Civicidea

ჩინეთმა პარგვაისა და ბელიზის მინისტრები ტაივანთან დიპლომატიური ურთიერთობების გამო დაასანქცირა

ჩინეთმა პარაგვაის კომუნიკაციების მინისტრ, გუსტავო ვილატესა და ბელიზის საგარეო საქმეთა მინისტრ, ფრენსის ფონსეკას ტაივანთან დიპლომატიური ურთიერთობების გამო სანქციები დაუწესა. ჩინეთის საგარეო საქმეთა სამინისტრომ გადაწყვეტილება ეროვნული სუვერენიტეტისა და უსაფრთხოების დაცვით ახსნა. აღნიშნული ნაბიჯი კიდევ ერთხელ ადასტურებს ტაივანის საკითხის მნიშვნელობას ჩინეთის საგარეო პოლიტიკაში.

პარაგვაი და ბელიზი იმ 12 სახელმწიფოს შორის არიან, რომლებიც დღემდე ინარჩუნებენ დიპლომატიურ ურთიერთობებს ტაივანთან. სანქციების პაკეტი მოიცავს მინისტრების ჩინეთში არსებული ქონებისა და აქტივების გაყინვას, მათთვის ვიზების გაცემასა და ქვეყანაში შესვლის აკრძალვას, ასევე ჩინეთში მოქმედი ორგანიზაციებისა და ფიზიკური პირებისთვის მათთან საქმიანი ურთიერთობებისა და თანამშრომლობის შეზღუდვას. თუმცა უნდა აღინიშნოს, რომ სანქციებს ძირითადად სიმბოლური ხასიათი აქვს, ვინაიდან ტაივანთან დიპლომატიური ურთიერთობების მქონე ქვეყნების მინისტრები ჩინეთში, როგორც წესი, არ მოგზაურობენ.

სააგენტო Reuters-ის ცნობით, ჩინეთის ხელისუფლებამ სანქცირებულ პირებს „პაიკები“ უწოდა და განაცხადა, რომ მათ პეკინს შეურაცხყოფა მიაყენეს. ჩინეთის საგარეო საქმეთა სამინისტროს პრესსპიკერმა მაო ნინგმა განაცხადა: „ისინი სერიოზულად ერევიან ჩინეთის შიდა საქმეებში, ავრცელებენ ცრუ ინფორმაციას ჩინეთის კიბერშეტევების შესახებ და თავს ესხმიან და აკრიტიკებენ ჩინეთს, რაც ჩინეთის საერთაშორისო რეპუტაციას აზიანებს“

სანქციები ტაივანის ეროვნული დღის აღნიშვნიდან ორი დღის შემდეგ გამოცხადდა. დღესასწაულს გამოეხმაურა პარაგვაის კომუნიკაციების მინისტრი, გუსტავო ვილატე, რომელმაც სოციალურ ქსელში გამოქვეყნებულ განცხადებაში აღნიშნა, რომ მისი ქვეყანა კვლავ ადასტურებს ტაივანთან მეგობრულ და თანამშრომლობით ურთიერთობებს. მისი თქმით, ეს ურთიერთობები საერთო ღირებულებებსა და პრინციპებს, ხალხთა თვითგამორკვევას, ადამიანის უფლებებსა და დემოკრატიას ეფუძნება.

პარაგვაის პრეზიდენტი სანტიაგო პენია ტაივანს სამხრეთამერიკული ქვეყნისთვის „ფუნდამენტურ პარტნიორად“ მოიხსენიებს. მიმდინარე წლის დასაწყისში ის ტაიპეის ეწვია, სადაც მხარეებმა რამდენიმე შეთანხმებას მოაწერეს ხელი. შეთანხმებები ითვალისწინებდა თანამშრომლობას სისხლის სამართლის საქმეებზე სამართლებრივი დახმარების, კიბერუსაფრთხოების, ხელოვნური ინტელექტისა და გამოთვლითი ტექნოლოგიების სფეროებში.

გასულ თვეში ტაივანის საგარეო საქმეთა მინისტრი ლინ ჩია-ლუნგიც ეწვია ბელიზს. ტაივანის საგარეო საქმეთა სამინისტროს განცხადებით, მხარეები ურთიერთობების გაღრმავებაზე შეთანხმდნენ.

ჩინეთი ტაივანს საკუთარ ტერიტორიად მიიჩნევს და მის დამოუკიდებლობას არ აღიარებს. პეკინი აცხადებს, რომ საჭიროების შემთხვევაში ტაივანზე კონტროლის დასამყარებლად ძალის გამოყენებას არ გამორიცხავს. თავის მხრივ, ტაივანის ხელისუფლება ჩინეთის პრეტენზიებს უარყოფს და კუნძულის თვითმმართველობას იცავს.

სანქციები კიდევ ერთი მაგალითია იმისა, თუ როგორ იყენებს ჩინეთი დიპლომატიურ და ეკონომიკურ შეზღუდვებს ტაივანთან დაკავშირებული საკითხების საპასუხოდ. ამ გადაწყვეტილების ფონზე, პარაგვაისა და ბელიზის მიერ ტაივანთან ურთიერთობების შენარჩუნება, პეკინსა და ამ ქვეყნებს შორის დიპლომატიური დაძაბულობის წყაროდ რჩება.

ჩინეთმა პარგვაისა და ბელიზის მინისტრები ტაივანთან დიპლომატიური ურთიერთობების გამო დაასანქცირა Read More »

ჩინეთი სამხრეთ კავკასიასა და ყირგიზეთში (5 – 11 ოქტომბერი)

საქართველო

ირაკლი კობახიძე: ჩინეთში ქართული პროდუქციის ექსპორტი 177%-ით გაიზარდა

7 ოქტომბერი

7 ოქტომბერს საქართველოს პრემიერ–მინისტრმა, ირაკლი კობახიძემ, მთავრობის სხდომაზე ჩინეთთან ეკონომიკური თანამშრომლობის მაჩვენებლებზე ისაუბრა. მისი განცხადებით, 2026 წლის იანვარ–აგვისტოში ჩინეთში ქართული პროდუქციის ექსპორტი 177%-ით გაიზარდა, რაც პრემიერმა თავისუფალი ვაჭრობის შეთანხმების გაფართოების პრაქტიკულ შედეგად შეაფასა.

კობახიძის თქმით, წლის პირველ ნახევარში ჩინეთიდან საქართველოში განხორციელებული პირდაპირი უცხოური ინვესტიციების მოცულობამ დაახლოებით 236 მილიონი აშშ დოლარი შეადგინა. ამ მაჩვენებლით ჩინეთმა საქართველოს ინვესტორ ქვეყნებს შორის პირველი ადგილი დაიკავა.

პრემიერმა ეკონომიკური კავშირების გაღრმავებაში პირდაპირი ავიამიმოსვლის მნიშვნელობაც გამოყო. მისი განცხადებით, საქართველოსა და ჩინეთს შორის კვირაში 14 ავიარეისი სრულდება, რაც ორ ქვეყანას შორის ეკონომიკური ურთიერთობების გაფართოებას უწყობს ხელს.

საქპატენტმა ჩინეთის ინტელექტუალური საკუთრების უწყებასთან თანამშრომლობის მემორანდუმი გააფორმა

10 ოქტომბერი

საქპატენტმა და ჩინეთის ინტელექტუალური საკუთრების ეროვნულმა ადმინისტრაციამ (CNIPA) თანამშრომლობის მემორანდუმი გააფორმეს. 10 ოქტომბერს დოკუმენტს ხელი საქპატენტის თავმჯდომარემ სოსო გიორგაძემ და CNIPA-ს კომისრის მოადგილემ რუი ვენბიაომ მოაწერეს.

შეხვედრაზე მხარეებმა ერთობლივი საგანმანათლებლო ღონისძიებების ჩატარება, არსებული სასწავლო რესურსების გაზიარება და ახალი მასალების ერთობლივად შექმნა განიხილეს. საუბარი შეეხო ინტელექტუალური საკუთრების სფეროში მომუშავე ექსპერტებს შორის ცოდნისა და გამოცდილების გაცვლასაც. ვიზიტის ფარგლებში დელეგაციის წევრები ქუთაისში ინტელექტუალური საკუთრების სწავლებისა და გადამზადების ცენტრის გახსნას დაესწრნენ.

აზერბაიჯანი

აზერბაიჯანში სასწავლებლად 23 ჩინელი სტუდენტი შეირჩა

5 ოქტომბერს, 2026-2027 სასწავლო წლისთვის 23 ჩინელმა სტუდენტმა აზერბაიჯანის უნივერსიტეტებში სწავლის უფლება მოიპოვა. ისინი მთავრობათაშორისი სასტიპენდიო პროგრამით ისარგებლებენ, რომელიც ორი ქვეყნის განათლების სამინისტროებს შორის თანამშრომლობის შეთანხმების ფარგლებში ხორციელდება.

აზერბაიჯანის მეცნიერებისა და უმაღლესი განათლების სახელმწიფო სააგენტოს ინფორმაციით, სტუდენტები მაგისტრატურისა და დოქტორანტურის საფეხურებზე ისწავლიან. მათ ბაქოს სახელმწიფო უნივერსიტეტი, აზერბაიჯანის სახელმწიფო ნავთობისა და მრეწველობის უნივერსიტეტი, აზერბაიჯანის ტექნიკური უნივერსიტეტი და ბაქოს სლავური უნივერსიტეტი მიიღებენ. სასწავლო მიმართულებები განათლებას, ჰუმანიტარულ და სოციალურ მეცნიერებებს, საბუნებისმეტყველო და ტექნიკურ სპეციალობებს მოიცავს.

შუა დერეფანზე გადაზიდვების გამარტივებას გეგმავენ

6 ოქტომბერი

6 ოქტომბერს აზერბაიჯანის რკინიგზის თავმჯდომარის მრჩეველმა, ემილ მამედოვმა, შუა დერეფნის სამხრეთ განშტოებაზე გადაზიდვების შემაფერხებელი ფაქტორების შესწავლა დაანონსა. ბაქოში გამართულ გერმანია–აზერბაიჯანის თანამშრომლობის კონფერენციაზე მან განაცხადა, რომ სამუშაოები ოქტომბერში დაიწყება.

შესწავლა მოიცავს მარშრუტს, რომელიც ყირგიზეთს, უზბეკეთსა და თურქმენეთს კასპიის ზღვის გავლით აზერბაიჯანსა და საქართველოს უკავშირებს. შეფასების შედეგად გამოვლინდება გადაზიდვების დროს არსებული პრობლემები და განისაზღვრება მარშრუტის განვითარებისთვის საჭირო შემდგომი ნაბიჯები.

მამედოვმა ასევე ისაუბრა ერთობლივ საწარმოზე „Middle Corridor Multimodal“, რომელშიც ყაზახეთი, აზერბაიჯანი, საქართველო და ჩინეთი მონაწილეობენ. მისი განმარტებით, მომსახურების კოორდინაციისა და „ერთი ფანჯრის“ სისტემის მიზანია, ტვირთის მფლობელებს გადაზიდვების ორგანიზება გაუმარტივოს და საშუალება მისცეს, აკონტროლონ ტვირთის ადგილმდებარეობა და ტრანსპორტირების ეტაპი.

