდომას კრიტიკული მნიშვნელობა აქვს, ვინაიდან მათი შეფასებით, ჩინეთს ოპერირება გლობალურ დონეზე „მტრულ გარემოში“ უწევს, რაც პირველ რიგში აშშ-სთან სატარიფო ომსა და დასავლურ ტექნოლოგიებზე წვდომის შეზღუდვას უკავშირდება. ეროვნული სტატისტიკის ბიუროს მონაცემებით, ჩინეთის ეკონომიკური ზრდა 2025 წელს ყველაზე დაბალ მაჩვენებელზე ჩამოვიდა მესამე კვარტალში. წლიურ ჭრილში ზრდამ შეადგინა 4.8%, რაც წინა კვარტალთან შედარებით დაბალი მაჩვენებელია. აღნიშნულის ახსნა საგარეო ეკონომიკური ზეწოლით იქნა ახსნილი, თუმცა შიდა პოლიტიკური და ეკონომიკური დისბალანსიც გასათვალისწინებელია.

შემდეგი 5 წლის გეგმა და შიდა ეკონომიკური დისბალანსი

ხუთწლიანი გეგმა 2026 წლიდან ამოქმედდება, ხოლო მისი სრული დეტალები მხოლოდ მომავალი წლის მარტისთვის იქნება ცნობილი, როცა საკანონმდებლო ორგანოს მიერ დამტკიცდება. თუმცა სი ძინპინმა ძირითადი პრიორიტეტები გამოკვეთა: მიზანი ეკონომიკური სტრატეგიის განახლებაა, რაც გულისხმობს, რომ წამყვანი პრიორიტეტი წარმოების ზრდის ნაცვლად, პროდუქტის ხარისხობრივი გაუმჯობესება გახდება. მიზანია შეიქმნას ეკონომიკა, რომელიც ინოვაციურ ტექნოლოგიებს განავითარებს და აღარ იქნება დამოკიდებული იაფ მუშახელსა და ექსპორტზე. ბუნებრივი რესურსების ექპლუატაციის შესამცირებლად მწვანე ენერგიაზე გადასვლა და დაბინძურების შემცირება არის ერთ-ერთი განხილვის საკითხი.

ჩინეთის ეკონომიკის მთავარი გამოწვევად სახელდება დაბალი სამომხმარებლო მოთხოვნა, ჭარბი წარმოების ფონზე. ასევე უმუშევრობის დონე საკმაოდ დაბალია ახალგაზრდებში. ჩინეთის ეკონომიკას სჭირდება რეგულირება, რადგან ქვეყნის ინდუსტრიული განვითარება ნაწილობრივ სწორედ წარმოების გადაჭარბებული მოცულობის გამოა შეფერხებული. საერთაშორისო პარტნიორები ჩინეთს მოუწოდებენ ბაზარზე ჭარბი პროდუქტების ექსპორტი შეწყვიტოს, ვინაიდან ჭარბი პროდუქცია საბაზრო ფასის შემცირებას იწვევს.

იაკობ გუნტერი, ბერლინის MERICS კვლევითი ცენტრის ეკონომიკისა და ინდუსტრიის პროგრამის ხელმძღვანელი, საკმაოდ სკეპტიკურად აფასებს ჩინეთის ეკონომიკური განახლების გეგმას, ვინაიდან, მისი თქმით, მცირეა იმის შანსი, რომ ახალი ხუთწლიანი გეგმა კრიტიკულად განსხვავდებოდეს არსებული სტრატეგიისგან. ამის მიზეზი ის არის, რომ სი ძინპინი უკვე სრულიად აკონტროლებს სისტემას და ამ ეტაპისთვის მასშტაბური და ძირეული სისტემური ცვლილებები მის ინტერესში არ შედის. გეგმა შეიძლება ორიენტირდებოდეს სამომხმარებლო მოთხოვნის სტიმულირებაზე და შიდა კონკურენციის შეზღუდვაზე, რათა ჭარბი წარმოების მოცულობა დაბალანსდეს. თუმცა გუნტერის თქმით, თუ ეკონომიკური ცვლილებები ბევრად გრძელვადიან პერსპექტივაში წარიმართება, უნდა ველოდოთ სოციალური დაცვის სისტემის გაძლიერებას, სუბსიდირების პრინციპის გადახედვასა და ჭარბი ინვესტიციების შემცირებას. ჩინეთი სტაბილურობისა და მდგრადი განვითარებისაკენ ისწრაფვის ეკონომიკაში.

