Civicidea

ჩინეთი ტაივანის სრუტეში კანადური ფრეგატის გავლას პროვოკაციად აფასებს

პეკინსა და ოტავას შორის ურთიერთობების დათბობის მცდელობის ფონზე, ჩინეთი მწვავედ გამოეხმაურა კანადის სამხედრო გემის, HMCS Charlottetown-ის მიერ ტაივანის სრუტის გავლას და დასავლური ქვეყნები ჩინეთის უსაფრთხოების ინტერესების ხელყოფის მცდელობაში დაადანაშაულა. აღნიშნულ საკითხზე 29 მაისს ჩინეთის საგარეო საქმეთა სამინისტროს სპიკერმა, მაო ნინმა განაცხადა.

კანადური მედიის ინფორმაციით, სამეფო საზღვაო ძალების ფრეგატმა ტაივანის სრუტე 22-23 მაისს გადაკვეთა. კანადის თავდაცვის უწყებამ აღნიშნული ტრანზიტი „რუტინულ ოპერაციად“ შეაფასა. პეკინი ამ პოზიციას მკაცრი რიტორიკით დაუპირისპირდა და აღნიშნა, რომ ტაივანის სრუტე ჩინეთის შიდა წყლებს მიეკუთვნება.

ჩინეთის ამ ფორმულირებას კატეგორიულად უარყოფს ტაიბეი და ხაზგასმით აღნიშნავს, რომ სრუტე არ შედის ჩინეთის სუვერენიტეტის ფარგლებში, რადგან იგი წარმოადგენს საერთაშორისო სანაოსნო მარშრუტს, სადაც საერთაშორისო სამართლის თანახმად, ნავიგაციის თავისუფლება გარანტირებულია. ასევე, ტაივანის თავდაცვის სამინისტრომ განაცხადა, რომ კანადური გემის გადაადგილებას აკვირდებოდა და ვითარება სრულ კონტროლს ექვემდებარებოდა.

ამ ინცინდენტიდან რამდენიმე დღეში, ჩინეთის საგარეო საქმეთა მინისტრი ვან ი ოფიციალური ვიზიტით კანადაში ჩავიდა, რაც ბოლო ათწლეულის განმავლობაში ჩინეთის საგარეო უწყების ხელმძღვანელის პირველი ვიზიტია ამ ქვეყანაში.

ამ ნაბიჯით მხარეები ურთიერთობების განახლებას გეგმავდნენ, თუმცა საზღვაო დემონსტრაციამ მიმდინარე პროცესები კითხვის ნიშნის ქვეშ დააყენა. მით უმეტეს, რომ ვიზიტამდე რამდენიმე კვირით ადრე, ჩინეთის ელჩმა ოტავა გააფრთხილა, რომ ტაივანთან დაკავშირებულმა სამხედრო და პოლიტიკურმა კონტაქტებმა შესაძლოა ორმხრივი ურთიერთობები დააზიანოს.

ბოლო წლებში ტაივანის სრუტეში დასავლური ქვეყნების სამხედრო გემების ტრანზიტმა სისტემატური ხასიათი მიიღო. მსგავსი ოპერაციები რეგულარულად ტარდება აშშ–ის, კანადის, დიდი ბრიტანეთისა და ავსტრალიის მონაწილეობით, რასაც ჩინეთი რეგიონული სტაბილურობის საფრთხედ აფასებს და „პროვოკაციად“ მოიხსენიებს.

ჩინეთი ტაივანის სრუტეში კანადური ფრეგატის გავლას პროვოკაციად აფასებს Read More »

ჩინეთი ტაივანის სრუტეში კანადური ფრეგატის გავლას პროვოკაციად აფასებს

პეკინსა და ოტავას შორის ურთიერთობების დათბობის მცდელობის ფონზე, ჩინეთი მწვავედ გამოეხმაურა კანადის სამხედრო გემის, HMCS Charlottetown-ის მიერ ტაივანის სრუტის გავლას და დასავლური ქვეყნები ჩინეთის უსაფრთხოების ინტერესების ხელყოფის მცდელობაში დაადანაშაულა. აღნიშნულ საკითხზე 29 მაისს ჩინეთის საგარეო საქმეთა სამინისტროს სპიკერმა, მაო ნინმა განაცხადა.

კანადური მედიის ინფორმაციით, სამეფო საზღვაო ძალების ფრეგატმა ტაივანის სრუტე 22-23 მაისს გადაკვეთა. კანადის თავდაცვის უწყებამ აღნიშნული ტრანზიტი „რუტინულ ოპერაციად“ შეაფასა. პეკინი ამ პოზიციას მკაცრი რიტორიკით დაუპირისპირდა და აღნიშნა, რომ ტაივანის სრუტე ჩინეთის შიდა წყლებს მიეკუთვნება.

ჩინეთის ამ ფორმულირებას კატეგორიულად უარყოფს ტაიბეი და ხაზგასმით აღნიშნავს, რომ სრუტე არ შედის ჩინეთის სუვერენიტეტის ფარგლებში, რადგან იგი წარმოადგენს საერთაშორისო სანაოსნო მარშრუტს, სადაც საერთაშორისო სამართლის თანახმად, ნავიგაციის თავისუფლება გარანტირებულია. ასევე, ტაივანის თავდაცვის სამინისტრომ განაცხადა, რომ კანადური გემის გადაადგილებას აკვირდებოდა და ვითარება სრულ კონტროლს ექვემდებარებოდა.

ამ ინცინდენტიდან რამდენიმე დღეში, ჩინეთის საგარეო საქმეთა მინისტრი ვან ი ოფიციალური ვიზიტით კანადაში ჩავიდა, რაც ბოლო ათწლეულის განმავლობაში ჩინეთის საგარეო უწყების ხელმძღვანელის პირველი ვიზიტია ამ ქვეყანაში.

ამ ნაბიჯით მხარეები ურთიერთობების განახლებას გეგმავდნენ, თუმცა საზღვაო დემონსტრაციამ მიმდინარე პროცესები კითხვის ნიშნის ქვეშ დააყენა. მით უმეტეს, რომ ვიზიტამდე რამდენიმე კვირით ადრე, ჩინეთის ელჩმა ოტავა გააფრთხილა, რომ ტაივანთან დაკავშირებულმა სამხედრო და პოლიტიკურმა კონტაქტებმა შესაძლოა ორმხრივი ურთიერთობები დააზიანოს.

ბოლო წლებში ტაივანის სრუტეში დასავლური ქვეყნების სამხედრო გემების ტრანზიტმა სისტემატური ხასიათი მიიღო. მსგავსი ოპერაციები რეგულარულად ტარდება აშშ–ის, კანადის, დიდი ბრიტანეთისა და ავსტრალიის მონაწილეობით, რასაც ჩინეთი რეგიონული სტაბილურობის საფრთხედ აფასებს და „პროვოკაციად“ მოიხსენიებს.

ჩინეთი ტაივანის სრუტეში კანადური ფრეგატის გავლას პროვოკაციად აფასებს Read More »

გილოცავთ საქართველოს დამოუკიდებლობის დღეს!

26 მაისს გილოცავ ჩემო სამშობლო!!!