 

აზერბაიჯანმა ჩინურ DBN Group-თან აგროტექნოლოგიებში თანამშრომლობა განიხილა

10 ოქტომბერი

10 ოქტომბერს აზერბაიჯანის სოფლის მეურნეობის მინისტრის, მეჯნუნ მამედოვის ხელმძღვანელობით ჩინეთში მყოფი დელეგაცია პეკინში აგროტექნოლოგიური კომპანია „DBN Tech Group“-ს ეწვია. კომპანიის ხელმძღვანელობასთან შეხვედრაზე მხარეებმა აგრარულ სექტორში თანამშრომლობის შესაძლებლობები განიხილეს.

მამედოვმა კომპანიის წარმომადგენლებს აზერბაიჯანის აგრარული სექტორის განვითარების გეგმები გააცნო, მათ შორის 2026-2030 წლების სახელმწიფო პროგრამა. პროგრამა წარმოებისა და გადამუშავების განვითარებასა და უფრო პროდუქტიულ, კონკურენტუნარიან მოდელზე გადასვლას ითვალისწინებს. მინისტრმა ამ მიზნების მისაღწევად ჩინურ კომპანიებთან თანამშრომლობის მნიშვნელობა გამოყო და „DBN Tech Group“ აზერბაიჯანში ყოველწლიურ საერთაშორისო სასოფლო–სამეურნეო გამოფენაში „Caspian Agro“ მონაწილეობის მისაღებად მიიწვია.

სომხეთი

სომხეთის მარეგულირებელმა Huawei-სთან 5G-ის განვითარებისა და 6G-ის დანერგვის პერსპექტივები განიხილა

6 ოქტომბერი

6 ოქტომბერს სომხეთის საზოგადოებრივი მომსახურებების მარეგულირებელი კომისიის თავმჯდომარე, მესროპ მესროპიანი, ჩინური კომპანია „Huawei“-ს დელეგაციას შეხვდა. დელეგაციაში შედიოდნენ კომპანიის სომხეთის ოფისის ხელმძღვანელი ჟაო ჰონგბო, ახლო აღმოსავლეთისა და ცენტრალური აზიის რეგიონში სტრატეგიის დირექტორი და სხვა ექსპერტები.

კომპანიის წარმომადგენლებმა 5G-ის განვითარებისა და 6G-ის დანერგვის საერთაშორისო ტენდენციები და შესაძლებლობები წარადგინეს. მხარეებმა სატელეკომუნიკაციო სექტორის ტექნოლოგიური განახლებისა და ახალი თაობის საკომუნიკაციო ტექნოლოგიების გამოყენების საკითხები განიხილეს. კომისიის წარმომადგენლებმა დელეგაციას ამ მიმართულებით დაგეგმილი ნაბიჯები და პროგრამები გააცნეს. შეხვედრის დასასრულს მხარეები საერთო ინტერესის საკითხებზე პროფესიული დიალოგისა და თანამშრომლობის გაგრძელებაზე შეთანხმდნენ.

 

ერევანში ჩინური სიმღერის მესამე საუნივერსიტეტო კონკურსი გაიმართა

8 ოქტომბერი

8 ოქტომბერს რუსულ–სომხურ უნივერსიტეტში ჩინური სიმღერის მესამე საუნივერსიტეტო კონკურსი გაიმართა. ღონისძიება უნივერსიტეტის კონფუცის კლასისა და ვალერი ბრიუსოვის სახელობის სახელმწიფო უნივერსიტეტთან არსებული კონფუცის ინსტიტუტის ორგანიზებით, ჩინეთის საელჩოს მხარდაჭერით ჩატარდა.

კონკურსს ჩინეთის ელჩი ლი სინვეი და რუსულ–სომხური უნივერსიტეტის რექტორი ედვარდ სანდოიანი დაესწრნენ. ელჩის განცხადებით, სტრატეგიული პარტნიორობის დამყარების შემდეგ ორ ქვეყანას შორის საგანმანათლებლო და კულტურული თანამშრომლობა ღრმავდება.

ფინალურ ეტაპზე სომხეთის სხვადასხვა უნივერსიტეტის 18 სტუდენტი მონაწილეობდა. პირველი და მეორე ადგილები კომიტასის სახელობის ერევნის სახელმწიფო კონსერვატორიის სტუდენტებმა, ლილიტ ხერუნცმა და ანი კაზარიანმა დაიკავეს, მესამე ადგილი კი რუსულ–სომხური უნივერსიტეტის წარმომადგენელმა მილენა არაქელიანმა მოიპოვა. გამარჯვებულებს ჩინეთის საელჩოსგან პრიზები გადაეცათ.

ყირგიზეთი

ყირგიზეთმა ჩინეთთან დამაკავშირებელი რკინიგზის რეგიონულ მარშრუტებთან ინტეგრაცია განიხილა

8 ოქტომბერი

7-8 ოქტომბერს თურქმენბაშიში გამართულ რეგიონულ შეხვედრებზე ჩინეთ–ყირგიზეთ–უზბეკეთის რკინიგზის სხვა სატრანსპორტო მარშრუტებთან დაკავშირებისა და რეგიონისთვის მისი ეკონომიკური სარგებლის საკითხები განიხილეს.

7 ოქტომბერს ცენტრალური აზიის ქვეყნებისა და აზერბაიჯანის საგარეო საქმეთა მინისტრების შეხვედრაზე ყირგიზეთის საგარეო საქმეთა მინისტრის პირველმა მოადგილემ, ასეინ ისაევმა, სატრანსპორტო და ლოგისტიკური კავშირების გაფართოება პრიორიტეტად დაასახელა. ყურადღება დაეთმო რკინიგზის რეგიონის ქვეყნების ინფრასტრუქტურასა და კასპიის ზღვის გავლით მოქმედ მარშრუტებთან დაკავშირებას, რამაც საერთაშორისო ბაზრებზე წვდომა უნდა გააუმჯობესოს.

8 ოქტომბერს სახელმწიფოთა მეთაურების საკონსულტაციო შეხვედრაზე პროექტის მნიშვნელობაზე ყირგიზეთის პრეზიდენტმა, სადირ ჟაფაროვმაც ისაუბრა. მისი განცხადებით, რკინიგზამ რეგიონის ქვეყნების საერთაშორისო სატრანსპორტო და საწარმოო კავშირებში ჩართვის დამატებითი შესაძლებლობები უნდა შექმნას. ჟაფაროვმა თანამშრომლობის პრაქტიკულ მიზნებად გადაზიდვების ხარჯებისა და ტრანსპორტირების დროის შემცირება დაასახელა და აღნიშნა, რომ რეგიონული სატრანსპორტო პროექტებიდან ეკონომიკური სარგებლის მიღება თითოეულ ქვეყანას უნდა შეეძლოს.

 

ჩინეთი სამხრეთ კავკასიასა და ყირგიზეთში (5 – 11 ოქტომბერი) Read More »

პუტინის თანაშემწის ვიზიტი ჩინეთში: აშშ-რუსეთ-ჩინეთის ლიდერების სამმხრივი შეხვედრის პერსპექტივა

8 ოქტომბერს, რუსეთის პრეზიდენტის ვლადიმერ პუტინის თანაშემწე, ნიკოლაი პატრუშევი ჩინეთს ეწვია. რუსეთის დელეგაციაში წარმოდგენილნი იყვნენ სამთავრობო სააგენტოების, ლოგისტიკური კომპანიების, გემთმშენებელი, სამეცნიერო და საგანმანათლებლო ინსტიტუტების წარმომადგენლები. რუსეთის საინფორმაციო სააგენტოს ინფორმაციით, ვიზიტის მიზანია საზღვაო სექტორში თანამშრომლობის შესახებ მოლაპარაკებების წარმოება.

პეტრუშევი რუსეთის საზღვაო კოლეგიის თავმჯდომარეა. ამასთან, 2024 წლიდან, ის პუტინის თანაშემწის პოზიციას იკავებს. 2008-2024 წლებში, პეტრუშევი რუსეთის უსაფრთხოების საბჭოს მდივნის თანამდებობას იკავებდა.

ამერიკის პრეზიდენტ დონალდ ტრამპისა და ჩინეთის პრეზიდენტ სი ძინპინის შეხვედრის შემდეგ, პეტრუშევი არის პირველი მაღალი რანგის ოფიციალური პირი მოსკოვიდან, რომელიც პეკინს ეწვია. ამიტომ, ექსპერტები პეტრუშევთან მოლაპარაკებების ერთ-ერთ შესაძლო თემად ტრამპს, პუტინსა და სი ძინპინს შორის სამმხრივი შეხვედრის გამართვის საკითხს ასახელებენ.

რიგი გარემოებები მიანიშნებს, რომ ნოემბერში, ჩინეთის ქალაქ შენჟენში, აზია-წყნარი ოკეანის ეკონომიკური თანამშრომლობის (APEC) რეგიონული ფორუმის სამიტის ფარგლებში, ტრამპს, სი ძინპინსა და პუტინს შორის შესაძლოა სამმხრივი შეხვედრა გაიმართოს. 1 ოქტომბერს, პუტინმა შეხვედრის შესახებ კითხვას მიმღებლური ტონით უპასუხა და აღნიშნა, რომ ეს „უდავოდ შესაძლებელია.“

სამმხრივი შეხვედრის შესაძლებლობის შესახებ კომენტარი გააკეთა რუსეთში ჩინეთის ელჩმა, ჭანგ ჰანჰუიმ. მისი თქმით, მსგავსი შეხვედრა „ძალიან სასარგებლო იქნება“ „მულტიპოლარული მსოფლიოს განვითარებისა და ფორმირების მიმართ.“

პეტრუშოვის ჩინეთში ვიზიტი აჩვენებს, რომ მოსკოვსა და პეკინს შორის ურთიერთობები, უკრაინაში მიმდინარე ომის და დასავლეთის კრიტიკის მიუხედავად, ვითარდება. ამასთან, დონალდ ტრამპსა და სი ძინპინს შორის გამართული „კონსტრუქციული“ დიალოგის ფონზე, პეკინმა ვაშინგტონსა და კრემლს შორის შუამავლის როლი შეიძლება ითამაშოს.

 

წყარო: Kremlin aide visits China amid speculation about potential Xi-Putin-Trump meeting

პუტინის თანაშემწის ვიზიტი ჩინეთში: აშშ-რუსეთ-ჩინეთის ლიდერების სამმხრივი შეხვედრის პერსპექტივა Read More »

ევროპარლამენტი ჩინეთის მიმართ პოზიციას ამკაცრებს

7 ოქტომბერს, ევროპის პარლამენტში ჩინეთის შესახებ ანგარიშის კენჭისყრა გაიმართა. დოკუმენტს მხარი დაუჭირა 456-მა ევროპარლამენტარმა, 86-მა საწინააღმდეგო პოზიცია დააფიქსირა, ხოლო 110-მა თავი შეიკავა ხმის მიცემისგან. ანგარიში ევროკავშირ-ჩინეთის ურთიერთობების მიმდინარე დინამიკაში ცვლილებების მაუწყებელია, რამდენადაც მასში ჩინეთის წინააღმდეგ უფრო მკაცრი ქმედებებია გაწერილი.