ჩინეთი ეკონომიკის ხუთწლიანი განვითარების გეგმას აანონსებს Read More »

ჩინეთი სამხრეთ კავკასიასა და ყირგიზეთში (13-19 ოქტომბერი)

კვირის ამბავი / /

საქართველო

მარიამ ქვრივიშვილი ჩინეთის ელჩს შეხვდა

ივანიშვილის მთავრობის ეკონომიკისა და მდგრადი განვითარების მინისტრი, მარიამ ქვრივიშვილი საქართველოში ჩინეთის ელჩს, ჭოუ ციენს შეხვდა.

გავრცელებული ინფორმაციის თანახმად, “მხარეებმა ისაუბრეს საქართველოსა და ჩინეთს შორის არსებული სტრატეგიული პარტნიორობის განვითარების დადებით დინამიკაზე, მათ შორის, სავაჭრო-ეკონომიკური მიმართულებით”. ამასთანავე, შეხვედრაზე განხილულ იქნა “ორმხრივი თანამშრომლობის საკითხები სამოქალაქო ავიაციისა და ტურიზმის სექტორებში”.

პრესრელიზის მიხედვით, მხარეებმა შეხვედრაზე “განსაკუთრებული” ყურადღება გაამახვილეს ჩინეთის მე-9 საერთაშორისო იმპორტის გამოფენაზე, რომელიც შანხაიში 5-10 ნოემბერს გაიმართება. ჩინეთის მხარემ საქართველო აღნიშნულ გამოფენაზე ოფიციალურად მიიწვია. შეხვედრაზე აღინიშნა, რომ გამოფენაზე 40-ზე მეტი ქართული კომპანია იქნება წარდგენილი.

15 ოქტომბერი

“ერთი ჩინეთის პრინციპის” შესახებ ჩინეთის ელჩის სტატია ქართულ მედიაში

17 ოქტომბერს, ქართულ გაზეთ „რეზონანსში“ გამოქვეყნდა საქართველოში ჩინეთის ელჩის, ჭოუ ციენის, სტატია, სათაურით: „ერთი ჩინეთის პრინციპი უდავოა: გაეროს გენერალური ასამბლეის №2758 რეზოლუციაში ეჭვის შეტანა დაუშვებელია“.

სტატიის შინაარსობრივ ნაწილში რიგი მონაკვეთები განსაკუთრებულ ყურადღებას იქცევს, რამდენადაც ხაზგასმულია სახალხო რესპუბლიკის მტკიცე და მკაცრი პოზიცია თაივანის საკითხთან მიმართებით:

  • სტატიაში აღნიშნულია, რომ “თაივანი ჩინეთის უდავო და უცვლელი ნაწილია”. ელჩის თქმით, 1971 წელს გაეროს გენერალური ასამბლეის მიერ მიღებული რეზოლუცია 2758, სწორედ, ერთი ჩინეთის პრინციპს ეფუძნება. კერძოდ, რეზოლუციაში მკაფიოდ არის ნათქვამი, რომ “მსოფლიოში ერთადერთი ჩინეთია და ჩინეთის სახალხო რესპუბლიკის მთავრობა მთლიანად ჩინეთის, მათ შორის, თაივანის ერთადერთი ლეგიტიმური წარმომადგენელია”.
  • სტატიაში აღნიშნულია, რომ “ცალკეული ქვეყნები და თაივანის ხელისუფლება ხშირად ალიაქოთს ტეხენ გაეროს გენერალური ასამბლეის 2758-ე რეზოლუციის შესახებ.”
  • ასევე, ელჩი წერს, რომ “ჩინეთისთვის დღესდღეობით კიდევ უფრო შეუძლებელია, უმოქმედოდ იჯდეს და თაივანის გახლეჩის მცელობებს სისრულეში მოყვანის საშუალებები მისცეს”.