მძიმე წლები გიდგას, თითქოს საშველიც არ ჩანს მაგრამ ან როდის იყავი დალხენილი.. მტერი არ მოგკლებია შინ თუ გარეთ, მაგრამ მუდამ ახერხებდი წამოდგომას, მუხლის გამყარებას, წინსვლას, გადარჩენას!!!! და ხვალინდელი დღეც არ იქნება განსხვავებული!!!
ეს პათეტიკა, ან თავის გამხნევება არ არის.

იმედიანად რომ უნდა ვიყოთ და ბრძოლა არ შევწყვიტოთ მორიგ ჯერზე ილიაუნის ახალგაზრდებმა დაამტკიცეს გასულ კვირას!!! მზია ამტკიცებს ყოველდღე სატუსაღოში!!! გარეთ მედგრად მყოფი რუსთაველის მცველები გვაძლიერებენ და ის ასიათასი ქართველი ქვეყნის სიყვარულით სასოწარკვეთას რომ აძლევს უფლებას ფარხმალი დააყრევინოს!!! 

ვიბრძოლებთ შენთვის, ისტორიისთვის, სიამაყისთვის ქართველობა რომ გვაძლევს და მომავლისთვის ჩვენს შვილებს რომ ვუტოვებთ!!!

თინათინ ხიდაშელი

გილოცავთ საქართველოს დამოუკიდებლობის დღეს! Read More »

ჩინეთი-პაკისტანის მოლაპარაკებები პეკინში: სტრატეგიული პარტნიორობის გაძლიერება და რეგიონული კრიზისები

25 მაისს ჩინეთის პრეზიდენტ სი ძინპინსა და პაკისტანის პრემიერ–მინისტრ შეჰბაზ შარიფს შორის შეხვედრა პეკინში გაიმართა, სადაც მხარეებმა ორმხრივი სტრატეგიული პარტნიორობის გაღრმავება და რეგიონული კრიზისების, მათ შორის ახლო აღმოსავლეთში მიმდინარე ომის, დეესკალაციის საკითხები განიხილეს.

სი ძინპინმა შეხვედრაზე პაკისტანს ჩინეთისთვის „ძველი მეგობარი“ უწოდა და ხაზი გაუსვა ქვეყნებს შორის „გაუტეხელ მეგობრობას“. მისი თქმით, პეკინი და ისლამაბადი ათწლეულების განმავლობაში ინარჩუნებენ ურთიერთდახმარებაზე დაფუძნებულ კავშირებს და მზად არიან გააძლიერონ სტრატეგიული პარტნიორობა.

შეხვედრა გაიმართა ჩინეთის სახალხო რესპუბლიკის სახელმწიფო სასახლეში და მას წინ უძღოდა შარიფის მოლაპარაკებები ჩინეთის პრემიერ ლი ციანგთან. შეხვედრაში ასევე მონაწილეობდა პაკისტანის სამხედრო ხელმძღვანელობა, მათ შორის არმიის შტაბის უფროსი, რაც მიუთითებს უსაფრთხოების თემების მნიშვნელობაზე დღის წესრიგში.

საერთაშორისო მედიის შეფასებით, შეხვედრის ერთ–ერთი მთავარი თემა იყო ახლო აღმოსავლეთში მიმდინარე კონფლიქტი და დიპლომატიური მცდელობები მის დასასრულებლად. პაკისტანი ბოლო თვეებში ცდილობს შუამავლის როლის გაძლიერებას აშშ–სა და ირანს შორის, ხოლო ჩინეთი მხარს უჭერს „სტაბილურობის აღდგენას“ რეგიონში.

პარალელურად, პაკისტან–ჩინეთის ეკონომიკური თანამშრომლობა რჩება დღის წესრიგის ცენტრალურ ნაწილად. ბოლო დღეებში გამართულ ბიზნესფორუმებზე ქვეყნებს შორის დაახლოებით 1.2 მილიარდ დოლარზე მეტი ღირებულების შეთანხმებები გაფორმდა, რაც ენერგეტიკისა და ინფრასტრუქტურის სფეროებს მოიცავს.

შეხვედრა აჩვენებს, რომ ჩინეთი ცდილობს შეინარჩუნოს გავლენა სამხრეთ აზიაში მაშინ, როდესაც რეგიონში იზრდება აშშ–ისა და სხვა ძალების აქტიურობა. პაკისტანისთვის კი პეკინი კვლავ რჩება ერთ–ერთ მთავარ ეკონომიკურ და უსაფრთხოების პარტნიორად, განსაკუთრებით კრიზისულ გეოპოლიტიკურ გარემოში.

ჩინეთი-პაკისტანის მოლაპარაკებები პეკინში: სტრატეგიული პარტნიორობის გაძლიერება და რეგიონული კრიზისები Read More »

ჩინეთი სამხრეთ კავკასიასა და ყირგიზეთში (18-24 მაისი)

საქართველო

„ტავ ჯორჯია“ Routes Europe 2026-ზე პირდაპირი ფრენების გაფართოებაზე მუშაობს

18 მაისი

საქართველო ჩინურ საავიაციო ბაზარზე ახალი მიმართულებების ათვისებას გეგმავს. იტალიის ქალაქ რიმინიში მიმდინარე საერთაშორისო საავიაციო ფორუმზე Routes Europe 2026, თბილისისა და ბათუმის აეროპორტების მმართველი კომპანია „ტავ ჯორჯია“ ჩინურ ავიაკომპანიებთან აქტიურ მოლაპარაკებებს მართავს.

ფორუმის ფარგლებში დაგეგმილ 20-მდე შეხვედრას შორის, ჩინეთის მიმართულება ერთ–ერთი მთავარი პრიორიტეტია ბაზრების დივერსიფიცირების სტრატეგიის ფარგლებში, რაც ახლო აღმოსავლეთში მიმდინარე კრიზისის ფონზე კიდევ უფრო აქტუალური გახდა.

„ტავ ჯორჯიას“ გენერალურმა მენეჯერმა, თეა ზაქარაძემ განაცხადა, რომ თბილისის აეროპორტიდან ჩინეთის რამდენიმე მიმართულებით ფრენები უკვე ხორციელდება და ივლისიდან პირდაპირი რეისები შანხაის მიმართულებითაც ინიშნება. მისივე თქმით, ამ ბაზარზე მოთხოვნა მაღალია, რის გამოც ჩინეთის მიმართულებით მუშაობას აქტიურად აგრძელებენ.

ჩინური მხარის გარდა, ქართული დელეგაცია მოლაპარაკებებს ევროპულ და ახლო აღმოსავლეთის ავიაკომპანიებთანაც მართავს. საავიაციო ფორუმი Routes Europe 2026, რომელშიც 65-ზე მეტი ქვეყნის 100-ზე მეტი ავიაკომპანია და აეროპორტი მონაწილეობს, 20 მაისამდე გაგრძელდება.

შალვა პაპუაშვილი ჩინეთის პოლიტიკური საკონსულტაციო კონფერენციის თავმჯდომარეს, ვანგ ჰიუნინგს შეხვდა

18 მაისი

18 მაისს შალვა პაპუაშვილი შეხვდა ჩინეთის კომუნისტური პარტიის პოლიტბიუროს მუდმივმოქმედი კომიტეტის წევრს და ჩინეთის სახალხო პოლიტიკური საკონსულტაციო კონფერენციის თავმჯდომარეს ვანგ ჰიუნინგს.