მიუხედავად იმისა, რომ ანგარიში ჩინეთის მიმართ ევროკავშირის პოლიტიკაზე პირდაპირ გავლენას არ ახდენს, მისი ტონი პეკინის მიმართ ევროპის პოლიტიკის გამკაცრების ტენდენციას აჩვენებს. წინა ანგარიშებისგან განსხვავებით, ევროპარლამენტის მიერ მიღებულ დოკუმენტში ჩინეთი ევროკავშირის „სისტემურ მეტოქედ“ არის წარმოდგენილი. ამასთან, ანგარიში პეკინს ახასიათებს, როგორ უკრაინის ომში რუსეთის ქმედებების მხარდამჭერი. ამ მხრივ, ხაზგასმულია ჩინეთის მიერ რუსეთისთვის ორმაგი გამოყენების საქონლის მიწოდების და სანქციებისთვის გვერდის ავლის ხელშეწყობის პრაქტიკა.

ტაივანის საკითხთან დაკავშირებით ანგარიში ევროკავშირს მოუწოდებს, წევრ სახელმწიფოებსა და სხვა დემოკრატიულ პარტნიორებთან გააძლიეროს უსაფრთხოების კოორდინაცია, მათ შორის, საზღვაო ძალების განთავსება და ერთობლივი წვრთნების ჩატარება, რათა აზია-წყნარი ოკეანის რეგიონში რეგიონში სტაბილურობა გაძლიერდეს.

პეკინსა და ბრიუსელს შორის მიმდინარე სავაჭრო მოლაპარაკებების ფონზე, ანგარიშში აღნიშნულია, რომ ჩინეთის ჭარბი საწარმოო შესაძლებლობები საფრთხეს უქმნის ევროკავშირის სამრეწველო სექტორს, ხოლო სახალხო რესპუბლიკის ელექტრომობილების სექტორი ევროპის უსაფრთხოებისა და ეკონომიკისთვის „დიდ საფრთხეს“ წარმოადგენს.

ანგარიშის მიმართ ევროპარლამენტარების უმრავლესობის მხარდაჭერის მიუხედავად, პარლამენტში ჩინეთის შესახებ პოზიციები განსხვავდება. ცენტრისტული და მემარჯვენე დაჯგუფებები პეკინის წინააღმდეგ უფრო მკაცრი პოლიტიკის გატარების მომხრე არიან. მათი თვალსაზრისით, ჩინეთი არის სისტემური მეტოქე, რომელსაც ესმის არა დიპლომატიის, არამედ ძალის ენა.

მეორე მხრივ, სოციალისტური და მემარცხენე ჯგუფების წევრები ჩინეთთან დიალოგს უჭერენ მხარს. მათი აზრით, ევროკავშირ-ჩინეთის ურთიერთობები არ უნდა დაეფუძნოს ორბლოკიანი ბიპოლარული მსოფლიოს იდეას, რომელიც „სახიფათო“ და „არაპროდუქტიულია.“

ევროპარლამენტი ჩინეთის მიმართ პოზიციას ამკაცრებს Read More »

ახალი ნაბიჯი ევროკავშირ-ჩინეთის სავაჭრო მოლაპარაკებებში: შეხვედრა პეკინში

დღეს, 7 ოქტომბერს, ევროკავშირის ვაჭრობის საკითხებზე პასუხისმგებელი ოფიციალური პირები ჩინეთთან ორდღიანი ინტენსიური მოლაპარაკებებისთვის პეკინში გაემგზავრებიან. ევროკავშირის დელეგაციას ხელმძღვანელობს მაროშ შეფჩოვიჩი, ევროკომისარი ვაჭრობისა და ეკონომიკური უსაფრთხოების, ასევე ინტერინსტიტუციური ურთიერთობებისა და გამჭვირვალობის საკითხებში.

8-9 ოქტომბერს, ჩინეთისა და ევროკავშირის ე.წ. „ვაჭრობისა და ინვესტიციის კონსულტაციების“ ფარგლებში, შეფჩოვიჩი ჩინელ კოლეგას, ვან ვენტაოს შეხვდება. მოლაპარაკებები მიზნად ისახავს ჩინეთ-ევროკავშირის სავაჭრო ურთიერთობებში არსებული დისბალანსის აღმოფხვრას. ბოლო თვეებში, ევროკავშირის წევრებთან ვაჭრობაში ჩინეთის სავაჭრო პროფიციტი მნიშვნელოვნად გაიზარდა.

ჩინეთ-ევროკავშირის ურთიერთობები წევრი სახელმწიფოების მხრიდან რამდენიმე კრიტიკას აწყდება. კერძოდ, ჩინეთიდან იაფი იმპორტის ზრდის ფონზე, ევროპის ინდუსტრიულ ცენტრებში, მათ შორის, გერმანიაში, მწარმოებელი კომპანიების კონკურენტუნარიანობა მცირდება. შედეგად, ევროპული კომპანიები ჩინეთის კორპორაციების სათანადო კონკურენციას ვერ უწევენ, რის გამოც, ისინი ან იხურებიან, ან საქმიანობის მასშტაბს ამცირებენ. ამიტომ, ჩინეთიდან იმპორტის ზრდა პოტენციურად უმუშევრობის პრობლემასთან ასოცირდება.

კრიტიკოსები თვლიან, რომ ჩინეთის სახელმწიფო კაპიტალიზმის მოდელი და სახელმწიფო სუბსიდიების პრაქტიკა ევროკავშირის წარმოების სექტორს აზარალებს.

ჩინეთთან ვაჭრობის საკითხების მიმართ განსაკუთრებით მკაცრი პოზიციით გამოირჩევიან საფრანგეთი და გერმანია. 5 ოქტომბერს, გერმანიის კანცლერმა, ფრიდრიხ მერცმა და საფრანგეთის პრეზიდენტმა, ემანუელ მაკრონმა ხელი მოაწერეს დოკუმენტს, რომელიც საგარეო ვაჭრობის რეგულაციის მიმართულებით ახალი მექანიზმის შემოღებას ითვალისწინებს. ინიციატივა გულისხმობს საგანგებო ინსტრუმენტის გამოყენებას იმ ქვეყნების ან კომპანიების წინააღმდეგ, რომლებიც ევროპის ბაზარზე უსამართლო სავაჭრო პრაქტიკას ახორციელებენ. ექსპერტთა შეფასებით, ინსტრუმენტი ევროკავშირს მისცემს შესაძლებლობას, საჭიროების შემთხვევაში, ჩინეთი ევროპის ბაზარს ჩამოაშოროს.

7 ოქტომბერს, ჩინეთის კომერციის მინისტრმა დააფიქსირა სამინისტროს იმედი, რომ საფრანგეთი და გერმანია თავს შეიკავებენ ევროკავშირის წაქეზებისგან, რომ ამ უკანასკნელმა პროტექციონისტულ ინსტრუმენტებს მიმართოს. სამინისტრომ მოუწოდა მხარეებს, არ მოახდინონ ეკონომიკური და სავაჭრო საკითხების პოლიტიზება.

მომავალ კვირას, ბრიუსელში, ევროკავშირის წევრი სახელმწიფოების ლიდერები შეხვდებიან ერთმანეთს. სწორედ აღნიშნულ შეხვედრაზე განიხილება პეკინთან მოლაპარაკებების შედეგებიც.

 

წყარო: South China Morning Post – ‘Last chance saloon: EU presses China for a sign to prove trade talks can work’

ახალი ნაბიჯი ევროკავშირ-ჩინეთის სავაჭრო მოლაპარაკებებში: შეხვედრა პეკინში Read More »

ჩინეთი სამხრეთ კავკასიასა და ტაჯიკეთში (21-27 სექტემბერი)

საქართველო

საქართველო შუა დერეფნის განვითარების ერთობლივ ინიციატივას შეუერთდა

22 სექტემბერი

22 სექტემბერს საქართველო ტრანსკასპიური საერთაშორისო სატრანსპორტო მარშრუტის განვითარების ერთობლივ ინიციატივას შეუერთდა. პეკინში, გლობალური მდგრადი ტრანსპორტის ფორუმის ფარგლებში გამართულ მაღალი დონის შეხვედრაში საქართველოს ეკონომიკისა და მდგრადი განვითარების მინისტრი მარიამ ქვრივიშვილი მონაწილეობდა.

ინიციატივა სატრანსპორტო პოლიტიკის კოორდინაციას, ინფრასტრუქტურის განვითარებას, საბაჟო და სასაზღვრო პროცედურების გაუმჯობესებასა და ციფრული სისტემების დანერგვას ითვალისწინებს. ქვრივიშვილმა დერეფნის გასწვრივ ინფრასტრუქტურული პროექტების უკეთ შეთანხმების საჭიროებაზეც ისაუბრა.

სიტყვით გამოსვლისას მინისტრმა საქართველოს ინფრასტრუქტურული გეგმები წარადგინა. მისი განცხადებით, 2032 წლამდე პრიორიტეტული პროექტებისთვის დაახლოებით 7 მილიარდი აშშ დოლარია გათვალისწინებული. მიზანი საზღვაო და სარკინიგზო ქსელების გამტარუნარიანობის გაორმაგება და აეროპორტების შესაძლებლობების გასამმაგებაა. ქვრივიშვილმა შუა დერეფნის განვითარებისთვის ანაკლიის ღრმაწყლოვანი პორტის მნიშვნელობასაც გაუსვა ხაზი.

საქართველო და ჩინეთი ვაჭრობის ხელშეწყობის სამუშაო ჯგუფს შექმნიან

22 სექტემბერი

22 სექტემბერს საქართველოს ეკონომიკისა და მდგრადი განვითარების მინისტრი მარიამ ქვრივიშვილი ჩინეთის კომერციის მინისტრის მოადგილეს, ლინგ ძის შეხვდა. შეხვედრაზე მხარეები ორმხრივი ვაჭრობის ხელშეწყობის ერთობლივი სამუშაო ჯგუფის შექმნაზე შეთანხმდნენ.

ჯგუფი პრიორიტეტულ სექტორებს განსაზღვრავს და მათ მიხედვით სავაჭრო მისიებს დაგეგმავს. მისი საქმიანობა ხელს შეუწყობს ჩინეთის ბაზარზე ქართული პროდუქციის წარდგენასა და ქართველი მწარმოებლების გამოფენებში მონაწილეობას. ჯგუფი ჩინეთიდან საქართველოში სავაჭრო მისიების ვიზიტებსაც მოამზადებს, რათა მათ ადგილობრივი საწარმოები გაიცნონ.

მხარეებმა ელექტრონული კომერციის სფეროში თანამშრომლობა და შუა დერეფნისთვის ანაკლიის პორტის მნიშვნელობაც განიხილეს. ლინგ ძიმ ქვრივიშვილი 2027 წლის პირველ ნახევარში სავაჭრო-ეკონომიკური თანამშრომლობის ერთობლივი კომისიის სხდომის ჩასატარებლად ჩინეთში მიიწვია.