ჩინეთის საგარეო პოლიტიკური ხედვების შემდგომ, სტატიის დასასრულს, ელჩი ყურადღებას ამახვილებს საქართველო-ჩინეთის პარტნიორობაზე და აღნიშნავს, რომ მხარეები “ერთმანეთს ენდობიან და პატივს სცემენ ერთმანეთის სუვერენიტეტს, დამოუკიდებლობასა და ტერიტორიულ მთლიანობას”.

ამასთანავე, სტატიაში, ჩინეთის ელჩი აღნიშნავს, რომ “ჩინეთი აფასებს საქართველოს მიერ ერთი ჩინეთის პრინციპისადმი ხანგრძლივ ერთგულებას და მზადაა, საქართველოსთან ერთად კვლავ დაიცვას ერთმანეთის ძირითადი ინტერესები”. თუმცა, სტატიაში უგულებელყოფილია ფაქტი, რომ სახალხო რესპუბლიკა საქართველოს ტერიტორიული მთლიანობისადმი ანალოგიურ “ერთგულებას” არ იჩენს და გასული წლების მანძილზე, ჩინეთს ერთხელაც კი არ დაუჭერია მხარი გაეროს გენერალური ასამბლეის მიერ “აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ” მიღებული რეზოლუციისთვის. მათ შორის, სტრტატეგიული პარტნიორობის გამოცხადების შემდგომ პერიოდშიც (2023-2025 წლებში), ჩინეთმა აღნიშნული რეზოლუციის მხარდაჭერისგან “თავი შეიკავა”.

17 ოქტომბერი

პეკინში „Emotions Are Georgia - საქართველოს ოთხი სეზონის გამოცდილება“ გაიმართა

ჩინეთ-საქართველოს მზარდი სტრატეგიული პარტნიორობისა და ხალხთაშორისი კავშირების ფონზე, საქართველოს ტურიზმის ეროვნულმა ადმინისტრაციამ, ჩინეთში საქართველოს საელჩოს აქტიური მხარდაჭერით, პეკინის ლონგფუსის მოედანზე, კულტურული ღონისძიება გამართა („一往情深·格鲁吉亚“). 17-19 ოქტომბერს გამართულმა სამდღიანმა პროგრამამ ჩინელ სტუმრებს საქართველოს კულტურა ახლოდან გააცნო.

ღონისძიებას დაესწრო ჩინეთის სახალხო რესპუბლიკაში საქართველოს საგანგებო და სრულუფლებიანი ელჩი პაატა კალანდაძე, რომელმაც მისასალმებელ სიტყვაში საქართველო-ჩინეთის მეგობრული ურთიერთობებისა და სტრატეგიული პარტნიორობის მნიშვნელობაზე გაამახვილა ყურადღება.

19 ოქტომბერი

აზერბაიჯანი

23 ჩინელი სტუდენტი აზერბაიჯანში აგრძელებს სწავლას

2025-2026 წლების, აზერბაიჯანის მთავრობის სასტიპენდიო პროგრამების ფარგლებში, 65-მა უცხოელმა სტუდენტმა აზერბაიჯანის უმაღლეს სასწავლო დაწესებულებებში სწავლის გაგრძელების უფლება მოიპოვა. სტიპენდიანტებს შორის 23 სტუდენტი ჩინეთის სახალხო რესპუბლიკიდანაა.

სასტიპენდიო პროგრამის ფარგლებში, სტუდენტები სხვადასხვა სახელმწიფო უნივერსიტეტში გააგრძელებენ სწავლას. მათ შორის, 9 ჩინელი სტუდენტი ბაქოს სახელმწიფო უნივერსიტეტში ისწავლის.

14 ოქტომბერი

ჩინური კომპანიები „კასპიის მშენებლობის კვირის“ გამოფენაზე

ბაქოში გაიმართა „კასპიის მშენებლობის კვირის“ 30-ე გამოფენა, რომელსაც რეგიონის სამშენებლო სექტორის წამყვანი კომპანიები ესწრებოდნენ. გამოფენა აერთიანებდა რამდენიმე საერთაშორისო ღონისძიებას, მათ შორის, აზერბაიჯანის საერთაშორისო მშენებლობის გამოფენას, ყარაბაღის აღდგენის, აღორძინებისა და განვითარების შესახებ გამოფენას და სხვა.

