Civicidea

საქმოქალაქო ორგანიზაციების ერთობლივი განცხადება

კორუფციის მხილების ნაცვლად, ანტიკორუფციული ბიურო სამოქალაქო საზოგადოებას დევნის

ამბები / /

სანამ „ქართული ოცნება” აგრძელებს საქართველოს საჯარო ინსტიტუტებისა და სახელმწიფო რესურსების მიტაცებას, ქვეყნის ანტიკორუფციული მექანიზმები გამოიყენება არა იმისთვის, რომ ამხილოს და პასუხი აგებინოს კორუფციაში მონაწილე მაღალჩინოსნებს, არამედ იმისთვის, რომ კიდევ ერთი დარტყმა მიაყენონ დამოუკიდებელ, ქართულ  სამოქალაქო საზოგადოების ორგანიზაციებს. 

დამოუკიდებელი მონიტორინგის თანახმად, 2013 წლიდან მოყოლებული, კომპანიებმა, რომლებიც დაკავშირებულნი არიან „ქართული ოცნების“ მაღალჩინოსნებთან და პარტიის დამფუძნებელთან, ბიძინა ივანიშვილთან, სახელმწიფო ტენდერებში გამარჯვების შედეგად 3.28 მილიარდ ლარზე მეტი მიიღეს. მათ შორის, 2020–2024 წლებში სახელმწიფო ტენდერებით 1.028 მილიარდი ლარი მიენიჭათ კომპანიებს, რომლებიც დაკავშირებულნი არიან მმართველი პარტიის დონორებთან, ხოლო მათივე შემოწირულობების ოდენობამ 7.7 მილიონი ლარი შეადგინა.

სახელმწიფო ტენდერებთან დაკავშირებული კორუფციული ქმედებები მრავალმხრივია და მოიცავს არაკონკურენტულ შესყიდვებსა და გამარტივებულ ტენდერებს, რომლებიც მიკერძოებულია მმართველ პარტიასთან დაახლოებული კომპანიების სასარგებლოდ, ასევე დასაქმების პროგრამებს, რომლებიც ფორმალურად მიზნად ისახავს მოწყვლადი მოქალაქეების მხარდაჭერას, მაგრამ რეალურად საჯარო სახსრებს მმართველი პარტიის ვიწრო-პარტიული ინტერესების მიღწევისკენ მიმართავს, პარტიული კადრების არაფორმალურ ქსელების დაფინანსების გზით. ასევე  ნიშანდობლივია, საჯარო მოხელეთა არაპირდაპირი, გაუმჭვირვალე ქონებრივი გარიგებები, მათ შორის არაერთი დადასტურებული შემთხვევა დაუფიქსირებელი ქონების შესახებ. 2024–2025 წლებში მხოლოდ ამ ფორმით დაფიქსირდა 34 მილიონ ლარზე მეტი ღირებულების ქონების, მათ შორის, ნაღდი ფულის და უძრავი ქონების გადაცემა თანამდებობის პირებზე. ფორმალურად ეს ტრანზაქციები რეგისტრირდება როგორც საჩუქარი, თუმცა ფაქტობრივად წარმოადგენს ალტერნატიულ კორუფციულ მექანიზმს, რომელიც მიზნად ისახავს პოლიტიკური ლოიალობის შენარჩუნებას და გავლენების სისტემურ განაწილებას. ეს საკითხები არ არის ასახული ანტიკორუფციული ბიუროს 2023–2024 წლების ანგარიშებში, მიუხედავად იმისა, რომ ბიუროს კანონით ევალება თანამდებობის პირების ქონებრივი დეკლარაციების კონტროლი და საეჭვო გარიგებებზე რეაგირება.

ბიუროს მიერ წარდგენილი ანგარიშები ფორმალური ხასიათისაა, მათში არ ფიქსირდება არც ერთი ელიტური კორუფციის შემთხვევა, არც ინტერესთა შეუთავსებლობის ფაქტი და არც კონკრეტული ქონებრივი გარიგებების შეფასება. ასეთი  მიდგომა ცხადყოფს, რომ ბიურო რეალურად არ ახორციელებს პრევენციულ ან მაკონტროლებელ ფუნქციას, არამედ ემსახურება პოლიტიკური ანგარიშსწორების მიზნებს.

შედეგად, მიუხედავად იმისა, რომ „ქართული ოცნება“ საჯაროდ საუბრობს კორუფციასთან ბრძოლაზე, პრაქტიკაში, სახელმწიფო რესურსები მიტაცებულია პოლიტიკური ელიტის და მასთან დაახლოებული ბიზნესის მიერ, რომლებიც მდიდრდებიან გამჭვირვალობის, სამართლიანი კონკურენციისა და საჯარო ანგარიშვალდებულების იგნორირების  ხარჯზე.

ამავდროულად, სახელმწიფო ანტიკორუფციული ბიურო გამოიყენება დამოუკიდებელი სამოქალაქო საზოგადოების ორგანიზაციების დევნის ინსტრუმენტად. დამოუკიდებელ სამოქალაქო საზოგადოების ორგანიზაციებს ავალებენ  ბიუროს მიაწოდონ მოცულობითი ინფორმაცია, მათ შორის,  პირადი მონაცემები, 2024 წლიდან დღემდე შესრულებულ საქმიანობაზე, რაც უპრეცედენტო ჩარევაა სამოქალაქო სექტორის დამოუკიდებლობაში.

2025 წლის 4 სექტემბერს, ბიურომ დაიწყო 80-ზე მეტი არასამთავრობო ორგანიზაციის “მონიტორინგი”,  „გრანტების შესახებ კანონში” ამა წლის აპრილში მიღებული ცვლილებების ფარგლებში. აღნიშნული ცვლილებები ეწინააღმდეგება საქართველოს კონსტიტუციით გარანტირებულ გაერთიანების თავისუფლებას და არათანაბრად აზარალებს ადამიანის უფლებებსა და დემოკრატიულ ანგარიშვალდებულებზე მომუშავე ორგანიზახიებს. 

ეს ქმედებები ასახავს მზარდ ტენდენციას, რომლის პირობებშიც მიტაცებული სახელმწიფო აპარატი მიმართულია სამოქალაქო სექტორის საქმიანობის შეზღუდვაზე, ხოლო ხელისუფლების კორუმპირებული წარმომადგენლები ხელშეუხებლები რჩებიან. კონტროლი გარდაიქმნება რეპრესიად, რომელიც ნიღბად იყენებს სამართლიანობას. ასეთი შერჩევითი ქმედება ზღუდავს სამოქალაქო თავისუფლებებს, სპობს სამოქალაქო ორგანიზაციების შესაძლებლობს გამოთქვან დამოუკიდებელი აზრი ან ხელისუფლებას პასუხი  მოსთხოვონ კორუფციაზე ან სხვა სახის დანაშაულებზე, რაც პირდაპირ საფრთხეს უქმნის საქართველოს დემოკრატიულ მომავალს.

ყველასთვის ნათელია “ქართული ოცნების” ორმაგი სტანდარტი. მაშინ როდესაც “ქართულ ოცნების” მაღალჩინოსნები და მათთან ასოცირებული ბიზნესები კორუფციაშია გახვეული, “ქართული ოცნებისვე” შექმნილი ზედამხედველობის მექანიზმები მიმართულია მხოლოდ მათ წინააღმდეგ, ვინც კორუფციას ამხელს. ეს არ არის  ანტიკორუფციული პოლიტიკა — ეს კორუფციის და კორუფციული მექანიზმების დაცვის სქემაა, რომელითაც იდევნება კორუფციის მამხილებელი დამოუკიდებელი სამოქალაქო სექტორი.

ხელმომწერი ორგანიზაციები:

  1. ევროპის ფონდი

  2. საქართველოს ახალგაზრდა იურისტთა ასოციაცია

  3. საერთაშორისო გამჭვირვალობა – საქართველო 

  4. ადამიანის უფლებების განვითარების ფონდი

  5. ქალები საქართველოდან

  6. სამოქალაქო იდეა

  7. თანასწორობის მოძრაობა

  8. პრევენცია პროგრესისთვის

  9. ქალთა ინიციატივების მხარდამჭერი ჯგუფი                                 

  10. ადამიანის უფლებათა ცენტრი (HRC)

  11. ტოლერანტობის და მრავალფეროვნების ინსტიტუტი (TDI)

  12. საქართველოს მომავლის აკადემია

  13. თავისუფალ ჟურნალისტთა სახლი

  14. მხარდაჭერის და შესაძლებლობების განვითარების ცენტრი

  15. დემოკრატ მესხთა კავშირი

  16. საქართველოს რეგიონული გაძლიერების ფონდი

  17. ქართული მედია ჯგუფი

  18. მწვანე სექტორი

  19. სამოქალაქო მოძრაობა თავისუფლებისთვის

  20. დემოკრატიის კვლევის ინსტიტუტი

  21. უფლებები საქართველო

  22. საქართველოს ფსიქოსოციალური დახმარების ასოციაცია ნდობა

  23. პარტნიორობა ადამიანის უფლებებისთვის

  24. გრლზვეივ

  25. მედია ცენტრი კახეთი

  26. ასოციაცია “სოციალური ქოლგა”

  27. Მწვანე ალტერნატივა

  28. ჩართულობის და განვითარების ცენტრი

  29. ბათუმის დამოუკიდებელი ცხოვრების ცენტრი 

  30. წამების მსხვერპლთა ფსიქოსოციალური და სამედიცინო რეაბილიტაციის ცენტრი – GCRT

  31. ა(ა)იპ – ,,შეხვედრის ადგილი – დმანისი”

  32. ა(ა)იპ – ახალგაზრდა ფემინისტები

  33. მედიის ინსტიტუტი

  34. ა(ა)იპ რაჭის სათემო ორგანიზაცია

  35. საქართველოს დემოკრატიული ინიციატივა (GDI)

  36. ა(ა)იპ გორელ ფოტოგრაფთა კლუბი / ხელოვნების სახლი

  37. საქართველოს ევროპული ორბიტა

  38. სამოქალაქო ინტეგრაციი ფონდი

  39. მხარდაჭერის და შესაძლებლობის განვითარების ცენტრი

  40. ყვარლის ევროკლუბი

  41. პროფესიო – პიროვნული და პროფესიული განვითარების ცენტრი

  42. ლომეკი

  43. ეკონომიკური პოლიტიკის კვლევის ცენტრი

  44. მედიის განვითარების ფონდი (MDF)

  45. ინფორმაციის თავისუფლების განვითარების ინსტიტუტი (IDFI)

  46. სათემო ფონდი ლელი

  47. ლელიანის ზრდასრულთა განათლების ცენტრი

  48. სამოქალაქო საზოგადოების ფონდი

  49. საქართველოს სტრატეგიული კვლევებისა და განვითარების ცენტრი

  50. ევროპულ-ქართული ინსტიტუტი (EGI)

  51. საჯარო მოსამსახურეთა დამოუკიდებელი პროფესიული კავშირი -კონსტიტუციის 78-ე მუხლი

  52. თეთრიწყაროს ახალგაზრდული ცენტრი 

  53. ღია სივრცე კავკასია

კორუფციის მხილების ნაცვლად, ანტიკორუფციული ბიურო სამოქალაქო საზოგადოებას დევნის Read More »

აშშ-ჩინეთისსავაჭროშეთანხმება: ტარიფებისშემსუბუქება, FBI-ისვიზიტიდაფენტანილთანბრძოლისახალიეტაპი

ერთი ახალი ამბავი / /

პეკინსა და ვაშინგტონს შორის მიმდინარე დაძაბული მოლაპარაკებების შედეგად, ორმხრივი ურთიერთობები ახალ ფაზაში შევიდა. ოქტომბრის ბოლოს დონალდ ტრამპსა და სი ძინპინს შორის გამართული შეხვედრის შემდგომ, გაჩნდა ოპტიმისტური მოლოდინები, რომ ქვეყნებს შორის სავაჭრო ომი შენელდებოდა.

სი ძინპინთან შეხვედრის შემდეგ, პრეზიდენტმა ტრამპმა გამოაცხადა, რომ დაუყოვნებლივ გააუქმებდა იმ ტარიფების ნაწილს, რომლებიც მანამდე იყო დაწესებული ჩინურ საქონელზე. შედეგად, აშშ-სა და ჩინეთს შორის დაძაბულობა შედარებით შემცირდა.

თუმცა, ორმხრივი ურთიერთობების მომავალი კვლავ გაურკვეველია. სი ძინპინისა და ტრამპის შეხვედრის შემდეგ, აშშ-ის ოფიციალურ პირებს არ განუმარტავთ ჩინურ საქონელზე დაწესებული სხვა ტარიფები დარჩება თუ არა ძალაში. ბოლო თვეების განმავლობაში, ორივე ქვეყანა ემუქრებოდა ერთმანეთს 100%-ზე მეტი ტარიფების დაწესებით, რამაც გავლენა მოახდინა გლობალური მიწოდების ჯაჭვებზე და ინვესტორთა ნდობაზე.

ქვეყნებს შორის ურთიერთობების გადატვირთვის ტენდენციას აჩვენებს აშშ-ის გამოძიების ფედერალური ბიუროს (FBI) დირექტორის კრისტოფერ რეის ვიზიტი პეკინში. ამ იშვიათი ვიზიტის შედეგად, აღნიშნულ ქვეყნებს შორის სამართალდამცავ სფეროში უმაღლესი დონის კონტაქტი აღდგა.

გავრცელებული ინფორმაციით, რეი შეხვდა ჩინეთის საზოგადოებრივი უსაფრთხოებისა და საგარეო საქმეთა მაღალჩინოსნებს, რათა განეხილათ თანამშრომლობა ფენტანილის წარმოებაში გამოყენებადი საჭირო ქიმიკატების ექსპორტის შეზღუდვაზე – იმ ნივთიერებებზე, რომლებიც, აშშ-ის ხელისუფლების თქმით, ამძაფრებს ოპიოიდურ კრიზისს ამერიკაში. გავრცელებული ინფორმაციით, FBI-ის დირექტორი პეკინში ორი დღით იმყოფებოდა: შაბათს დახურულ შეხვედრებს დაესწრო და ჩინეთი კვირას, დილით დატოვა.

შეხვედრებზე მხარეები შეთანხმდნენ FBI-სა და ჩინეთის საზოგადოებრივი უსაფრთხოების სამინისტროს შორის ერთობლივი სამუშაო მექანიზმის შექმნაზე, რომელიც მიზნად ისახავს მონაცემთა გაცვლის გაუმჯობესებას, ქიმიური ექსპორტის მონიტორინგსა და კონტრაბანდული ქსელების წინააღმდეგ ოპერაციების კოორდინაციას.

ჩინეთის მხარემ განაცხადა, რომ შეხვედრები იყო „კონსტრუქციული“ და პეკინი მზადაა გააღრმავოს ანტინარკოტიკული თანამშრომლობა. რეის ვიზიტი ანალიტიკოსებმა შეაფასეს, როგორც ნდობის აღდგენის მცდელობა, რომელიც მიზნად ისახავს დაძაბულობის შემცირებას.

ამავდროულად, შანხაიში გამართულ ჩინეთის საერთაშორისო იმპორტის გამოფენაზე შტატების წარმომადგენლებმა განაცხადეს, რომ მათ უჩნდებათ იმედი, რომ სავაჭრო ომის ყველაზე მწვავე პერიოდი დასრულდება. ამერიკულმა კომპანიებმა, სოფლის მეურნეობის ექსპორტიორებიდან დაწყებული ტექნოლოგიური მწარმოებლებით დამთავრებული, წარმოადგინეს თავიანთი პროდუქცია და გამოთქვეს იმედი, რომ სავაჭრო კავშირები მალე უფრო თავისუფლად ამოქმედდება.