„Air China“ საქართველოსთან ახალი საჰაერო კავშირების შესაძლებლობებს შეისწავლის

22 სექტემბერი

22 სექტემბერს მარიამ ქვრივიშვილმა „Air China“-ს პრეზიდენტთან, ცუ გუანგძსთან, საქართველოსა და ჩინეთს შორის საჰაერო მიმოსვლის გაფართოება განიხილა. ეკონომიკის სამინისტროს ინფორმაციით, შეხვედრაზე საუბარი პეკინიდან პირდაპირი ფრენის დანიშვნის შესაძლებლობას შეეხო.

მხარეები შეთანხმდნენ, რომ ავიაკომპანია ჩინეთის სხვა ქალაქებიდან საქართველოს მიმართულებით ფრენების დაწყებასაც შეისწავლის. სამინისტრომ შეხვედრის შესახებ ცნობაში მგზავრთა რაოდენობის ზრდაზეც მიუთითა. უწყების მონაცემებით, 2026 წლის იანვარ-აგვისტოში ჩინურმა ავიაკომპანიებმა ორ ქვეყანას შორის პირდაპირი რეისებით 85 669 მგზავრი გადაიყვანეს, რაც წინა წლის შესაბამის პერიოდზე 31%-ით მეტია.

საქართველომ და ჩინეთმა სატრანსპორტო სამუშაო ჯგუფის შექმნა განიხილეს

23 სექტემბერი

23 სექტემბერს მარიამ ქვრივიშვილი ჩინეთის ტრანსპორტის მინისტრს, ლიუ ვეის შეხვდა და სატრანსპორტო თანამშრომლობის კოორდინაციისთვის ერთობლივი სამუშაო ჯგუფის შექმნის შესაძლებლობა განიხილა. ჯგუფში სარკინიგზო, საზღვაო, საავტომობილო და სამოქალაქო ავიაციის სფეროების შესაბამისი უწყებები და ორგანიზაციები გაერთიანდებიან, თუ მხარეები მის ჩამოყალიბებაზე შეთანხმდებიან.

შეხვედრაზე განსაკუთრებული ყურადღება ანაკლიის ღრმაწყლოვან პორტს, რკინიგზის მოდერნიზაციასა და მოძრავი შემადგენლობის განახლებას დაეთმო. მხარეებმა თბილისი-პეკინისა და თბილისი-კუანგჭოუს პირდაპირი საჰაერო მიმართულებების განვითარების შესაძლებლობებზეც იმსჯელეს. სამინისტროს ცნობით, საჰაერო კავშირების გაფართოების ხელშესაწყობად ორი ქვეყნის სამოქალაქო ავიაციის უწყებებს შორის თანამშრომლობის გაგრძელებაზე შეთანხმდნენ.

აზერბაიჯანი

აზერბაიჯანმა და ჩინეთმა საავტომობილო გადაზიდვების შეთანხმება წარადგინეს

22 სექტემბერი

22 სექტემბერს პეკინში აზერბაიჯანისა და ჩინეთის წარმომადგენლებმა საერთაშორისო საავტომობილო გადაზიდვების შესახებ სამთავრობათაშორისო შეთანხმების დოკუმენტები გაცვალეს. ღონისძიება მდგრადი ტრანსპორტის გლობალური ფორუმის ფარგლებში, ტრანსკასპიური საერთაშორისო სატრანსპორტო მარშრუტისადმი მიძღვნილ მაღალი დონის შეხვედრაზე გაიმართა.

აზერბაიჯანის დელეგაციას ვიცე-პრემიერი შაჰინ მუსტაფაევი ხელმძღვანელობდა. მუსტაფაევმა შუა დერეფნის მნიშვნელობაზე, ჩინეთთან სატვირთო გადაზიდვების გაზრდასა და სატრანზიტო შესაძლებლობების გაფართოებაზე ისაუბრა. ვიზიტის ფარგლებში დელეგაცია ჩინური კომპანიების ხელმძღვანელებსაც შეხვდა. მხარეებმა აზერბაიჯანში მიმდინარე პროექტები, ენერგეტიკისა და განახლებადი ენერგიის სფეროებში თანამშრომლობის გაფართოება და ახალი ერთობლივი პროექტების შესაძლებლობები განიხილეს.

ალიევმა ჩინურ კომპანიებთან ხელოვნური ინტელექტის სფეროში თანამშრომლობა განიხილა

24 სექტემბერი

24 სექტემბერს ბაქოში აზერბაიჯანის პრეზიდენტი ილჰამ ალიევი ჩინური კომპანიების, „01.AI“-სა და „Sinovation Ventures“-ის აღმასრულებელ დირექტორს, კაი-ფუ ლის, შეხვდა. შეხვედრას იტალიური „TEHA Group“-ის წარმომადგენელი ფილიპო მალინვერნოც დაესწრო.

მხარეებმა მწვანე ენერგეტიკაში, კიბერუსაფრთხოებასა და განათლებაში ხელოვნური ინტელექტის პრაქტიკული გამოყენება და შესაბამის კომპანიებთან თანამშრომლობის შესაძლებლობები განიხილეს. ყურადღება დაეთმო აზერბაიჯანის 2025-2028 წლების ხელოვნური ინტელექტის სტრატეგიასაც. ალიევმა ჩინეთთან და იტალიასთან ეკონომიკური კავშირები გამოყო და აღნიშნა, რომ ორივე ქვეყნის ბიზნესის წარმომადგენლები აზერბაიჯანში ინვესტიციებს ახორციელებენ.



ბაირამოვმა გაეროში ჩინეთის გლობალური განვითარების ინიციატივას მხარდაჭერა გამოუცხადა

25 სექტემბერი

25 სექტემბერს ნიუ-იორკში აზერბაიჯანის საგარეო საქმეთა მინისტრმა ჯეიჰუნ ბაირამოვმა ჩინეთის გლობალური განვითარების ინიციატივის მეხუთე წლისთავისადმი მიძღვნილ მაღალი დონის შეხვედრაზე ისაუბრა. ღონისძიება გაეროს გენერალური ასამბლეის 81-ე სესიის ფარგლებში გაიმართა.

მინისტრმა ინიციატივა გაეროს 2030 წლის მდგრადი განვითარების მიზნების განხორციელების მნიშვნელოვან მექანიზმად შეაფასა და აზერბაიჯან-ჩინეთის ყოვლისმომცველი სტრატეგიული პარტნიორობა გამოყო.

ბაირამოვმა ყურადღება შუა დერეფნის განვითარებასა და ჩინეთსა და ევროპას შორის გადაზიდვებში აზერბაიჯანის როლზეც გაამახვილა. მისი განცხადებით, მარშრუტის მოდერნიზაცია სავაჭრო ხარჯების შემცირებასა და განვითარებადი ქვეყნებისთვის ბაზრებზე წვდომის გაფართოებას ემსახურება. მინისტრმა ამ ქვეყნებს შორის ტექნოლოგიებისა და რესურსების გაცვლის მხარდასაჭერად თანამშრომლობის გაძლიერების მზადყოფნაც დაადასტურა.

სომხეთი

ჩინეთის პრემიერმა სომხეთთან თანამშრომლობის გაღრმავების მზადყოფნა გამოთქვა

21 სექტემბერი

21 სექტემბერს ჩინეთის პრემიერმა, ლი ციანმა, სომხეთის პრემიერ-მინისტრ ნიკოლ ფაშინიანს დამოუკიდებლობის 35-ე წლისთავი მიულოცა და ორმხრივი თანამშრომლობის გაღრმავების მზადყოფნა გამოთქვა. წერილში მან სომხეთი ჩინეთის სტრატეგიულ პარტნიორად მოიხსენია.

ლი ციანმა ყურადღება „ერთი სარტყელი, ერთი გზა“ ინიციატივის ფარგლებში თანამშრომლობის განვითარებაზე გაამახვილა. მისი განცხადებით, მზად არის ფაშინიანთან ერთად იმუშაოს, რათა ორ ქვეყანას შორის თანამშრომლობა გაღრმავდეს და უფრო პრაქტიკული შინაარსი შეიძინოს.

 

 

ჩინეთის საპარლამენტო დელეგაციამ სომხეთში თანამშრომლობის გაფართოება განიხილა

22 სექტემბერი

22 სექტემბერს ერევანში სომხეთის პარლამენტის თავმჯდომარე, რუბენ რუბინიანი, სრულიად ჩინეთის სახალხო წარმომადგენელთა კრების საგარეო საქმეთა კომიტეტის თავმჯდომარესა და ჩინეთ-სომხეთის მეგობრობის ჯგუფის ხელმძღვანელს, ლოუ ცინძიანს, შეხვდა.

შეხვედრაზე მხარეებმა ორმხრივი ურთიერთობების განვითარებაზე, საპარლამენტო თანამშრომლობაზე და განათლების, კულტურისა და ვაჭრობის სფეროებში კავშირების გაძლიერებაზე იმსჯელეს.

იმავე დღეს ჩინეთის დელეგაცია სომხეთის პარლამენტის საგარეო ურთიერთობათა კომიტეტის წევრებსაც შეხვდა. კომიტეტის თავმჯდომარემ, სარგის ხანდანიანმა, ჩინეთის ბაზარზე სომხური პროდუქციის უფრო ფართოდ წარმოდგენის შესაძლებლობებზე გაამახვილა ყურადღება. ლოუ ცინძიანმა სომხეთს „ერთი ჩინეთის“ პრინციპის მხარდაჭერისთვის მადლობა გადაუხადა და განაცხადა, რომ ჩინეთი სომხეთის სუვერენიტეტსა და ტერიტორიულ მთლიანობას პატივს სცემს.

ჩინეთის ელჩმა ტექნოლოგიურ და ტურისტულ თანამშრომლობაზე ისაუბრა

24 სექტემბერი

24 სექტემბერს გამოქვეყნებულ ინტერვიუში ჩინეთის ელჩმა სომხეთში, ლი სინვეიმ, ხელოვნური ინტელექტის, ციფრული ეკონომიკისა და მაღალი ტექნოლოგიების სფეროებში თანამშრომლობის პერსპექტივებზე ისაუბრა. NEWS.am-სა და Armenpress-თან საუბრისას მან აღნიშნა, რომ ორი ქვეყნის შესაბამისი უწყებები ამ მიმართულებებით თანამშრომლობის გაღრმავების საკითხებს განიხილავენ.

ელჩი ტურიზმსა და პირდაპირ ავიაკავშირებსაც შეეხო. მისი განცხადებით, ერევან-ურუმჩის მიმართულებით კვირაში ექვსი რეისი სრულდება, რაც მოქალაქეთა მიმოსვლას ამარტივებს. ლი სინვეის შეფასებით, ტურისტული ნაკადების ზრდამ მომავალში ფრენების რაოდენობის გაზრდა და ავიაბილეთების გაიაფებაც შეიძლება განაპირობოს.

ტაჯიკეთი

ტაჯიკურ-ჩინურმა სამთო კომპანიამ მეტალურგიული საწარმო გააფართოვა

21 სექტემბერი

21 სექტემბერს ტაჯიკეთის პრეზიდენტმა, ემომალი რაჰმონმა, ქალაქ ისტიკლოლში „ტაჯიკურ-ჩინური სამთო კომპანიის“ მეტალურგიული საწარმოს მეორე ეტაპი გახსნა. ახალი საწარმო ადგილობრივი ნედლეულის გადამუშავებასა და უფრო მაღალი ღირებულების პროდუქციის გამოშვებაზეა გათვლილი. ოფიციალური ინფორმაციით, მასში 250 ადგილობრივი და უცხოელი თანამშრომელი დასაქმდება.