გამოფენაში 17 ქვეყნიდან 299 კომპანია მონაწილეობდა. წარმოდგენილ ქვეყნებს შორის ერთ-ერთი ჩინეთის სახალხო რესპუბლიკა იყო.

აზერბაიჯანულ მედიაში ჩინური კომპანიების მონაწილეობას განსაკუთრებული ყურადღება ეთმობა. კერძოდ, აზერბაიჯანის მთავრობის საინფორმაციო სააგენტოს სტატიაში აღნიშნულია, რომ „Plastex Caspian“ გამოფენაში ჩინური კომპანიის მონაწილეობა „მრეწველობის განვითარებას“ და „საერთაშორისო თანამშრომლობის გაფართოებას“ შეუწყობს ხელს.

14 ოქტომბერი

ჩინეთ-აზერბაიჯანის სავაჭრო ურთიერთობები (2025 წლის იანვარი-აგვისტო)

აზერბაიჯანის საინფორმაციო სააგენტოს მიერ გავრცელებული ინფორმაციის თანახმად, 2025 წლის იანვარ-აგვისტოს თვეებში აზერბაიჯანის იურიდიულმა და ფიზიკურმა პირებმა 173 ქვეყანასთან სავაჭრო კავშირები დაამყარეს.

სახელმწიფო საბაჟო კომიტეტის მიერ გავრცელებული ინფორმაციის მიხედვით, საგარეო ვაჭრობის ბრუნვის 87.8 %-ს თურქეთთან, რუსეთთან, ჩინეთთან, გერმანიასა და სხვა რიგ ქვეყნებთან სავაჭრო ურთიერთობები შეადგენს.

ასევე, აღნიშნულია, რომ აზერბაიჯანში იმპორტირებული პროდუქციის მთლიანი ღირებულების 19.1 % ჩინეთის სახალხო რესპუბლიკაზე მოდის. საყურადღებოა, რომ აზერბაიჯანში იმპორტირებული პროდუქციის მაჩვენებლით, ჩინეთი აზერბაიჯანის მეზობელ და პარტნიორ ქვეყნებს, მათ შორის, თურქეთსა და რუსეთსაც კი, წინ უსწრებს.

აზერბაიჯანიდან ექსპორტირებული პროდუქციის მაჩვენებლის მიხედვით კი, მთავარი ქვეყნები არიან იტალია, თურქეთი, რუსეთი, ჩეხეთი, ბულგარეთი და სხვ. აღსანიშნავია, რომ ჩინეთზე აზერბაიჯანული ექსპორტის მხოლოდ 3.5 % მოდის.

14 ოქტომბერი

შეთანხმება აზერბაიჯანის სურსათის უვნებლობის სააგენტოსა და ჩინეთის საბაჟო ადმინისტრაციას შორის

აზერბაიჯანის რესპუბლიკის სურსათის უვნებლობის სააგენტოს დელეგაცია ჩინეთს ეწვია. ვიზიტის მიზნად აზერბაიჯანული საკვები პროდუქციის საექსპორტო მიმართულებების გაფართოება დასახელდა.

აზერბაიჯანის სურსათის უვნებლობის სააგენტოსა და ჩინეთის საბაჟო ადმინისტრაციას შორის „აზერბაიჯანის რესპუბლიკიდან ჩინეთის სახალხო რესპუბლიკაში ექსპორტირებული თხილისა და ნუშის შემოწმების, კარანტინისა და სანიტარული მოთხოვნების შესახებ ოქმს“ მოეწერა ხელი. ამასთანავე, მხარეებმა ხელი მოაწერეს „იმპორტსა და ექსპორტში სურსათის უვნებლობის სფეროში თანამშრომლობის მექანიზმის შესახებ დოკუმენტს“.

15 ოქტომბერი

ჩინეთი ბაქოში სამედიცინო ტურიზმის შესახებ გამართულ კონფერენციაზე

ბაქოში სახელმწიფო ტურიზმის სააგენტოს ორგანიზებით ჩატარდა საერთაშორისო კონფერენცია, სახელწოდებით: „ჯანმრთელობის ტურიზმის კონფერენცია 2025: კეთილდღეობის და სამედიცინო ტურიზმის მომავალი მიმართულებები“.