შალვა პაპუაშვილის თქმით, თბილისი და პეკინი იზიარებენ ეროვნული სუვერენიტეტის, მშვიდობისა და უსაფრთხოების დაცვის პრინციპებს და მხარს უჭერენ საერთაშორისო სამართლის განმტკიცებასა და საერთაშორისო ურთიერთობებში თანასწორობისა და ურთიერთპატივისცემის იდეას. ჩინურმა მხარემ კი დაადასტურა საქართველოს სუვერენიტეტისა და ტერიტორიული მთლიანობის მხარდაჭერა.

შეხვედრაზე ყურადღება დაეთმო ეკონომიკური და სავაჭრო თანამშრომლობის გაფართოებას, ასევე ტურიზმის, განათლების, ინოვაციების, კულტურისა და საპარლამენტო კავშირების გაძლიერებას. მხარეებმა ასევე განიხილეს თავისუფალი ვაჭრობის შეთანხმების მნიშვნელობა თანამშრომლობის გაღრმავებისთვის.

შეხვედრაზე ხაზი გაესვა გლობალური ტურბულენტობის ფონზე ტრანსპორტის, ლოგისტიკისა და დაკავშირებადობის პროექტების მნიშვნელობას, მათ შორის „სარტყლისა და გზის“ ინიციატივასა და შუა დერეფნის პოტენციალს.

შეხვედრის შემდეგ ორივე მხარემ გამოხატა მზადყოფნა ურთიერთობების შემდგომი გაღრმავებისთვის.

პაპუაშვილის ვიზიტი ჩინეთში: შეხვედრა ჭაო ლეძისთან

18 მაისი

ჩინეთში ოფიციალური ვიზიტის ფარგლებში „ქართული ოცნების“ პარლამენტის თავმჯდომარე შალვა პაპუაშვილი 18 მაისს ეროვნული სახალხო კონგრესის მუდმივმოქმედი კომიტეტის თავმჯდომარეს, ჭაო ლეძის შეხვდა.

მხარეებმა მოლაპარაკებების მთავარ მიმართულებად საქართველოსა და ჩინეთს შორის სტრატეგიული პარტნიორობისა და პოლიტიკური დიალოგის გაფართოება დაასახელეს. ყურადღება დაეთმო თანამშრომლობის გაღრმავებას ვაჭრობის, ტურიზმის, განათლების, თანამედროვე ტექნოლოგიებისა და კულტურის მიმართულებებით.

შეხვედრაზე აღინიშნა, რომ ორ ქვეყანას უკვე აკავშირებს მნიშვნელოვანი სამართლებრივი და ეკონომიკური ჩარჩოები, მათ შორის თავისუფალი ვაჭრობის შეთანხმება და უვიზო რეჟიმი, რაც ოფიციალური შეფასებით, სავაჭრო და ტურისტული ნაკადების ზრდას უწყობს ხელს.

მხარეებმა გლობალური არასტაბილურობის ფონზე საერთაშორისო სამართლის პრინციპების მნიშვნელობას გაუსვეს ხაზი. პაპუაშვილის თქმით, საქართველოს პარლამენტი განსაკუთრებულ ყურადღებას უთმობს საპარლამენტო დიპლომატიას, რომელიც საქართველოს პარლამენტსა და ჩინეთის ეროვნულ სახალხო კონგრესს შორის აქტიურად ვითარდება.

ჩინეთის ოფიციალურ განცხადებებში ნათქვამია, რომ საქართველო–ჩინეთის ურთიერთობები „ახალ ეტაპზე“ გადავიდა, ხოლო პეკინმა კიდევ ერთხელ დაადასტურა საქართველოს სუვერენიტეტისა და დამოუკიდებლობის მხარდაჭერა. საპასუხოდ, პაპუაშვილმა აღნიშნა, რომ საქართველო აგრძელებს „ერთი ჩინეთის პრინციპის“ მხარდაჭერას და აქტიურად ჩაერთვება გლობალური განვითარების ინიციატივებში.

შალვა პაპუაშვილმა ჩინეთის საგარეო საქმეთა უნივერსიტეტში მოხსენება გააკეთა

19 მაისი

19 მაისს საქართველოს პარლამენტის თავმჯდომარე შალვა პაპუაშვილმა ჩინეთის საგარეო საქმეთა უნივერსიტეტში (CFAU) მოხსენება გააკეთა.

პეკინში მდებარე უნივერსიტეტი, რომელიც ჩინეთის საგარეო საქმეთა სამინისტროსთან არის აფილირებული, „ჩინელი დიპლომატების აკვნად“ მიიჩნევა და დიპლომატიის, საერთაშორისო ურთიერთობებისა და საერთაშორისო სამართლის სპეციალისტებს ამზადებს.

პაპუაშვილმა გამოსვლაში ყურადღება გაამახვილა ჩინეთში საქართველოს საპარლამენტო დელეგაციის პირველი ვიზიტის მნიშვნელობასა და ორ ქვეყანას შორის მზარდ სტრატეგიულ პარტნიორობაზე. მისი თქმით, გლობალური ტრანსფორმაციების ფონზე საქართველო მშვიდობისა და განვითარების „კუნძულია“.

პარლამენტის თავმჯდომარემ ასევე ისაუბრა ეროვნული ინტერესებისა და სუვერენიტეტის დაცვის მიმართულებით ხელისუფლების ძალისხმევაზე, საქართველოს სტრატეგიულ გეოგრაფიულ მდებარეობასა და დაკავშირებადობის პოტენციალზე.

შეხვედრა ჩინეთში შალვა პაპუაშვილის ოფიციალური ვიზიტის ფარგლებში გაიმართა.

შალვა პაპუაშვილის შეხვედრა შაანსის პროვინციის პარლამენტის თავმჯდომარესთან

20 მაისი

ჩინეთში ოფიციალური ვიზიტის ფარგლებში, საქართველოს პარლამენტის თავმჯდომარე 20 მაისს შაანსის პროვინციის კომიტეტის მდივანსა და შაანსის სახალხო კონგრესის მუდმივმოქმედი კომიტეტის თავმჯდომარეს, ჭაო იდეს შეხვდა.

მხარეებმა საქართველო–ჩინეთის ურთიერთობები და სტრატეგიული პარტნიორობის გაღრმავების პერსპექტივები განიხილეს. შალვა პაპუაშვილმა შაანსის პროვინციის ისტორიულ და ეკონომიკურ მნიშვნელობაზე ისაუბრა და აღნიშნა, რომ რეგიონში უძველესი ცივილიზაცია და თანამედროვე ტექნოლოგიები წარმატებით ერწყმის ერთმანეთს.

შეხვედრაზე ყურადღება გამახვილდა ადგილობრივ და რეგიონულ დონეზე თანამშრომლობის მნიშვნელობაზე. მხარეებმა დადებითად შეაფასეს საქართველოსა და ჩინეთის ქალაქებს შორის დაძმობილების პროცესის გააქტიურება და მზადყოფნა გამოთქვეს ინსტიტუციური, კულტურული და საგანმანათლებლო კავშირების გაღრმავებისთვის.

პარლამენტის თავმჯდომარემ ჩინეთში ოფიციალური ვიზიტის შედეგები შეაჯამა

20 მაისი

საქართველოს პარლამენტის თავმჯდომარემ შალვა პაპუაშვილი ჩინეთში ოფიციალური ვიზიტის შედეგები შეაჯამა და 20 მაისს ჟურნალისტებთან საუბრისას განაცხადა, რომ ორ ქვეყანას შორის ურთიერთობები „ისტორიულად მაღალ დონეზეა“.