საწარმოს წლიური სიმძლავრე 30 ათასი ტონა გაწმენდილი ტყვიის, 1 000 ტონა სპილენძის შემცველი შუალედური პროდუქტის, 40 ტონა ვერცხლისა და 100 კილოგრამი ოქროს წარმოებას ითვალისწინებს. ნედლეული ზარნისორის საბადოდან მიეწოდება, ხოლო პროდუქცია შიდა ბაზართან ერთად ექსპორტისთვისაც არის განკუთვნილი. რაჰმონმა საწარმოსთან მინერალების შემდგომი გადამუშავების საამქროებისგან შემდგარი ტექნოლოგიური პარკის შექმნაც მოითხოვა.

ტაჯიკეთის სახელმწიფო მართვის აკადემიამ ჩინურ უნივერსიტეტთან მემორანდუმი გააფორმა

21 სექტემბერი

21 სექტემბერს ჩინეთის ქალაქ ლანჯოუში ტაჯიკეთის პრეზიდენტთან არსებულმა სახელმწიფო მართვის აკადემიამ და ლანჯოუს ტექნოლოგიურმა უნივერსიტეტმა ურთიერთგაგებისა და თანამშრომლობის მემორანდუმი გააფორმეს. ტაჯიკურ დელეგაციას აკადემიის რექტორი, დავრონ საფარზოდა, ხელმძღვანელობდა. დოკუმენტი განათლების, სამეცნიერო კვლევებისა და აკადემიური გაცვლების სფეროებში თანამშრომლობას ითვალისწინებს.

მემორანდუმის ფარგლებში დაგეგმილია სტუდენტებისა და ლექტორების გაცვლა, სასწავლო პროგრამები, სტაჟირებები და ცენტრალური აზიისა და რეგიონული ეკონომიკის საკითხებზე ერთობლივი კვლევები. მოლაპარაკებებისას მხარეებმა ტაჯიკი საჯარო მოხელეებისთვის მოკლევადიანი სასწავლო კურსებისა და ერთობლივი საგანმანათლებლო პროგრამის შექმნაც განიხილეს. აკადემიამ ასევე შესთავაზა სამეცნიერო პროექტი, რომელიც 2027 წელს ორ ქვეყანას შორის დიპლომატიური ურთიერთობების დამყარების 35 წლისთავს მიეძღვნება.

 

ტაჯიკეთმა სინძიანში ექსპორტისა და სამრეწველო თანამშრომლობის გაფართოება განიხილა

24 სექტემბერი

24 სექტემბერს ურუმჩიში ტაჯიკეთის ეკონომიკური განვითარებისა და ვაჭრობის მინისტრის მოადგილე, რუხშონა ნასრიდდინზოდა, დელეგაციასთან ერთად სინძიან-უიღურის ავტონომიური რაიონის შესაბამისი უწყებების წარმომადგენლებს შეხვდა. მოლაპარაკებების ერთ-ერთი მთავარი საკითხი ჩინეთში გასატანი ტაჯიკური პროდუქციის ჩამონათვალის გაფართოება იყო.

მხარეებმა განიხილეს სანიტარიული და ფიტოსანიტარიული მოთხოვნები, პროდუქციის სტანდარტიზაცია და სერტიფიცირება, ასევე ვაჭრობის შემაფერხებელი ფაქტორების აღმოფხვრა. საუბარი შეეხო ლოგისტიკური ცენტრების შექმნასა და განახლებას, სატვირთო გადაზიდვების ეფექტიანობის გაზრდასა და განახლებად ენერგეტიკაში ინვესტიციების მოზიდვასაც. სამინისტროს ინფორმაციით, შეხვედრის შედეგად მომზადდა ტაჯიკეთსა და სინძიანს შორის სავაჭრო-ეკონომიკური თანამშრომლობის ქვეკომისიის მომდევნო სხდომის დღის წესრიგი.

იმავე დღეს ნასრიდდინზოდა სინძიანის სახალხო წარმომადგენელთა კრების მუდმივი კომიტეტის თავმჯდომარის მოადგილეს, ლი ნინპინსაც, შეხვდა. ამ შეხვედრაზე ყურადღება გამახვილდა კრიტიკულად მნიშვნელოვანი მინერალების გადამამუშავებელი ერთობლივი საწარმოების შესაქმნელად ჩინური ინვესტიციების მოზიდვაზე. მხარეებმა განიხილეს წარმოების სრული ჯაჭვის განვითარება, ნედლეულის გადამუშავებიდან საბოლოო პროდუქციის გამოშვებამდე, და თანამშრომლობის გაფართოება ფორმატში „ცენტრალური აზია-ჩინეთი“.

ჩინეთი სამხრეთ კავკასიასა და ტაჯიკეთში (21-27 სექტემბერი) Read More »

CRRG-ის ვაგონები თბილისის მეტროში: შესაძლო რისკები და გამოწვევები

კვლევაში იხილავთ თუ როგორ გაიმარჯვა თბილისის მეტროს ვაგონების შესყიდვის ტენდერში კომპანია „ჯი-თი გრუპმა“, რომელიც მერიას ჩინური სახელმწიფო კომპანია CRRC-ის პროდუქციას მიაწვდის. 

კვლევის შედეგად დადგინდა, რომ:

🔴 „ჯი-თი გრუპის” მეწილეები და თანამშრომლები წლების განმავლობაში სოლიდურ თანხებს სწირავდნენ „ქართულ ოცნებას”

🔴 სატენდერო პირობები საეჭვოდ ჰგავს კონკრეტულ კომპანიაზე მორგებულს – ჩეხურმა მხარემ ტენდერი სწორედ ამის გამო გაასაჩივრა

🔴 CRRC საერთაშორისოდ ასოცირდება, კორუფციულ სკანდალებთან, უიღურთა იძულებით შრომასთან თუ ევროკავშირისა და აშშ-ის სანქციებთან

🔴 კომპანია პირდაპირ არის დაქვემდებარებული ჩინეთის კომუნისტურ პარტიას –  რაც კრიტიკული ინფრასტრუქტურის შემთხვევაში დამატებით უსაფრთხოების რისკებს ქმნის

CRRG-ის ვაგონები თბილისის მეტროში: შესაძლო რისკები და გამოწვევები Read More »

ჩინეთი სამხრეთ კავკასიასა და უზბეკეთში (14-20 სექტემბერი)

საქართველო

საქართველოს ელჩი ნინგსია ხუეის რეგიონის დელეგაციას შეხვდა

14 სექტემბერი

14 სექტემბერს ჩინეთში საქართველოს ელჩმა, პაატა კალანდაძემ, ნინგსია ხუეის ავტონომიური რეგიონის საგარეო საქმეთა ოფისის დელეგაციასთან შეხვედრა გამართა. დელეგაციას ოფისის დირექტორი, პაი იუჭენი ხელმძღვანელობდა.

საქართველოს საელჩოს ინფორმაციით, მხარეებმა თანამშრომლობის შემდგომი გაღრმავების შესაძლებლობები განიხილეს. შეხვედრა მას შემდეგ გაიმართა, რაც საქართველომ და ჩინეთმა ურთიერთობები ყოვლისმომცველი სტრატეგიული პარტნიორობის დონეზე აიყვანეს. პრეზიდენტებმა ეს გადაწყვეტილება დიპლომატიური ურთიერთობების 34-ე წლისთავზე, 2026 წლის 9 ივნისს, წერილების გაცვლით გამოაცხადეს.

შანხაიში ქართული ღვინის პოპულარიზაციის ახალი კამპანია დაიწყო

16 სექტემბერი

16 სექტემბერს შანხაიში ქართული ღვინის ეროვნულმა სააგენტომ მარკეტინგული და სადეგუსტაციო ღონისძიებების პროგრამა წარადგინა, რომელიც ჩინელ მომხმარებლებს შორის ქართული ღვინის ცნობადობის გაზრდასა და ბაზარზე მისი პოზიციების განმტკიცებას ისახავს მიზნად.

დეგუსტაციაზე ქართული მარნების წარმომადგენლებმა მშრალი და ნახევრად ტკბილი წითელი და თეთრი ღვინოები, ასევე ცქრიალა და ქარვისფერი ღვინოები წარადგინეს. სტუმრებს მარნების ისტორია და საქართველოს მეღვინეობის რეგიონების თავისებურებებიც გააცნეს.

კამპანიის გახსნის ღონისძიება შანხაის სასტუმრო „W“-ში სააგენტოს პარტნიორმა, „Dragon Trail International“-მა გამართა. ღონისძიებას მედიის წარმომადგენლები, ბლოგერები და ღვინის ავტორი დენის ლინი დაესწრნენ. აღნიშნულის შესახებ ინფორმაციას ჩინური გამოცემა „Gourmet Talks” აქვეყნებს.

აზერბაიჯანი

აზერბაიჯანმა და ჩინეთმა უსაფრთხოების სფეროში თანამშრომლობის შეთანხმება გააფორმეს

14 სექტემბერი

14 სექტემბერს აზერბაიჯანის სახელმწიფო უსაფრთხოების სამსახურმა და ჩინეთის საზოგადოებრივი უსაფრთხოების სამინისტრომ უსაფრთხოების სფეროში თანამშრომლობის შეთანხმება გააფორმეს.

დოკუმენტს ხელი ჩინეთის ძიანსუს პროვინციის ქალაქ ლიანიუნგანგში, სამსახურის უფროსის, გენერალ–პოლკოვნიკ ალი ნაგიევისა და ჩინეთის საზოგადოებრივი უსაფრთხოების მინისტრის, ვანგ სიაოხუნის შეხვედრის შემდეგ მოეწერა. მხარეებმა ტერორიზმის, ტრანსნაციონალური ორგანიზებული დანაშაულისა და სატელეკომუნიკაციო სისტემების გამოყენებით ჩადენილი თაღლითობის წინააღმდეგ თანამშრომლობის გაღრმავება განიხილეს.

ჩინეთის სამინისტროს მიწვევით ჩასული აზერბაიჯანული დელეგაცია საზოგადოებრივი უსაფრთხოების სფეროში თანამშრომლობის მეხუთე გლობალურ ფორუმშიც მონაწილეობდა. ღონისძიებაზე განიხილეს საერთაშორისო პარტნიორობის გაძლიერება, უსაფრთხოების სფეროში ახალი ტექნოლოგიების გამოყენება და მართვის მექანიზმების გაუმჯობესება. ასევე, მიიღეს ტერორიზმის წინააღმდეგ გლობალური ბრძოლის 2026 წლის სამოქმედო გეგმაც. ორმხრივ შეხვედრაზე ნაგიევმა და ვანგმა ინფორმაციის ოპერატიული გაცვლისა და უსაფრთხოების უწყებებს შორის კავშირების განვითარების მნიშვნელობაც აღნიშნეს.