კონფერენციას ესწრებოდნენ სხვადასხვა ქვეყნის, მათ შორის, თურქეთის, მაკედონიის, ტაილანდის, დიდი ბრიტანეთისა და ჩინეთის წარმომადგენლები. ჩინეთის სახალხო რესპუბლიკის მხრიდან კონფერენციაში მონაწილეობდა ჩინეთის ჯანმრთელობისა და სამედიცინო ტურიზმის ასოციაცია. ასოციაციის პრეზიდენტმა, სიტყვით გამოსვლის დროს, ჯანმრთელობისა და სამედიცინო ტურიზმის სექტორის განვითარების მნიშვნელობაზე ისაუბრა.

15 ოქტომბერი

აზერბაიჯანისა და ჩინეთის ექიმების ერთობლივი ოპერაცია

აზერბაიჯანის მთავრობის საინფორმაციო სააგენტოს მიერ გავცელებული ინფორმაციით, აზერბაიჯანისა და ჩინეთის ქირურგებმა ერთ პაციენტს დისტანციურად, რობოტული ხელსაწყოების დახმარებით, ოპერაცია ჩაუტარეს. საყურადღებოა, რომ სააგენტო აღნიშნულ მოვლენას “აზერბაიჯანის ჯანდაცვის ისტორიაში უპრეცედენტო ინოვაციურ მოვლენად” აფასებს.

16 ოქტომბერი

აზერბაიჯანის წარმომადგენელი პეკინის საერთაშორისო კონგრესზე

აზერბაიჯანის სამედიცინო-კვლევითი კარდიოლოგიის ინსტიტუტის დირექტორმა, პროფესორმა გიულნაზ მაჰირ დადაშოვამ მონაწილეობა მიიღო პეკინში გამართულ საერთაშორისო კარდიოლოგთა კონგრესზე, სადაც ერთ-ერთი სესიის ფარგლებში, სიტყვით გამოვიდა.

გავრცელებული ინფორმაციის მიხედვით, კონგრესის ფარგლებში, აზერბაიჯანის რესპუბლიკის ჯანდაცვის სამინისტროს სამეცნიერო-კვლევითი კარდიოლოგიის ინსტიტუტიდა ცინხუას უნივერსიტეტი სამედიცინო-კვლევით და აკადემიურ დარგებში თანამშრომლობის შესახებ მემორანდუმს მოაწერენ ხელს.

17 ოქტომბერი

ჩინეთიდან აზერბაიჯანში მულტიმოდალური გადაზიდვები დაიწყო

ჩინეთის სინძიანის უიღურთა ავტონომიური რეგიონიდან ჩინეთი-ყირგიზეთი-უზბეკეთი-თურქმენეთი-აზერბაიჯანის მარშრუტით პირველი საერთაშორისო მულტიმოდალური კონტეინერული გადაზიდვები დაიწყო.

აზერბაიჯანის საინფორმაციო სააგენტო აღნიშნული მარშრუტით მულტიმოდალური გადაზიდვების დაწყებას, “გზისა და სარტყლის” ინიციატივის ფარგლებში, აზიისა და ევროპის დამაკავშირებელი დერეფნის განვითარებისთვის მნიშვნელოვან მოვლენად აფასებს.

18 ოქტომბერი

სომხეთი

სომხეთი ჩინეთთან ლოგისტიკურ კავშირებს აძლიერებს

სომხეთსა და ყაზახეთს შორის ამოქმედდა ახალი მულტიმოდალური სატრანსპორტო მაშრუტი, რომელიც ქვეყნებს თურქმენეთისა და ირანის გავლით დააკავშირებს.

საყურადღებოა, რომ აღნიშნული მოვლენა სომეხი ექსპერტების მიერ ცენტრალურ აზიასა და ჩინეთთან სავაჭრო ურთიერთობების გაღრმავების შესაძლებლობად არის შეფასებული. კერძოდ, მოქმედი სატრანსპორტო მარშრუტი ორ განშტოებას აერთიანებს: ჩინეთი-ყაზახეთი-უზბეკეთი-თურქმენეთი-ირანი-სომხეთი და ჩინეთი-ყაზახეთი-თურქმენეთი-ირანი-სომხეთი.