ეს ბოლო 20 წლის განმავლობაში საქართველოს პარლამენტის თავმჯდომარის პირველი ოფიციალური ვიზიტია ჩინეთში, რაც, მაღალჩინოსნის თქმით, ვიზიტის ისტორიულ მნიშვნელობას უსვამს ხაზს.

პაპუაშვილის თქმით, საქართველო და ჩინეთი უკვე რამდენიმე წელია სტრატეგიული პარტნიორები არიან, მოქმედებს უვიზო მიმოსვლა და თავისუფალი ვაჭრობის შეთანხმება, რაც ვაჭრობის, ტურიზმისა და პირდაპირი ავიარეისების ზრდაზეც აისახება.

„ქართული ოცნების“ პარლამენტის თავმჯდომარის შეფასებით, თბილისსა და პეკინს „აბსოლუტურად იდენტური მიდგომა“ აქვთ მშვიდობიანი თანაცხოვრებისა და საერთაშორისო სამართლის პატივისცემის მიმართულებით.

პაპუაშვილის ვიზიტი კიდევ ერთხელ მიუთითებს, რომ ჩინეთი საქართველოს საგარეო–პოლიტიკურ დღის წესრიგში ერთ–ერთ აქტიურ მიმართულებად რჩება, რასაც ბოლო პერიოდში ქართველი მაღალჩინოსნებისა და საპარლამენტო დელეგაციების ჩინეთში გახშირებული ოფიციალური ვიზიტები ადასტურებს.

აზერბაიჯანი

ილჰამ ალიევმა ჩინეთის ვიცე–პრემიერი ჟანგ გუოჩი მიიღო

18 მაისი

აზერბაიჯანის პრეზიდენტმა ილჰამ ალიევმა 18 მაისს ჩინეთის სახელმწიფო საბჭოს ვიცე–პრემიერი ჟანგ გუოჩი მიიღო. შეხვედრაზე მხარეებმა პოლიტიკური, ეკონომიკური, სატრანსპორტო და სხვა მიმართულებებით თანამშრომლობის გაღრმავების პერსპექტივები განიხილეს.

ჩინეთის მხარემ პრეზიდენტ ალიევს ჩინეთის პრეზიდენტ სი ძინპინის მისალმება გადასცა და აღნიშნა, რომ სი ძინპინი მას ჩინეთის მეგობრად მიიჩნევს. თავის მხრივ, აზერბაიჯანის პრეზიდენტმა მადლიერება გამოხატა მიღებული მისალმების გამო.

შეხვედრისას ყურადღება დაეთმო მსოფლიო ურბანული ფორუმის, World Urban Forum 13 საკითხსაც, რომელიც ბაქოში გაიმართა და გლობალური ურბანიზაციისა და ქალაქების განვითარების საკითხებს მიეძღვნა. ჩინურმა მხარემ აზერბაიჯანს ღონისძიების მაღალ დონეზე მასპინძლობისთვის მადლობა გადაუხადა.

მოლაპარაკებების დროს მხარეებმა კიდევ ერთხელ დაადასტურეს ორმხრივი მხარდაჭერა სუვერენიტეტისა და ტერიტორიული მთლიანობის პრინციპების მიმართ. ჟანგ გუოჩიმ აღნიშნა, რომ ჩინეთ–აზერბაიჯანის ურთიერთობები დინამიკურად ვითარდება და უკვე მიაღწია ყოვლისმომცველი სტრატეგიული პარტნიორობის დონეს.

ილჰამ ალიევმა განაცხადა, რომ აზერბაიჯანი, როგორც ქვეყანა, რომელიც თავად დაზარალდა სეპარატიზმისგან, გმობს სეპარატიზმის ყველა ფორმასა და გამოვლინებას. მან ასევე აღნიშნა, რომ ბაქომ არა მხოლოდ არ აღიარა ჩინეთის ტაივანის რეგიონში ჩატარებული არჩევნები, არამედ იყო ერთ–ერთი იმ სახელმწიფოთაგან, რომლებმაც ამ არჩევნების შედეგები დაგმო.

ამ კონტექსტში, სახელმწიფოს მეთაურმა კიდევ ერთხელ გაუსვა ხაზი, რომ აზერბაიჯანი ყოველთვის ურყევად უჭერს მხარს „ერთი ჩინეთის“ პოლიტიკას.

ბაქოში მიმდინარე ფორუმზე სინ ლიმ ურბანული განვითარების გამოცდილების გაზიარების მნიშვნელობაზე ისაუბრა

18 მაისი

ბაქოში გამართულ მსოფლიო ურბანული ფორუმის მე-13 სესიას (WUF13) შანხაის ურბანული დაგეგმარებისა და დიზაინის ინსტიტუტის დირექტორი, სინ ლი დაესწრო.

18 მაისს ჟურნალისტებთან საუბრისას სინ ლიმ აღნიშნა, რომ მსოფლიო ურბანული ფორუმი მნიშვნელოვან პლატფორმას წარმოადგენს ქვეყნების გამოცდილების გაცვლისა და ურბანული დაგეგმარების გლობალური განვითარების ხელშეწყობისთვის.

„ჩინეთი და აზერბაიჯანი ფლობენ პოტენციალს გააფართოონ თანამშრომლობა განათლების, ურბანული დაგეგმარებისა და ურბანული დიზაინის სფეროებში“, – განაცხადა სინ ლიმ.

მისი თქმით, მსოფლიო ურბანული ფორუმი მნიშვნელოვან პლატფორმას წარმოადგენს ქვეყნების გამოცდილების გაცვლისა და ურბანული დაგეგმარების გლობალური განვითარების ხელშეწყობისთვის.

სინ ლიმ ასევე აღნიშნა, რომ ჩინური დელეგაციის ერთ–ერთი მთავარი მიზანი ურბანული განვითარების სფეროში ჩინეთის გამოცდილების საერთაშორისო საზოგადოებისთვის გაზიარებაა.

მსოფლიო ურბანული ფორუმის მე-13 სესია (WUF13), რომელიც 17-დან 22 მაისის ჩათვლით მიმდინარეობდა, მდგრადი ურბანიზაციისა და ქალაქების განვითარების საკითხებში ერთ–ერთ ყველაზე გავლენიან საერთაშორისო პლატფორმად მიიჩნევა. წლევანდელ ღონისძიებას 176 ქვეყნიდან 57 000-ზე მეტი მონაწილე დაესწრო.

ლი ლიპინი WUF13-ის ფორუმზე სიტყვით გამოვიდა

22 მაისი

22 მაისს ჩინეთის საერთაშორისო ვაჭრობის ხელშეწყობის საბჭოს (CCPIT) სამშენებლო ინდუსტრიის ქვეკომიტეტის ხელმძღვანელმა ლი ლიპინმა მსოფლიო ურბანული ფორუმის (WUF13) ფარგლებში გამართულ ღონისძიებაზე ვიდეომიმართვა გააკეთა.

ფორუმზე გაკეთებულ განცხადებაში ლიპინმა აღნიშნა, რომ 21-ე საუკუნის დასაწყისიდან ჩინეთში ურბანიზაცია მნიშვნელოვნად დაჩქარდა, რამაც გარემოს ხარისხის გაუმჯობესება გამოიწვია და ქვეყანას მდგრადი ურბანული განვითარების მიმართულებით მნიშვნელოვანი გამოცდილება შეუქმნა.