 

აზერბაიჯანის თავდაცვის მინისტრმა ჩინელ კოლეგასთან სამხედრო თანამშრომლობა განიხილა

15 სექტემბერი

15 სექტემბერს ჩინეთში სამუშაო ვიზიტის ფარგლებში აზერბაიჯანის თავდაცვის მინისტრი, გენერალ–პოლკოვნიკი ზაქირ ჰასანოვი, ჩინეთის თავდაცვის მინისტრს, ადმირალ დონგ ძიუნს, შეხვდა. მხარეებმა სამხედრო და სამხედრო–ტექნიკური თანამშრომლობის, ასევე სამხედრო განათლების სფეროში ურთიერთობების არსებული მდგომარეობა და განვითარების პერსპექტივები განიხილეს. საუბარი საერთაშორისო უსაფრთხოებისა და სტაბილურობის საკითხებსაც შეეხო.

ვიზიტისას ჰასანოვმა ჩინეთის აეროკოსმოსური მეცნიერებისა და მრეწველობის კორპორაციის, „CASIC“-ის, საწარმოც მოინახულა და მის მიერ წარმოებული თავდაცვითი სისტემები დაათვალიერა. 16 სექტემბერს მინისტრი პეკინის მე-13 სიანგშანის ფორუმის გახსნას დაესწრო. თავდაცვის სამინისტროს ცნობით, საერთაშორისო უსაფრთხოების საკითხებზე გამართულ ღონისძიებაში ასზე მეტი ქვეყნის თავდაცვის უწყებების წარმომადგენლები, საერთაშორისო ორგანიზაციები და ექსპერტები მონაწილეობდნენ. ფორუმი 17 სექტემბრამდე გაგრძელდა.

 

ბაქოში ჩინეთის TRACECA-ში შესაძლო გაწევრიანება განიხილეს

17 სექტემბერი

17 სექტემბერს ბაქოში აზერბაიჯანის საგარეო საქმეთა მინისტრმა, ჯეიჰუნ ბაირამოვმა, და „TRACECA“-ს მთავრობათაშორისი კომისიის მუდმივი სამდივნოს გენერალურმა მდივანმა, ჯასურბეკ ჩორიევმა, ორგანიზაციაში ჩინეთისა და პაკისტანის შესაძლო გაწევრიანების საკითხი განიხილეს.

„TRACECA“-ს განცხადებით, საუბარი ევროპა–კავკასია–აზიის სატრანსპორტო დერეფნის გეოგრაფიული მოცვის გაფართოებასა და ახალი პარტნიორების ჩართვის პერსპექტივებს შეეხო. შეხვედრაზე მხარეებმა შუა დერეფნის განვითარებაზე, სატრანზიტო გადაზიდვების ზრდასა და მიწოდების ვადების შემცირებაზეც იმსჯელეს. შეხვედრაზე ასევე განიხილეს ბაქოსა და ტაშკენტში კომპეტენციის ცენტრების შექმნის, მრავალმხრივი სანებართვო სისტემის დანერგვისა და ვაჭრობის გასამარტივებლად ციფრული ინსტრუმენტების განვითარების ინიციატივები.

 

აზერბაიჯანის რკინიგზამ ჩინეთიდან შვიდი სატვირთო ლოკომოტივი მიიღო

18 სექტემბერი

18 სექტემბერს „აზერბაიჯანის რკინიგზამ“, „ADY“-მ, ბაქოში ჩინეთში წარმოებული შვიდი ახალი „AC50“-ის ტიპის სატვირთო ლოკომოტივი წარადგინა. კომპანიის ინფორმაციით, „CRRC Ziyang“-ის მიერ დამზადებული ლოკომოტივები საერთაშორისო სატრანსპორტო დერეფნებზე ტვირთების გადასაზიდად არის განკუთვნილი.

კომპანიაში აცხადებენ, რომ ახალი ტექნიკა უფრო მძიმე და გრძელი სატვირთო შემადგენლობების გადაადგილების შესაძლებლობას იძლევა. „ADY“-ს საზოგადოებასთან ურთიერთობის სამსახურის წარმომადგენლის, ბახთიარ ჰაჯიევის განცხადებით, პარკის განახლება შუა დერეფანში ტვირთებზე მოთხოვნისა და ჩინეთიდან აზერბაიჯანის მიმართულებით გაგზავნილი საკონტეინერო მატარებლების რაოდენობის ზრდას უკავშირდება.

სომხეთი

სომხეთის თავდაცვის მინისტრმა პეკინში სამხედრო თანამშრომლობის გაფართოება განიხილა

15 სექტემბერი

15 სექტემბერს სომხეთის თავდაცვის მინისტრი სურენ პაპიკიანი პეკინში ჩინეთის თავდაცვის მინისტრს, ადმირალ დონგ ძიუნს შეხვდა. მხარეებმა თავდაცვის სფეროში თანამშრომლობა და მისი განვითარების პერსპექტივები განიხილეს.

სომხეთის თავდაცვის სამინისტროს ინფორმაციით, მინისტრებმა განსაკუთრებული ყურადღება თანამშრომლობის ახალი მიმართულებების განვითარებასა და გრძელვადიან დაგეგმვას დაუთმეს. შეხვედრას ჩინეთში სომხეთის ელჩი ვაჰე გევორგიანიც დაესწრო.

პაპიკიანის ჩინეთში სამუშაო ვიზიტი 14 სექტემბერს დაიწყო. 16 სექტემბერს ის პეკინში სიანშანის მე-13 ფორუმის გახსნას დაესწრო, ხოლო 17 სექტემბერს ჩინეთის მსხვილი სამხედრო–სამრეწველო კომპანიების ხელმძღვანელებთან თანამშრომლობის საკითხები განიხილა. 18 სექტემბერს მინისტრი პეკინის ეროვნული თავდაცვის უნივერსიტეტსაც ეწვია. სამინისტროს განცხადებით, უნივერსიტეტის ხელმძღვანელობასთან შეხვედრაზე რამდენიმე შეთანხმებას მიაღწიეს, თუმცა მათი შინაარსი გამოქვეყნებულ ცნობაში არ დაკონკრეტებულა.

 

სომხეთში „ArCa-UnionPay“-ის ერთობლივი საბანკო ბარათები წარადგინეს

17 სექტემბერი

17 სექტემბერს სომხეთში სომხური გადახდის სისტემის, „ArCa“-ისა და ჩინური „UnionPay International“-ის ერთობლივი საბანკო ბარათების გამოშვების დაწყების ცერემონია გაიმართა. ღონისძიებას სომხეთის ცენტრალური ბანკის, ორივე გადახდის სისტემის, ჩინეთის საელჩოსა და ფინანსური სექტორის წარმომადგენლები დაესწრნენ.

ერთობლივი ბარათი სომხეთში „ArCa“-ს ინფრასტრუქტურით მომსახურებას, საზღვარგარეთ კი „UnionPay“-ის საერთაშორისო ქსელში გადახდების განხორციელებას ითვალისწინებს. „ArCa“-ს ხელმძღვანელის, ვარდან ხაჩატრიანის განცხადებით, ბარათების გამოშვება თანამშრომლობის პირველი ეტაპია და მომავალში სხვა მომსახურებების, მათ შორის სწრაფი ფულადი გადარიცხვების განვითარებაც იგეგმება. „UnionPay“-ის წარმომადგენელმა პარტნიორობა სომხეთის საგადახდო ბაზარზე კომპანიის საქმიანობის გაფართოების მნიშვნელოვან ნაბიჯად შეაფასა.

უზბეკეთი

ტაშკენტის ოლქის დელეგაციამ ჩინეთში სამრეწველო და ენერგეტიკული თანამშრომლობა განიხილა

15 სექტემბერი

15 სექტემბერს ჩინეთის ქალაქ ტიანძინში გამართულ უზბეკეთ–ჩინეთის ბიზნესფორუმში ორასზე მეტი, მთლიანობაში 300-ზე მეტი, მეწარმე მონაწილეობდა. უზბეკურ დელეგაციას ტაშკენტის ოლქის გუბერნატორი, ზოირ მირზაევი ხელმძღვანელობდა.

მონაწილეებმა ოლქის საინვესტიციო და საექსპორტო შესაძლებლობები, საწარმოო ბაზა და სატრანსპორტო ინფრასტრუქტურა განიხილეს. ფორუმის ფარგლებში გამართული შეხვედრების შედეგად სამი დოკუმენტი გაფორმდა. ვიზიტის ფარგლებში დელეგაციამ ჩინურ კომპანიებთან ქიმიური და ნავთობქიმიური წარმოების, ტექნოლოგიების ადგილობრივად დანერგვისა და განახლებადი ენერგეტიკის საკითხებზეც გამართა მოლაპარაკებები.

ჩინეთი სამხრეთ კავკასიასა და უზბეკეთში (14-20 სექტემბერი) Read More »

ჩინეთი სამხრეთ კავკასიასა და ყირგიზეთში (7-13 სექტემბერი)

საქართველო

მარიამ ქვრივიშვილმა COSCO-ს წარმომადგენელთან ანაკლიის პორტსა და შუა დერეფანზე იმსჯელა

7 სექტემბერი

7 სექტემბერს ბათუმში საქართველოს ეკონომიკისა და მდგრადი განვითარების მინისტრი მარიამ ქვრივიშვილი ჩინური საზღვაო–სატრანსპორტო კომპანია „COSCO SHIPPING Lines“-ის რეგიონულ მენეჯერს, ჩენ ჰუაფენგს შეხვდა.

შეხვედრაზე განსაკუთრებული ყურადღება ანაკლიის ღრმაწყლოვანი პორტის პროექტს დაეთმო. მხარეებმა ასევე განიხილეს შუა დერეფნის განვითარების პერსპექტივები, საქართველოს სატრანზიტო შესაძლებლობები, სატრანსპორტო და ლოგისტიკური ინფრასტრუქტურის განვითარების გეგმები და საზღვაო გადაზიდვებში თანამშრომლობის გაღრმავება. მინისტრის განცხადებით, 2032 წლისთვის ქვეყნის სტრატეგიულ სატრანსპორტო და ლოგისტიკურ ინფრასტრუქტურაში 7 მილიარდი დოლარის ინვესტიცია იგეგმება.

შეხვედრა საქართველოს საერთაშორისო საზღვაო ფორუმის ფარგლებში გაიმართა. მას საქართველოს რკინიგზის, ანაკლიის საზღვაო ნავსადგურისა და საზღვაო ტრანსპორტის სააგენტოს ხელმძღვანელებიც ესწრებოდნენ.

გაგა კირკიტაძემ ჩინეთში უსაფრთხოებისა და სამართალდამცავი თანამშრომლობის საკითხები განიხილა

10 სექტემბერი

საქართველოს შინაგან საქმეთა მინისტრის მოადგილემ, გაგა კირკიტაძემ, დელეგაციასთან ერთად მონაწილეობა მიიღო გლობალური საზოგადოებრივი უსაფრთხოების თანამშრომლობის ფორუმში, რომელიც 8-10 სექტემბერს ჩინეთის ქალაქ ლიენიუნკანგში გაიმართა.