სავაჭრო ურთიერთობებში ახალი ფაზის დაწყება არც ერთი მხარის გამარჯვებად არ უნდა იქნას განხილული. ტარიფებთან დაკავშირებული შეთანხმება წარმოადგენს პრაგმატულ პაუზას განგრძობად კონფლიქტში, რომელმაც მნიშვნელოვნად შეცვალა გლობალური ვაჭრობის დინამიკა. ყოვლისმომცველი შეთანხმების გარეშე, მიმდინარე სტაბილური სავაჭრო ურთიერთობები შეიძლება დროებითი აღმოჩნდეს.

ავტორი: ნია კოხრეიძე

აშშ-ჩინეთისსავაჭროშეთანხმება: ტარიფებისშემსუბუქება, FBI-ისვიზიტიდაფენტანილთანბრძოლისახალიეტაპი Read More »

ჩინეთი სამხრეთ კავკასიასა და ყაზახეთში(3-9 ნოემბერი)

კვირის ამბავი / /

საქართველო

ირაკლი კობახიძე ლი ციანს შეხვდა

4 ნოემბერი

2025 წლის 4 ნოემბერს, საქართველოს პრემიერ-მინისტრი შანხაიში ჩინეთის სახალხო რესპუბლიკის პრემიერ-მინისტრ ლი ციანს შეხვდა.

შეხვედრაზე ლი ციანმა ხაზი გაუსვა ორ ქვეყანას შორის 2023 წელს დამყარებული სტრატეგიული პარტნიორობის მნიშვნელობას და აღნიშნა, რომ ჩინეთი მზად არის, გააღრმავოს თანამშრომლობა სავაჭრო-ეკონომიკურ სფეროში, განსაკუთრებით კი „ერთი სარტყელი, ერთი გზის“ ინიციატივის ფარგლებში.

კობახიძემ დაადასტურა, რომ საქართველო ჩინეთს სტრატეგიულ პარტნიორად მიიჩნევს, მტკიცედ იცავს „ერთი ჩინეთის“ პრინციპს და მხარს უჭერს ჩინეთის გლობალურ ინიციატივებს.

შეხვედრის ბოლოს, პრემიერებმა ხელი მოაწერეს ორმხრივი თანამშრომლობის დოკუმენტებს ისეთ სფეროებში, როგორიცაა: ვაჭრობა, სოფლის მეურნეობა, ავიაცია, კულტურა, გარემოს დაცვა და, განსაკუთრებით, ხელოვნური ინტელექტი (AI).

შეხვედრა შანხაის მერთან

5 ნოემბერი

2025 წლის 5 ნოემბერს, საქართველოს პრემიერ-მინისტრი ირაკლი კობახიძე შანხაის მერს, კუნგ ჭენგს, ჩინეთის საერთაშორისო იმპორტის გამოფენის (CIIE) ფარგლებში შეხვდა.

პრემიერ-მინისტრმა კობახიძემ ხაზი გაუსვა ეკონომიკური თანამშრომლობის უპირატეს მნიშვნელობას და აღნიშნა, რომ მთავრობის მიზანია ორმხრივ ურთიერთობებში ხელშესახები პრაქტიკული შედეგების მიღწევა. შანხაის მერი დაეთანხმა ამ პოზიციას და აღნიშნა, რომ თბილისისა და შანხაის დამეგობრებული ქალაქების სტატუსი ხელს შეუწყობს პრაგმატული და ორმხრივად სასარგებლო თანამშრომლობის გაღრმავებას.

აღსანიშნავია, რომ 2024 წელს თბილისსა და შანხაის შორის გაფორმდა შეთანხმება,  რომელიც ითვალისწინებდა თანამშრომლობას ისეთ სფეროებში, როგორიცაა სპორტი, კულტურა, ურბანული განვითარება, ტრანსპორტი და გამწვანება.

ირაკლი კობახიძე ჩინეთის საერთაშორისო იმპორტის მე-8 გამოფენის (CIIE) გახსნის ცერემონიაზე

5 ნოემბერი

შანხაიში ჩატარებულ ჩინეთის საერთაშორისო იმპორტის გამოფენაში მონაწილეობდა 155 ქვეყანა, რეგიონი და საერთაშორისო ორგანიზაცია, 4,108 უცხოური კომპანია. მათ შორის საპატიო ქვეყნების სტატუსით მონაწილეობენ ტაილანდი, არაბთა გაერთიანებული საამიროები, ნიგერია, საქართველო, შვედეთი და კოლუმბია.

საქართველოს მთავრობის გვერდზე გამოქვეყნებული პოსტიდან დასტურდება, რომ 2025 წლის 5 ნოემბერს, საქართველოს პრემიერ-მინისტრმა ირაკლი კობახიძემ ჩინეთის სახალხო რესპუბლიკის პრემიერ ლი ციანთან ერთად ჩინეთის იმპორტის საერთაშორისო გამოფენაზე (CIIE) საქართველოს საგამოფენო სივრცე გახსნა.

ჩინეთში საქართველოს ელჩმა, პაატა კალანდაძემ განაცხადა, რომ CIIE  ქართული პროდუქციის ჩინურ ბაზარზე უფრო ფართო წვდომის შესაძლებლობას იძლევა.

ელჩის განცხადებით, ჩინეთის უზარმაზარი და საინტერესო ბაზარი ფართო პერსპექტივებს იძლევა ისეთი ქართული პროდუქტებისთვის, როგორიცაა ღვინო, მინერალური წყლები და თაფლი. მან ასევე ხაზი გაუსვა, რომ ორმხრივ ვაჭრობას მნიშვნელოვნად უწყობს ხელს თავისუფალი ვაჭრობის შეთანხმება (FTA) და გასულ წელს დაწესებული უვიზო რეჟიმი, რაც აძლიერებს როგორც ტურისტულ, ისე საქმიან კავშირებს.

ვან ი-ს შეხვედრა საქართველოს საგარეო საქმეთა მინისტრთან

7 ნოემბერი

2025 წლის 7 ნოემბერს საქართველოს საგარეო მინისტრსა და ჩინეთის კომუნისტური პარტიის ცენტრალური კომიტეტის პოლიტბიუროს წევრს და საგარეო საქმეთა მინისტრს შორის გაიმართა მოლაპარაკებები. ორ მხარეს შორის მოლაპარაკებები პეკინში ოფიციალური ვიზიტის ფარგლებში შედგა.

ვანგ ი-ს მიხედვით საქართველო ჩინეთისთვის არის პირველი ქვეყანა ევრაზიის რეგიონში და უმნიშვნელოვანესი სტრატეგიული პარტნიორი ამიერკავკასიაში, რომელმაც თავისუფალი სავაჭრო შეთანხმება გააფორმა ჩინეთთან. მინისტრის განცხადების თანახმად, ჩინეთის მხარე მზად არის გააგრძელოს ურთიერთთანამშრომლობა საქართველოსთან და გააღრმავოს საქართველოსა და ჩინეთს შორის ურთიერთობები.

ასევე, ვანგ იმ აღნიშნა, რომ ჩინეთი მზად არის საქართველოსთან გააძლიეროს სტრატეგიული ურთიერთობა, გააფართოვოს თანამშრომლობა ვაჭრობისა და კულტურული გაცვლების სფეროებში და ხელი შეუწყოს “სარტყლისა და გზის” ინიციატივის მაღალი ხარისხით განხორციელებას.

განსაკუთრებული ყურადღება დაეთმო კავკასიის რეგიონის სტრატეგიულ მნიშვნელობას. ამ კონტექსტში, ხაზგასმით აღინიშნა საქართველოს გამორჩეული როლი შუა დერეფნის განვითარებაში.

საქართველოს საგარეო საქმეთა მინისტრმა ხაზგასმით აღნიშნა, რომ საქართველო მოელის თავისუფალი ვაჭრობის შეთანხმების განახლებული ვერსიის სწრაფად ამოქმედებას, რათა ქართულ პროდუქტებს ჩინეთის ბაზარზე შესვლის მეტი შესაძლებლობა მიეცეს. ასევე, შეხვედრაზე აღინიშნა, რომ საქართველოს ხელისუფლება ურყევად უჭერს მხარს „ერთი ჩინეთის“ პრინციპს და მზად არის ნებისმიერ პლატფორმაზე დააფიქსიროს თავისი მხარდაჭერა ჩინეთის მიმართ.

აზერბაიჯანი

აზერბაიჯანის სახელმწიფო ეკონომიკური უნივერსიტეტი და პეკინის უცხო ენების უნივერსიტეტი თანამშრომლობას იწყებენ

3 ნოემბერი

ჩინეთის პეკინის უცხო ენების უნივერსიტეტის დელეგაცია აზერბაიჯანის სახელმწიფო ეკონომიკურ უნივერსიტეტს (ასეუ) ეწვია.

ასეუ-ს რექტორმა, ადალეთ მურადოვმა, შეხვედრის დროს აღნიშნა, რომ 2019 წლიდან უნივერსიტეტში, ჰაიდარ ალიევის ფონდის მხარდაჭერითა და კონფუცის ინსტიტუტის ჩართულობით, ტარდება ჩინური ენის ონლაინ კურსები. აღნიშნული კურსებში 500-ზე მეტმა სტუდენტმა მიიღო მონაწილეობა.

თავის მხრივ, პეკინის უცხო ენების უნივერსიტეტის პრორექტორმა, გაო ქანგმა აღნიშნა, რომ ჩინურ უნივერსიტეტში 101 უცხო ენა ისწავლება. მათ შორის, ერთ-ერთი აზერბაიჯანული ენაა.

შეხვედრის ფარგლებში, მხარეებმა განიხილეს თანამშრომლობის კონკრეტული მიმართულებები. კერძოდ, მხარეებს შორის მიღწეულ იქნა შეთანხმება „უცხო ენა + ეკონომიკის“ მიმართულებით ორმაგი დიპლომის პროგრამების განხორციელების, ასეუ-ს პედაგოგებისთვის უცხო ენების განხრით ტრენინგების ჩატარების, პეკინის უცხო ენების უნივერსიტეტის ენის სწავლების გამოცდილების გაზიარების, ასეუ-ში უცხო ენების სწავლების ცენტრის შექმნისა და ერთობლივი კონფერენციების თუ თარგმნის პროექტების განხორციელების შესახებ.

აზერბაჯანის მეცნიერებათა ეროვნულ აკადემიასა და პეკინის უცხო ენების უნივერსიტეტს შორის ურთიერთგაგების მემორანდუმი გაფორმდა

3 ნოემბერი

აზერბაიჯანის მეცნიერებათა ეროვნული აკადემიის (AMEA) პრეზიდენტი, ისა ჰაბიბაილი პეკინის უცხო ენების უნივერსიტეტის პრორექტორს, გაო ქანგინს შეხვდა.

AMEA-ს პრეზიდენტმა შეხვედრაზე აღნიშნა, რომ აზერბაიჯანსა და ჩინეთს შორის ურთიერთობები მყარ საფუძვლებს ეფუძნება და აზერბაიჯანის პრეზიდენტი, ილჰამ ალიევი პეკინთან ურთიერთობებს განსაკუთრებულ მნიშვნელობას ანიჭებს. ამასთანავე, ჰაბიბაილიმ სტუმრებს მიაწოდა ინფორმაცია პარტნიორი ჩინური უნივერსიტეტებისა და აკადემიების შესახებ.

შეხვედრის დასასრულს, აზერბაიჯანის მეცნიერებათა ეროვნულ აკადემიასა და პეკინის უცხო ენების უნივერსიტეტს შორის ხელი მოეწერა ურთიერთგაგების მემორანდუმს.

ბაქოს საინჟინრო უნივერსიტეტი და ჩინეთის თიანშუეის ნორმალური უნივერსიტეტი თანამშრომლობას იწყებენ

4 ნოემბერი

ბაქის საინჟინრო უნივერსიტეტსა და ჩინეთის თიანშუეის ნორმალურ უნივერსიტეტს შორის აკადემიური თანამშრომლობის შესახებ ურთიერთგაგების მემორანდუმს მოეწერა ხელი.

შეთანხმება ითვალისწინებს ერთობლივ სამეცნიერო პროექტებს, სტუდენტების/პედაგოგების გაცვლით პროგრამებს, ორმაგი დიპლომის პროგრამების ორგანიზებასა და აკადემიური პროგრამების ერთობლივ მომზადებას.

ჩინეთის თიანშუეის ნორმალური უნივერსიტეტის რექტორმა, ვანგ ჰუინგმა აღნიშნა, რომ ხელმოწერილი მემორანდუმი ხელს შეუწყობს არა მხოლოდ უნივერსიტეტებს, არამედ ჩინეთსა და აზერბაიჯანს შორის მეგობრობის, თანამშრომლობის გაძლიერებას.

აზერბაიჯანის სახელმწიფო პედაგოგიური უნივერსიტეტი ჩინურ უნივერსიტეტთან თანამშრომლობას იწყებს

5 ნოემბერი

აზერბაიჯანის სახელმწიფო პედაგოგიურ უნივერსიტეტს ჩინეთის თიანშუეის ნორმალური უნივერსიტეტის დელეგაცია ეწვია.

მხარეებმა, შეხვედრის დასასრულს, ხელი მოაწერეს თანამშრომლობის შესახებ ურთიერთგაგების მემორანდუმს, რომელიც ითვალისწინებს ერთობლივ სამეცნიერო საქმიანობას, სტუდენტებისთვის/პედაგოგებისთვის გაცვლით პროგრამებს, ორმაგი დიპლომის პროგრამებსა და ერთობლივ აკადემიურ პროგრამებს.

აზერბაიჯანის საგანგებო სიტუაციების სამინისტროს დელეგაციის ვიზიტი ჩინეთში

5 ნოემბერი

აზერბაიჯანის საგანგებო სიტუაციების სამინისტროს დელეგაცია 26 ოქტომბრიდან 4 ნოემბრამდე ჩინეთის სახალხო რესპუბლიკაში იმყოფებოდა.

ვიზიტის ფარგლებში, დელეგაციის წევრები შეხვდნენ ჩინეთის ეროვნული ავიაციის ტექნოლოგიების იმპორტისა და ექსპორტის კორპორაციის ვიცე-პრეზიდენტ ლიუ ის.

შეხვედრის ფარგლებში, მხარეებმა ისაუბრეს საგანგებო სიტუაციების მართვის დარგში მოქმედ დაწესებულებებს შორის ორმხრივი თანამშრომლობის მნიშვნელობასა და ავიაციის დარგში, შესაბამისი ტექნოლოგიების გამოყენების საჭიროებაზე.

აზერბაიჯანის პრემიერ მინისტრის მოადგილე ჩინეთში

6 ნოემბერი

ჩინეთის საერთაშორისო იმპორტის გამოფენის ფარგლებში, აზერბაიჯანის პრემიერ მინისტრის მოადგილე და აზერბაიჯან-ჩინეთის მთავრობათაშორისი სავაჭრო-ეკონომიკური თანამშრომლობის კომისიის თავმჯდომარე, შაჰინ მუსტაფაევი შეხვდა ჩინური კომპანიების, მათ შორის, China Datang Corporation Ltd-სა და Wontai Group-ის ხელმძღვანელობას.

ჩინურ კომპანიებთან შეხვედრაზე, აზერბაიჯანის პრემიერ მინისტრის მოადგილემ აღნიშნა, რომ ჩინური კომპანიები სარგებლობენ აზერბაიჯანში არსებული ხელსაყრელი საინვესტიციო და ბიზნეს გარემოთი და სხვადასხვა მიმართულებით, პროექტებს ახორციელებენ.

სოკარი ჩინურ კომპანიასთან თანამშრომლობას იწყებს

7 ნოემბერი

სოკარის პრეზიდენტი როვშან ნაჯაფი ჩინური კომპანიის, Sinopec Engineering-ის პრეზიდენტს, ჭანგ სინმინგს შეხვდა.

შეხვედრის ფარგლებში, მხარეებმა ნავთობისა და გაზის წარმოების, ნავთობქიმიური პროდუქტების, გაციფრულების, ენერგიის გადაცემისა და თანამედროვე დამუშავების ტექნოლოგიების შესახებ ისაუბრეს.