„ჩინეთი მზად არის საერთაშორისო პარტნიორებს გაუზიაროს მდგრადი ურბანული განვითარების სფეროში დაგროვილი გამოცდილება“, – განაცხადა ლი ლიპინმა.

მისი თქმით, ბოლო წლებში ჩინეთის სამშენებლო სექტორმა მნიშვნელოვანი შედეგები აჩვენა ციფრული და ინტელექტუალური ტრანსფორმაციის, „ჭკვიანი“ ქალაქების განვითარების, ურბანული განახლებისა და მწვანე, დაბალნახშირბადიანი განვითარების ხელშეწყობის მიმართულებით.

ლი ლიპინმა აღნიშნა, რომ ჩინეთი მზად არის საერთაშორისო პარტნიორებთან ერთად იმუშაოს ურბანიზაციასთან და ქალაქების მდგრად განვითარებასთან დაკავშირებული გლობალური გამოწვევების გადასაჭრელად.

Xinhua ბაქოში გამართულ ფორუმზე ჩინეთის ურბანულ მიღწევებს მიმოიხილავს

22 მაისი

22 მაისს ჩინურმა სახელმწიფო სააგენტომ Xinhua News Agency ბაქოში გამართული მსოფლიო ურბანული ფორუმის, WUF13 შესახებ ღონისძიების შემაჯამებელი სტატია გამოაქვეყნა.

სტატიის მიხედვით, წლევანდელი ფორუმი, რომელიც ჩატარდა სახელწოდებით „სამყაროს დაბინავება: უსაფრთხო და მდგრადი ქალაქები და თემები“, გახდა მნიშვნელოვანი პლატფორმა მდგრადი და ინკლუზიური ურბანული გარემოს შესაქმნელად.

ღონისძიების ფარგლებში ჩინურმა მხარემ წარადგინა ეროვნული ანგარიში „ახალი ურბანული დღის წესრიგის“ შესრულების შესახებ. დოკუმენტში ასახულია ქვეყნის პროგრესი ურბანული განვითარების პოლიტიკაში, მათ შორის ქალაქების დაგეგმარების გაუმჯობესება, ინფრასტრუქტურის მოდერნიზაცია და ეკოლოგიურად უფრო მდგრადი ურბანული სივრცეების შექმნა.

ფორუმის საგამოფენო სივრცეში ყურადღება მიიპყრო ჩინეთის პავილიონმა, სადაც Urban Planning Society of China-მა წარადგინა ექსპოზიცია და ვიზიტორებს პრაქტიკულ მაგალითებზე დაყრდნობით გააცნო ქვეყნის ინოვაციური ქალაქგეგმარებითი გამოცდილება.

WUF13-ის მონაწილეთა საერთო შეფასებით, ბაქოს ფორუმი გახდა გარდამტეხი ეტაპი ურბანული განვითარების გლობალური თანამშრომლობის გაძლიერებისა და ქვეყნებს შორის ცოდნის გაცვლის თვალსაზრისით.

სომხეთი

ევროპული დიპლომატია პეკინში: სომხეთისა და ევროკავშირის ინიციატივით ელჩებმა ჩინეთის გლობალური როლი განიხილეს

19 მაისი

ჩინეთში სომხეთის საელჩოსა და ევროკავშირის წარმომადგენლობის ერთობლივი ინიციატივით, პეკინმა ევროპული პოლიტიკური გაერთიანების (EPC) წევრი ქვეყნების ელჩების მაღალი დონის შეხვედრას უმასპინძლა.

19 მაისს გამართული დიპლომატიური აუდიენციის მთავარ ფოკუსს ევროპული უსაფრთხოებისა და სტაბილურობის პერსპექტივები და ამ პროცესებში ჩინეთის, როგორც გლობალური აქტორის როლის შეფასება წარმოადგენდა.

გავრცელებული ოფიციალური პრესრელიზის თანახმად, მზარდი გეოპოლიტიკური დაძაბულობის ფონზე, დიპლომატებმა ხაზგასმით აღნიშნეს ევროპის სტრატეგიული მდგრადობის გაძლიერების აუცილებლობა. ამავდროულად, შეხვედრის მონაწილეები შეთანხმდნენ, რომ პეკინთან პირდაპირი დიალოგისა და კომუნიკაციის არხების შენარჩუნება პრაგმატულ აუცილებლობას წარმოადგენს.

დისკუსია შეეხო როგორც პოლიტიკურ, ისე ეკონომიკურ ჭრილში არსებულ გამოწვევებს, სადაც ჩინეთთან ურთიერთობა ერთდროულად მოიცავს როგორც პარტნიორობის, ისე სტრატეგიული კონკურენციის ელემენტებს.

შეხვედრა შედგა ევროპული პოლიტიკური გაერთიანების (EPC) ეგიდით, რომელიც 50-მდე ევროპულ სახელმწიფოს აერთიანებს და წარმოადგენს პოლიტიკური დიალოგის პლატფორმას საერთო ინტერესების საკითხებზე თანამშრომლობის გასაღრმავებლად.

ექსპერტების შეფასებით, მსგავსი ფორმატის შეხვედრები მიზნად ისახავს ევროპის ერთიანი პოზიციების კოორდინაციას გლობალური გამოწვევების ფონზე, განსაკუთრებით მაშინ, როდესაც ჩინეთთან ურთიერთობები ერთდროულად თანამშრომლობისა და სტრატეგიული კონკურენციის ელემენტებს მოიცავს.

ყირგიზეთი

ჩინეთის უსაფრთხოების მინისტრი ყირგიზეთს ეწვია

19 მაისი

19 მაისს ჩინეთის სახალხო რესპუბლიკის საზოგადოებრივი უსაფრთხოების მინისტრის, ვან სიოჰონის ხელმძღვანელობით დელეგაცია ოფიციალური ვიზიტით ბიშკეკში ჩავიდა. ინფორმაციას ყირგიზეთის შინაგან საქმეთა სამინისტრო ავრცელებს.

ვიზიტის მთავარ მოვლენას ვან სიოჰონისა და ყირგიზეთის შინაგან საქმეთა მინისტრის, ულან ნიიაზბეკოვის შეხვედრა წარმოადგენს. მხარეებს შორის გამართული დისკუსიის ცენტრალური თემა ყირგიზეთსა და ჩინეთს შორის სამართალდაცვით სფეროში სტრატეგიული პარტნიორობის გაფართოებაა.

დისკუსიები ასევე შეეხება უწყებათაშორისი კოორდიანაციის გაუმჯობესებასა და სამომავლო ოპერატიული თანამშრომლობის კონკრეტული პერსპექტივების დასახვას. ვიზიტი მიზნად ისახავს ორ ქვეყანას შორის უსაფრთხოების სფეროში არსებული ურთიერთობების შემდგომ გაძლიერებას.

ჩინეთისა და ყირგიზეთის სპეცსამსახურების ხელმძღვანელები პეკინში შეხვდნენ

19 მაისი

19 მაისს ყირგიზეთის ეროვნული უსაფრთხოების სახელმწიფო კომიტეტის თავმჯდომარემ, ჯუმგალბეკ შაბდანბეკოვმა ჩინეთის სახალხო რესპუბლიკის საზოგადოებრივი უსაფრთხოების მინისტრს, ვან სიოჰონგს უმასპინძლა.