17 ოქტომბერი

სომხეთში ჩინეთის სახალხო რესპუბლიკის ელჩის სტატია თაივანის შესახებ

სომხეთში ჩინეთის ელჩის, ლი სინვეის, სტატია, სათაურით: “ერთი ჩინეთის“ უდავო პრინციპი და ახალი სტრატეგიული პარტნიორობა ჩინეთსა და სომხეთს შორის”, სომხურ მედიაში გავრცელდა. სტატიაში რამდენიმე მონაკვეთი იქცევს ყურადღებას:

  • სტატიაში ჩინეთის ელჩი აღნიშნავს, თაივანის დაბრუნება წარმოადგენს მეორე მსოფლიო ომის შედეგების და ომისშემდგომი საერთაშორისო წესრიგის განუყოფელ ნაწილს.
  • ელჩი თვლის, რომ თაივანის ჩინეთთან კავშირის ისტორიული და სამართლებრივი ფაქტები უტყუარია და დასტურებულია ერთმნიშვნელოვნად. კერძოდ, ის აღნიშნავს, რომ გაეროს გენერალური ასამბლეის მიერ 1971 წელს დამტკიცებული რეზოლუცია 2758, სამ ფუნდამენტურ პრინციპს ადასტურებს: “არსებობს მხოლოდ ერთი ჩინეთი”; “თაივანი წარმოადგენს ჩინეთის განუყოფელ ნაწილს”; “ჩინეთის სახალხო რესპუბლიკის მთავრობა არის ერთადერთი ლეგიტიმური მთავრობა, რომელიც მთელ ჩინეთს წარმოადგენს”.
  • სტატიაში მკაცრად არის დაგმობილი თაივანის ხელისუფლებისა და „ზოგიერთი გარე ძალის“ ქმედებები, რომლებიც თითქოსდა რეზოლუციის შინაარსს ამახინჯებენ თაივანის „გაურკვეველი სტატუსის“ ყალბი თხრობის გასავრცელებლად და მისი „საერთაშორისო სივრცის“ გასაფართოებლად.

სტატიის დასასრულს, ელჩი განსაკუთრებულ ყურადღებას უთმობს ჩინეთ-სომხეთის ურთიერთობებსა და სტრატეგიული პარტნიორობას.  ელჩი სინვეი ხაზს უსვამს, რომ სომხეთის მხარე სრულად უჭერს მხარს „ერთი ჩინეთის“ პრინციპს , მტკიცედ ეწინააღმდეგება „თაივანის დამოუკიდებლობას“ და მხარს უჭერს ჩინეთის ეროვნული გაერთიანების ძალისხმევას. თავის მხრივ, ჩინეთის ელჩი აღნიშნავს, რომ “ჩინეთი მტკიცედ უჭერს მხარს სომხეთის პოლიტიკურ დამოუკიდებლობას, სუვერენიტეტს, ტერიტორიულ მთლიანობასა და საზღვრების ურღვევობას, და დადებითად აფასებს სომხეთის „მშვიდობის გზაჯვარედინის“ ინიციატივას”.

17 ოქტომბერი

ყირგიზეთი

ჩინური კომპანიების დელეგაცია ბიშკეკში

2025 წლის 14 ოქტომბერს ჩინეთიდან, კერძოდ, შანხაიდან, მსხვილი კომპანიების წარმომადგენლები ყირგიზეთს საქმიანი ვიზიტით ეწვივნენ.

დელეგაციამ, რომელშიც ჩინეთი ყირგიზეთი-უზბეკეთის მაგისტრალის მთავარი ინჟინერი, ასევე,  ფარმაცევტული და ინფრასტრუქტურული სფეროს ხელმძღვანელები შედიოდნენ, ყირგიზეთის სავაჭრო-სამრეწველო პალატის პრეზიდენტ თემირ სარიევთან შეხვედრა გამართა.