შეხვედრის დასასრულს, კომპანიებს შორის თანამშრომლობის შესახებ შეთანხმებას მოეწერა ხელი.

აზერბაიჯანის ფიზიკის ინსტიტუტი ჰონგ კონგის აკადემიასთან თანამშრომლობს

8 ნოემბერი

აზერბაიჯანის მეცნიერებისა და განათლების სამინისტროს ფიზიკის ინსტიტუტის დირექტორმა, არიფ ჰაშიმოვმა მეცნიერებისა და ჰუმანიტარული მეცნიერებების საერთაშორისო CORE აკადემიას უმასპინძლა.

შეხვედრის ფარგლებში, ფიზიკის ინსტიტუტსა და CORE აკადემიას შორის, ევრაზიის საერთაშორისო ლაბორატორიის შექმნის შესახებ სტრატეგიული თანამშრომლობის შეთანხმებას მოეწერა ხელი.

შეთანხმება ითვალისწინებს მეცნიერებისა და განათლების დარგებში ინტეგრაციის გაძლიერებას, საგანმანათლებლო და კადრების მომზადების პროგრამებს, ტექნოლოგიის გადაცემას, საერთაშორისო სამეცნიერო კავშირების გაძლიერებას, ერთობლივ სამეცნიერო-კვლევით საქმიანობასა და „სარტყლისა და გზის“ პლატფორმის ფარგლებში, ერთობლივი ლაბორატორიის შექმნას.

სომხეთი

ჩინეთის სოციალური მეცნიერებების აკადემიის წარმომადგენელი სომხეთ-ჩინეთის ურთიერთობების შესახებ

5 ნოემბერი

ჩინეთის სოციალური მეცნიერებების აკადემიის “სარტყლისა და გზის” კვლევითი ცენტრის გენერალურმა მდივანმა, ვან სიაოციუნიანმა, კონფერენციაზე, სახელწოდებით – “ორბელის ფორუმი 2025: მშვიდობისა და მრავალმხრივი თანამშრომლობის მშენებლობა”, გამოსვლისას სომხეთ-ჩინეთის ურთიერთობებზე გაამახვილა ყურადღება და აღნიშნა: “საუკუნეების განმავლობაში, სომხეთი აღმოსავლური და დასავლური ცივილიზაციების გზაჯვარედინზე მდებარეობდა. სწორედ ცივილიზაციური ჰარმონიის ეს ფაქტორი დგას ჩინეთის „სარტყელი და გზის“ ინიციატივის (BRI) საფუძველშიც”.

ვანის თქმით, მიმდინარე გეოპოლიტიკური ცვლილებების ფონზე, ჩინეთ-სომხეთის თანამშრომლობა ხელს უწყობს არა მხოლოდ რეგიონული ეკონომიკური ინტეგრაციის გაღრმავებას, არამედ მშვიდობის დამყარებასა და კულტურული კავშირების გაძლიერებას სამხრეთ კავკასიაში. ვანის აზრით, ასეთი თანამშრომლობა უნდა ეფუძნებოდეს თანასწორობის პრინციპს, რაც მოიცავს სუვერენიტეტის პატივისცემას, ინტერესთა ურთიერთგაგებას და საერთო სარგებლის გაცნობიერებას.

ვანმა ასევე ყურადღება გაამახვილა სომხეთის ბოლოდროინდელ საგარეო პოლიტიკურ კურსზე. კერძოდ, მან დადებითად შეაფასა ის ფაქტი, რომ სომხეთი ევროკავშირთან დაახლოების პარალელურად, შანხაის თანამშრომლობის ორგანზიაციაში გაწევრიანებისკენ მიისწრაფვის:

„სომხეთის დიპლომატია ამ მხრივ შთამბეჭდავია, რადგან ის მიზნად ისახავს სტრატეგიული ურთიერთობების გაღრმავებას ჩინეთთან, თანაც რუსეთთან კონსტრუქციული კავშირების შენარჩუნებით.” – აღნიშნა ექსპერტმა.

ერევანში ჩინური სიმღერის მეორე სტუდენტური კონკურსი გაიმართა

6 ნოემბერი

6 ნოემბერს რუსულ-სომხური უნივერსიტეტის კულტურის სახლში გაიმართა ჩინური სიმღერის მეორე უნივერსიტეტთაშორისი კონკურს-ფესტივალი. ღონისძიება ჩატარდა სომხეთში ჩინეთის საელჩოს, რუსულ-სომხური უნივერსიტეტის კონფუცის კლასისა და ბრიუსოვის სახელობის სახელმწიფო უნივერსიტეტის კონფუცის ინსტიტუტის ერთობლივი ძალისხმევით.

მასპინძელი უნივერსიტეტების გარდა, კონკურსში მონაწილეობა მიიღეს ერევნის სახელმწიფო უნივერსიტეტისა და სომხეთის ფიზიკური კულტურისა და სპორტის სახელმწიფო ინსტიტუტის სტუდენტებმა. კონკურსანტებმა შეასრულეს სიმღერები ჩინურ ენაზე. კონკურსის ფარგლებში, გამარჯვებულები გამოვლინდნენ მათი გამოთქმის, ვოკალური უნარებისა და სასცენო გამოსვლების მიხედვით.

კონკურსის გამარჯვებული გახდა ბრიუსოვის უნივერსიტეტის სტუდენტი ჰაიასტან ჰმაიაკიანი. პირველი სამი ადგილის მფლობელები და სხვა გამორჩეული მონაწილეები დაჯილდოვდნენ სომხეთში ჩინეთის საელჩოს მიერ გადაცემული მობილური ტელეფონებით.

გახსნის ცერემონიაზე მისასალმებელი სიტყვით გამოვიდა რუსულ-სომხური უნივერსიტეტის პრორექტორი პარგევ ავეტისიანი, რომელმაც აღნიშნა, რომ ღონისძიება „შესანიშნავი შესაძლებლობაა, მოვისმინოთ სტუდენტების შესრულება, რომლებიც მოხიბლულნი არიან ჩინური კულტურითა და მუსიკით“.

თავის მხრივ, სომხეთში ჩინეთის ელჩმა ლი სინვეიმაც ყურადღება გაამახვილა სომეხი ახალგაზრდების მზარდ ინტერესზე ჩინური ენისა და კულტურისადმი. ამასთან,  ლი სინვეიმ, იმედი გამოთქვა, რომ შემდგომ წლებში კონკურსში უფრო მეტი მონაწილე ჩაერთვება და აღნიშნა, რომ მომავალი წლის ღონისძიება გაიმართება სომხეთის საზოგადოებრივი ტელევიზიის ახალ სტუდიაში, რომელიც ჩინეთის მხარდაჭერით შენდება.

ყაზახეთი

ყაზახეთში ჩინეთის ელჩი ყაზახეთის ტრანსპორტის მინისტრს შეხვდა

7 ნოემბერი

ჩინეთი და ყაზახეთი ინფრასტრუქტურისა და ლოჯისტიკის სფეროში თანამშრომლობას აძლიერებენ. კერძოდ, 7 ნოემბერს, ჩინეთის ელჩი ხან ჩუნლინი შეხვდა ყაზახეთის ტრანსპორტის ახლად დანიშნულ მინისტრს, საურანბაიევს.

შეხვედრის ფარგლებში, მხარეებმა ხაზი გაუსვეს ტრანსპორტისა და ლოჯისტიკის სფეროში ურთიერთდაკავშირების მნიშვნელობას, როგორც “სარტყლისა და გზის” ინიციატივის მთავარ პრიორიტეტს.

ჩინეთის საელჩომ გამოთქვა მზადყოფნა, ხელი შეუწყოს მეტი ჩინური კომპანიის მონაწილეობას ყაზახეთის სატრანსპორტო და ინფრასტრუქტურულ პროექტებში.

ყაზახეთის ტრანსპორტის მინისტრმა დადებითად შეაფასა არსებული პრაქტიკული თანამშრომლობა და გამოხატა მზადყოფნა, რომ გააგრძელოს ჩინეთთან მუშაობა “სარტყლისა და გზის” ინიციატივის ფარგლებში.

ახალი სავაჭრო შეთანხმება ყაზახეთსა და ჩინეთს შორის

5 ნოემბერი

ყაზახეთმა და ჩინეთმა, ჩინეთის საერთაშორისო იმპორტის გამოფენაზე, სავაჭრო პარტნიორობის შესახებ ახალ შეთანხმებაზე მოაწერეს ხელი. შეთანხმება მიზნად ისახავს ონლაინ პლატფორმების შექმნას და ციფრული ვაჭრობის ხელშეწყობას, რაც, თავის მხრივ, გაამარტივებს ყაზახური პროდუქციის ჩინურ ბაზარზე შესვლას.

შეთანხმება გაფორმდა Optimize Integration Group (OIG)-სა და ყაზახეთის სავაჭრო პოლიტიკის განვითარების ცენტრ, QazTrade-ს შორის.

შეთანხმების აჩვენებს, რომ ყაზახეთი ჩინეთის მთავარ ციფრულ იმპორტიორთან პარტნიორობითა და ჩინეთის საერთაშორისო იმპორტის გამოფენაში ჩართულობით, ცდილობს დააჩქაროს ყაზახური პროდუქციის ექსპორტი და  გაზარდოს სოფლის მეურნეობის პროდუქციის მიწოდება ჩინეთში.

ყაზახეთსა და ჩინეთს შორის სამეცნიერო თანამშრომლობა ახალ ეტაპზე გადადის

6 ნოემბერი

6 ნოემბერს, სიანის ძიათონგის უნივერსიტეტში „შაქარიმის“ სახელობის ყაზახურ-ჩინური კულტურული კვლევის ცენტრი გაიხსნა. ღონისძიება ჩატარდა “სარტყლისა და გზის” ინიციატივის ფარგლებში. ყაზახურ მედიაში გავრცელებული ინფორმაციის მიხედვით, ახლადგახსნილი ცენტრი მნიშვნელოვან როლს შეასრულებს ყაზახეთსა და ჩინეთს შორის კულტურული და სამეცნიერო თანამშრომლობის გაღრმავებაში.

“შაქარიმის” კულტურული კვლევის ცენტრის მიზანია ჩინელ აუდიტორიას გააცნოს ყაზახი ხალხის სულიერი მემკვიდრეობა.

ცენტრი ხელს შეუწყობს ორი ქვეყნის მეცნიერებსა და სტუდენტებს შორის ერთობლივ კვლევით და კულტურულ-გაცვლითი პროგრამების განხორციელებას.

ჩინეთი სამხრეთ კავკასიასა და ყაზახეთში(3-9 ნოემბერი) Read More »

ჩინეთის მესამე ავიამზიდი, „ფუძიანი“, ექსპლუატაციაში შევიდა.

ერთი ახალი ამბავი / /

ჩინეთის უახლესი და ყველაზე მძლავრი ავიამზიდი, „ფუძიანი“, ოფიციალურად ჩაეშვა ექსპლუატაციაში, რაც პეკინისთვის მნიშვნელოვანი წინგადადგმული ნაბიჯია გლობალურ საზღვაო ძალებში პოზიციის გასამყარებლად და საზღვაო უპირატესობის კუთხით, შეერთებულ შტატებთან დასაწევად. „ფუძიანი“ ჩინეთის მესამე და ყველაზე მოწინავე ხომალდია, რომელიც აღჭურვილია ელექტრომაგნიტური კატაპულტებით (EMALS). ეს ინოვაციური ტექნოლოგია თვითმფრინავებს საშუალებას აძლევს, აფრინდნენ უფრო მძიმე შეიარაღებითა და საწვავის დატვირთვით, რათა მტრის სამიზნეებს უფრო დიდი მანძილიდან დაარტყან, რაც მას უფრო მძლავრს ხდის, ვიდრე ჩინეთის პირველი ორი, რუსული დიზაინის ავიამზიდი, „ლიაონინგი“ და „შანდუნი“.

„ფუძიანი“ სამსახურში ოთხშაბათს, ჰაინანის პროვინციაში, გრანდიოზული ცერემონიით შევიდა, რაც ჩინეთის სამხედრო მოდერნიზაციის უდიდეს მიღწევად ითვლება. ამ მოვლენით ჩინეთი გახდა მეორე ქვეყანა მსოფლიოში – აშშ-ის შემდეგ – რომელიც EMALS ტექნოლოგიით აღჭურვილ ავიამზიდს იყენებს. ეს არის ასევე მსოფლიოში ყველაზე დიდი ჩვეულებრივი საწვავით მომუშავე ხომალდი, რაც ხაზს უსვამს ჩინეთის საინჟინრო მიღწევებს.

პრეზიდენტი სი ძინპინი თავად დაესწრო გაშვებისა და დროშის გადაცემის ცერემონიას სანის საზღვაო პორტში. სი ძინპინმა მოინახულა ხომალდი და გაეცნო მონაცემებს მისი შესაძლებლობებისა და მუშაობის შესახებ. სახელმწიფო მედიის ცნობით, მანამდე სი ძინპინმა პირადად მიიღო გადაწყვეტილება ელექტრომაგნიტური კატაპულტის ტექნოლოგიის მიღების შესახებ.

ჩინელი სამხედრო ექსპერტის, ჟანგ ძიუნშეს განცხადებით, „ფუძიანის“ სამხედრო ფლოტში გადაცემა განაპირობებს სახალხო განმათავისუფლებელი არმიის საზღვაო ძალების სანაპირო დაცვიდან შორ მანძილზე თავდაცვაზე გადასვლას, რითაც ჩინეთი ოფიციალურად შედის სამი ავიამზიდის ეპოქაში. მისი თქმით, ეს ნაბიჯი ფლოტს რამდენიმე ძირითად უპირატესობას ანიჭებს. პირველ რიგში, თვითმფრინავებს სრული საწვავითა და საბრძოლო მასალით შეუძლიათ აფრენა, რაც საბრძოლო მოქმედების რადიუსს ზრდის. ამასთანავე, ავიამზიდიდან თვითმფრინავების გაშვების სიხშირე საგრძნობლად მატულობს. ექსპერტები ვარაუდობენ, რომ „ფუძიანი“ და „შანდუნი“ შეიძლება ერთსა და იმავე პორტში განლაგდნენ სამხრეთ ჩინეთის ზღვის პირისპირ. ეს ხელს შეუწყობს ორმაგი ავიამზიდის ჯგუფის შექმნას და სტრატეგიულად შეაკავებს „თაივანის დამოუკიდებლობის“ მომხრე ძალებს.

მიუხედავად იმისა, რომ ჩინეთს გემების რაოდენობით მსოფლიოში უმსხვილესი საზღვაო ძალები ჰყავს და „ფუძიანი“ 80,000 ტონის მასით ყველაზე ახლოს დგას აშშ-ის „ნიმიცის კლასის“ ავიამზიდებთან, ანალიტიკოსები ამბობენ, რომ მას სრულ ოპერატიულ მზადყოფნამდე ჯერ კიდევ რთული გზა აქვს გასავლელი. დიზელის საწვავზე მუშაობის გამო, „ფუძიანს“ მოქმედების შეზღუდული რადიუსი აქვს, განსხვავებით აშშ-ის ბირთვული ენერგიის მქონე ავიამზიდებისგან. ექსპერტები ვარაუდობენ, რომ გემბანის კონფიგურაციის გამო, მისი საჰაერო ოპერაციების მაჩვენებელი შეიძლება მხოლოდ 60% იყოს იმასთან შედარებით, რასაც აშშ-ის  50 წლის ავიამზიდი აჩვენებს. ჩინეთი ამჟამად უკვე აშენებს მეოთხე ავიამზიდს, რომელიც, სავარაუდოდ, ბირთვული ენერგიით იქნება მომუშავე და EMALS ტექნოლოგიასაც გამოიყენებს.