ყირგიზეთის ეროვნული უსაფრთხოების სახელმწიფო კომიტეტის ინფორმაციით, შეხვედრაზე მხარეებმა განიხილეს თანამშრომლობის გაძლიერება ტერორიზმთან, რელიგიურ ექსტრემიზმთან, ეკონომიკურ დანაშაულებთან და კიბერთავდასხმებთან ბრძოლის მიმართულებით.

მოლაპარაკებების ერთ–ერთი მთავარი თემა იყო სტრატეგიული ინფრასტრუქტურული პროექტების უსაფრთხოების უზრუნველყოფა, მათ შორის ჩინეთი–ყირგიზეთი–უზბეკეთის მშენებლობა, რომელსაც რეგიონული დაკავშირებადობისა და ეკონომიკური განვითარების თვალსაზრისით განსაკუთრებული მნიშვნელობა ენიჭება.

შაბდანბეკოვმა ასევე დაადასტურა მზადყოფნა, უზრუნველყოს ყირგიზეთში ჩინელი ინვესტორების უფლებებისა და კანონიერი ინტერესების დაცვა.

შეხვედრის დასასრულს მხარეები შეთანხმდნენ თანამშრომლობის გაღრმავებაზე და პრაქტიკული ნაბიჯების განხორციელებაზე, რომლებიც უსაფრთხოების სფეროში ურთიერთობის შემდგომ გაძლიერებას ისახავს მიზნად.

ყირგიზეთმა და ჩინეთმა 430 მილიონი დოლარის ღირებულების პროექტს მოაწერეს ხელი

20 მაისი

20 მაისს ყირგიზეთსა და ჩინეთს შორის $430 მილიონიან ენერგეტიკულ და ლოგისტიკურ პროექტზე შეთანხმება გაფორმდა, იუწყება ყირგიზეთის საინფორმაციო სააგენტო Kabar.

პროექტი მიზნად ისახავს ენერგეტიკული ინფრასტრუქტურის გაძლიერებას და სატრანსპორტო–ლოგისტიკური შესაძლებლობების გაფართოებას, რაც ორ ქვეყანას შორის ეკონომიკური თანამშრომლობის კიდევ უფრო გააქტიურებას შეუწყობს ხელს.

ინიციატივა განიხილება როგორც მნიშვნელოვანი ნაბიჯი ჩინეთსა და ცენტრალური აზიის სახელმწიფოს შორის სტრატეგიული პარტნიორობის ფარგლებში, განსაკუთრებით ენერგეტიკისა და რეგიონული დაკავშირებადობის მიმართულებით.

მხარეთა შეფასებით, აღნიშნული სტრატეგიული პარტნიორობა მხოლოდ ორმხრივი ეკონომიკური სარგებლის მიღებით არ შემოიფარგლება. იგი ფუნდამენტურ როლს შეასრულებს ცენტრალური აზიის რეგიონის ენერგეტიკული უსაფრთხოების განმტკიცებასა და სატრანზიტო პოტენციალის მასშტაბურ გაძლიერებაში.

ჩინეთი სამხრეთ კავკასიასა და ყირგიზეთში (18-24 მაისი) Read More »

„ლიანინის“ ავიამზიდის წვრთნებმა რეგიონში დაძაბულობა გამოიწვია

ჩინეთის სახალხო–განმათავისუფლებელმა არმიამ დასავლეთ წყნარ ოკეანეში ავიამზიდ „ლიანინის“ ხელმძღვანელობით ფართომასშტაბიანი სამხედრო წვრთნები დაიწყო, რამაც იაპონიაში უსაფრთხოების საკითხებზე შეშფოთება გამოიწვია.

ჩინეთის სამხედრო–საზღვაო ძალები აცხადებენ, რომ სწავლება „წლიური გეგმის ფარგლებში ჩატარებული რუტინული წვრთნაა“, თუმცა დასავლური მედიის ნაწილი აღნიშნავს, რომ აქტივობა რეგიონში მზარდი სტრატეგიული კონკურენციის ფონზე მიმდინარეობს, რაც ოკინავასა და ტაივანის მიმდებარე საზღვაო სივრცეებს განსაკუთრებით მგრძნობიარე კრიტიკულ წერტილებად აქცევს.

South China Morning Post-ის ცნობით, მიმდინარე სამხედრო წვრთნები გასული წლის დეკემბერში მომხდარი ინციდენტის შემდეგ ტარდება. მაშინ, იაპონიის განცხადებით, ჩინურმა J-15 ტიპის სამხედრო თვითმფრინავებმა ოკინავასთან ახლოს იაპონურ გამანადგურებლებს ცეცხლის მართვის რადარები დაუმიზნეს, რის გამოც ტოკიომ ოფიციალური პროტესტი გამოთქვა.

Reuters-ის ინფორმაციით, აპრილშიც ჩინურმა სამხედრო ხომალდებმა ოკინავას პრეფექტურის კუნძულებთან მდებარე სრუტე გაიარეს დასავლეთ წყნარ ოკეანეში ჩატარებული წვრთნების დასრულების შემდეგ. იაპონიის მთავრობის შეფასებით, ეს ჩინეთის საზღვაო და სამხედრო შესაძლებლობების ზრდაზე მიუთითებს.

ტაივანის პრემიერ–მინისტრმა ჩო იუნგ–ტაიმ ამავე კვირაში განაცხადა, რომ ჩინეთის სამხედრო მოქმედებები „რეგიონული არასტაბილურობის ყველაზე დიდი წყაროა“. მისი თქმით, პეკინი სამხედრო და პოლიტიკური ზეწოლის გაძლიერებას აგრძელებს როგორც ტაივანის, ისე ფართო ინდო–წყნარი ოკეანის რეგიონის მიმართ.

ანალიტიკოსების შეფასებით, ჩინეთის ავიამზიდების დასავლეთ წყნარ ოკეანეში უფრო აქტიური ოპერირება მიუთითებს პეკინის მცდელობაზე, გააძლიეროს სამხედრო გავლენა „პირველი კუნძულოვანი ჯაჭვის“ მიღმაც, სადაც მნიშვნელოვან სამხედრო ყოფნას ინარჩუნებენ აშშ და მისი მოკავშირეები, მათ შორის იაპონია.

„ლიანინის“ ავიამზიდის წვრთნებმა რეგიონში დაძაბულობა გამოიწვია Read More »

თბილისი-პეკინის სტრატეგიული ურთიერთობა: შალვა პაპუაშვილის ოფიციალური ვიზიტი ჩინეთში

საქართველოსა და ჩინეთის სახალხო რესპუბლიკას შორის სტრატეგიული პარტნიორობის გაფორმების შემდეგ, ორმხრივი პოლიტიკური ურთიერთობები მრავალმხრივ ფორმატში გადავიდა. ქართველი მაღალჩინოსნების ჩინეთში გახშირებულ სტუმრობას, ამჯერად „ქართული ოცნების“ პარლამენტის თავმჯდომარის, შალვა პაპუაშვილის ოფიციალური ვიზიტი დაემატა. საკანონმდებლო ორგანოს ხელმძღვანელი პეკინში 18 მაისს გაემგზავრა.