მოლაპარაკებების შედეგად, მხარეები ყირგიზული კომპანიებისთვის შანხაიში საქმიანი ტურის მოწყობაზე შეთანხმდნენ. როგორც სსპ-ის პრეზიდენტმა სარიევმა აღნიშნა, საბოლოო მიზანი ჩინური ინტერესების კონკრეტულ კონტრაქტებად გარდაქმნაა.

14 ოქტომბერი

ყირგიზეთის ქალთა კონგრესის პრეზიდენტის ინტერვიუ

2025 წლის 15 ოქტომბერს ჩინეთის ოფიციალურ საინფორმაციო სააგენტო Xinhua-სთვის მიცემულ ინტერვიუში, ზამირა აკბაგისევამ, ყირგიზეთის ქალთა კონგრესის პრეზიდენტმა, განაცხადა, რომ ჩინეთი ბოლო ათწლეულებში ქალთა უფლებების დაცვასა და გაუმჯობესებაში სასიცოცხლოდ მნიშვნელოვან როლს ასრულებს.

ასევე, მან ჩინეთს ყირგიზეთში ქალთა ინიციატივების მხარდაჭერისთვის მადლობა გადაუხადა და აღნიშნა, რომ ჩინელი ქალების წარმატება საზოგადოებრივ ინტერესებზე ორიენტირებული მმართველობის ნათელი მაგალითია.

15 ოქტომბერი

ყირგიზეთის პოლიტიკურ წრეებში გავლენიანი ექსპერტის ინტერვიუ

2025 წლის 17 ოქტომბერს ჩინეთის ოფიციალურ საინფორმაციო სააგენტო Xinhua-ს მიერ გამოქვეყნებულ ინტერვიუში ვკითხულობთ, რომ ყირგიზეთის „მსოფლიო პოლიტიკის ინსტიტუტის“ დირექტორი შერადილ ბაქთიგულოვი ჩინეთს საერთაშორისო-გლობალური პროგრესის აქტიურ მხარდამჭერად მოიხსენებს. იგი მიიჩნევს, რომ მზარდი ანტი-გლობალისტური ტენდენცია, პროტექციონიზმი და უნილატერალიზმი მსოფლიო წესრიგს სერიოზულ გამოწვევას უქმნის.

ბაქთიგულოვის აზრით, ამ გლობალური გამოწვევების ფონზე, ჩინეთმა წარმოადგინა კონცეფცია, რომელიც ღიაობის, ორმხრივი სარგებლისა და სამართლიანობის პრინციპებს ეფუძნება.

17 ოქტომბერი

InvestHK-ის დელეგაციის ოფიციალური ვიზიტი ცენტრალურ აზიაში

2025 წლის 18 ოქტომბერს ჰონგ-კონგის სპეციალური ადმინისტრაციული რეგიონის სამთავრობო სააგენტოს, Invest Hong Kong-ის (InvestHK), გენერალურმა დირექტორმა, ქალბატონმა ალფა ლაუმ, ცენტრალური აზიის სამ ქვეყანაში: ყაზახეთში, ყირგიზეთსა და უზბეკეთში ოფიციალური რვა დღიანი ვიზიტი დაიწყო.

აღნიშნული ვიზიტი უშუალოდ უკავშირდება ჩინეთის “ერთი სარტყელი – ერთი გზის” (BRI) ინიციატივას და ხაზს უსვამს პეკინის ძალისხმევას, გააძლიეროს რეგონული ეკონომიკური კავშირები. ვიზიტის მიზანია ჰონგ-კონგის, როგორც წამყვანი საერთაშორისო ფინანსური ჰაბის, შესაძლებლობების წარდგენა ცენტრალური აზიის ქვეყნებისთის.

ქალბატონმა ლაუმ აღნიშნა, რომ რეგიონის ინფრასტრუქტურული და განვითარების სხვა ტიპის პროექტებისთვის მრავალფეროვანი დაფინანსების არხების შესათავაზებლად, ჰონგ-კონგის მყარი სარეგულაციო ჩარჩო და დაბალი საგადასახადო რეჟიმი ერთვარ საფუძველს ქმნის.

18 ოქტომბერი

ჩინეთი სამხრეთ კავკასიასა და ყირგიზეთში (13-19 ოქტომბერი) Read More »

Scroll to Top