ავტორი: მარიამ მაჭარაშვილი

ჩინეთის მესამე ავიამზიდი, „ფუძიანი“, ექსპლუატაციაში შევიდა. Read More »

აშშ-ში ჩინეთის ელჩის განცხადება თაივანთან დაკავშირებით

ერთი ახალი ამბავი / /

დონალდ ტრამპისა და სი ძინპინის შეხვედრის შემდეგ, ჩინეთმა კიდევ ერთხელ დააფიქსირა იმ “წითელ ხაზების” მნიშვნელობა, რომელთა გადაკვეთაც აშშ-სა და სხვა ქვეყნების მხრიდან მისთვის მიუღებელია.

შანხაიში გამართულ ვირტუალურ შეხვედრაზე, სადაც მონაწილეობდნენ ამერიკელი და ჩინელი ბიზნესმენები, ჩინეთის ელჩმა განიხილა ის ოთხი “წითელი ხაზი” (თაივანი, დემოკრატია და ადამიანის უფლებები, პოლიტიკური გზისა და სისტემის არჩევანი და განვითარების უფლებები), რომელთა დაცვასაც ჩინეთი მკაცრად სთხოვს მოკავშირე ქვეყნებს. ელჩმა განაცხადა: “ჩვენ იმედი გვაქვს, რომ ამერიკის შეერთებული შტატები თავიდან აირიდებს მათ [წითელი ხაზების] გადაკვეთას და და ამით პრობლემების გამოწვევას”.

ჩინეთის ელჩმა ყურადღება გაამახვილა ჩინეთსა და აშშ-ს შორის მიმდინარე მოლაპარაკებებზე და აღნიშნა, რომ ეს პროცესი მოითხოვს “ორივე მხარის მიერ ერთმანეთის ძირითადი ინტერესების“ პატივისცემას.

აღნიშნული ოთხი “წითელი ხაზი” უკვე დიდი ხანია მიიჩნევა ჩინეთისთვის სენსიტიურ საკითხად. შესაბამისად, ვაშინგტონის არაოფიციალური ურთიერთობები თაიფეისთან ჩინეთ-ამერიკის ურთიერთობებში დაძაბულობის ერთ-ერთი მნიშვნელოვანი კერაა. ამასთანავე, ამერიკელი ოფიციალური პირების მიერ პერიოდულად ჩინეთში ადამიანის უფლებების დარღვევის ფაქტებზე რეაგირება და კრიტიკა ქვეყნებს შორის დაძაბულობას კიდევ უფრო ამწვავებს.

დაძაბულობის მიუხედავად, დონალდ ტრამპმა აღნიშნა, რომ 30 ოქტომბრის შეხვედრაზე თაივანის თემა არ განხილულა. თუმცა სი ძინპინისა და ტრამპის შეხვედრის შემდეგ, ჩინეთმა მკაფიოდ აღნიშნა, რომ მისი “წითელი ხაზების” დაცვა და პატივისცემა მთავარი პირობაა სტაბილური ურთიერთობისთვის.

ავტორი: ქეთი აბულაძე

აშშ-ში ჩინეთის ელჩის განცხადება თაივანთან დაკავშირებით Read More »

ჩიპებთან დაკავშირებული დავა ნიდერლანდებსა და ჩინეთს შორის

ერთი ახალი ამბავი / /

2024 წლის სექტემბერში ნიდერლანდების ეკონომიკის სამინისტრომ კონტროლი აიღო  ნიდერლანდებში არსებულ ჩიპების მწარმოებელ კომპანიაზე, რომელიც 2018 წელს ნაწილობრივ სახელმწიფო საკუთრებაში მყოფმა ჩინურმა კომპანიამ -Wingtech Technology-მ შეიძინა. ნიდერლანდების ეკონომიკის სამინისტრომ კომპანიაზე კონტროლის ასაღებად მიმართა საქონლის ხელმისაწვდომობის აქტს და განმარტა, რომ Nexperia-ს ხელმძღვანელობის სერიოზული ხარვეზები „საფრთხის წინაშე აყენებდა ნიდერლანდებისა და ევროპის ტერიტორიაზე მნიშვნელოვანი ტექნოლოგიური ცოდნისა და შესაძლებლობების უწყვეტობასა და დაცულობას“.

ნიდერლანდების მთავრობის მიხედვით, Nexperia-ზე კონტროლი გულისხმობს, რომ „ეკონომიკის მინისტრს შეეძლება დაბლოკოს ან გააუქმოს კომპანიის გადაწყვეტილებები იმ შემთხვევაში, თუ ისინი (პოტენციურად) საზიანოა კომპანიის ინტერესებისთვის, მისი მომავალისთვის, როგორც ნიდერლანდური და ევროპული საწარმოსთვის, და/ან ევროპისათვის ამ კრიტიკული ღირებულებათა ჯაჭვის (value chain) შენარჩუნებისთვის“.

როდესაც ვსაუბრობთ Nexperia-სა და მის მფლობელ კომპანია Wingtech Technology-ზე, უნდა აღინიშნოს, რომ გასულ წელს აშშ-ის ვაჭრობის დეპარტამენტმა Wingtech შეიყვანა ე.წ. „ერთეულთა სიაში“ (entity list). ეს უკანასკნელი იმ კომპანიების ჩამონათვალია, რომლებიც შეიძლება საფრთხეს უქმნიდნენ ამერიკის ეროვნულ უსაფრთხოებას და ამის გამო, ექვემდებარებიან ექსპორტის კონტროლს. გარდა ამისა, 2023 წელს ბრიტანეთის მთავრობამ ეროვნული უსაფრთხოების ეგიდით არ დაუშვა, რომ Nexperia-ს შეეძინა უელსში მდებარე ჩიპების მწარმოებელი ქარხანა. ყველაფერი ეს ნათლად ასახავს ზოგად გეოპოლიტიკურ დაძაბულობას ჩინეთსა და დასავლეთს შორის მოწინავე ტექნოლოგიების მიმართულებით.

2024 წელს, მას შემდეგ, რაც ნიდერლანდების ეკონომიკის სამინისტრომ Nexperia-ზე კონტროლი აიღო, Wingtech-მა სოციალურ ქსელში გამოაქვეყნა პოსტი, რომელშიც გააკრიტიკა სამინისტროს გადაწყვეტილებები და აღნიშნა, რომ კომპანია „მტკიცედ ეწინააღმდეგება სავაჭრო საკითხების პოლიტიზაციას“ და „გეოპოლიტიკურ მიკერძოებაზე დაფუძნებულ გადაჭარბებულ ჩარევას, ეროვნული უსაფრთხოების უსაფუძვლო საბაბით, ნაცვლად ფაქტებზე დაფუძნებული რისკების შეფასებისა“

გარდა ამისა, ჩინეთის საგარეო საქმეთა სამინისტროს სპიკერმა ლინ ჯიანმაც განაცხადა, რომ „შესაბამისმა ქვეყნებმა ნამდვილად უნდა დაიცვან საბაზრო პრინციპები და თავი აარიდონ ეკონომიკური და სავაჭრო საკითხების პოლიტიზაციას.“

ეკონომიკის სამინისტროს ზემოხსენებულ ქმედებაზე ჩინეთის პირდაპირი პასუხი იყო Nexperia-ს ჩინურ ქარხნებში წარმოებული ჩიპების ევროპაში ხელახალი ექსპორტის შეწყვეტა. გარდა ამისა, Nexperia-ს ჩინეთში მდებარე ქარხნის განცხადებით, ნიდერლანდებში დაფუძნებულმა ქარხნამ შეაჩერა ჩიპების დასამზადებლად ერთ-ერთი მნიშვნელოვანი ნაწილის (wafers) მიწოდება ჩინური ქარხნისათვის, რამაც კიდევ უფრო გაართულა მდგომარეობა და გააძნელა ნახევარგამტარების დასრულებული ვერსიების წარმოება. ყოველივე ამან სერიოზული შეშფოთება გამოიწვია ევროპელ ავტომწარმოებლებში, ვინაიდან ეს ჩიპები ავტომობილების წარმოების პროცესში ძალიან მნიშვნელოვანია.

უნდა აღინიშნოს, რომ ევროპაში წარმოებული Nexperia-ს ჩიპების დაახლოებით 70% იგზავნება ჩინეთში, საიდანაც ისინი დასრულებული სახით ხელახლა ექსპორტირდება სხვა ქვეყნებში. გასულ თვეში ევროპის ავტომწარმოებლების ასოციაციამ (ACEA) განაცხადა, რომ თუ ჩინეთის მიერ ჩიპებზე დაწესებული აკრძალვა არ გაუქმდებოდა, Nexperia-ს ჩიპების ევროპული მარაგი რამდენიმე კვირაში ამოიწურებოდა. გარდა ამისა, ისეთმა კომპანიებმა, როგორებიცაა Volvo Cars და Volkswagen, დასძინეს, რომ ამ დეფიციტს შესაძლოა მათი ქარხნების დროებითი გაჩერებაც გამოეწვია.

ამ კვირაში ჩინეთის ვაჭრობის სამინისტრომ განაცხადა, რომ „ნიდერლანდებს ეკისრება სრული პასუხისმგებლობა“, ვინაიდან სწორედ მისმა ქმედებებმა გამოიწვია „გლობალური ნახევარგამტარების მიწოდების ჯაჭვში არეულობა და ქაოსი.“

თეთრი სახლის ინფორმაციით, ჩიპების თემა განხილული იყო დონალდ ტრამპსა და სი ძინპინს შორის გამართულ შეხვედრაზე, გასულ კვირას, სამხრეთ კორეაში. როგორც ცნობილია, აშშ-სა და ჩინეთს შორის მომავალი სავაჭრო შეთანხმების ფარგლებში, ჩინეთი შეამსუბუქებს ავტოინდუსტრიისთვის საჭირო კომპიუტერული ჩიპების ექსპორტის შეზღუდვებს.

ჩიპებთან დაკავშირებული დავა ნიდერლანდებსა და ჩინეთს შორის Read More »

ჩინეთი ბრიტანეთის უნივერსიტეტის აკადემიური თავსიუფლების ხელყოფის ფაქტშია მხილებული

ერთი ახალი ამბავი / /

ბრიტანეთის უნივერსიტეტში (Sheffield Hallam University) ჩინეთი პროფესორ ლორა მერფის კვლევის შეჩერების მიზეზი გახდა. კვლევა ეხებოდა უიღურ (თურქულენოვანი მუსლიმი ეთნიკური უმცირესობა ჩინეთის სინძიანგის, უიღურთა ავტონომიურ რეგიონში) მუსლიმთა იძულებით შრომას ჩინეთის ჩრდილო-დასავლეთ რეგიონ სინძიანგში. ჩინეთის მხრიდან ზეწოლის პრაქტიკა ორი წელია გრძელდება, მათ შორის უნივერსიტეტის თანამშრომლებზე ცალკეული პირებისაგან, რომლებიც თავს ჩინეთის ეროვნული უსაფრთხოების სამსახურის წარმომადგენლებად ასახელებდნენ. მნიშვნელოვანი ფაქტია, რომ ჩინეთიდან უნივერსიტეტის ვებგვერდზე წვდომაც დაიბლოკა. დიდი ბრიტანეთი საკითხს არა მხოლოდ ადამიანის უფლების სერიოზულ დარღვევად მიიჩნევს, არამედ მოვლენა სახელმწიფოებრივი სუვერენიტეტისა და ეროვნული ინტერესის დარღვევად არის კლასიფიცირებული, თუმცა უნივერსიტეტმა კვლევა შეაჩერა ორწლიანი ზეწოლის შემდეგ.

მნიშვნელოვანია თავად უნივერსიტეტის ადმინისტრაციის როლიც, რომლის დირექტივითაც პროფესორ მერფის აღარ შეეძლო კვლევის პროცესის გაგრძელება მუსლიმთა იძულებითი შრომის შესახებ. პროფესორის ინიციატივით, სამართლებრივი დავა დაიწყო უნივერსიტეტთან, ვინაიდან ირღვეოდა ინდივიდის აკადემიური თავისუფლება.

„უნივერსიტეტის ადმინისტრაციამ პირდაპირ აწარმოა მოლაპარაკებები უცხოეთის სადაზვერვო სამსახურთან. მათ გაცვალეს პროფესორის აკადემიური თავისუფლება ვებსაიტზე წვდომის განახლებაში“ განაცხადა პროფესორმა მერფმა. მნიშვნელოვანი საკითხია, რომ უნივერსიტეტში ჩინეთიდან მრავალი სტუდენტი აგრძელებდა სწავლას, ხოლო ვებსაიტზე წვდომის შეზღუდვის შემდეგ, ბუნებრივია, პროცესი შეჩერდა.

ლონდონში ჩინეთის საელჩომ BBC-ს განუცხადა, რომ „შეფილდ ჰალამის უნივერსიტეტის ჰელენა კენედის ცენტრმა გამოაქვეყნა ყალბი ინფორმაციის შემცველი ანგარიში სინძიანგის შესახებ“. საელჩომ დასძინა, „გამოვლინდა, რომ ამ ანგარიშების ზოგიერთმა ავტორმა დაფინანსება მიიღო აშშ-ის სააგენტოებისგან“. პროფესორი მერფი BBC-სთან აღნიშნავს, რომ დაფინანსება აშშ-ის ჰუმანიტარული მეცნიერებების ეროვნული ფონდისგან (National Endowment for Humanities) მიიღო, რომლის მიზანი იყო ავტობიოგრაფიული ანგარიშის მომზადება იმ ადამიანების შესახებ, რომლებიც იძულებით შრომაში იყვნენ ჩართულნი.

ზეწოლამ 2024 წლიდან აქტიურ ფაზას მიაღწია. 2024 წლის 18 აპრილს „ეროვნული უსაფრთხოების სამსახურის სამი ოფიცერი“ ეწვია შეფილდ ჰალამის ოფისს ჩინეთში. ორი საათის განმავლობაში მიმდინარეობდა Helena Kennedy Centre for International Justice-ის დაკითხვა სამომავლო და მიმდინარე კვლევების შესახებ, ვინაიდან პროფესორი მერფი სწორედ HKC ინსტიტუტის სახელით ამზადებდა კვლევას.

მანამდე 2023 წლის დეკემბერში გამოქვეყნებული იყო ცენტრის კვლევა, რომელიც ამხელდა სინძიანგის რეგიონში ადამიანთა ექსპლუატაციის პრაქტიკას ტანსაცმლის წარმოებისა და მიწოდების პროცესში. ანგარიშში ნახსენები იყო ჰონგ-კონგის კომპანია Smart Shirts Ltd, რომელმაც უნივერსიტეტის წინააღმდეგ ცილისწამებისათვის სარჩელი შეიტანა. ლონდონის უზენაესმა სასამართლომ წინასწარი დადგენილებით გამოიტანა დასკვნა, რომ ანგარიში ნამდვილად შეიცავდა კომპანიისათვის ფინანსურად დამაზიანებელ შინაარს, მაგრამ ინფორმაციის ვალიდურობის საკითხი კითხვის ქვეშ არ დამდგარა.

მნიშვნელოვანია, გავითვალისწინოთ პროფესორი მერფის რეპუტაციაც. საერთაშორისო დონეზე მისი კვლევები დიდი ბრიტანეთის, კანადისა და ავსტრალიის პარლამენტში დიდი რეპუტაციით სარგებლობდა და რეკომენდაციის ფუნქციასაც ასრულებდა პოლიტიკის შემუშავების პროცესში. 2023 წელს მერფი აშშ-ის უსაფრთხოების დეპარტამენტში მუშაობდა (the US Department of Homeland Security), სადაც Uyghur Forced Labour Prevention Act-ის განხორციელებაში მონაწილეობდა. ფაქტობრივად ამ წლებში მერფი მუდამ იძულებითი შრომის პრაქტიკის კვლევით იყო დაკავებული. მისი არყოფნის დროს, Sheffield Hallam-ის უნივერსიტეტმა, 2024 წლის აგვისტოში, მიიღო გადაწყვეტილება იძულებით შრომასთან დაკავშირებული კვლევის შეწყვეტის შესახებ, მიუხედავად იმისა, რომ პროექტი კვლავ ფინანსდებოდა გარე დონორების მიერ. აღნიშნული ფაქტი, მერფის დაბრუნების შემდეგ, გახდა ცნობილი. უნივერსიტეტი გადაწყვეტილების ვალიდაციას უსაფრთხოების სამსახურის ზეწოლით ხსნიდა, რადგან საფრთხე ექმნებოდა თანამშრომელთა უსაფრთხოებას როგორც ბრიტანეთში, ისე ჩინეთში. 