ვიზიტის ძირითადი ნაწილი პეკინში გამართული შეხვედრები იყო, რომლის ფარგლებშიც შალვა პაპუაშვილი პირადად შეხვდა ეროვნული სახალხო კონგრესის მუდმივმოქმედი კომიტეტის თავმჯდომარეს, ჭაო ლეძის.

მოლაპარაკებების ერთ–ერთი მთავარი თემა საქართველოსა და ჩინეთს შორის სტრატეგიული პარტნიორობის გაღრმავება და პოლიტიკური დიალოგის გაფართოება იყო. მხარეებმა აღნიშნეს, რომ ქვეყნებს უკვე აკავშირებს მნიშვნელოვანი სამართლებრივი და ეკონომიკური ჩარჩოები, მათ შორის თავისუფალი ვაჭრობის შეთანხმება და უვიზო რეჟიმი, რაც, ოფიციალური შეფასებით, ხელს უწყობს სავაჭრო და ტურისტული ნაკადების ზრდას.

ჩინეთის საინფორმაციო განცხადებებში ნათქვამია, რომ ორ ქვეყანას შორის ურთიერთობები „ახალ ეტაპზე“ გადავიდა, ხოლო პეკინმა კიდევ ერთხელ დაადასტურა საქართველოს სუვერენიტეტისა და დამოუკიდებლობის მხარდაჭერა. საპასუხოდ, პაპუაშვილმა აღნიშნა, რომ საქართველო აგრძელებს „ერთი ჩინეთის პრინციპის“ მხარდაჭერას და აქტიურად ჩაერთვება გლობალური განვითარების ინიციატივებში.

პეკინის გარდა, შალვა პაპუაშვილი ეწვია შაანსის პროვინციას, სადაც ადგილობრივი პარლამენტის თავმჯდომარეს, ჭაო იდეს შეხვდა. შეხვედრებზე განხილული იყო რეგიონული ეკონომიკური და კულტურული თანამშრომლობის საკითხები.

ვიზიტის პროგრამა ასევე მნიშვნელოვანწილად მოიცავდა შეხვედრებს ჩინეთის წამყვან პოლიტიკურ ინსტიტუტებთან. კერძოდ, პარლამენტის თავმჯდომარე შეხვდა ჩინეთის სახალხო პოლიტიკური საკონსულტაციო საბჭოს (CPPCC) თავმჯდომარეს, ვანგ ჰიუნინგს. განხილვის თემა იყო პარლამენტთაშორისი თანამშრომლობის გაძლიერება და ინსტიტუციური დიალოგის განვითარება.

პარლამენტის თავმჯდომარემ მოხსენება გააკეთა ჩინეთის საგარეო საქმეთა უნივერსიტეტშიც. გამოსვლისას მან საქართველოს გეოპოლიტიკურ როლზე ისაუბრა და აღნიშნა, რომ ქვეყანა ისტორიულად „აბრეშუმის გზის“ ნაწილია, ხოლო დღეს „შუა დერეფნის“ მნიშვნელოვან რგოლს წარმოადგენს, რომელიც ევროპასა და აზიას შორის სატრანსპორტო კავშირებს აძლიერებს. სტუდენტებისა და პროფესორ–მასწავლებლების წინაშე გამოსვლისას პაპუაშვილმა მიმოიხილა საქართველოს საგარეო პოლიტიკის პრიორიტეტები და ქვეყნის როლი საერთაშორისო სატრანზიტო და სავაჭრო პროცესებში.

მედიასთან საუბრისას შალვა პაპუაშვილმა ვიზიტის შედეგები შეაჯამა და მის „ისტორიულ მნიშვნელობას“ გაუსვა ხაზი. ოფიციალური შეფასებით, ჩინეთის ხელისუფლებასა და თბილისს საერთაშორისო გამოწვევებზე „აბოლუტურად იდენტური მიდგომა“ აქვთ, რაც მშვიდობიანი თანაცხოვრებისა და საერთაშორისო სამართლის პრინციპების პატივისცემას ეფუძნება.

პაპუაშვილის ვიზიტი კიდევ ერთი დასტურია იმისა, რომ ქართველი მაღალჩინოსნების სტუმრობა ჩინეთში ერთჯერად დიპლომატიურ აქტს აღარ წარმოადგენს. ბოლო პერიოდში სხვადასხვა დონის საპარლამენტო კომიტეტებისა თუ მმართველი გუნდის წევრების პეკინსა და ჩინეთის სხვადასხვა პროვინციებში გახშირებული ვოიაჟები აჩვენებს, რომ „აღმოსავლური მიმართულება“ საქართველოს მიმდინარე საგარეო–პოლიტიკური სტრატეგიის ერთ–ერთ ყველაზე აქტიურ ვექტორად იქცა.

თბილისი-პეკინის სტრატეგიული ურთიერთობა: შალვა პაპუაშვილის ოფიციალური ვიზიტი ჩინეთში Read More »

თინათინ ხიდაშელი არჩევნების თემაზე უკრაინის კრიზისის მედია ცენტრის საერთაშორისო დისკუსიაში.

20 მაისს, უკრაინის კრიზისის მედია ცენტრის (UCMC) ორგანიზებით გაიმართა ექსპერტთა დისკუსია თემაზე: „რუსეთის გავლენის ოპერაციები საარჩევნო კამპანიების დროს ევროკავშირისა და აღმოსავლეთ პარტნიორობის ქვეყნებში (2024–2025): გაკვეთილები უკრაინისთვის“.

პანელში, რომელიც აღმოსავლეთ პარტნიორობის ქვეყნებში მიმდინარე საარჩევნო პროცესებს შეეხებოდა, მონაწილეობა მიიღო „სამოქალაქო იდეას“ თავმჯდომარე თინათინ ხიდაშელმა. მისი გამოსვლის თემა იყო: „საქართველო: არჩევნები ხელისუფლების სცენარით“.

საერთაშორისო შეხვედრამ თავი მოუყარა სხვადასხვა ქვეყნის მკვლევრებსა და ექსპერტებს, რომელთაც იმსჯელეს რუსეთის საინფორმაციო გავლენის ოპერაციებსა და  დემოკრატიული საარჩევნო პროცესების წინაშე მდგარ გამოწვევებზე.

 

დისკუსია სრულად:

თინათინ ხიდაშელი არჩევნების თემაზე უკრაინის კრიზისის მედია ცენტრის საერთაშორისო დისკუსიაში. Read More »

სი და პუტინი პეკინში: სტრატეგიული პარტნიორობის დემონსტრირება და კვლავ გადაუჭრელი „ციმბირის ძალა 2“

20 მაისს ჩინეთის პრეზიდენტმა სი ძინპინმა რუსეთის პრეზიდენტ ვლადიმირ პუტინს ოფიციალური ვიზიტის ფარგლებში უმასპინძლა, სადაც მხარეებმა თანამშრომლობის შესახებ ათეულობით დოკუმენტს მოაწერეს ხელი და ორმხრივი ურთიერთობები „ახალ ეტაპზე გადასვლად“ შეაფასეს.

შეხვედრა აშშ–ის პრეზიდენტ დონალდ ტრამპის ჩინეთში ვიზიტიდან რამდენიმე დღეში გაიმართა, რამაც საერთაშორისო მედიის შეფასებით, პეკინსა და მოსკოვს შესაძლებლობა მისცა, დასავლეთის მიმართ ერთიანი პოლიტიკური პოზიცია კიდევ ერთხელ აჩვენონ. ეს ასახავს ჩინეთის სტრატეგიას, შეინარჩუნოს სტრატეგიული კავშირი რუსეთთან, პარალელურად, მართოს ურთიერთობები ვაშინგტონთან.