ღონისძიებაზე სხვადასხვა ქვეყნის სამართალდამცავი უწყებებისა და საერთაშორისო ორგანიზაციების წარმომადგენლებმა უსაფრთხოების სფეროში თანამშრომლობის საკითხები განიხილეს. ფორუმის ფარგლებში კირკიტაძე დაესწრო ქვეფორუმებსაც, რომლებიც ნარკოტიკების კონტროლის მიმართულებით საერთაშორისო თანამშრომლობასა და საპოლიციო განათლებას ეხებოდა.

ჩინეთში ვიზიტისას კირკიტაძე საზოგადოებრივი უსაფრთხოების მინისტრის მოადგილეს, ლინგ ჭიფენგს შეხვდა. შსს–ის ინფორმაციით, მხარეებმა საქართველოსა და ჩინეთის სამართალდამცავ უწყებებს შორის თანამშრომლობის მიმდინარე და სამომავლო მიმართულებებზე ისაუბრეს. კირკიტაძემ ჩინელ კოლეგას საქართველოს შინაგან საქმეთა სამინისტროს საქმიანობის ძირითადი მიმართულებები გააცნო, შეხვედრის მონაწილეებმა კი ერთმანეთს პროფესიული გამოცდილება და პრაქტიკა გაუზიარეს.

საქართველო CIFTIS-ის გამოფენაზე ეროვნული პავილიონით პირველად წარდგა

10 სექტემბერი

საქართველომ პეკინში გამართულ მომსახურებით ვაჭრობის ჩინეთის საერთაშორისო გამოფენაში, „CIFTIS 2026“-ში, ეროვნული პავილიონით პირველად მიიღო მონაწილეობა. 10 სექტემბერს გამოფენას საქართველოს ეკონომიკისა და მდგრადი განვითარების მინისტრის მოადგილე, ირაკლი ნადარეიშვილი დაესწრო.

ნადარეიშვილმა ქართულ პავილიონში პეკინის ვიცე-მერს, თანგ ვენხუნგს, უმასპინძლა და საქართველოს საინვესტიციო შესაძლებლობები და ბიზნესგარემო გააცნო. პავილიონის ექსპოზიცია საქართველოს საექსპორტო შესაძლებლობებს, შუა დერეფანში ქვეყნის როლს, სატრანსპორტო და ლოგისტიკურ ინფრასტრუქტურას, ტექნოლოგიურ სექტორს, ტურიზმსა და მეღვინეობას მოიცავდა.

საქართველოს მონაწილეობა ინვესტიციების სააგენტომ საელჩოს, ტურიზმის ეროვნული ადმინისტრაციისა და ღვინის ეროვნული სააგენტოს მხარდაჭერით მოაწყო. სამინისტროს ინფორმაციით, გამოფენაზე 90 ქვეყანა, რეგიონი და საერთაშორისო ორგანიზაცია, ასევე 1 800-ზე მეტი კომპანია იყო წარმოდგენილი.

აზერბაიჯანი

ჩინეთის კომუნისტური პარტიის დელეგაციამ ბაქოში პოლიტიკური და ეკონომიკური თანამშრომლობა განიხილა

8 სექტმებერი

8 სექტემბერს ბაქოში აზერბაიჯანის პრემიერ–მინისტრი ალი ასადოვი ჩინეთის კომუნისტური პარტიის ცენტრალური კომიტეტის საერთაშორისო ურთიერთობების დეპარტამენტის ხელმძღვანელს, ლიუ ხაისინს, შეხვდა.

შეხვედრაზე მხარეებმა სავაჭრო, საინვესტიციო და განახლებადი ენერგეტიკის სფეროებში თანამშრომლობის პერსპექტივები განიხილეს. საუბარი შეეხო „სარტყლისა და გზის“ ინიციატივას, შუა დერეფანსა და „ზანგეზურის დერეფნის“ გახსნის მნიშვნელობასაც, რომელიც, მათი შეფასებით, რეგიონულ სატრანსპორტო კავშირებს გააძლიერებს.

იმავე დღეს ჩინეთის დელეგაცია მმართველი პარტიის, „ახალი აზერბაიჯანის“, თავმჯდომარის მოადგილესა და ცენტრალური აპარატის ხელმძღვანელს, თაჰირ ბუდაგოვს, შეხვდა. პარტიის მიერ გავრცელებული ინფორმაციით, მოლაპარაკებები პარტიებს შორის ვიზიტების, გამოცდილების გაცვლისა და თანამშრომლობის სამომავლო მიმართულებებს შეეხო. მხარეებმა ახალგაზრდების სახელმწიფო მართვასა და პარტიულ საქმიანობაში მონაწილეობის საკითხები და ამ მიმართულებით საგანმანათლებლო დაწესებულებებს შორის თანამშრომლობაც განიხილეს.

 

პეკინის მომსახურებით ვაჭრობის გამოფენაში ათი აზერბაიჯანული კომპანია მონაწილეობდა

13 სექტემბერი

9-13 სექტემბერს პეკინში გამართულ ჩინეთის მომსახურებით ვაჭრობის საერთაშორისო გამოფენაზე, „CIFTIS 2026“, აზერბაიჯანი ათი კომპანიით იყო წარმოდგენილი.

პავილიონში წარმოდგენილი იყო აზერბაიჯანის საინვესტიციო შესაძლებლობები, ბიზნესის მხარდაჭერის მექანიზმები და ინვესტორებისთვის შეთავაზებული შეღავათები. ცალკე ყურადღება დაეთმო ყარაბაღისა და აღმოსავლეთ ზანგეზურის ეკონომიკურ რეგიონებს, ალათის თავისუფალ ეკონომიკურ ზონასა და ინდუსტრიულ პარკებს.

სააგენტოს ინფორმაციით, მონაწილეობის მიზანი საერთაშორისო ბაზარზე აზერბაიჯანული მომსახურებების პოპულარიზაცია და ახალი ბიზნესპარტნიორების მოძიება იყო. პავილიონი ეკონომიკის სამინისტროს მხარდაჭერით, „AZPROMO“-სა და ჩინეთში აზერბაიჯანის სავაჭრო სახლის ორგანიზებით მოეწყო.

სომხეთი

ჩინური ავტომობილების სომხეთში მიწოდების შესახებ მემორანდუმი გაფორმდა

7 სექტემბერი

7 სექტემბერს ჩინეთის ქალაქ ჩენდუში ჩინეთ–სომხეთის რეგიონული განვითარების ფონდმა კომპანია „Guangzhou Guanghua Automotive Industry Holding“-თან თანამშრომლობის მემორანდუმი გააფორმა. დოკუმენტს ხელი ფონდის პრეზიდენტმა, სერგეი ავანესოვმა, და კომპანიის გენერალურმა მენეჯერმა, იან დევენმა, მოაწერეს.

მემორანდუმის მიხედვით, მხარეები სომხეთში ახალი და მეორადი ჩინური ავტომობილების ექსპორტის ორგანიზებაზე იმუშავებენ. თანამშრომლობა მოიცავს ავტომობილების შერჩევას, ტრანსპორტირებას, განბაჟებას, სერტიფიცირებასა და გაყიდვის შემდგომ მომსახურებას. საწყის ეტაპზე განსაზღვრულ ბრენდებს შორისაა BYD და Huawei-სთან თანამშრომლობით განვითარებული AITO. ფონდი ბანკებთან და სხვა ფინანსურ ინსტიტუტებთან ერთად სომეხი მყიდველებისთვის კრედიტის, ლიზინგისა და განვადების მექანიზმების შემუშავებასაც გეგმავს.

 

 

სომეხი ჟურნალისტი ჩინეთის საერთაშორისო მედიაგაცვლის პროგრამას შეუერთდა

8 სექტემბერი

სომხური საინფორმაციო სააგენტო „NEWS.am“-ის ჟურნალისტი დიანა არუშანიანი ჩინეთის საერთაშორისო პრესკომუნიკაციის ცენტრის, CIPCC-ის, პროგრამის მეორე ეტაპს შეუერთდა. პროგრამის გახსნის ცერემონია პეკინში გაიმართა.

პროგრამა ოთხი თვის განმავლობაში პეკინსა და ჩინეთის სხვადასხვა პროვინციაში მუშაობას, სასწავლო კურსებს, დისკუსიებსა და ადგილზე რეპორტაჟების მომზადებას ითვალისწინებს. მონაწილეები ჩინეთში მიმდინარე საზოგადოებრივ, პოლიტიკურ და კულტურულ მოვლენებს გაეცნობიან. დაგეგმილია მათი დასწრება საერთაშორისო ღონისძიებებზეც. ჩინეთის ჟენმინის უნივერსიტეტის ბაზაზე განხორციელებულ პროგრამაში 101 ქვეყნიდან 109 ჟურნალისტი მონაწილეობს.

ყირგიზეთი

ყირგიზეთის შს მინისტრმა ჩინეთში უსაფრთხოების საკითხებზე გამართულ შეხვედრაში მონაწილეობა მიიღო

7 სექტემბერი

7 სექტემბერს პეკინში ყირგიზეთის შინაგან საქმეთა მინისტრმა, ულან ნიაზბეკოვმა, „ცენტრალური აზია–ჩინეთის“ ფორმატში გამართულ მინისტრთა შეხვედრაში მიიღო მონაწილეობა. მონაწილეებმა ტრანსნაციონალური დანაშაულის, ტერორიზმის, ნარკოტიკებით უკანონო ვაჭრობისა და კიბერდანაშაულის წინააღმდეგ თანამშრომლობის საკითხები განიხილეს.

ყირგიზეთის შინაგან საქმეთა სამინისტროს ინფორმაციით, ნიაზბეკოვმა აღნიშნა, რომ სახელმწიფოებს შორის ეკონომიკური, სატრანსპორტო და ჰუმანიტარული კავშირების გაფართოება სამართალდამცავ ორგანოთა თანამშრომლობის გაძლიერებასაც მოითხოვს. მინისტრმა ინფორმაციის სწრაფი გაცვლის მნიშვნელობაზე გაამახვილა ყურადღება. შეხვედრაზე განიხილეს შანხაის თანამშრომლობის ორგანიზაციის ფარგლებში ურთიერთქმედება და სამართალდამცავი უწყებების თანამშრომელთა პროფესიული მომზადებაც.

ჩინეთი სამხრეთ კავკასიასა და ყირგიზეთში (7-13 სექტემბერი) Read More »

ჩინეთი სამხრეთ კავკასიასა და ყაზახეთში (31 აგვისტო – 6 სექტემბერი)

საქართველო

თბილისის შემოვლითი გზის მონაკვეთს ჩინური კომპანია 499 მილიონ ლარად ააშენებს

1 სექტემბერი

თბილისის შემოვლითი მაგისტრალის წიწამური–ავჭალის 7,3-კილომეტრიან მონაკვეთს ჩინური კომპანია „China Railway Tunnel Group“ ააშენებს. საავტომობილო გზების დეპარტამენტის მიერ გამოცხადებულ საერთაშორისო ტენდერში კომპანია გამარჯვებულად 1 სექტემბერს გამოცხადდა.

კონტრაქტის ღირებულება დაახლოებით 499,1 მილიონი ლარია, სამუშაოების დასრულებისთვის კი 36 თვეა განსაზღვრული. პროექტი ოთხზოლიანი გზის, დაახლოებით 3,4 კილომეტრის სიგრძის ორი პარალელური გვირაბის, ხიდებისა და სატრანსპორტო კვანძების მშენებლობას მოიცავს.