მერფის შეფასებით, უნივერსიტეტმა კომერციულ ინტერესებს მიანიჭა პრიორიტეტი. უნივერსიტეტის წარმომადგენლები უგულვებელყოფენ კომერციულ მოტივს, ვინაიდან 2024-2025 წლებში ჩინეთიდან მხოლოდ 73 სტუდენტი ფიქსირდებოდა. თუმცა, ჩინეთის საელჩოს განცხადებით, 200 000-ზე მეტი ჩინელი სტუდენტი სწავლობდა ბრიტანეთში ამავე პერიოდისათვის.

საკითხს ეხმიანება ჰელენა კენედიც, რომელიც ჩინეთის მხრიდან იძულებითი შრომის პრაქტიკაზე კვლევითი საქმიანობის გამო თავადაც დასანქცირდა. მისი თქმით, ბრიტანეთის უნივერსიტეტები ფინანსურად დამოკიდებული გახდნენ ჩინეთზე, რამაც აკადემიური სფერო კომერციულ ინტერესებს მოარგო, ხოლო ინდივიდის ინტელექტუალური თავისუფლება ხელყო.

ავტორი: მარიამ არაბაშვილი 

ჩინეთი ბრიტანეთის უნივერსიტეტის აკადემიური თავსიუფლების ხელყოფის ფაქტშია მხილებული Read More »

ჩინეთი სამხრეთ კავკასიასა და ტაჯიკეთში (27.10 – 02.11)

კვირის ამბავი / /

საქართველო

საქართველოსა და ჩინეთს შორის სარკინიგზო თანამშრომლობა ღრმავდება

22 ოქტომბერი

საქართველოს საგანგებო და სრულუფლებიანი ელჩი ჩინეთის სახალხო რესპუბლიკაში, პაატა კალანდაძე, შეხვდა ქალაქ ჭუჭოუს მუნიციპალიტეტის ვიცე-მერს, ხუა იანგს.

შეხვედრაზე განიხილეს საქართველოსა და ჩინეთს შორის სარკინიგზო სფეროში მიმდინარე თანამშრომლობის გაღრმავების შესაძლებლობები. ასევე, მხარეები შეთანხმდნენ ამ მიმართულებით მუშაობის გაგრძელებაზე.

 

აღსანიშნავია, რომ ქალაქი ჭუჭოუ ცნობილია როგორც ჩინეთის „ლოკომოტივების დედაქალაქად“. CRRC ZELC (ჭუჭოუს ლოკომოტივების მწარმოებელი კომპანია) 1997 წლიდან აქტიურად არის ჩართული გლობალურ ექსპორტში. მნიშვნელოვანი პარტნიორები არიან სინგაპური, მალაიზია, მაკედონია, თურქეთი, ჩეხეთი, გერმანია, სამხრეთ აფრიკა და ა.შ.

საქართველოში ჩინეთის საელჩოს მიერ ორგანიზებული ესეების კონკურსი: „მე და ჩემი ჩინური ამბავი“

30 ოქტომბერი

საქართველოში ჩინეთის საელჩომ დააორგანიზა ესეების კონკურსი – „მე და ჩემი ჩინური ამბავი“ („我和中国的故事“), რომელშიც მონაწილეობას იღებდნენ მონაწილეობას იღებდნენ სტუდენტები, სკოლის მოსწავლეები და სხვა დაინტერესებული პირები.

საელჩომ გამოაქვეყნა გამარჯვებულთა სია, სადაც წარმოდგენილნი არიან სხვადასხვა სექტორისა და პროფესიის წარმომადგენლები. მათ შორის, პირველ ადგილზე გავიდა ტელეკომპანია “იმედის” ტელეწამყვანი, თამარ ცინცაძე.

ჩინეთის მშვიდობიანი გაერთიანების ხელშეწყობის ეროვნული ასოციაციის პოზიცია თაივანთან დაკავშირებით

საქართველოში ჩინეთის საელჩოს მიერ გავრცელებული ინფორმაციის თანახმად, ჩინეთის მშვიდობიანი ეროვნული გაერთიანების ხელშეწყობის საქართველოს ასოციაციამ, 25 ოქტომბერს, გამოაქვეყნა განცხადება თაივანის განთავისუფლების მე-80 წლისთავის აღსანიშნავად.

ჩინეთის რესპუბლიკის მთავრობამ 2001 წლიდან 2024 წლამდე პერიოდში 25 ოქტომბრის საყოველთაო უქმედ გამოცხადება შეწყვიტა. თუმცა, 2025 წელს აღდგა უქმე დღის სტატუსი, რასაც თან ახლდა დღესასწაულის სახელის ცვლილება. წლევანდელი გადაწყვეტილებით 25 ოქტომბერი „თაივანის განთავისუფლების მემორიალურ დღედ“ გამოცხადდა.

ასოციაციის მიერ გამოქვეყნებული განცხადების მიხედვით, გაერთიანება არის ისტორიული და სამართლებრივი ფაქტი, რომელიც გარდაუვალია და წარმოადგენს ჩინელი ერის მოთხოვნას. ორგანიზაცია მკაცრად გმობს „თაივანის დამოუკიდებლობის“ მცდელობებს და გარე ძალების ჩარევას. 

აზერბაიჯანი

ბაქოს საინჟინრო უნივერსიტეტსა და ცინხუას უნივერსიტეტს შორის თანამშრომლობის მიმართულებები განისაზღვრა

27 ოქტომბერი

ბაქოს საინჟინრო უნივერსიტეტსა და ჩინეთის ცინხუას უნივერსიტეტს შორის, თანამშრომლობის სამომავლო მიმართულებების განსაზღვრის მიზნით, მოლაპარაკებები გაიმართა.

შეხედრაზე მხარეებმა, სამეცნიერო-კვლევითი ინიციატივების, აკადემიური გაცვლითი პროგრამებისა და ერთობლივი საგანმანათლებლო პროექტების მიმართულებით, თანამშრომლობის შესაძლებლობებზე ისაუბრეს. 

გარდა ამისა, მხარეები, მიმდინარე წლის ივლისში, უნივერსიტეტებს შორის თანამშრომლობასთან დაკავშირებით გამართული მოლაპარაკებების შემდგომ პერიოდში, მიღწეულ შედეგებს გაეცნენ.

აზერბაიჯანსა და ჩინეთს შორის „მწვანე ენერგიის განვითარების კუთხით ერთობლივი კვლევითი ცენტრის“ შექმნის საკითხი განიხილეს

27 ოქტომბერი

ენერგეტიკის მინისტრ ფარვიზ შაჰბაზოვსა და China Energy Engineering Corporation Limited-ის დელეგაციას შორის შეხედრა გაიმართა.

შეხვედრაზე სამინისტროსა და კომპანიას შორის ენერგეტიკის სფეროში პროექტების განხორციელების საკითხი იქნა განხილული. კერძოდ, აღინიშნა, რომ აზერბაიჯანში განახლებადი ენერგიის მიმართულებით China Energy Engineering Corporation Limited-თან ერთობლივი ინიციატივები დარგის განვითარებას შეუწყობს ხელს.

შეხვედრაზე ხაზი გაესვა ჩინეთის ელექტროენერგეტიკული დაგეგმვისა და ინჟინერიის ინსტიტუტთან (EPPEI) ერთად განხორციელებული კვლევების მნიშვნელობას. ამასთანავე, მხარეებმა “მწვანე ენერგიის განვითარების კუთხით ერთობლივი კვლევითი ცენტრის” შექმნის აუცილებლობაზე გაამახვილეს ყურადღება.

სამინისტროს წარმომადგენელმა, ბილასუვარსა და ნეფტჩალაში ჩინური კომპანიის საქმიანობა, კერძოდ, 760 მეგა ვატი სიმძლავრის მზის ელექტროსადგურის შენება და მისი აღჭურვილობით უზრუნველყოფა, მაღალ დონეზე შეაფასა.

აზერბაიჯანი და ჩინეთი შუა დერეფნის გავლით სატვირთო გადაზიდვების გაზრდის შესახებ შეთანხმდნენ

27 ოქტომბერი

“აზერბაიჯანის რკინიგზების” პრეზიდენტი, როვშან რუსთამოვი შეხვდა ჩინეთის სახალხო რესპუბლიკის დელეგაციას, რომელსაც ხელმძღანელობდა ქალაქ სიანის მერი, იე ნიუ პინინი.

შეხვედრაზე აღინიშნა, რომ შუა დერეფნის შესაძლებლობების გაფართოების და ტვირთების ნაკადის გაზრდის მიზნით, აზერბაიჯანის რკინიგზები და ჩინეთის სიანის ნავსადგური მჭიდროდ თანამშრომლობენ. თანამშრომლობის გასაძლიერებლად, სიანის ნავსადგურში აზერბაიჯანის რკინიგზების წარმომადგენელი დაინიშნა. ამასთანავე, წარმომადგენელს წვდომა მიენიჭა სიანის ნავსადგურის საოპერაციო სისტემაზე.

შეხვედრაზე აღინიშნა, რომ წელს, 9 თვის განმავლობაში, აზერბაიჯანის რკინიგზებმა 113 სატრანზიტო მატარებელი მიიღო. აღნიშნული, წინა წლის იმავე პერიოდთან შედარებით, 39 %-იან ზრდაზე მიანიშნებს. ანალოგიურად, წინა წელთან შედარებით, ტვირთბრუნვა 20 %-ით არის გაზრდილი.  

შეხვედრის ფარგლებში, აზერბაიჯანის რკინიგზებსა და ჩინეთის სიანის ნავსადგურს შორის ურთიერთგაგების მემორანდუმი გაფორმდა. მემორანდუმი ითვალისწინებს საერთაშორისო სატვირთო გადაზიდვებისთვის ხელსაყრელი გარემოს შექმნას, გაციფრულების მეშვეობით მომსახურების ხარისხის გაუმჯობესებას და „გზისა და სარტყლის“ ინიციატივის ფარგლებში, შუა დერეფნის მულტიმოდალური სატრანსპორტო კავშირების გაფართოებას.

ჩინელი დოქტორანტურების მონაწილეობით, ბაქოს საინჟინრო უნივერსიტეტში სამეცნიერო სემინარი ჩატარდა

28 ოქტომბერი

ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის ორმაგი სადიპლომო პროგრამის ფარგლებში, ჩინეთის სახალხო რესპუბლიკიდან 32 დოქტორანტი და პროფესორ-მასწავლებლების დელეგაცია აზერბაიჯანს ეწვივნენ.

დელეგაციის ვიზიტის ფარგლებში, “მდგრადი განვითარების მიზნებზე ინჟინერიის გავლენების” შესახებ სამეცნიერო სემინარი ჩატარდა. სემინარს ესწრებოდნენ აზერბაიჯანის მეცნიერებათა ეროვნული აკადემიის წარმომადგენლები და სხვა უნივერსიტეტების მეცნიერ-მკვლევარები.

ბაქოს საინჟინრო უნივერსიტეტის რექტორმა, იაკუბ ფირიევმა ხაზი გაუსვა პეკინის ქიმიური ტექნოლოგიების უნივერსიტეტთან დამყარებული თანამშრომლობისა და ბაკალავრიატის დონეზე შექმნილი პირველი ორმაგი სადიპლომო პროგრამის წარმატებებს.

ღონისძიებაზე, პეკინის ქიმიური ტექნოლოგიების უნივერსიტეტის საერთაშორისო საგანმანათლებლო დეპარტამენტის პროფესორმა, იუ იემ უნივერსიტეტის სამეცნიერო-კვლევითი მიმართულებებისა და ორმაგი სადიპლომო პროგრამების შესახებ ისაუბრა. ამასთანავე, შეხვედრაზე, ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის სადიპლომო პროგრამის ფარგლებში ჩინეთში მყოფი აზერბაიჯანელი სტუდენტების ვიდეოინტერვიუები წარადგინეს.

აზერბაიჯანის ენების უნივერსიტეტი ჩინეთში გამართულ საერთაშორისო კონფერენციაზე

28 ოქტომბერი

აზერბაიჯანის ენების უნივერსიტეტის კონფუცის ინსტიტუტის დირექტორი, რაფიკ აბასოვი დაესწრო “პროფესიონალების საერთაშორისო გაცვლის 23-ე კონფერენციას”, რომელიც ქალაქ შანხაიში ჩატარდა.

კონფერენცია ჩინეთის ადამიანური რესურსებისა და სოციალური უზრუნველყოფის სამინისტროს და შანხაის მერიის მხარდაჭერით გაიმართა. ღონისძიების მთავარი ორგანიზატორები პეკინის საერთაშორისო კვლევების უნივერსიტეტი და ჩინეთის რეგიონული კვლევების კონსორციუმი იყო.

კონფერენციაზე განხილულ იქნა ხელოვნური ინტელექტის როლი კულტურებს შორის განათლების განვითარებაში, კულტურათაშორისი განათლების სისტემებისთვის კადრების მომზადების საკითხი, საინფორმაციო საზოგადოებაში განათლების განვითარების ტენდენციები და სხვა თემები.

აზერბაიჯანის არქიტექტურისა და მშენებლობის უნივერსიტეტი ჩინეთში გამართულ საერთაშორისო კონფერენციაზე

28 ოქტომბერი

აზერბაიჯანის არქიტექტურისა და მშენებლობის უნივერსიტეტის დელეგაციამ, ჩინეთის ადამიანური რესურსებისა და სოციალური უზრუნველყოფის სამინისტროსა და შანხაის მერიის მიერ “მათემატიკა და ხელოვნური ინტელექტის” თემაზე გამართულ, საერთაშორისო სამეცნიერო კონფერენციაში მიიღო მონაწილეობა.

აზერბაიჯანის უნივერსიტეტის დელეგაცია კონფერენციას შანხაის ჯიაო ტონგის უნივერსიტეტისგან მიღებული მოწვევით დაესწრო. კონფერენციის ფარგლებში, აზერბაიჯანის არქიტექტურისა და მშენებლობის უნივერსიტეტის რექტორმა, გულჩოჰრა მამმადოვმა საერთაშორისო სამეცნიერო ჟურნალების განვითარებაში შინაარსის ხარისხის, მულტიდისციპლინარული თანამშრომლობისა და უნივერსიტეტებს შორის სამეცნიერო კავშირების მნიშვნელობაზე ისაუბრა.

მოგვიანებით, 30 ოქტომბერს, აზერბაიჯანის არქიტექტურისა და მშენებლობის უნივერსიტეტის წარმომადგენლები შანხაის ჯიაო ტონგის უნივერსიტეტს ეწვივნენ. შეხვედრის ფარგლებში, მხარეებმა უნივერსიტეტებს შორის აკადემიური თანამშრომლობის გაფართოების, ერთობლივი სასწავლო პროგრამების განვითარებისა და ორმხრივი სამეცნიერო პროექტების განხორციელების საკითხები განიხილეს.

ბაქოსა და ქალაქ სიანს შორის პირდაპირი საჰაერო კავშირების დამყარების საკითხი განიხილეს

29 ოქტომბერი

ციფრული განვითარებისა და ტრანსპორტის მინისტრი, რაშად ნაბიევი ჩინეთის ქალაქ სიანის მერს, იე ნიუპინგს შეხვდა.

შეხვედრაზე მხარეებმა ქალაქებს შორის საჰაერო კავშირების დამყარების, ხელოვნური ინტელექტის, გაციფრულებისა და სხვა მიმართულებებით თანამშრომლობის პერსპექტივები განიხილეს.