მოლაპარაკებების დასრულების შემდეგ გავრცელებულ ერთობლივ განცხადებაში ჩინეთმა და რუსეთმა „მრავალპოლარული მსოფლიო წესრიგის“ მხარდაჭერა დაადასტურეს. ოფიციალური განცხადებების მიხედვით, მხარეებმა განსაკუთრებული ყურადღება დაუთმეს ეკონომიკურ თანამშრომლობას, ენერგეტიკას, ტექნოლოგიებს, მეცნიერებას, განათლებასა და მედიის სფეროში კავშირების გაღრმავებას.

სი ძინპინმა ორმხრივ ურთიერთობებს „ისტორიულად უმაღლესი დონე“ უწოდა, ხოლო პუტინმა განაცხადა, რომ ჩინეთ–რუსეთის თანამშრომლობა „გარე ზეწოლის პირობებში“ სტაბილურად ვითარდება. ორივე ლიდერმა საერთაშორისო პოლიტიკაში „უნილატერალიზმი“ და „ჰეგემონიური მიდგომები“ გააკრიტიკა. ამ რიტორიკას პეკინი და მოსკოვი ბოლო წლებში ხშირად იყენებენ დასავლეთის, განსაკუთრებით კი აშშ–ის პოლიტიკის შეფასებისას.

სამიტზე განიხილეს საერთაშორისო უსაფრთხოების საკითხებიც, მათ შორის უკრაინის ომი, ახლო აღმოსავლეთის კრიზისი და აზია–წყნარი ოკეანის რეგიონში მზარდი კონკურენცია. ჩინეთმა კვლავ აღნიშნა, რომ კონფლიქტები „დიალოგისა და პოლიტიკური მოლაპარაკებების გზით“ უნდა გადაწყდეს.

შეხვედრის ერთ–ერთი მთავარი თემა ენერგეტიკული თანამშრომლობა იყო. რუსეთი ცდილობს ევროპულ ბაზრებზე დაკარგული პოზიციები ჩინეთის მიმართულებით გაზარდოს. ამ კონტექსტში მოსკოვისთვის სტრატეგიული მნიშვნელობისაა პროექტი „ციმბირის ძალა 2“, რომელიც წელიწადში 50 მილიარდი კუბური მეტრი რუსული გაზის ჩინეთში ტრანსპორტირებას იამალის საბადოებიდან, მონღოლეთის გავლით ითვალისწინებს.

თუმცა, მიუხედავად მაღალი მოლოდინებისა, პეკინის სამიტზე მხარეებმა საბოლოო შეთანხმებას კვლავ ვერ მიაღწიეს. კრემლის განცხადებით, პროექტის „ძირითად ასპექტებზე“ საერთო შეთანხმება არსებობს, თუმცა რიგი დეტალები ჯერ კიდევ დასაზუსტებელია. საერთაშორისო მედიის ინფორმაციით, უთანხმოებას გაზის ფასი, დაფინანსება და გრძელვადიანი პირობები იწვევს.

დასავლურ მედიაში აღნიშნავენ, რომ პეკინსა და მოსკოვს შორის ურთიერთობები ასიმეტრიულია. უკრაინის ომის შემდეგ, დასავლური სანქციებისა და ევროპული ბაზრის დაკარგვის ფონზე, რუსეთის ეკონომიკური დამოკიდებულება ჩინეთზე მნიშვნელოვნად გაიზარდა, რაც პეკინს დამატებით ბერკეტებს აძლევს. ჩინეთი ამით სარგებლობს და ცდილობს რუსული ენერგორესურსები მაქსიმალურად ხელსაყრელი პირობებით მიიღოს. მიუხედავად ამისა, ჩინეთი ცდილობს რუსეთთან თანამშრომლობა ისე მართოს, რომ დასავლეთთან საკუთარი ეკონომიკური ურთიერთობები სრულად არ დააზიანოს.

ეს გარემოება აჩვენებს, რომ პეკინსა და მოსკოვს შორის ურთიერთობები, მიუხედავად სტრატეგიული და პოლიტიკური დაახლოებისა, მაინც მკაფიოდ ეფუძნება პრაგმატულ ეკონომიკურ ინტერესებს, სადაც ორივე მხარე საკუთარი პირობების მაქსიმალურად დაცვას ცდილობს.

სი და პუტინი პეკინში: სტრატეგიული პარტნიორობის დემონსტრირება და კვლავ გადაუჭრელი „ციმბირის ძალა 2“ Read More »

ვებინარი „ქართული სამხედრო ძალა დამოუკიდებლობის შემდეგ“

სამოქალაქო იდეას თავმჯდომარემ, თინათინ ხიდაშელმა მონაწილეობა მიიღო ვებინარში „ ქართული სამხედრო ძალა დამოუკიდებლობის შემდეგ“ , რომელშიც მონაწილეებმა განიხილეს საქართველოს სამხედრო განვითარების გზა და ქვეყნის თავდაცვისუნარიანობის წინაშე არსებული გამოწვევები.
 
დისკუსიის ფარგლებში ყურადღება გამახვილდა, თუ როგორ გარდაქმნა საქართველოს შეიარაღებული ძალები კოსოვოს, ერაყისა და ავღანეთის საერთაშორისო მისიებში მიღებულმა გამოცდილებამ. ამ პროცესებმა მნიშვნელოვანი წვლილი შეიტანა ქართული არმიის პროფესიონალიზაციასა და განვითარებაში:
 
▪️ ჩამოყალიბდა უფრო პროფესიული, დისციპლინირებული და დამსახურებაზე დაფუძნებული სამხედრო კულტურა;
▪️ გაძლიერდა ნატოს ძალებთან თანამშრომლობისა და თავსებადობის შესაძლებლობა;
▪️ გაიზარდა ახალი თაობის სამხედრო ლიდერების გამოცდილება და შესაძლებლობები;
▪️ საქართველომ კიდევ ერთხელ აჩვენა თავისი მზადყოფნა, წვლილი შეიტანოს გლობალურ უსაფრთხოებაში;
▪️ სამხედრო თანამშრომლობამ კიდევ უფრო გაამყარა საქართველოს ევროატლანტიკური მისწრაფებები.
 
ამასთან ერთად, საერთაშორისო მისიებში მიღწეული წარმატება მხოლოდ მაშინ იქცევა რეალურ ძალად, როდესაც სამხედრო სისტემის მთავარი მიზანი ქვეყნის შიდა თავდაცვის გაძლიერებას ემსახურება.
 
დღეს საქართველოს მთავარი გამოწვევაა, შეინარჩუნოს წლების განმავლობაში დაგროვილი პროფესიული გამოცდილება და საერთაშორისო თანამშრომლობის შედეგად მიღებული შესაძლებლობები, ყველა რეფორმა მიმართოს ერთი უმთავრესი მიზნის – საქართველოს გაძლიერებისა და უსაფრთხოების განმტკიცებისკენ.

ვებინარი „ქართული სამხედრო ძალა დამოუკიდებლობის შემდეგ“ Read More »

Scroll to Top