ტენდერში ათი კომპანია მონაწილეობდა. გამარჯვებული კომპანიის თავდაპირველი შეთავაზება 519,7 მილიონ ლარს შეადგენდა, თუმცა საბოლოო სახელშეკრულებო ღირებულება შემცირდა. წიწამური–ავჭალის მონაკვეთი მომავალში ავჭალა–აეროპორტის 22,5-კილომეტრიან გზას დაუკავშირდება.

მიხეილ ყაველაშვილმა ჩინეთის ყოფილი ელჩი ოქროს საწმისის ორდენით დააჯილდოვა

2 სექტემბერი

2 სექტემბერს მიხეილ ყაველაშვილმა საქართველოში ჩინეთის ყოფილი ელჩი, ჭოუ ციენი, ორ ქვეყანას შორის ურთიერთობების გაღრმავებაში შეტანილი პირადი წვლილისა და საქმიანობისთვის ოქროს საწმისის ორდენით დააჯილდოვა.

ყაველაშვილმა ყოფილი ელჩის დიპლომატიური მისიის პერიოდში ორმხრივი ურთიერთობების განვითარებაზე გაამახვილა ყურადღება და საქართველო–ჩინეთის ყოვლისმომცველი სტრატეგიული პარტნიორობის შემდგომი გაღრმავების იმედი გამოთქვა.

ჯილდო ჭოუ ციენის სახელით ჩინეთის საელჩოს საქმეთა დროებითმა რწმუნებულმა, ტაი ჩუნიუნგმა მიიღო. საელჩოს ცნობით, მან ქართულ მხარეს მადლობა გადაუხადა და განაცხადა, რომ საელჩო გააგრძელებს ორი ქვეყნის ლიდერებს შორის მიღწეული შეთანხმებების განხორციელებასა და პრაქტიკული თანამშრომლობის გაძლიერებაზე მუშაობას.

საქართველოს ელჩმა „Cathay Pacific“-თან თანამშრომლობის საკითხები განიხილა

3 სექტემბერი

3 სექტემბერს ჩინეთში საქართველოს ელჩმა, პაატა კალანდაძემ, ავიაკომპანია „Cathay Pacific“-ის დელეგაციას უმასპინძლა. საქართველოს საელჩოს ინფორმაციით, შეხვედრაზე მხარეებმა ავიაკომპანიის საქართველოსთან თანამშრომლობის საკითხები განიხილეს.

დელეგაციას მიხაელ სიონგი ხელმძღვანელობდა, რომელიც ჩინეთის ძირითად ტერიტორიაზე კომპანიის გენერალური მენეჯერია. „Cathay Pacific“ ჰონგ–კონგში 80 წლის წინ დაარსდა. საქართველოს საელჩოს შეფასებით, კომპანია მსოფლიოში ერთ–ერთი ყველაზე მსხვილი და წარმატებული ავიაგადამზიდია.

აზერბაიჯანი

აზერბაიჯანმა და ჩინეთმა პროკურატურებს შორის თანამშრომლობის მემორანდუმი გააფორმეს

31 აგვისტო

31 აგვისტოს ბაქოში აზერბაიჯანის გენერალურმა პროკურორმა, ქამრან ალიევმა, და ჩინეთის უმაღლესი სახალხო პროკურატურის გენერალურმა პროკურორმა, ინ იუნმა, თანამშრომლობის მემორანდუმი გააფორმეს.

დოკუმენტი სისხლის სამართლის საქმეებზე სამართლებრივი დახმარების გაძლიერებას, პროკურორების გამოცდილების გაცვლას, სასწავლო პროგრამებსა და ერთობლივი სემინარების ორგანიზებას ითვალისწინებს. მხარეებმა ტრანსნაციონალურ დანაშაულთან ბრძოლისა და კიბერუსაფრთხოების საკითხებიც განიხილეს.

ვიზიტის ფარგლებში ჩინეთის დელეგაცია აზერბაიჯანის პარლამენტის თავმჯდომარეს, საჰიბა გაფაროვას, და უზენაესი სასამართლოს თავმჯდომარეს, ინამ ქარიმოვს, შეხვდა. 2 სექტემბერს დელეგაციას პრეზიდენტმა ილჰამ ალიევმაც უმასპინძლა. შეხვედრაზე საკანონმდებლო, სამართალდამცავ და სასამართლო ინსტიტუტებს შორის თანამშრომლობა აზერბაიჯან–ჩინეთის ყოვლისმომცველი სტრატეგიული პარტნიორობის ერთ–ერთ მიმართულებად განიხილეს.

ბაქოს საინჟინრო უნივერსიტეტის 37 სტუდენტი სწავლას ჩინეთში გააგრძელებს

31 აგვისტო

31 აგვისტოს ბაქოს საინჟინრო უნივერსიტეტის 37 სტუდენტი ჩინეთში, პეკინის ქიმიური ტექნოლოგიის უნივერსიტეტში სწავლის გასაგრძელებლად გაემგზავრა. სტუდენტების გამგზავრება ორი უნივერსიტეტის ერთობლივი ორმაგი დიპლომის პროგრამის ფარგლებში განხორციელდა.

სტუდენტები 2026-2027 სასწავლო წლიდან საბაკალავრო პროგრამის მესამე და მეოთხე კურსებს პეკინში გაივლიან. პროგრამა, რომლის განხორციელებაც 2025 წელს დაიწყო, „2+2“ მოდელს ეფუძნება: სტუდენტები პირველ ორ წელს ბაქოში სწავლობენ, მომდევნო ორს კი პეკინში.

სწავლება ექვს მიმართულებას მოიცავს: ქიმიურ, კომპიუტერულ და მექანიკურ ინჟინერიას, ქიმიას, ბიოტექნოლოგიასა და ბიზნესის ადმინისტრირებას. პროგრამის მოთხოვნების შესრულების შემთხვევაში, კურსდამთავრებულები ორივე უნივერსიტეტის დიპლომს მიიღებენ.

სომხეთი

ფაშინიანმა ჩინეთთან სტრატეგიული ურთიერთობები სომხეთის საგარეო პოლიტიკის კონტექსტში განიხილა

1 სექტემბერი

1 სექტემბერს, ყირგიზეთის დედაქალაქ ბიშკეკში გამართულ შანხაის თანამშრომლობის ორგანიზაციის „SCO+“ ფორმატის შეხვედრაზე, სომხეთის პრემიერ–მინისტრმა ნიკოლ ფაშინიანმა ჩინეთთან სტრატეგიულ ურთიერთობებზე ისაუბრა.

მან ჩინეთი იმ სახელმწიფოებს შორის დაასახელა, რომლებთანაც სომხეთმა ბოლო წლებში სტრატეგიული კავშირები დაამყარა, და ეს თანამშრომლობა ქვეყნის დაბალანსებული საგარეო პოლიტიკის კონტექსტში განიხილა. ფაშინიანის განმარტებით, სხვადასხვა ძალასთან ურთიერთობების განვითარება სომხეთის სუვერენიტეტისა და დამოუკიდებლობის შენარჩუნებას ემსახურება.

გამოსვლისას სომხეთის პრემიერ–მინისტრმა რეგიონული სატრანსპორტო კავშირების გახსნაზეც გაამახვილა ყურადღება და განაცხადა, რომ სომხეთი აზერბაიჯანთან და თურქეთთან ამ მიმართულებით მუშაობს, მათ შორის, „TRIPP“-ის პროექტის ფარგლებში. მისი თქმით, ამ კავშირების ამოქმედება როგორც აღმოსავლეთ–დასავლეთის, ისე სამხრეთ–ჩრდილოეთის მიმართულებით ახალ სატრანსპორტო შესაძლებლობებს შექმნის.

ყაზახეთი

ყაზახეთს განვითარების ბანკის სათავო ოფისის მასპინძლობა სურს

1 სექტემბერი

1 სექტემბერს, ბიშკეკში გამართულ შანხაის თანამშრომლობის ორგანიზაციის სამიტზე, ყაზახეთის პრეზიდენტმა, ყასიმ–ჟომართ თოყაევმა, ჩინეთის ინიციატივას ორგანიზაციის განვითარების ბანკის შექმნის შესახებ მხარი დაუჭირა. მან ბანკის სათავო ოფისის ყაზახეთში განთავსების მზადყოფნაც გამოთქვა.

ტოყაევის განცხადებით, ბანკის ფინანსური რესურსები, უპირველესად, ინფრასტრუქტურული, ტექნოლოგიური და სამრეწველო პროექტების დაფინანსებას უნდა მოხმარდეს. პრეზიდენტმა ეკონომიკური თანამშრომლობის გასაფართოებლად საზღვრისპირა სავაჭრო ზონების შექმნა და სატრანზიტო გადაზიდვების ერთიანი ციფრული პლატფორმის დანერგვაც შესთავაზა წევრ სახელმწიფოებს. მან ასევე ორგანიზაციის სატრანსპორტო კავშირების განვითარების სტრატეგიის 2035 წლამდე შემუშავების აუცილებლობაზე ისაუბრა.

 

თოყაევმა ჩინეთთან თანამშრომლობის პრიორიტეტებად ლოგისტიკა და ტექნოლოგიები დაასახელა

1 სექტემბერი

1 სექტემბერს გავრცელებულ წერილობით ინტერვიუში ყაზახეთის პრეზიდენტმა, ყასიმ–ჟომართ თოყაევმა, ჩინეთთან თანამშრომლობაში შუა დერეფნის მნიშვნელობაზე გაამახვილა ყურადღება. ჩინურ საინფორმაციო სააგენტო „Xinhua-სთვის“ მიცემულ ინტერვიუში მან სატრანსპორტო და ტექნოლოგიური თანამშრომლობის პერსპექტივები განიხილა.

თოყაევმა ახალი სარკინიგზო ხაზების, ლოგისტიკური ტერმინალებისა და სასაზღვრო ინფრასტრუქტურის განვითარების მნიშვნელობა გამოყო. მისი განცხადებით, მარშრუტის კონკურენტუნარიანობის გასაზრდელად საჭიროა დოკუმენტების ციფრული დამუშავება, საინფორმაციო სისტემების კოორდინაცია და საბაჟო პროცედურების ავტომატიზაცია.

პრეზიდენტმა ჩინურ კომპანიებთან თანამშრომლობის შესაძლო მიმართულებებად ხელოვნური ინტელექტი, წარმოების ავტომატიზაცია, ელექტრონული კომერცია, სამეცნიერო კვლევები და კადრების მომზადება დაასახელა. შანხაიში მანამდე გამართულ შეხვედრებზე საუბრისას მან აღნიშნა, რომ ამ სფეროებში ერთობლივი პროექტების განხორციელების მიმართ ორმხრივი ინტერესი გამოიკვეთა. თოყაევის შეფასებით, ტექნოლოგიური თანამშრომლობა ყაზახეთ–ჩინეთის ურთიერთობების ერთ–ერთ მნიშვნელოვან მიმართულებად შეიძლება იქცეს.

ჩინეთი სამხრეთ კავკასიასა და ყაზახეთში (31 აგვისტო – 6 სექტემბერი) Read More »

Scroll to Top