შეხვედრის ბოლოს, მხარეები, განხილულ თემებზე სამუშაოდ, სამუშაო ჯგუფის შექმნაზე შეთანხმდნენ.

აზერბაიჯანისა და ჩინეთის უმაღლეს სასწავლებლებს შორის თანამშრომლობის პერსპექტივები განიხილეს

29 ოქტომბერი

ჩინეთის სახალხო რესპუბლიკის ელჩი საქართველოში, ლუ მეი აზერბაიჯანის რესპუბლიკის პრეზიდენტთან არსებული საჯარო მმართველობის აკადემიას ეწვია.

შეხვედრაზე აკადემიის რექტორმა, ურხან ალაქბაროვმა, აზერბაიჯან-ჩინეთის მეგობრობაზე და ორმხრივი თანამშრომლობის განვითარებაში განათლების მნიშვნელობაზე ისაუბრა.

შეხვედრაზე მხარეებმა ორი ქვეყნის უმაღლეს საგანმანათლებლო დაწესებულებებს შორის თანამშრომლობის პერსპექტივები განიხილეს.

აზერბაიჯანსა და ჩინეთს შორის ტურიზმის სფეროში არსებული კავშირები განიხილეს

29 ოქტომბერი

სახელმწიფო ტურიზმის სააგენტოს თავმჯდომარე, ფუად ნაღიევი აზერბაიჯანში ჩინეთის ელჩს, ლუ მეის შეხვდა.

შეხვედრაზე ფუად ნაღიევმა ორმხრივი ტურისტული კავშირების განვითარების დინამიკაზე და სავიზო შეზღუდვების გაუქმების დადებით შედეგებზე ისაუბრა.

სააგენტოს თავმჯდომარემ, ასევე, აღნიშნა, რომ ჩინეთში აზერბაიჯანის ტურიზმის ბიუროს ადგილობრივი ფილიალის გახსნის მიმართულებით სამუშაოები მიმდინარეობს.

თავის მხრივ, ჩინეთის ელჩმა აღნიშნა, რომ აზერბაიჯანის მდიდარი ტურიზმის პოტენციალი ჩინელი ტურისტების ყურადღებას იპყრობს და ტურიზმი ქვეყნებს შორის მზარდი თანამშრომლობის ერთ-ერთ მიმართულებას წარმოადგენს. ელჩმა აღნიშნა, რომ ჩინეთი აზერბაიჯანის ტურიზმის სექტორში საინვესტიციო შესაძლებლობებითა და შესაძლო პროექტებში მონაწილეობითაა დაინტერესებული.

აღსანიშნავია, რომ ბაქო-პეკინის მიმართულებით კვირაში სამი, ბაქო-ურუმჩის მიმართულებით კი, ხუთი რეისი ხორციელდება. 2024 წელს, ჩინეთიდან აზერბაიჯანში ჩამოსული ვიზიტორების რაოდენობამ 44 798-ს მიაღწია, რაც, წინა წელთან შედარებით, 94 %-იან ზრდაზე მიანიშნებს.

ბაქოს ახალგაზრდულ ცენტრში კონფუცის ინსტიტუტის ფილიალი გაიხსნა

30 ოქტომბერი

ბაქოს ახალგაზრდულ ცენტრში, აზერბაიჯანის ენების უნივერსიტეტში მოქმედი კონფუცის ინსტიტუტის ფილიალის გახსნის ცერემონია გაიმართა. ღონისძიება აზერბაიჯანის ახალგაზრდობის და სპორტის სამინისტროსა და აზერბაიჯანში ჩინეთის საელჩოს მხარდაჭერით დაორგანიზდა.

გახსნის ცერემონიას ესწრებოდნენ ახალგაზრდობის და სპორტის მინისტრი, ფარიდ გაიბოვი, აზერბაიჯანში ჩინეთის ელჩი, ლუ მეი და ახალგაზრდული ცენტრის დირექტორი, ნარგიზ ბაბაევი.

ღონისძიების ფარგლებში, ბაქოს ახალგაზრდული ცენტრის დირექტორმა, ნარგიზ ბაბაევმა, აზერბაიჯანის მხრიდან კონფუცის ინსტიტუტის დირექტორმა, რაფიკ აბასოვმა და ჩინეთის მხრიდან ინსტიტუტის დირექტორმა, ლი ჯიჰუამ თანამშრომლობის შესახებ შეთანხმებას მოაწერეს ხელი. შეთახნმება აზერბაიჯანისა და ჩინეთის ახალგაზრდებს შორის განათლების, კულტურისა და ენის კუთხით გაცვლის გაფართოებას, ერთობლივ პროექტებსა და პროგრამებს ითვალისწინებს.

ბაქოს სახელმწიფო უნივერსიტეტი ჩინეთის უნივერსიტეტებთან თანამშრომლობს

30 ოქტომბერი

ჩინეთის სახალხო რესპუბლიკის პეკინის ქიმიური ტექნოლოგიების უნივერსიტეტის დელეგაცია ბაქოს სახელმწიფო უნივერსიტეტს ეწვია.

შეხვედრაზე ორ საგანმანათლებლო დაწესებულებას შორის სამეცნიერო და აკადემიური თანამშრომლობის განვითარების პერსპექტივები განიხილეს.

ფიზიკის ინსტიტუტში პეკინის ქიმიური ტექნოლოგიების უნივერსიტეტთან თანამშრომლობის შესაძლებლობები განიხილეს

31 ოქტომბერი

აზერბაიჯანის მეცნიერებისა და განათლების სამინისტროს ფიზიკის ინსტიტუტსა და ჩინეთის პეკინის ქიმიური ტექნოლოგიების უნივერსიტეტს შორის, თანამშრომლობის პერსპექტივების განხილვის მიზნით, შეხვედრა გაიმართა.

შეხვედრაზე, მხარეებმა მეცნიერების, განათლებისა და ინოვაციების მიმართულებით ერთობლივი პროექტების განხორციელების, ორმხრივი გაცვლების განხოციელებისა და ახალგაზრდა მეცნიერებისთვის გაცვლითი პროგრამების შექმნის საკითხები განიხილეს.

აზერბაიჯანის სახელმწიფო ნავთობის ფონდის შეხვედრა CEEC International-თან

31 ოქტომბერი

აზერბაიჯანის სახელმწიფო ნავთობის ფონდის აღმასრულებელი დირექტორის მოადგილე, როვშან ჯავადოვი ჩინური კომპანიის, China Energy International Group Co., Ltd./“CEEC International”-ის წარმომადგენლებს შეხვდა.

მხარეებმა, 2025 წლის 8 სექტემბერს, აზერბაიჯანის სახელმწიფო ნავთობის ფონდსა და CEEC International-ს შორის ხელმოწერილი ურთიერთგაგების მემორანდუმის ფარგლებში, ორმხრივი თანამშრომლობის გაღრმავების, საინვესტიციო შესაძლებლობების განსაზღვრისა და თანამშრომლობის მექანიზმების შესახებ ისაუბრეს.

პეკინის უცხო ენების უნივერსიტეტი აზერბაიჯანში

1 ნოემბერი

პეკინის უცხო ენების უნივერსიტეტის პრორექტორმა, გაო ქანგინმა, აზერბაიჯანის სახელმწიფო საინფორმაციო სააგენტოსთან ინტერვიუში, ორი ქვეყნის უნივერსიტეტებს შორის თანამშრომლობის მიმდინარე დინამიკაზე ისაუბრა.

პრორექტორმა აღნიშნა, რომ მისი უნივერსიტეტის დელეგაციის აზერბაიჯანში ვიზიტი ქვეყნებს შორის განათლებისა და მეცნიერების მიმართულებით თანამშრომლობის ახალი ეტაპის დასაწყისია.

ვიზიტის ფარგლებში, პეკინის უცხო ენების უნივერსიტეტის დელეგაცია შეხვდა ბაქოს სახელმწიფო უნივერსიტეტის, აზერბაიჯანის მეცნიერებათა ეროვნული აკადემიის, აზერბაიჯანის სახელმწიფო ეკონომიკური უნივერსიტეტის, ჰეიდარ ალიევის ფონდის და ხაზარის უნივერსიტეტის წარმომადგენლებს. მეტიც, შეხვედრების ფარგლებში ურთიერთგაგების შესახებ მემორანდუმები გაფორმდა.

ვიზიტის ფარგლებში, ჩინური მხარის წარმომადგენლები ჰეიდარ ალიევის ფონდის ვიცე-პრეზიდენტს, ლეილა ალიევს, აღმასრულებელ დირექტორს, ანარ ალაქბაროვსა და აზერბაიჯანის მილი მეჯლისის (პარლამენტის) თავმჯდომარეს, საჰიბა ქაფაროვას შეხვდნენ. მხარეებს შორის ურთიერთგაგების მემორანდუმი გაფორმდა.

გარდა ამისა, პეკინის უცხო ენების უნივერსიტეტმა ურთიერთგაგების მემორანდუმები გააფორმა აზერბაიჯანის სახელმწიფო ეკონომიკურ უნივერსიტეტსა და აზერბაიჯანის მეცნიერებათა ეროვნულ აკადემიასთან.

სომხეთი

სომხეთში ჩინეთის ელჩი, ლი სინვეი ერევნის მერ ტიგრან ავინიანს შეხვდა

სომხეთში ჩინეთის ელჩ, ლი სინვეისა და ერევნის მერს, ტიგრან ავინიანს შორის შეხვედრა გაიმართა. ჩინეთის ელჩმა ყურადღება გაამახვილა ჩინეთის ქალაქებსა და ერევანს შორის ბოლო პერიოდში დამყარებულ კავშირებზე. მან აღნიშნა, რომ რეგიონათაშორისი თანამშრომლობა მნიშვნელოვან როლს ასრულებს ორმხრივ ურთიერთობებში. ელჩმა, ასევე, განაცხადა, რომ მხარეებს ვაჭრობის, ეკონომიკის, კულტურისა და ტურიზმის სფეროებში თანამშრომლობის გაღრმავება შეუძლიათ.

მერმა ავინიანმა, თავის მხრივ, გამოხატა მადლიერება, ჩინეთის მხარის მიერ ადგილობრივი მოსახლეობის კეთილდღეობის მხარდაჭერის გამო. მერმა ხაზი გაუსვა ურბანული მენეჯმენტის მოდერნიზაციის სფეროში ჩინეთის მიღწევებს. ავინიანმა, ასევე, აღნიშნა, რომ ჩინური გამოცდილების გაცნობა ხელს შეუწყობს ჩინეთისა და სომხეთის ქალაქებს შორის თანამშრომლობის გაღრმავებას და გააძლიერებს ორ ქვეყანას შორის ხალხთაშორის კავშირებზე დაფუძნებულ მეგობრობასაც.

ტაჯიკეთი

ტაჯიკურმა და ჩინურმა კომპანიებმა თანამშრომლობის მემორანდუმი გააფორმეს

დუშანბეში გაიმართა ავიაკომპანია „Somon Air“-ისა და ჩინური კომპანია Shanghai Haizhu Engineering & Design Group Co., Ltd. (HIZ)-ის წარმომადგენელთა შეხვედრა, რომლის შედეგადაც მხარეებმა თანამშრომლობის შესახებ მემორანდუმს მოაწერეს ხელი. მემორანდუმი მიზნად ისახავს ტაჯიკეთის საავიაციო ინფრასტრუქტურის განვითარებასა და მოდერნიზაციას.

მოლაპარაკებებისას მხარეებმა განიხილეს ქვეყნის აეროპორტების განვითარების პერსპექტივები. განსაკუთრებული ყურადღება დაეთმო საჰაერო ხომალდების ტექნიკური მომსახურებისათვის განკუთვნილი ჰანგარის პროექტირებისა და მშენებლობის საკითხს. მიღწეული შეთანხმების ფარგლებში იგეგმება პროექტის ტექნიკურ-ეკონომიკური დასაბუთების (Feasibility Study) მომზადება.

აღსანიშნავია, რომ 2001 წელს დაფუძნებული ჩინური კომპანია HIZ საავიაციო ინფრასტრუქტურის დიზაინისა და მშენებლობის სფეროში ჩინეთის ათ ყველაზე წამყვან კომპანიას შორისაა.

ჩინეთი სამხრეთ კავკასიასა და ტაჯიკეთში (27.10 – 02.11) Read More »

თაივანი უარყოფს პეკინის შეთავაზებას “ერთი ქვეყანა, ორი სისტემის” შესახებ

ერთი ახალი ამბავი / /

თაივანი არ აპირებს, მიიღოს ჩინეთის შეთავაზება „ერთი ქვეყანა, ორი სისტემის“ შესახებ და მზადაა, დაიცვას საკუთარი თავისუფლება და დემოკრატია – განაცხადა თაივანის პრეზიდენტმა ლაი ჩინგ-თემ 31 ოქტომბერს, რითაც მკაფიოდ უარყო პეკინის მიერ კუნძულის კონტროლქვეშ მოქცევის უახლესი მცდელობა.

ჩინეთმა ამ კვირაში აღნიშნა, რომ თაივანთან მიმართებით ძალის გამოყენებას „ბოლომდე არ გამორიცხავს.“ საგულისხმოა, რომ ეს განცხადება წინააღმდეგობაში მოდის წინა კვირების განმავლობაში სახელმწიფო მედიაში გამოქვეყნებულ მასალებთან, სადაც პეკინი თაივანს იმავე სახის „მშვიდობიან მმართველობას“ ჰპირდებოდა, რომელიც ჰონგ-კონგსა და მაკაუში მოქმედებს.

სწორედ ამ პოლიტიკურად ამბივალენტურ ვითარებას მოჰყვა თაივანის ქალაქ ჰუკოუში მდებარე სამხედრო ბაზაზე ჩინგ-თეს სიტყვით გამოსვლა, სადაც აღნიშნა, რომ ნამდვილი და გრძელვადიანი მშვიდობის გარანტორი მხოლოდ ძალა და თავდაცვითი მზადყოფნაა.

„ჩვენ ღირსეულად და მტკიცედ უნდა შევინარჩუნოთ სტატუს-კვო, მკაფიოდ უნდა დავუპირისპირდეთ ანექსიას, აგრესიასა და იძულებით გაერთიანებას“ – განაცხადა პრეზიდენტმა. მისივე თქმით, თაივანი 2030 წლისთვის სამხედრო ხარჯებს მშპ-ის 5%-მდე გაზრდის, რათა ჩინეთის მზარდი საფრთხის პირობებში თავდაცვა მაქსიმალურად გააძლიეროს. ამავე სტრატეგიის საარგუმენტაციოდ მან ხაზი გაუსვა, რომ „თაივანელი ხალხის მიერ სუვერენიტეტის დაცვა და დემოკრატიული ცხოვრების წესის შენარჩუნება პროვოკაციად არ უნდა შეფასდეს. ინვესტიცია ეროვნულ თავდაცვაში ნიშნავს ინვესტიციას მშვიდობაში.“ აღსანიშნავია, რომ ჩინეთის თაივანის საკითხთა ოფისს აღნიშნულ განცხადებებზე კომენტარი ჯერ არ გაუკეთებია.

საინტერესოა ისიც, რომ ჩინგ-თეს ჰუკოუში ვიზიტის მიზანი M1A2T Abrams ტიპის ტანკების ბატალიონის მიღების ცერემონიაზე დასწრება იყო, ხსენებული სამხედრო ტექნიკა კი ამერიკული კომპანია General Dynamics Land Systems-ის მიერაა წარმოებული. ამ ეტაპისთვის თაივანმა შეკვეთილი 108 ტანკიდან 80 ერთეული უკვე მიიღო, რაც  ადასტურებს, რომ ჩინეთ–აშშ-ის დაპირსპირებაში თაივანი კვლავაც  რჩება აქტუალურ საკითხად, რომელიც სცდება რეგიონულ საზღვრებს და გლობალურ მნიშვნელობას იძენს.

ამ კონტექსტში, ბუსანში გამართულ ჩინეთ-აშშ-ის სამიტზე თაივანის თემის სრული უგულებელყოფა მოხდა – სი ძინპინსა და დონალდ ტრამპს მასზე საჯაროდ არ უსაუბრიათ, რაც, შესაძლოა, დაძაბულობის დროებით შენელების მიზნით მხარეებს შორის პრაგმატული თანხმობის ფორმირებაზე მიუთითებდეს. თუმცა, იმ პირობებში, როცა ვაშინგტონი თაივანის სამხედრო აღჭურვას აგრელებს, ხოლო პეკინი ისევ არ გამორიცხავს ძალის გამოყენებას, ეს დიპლომატიური დუმილი სტრატეგიული პაუზა უფროა, ვიდრე რეალურ შერიგების ნიშანი.

თაივანი უარყოფს პეკინის შეთავაზებას “ერთი ქვეყანა, ორი სისტემის” შესახებ Read More »

ჩინეთი სამხრეთ კავკასიასა და უზბეკეთში (20-26 ოქტომბერი)

კვირის ამბავი / /
საქართველო
ჩინეთის მზარდი გავლენის სტრატეგიული ანალიზი: თბილისში აბრეშუმის გზის ფორუმი 2025 ჩატარდა

2025 წლის 22-23 ოქტომბერს, თბილისში მეხუთე საერთაშორისო აბრეშუმის გზის ფორუმი გაიმართა. ღონისძიება, რომელსაც 70-ზე მეტი ქვეყნის დელეგატი ესწრებოდა, მათ შორის გაეროს, აზიის განვითარების ბანკის (ADB) და სხვა მსხვილი საერთაშორისო ორგანიზაციების წარმომადგენლები, რეგიონული და გლობალური თანამშრომლობის კრიტიკულ ინსტრუმენტად არის მიჩნეული.

წლევანდელი ფორუმის მთავარი სლოგანი იყო „ინვესტიცია დაკავშირებადობაში – ზრდა სტაბილურობაში“ (Invest in Connectivity – Grow in Stability). „სტაბილურობაზე“ აქცენტირება მნიშვნელოვანი პოლიტიკური სტრატეგიაა, რადგან 2022 წელს რუსეთზე დაწესებულმა სანქციებმა მნიშვნელოვნად შეცვალა ევროპისა და ევრაზიის სატრანსპორტო სისტემები. შედეგად, გაიზარდა საქართველოს როლი ტრანსევრაზიულ ვაჭრობაში. ფორუმზე განიხილეს გლობალური ვაჭრობის, ტრანსპორტის, ციფრული ტექნოლოგიებისა და ინვესტიციების მიმართულებები.

ფორუმი ჩინეთ-საქართველოს ორმხრივი კავშირების მზარდი ტენდენციის გამოხატულებაა. 2015 წელს, სწორედ საქართველოსა და ჩინეთის მთავრობების ორგანიზებით, გაიმართა პირველი აბრეშუმის გზის ფორუმი. სწორედ ამ პერიოდში შეუერთდა საქართველო ჩინეთის “სარტყლისა და გზის” ინიციატივას (BRI).  

წელს აბრეშუმის გზის ფორუმზე ყოფილი ჩინელი მაღალჩინოსნის მონაწილეობამ, რეგიონული კავშირების გაძლიერების მიმართ პეკინის ინტერესი ცხადი გახადა. კერძოდ, ფორუმში მონაწილეობდა აზიის განვითარების ბანკის ვიცე-პრეზიდენტი ინგმინ იანგი, ჩინეთის ფინანსთა სამინისტროს ყოფილი მაღალჩინოსანი, რომელმაც შუა დერეფნის ეკონომიკურ პერსპექტივებზე პანელი გახსნა.

თბილისის აბრეშუმის გზის ფორუმი, მართალია, წარმატებით ამკვიდრებს საქართველოს ცენტრალურ მოთამაშედ, მაგრამ ზრდის მის დამოკიდებულებას ჩინეთზე. ექსპერტები აღნიშნავენ, რომ “ქართული ოცნების” მიერ არჩეული სტრატეგიული გზა, რომელიც 2023 წელს ჩინეთთან სტრატეგიული პარტნიორობასა და ანაკლიის პროექტის შესახებ მიღებულ გადაწყვეტილებაში აისახა, აჩვენებს, რომ მოკლევადიანი ფინანსური სარგებლის მისაღებად საქართველო უგულებელყოფს ევროატლანტიკური უსაფრთხოების გრძელვადიან პრიორიტეტებს.

22/23 ოქტომბერი

საქართველოს საგარეო საქმეთა მინისტრი ჩინეთის ელჩს შეხვდა

2025 წლის 24 ოქტომბერს საქართველოს საგარეო საქმეთა მინისტრი მაკა ბოჭორიშვილი შეხვდა ჩინეთის სახალხო რესპუბლიკის ელჩს, ჭოუ ციენს. შეხვედრაზე მხარეებმა განიხილეს საქართველო–ჩინეთის ორმხრივი თანამშრომლობის საკითხი. განსაკუთრებული ყურადღება გამახვილდა:

  • უვიზო მიმოსვლისა და პირდაპირი ავიამიმოსვლის მნიშვნელობაზე;
  • საქართველოს მონაწილეობაზე ჩინეთის რიგით მე-8 საერთაშორისო იმპორტის გამოფენაში, რომელიც გაიმართება 5-10 ნოემბერს. აღინიშნა, რომ ეს პლატფორმა ხელს უწყობს ქართველი ექსპორტიორების აქტიურობას ჩინეთის ბაზარზე. აღსანიშნავია, რომ 2018 წლიდან გამოფენაში მონაწილეობდა 120-ზე მეტი კომპანია, მიმდინარე წელს კი 40-ზე მეტი წამყვანი ქართული კომპანია სამ პავილიონში იქნება წარმოდგენილი.
  • შუა დერეფნის პროექტისა და „ერთი სარტყელი, ერთი გზა“ ინიციატივის ფარგლებში, თანამშრომლობის გაძლიერების მნიშვნელობა, რეგიონული და გლობალური მშვიდობის, სტაბილურობისა და პროგრესის უზრუნველყოფის თვალსაზრისით.
  • ორმხრივი თანამშრომლობა სამოქალაქო ავიაციისა და ტურიზმის სფეროებში, ახალი მიმართულებების დანიშვნისა და ფრენების სიხშირეების ზრდის მნიშვნელობა.

აღნიშნულ შეხვედრაზე გამოიკვეთა, რომ მხარეები მზად არიან გააღრმავონ სტრატეგიული პარტნიორობა, ხელი შეუწყონ ეკონომიკური აქტივობების განვითარებას. ასევე, მხარეებმა განიხილეს ეკონომიკის, ტურიზმის, განათლებისა და კულტურის სფეროებში თანამშრომლობის გაღრმავების საკითხები. 

24 ოქტომბერი

ჩინეთის ელჩმა თენგიზ მალანიას ფილმში საქართველოს გლობალურ როლზე ისაუბრა

2025 წლის 27 ოქტომბერს, ჩინეთის ელჩმა საქართველოში, ჭოუ ციენმა, მონაწილეობა მიიღო ქართველი რეჟისორის, თენგიზ მალანიას, დოკუმენტური ფილმის, „კულტურა იხსნის მსოფლიოს“ 《文化拯救世界》– ჩაწერაში.

დოკუმენტური ფილმი „კულტურა იხსნის მსოფლიოს“, რომელიც საქართველოს კულტურის სამინისტროსა და კინოაკადემიის მხარდაჭერით იქმნება, მიზნად ისახავს რეგიონული და გლობალური მშვიდობის ხელშეწყობაში საქართველოს როლის წარმოჩენას.

ელჩის თქმით, აბრეშუმის გზის საფუძველია მშვიდობიანი თანამშრომლობა, ღიაობა და ორმხრივი სარგებელი. ეს გზა არა მხოლოდ ეკონომიკური დერეფანია, არამედ მეგობრობისა და კულტურული გაცვლის ხიდი.

ელჩმა ყურადღება გაამახვილა თავმჯდომარე სი ძინფინის გლობალურ ცივილიზაციურ ინიციატივაზე, რომელიც მოუწოდებს მსოფლიო ცივილიზაციების მრავალფეროვნების პატივისცემისკენ, თანასწორობისა და დიალოგისკენ. ჭოუ ციენის განმარტებით, აბრეშუმის გზა სწორედ ამ პრინციპების პრაქტიკული გამოხატულებაა.

27 ოქტომბერი

ჩინეთის ელჩის ვიზიტი კავკასიის უნივერსიტეტში

23 ოქტომბერს, კავკასიის უნივერსიტეტს ესტუმრა ჩინეთის სახალხო რესპუბლიკის ელჩი, ჭოუ ციენი. ელჩი შეხვდა უნივერსიტეტის პრეზიდენტ კახა შენგელიას, ინტერნაციონალიზაციის ვიცე-პრეზიდენტ ირენა მელუას და საერთაშორისო ურთიერთობების დეპარტამენტის დირექტორ ქეთევან კარბაიას.

შეხვედრის ფარგლებში განხილული იქნა კავკასიის უნივერსიტეტსა და ჩინეთის უმაღლეს საგანმანათლებლო დაწესებულებებს შორის არსებული თანამშორომლობა: სტუდენტური გაცვლითი პროგრამები, მოკლევადიანი პროგრამები როგორც ქართველი, ისე ჩინელი სტუდენტებისთვის და ერთობლივი კვლევითი პროექტები. 

აღსანიშნავია, რომ კავკასიის უნივერსიტეტი აქტიურად თანამშრომლობს ჩინეთთან, მათ შორის სიჩუანის ტურიზმის უნივერსიტეტთან 2020 წელს გაფორმებული მემორანდუმის ფარგლებში. შეთანხმება სტუდენტთა და ლექტორთა გაცვლით პროგრამებს და ორმაგი ხარისხის პროგრამებს ითვალისწინებს. ასევე, წინა წელს, კავკასიის უნივერსიტეტის სტუდენტებს საშუალება მიეცათ მონაწილეობა მიიღონ ჩინეთის სიას უნივერსიტეტის საერთაშორისო საზაფხულო ბანაკში. 

კავკასიის უნივერსიტეტი არა მხოლოდ აძლიერებს აკადემიურ კავშირებს ჩინეთის წამყვან უნივერსიტეტებთან, არამედ უზრუნველყოფს სტუდენტებისა და ლექტორებისთვის საერთაშორისო გამოცდილებისა და კულტურული გაცვლის ფართო შესაძლებლობებს.

23 ოქტომბერი

საქართველოს ელჩი პაატა კალანდაძე Lanting Forum-ის ღონისძიებას დაესწრო

2025 წლის 27 ოქტომბერს საქართველოს ელჩი პაატა კალანდაძე დაესწრო „Lanting Forum“-ის მიერ ორგანიზებულ შეხვედრას გლობალური მმართველობის გაუმჯობესების საკითხებზე. ღონისძიებაზე სიტყვით გამოვიდა ჩინეთის საგარეო საქმეთა მინისტრი ვანგ ი. მან წარმოადგინა ჩინეთის პრეზიდენტ სი ძინფინის Global Governance Initiative (GGI), რომელიც მან 2025 წლის სექტემბერში წარადგინა, შანხაის თანამშრომლობის ორგანიზაციის (SCO) შეხვედრაზე.

GGI ინიციატივის ხუთი ძირითადი კონცეფციაა: სუვერენული თანასწორობის დაცვა, საერთაშორისო სამართლის უზენაესობის დაცვა, მულტილატერალიზმის პრინციპი, ხალხზე ორიენტირებული მიდგომა და მოქმედებაზე ორიენტირება.

„Lanting Forum“ კი წარმოადგენს კომუნიკაციის პლატფორმას, რომელიც შექმნილია ჩინეთის საგარეო საქმეთა სამინისტროს ინიციატივით და მიზნად ისახავს მთავრობის, ბიზნესის, აკადემიური წრეებისა და მედიის წარმომადგენლებს შორის დისკუსიების წახალისებას საგარეო პოლიტიკის საკითხებზე.

 „Lanting Forum“–ზე ვანგ ი-მ აღნიშნა, რომ GGI, ანუ გლობალური მმართველობის ინიციატივა, ეფუძნება გაეროს ქარტიის მიზნებსა და პრინციპებს, ასახავს ჩინური დიპლომატიის ტრადიციებს, საერთო მომავლის ხედვას, და წარმოადგენს გზას გლობალური მმართველობის რეფორმისთვის. 

27 ოქტომბერი

შოთა რუსთაველის უნივერსიტეტი ჩინეთის ორ საერთაშორისო თეატრალურ ფესტივალზე

2025 წლის ოქტომბერში, საქართველოს შოთა რუსთაველის თეატრისა და კინოს სახელმწიფო უნივერსიტეტის დასი მონაწილეობდა ორ მნიშვნელოვან თეატრალურ ფესტივალში ჩინეთში. 20-22 ოქტომბერს პეკინში, მსოფლიო თეატრალური განათლების ეგიდით (WTEA), „2025 წლის საერთაშორისო თეატრალური ფესტივალი“ გაიმართა. უნივერსიტეტი მაყურებლის წინაშე წარდგა სპექტაკლით – „სიყვარულის მსუბუქი ფრთებით“.

ფესტივალების ფარგლებში, საქართველოს ელჩი პაატა კალანდაძე შეხვდა ჩინეთის ცენტრალური დრამის აკადემიის ვიცე პრეზიდენტ სიუ ჭენს, რექტორ გიორგი შალუტაშვილს და უნივერსიტეტის პედაგოგ ნიკა საბაშვილს. შეხვედრაზე მხარეებმა განიხილეს სამომავლო თანამშრომლობის გაღრმავების საკითხი. 

მსოფლიო თეატრალური განათლების ალიანსი (WTEA), რომელიც დაარსდა 2016 წელს, აერთიანებს წამყვან თეატრალურ სკოლებს და მიზნად ისახავს განათლებისა და გამოცდილების გაცვლის ხელშეწყობას. როგორც ალიანსის ერთ-ერთი დამფუძნებელი წევრი, შოთა რუსთაველის უნივერსიტეტი მეოთხედ იღებს მონაწილეობას ფესტივალში.

გარდა პეკინის ფესტივალისა, 2025 წლის 24 ოქტომბრიდან 2 ნოემბრამდე, ქართული დასი მონაწილეობას მიიღებს კიდევ ერთ მნიშვნელოვან ჩინურ თეატრალურ ღონისძიებაში, „კუილინის ფესტივალში“.

23 ოქტომბერი

აზერბაიჯანი

ჩინეთის საინფორმაციო სააგენტო „სინხუას“ ინტერვიუ აზერბაიჯანის სურსათის უვნებლობის სააგენტოს დირექტორთან

აზერბაიჯანის სურსათის უვნებლობის სააგენტოს დირექტორმა, აქბარ ალიევმა, ჩინეთის საინფორმაციო სააგენტო „სინხუასთან“ ინტერვიუში სააგენტოს დელეგაციის ჩინეთში ვიზიტის შედეგებზე ისაუბრა.

აქბარ ალიევმა ინტერვიუში აღნიშნა, რომ წელს აზერბაიჯანის რესპუბლიკის პრეზიდენტის, ილჰამ ალიევის ჩინეთში ვიზიტმა ორმხრივ ურთიერთობებს მნიშვნელოვნად შეუწყო ხელი. მისი თქმით, სწორედ ქვეყნებს შორის თანამშრომლობის ფარგლებში დაიწყო აზერბაიჯანული თხილის ექსპორტი „მსოფლიოს ერთ-ერთ ყველაზე დიდ ბაზარზე“, ჩინეთში.

ალიევმა ყურადღება გაამახვილა აზერბაიჯანის სურსათის უვნებლობის სააგენტოსა და შესაბამის ჩინურ უწყებას შორის, ჩინეთში თხილისა და ნუშის ექსპორტის შესახებ ხელმოწერილ ოქმზე. ამავდროულად, მან აღნიშნა, რომ ჩინეთში რიგი პროდუქტების, მათ შორის, ქათმის, ვაშლისა და კენკრის ექსპორტის გაფართოების მიზნით, ჩინურ მხარესთან დიალოგი გრძელდება.

20 ოქტომბერი

აზერბაიჯანის მეტროლოგიის ინსტიტუტის დელეგაცია ჩინეთში

აზერბაიჯანის ანტიმონოპოლიის და სამომხმარებლო ბაზრის კონტროლის სახელმწიფო სააგენტოს დაქვემდებარებაში არსებული მეტროლოგიის ინსტიტუტის წარმომადგენლები, სამუშაო ვიზიტით, ჩინეთს ეწვივნენ.

ვიზიტის ფარგლებში, აზერბაიჯანის დელეგაცია ჩინეთის მეტროლოგიის ინსტიტუტის ხელმძღვანელობას შეხვდა. შეხვედრის ფარგლებში, მხარეებმა ისაუბრეს აზერბაიჯანის მეტროლოგიის ინსტიტუტის სამუშაო მიმართულებებსა და განხორციელებულ პროექტებზე. ასევე, ინსტიტუტებმა განიხილეს „სტანდარტული სანიმუშო მატერიალების“ (Standard Reference Materials) სფეროში თანამშრომლობის შესაძლებლობები.

ამავდროულად, მხარეებმა განიხილეს ერთობლივი სამეცნიერო-კვლევითი და ტექნიკური პროექტების განხორციელების, სპეციალისტების გადამზადებისა და ტრენინგების ორგანიზების კუთხით თანამშრომლობის პერსპექტივები. 

20 ოქტომბერი

აზერბაიჯანის სახელმწიფო ფილარმონია შანხაის საერთაშორისო ფესტივალზე

აზერბაიჯანის სახელმწიფო საინფორმაციო სააგენტოს მიერ გავრცელებული ინფორმაციის მიხედვით, აზერბაიჯანის სახელმწიფო აკადემიური ფილარმონიის წარმომადგენლები, ბაქოს სახელმწიფო ორკესტრის თანხლებით, შანხაის 24-ე საერთაშორისო ხელოვნების ფესტივალში მონაწილეობდნენ. სააგენტოს ინფორმაციით, ორკესტრის მუსიკალურმა წარმოდგენამ აუდიტორიის მხრიდან დიდი მოწონება დაიმსახურა.

21 ოქტომბერი

ჩინეთის დისტანციური ზონდირებისა და ციფრული მიწის ინსტიტუტი აზერბაიჯანში

21 ოქტომბერს, ჩინეთის მეცნიერებათა აკადემიის დისტანციური ზონდირებისა და ციფრული დედამიწის ინსტიტუტის თავმჯდომარის მოადგილე, ლი რენინგი, აზერბაიჯანის მეცნიერებათა ეროვნული აკადემიის სეისმოლოგიური მომსახურების ცენტრს ეწვია.

ლი რენინგმა სეისმოლოგიური კვლევების სფეროში თანამშრომლობის მხრივ ინტერესი გამოხატა. ჩინეთის დელეგაციის წარმომადგენელმა მხარეებს შორის ორმხრივი თანამშრომლობის შესახებ მემორანდუმის გაფორმების ინიციატივა წამოაყენა და აღნიშნა: „ვიმედოვნებ, რომ მსგავსი დოკუმენტის ხელმოწერას, ჩვენი ორმხრივი თანამშრომლობის მჭიდრო განვითარებაში, დადებითი შედეგები ექნება.“

21 ოქტომბერი

ბაქოს საინჟინრო უნივერსიტეტი ჩინეთის სამიტზე

ბაქოს საინჟინრო უნივერსიტეტის საერთაშორისო ურთიერთობების მიმართულებით პრორექტორი, ათრაბა გიულმა მონაწილეობა მიიღო „უნივერსიტეტის პარტნიორების სამიტი ხანგჭოუ 2025“-ში, რომელიც ჩინეთის სახალხო რესპუბლიკაში ჩატარდა.

სამიტი ჩინეთის ბეიჰანგის უნივერსიტეტის (Beihang University) მიერ დაორგანიზდა და მიზნად ისახავდა უნივერსიტეტებს შორის თანამშრომლობის გაძლიერებას.

ბაქოს საინჟინრო უნივერსიტეტის პრორექტორმა, სამიტის ფარგლებში, ჩინეთში პარტნიორი უნივერსიტეტების წარმომადგენლებს შეხვდა და მრგვალ მაგიდებში მიიღო მონაწილეობა. შეხვედრებზე განიხილეს თანამშრომლობის პოტენციური პერსპექტივები, მათ შორის, მასწავლებელ-მოსწავლეთა გაცვლის მექანიზმები, ორმაგი სადიპლომო პროგრამების შექმნა, ერთობლივი სამეცნიერო-კვლევითი და ინოვაციური პროექტების განხორციელება და სხვა.

22 ოქტომბერი

ჩინეთთან ეკონომიკური ურთიერთობის გაძლიერების შესახებ შეხვედრა გაიმართა

ჩინეთის საერთაშორისო ვაჭრობის საბჭოს შაანსის პროვინციის კომიტეტის წარმომადგენლები, ოფიციალური ვიზიტით, აზერბაიჯანს ეწვივნენ. ვიზიტის ფარგლებში, დელეგაციასა და აზერბაიჯანის ექსპორტისა და ინვესტიციების ხელშეწყობის სააგენტოს შორის „ჩინეთის შაანსის პროვინციასთან აზერბაიჯანის ეკონომიკური და სავაჭრო თანამშრომლობის“ შესახებ მრგვალი მაგიდა გაიმართა.

შეხვედრაზე სააგენტოს აღმასრულებელი დირექტორის მოადგილემ, თურალ ჰაჯილიმ აზერბაიჯან-ჩინეთის თანამშრომლობის დინამიკაზე, აზერბაიჯანში ჩინური კომპანიების საინვესტიციო პროექტებსა და აზერბაიჯან-ჩინეთის სავაჭრო კავშირებზე ისაუბრა. თავის მხრივ, შაანსის პროვინციის კომიტეტის პარტიის მდივანმა, ვანგ ხონგვეიმ აღნიშნა, რომ ორმხრივი სავაჭრო-საინვესტიციო თანამშრომლობის გაფართოების მნიშვნელოვანი პოტენციალი არსებობს.

მრგვალი მაგიდის ფარგლებში, ჩინურმა კომპანიებმა პრეზენტაციები წარადგინეს. შეხვედრის დასასრულს, მხარეებმა სამომავლო თანამშრომლობის შესაძლებლობები განიხილეს.

23 ოქტომბერი

შეხვედრა აზერბაიჯანელ სტუდენტებთან, რომლებიც ჩინეთში აგრძელებენ სწავლას

ბაქოს საინჟინრო უნივერსიტეტსა და პეკინის ქიმიური ტექნოლოგიების უნივერსიტეტს შორის, ორმაგი სადიპლომო პროგრამის ფარგლებში, აზერბაიჯანიდან სტუდენტთა პირველი ნაკადი ჩინეთში აგრძელებს სწავლას.

გასულ კვირას, ხსენებულ აზერბაიჯანელ სტუდენტებთან პეკინში გაიმართა შეხვედრა, რომლის ფარგლებშიც, განხილულ იქნა სასწავლო პროცესი, სტუდენტების აკადემიური მიღწევები და სოციალურ გარემოსთან ადაპტაციის საკითხები.

საყურადღებოა, რომ ბაქოს საინჟინრო უნივერსიტეტისა და პეკინის ქიმიური ტექნოლოგიების უნივერსიტეტის ორმაგი სადიპლომო პროგრამა, აზერბაიჯანისა და ჩინეთის უნივერსიტეტებს შორის, ბაკალავრიატის დონეზე შექმნილი პირველი ორმაგი სადიპლომო პროგრამაა. პროგრამის ფარგლებში, სტუდენტები ორივე უნივერსიტეტში მიიღებენ განათლებას და მოიპოვებენ ორმაგ დიპლომს. პროგრამა მოიცავს ქიმიის, კომპიუტერული და მექანიკური ინჟინერიის სპეციალობებს. აზერბაიჯანის სახელმწიფო საინფორმაციო სააგენტოს ინფორმაციით, მომავალ წლებში, პროგრამაზე მისაღები ადგილების რაოდენობის გაზრდა იგეგმება.

24 ოქტომბერი

სომხეთი

სომხეთის ელჩი შანხაის თანამშრომლობის ორგანიზაციის ფორუმზე

24 ოქტომბერს, სომხეთში ჩინეთის ელჩმა, ვაჰე გევორგიანმა მონაწილეობა მიიღო პეკინში გამართულ ჩინეთ-შანხაის თანამშრომლობის ორგანიზაციის საინვესტიციო თანამშრომლობის ფორუმში. ფორუმი დაორგანიზდა შანხაის თანამშრომლობის ორგანიზაციის (SCO) და ჩინეთის საერთაშორისო განვითარების ასოციაციის (CODA) მიერ.

„ელჩების დიალოგის“ პანელზე, სომხეთის ელჩმა ისაუბრა სომხეთის ეკონომიკურ და საინვესტიციო ლანდშაფტზე. ელჩმა ყურადღება გაამახვილა ქვეყანაში მიმდინარე ბიზნეს რეფორმებსა და კვალიფიცირებულ ადამიანურ რესურსებზე. გევორგიანმა პოტენციური თანამშრომლობის დარგებს შორის ახსენა მაღალი ტექნოლოგიების ინდუსტრიები, განახლებადი ენერგია, სოფლის მეურნეობა, ტურიზმი და სატრანსპორტო სექტორი.

ელჩმა აღნიშნა, რომ ჩინეთ-SCO-ს მსგავს პლატფორმებში სომხეთის მონაწილეობა ადასტურებს ოფიციალური ერევანის პოლიტიკას, რომელიც ითვალისწინებს ეკონომიკურ დივერსიფიკაციასა და დიპლომატიას. კერძოდ, ქვეყანა აზიის ეკონომიკებთან ეკონომიკური კავშირების პარალელურად, ინარჩუნებს კავშირებს დასავლეთსა და სამხრეთ კავკასიის რეგიონში პარტნიორებთან.

აღსანიშნავია, რომ ფორუმამდე, ჩინურ მედიასთან, CGTN-თან ინტერვიუში განაცხადა, რომ ერევანსა და ჩინეთს შორის ურთიერთობები ურთიერთნდობას ეფუძნება და ქვეყნებს შორის თანამშრომლობას „ლიმიტი“ არ აქვს.

24 ოქტომბერი

უზბეკეთი
უზბეკეთმა ჩინეთში 629.8 მილიონი დოლარის ღირებულების გაზი გაიტანა

უზბეკეთმა მიმდინარე წლის იანვარ-სექტემბერში ჩინეთში მილსადენით დაახლოებით 629.8 მილიონი დოლარის ღირებულების ბუნებრივი აირი გაიტანა. ჩინეთში გაზის უმსხვილესი იმპორტიორი (7.29 მილიარდი დოლარის ღირებულების იმპორტით) რუსეთი გახდა. თურქმენეთი, რომელიც მრავალი წლის განმავლობაში პირველ ადგილს იკავებდა, ახლა მეორე ადგილზეა. მის მიერ ჩინეთში მილსადენით მიწოდებული გაზის მოცულობა 2025 წლის პირველ ცხრა თვეში 12.7%-ით შემცირდა და 6.46 მილიარდი დოლარი შეადგინა.

ჩინეთის მთავარი საბაჟო სამმართველოს საერთო სტატისტიკა აჩვენებს, რომ 2024 წელს ჩინეთმა $21.1 მილიარდის ღირებულების გაზი შემოიტანა, რაც, 2023 წელთან შედარებით, 8.6%-ით მეტია.

20 ოქტომბერი

უზბეკმა სტუდენტებმა მონაწილეობა მიიღეს ჩინეთის საგანმანათლებლო პროგრამაში

უზბეკეთში ოფიციალურად დაიწყო საგანმანათლებლო ინიციატივის, Seeds for the Future-ის ახალი ეტაპი, რომელიც მიზნად ისახავს ციფრული ტექნოლოგიებით დაინტერესებული ნიჭიერი სტუდენტების მხარდაჭერას. პროექტის საერთაშორისო ფაზა ჩინეთში გაიმართება.

ციფრული განათლების განვითარების ცენტრის დირექტორმა, აზამატ ეშონკულოვმა, სიტყვით გამოსვლისას აღნიშნა, რომ ჩინეთის ციფრული ეკონომიკის სწრაფი განვითარება ქმნის კვალიფიციური IT-სპეციალისტების მზარდ მოთხოვნას.

„უზბეკეთში ციფრული ეკონომიკა დინამიკურად ვითარდება, რაც ზრდის კვალიფიციური კადრების საჭიროებას. სასიხარულოა, რომ ჩვენი სტუდენტების განათლების დონე უმჯობესდება და მათი დაინტერესება ციფრული ტექნოლოგიებით იზრდება — მათ შორის გლობალური ინიციატივების, როგორიცაა Seeds for the Future, მეშვეობით,“ — აღნიშნა მან.

პროგრამა, რომელიც 2008 წლიდან ჩინური კომპანია Huawei Technologies Co., Ltd.-ის მიერ ხორციელდება, უკვე მოიცავს 142 ქვეყნის 19,000-ზე მეტ სტუდენტს და თანამშრომლობს 500-ზე მეტ უნივერსიტეტთან მთელ მსოფლიოში.

წელს პროგრამის ფარგლებში უზბეკეთის ექვსი უნივერსიტეტის ათი სტუდენტი მიიწვიეს ჩინეთში გამართულ საერთაშორისო საგანმანათლებლო სემინარზე, რომელიც ჩატარდა 19-25 ოქტომბერს. ერთკვირიან პროგრამაში მონაწილეობა მიიღო 19 ქვეყნის 150 სტუდენტმა, რომლებიც მუშაობენ ისეთ თანამედროვე დისციპლინებზე, როგორიცაა ხელოვნური ინტელექტი, 5G კომუნიკაციები და სხვა ინოვაციური IT-მიმართულებები.

25 ოქტომბერი

უზბეკეთში ჩინურ კომპანიასთან თანამშრომლობით ჰიდროელექტროსადგურის მშენებლობა იგეგმება

ანდიჯანის რეგიონში, ჩინურ კომპანია Sichuan Power Transmission & Transformation Construction-თან პარტნიორობით, 200 მეგავატიანი ჰიდროელექტროსადგურის მშენებლობაა დაგეგმილი. მხარეებმა მოილაპარაკეს 500 მილიონი დოლარის ინვესტიციის პროექტის განხორციელებაზე, რომელიც მოიცავს როგორც ახალი სადგურის აშენებას, ასევე არსებული ქვესადგურების მოდერნიზაციას.

შეთანხმება მიღწეულია ანდიჯანის რეგიონის დელეგაციის ჩინეთში ოფიციალური ვიზიტის ფარგლებში. უზბეკური მხარის წარმომადგენლები შეხვდნენ ხსენებული ჩინური კომპანიის ხელმძღვანელობას. მოგვიანებით, ანდიჯანის რეგიონულმა ადმინისტრაციამ აღნიშნა, რომ ჩინურ მხარესთან შეთანხმებული პროექტი ენერგეტიკის სექტორში ორმხრივ თანამშრომლობას გააძლიერებს და რეგიონში განახლებადი ენერგიის წყაროების განვითარებას შეუწყობს ხელს.

აღსანიშნავია, რომ კომპანია Sichuan Power Transmission & Transformation Construction ოპერირებს ელექტროენერგეტიკული ინფრასტრუქტურისა და ელექტროენერგიის გადაცემის სისტემების მშენებლობის დარგში.

26 ოქტომბერი

ჩინეთი სამხრეთ კავკასიასა და უზბეკეთში (20-26 ოქტომბერი) Read More »

Scroll to Top